1.   Dan il-Ftehim għandu jkopri l-aspetti kollha li huma meħtieġa għat-twettiq tal-azzjonijiet mill-Aġenzija li jistgħu jsiru fit-territorju tar-Repubblika tal-Albanija fejn membri tat-timijiet tal-Aġenzija jkollhom setgħat eżekuttivi.

2.   Dan il-Ftehim japplika biss fit-territorju tar-Repubblika tal-Albanija.

3.   L-istatus u d-delimitazzjoni, taħt il-liġi internazzjonali, tat-territorji rispettivi tal-Istati Membri tal-Unjoni Ewropea u r-Repubblika tal-Albanija, bl-ebda mod ma huma affettwati la minn dan il-Ftehim u lanqas minn kwalunkwe att imwettaq fl-implimentazzjoni tiegħu mill-Partijiet jew f'isimhom, inklużi l-istabbiliment ta' pjanijiet operazzjonali jew il-parteċipazzjoni f'operazzjonijiet transfruntieri.

1.   Għandu jiġi miftiehem bejn l-Aġenzija u r-Repubblika tal-Albanija pjan operazzjonali, li jaqblu miegħu l-Istat Membru jew l-Istati Membri li jmissu mal-fruntiera taż-żona ta' operazzjoni, għal kull operazzjoni konġunta jew intervent rapidu fil-fruntiera.

2.   Il-pjan operazzjonali għandu jistabbilixxi fid-dettall l-aspetti organizzattivi u proċedurali tal-operazzjoni konġunta jew tal-intervent rapidu fil-fruntiera, inklużi deskrizzjoni u valutazzjoni tas-sitwazzjoni, l-għan u l-objettivi operazzjonali, il-kunċett operazzjonali, it-tip ta' tagħmir tekniku li jrid jintuża, il-pjan ta' implimentazzjoni, il-kooperazzjoni ma' pajjiżi terzi oħra, Aġenziji u korpi oħrajn tal-Unjoni Ewropea jew organizzazzjonijiet internazzjonali, id-dispożizzjonijiet fir-rigward tad-drittijiet fundamentali, inkluża l-protezzjoni tad-data personali, l-istruttura tal-koordinazzjoni, tal-kmand, tal-kontroll, tal-komunikazzjoni u tar-rapportar, l-arranġamenti organizzattivi u loġistiċi, l-evalwazzjoni u l-aspetti finanzjarji tal-operazzjoni konġunta jew tal-intervent rapidu fil-fruntiera.

3.   L-evalwazzjoni tal-operazzjoni konġunta jew tal-intervent rapidu fil-fruntiera għandha titwettaq b'mod konġunt bejn ir-Repubblika tal-Albanija u l-Aġenzija.

1.   Il-membri tat-tim għandhom ikollhom l-awtorità li jwettqu l-kompiti u jeżerċitaw is-setgħat eżekuttivi meħtieġa għall-kontroll tal-fruntieri u għall-operazzjonijiet ta' ritorn.

2.   Il-membri tat-tim għandhom jirrispettaw il-liġijiet u r-regolamenti tar-Repubblika tal-Albanija.

3.   Il-membri tat-tim jistgħu jwettqu l-kompiti u jeżerċitaw is-setgħat fit-territorju tar-Repubblika tal-Albanija biss fuq struzzjonijiet minn u, bħala regola ġenerali, fil-preżenza ta' gwardji tal-fruntiera jew persunal rilevanti ieħor tar-Repubblika tal-Albanija. Ir-Repubblika tal-Albanija għandha, fejn meħtieġ, tagħti struzzjonijiet lit-tim skont il-pjan operazzjonali. Ir-Repubblika tal-Albanija tista' eċċezzjonalment tawtorizza lill-membri tat-tim biex jaġixxu f'isimha.

L-Aġenzija, permezz tal-uffiċjal tal-koordinazzjoni tagħha, tista' tikkomunika l-opinjonijiet tagħha lir-Repubblika tal-Albanija dwar l-istruzzjonijiet mogħtija lit-tim. F'dak il-każ, ir-Repubblika tal-Albanija għandha tikkunsidra dawk l-opinjonijiet u ssegwihom sa fejn ikun possibbli.

