Artikolu 1

Suġġett

Din id-Deċiżjoni tistabbilixxi regoli għall-implimentazzjoni tal-Artikolu 5(2) tal-Protokoll dwar l-Irlanda/l-Irlanda ta’ Fuq (“il-Protokoll”) dwar:

(a)	il-kundizzjonijiet biex jitqies li merkanzija li tiddaħħal fl-Irlanda ta’ Fuq minn barra l-Unjoni ma tkunx soġġetta għall-ipproċessar kummerċjali fl-Irlanda ta’ Fuq;

(b)	il-kriterji biex jitqies li merkanzija li tiddaħħal fl-Irlanda ta’ Fuq minn barra l-Unjoni ma tkunx f’riskju li sussegwentement tiddaħħal fl-Unjoni.

Artikolu 2

Ipproċessar mhux kummerċjali

Merkanzija ma għandhiex titqies li hija soġġetta għall-ipproċessar kummerċjali meta:

(a)	il-persuna li tippreżenta dikjarazzjoni għar-rilaxx għal ċirkolazzjoni libera dwar din il-merkanzija jew li tali dikjarazzjoni ssir f’isimha (“l-importatur”) kellha fatturat annwali totali ta’ anqas minn GBP 500 000 fl-aħħar sena finanzjarja kompluta tagħha; jew

(b)

l-ipproċessar isir fl-Irlanda ta’ Fuq u huwa għall-iskop uniku ta’:

(i)	il-bejgħ ta’ ikel lil konsumatur aħħari fir-Renju Unit;

(ii)	kostruzzjoni, fejn il-merkanzija pproċessata tifforma parti permanenti minn struttura mibnija mill-importatur fl-Irlanda ta’ Fuq;

(iii)

għoti dirett lir-riċevitur ta’ servizzi tas-saħħa jew tal-kura mill-importatur fl-Irlanda ta’ Fuq;

(iv)	attivitajiet mingħajr skop ta’ qligħ fl-Irlanda ta’ Fuq, meta ma jkun hemm l-ebda bejgħ sussegwenti tal-merkanzija pproċessata mill-importatur; jew

(v)	l-użu finali tal-għalf tal-annimali f’post fl-Irlanda ta’ Fuq mill-importatur.

Artikolu 3

Kriterji biex jitqies li l-merkanzija ma tkunx f’riskju li sussegwentement tiddaħħal fl-Unjoni

1. Għandu jitqies li l-merkanzija ma tkunx f’riskju li sussegwentement tiddaħħal fl-Unjoni meta din ma tkunx ikkunsidrata li tkun soġġetta għall-ipproċessar kummerċjali f’konformità mal-Artikolu 2, u meta:

(a)

fil-każ ta’ merkanzija mdaħħla fl-Irlanda ta’ Fuq minn parti oħra tar-Renju Unit permezz ta’ trasport dirett,

(i)	id-dazju pagabbli skont it-Tariffa Doganali Komuni tal-Unjoni jkun żero, jew

(ii)

l-importatur ikun ġie awtorizzat f’konformità mal-Artikoli minn 5 sa 7 ta’ din id-Deċiżjoni biex idaħħal dik il-merkanzija fl-Irlanda ta’ Fuq biex tinbiegħ lill-konsumaturi aħħarin fir-Renju Unit jew għall-użu aħħari minnhom, inkluż meta dik il-merkanzija tkun soġġetta għal proċessar mhux kummerċjali f’konformità mal-Artikolu 2 qabel tinbiegħ lill-konsumaturi aħħarin jew l-użu finali minnhom;

(b)

fil-każ ta’ merkanzija mdaħħla fl-Irlanda ta’ Fuq permezz ta’ trasport dirett għajr mill-Unjoni jew minn parti oħra tar-Renju Unit,

(i)	id-dazju pagabbli skont it-Tariffa Doganali Komuni tal-Unjoni jkun daqs jew inqas mid-dazju pagabbli skont it-tariffa doganali tar-Renju Unit , jew

