Artikolu 1

Għall-iskopijiet ta’ dan il-Ftehim:

(a)	“Parti Kontraenti” tfisser parti kontraenti għal dan il-Ftehim;

(b)	“Stat Membru” tfisser Stat Membru tal-Unjoni Ewropea; u

(c)	“parti” tfisser parti kontraenti għall-ftehim rilevanti bejn Stat Membru u l-Ġappun għas-servizzi tal-ajru elenkati fl-Anness I.

Artikolu 2

1. Id-dispożizzjonijiet fil-paragrafu 2 ta’ dan l-Artikolu għandhom japplikaw minflok id-dispożizzjonijiet korrispondenti elenkati fl-Anness II-A.

(a)

Kull parti tirriżerva d-dritt li żżomm jew tirrevoka l-privileġġi, id-drittijiet jew l-awtorizzazzjoni speċifikati fid-dispożizzjonijiet korrispondenti elenkati fl-Anness II-B fir-rigward ta’ linja tal-ajru ddeżinjata mill-parti l-oħra, jew li timponi dawk il-kundizzjonijiet li hija tqis meħtieġa fuq l-eżerċizzju mil-linja tal-ajru tal-privileġġi jew tad-drittijiet, jew fuq l-awtorizzazzjoni, fi kwalunkwe każ fejn tiġi ssodisfata waħda mill-kundizzjonijiet li ġejjin:

(i)

fil-każ ta’ linja tal-ajru ddeżinjata mill-parti li hija Stat Membru:

(A)	il-linja tal-ajru ma tkunx stabbilita fit-territorju ta’ dik il-parti jew ma jkollhiex liċenzja operattiva valida maħruġa minn Stat Membru f’konformità mad-dritt tal-Unjoni Ewropea;

(B)	il-kontroll regolatorju effettiv tal-linja tal-ajru ma jiġix eżerċitat jew ma jinżammx mill-Istat Membru responsabbli għall-ħruġ taċ-ċertifikat tal-operatur tal-ajru tiegħu, jew l-awtorità ajrunawtika rilevanti ma tiġix identifikata b’mod ċar fid-deżinjazzjoni;

(C)	is-sjieda maġġoritarja u l-kontroll effettiv tal-linja tal-ajru ma jkunux f’idejn l-Istati Membri jew l-Istati elenkati fl-Anness III, jew f’idejn iċ-ċittadini ta’ tali Stati;

(D)	il-linja tal-ajru ma jkollhiex il-post prinċipali tan-negozju tagħha fit-territorju tal-Istat Membru li mingħandu tkun irċeviet il-liċenzja operattiva tagħha;

(E)

il-linja tal-ajru tkun ingħatat permess operattiv skont ftehim bejn Stat Membru ieħor u l-Ġappun għal servizzi tal-ajru, u l-Ġappun jista’ juri li jkun qed jevita r-restrizzjonijiet fuq ir-rotot u l-kapaċità skont dak il-ftehim jekk jopera s-servizzi miftiehma skont il-ftehim bejn dik il-parti u l-Ġappun fuq rotta li tinkludi punt f’dak l-Istat Membru l-ieħor; jew

(F)

il-linja tal-ajru jkollha ċertifikat ta’ operatur tal-ajru maħruġ minn Stat Membru u ma jkun hemm l-ebda ftehim bejn dak l-Istat Membru u l-Ġappun għal servizzi tal-ajru u dak l-Istat Membru ma jkunx ta l-kunsens tiegħu għall-operat ta’ servizzi tal-ajru internazzjonali minn linja tal-ajru tal-Ġappun bejn dak l-Istat Membru u l-Ġappun; u

(ii)	fil-każ ta’ linja tal-ajru ddeżinjata mill-Ġappun, is-sjieda sostanzjali u l-kontroll effettiv tal-linja tal-ajru ma jkunux f’idejn il-Ġappun jew iċ-ċittadini tal-Ġappun.

(b)

Fl-eżerċizzju tad-dritt tiegħu skont dan il-paragrafu, u mingħajr preġudizzju għad-drittijiet tiegħu skont is-subparagrafi (a)(i)(E) u (F) ta’ dan il-paragrafu, il-Ġappun ma għandux jiddiskrimina bejn linji tal-ajru ddeżinjati mill-parti li hija Stat Membru, li s-sjieda maġġoritarja u l-kontroll effettiv tagħhom huma f’idejn l-Istati Membri jew l-Istati elenkati fl-Anness III, jew f’idejn iċ-ċittadini ta’ tali Stati, abbażi tas-sjieda u l-kontroll tagħhom.