F'każijiet fejn l-istruzzjonijiet maħruġa lit-tim ma jkunux konformi mal-pjan operazzjonali, l-uffiċjal tal-koordinazzjoni għandu jirrapporta immedjatament għand id-direttur eżekuttiv tal-Aġenzija (minn hawn 'il quddiem “id-direttur eżekuttiv”). Id-direttur eżekuttiv jista' jieħu miżuri xierqa, inkluża s-sospensjoni jew it-terminazzjoni tal-azzjoni.

4.   Il-membri tat-tim għandhom jilbsu l-uniformi tagħhom stess meta jkunu qed iwettqu l-kompiti tagħhom u jeżerċitaw is-setgħat tagħhom. Il-membri tat-tim għandhom ukoll jilbsu b'mod viżibbli fuq l-uniformi tagħhom identifikazzjoni personali u faxxa tad-driegħ blu bl-insinji tal-Unjoni Ewropea u tal-Aġenzija. Għall-finijiet ta' identifikazzjoni fir-rigward tal-awtoritajiet nazzjonali tar-Repubblika tal-Albanija, il-membri tat-tim għandhom, f'kull ħin iġorru magħhom id-dokument ta' akkreditazzjoni msemmi fl-Artikolu 7.

5.   Waqt li jwettqu l-kompiti tagħhom u jeżerċitaw is-setgħat tagħhom, il-membri tat-tim jistgħu jġorru armi, munizzjon u tagħmir tas-servizz kif awtorizzati skont il-liġi nazzjonali tal-Istat Membru tal-oriġini. Ir-Repubblika tal-Albanija għandha, qabel l-iskjerament tal-membri tat-tim, tinforma lill-Aġenzija dwar l-armi, munizzjon u tagħmir tas-servizz li jkunu permissibbli u dwar il-qafas legali rilevanti u l-kondizzjonijiet għall-użu tagħhom.

6.   Waqt li jwettqu l-kompiti tagħhom u jeżerċitaw is-setgħat tagħhom, il-membri tat-tim għandhom ikunu awtorizzati jużaw il-forza, inklużi armi, munizzjon u tagħmir tas-servizz, bil-kunsens tal-Istat Membru tal-oriġini u tar-Repubblika tal-Albanija, fil-preżenza ta' gwardji tal-fruntiera jew persunal rilevanti ieħor tar-Repubblika tal-Albanija u f'konformità mal-liġi nazzjonali tar-Repubblika tal-Albanija. Ir-Repubblika tal-Albanija tista' tawtorizza lill-membri tat-tim biex jużaw il-forza mingħajr il-preżenza ta' gwardji tal-fruntiera jew persunal rilevanti ieħor tar-Repubblika tal-Albanija. L-awtorità biex jingħata l-kunsens tal-Istat Membru tal-oriġini se tkun definita fil-pjan operazzjonali.

7.   Ir-Repubblika tal-Albanija tista' tawtorizza lill-membri tat-tim jikkonsultaw il-bażijiet tad-data tagħha jekk ikun meħtieġ biex jintlaħqu l-għanijiet operazzjonali speċifikati fil-pjan operazzjonali u għall-operazzjonijiet ta' ritorn. Il-membri tat-tim għandhom jikkonsultaw biss id-data li tkun meħtieġa għat-twettiq tal-kompiti tagħhom u biex jeżerċitaw is-setgħat tagħhom kif speċifikat fil-pjan operazzjonali jew kif meħtieġ għal operazzjonijiet ta' ritorn. Ir-Repubblika tal-Albanija għandha, qabel l-iskjerament tal-membri tat-tim, tinforma lill-Aġenzija dwar liema bażijiet ta' data nazzjonali jistgħu jiġu kkonsultati. Dik il-konsultazzjoni għandha ssir skont il-liġi nazzjonali tal-protezzjoni tad-data tar-Repubblika tal-Albanija.

1.   Id-direttur eżekuttiv jista' jissospendi jew jittermina l-azzjoni, wara li jkun informa lir-Repubblika tal-Albanija bil-miktub, jekk id-dispożizzjonijiet ta' dan il-Ftehim jew tal-pjan operazzjonali ma jkunux rispettati mir-Repubblika tal-Albanija. Id-direttur eżekuttiv għandu jinnotifika lir-Repubblika tal-Albanija bir-raġunijiet għal dan.