(ii)

l-importatur ikun ġie awtorizzat f’konformità mal-Artikoli minn 5 sa 7 ta’ din id-deċiżjoni biex idaħħal dik il-merkanzija fl-Irlanda ta’ Fuq biex tinbiegħ lill-konsumaturi aħħarin fl-Irlanda ta’ Fuq jew għall-użu aħħari tagħhom (inkluż meta dik il-merkanzija kienet soġġetta għal proċessar mhux kummerċjali f’konformità mal-Artikolu 2 qabel il-bejgħ, jew l-użu finali tagħha, mill-konsumaturi aħħarin), u d-differenza bejn id-dazju pagabbli skont it-tariffa doganali tar-Renju Unit ikun inqas minn 3 % tal-valur doganali tal-merkanzija.

2. Il-paragrafi 1(a)(ii) u 1(b)(ii) ma għandhomx japplikaw għal merkanzija soġġetta għal miżuri ta’ difiża tal-kummerċ adottati mill-Unjoni.

Artikolu 4

Kalkolu tad-dazji applikabbli

Għall-finijiet tal-Artikolu 3(1)(a)(i) u 3(1)(b) għandhom japplikaw ir-regoli li ġejjin:

(a)	id-dazju pagabbli skont it-Tariffa Doganali Komuni tal-Unjoni fuq merkanzija għandu jiġi kkalkulat skont ir-regoli stabbiliti fil-leġiżlazzjoni doganali tal-Unjoni;

(b)	id-dazju pagabbli skont it-tariffa doganali tar-Renju Unit fuq merkanzija għandu jiġi kkalkulat skont ir-regoli stabbiliti fil-leġiżlazzjoni doganali tar-Renju Unit.

Artikolu 5

Awtorizzazzjoni għall-finijiet tal-Artikolu 3

1. Għall-finijiet tal-Artikoli 3 (1)(a)(ii) u 3(1)(b)(ii), applikazzjoni għal awtorizzazzjoni biex tiddaħħal merkanzija fl-Irlanda ta’ Fuq permezz ta’ trasport dirett għall-bejgħ lill-konsumaturi finali jew għall-użu aħħari minnhom għandha tiġi ppreżentata lill-awtorità kompetenti tar-Renju Unit.

2. L-applikazzjoni għall-awtorizzazzjoni msemmija fil-paragrafu 1 għandu jkun fiha informazzjoni dwar l-attivitajiet kummerċjali tal-applikant, dwar il-merkanzija li tipikament tiddaħħal fl-Irlanda ta’ Fuq, kif ukoll deskrizzjoni tat-tip ta’ rekords, sistemi u kontrolli stabbiliti mill-applikant biex jiġi żgurat li l-merkanzija koperta mill-awtorizzazzjoni tiġi ddikjarata kif suppost għal finijiet doganali u tista’ tiġi pprovduta evidenza bħala appoġġ għall-impenn fl-Artikolu 6(b). Il-kummerċjant għandu jżomm l-evidenza, eż. fatturi, għall-aħħar ħames snin u għandu jipprovdiha lill-awtoritajiet kompetenti jekk jitolbuh jagħmel dan. Ir-rekwiżiti tad-data tal-applikazzjoni huma stipulati fid-dettall fl-Anness ta’ din id-Deċiżjoni.

3. L-awtorizzazzjoni għandha tindika mill-inqas dan li ġej:

(a)	isem il-persuna li ngħatatilha l-awtorizzazzjoni (“id-detentur tal-awtorizzazzjoni”);

(b)	numru ta’ referenza uniku attribwit mill-awtorità doganali kompetenti għad-deċiżjoni (“numru ta’ referenza tal-awtorizzazzjoni”);

(c)	l-awtorità li tat l-awtorizzazzjoni;

(d)	id-data tad-dħul fis-seħħ tal-awtorizzazzjoni.

