11.4.2014 |
MT |
Il-Ġurnal Uffiċjali tal-Unjoni Ewropea |
L 108/3 |
TRADUZZJONI
FTEHIM
Bejn l-Unjoni Ewropea u R-Repubblika Unita tat-Tanzanija dwar il-kondizzjonijiet tat-Trasferiment ta' Pirati Ssuspettati u Proprjetà Ssekwestrata Assoċjata mill-forza navali mmexxija mill-Unjoni Ewropea lejn ir-Repubblika Unita tat-Tanzanija
L-UNJONI EWROPEA, minn hawn 'il quddiem imsejħa wkoll l-UE,
minn naħa waħda, u
IR-REPUBBLIKA UNITA TAT-TANZANIJA, minn hawn 'il quddiem imsejħa “it-Tanzanija”,
min-naħa l-oħra,
minn hawn 'il quddiem imsejħin flimkien il-“Partijiet”,
WARA LI KKUNSIDRAW:
— |
Ir-Riżoluzzjonijiet tal-Kunsill tas-Sigurtà tan-Nazzjonijiet Uniti (NU) (UNSCR) 1814 (2008), 1838 (2008), 1846 (2008), 1851 (2008) u UNHCRs sussegwenti, |
— |
Il-Konvenzjoni tan-Nazzjonijiet Uniti dwar il-Liġi tal-Baħar (UNCLOS) tal-1982, b'mod partikolari l-Artikoli 100 sa 107 u l-Artikolu 110 tagħha, |
— |
L-Azzjoni Konġunta tal-Kunsill tal-UE 2008/851/PESK tal-10 ta' Novembru 2008 dwar l-operazzjoni militari tal-Unjoni Ewropea bil-ħsieb ta' kontribut għad-deterrenza, il-prevenzjoni u t-trażżin tal-atti ta' piraterija u ta' serq bl-użu tal-armi 'l barra mix-xtut tas-Somalja (1) (Operazzjoni EUNAVFOR Atalanta), kif sussegwentement emendata, |
— |
Il-liġi internazzjonali dwar id-drittijiet tal-bniedem, inkluż il-Patt Internazzjonali dwar id-Drittijiet Ċivili u Politiċi tal-1966, u l-Konvenzjoni kontra t-Tortura u Trattament jew Pieni Krudili, Inumani jew Degradanti Oħra tal-1984, |
— |
li dan il-Ftehim ma jaffettwax id-drittijiet u l-obbligi tal-Partijiet skont ftehimiet internazzjonali u strumenti oħrajn li jistabbilixxu qrati u tribunali internazzjonali, inkluż l-Istatut tal-Qorti Kriminali Internazzjonali. |
WARA LI KKUNSIDRAW UKOLL:
— |
l-inizjattivi reġjonali fil-ġlieda kontra l-piraterija bħal inizjattivi taħt l-Unjoni Afrikana (UA), il-Komunità tal-Afrika tal-Lvant (EAC), il-Komunità għall-Iżvilupp tan-Nofsinhar tal-Afrika (SADC), il-Kodiċi ta' Kondotta ta' Ġibut u l-Istrateġija Reġjonali għas-Sigurtà Marittima u kontra l-piraterija adottata fil-Mawrizju fl-2010, |
LAĦQU FTEHIM KIF ĠEJ:
Artikolu 1
Għan
Dan il-Ftehim jiddefinixxi l-kondizzjonijiet u l-modalitajiet għat-trasferiment mill-EUNAVFOR lejn it-Tanzanija ta' persuni ssuspettati li għandhom l-intenzjoni li jwettqu, li qed iwettqu jew li wettqu atti ta' piraterija u li jinsabu miżmuma mill-EUNAVFOR, u proprjetà assoċjata ssekwestrata mill-EUNAVFOR, u għat-trattament tagħhom wara tali trasferiment.