2.   Ir-Repubblika tal-Albanija tista' tissospendi jew tittermina l-azzjoni, wara li tinforma lill-Aġenzija bil-miktub, jekk id-dispożizzjonijiet ta' dan il-Ftehim jew tal-pjan operazzjonali ma jkunux rispettati mill-Aġenzija jew minn kwalunkwe Stat Membru parteċipanti. Ir-Repubblika tal-Albanija għandha tinnotifika lill-Aġenzija bir-raġunijiet għal dan.

3.   B'mod partikolari, id-direttur eżekuttiv jew ir-Repubblika tal-Albanija jistgħu jissospendu jew jitterminaw l-azzjoni f'każijiet ta' ksur tad-drittijiet fundamentali, ksur tal-prinċipju ta' non-refoulement jew tar-regoli tal-protezzjoni tad-data.

4.   It-terminazzjoni tal-azzjoni ma għandha taffettwa l-ebda dritt jew obbligu li jirriżulta mill-applikazzjoni ta' dan il-Ftehim jew il-pjan operazzjonali qabel tali terminazzjoni.

1.   Id-dokumenti, il-korrispondenza u l-assi tal-membri tat-tim għandhom igawdu l-invjolabbiltà, ħlief fil-każ ta' miżuri ta' eżekuzzjoni li huma permessi skont il-paragrafu 7.

2.   Il-membri tat-tim għandhom igawdu minn immunità mill-ġurisdizzjoni kriminali tar-Repubblika tal-Albanija fir-rigward tal-atti mwettqa fl-eżerċizzju ta' funzjonijiet uffiċjali tagħhom fil-kors tal-azzjonijiet li jsiru f'konformità mal-pjan operazzjonali.

Fil-każ ta' allegazzjoni ta' reat kriminali mwettaq minn membru tat-tim, id-direttur eżekuttiv u l-awtorità kompetenti tal-Istat Membru tal-oriġini għandhom jiġu nnotifikati minnufih. Qabel ma jinbeda proċediment quddiem il-qorti, id-direttur eżekuttiv, wara kunsiderazzjoni bir-reqqa ta' kwalunkwe rappreżentanza li ssir minn awtorità kompetenti tal-Istat Membru tal-oriġini u mill-awtoritajiet kompetenti tar-Repubblika tal-Albanija, għandu jiċċertifika lill-qorti jekk l-att inkwistjoni kienx twettaq fl-eżerċizzju tal-funzjonijiet uffiċjali tal-membru matul l-azzjonijiet li jsiru f'konformità mal-pjan operazzjonali. Sa meta ssir iċ-ċertifikazzjoni mid-direttur eżekuttiv, l-Aġenzija u l-Istat Membru tal-oriġini għandhom joqogħdu lura milli jieħdu xi miżura li x'aktarx tipperikola xi prosekuzzjoni kriminali sussegwenti possibbli tal-membru tat-tim mill-awtoritajiet kompetenti tar-Repubblika tal-Albanija.

Jekk l-att twettaq fil-qadi ta' funzjonijiet uffiċjali, il-proċedimenti ma għandhomx jinbdew. Jekk l-att ma jkunx twettaq fil-qadi ta' funzjonijiet uffiċjali, il-proċedimenti jistgħu ikomplu. Iċ-ċertifikazzjoni mid-direttur eżekuttiv għandha tkun vinkolanti fuq il-ġurisdizzjoni tar-Repubblika tal-Albanija. Il-privileġġi mogħtija lill-membri tat-tim u l-immunità mill-ġurisdizzjoni kriminali tar-Repubblika tal-Albanija ma jeżentawhomx mill-ġurisdizzjoni tal-Istat Membru tal-oriġini.