4. Id-dispożizzjonijiet tal-leġiżlazzjoni doganali tal-Unjoni dwar deċiżjonijiet relatati mal-applikazzjoni tal-leġiżlazzjoni doganali għandhom japplikaw għall-applikazzjonijiet u l-awtorizzazzjonijiet imsemmija f’dan l-Artikolu, inkluż fir-rigward tal-monitoraġġ.

5. F’każijiet fejn l-awtorità doganali kompetenti tar-Renju Unit tosserva użu ħażin intenzjonat ta’ awtorizzazzjoni jew ksur tal-kundizzjonijiet għal awtorizzazzjoni stabbiliti f’din id-Deċiżjoni, l-awtorità għandha tissospendi jew tirrevoka l-awtorizzazzjoni.

Artikolu 6

Kundizzjonijiet ġenerali għall-ħruġ ta' awtorizzazzjoni

Għall-finijiet tal-Artikoli 3(1)(a)(ii) u 3(1)(b)(ii), tista’ tingħata awtorizzazzjoni lill-applikanti li:

(a)

jissodisfaw il-kriterji ta’ stabbiliment li ġejjin:

(i)

ikunu stabbiliti fl-Irlanda ta’ Fuq jew ikollhom post fiss ta’ negozju fl-Irlanda ta’ Fuq

—	fejn ikun hemm preżenza permanenti ta’ riżorsi umani u tekniċi; u

—	li minnu l-merkanzija tinbiegħ, jew tiġi pprovduta għall-użu finali, lill-konsumaturi aħħarin; u

—	fejn informazzjoni u rekords doganali, kummerċjali u dwar it-trasport ikunu disponibbli jew aċċessibbli fl-Irlanda ta’ Fuq, u

(ii)	fil-każ li ma jkunux stabbiliti fl-Irlanda ta’ Fuq, l-operazzjonijiet tagħhom relatati mad-dwana jitwettqu fir-Renju Unit u jkollhom rappreżentant doganali indirett fl-Irlanda ta’ Fuq;

(b)

jimpenjaw ruħhom li jdaħħlu oġġetti fl-Irlanda ta’ Fuq biss għall-bejgħ lil konsumaturi aħħarin jew għall-użu aħħari minnhom, inkluż fejn dawk l-oġġetti kienu soġġetti għal ipproċessar mhux kummerċjali skont l-Artikolu 2 qabel il-bejgħ jew l-użu finali tagħhom mill-konsumaturi aħħarin; u, fil-każ ta’ bejgħ lill-konsumaturi aħħarin fl-Irlanda ta’ Fuq, jimpenjaw ruħhom li l-bejgħ se jsir minn ħanut fiżiku jew aktar fl-Irlanda ta’ Fuq li minnu jsir il-bejgħ dirett fiżiku lill-konsumaturi aħħarin.

Artikolu 7

Kundizzjonijiet speċifiċi għall-awtorizzazzjoni

1. Għall-finijiet tal-Artikoli 3(1)(a)(ii) u 3(1)(b)(ii), tingħata awtorizzazzjoni biex tiddaħħal merkanzija fl-Irlanda ta’ Fuq biss lill-applikanti li jissodisfaw il-kundizzjonijiet stabbiliti fl-Artikolu 6 kif ukoll il-kundizzjonijiet li ġejjin:

(a)	l-applikant jiddikjara li se jiddikjara għar-rilaxx għal ċirkolazzjoni libera merkanzija mdaħħla fl-Irlanda ta’ Fuq skont l-Artikolu 3(1)(a)(ii) jew 3(1)(b)(ii);

(b)	l-applikant ma jista’ jkun wettaq l-ebda ksur serju jew ksur ripetut tal-leġiżlazzjoni doganali u r-regoli fiskali, u ma jista’ jkollu l-ebda rekord ta’ reati kriminali serji relatati mal-attività ekonomika tiegħu;

(c)

fir-rigward ta’ merkanzija li trid tiġi ddikjarata bħala mhux f’riskju, l-applikant għandu juri li għandu livell għoli ta’ kontroll tal-operazzjonijiet tiegħu u tal-fluss tal-merkanzija, permezz ta’ sistema ta’ ġestjoni ta’ rekords kummerċjali u, fejn xieraq, tat-trasport, li jippermettu kontrolli xierqa u l-għoti ta’ evidenza bħala sostenn għall-impenn fl-Artikolu 6(b).

