IL-KUMITAT KONĠUNT TAŻ-ŻEE,

Wara li kkunsidra l-Ftehim dwar iż-Żona Ekonomika Ewropea (“il-Ftehim dwar iż-ŻEE”), u b’mod partikolari l-Artikolu 98 tiegħu,

Billi:

(1)	Id-Direttiva (UE) 2019/1151 tal-Parlament Ewropew u tal-Kunsill tal-20 ta’ Ġunju 2019 li temenda d-Direttiva (UE) 2017/1132 fir-rigward tal-użu ta’ għodod u proċessi diġitali fil-liġi dwar il-kumpaniji (1) għandha tiġi inkorporata fil-Ftehim dwar iż-ŻEE.

(2)	Jenħtieġ għalhekk, li l-Anness XXII tal-Ftehim dwar iż-ŻEE jiġi emendat skont dan,

ADOTTA DIN ID-DEĊIŻJONI:

Artikolu 1

Il-punt 1 (id-Direttiva (UE) 2017/1132 tal-Parlament Ewropew u tal-Kunsill) tal-Anness XXII tal-Ftehim dwar iż-ŻEE għandu jiġi emendat kif ġej:

Jiżdied dan li ġej:

“, kif emendat minn:

—	32019 L 1151: Id-Direttiva (UE) 2019/1151 tal-Parlament Ewropew u tal-Kunsill tal-20 ta’ Ġunju 2019 (ĠU L 186, 11.7.2019, p. 80).”

L-adattamenti li ġejjin jiddaħħlu wara l-adattament (c):

“(d)	Fir-rigward tal-Istati tal-EFTA, l-Artikoli 13i, 13j(2) u 16(6) għandhom japplikaw fi żmien sentejn mid-data tad-dħul fis-seħħ tad-Deċiżjoni tal-Kumitat Konġunt taż-ŻEE Nru 270/2022 tat-23 ta’ Settembru 2022.

(e)

L-Istati tal-EFTA li jiltaqgħu ma’ diffikultajiet partikolari fit-traspożizzjoni tad-Direttiva (UE) 2019/1151 għandhom ikunu intitolati li jdewmu l-applikazzjoni tad-Direttiva sa sena wara d-data tad-dħul fis-seħħ tad-Deċiżjoni tal-Kumitat Konġunt taż-ŻEE Nru 270/2022 tat-23 ta’ Settembru 2022. Huma għandhom jipprovdu raġunijiet oġġettivi għall-ħtieġa ta’ estensjoni bħal din. L-Istati tal-EFTA għandhom jinnotifikaw lill-Awtorità ta’ Sorveljanza tal-EFTA bl-intenzjoni tagħhom li jagħmlu użu minn tali estensjoni sal-jum wara d-data tad-dħul fis-seħħ tad-Deċiżjoni tal-Kumitat Konġunt taż-ŻEE Nru 270/2022 tat-23 ta’ Settembru 2022.”

Artikolu 2

It-test tad-Direttiva (UE) Nru 2019/1151 bil-lingwa Iżlandiża u b’dik Norveġiża, li għandu jiġi ppubblikat fis-Suppliment taż-ŻEE ta’ Il-Ġurnal Uffiċjali tal-Unjoni Ewropea, għandu jkun awtentiku.

Artikolu 3

Din id-Deċiżjoni għandha tidħol fis-seħħ fl-24 ta’ Settembru 2022, dment li jkunu saru n-notifiki kollha skont l-Artikolu 103(1) tal-Ftehim dwar iż-ŻEE (*).

Artikolu 4

Din id-Deċiżjoni għandha tiġi ppubblikata fit-Taqsima taż-ŻEE, u fis-Suppliment taż-ŻEE, ta’ Il-Ġurnal Uffiċjali tal-Unjoni Ewropea.