3.   Il-membri tat-tim għandhom igawdu minn immunità mill-ġurisdizzjoni ċivili u amministrattiva tar-Repubblika tal-Albanija fir-rigward tal-atti kollha li jwettqu fl-eżerċizzju tal-funzjonijiet uffiċjali tagħhom matul l-azzjonijiet li jsiru f'konformità mal-pjan operazzjonali. Jekk jinbeda xi proċediment ċivili kontra xi membri tat-tim quddiem kwalunkwe qorti tar-Repubblika tal-Albanija, id-direttur eżekuttiv u l-awtorità kompetenti tal-Istat Membru tal-oriġini għandhom jiġu nnotifikati minnufih. Qabel ma jinbeda l-proċediment quddiem il-qorti, id-direttur eżekuttiv, wara kunsiderazzjoni bir-reqqa ta' kwalunkwe rappreżentanza li ssir mill-awtorità kompetenti tal-Istat Membru tal-oriġini u mill-awtoritajiet kompetenti tar-Repubblika tal-Albanija, għandu jiċċertifika lill-qorti jekk l-att inkwistjoni kienx twettaq minn membri tat-tim fl-eżerċizzju tal-funzjonijiet uffiċjali tagħhom matul l-azzjonijiet li jsiru f'konformità mal-pjan operazzjonali.

Jekk l-att twettaq fil-qadi ta' funzjonijiet uffiċjali, il-proċediment ma għandux jinbeda. Jekk l-att ma kienx twettaq fl-eżerċizzju tal-funzjonijiet uffiċjali, il-proċediment jista' jitkompla. Iċ-ċertifikazzjoni mid-direttur eżekuttiv għandha tkun vinkolanti fuq il-ġurisdizzjoni tar-Repubblika tal-Albanija. Il-bidu ta' proċedimenti minn membri tat-tim għandu jipprekludihom milli jinvokaw l-immunità mill-ġurisdizzjoni fir-rigward ta' kwalunkwe kontrotalba li tkun direttament relatata mat-talba prinċipali.

4.   L-immunità tal-membri tat-tim mill-ġurisdizzjoni kriminali, ċivili u amministrattiva tar-Repubblika tal-Albanija tista' tiġi rinunzjata mill-Istat Membru tal-oriġini skont il-każ. Tali rinunzja għandha dejjem tkun rinunzja espressa.

5.   Il-membri tat-tim ma għandhomx ikunu obbligati jixhdu bħala xhieda.

6.   Fil-każ ta' dannu kkawżat minn membru tat-tim fl-eżerċizzju tal-funzjonijiet uffiċjali fil-kors tal-azzjonijiet li jsiru f'konformità mal-pjan operazzjonali, ir-Repubblika tal-Albanija għandha tkun responsabbli għal kwalunkwe ħsara.

Fil-każ ta' dannu kkawżat minn negliġenza gravi jew kondotta skorretta volontarja jew jekk l-att ma jkunx twettaq fil-qadi ta' funzjonijiet uffiċjali minn membru tat-tim minn Stat Membru parteċipanti, ir-Repubblika tal-Albanija tista' titlob, permezz tad-direttur eżekuttiv, li l-kumpens jitħallas mill-Istat Membru parteċipanti kkonċernat.

Fil-każ ta' dannu kkawżat minn negliġenza gravi jew kondotta skorretta volontarja jew jekk l-att ma jkunx twettaq fil-qadi ta' funzjonijiet uffiċjali minn membru tat-tim li jkun membru tal-persunal tal-Aġenzija, ir-Repubblika tal-Albanija tista' titlob li l-kumpens jitħallas mill-Aġenzija.

F'każ ta' dannu kkawżat fir-Repubblika tal-Albanija, minħabba force majeure, la r-Repubblika tal-Albanija, lanqas l-Istat Membru parteċipanti, u lanqas l-Aġenzija, ma għandu jkollhom l-ebda responsabbiltà.

7.   L-ebda miżura ta' eżekuzzjoni ma tista' tittieħed fir-rigward tal-membri tat-tim, ħlief fil-każ li jiġi istitwit kontrihom proċediment ċivili li ma jkunx relatat mal-funzjonijiet uffiċjali tagħhom.