2. L-awtorizzazzjonijiet għandhom jingħataw biss jekk l-awtorità doganali tqis li ser tkun tista’ twettaq kontrolli mingħajr sforz amministrattiv sproporzjonat, inkluż il-kontroll ta’ kwalunkwe evidenza li l-merkanzija nbiegħet lil konsumaturi aħħarin jew kienet soġġetta għall-użu finali minnhom.

3. Matul il-perjodu li jintemm xahrejn wara d-dħul fis-seħħ ta’ din id-Deċiżjoni, tista’ tingħata awtorizzazzjoni proviżorja jekk l-applikant ikun ippreżenta applikazzjoni kompluta, ikun konformi mal-paragrafu 1(b), u jiddikjara li jissodisfa l-kundizzjonijiet l-oħra għall-awtorizzazzjoni. It-tul tal-awtorizzazzjoni proviżorja għandu jkun limitat għal erba’ xhur, wara liema perjodu trid tkun ngħatat awtorizzazzjoni permanenti biex il-kummerċjant jibqa’ awtorizzat.

Artikolu 8

Skambju ta’ informazzjoni dwar l-applikazzjoni tal-Artikolu 5(1) u (2) tal-Protokoll

1. Mingħajr preġudizzji għall-obbligi tiegħu skont l-Artikolu 5(4) tal-Protokoll, moqri flimkien mar-Regolament (KE) Nru 638/2004 tal-Parlament Ewropew u tal-Kunsill (1) u r-Regolament (KE) Nru 471/2009 tal-Parlament Ewropew u tal-Kunsill (2), ta’ kull xahar, ir-Renju Unit għandu jipprovdi informazzjoni lill-Unjoni dwar l-applikazzjoni tal-Artikolu 5(1) u (2) tal-Protokoll kif ukoll ta’ din id-Deċiżjoni. Din l-informazzjoni għandha tinkludi volumi u valuri, f’forma aggregata u għal kull kunsinna, kif ukoll mezzi ta’ trasport, relatati ma’:

(a)	merkanzija mdaħħla fl-Irlanda ta’ Fuq li b’rabta magħha ma kien hemm l-ebda ħlas ta’ dazji doganali f’konformità mal-ewwel subparagrafu tal-Artikolu 5(1) tal-Protokoll;

(b)	merkanzija mdaħħla fl-Irlanda ta’ Fuq li b’rabta magħha ma kien hemm l-ebda ħlas ta’ dazji doganali f’konformità mat-tieni subparagrafu tal-Artikolu 5(1) tal-Protokoll; u

(c)	merkanzija mdaħħla fl-Irlanda ta’ Fuq li fir-rigward tagħha d-dazji doganali pagabbli kienu f’konformità mat-Tariffa Doganali Komuni tal-Unjoni.

2. Ir-Renju Unit għandu jipprovdi l-informazzjoni msemmija fil-paragrafu 1 fil-15-il jum tax-xogħol tax-xahar wara dak li għalih tkun qed tiġi pprovduta l-informazzjoni.