Artikolu 3

1. Ir-referenzi f’kull ftehim elenkat fl-Anness I għal-linji tal-ajru tal-Istat Membru li jkun parti għal dak il-ftehim għandhom jinftiehmu bħala referenzi għal-linji tal-ajru ddeżinjati minn dak l-Istat Membru.

2. Minbarra l-paragrafu 1 ta’ dan l-Artikolu, ir-referenza f’kull waħda mid-dispożizzjonijiet elenkati fl-Anness IV tal-ftehim rilevanti elenkat fl-Anness I għal-linji tal-ajru tal-Istat Membru li huwa parti għal dak il-ftehim għandhom jinftiehmu li jirreferu wkoll għal-linji tal-ajru ta’ dak l-Istat Membru li mhumiex iddeżinjati minn dak l-Istat Membru.

Artikolu 4

L-Annessi għal dan il-Ftehim għandhom jifformaw parti integrali minn dan il-Ftehim.

Artikolu 5

1. Kull Parti Kontraenti tista’ f’kull ħin titlob konsultazzjonijiet mal-Parti Kontraenti l-oħra biex jiġi emendat dan il-Ftehim. Dawn il-konsultazzjonijiet għandhom jibdew fi żmien sittin jum mid-data tal-wasla ta’ talba bħal din.

2. Dan il-Ftehim jista’ jiġi emendat bi ftehim bejn il-Partijiet Kontraenti u l-emendi għandhom jidħlu fis-seħħ bil-mod deskritt fl-Artikolu 6 ta’ dan il-Ftehim.

3. Minkejja l-paragrafu 2 ta’ dan l-Artikolu, l-emendi relatati biss mal-Annessi jistgħu jsiru permezz ta’ skambju ta’ noti diplomatiċi bejn l-Unjoni Ewropea u l-Gvern tal-Ġappun, f’konformità mal-proċeduri domestiċi applikabbli tagħhom.

Artikolu 6

1. Kull Parti Kontraenti għandha tibgħat permezz ta’ mezzi diplomatiċi lill-Parti Kontraenti l-oħra n-notifika li tikkonferma li l-proċeduri interni tagħha meħtieġa għad-dħul fis-seħħ ta’ dan il-Ftehim ikunu tlestew.

2. Dan il-Ftehim għandu jidħol fis-seħħ fl-ewwel jum tax-xahar ta’ wara d-data tal-wasla tal-aħħar notifika.

3. In-notifika lill-Unjoni Ewropea f’konformità ma’ dan l-Artikolu għandha tintbagħat lis-Segretarju Ġenerali tal-Kunsill tal-Unjoni Ewropea.

Artikolu 7

1. Fil-każ li ftehim elenkat fl-Anness I jintemm, id-dispożizzjonijiet ta’ dan il-Ftehim għandhom jieqfu japplikaw għal dak il-ftehim mid-data tat-terminazzjoni. Ir-referenzi f’dan il-Ftehim għall-ftehim mitmum għandhom jitqiesu nulli u bla effett minn dik id-data.

2. Fil-każ li l-ftehimiet kollha elenkati fl-Anness I jintemmu, dan il-Ftehim għandu jintemm fid-data tat-terminazzjoni tal-aħħar ftehim.

Artikolu 8

1. Dan il-Ftehim huwa mfassal f’żewġ kopji fil-lingwa Bulgara, Ċeka, Daniża, Estonjana, Finlandiża, Franċiża, Ġermaniża, Griega, Ingliża, Irlandiża, Kroata, Latvjana, Litwana, Maltija, Olandiża, Pollakka, Portugiża, Rumena, Slovakka, Slovena, Spanjola, Taljana, Ungeriża, Żvediża, u Ġappuniża, b’kull test ugwalment awtentiku.

2. F’każ ta’ kwalunkwe diverġenza ta’ interpretazzjoni, għandha tingħata prevalenza lit-test fil-lingwa li fiha [ie nnegozjat il-Ftehim.

B’XHIEDA TA’ DAN, is-sottofirmatarji, awtorizzati kif meħtieġ għal dan il-għan, iffirmaw dan il-Ftehim.