Il-proprjetà tal-membri tat-tim, li tkun ċertifikata mid-direttur eżekuttiv bħala meħtieġa għat-twettiq tal-funzjonijiet uffiċjali tagħhom, għandha tkun ħielsa minn sekwestru biex tiġi ssodisfata sentenza, deċiżjoni jew ordni. Fil-kuntest ta' proċedimenti ċivili, il-membri tat-tim ma għandhomx ikunu soġġetti għal xi restrizzjoni fuq il-libertà personali tagħhom jew għal kwalunkwe miżura oħra ta' kostrinġiment.

8.   L-immunità tal-membri tat-tim mill-ġurisdizzjoni tar-Repubblika tal-Albanija ma għandhiex teżentahom mill-ġurisdizzjonijiet tal-Istati Membri tal-oriġini rispettivi.

9.   Il-membri tat-tim għandhom, fir-rigward tas-servizzi mwettqa għall-Aġenzija, ikunu eżentati mid-dispożizzjonijiet tas-sigurtà soċjali li jistgħu jkunu fis-seħħ fir-Repubblika tal-Albanija.

10.   Il-membri tat-tim għandhom ikunu eżentati minn kwalunkwe forma ta' tassazzjoni fir-Repubblika tal-Albanija fuq is-salarju u l-emolumenti mħallsa lilhom mill-Aġenzija jew mill-Istati Membri tal-oriġini, kif ukoll fuq kwalunkwe introjtu li jirċievu minn barra mir-Repubblika tal-Albanija.

11.   Ir-Repubblika tal-Albanija għandha, f'konformità mal-liġijiet u r-regolamenti tagħha, tippermetti d-dħul ta' oġġetti għall-użu personali tal-membri tat-tim, u għandha tagħti eżenzjoni minn kull dazju doganali, taxxa u ħlasijiet relatati ħlief għal ħlasijiet għal ħżin, trasport u servizzi simili, fir-rigward ta' tali oġġetti. Ir-Repubblika tal-Albanija għandha wkoll tippermetti l-esportazzjoni ta' tali oġġetti.

12.   Il-bagalji personali tal-membri tat-tim jistgħu jiġu spezzjonati biss f'każijiet ta' suspetti ġustifikati li fihom oġġetti li mhumiex għall-użu personali tal-membri tat-tim, jew oġġetti li l-importazzjoni jew l-esportazzjoni tagħhom tkun projbita mil-liġi jew suġġetta għar-regolamenti tal-kwarantina tar-Repubblika tal-Albanija. L-ispezzjoni ta' tali bagalji personali għandha ssir biss fil-preżenza tal-membru jew membri tat-tim ikkonċernat jew ta' rappreżentant awtorizzat tal-Aġenzija.

1.   L-Aġenzija għandha, f'kooperazzjoni mar-Repubblika tal-Albanija, toħroġ dokument fil-lingwi uffiċjali tar-Repubblika tal-Albanija u f'lingwa uffiċjali tal-istituzzjonijiet tal-Unjoni Ewropea lil kull membru tat-tim għall-għanijiet ta' identifikazzjoni fil-konfront tal-awtoritajiet nazzjonali tar-Repubblika tal-Albanija u bħala prova tad-drittijiet tad-detentur biex iwettaq il-kompiti u jeżerċita s-setgħat imsemmija fl-Artikolu 4 ta' dan il-Ftehim u fil-pjan operazzjonali. Id-dokument ta' akkreditazzjoni għandu jinkludi l-informazzjoni li ġejja dwar il-membru tat-tim: l-isem u n-nazzjonalità; il-grad jew it-titlu tal-impjieg; ritratt reċenti diġitalizzat u l-kompiti li huwa awtorizzat iwettaq matul l-iskjerament.

2.   Id-dokument ta' akkreditazzjoni, flimkien ma' dokument tal-ivvjaġġar validu, jagħti lill-membru tat-tim aċċess għar-Repubblika tal-Albanija mingħajr il-bżonn ta' viża jew awtorizzazzjoni minn qabel.

3.   Id-dokument tal-akkreditazzjoni għandu jiġi ritornat lill-Aġenzija fi tmiem l-azzjoni. L-awtoritajiet kompetenti Albaniżi għandhom jiġu infurmati b'dan.