3. L-informazzjoni għandha tiġi pprovduta bl-użu ta’ tekniki elettroniċi għall-ipproċessar tad-data.

4. Fuq talba tar-rappreżentanti tal-Unjoni msemmija fid-Deċiżjoni 6/2020 tal-Kumitat Konġunt tas-17 ta’ Diċembru 2020 li tipprovdi l-arranġamenti prattiċi ta’ ħidma relatati mal-eżerċizzju tad-drittijiet tar-rappreżentanti tal-Unjoni msemmija fl-Artikolu 12(2) tal-Protokoll dwar l-Irlanda/Irlanda ta’ Fuq, u mill-inqas darbtejn fis-sena, l-awtoritajiet kompetenti tar-Renju Unit għandhom jipprovdu informazzjoni f’forma aggregata u għal kull awtorizzazzjoni lil dawn ir-rappreżentanti dwar l-awtorizzazzjonijiet mogħtija skont l-Artikoli minn 5 sa 7, inkluż l-għadd tal-awtorizzazzjonijiet aċċettati, miċħuda u revokati.

5. It-trasferiment regolari tal-informazzjoni msemmi hawn fuq għandu jibda mill-aktar fis possibbli u mhux aktar tard mill-15 ta’ April 2021. L-ewwel trasferiment ta’ informazzjoni għandu jkopri l-informazzjoni għall-perjodu mill-1 ta’ Jannar 2021 sa tmiem ix-xahar qabel it-trasferiment.

Artikolu 9

Rieżami u terminazzjoni

Jekk waħda mill-Partijiet tqis li jkun hemm devjazzjoni sinifikanti tat-traffiku kummerċjali, jew frodi jew attivitajiet illegali oħra, dik il-Parti għandha tinforma lill-Parti l-oħra fil-Kumitat Konġunt sal-1 ta’ Awwissu 2023, u l-Partijiet għandhom jagħmlu ħilithom kollha biex isibu soluzzjoni reċiprokament sodisfaċenti għall-kwistjoni. Jekk il-Partijiet ma jsibux deċiżjoni reċiprokament sodisfaċenti, l-Artikoli 3(1)(a)(ii), 3(1)(b)(ii) u minn 5 sa 8 ta’ din id-Deċiżjoni għandhom jieqfu japplikaw mill-1 ta’ Awwissu 2024, sakemm il-Kumitat Konġunt ma jiddeċidix qabel l-1 ta’ April 2024 li jkompli l-applikazzjoni tagħhom.

Fil-każ li l-Artikoli 3(1)(a)(ii), 3(1)(b)(ii) u minn 5 sa 8 ta’ din id-deċiżjoni jieqfu japplikaw f’konformità mal-ewwel subparagrafu, il-Kumitat Konġunt għandu jemenda din id-Deċiżjoni sal-1 ta’ Awwissu 2024 biex jagħmel dispożizzjonijiet alternattivi xierqa applikabbli mill-1 ta’ Awwissu 2024, huwa u jikkunsidra ċ-ċirkostanzi speċifiċi fl-Irlanda ta’ Fuq u b’rispett sħiħ tal-post tal-Irlanda ta’ Fuq fit-territorju doganali tar-Renju Unit.

Artikolu 10

Dħul fis-seħħ

Din id-Deċiżjoni għandha tidħol fis-seħħ fl-1 ta’ Jannar 2021.

Magħmul fi Brussell, is-17 ta’ Diċembru 2020.

Għall-Kumitat Konġunt

Il-Kopresidenti

Maroš ŠEFČOVIČ

Michael GOVE

(1) Ir-Regolament (KE) 638/2004 tal-Parlament Ewropew u tal-Kunsill tal-31 ta’ Marzu 2004 fuq l-istatistiċi Komunitarji rigward il-kummerċ ta’ merkanzija bejn Stati Membri u li jħassar ir-Regolament tal-Kunsill (KEE) Nru 3330/91 (ĠU L102, 7.4.2004, p. 1)

(2) Ir-Regolament (KE) Nru 471/2009 tal-Parlament Ewropew u tal-Kunsill tas-6 ta’ Mejju 2009 dwar statistika Komunitarja relatata mal-kummerċ estern ma’ pajjiżi li mhumiex membri u li jħassar ir-Regolament tal-Kunsill (KE) Nru 1172/95 (ĠU L 152, 16.6.2009, p. 23).