(1)

Il-Ftehim Interim li jistabbilixxi qafas għal Ftehim ta’ Sħubija Ekonomika bejn l-Istati tal-Afrika tal-Lvant u tan-Nofsinhar (ESA), minn naħa, u l-Komunità Ewropea u l-Istati Membri tagħha, min-naħa l-oħra (1) (“l-FSE interim”) ilu japplika b’mod proviżorju mill-14 ta’ Mejju 2012 bejn l-Unjoni u r-Repubblika ta’ Madagascar, ir-Repubblika ta’ Mauritius, ir-Repubblika tas-Seychelles u r-Repubblika taż-Żimbabwe. L-FSE interim ilu japplika mis-7 ta’ Frar 2019 b’mod proviżorju bejn l-Unjoni u l-Unjoni ta’ Comoros.

(2)

Il-Protokoll 1 (2) tal-FSE interim, li jikkonċerna d-definizzjoni tal-kunċett ta’ “prodotti oriġinarji” u metodi ta’ kooperazzjoni amministrattiva, jinkludi r-regoli tal-oriġini għall-importazzjoni fl-Unjoni ta’ prodotti li joriġinaw mill-Istati tal-ESA.

(3)

F’konformità mal-Artikolu 44(8) tal-Protokoll 1 tal-FSE interim, jingħataw derogi awtomatiċi minn dawk ir-regoli tal-oriġini, għall-kwota annwali ta’ 8 000 tunnellata tonn fil-landa u ta’ 2 000 tunnellata lojns tat-tonn.

(4)

Fit-2 ta’ Ottubru 2017, il-Kumitat dwar il-Kooperazzjoni Doganali ALN-UE adotta d-Deċiżjoni Nru 1/2017 (3), li tagħti deroga awtomatika mir-regoli tal-oriġini fir-rigward tat-tonn ippreservat u l-lojns tat-tonn importati fl-Unjoni f’konformità mal-Protokoll 1 tal-FSE interim mill-1 ta’ Jannar 2018 sal-31 ta’ Diċembru 2022.

(5)

Fl-10 ta’ Ġunju 2022, il-Kummissjoni Ewropea rċeviet talba mingħand ir-Repubblika tas-Seychelles f’isem l-Istati tal-ESA, għal deroga awtomatika ġdida mill-1 ta’ Jannar 2023, f’konformità mal-Artikolu 44(8) tal-Protokoll 1 tal-FSE interim, u li tibqa’ valida sal-konklużjoni u l-applikazzjoni ta’ Protokoll ġdid.

(6)

Id-deroga awtomatika attwali tiskadi fil-31 ta’ Diċembru 2022. F’konformità mal-Artikolu 44(8) tal-Protokoll 1 tal-FSE interim, jenħtieġ li l-Kumitat dwar il-Kooperazzjoni Doganali ALN-UE jagħti din id-deroga awtomatikament lill-Istati tal-ESA.

(7)

Ir-referenza fl-Artikolu 44(8) tal-Protokoll 1 tal-FSE interim għal “tonn fil-landa” għandha tinftiehem li tkopri t-tonn ippreservat fiż-żejt veġetali jew b’modi oħra. Għal dawk it-tipi ta’ tonn, l-Anness I tar-Regolament tal-Kunsill (KEE) Nru 2658/87 (4) (“in-Nomenklatura Magħquda”) jirreferi għat-terminu “ippreservat”. It-terminu “tonn ippreservat” ikopri t-tonn fil-landa, iżda wkoll it-tonn ippakkjat f’vakwu f’boroż tal-plastik jew f’kontenituri oħra. Għalhekk jixraq li jintuża t-terminu “tonn ippreservat”.

(8)

Fl-interess taċ-ċarezza, jixraq li jiġi stabbilit b’mod espliċitu li t-tonn mhux oriġinarju li se jintuża fil-manifattura tat-tonn ippreservat tal-kodiċijiet NM 1604 14 21, 31 u 41, 1604 14 28, 38 u 48, ex 1604 20 70, u tal-lojns tat-tonn tal-kodiċi NM 1604 14 26, 36 u 46 jenħtieġ li jkun tonn tal-Intestaturi tas-SA 0302 jew 0303, sabiex it-tonn ippreservat u l-lojns tat-tonn jibbenefikaw mid-deroga.

(9)

Ir-Regolament ta’ Implimentazzjoni tal-Kummissjoni (UE) 2015/2447 (5) jistabbilixxi r-regoli għall-ġestjoni tal-kwoti tariffarji. Jenħtieġ li dawk ir-regoli jiġu applikati għall-ġestjoni tal-kwantità li għaliha qed tingħata d-deroga permezz ta’ din id-Deċiżjoni.

(10)

Jenħtieġ li d-deroga awtomatika mitluba tingħata mill-Kumitat dwar il-Kooperazzjoni Doganali ALN-UE tul il-perjodu li jibqa’ jseħħ l-Artikolu 44(8) tal-Protokoll 1.

(11)

Sabiex ikun hemm monitoraġġ effiċjenti tat-tħaddim tad-deroga, jenħtieġ li l-awtoritajiet tal-Istati tal-ESA b’mod regolari jibagħtu lill-Kummissjoni Ewropea d-dettalji taċ-ċertifikati tal-moviment EUR.1 maħruġa jew id-dikjarazzjonijiet fuq fattura li jsiru għall-prodotti kkonċernati, skont din id-Deċiżjoni.

—

“Derogation - Decision No 1/2022 of the ESA-EU Customs Cooperation Committee of 19 October 2022.”;

—

“Dérogation - Décision n° 1/2022 du Comité de Coopération Douanière AfOA-UE du 19 octobre 2022.”;