1.   Il-membri tat-tim għandhom, fit-twettiq tal-kompiti tagħhom u meta jeżerċitaw is-setgħat tagħhom, jirrispettaw bis-sħiħ id-drittijiet fundamentali u l-libertajiet, inkluż fir-rigward tal-aċċess għal proċeduri tal-ażil, id-dinjità tal-bniedem u l-projbizzjoni tat-tortura, trattament inuman jew degradanti, id-dritt għal-libertà, il-prinċipju ta' non-refoulement u l-projbizzjoni tat-tkeċċijiet kollettivi, id-drittijiet tat-tfal u d-dritt għar-rispett tal-ħajja privata u tal-familja. Waqt it-twettiq tal-kompiti tagħhom u fl-eżerċizzju tas-setgħat tagħhom, huma ma għandhomx jiddiskriminaw b'mod arbitrarju kontra persuni fuq l-ebda bażi, inklużi s-sess, ir-razza jew l-oriġini etnika, ir-reliġjon jew it-twemmin, diżabbiltà, età jew orjentazzjoni sesswali jew l-identità tal-ġeneru. Kwalunkwe miżura li tinterferixxi mad-drittijiet u l-libertajiet fundamentali meħuda fit-twettiq tal-kompiti tagħhom u fl-eżerċizzju tas-setgħat tagħhom għandha tkun proporzjonata għall-objettivi ta' tali miżura u għandha tirrispetta l-essenza ta' dawn id-drittijiet u l-libertajiet fundamentali.

2.   Kull Parti għandu jkollha mekkaniżmu ta' trattament ta' lmenti sabiex tittratta l-allegazzjonijiet ta' ksur tad-drittijiet fundamentali mwettaq mill-persunal tagħha fil-qadi tal-funzjonijiet uffiċjali tagħhom matul xi operazzjoni konġunta jew intervent rapidu fil-fruntiera jew operazzjoni ta' ritorn imwettqa taħt dan il-Ftehim.

1.   L-ipproċessar ta' data personali mill-membri tat-tim għandu jsir biss meta jkun meħtieġ għat-twettiq tal-kompiti tagħhom u l-eżerċizzju tas-setgħat tagħhom għall-implimentazzjoni ta' dan il-Ftehim mir-Repubblika tal-Albanija, mill-Aġenzija jew mill-Istati Membri parteċipanti.

2.   L-ipproċessar ta' data personali mir-Repubblika tal-Albanija għandu jkun soġġett għal liġijiet nazzjonali tagħha.

3.   L-ipproċessar ta' data personali għal għanijiet amministrattivi mill-Aġenzija u mill-Istat jew Stati Membri parteċipanti, inkluż f'każ ta' trasferiment ta' data personali lejn ir-Repubblika tal-Albanija, għandu jkun soġġett għar-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni tal-individwi fir-rigward tal-ipproċessar ta' data personali mill-istituzzjonijiet u l-korpi tal-Komunità u dwar il-movement liberu ta' dik id-data (2), ir-Regolament (UE) 2016/679 tal-Parlament Ewropew u tal-Kunsill tas-27 ta' April 2016 dwar il-protezzjoni tal-persuni fiżiċi fir-rigward tal-ipproċessar ta' data personali u dwar il-moviment liberu ta' tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (3), id-Direttiva (UE) 2016/680 tal-Parlament Ewropew u tal-Kunsill tas-27 ta' April 2016 dwar il-protezzjoni ta' persuni fiżiċi fir-rigward tal-ipproċessar ta' data personali mill-awtoritajiet kompetenti għall-finijiet tal-prevenzjoni, l-investigazzjoni, is-sejbien jew il-prosekuzzjoni ta' reati kriminali jew l-eżekuzzjoni ta' pieni kriminali, u dwar il-moviment liberu ta' tali data, u li tħassar id-Deċiżjoni Qafas tal-Kunsill 2008/977/ĠAI (4) u għal miżuri adottati mill-Aġenzija għall-applikazzjoni tar-Regolament (KE) Nru 45/2001 kif imsemmi fl-Artikolu 45(2) tar-Regolament (UE) 2016/1624.

4.   F'każ li l-proċessar jinvolvi trasferiment ta' data personali, l-Istati Membri u l-Aġenzija għandhom jindikaw, fil-mument tat-trasferiment tad-data personali lir-Repubblika tal-Albanija, kwalunkwe restrizzjoni fuq l-aċċess tagħha jew l-użu tagħha, f'termini ġenerali jew speċifiċi, inkluż fir-rigward ta' trasferiment, tħassir jew qerda. Fejn il-ħtieġa ta' tali restrizzjonijiet issir ċara wara t-trasferiment tad-data personali, dawn għandhom jinformaw lir-Repubblika tal-Albanija dwar dan.

5.   Data personali miġbura għal għanijiet amministrattivi matul l-azzjoni tista' tiġi pproċessata mill-Aġenzija, mill-Istati Membri parteċipanti u mir-Repubblika tal-Albanija f'konformità mal-liġi applikabbli dwar il-protezzjoni tad-data.

6.   L-Aġenzija, l-Istati Membri parteċipanti u r-Repubblika tal-Albanija għandhom iħejju rapport komuni dwar l-applikazzjoni tal-paragrafi 1 sa 5 ta' dan l-Artikolu fi tmiem kull azzjoni. Dak ir-rapport għandu jintbagħat lill-uffiċjal tad-drittijiet fundamentali u l-uffiċjal tal-protezzjoni tad-data tal-Aġenzija. Huma għandhom jirrapportaw għand id-direttur eżekuttiv.

1.   L-awtorità kompetenti għall-implimentazzjoni ta' dan il-Ftehim fir-Repubblika tal-Albanija għandha tkun il-Ministeru tal-Intern.

2.   L-awtorità kompetenti tal-Unjoni Ewropea għall-implimentazzjoni ta' dan il-Ftehim għandha tkun l-Aġenzija.

1.   Kull tilwim li jirriżulta b'rabta mal-applikazzjoni ta' dan il-Ftehim għandu jiġi eżaminat b'mod konġunt mir-rappreżentanti tal-awtorità kompetenti tar-Repubblika tal-Albanija u minn rappreżentanti tal-Aġenzija, li għandhom jikkonsultaw lill-Istat Membru jew l-Istati Membri ġirien tar-Repubblika tal-Albanija.

2.   Fin-nuqqas ta' riżoluzzjoni minn qabel, it-tilwim li jikkonċerna l-interpretazzjoni jew l-applikazzjoni ta' dan il-Ftehim għandu jiġi riżolt biss b'negozjar bejn ir-Repubblika tal-Albanija u l-Kummissjoni Ewropea, li għandha tikkonsulta lil kwalunkwe Stat Membru ġar tar-Repubblika tal-Albanija.

1.   Dan il-Ftehim għandu jkun soġġett għar-ratifika, aċċettazzjoni jew approvazzjoni mill-Partijiet skont il-proċeduri interni tagħhom u l-Partijiet għandhom jinnotifikaw lil xulxin li lestew il-proċeduri meħtieġa għal dak l-iskop.

2.   Dan il-Ftehim għandu jidħol fis-seħħ fl-ewwel jum tat-tieni xahar wara x-xahar li fih tkun saret l-aħħar notifika prevista fil-paragrafu 1.

3.   Dan il-Ftehim huwa konkluż għal perjodu indefinit. Dan il-Ftehim jista' jiġi tterminat jew sospiż permezz ta' ftehim bil-miktub bejn il-Partijiet jew b'mod unilaterali minn kwalunkwe waħda mill-Partijiet. F'dan il-każ tal-aħħar, il-Parti li jkollha l-intenzjoni titterminah jew tissospendih għandha tinnotifika bil-miktub lill-Parti l-oħra b'dan. It-terminazzjoni jew sospensjoni għandha ssir effettiva fl-ewwel jum tat-tieni xahar wara x-xahar li fih tkun ingħatat in-notifika jew ikun ġie konkluż il-ftehim bil-miktub bejn il-Partijiet.

4.   In-notifiki li jsiru skont dan l-Artikolu għandhom jintbagħtu, fil-każ tal-Unjoni Ewropea, lis-Segretarjat Ġenerali tal-Kunsill tal-Unjoni Ewropea u, fil-każ tar-Repubblika tal-Albanija, lill-Ministeru responsabbli għall-Affarijiet Barranin tar-Repubblika tal-Albanija.