Artikolu 2
Definizzjonijiet
Għall-finijiet ta' dan il-Ftehim:
(a) |
“Forza Navali mmexxija mill-Unjoni Ewropea (EUNAVFOR)” għandha tfisser il-kwartieri ġenerali militari tal-UE u l-kontinġenti nazzjonali li jikkontribwixxu għall-operazzjoni ’Atalanta’ tal-EU, il-bastimenti, l-inġenji tal-ajru u l-assi tagħhom; |
(b) |
“Operazzjoni” għandha tfisser it-tħejjija, l-istabbiliment, it-twettiq u l-appoġġ tal-missjoni militari stabbilita mill-Azzjoni Konġunta tal-Kunsill tal-UE 2008/851/PESK u/jew is-suċċessuri tagħha; |
(c) |
“kontinġenti nazzjonali” għandha tfisser l-unitajiet u l-bastimenti li jappartjenu lill-Istati Membri tal-Unjoni Ewropea u lill-Istati l-oħrajn li jipparteċipaw fl-operazzjoni; |
(d) |
“Stat Mittenti” għandha tfisser Stat li jipprovdi kontinġent nazzjonali għall-EUNAVFOR. |
(e) |
“Piraterija” għandha tfisser piraterija kif definita fl-Artikolu 101 tal-UNCLOS; |
(f) |
“Persuna ttrasferita” għandha tfisser kwalunke persuna ssuspettata li għandha l-intenzjoni li twettaq, li qiegħda twettaq jew li wettqet, atti ta piraterija u li ġiet ittrasferita mill-EUNAVFOR lejn it-Tanzanija taħt dan il-Ftehim. |
Artikolu 3
Prinċipji ġenerali
1. It-Tanzanija tista' taċċetta, fuq it-talba tal-EUNAVFOR, it-trasferiment mill-EUNAVFOR ta' persuni miżmuma mill-EUNAVFOR b'konnessjoni ma' piraterija u proprjetà assoċjata ssekwestrata u tressaq lil tali persuni u proprjetà lill-awtoritajiet kompetenti tagħha għall-fini ta' investigazzjoni u prosekuzzjoni. Il-ftehim dwar l-aċċettazzjoni ta' konsenja proposta ser isir fuq il-bażi ta' każ b'każ mit-Tanzanija, b'kont meħud taċ-ċirkostanzi rilevanti kollha inkluż il-post tal-inċident.
2. L-EUNAVFOR għandha tittrasferixxi persuni lil awtoritajiet kompetenti tal-infurzar tal-liġi tat-Tanzanija biss.
3. Il-Partijiet għandhom jittrattaw lill-persuni msemmija fl-Artikolu 1, kemm qabel kif ukoll wara t-trasferiment, b'mod uman u f'konformità mal-obbligi tad-drittijiet internazzjonali tal-bniedem, inkluż il-projbizzjoni kontra t-tortura u t-trattament jew il-pieni krudili, inumani u degradanti, il-projbizzjoni ta' detenzjoni illegali, u f'konformità mar-rekwiżit għal proċess ġust.
4. It-trasferiment ma għandux jitwettaq qabel l-awtoritajiet kompetenti tal-infurzar tal-liġi tat-Tanzanija jiddeċiedu, f'konformità mal-proċeduri interni tat-Tanzanija, abbażi ta' evidenza mibgħuta mill-EUNAVFOR permezz tal-kanali ta' komunikazzjoni rilevanti, li hemm prospetti raġonevoli li tkun assigurata kundanna tal-persuni miżmuma mill-EUNAVFOR.
Artikolu 4
Trattament, prosekuzzjoni u proċess ta' persuni ttrasferiti
1. Il-persuni trasferiti għandhom ikunu ttrattati b'mod uman u ma għandhomx ikunu soġġetti għal tortura jew għal trattament jew piena krudili, inumana jew degradanti, għandhom jirċievu akkomodazzjoni u ikel raġonevoli u jkollhom aċċess għal kura medika, u għandhom ikunu jistgħu jwettqu osservanza reliġjuża.
2. Il-persuni ttrasferiti għandhom jitressqu fil-pront quddiem imħallef jew uffiċjal ieħor awtorizzat mil-liġi biex jeżerċita setgħa ġudizzjarja, li għandu jiddeċiedi mingħajr dewmien dwar il-legalità tad-detenzjoni tagħhom u għandu jordna r-rilaxx tagħhom jekk id-detenzjoni ma tkunx ġustifikata.
3. Il-persuni ttrasferiti għandhom ikunu intitolati għal proċess fi żmien raġonevoli jew għal rilaxx.
4. Fid-determinazzjoni ta' kwalunkwe akkuża kriminali kontrihom, il-persuni ttrasferiti għandhom ikunu intitolati għal smigħ ġust u pubbliku minn tribunal kompetenti, indipendenti u imparzjali stabbilit mil-liġi.
5. Il-persuni ttrasferiti akkużati b'reat kriminali għandhom jitqiesu innoċenti sakemm ma jiġix ipprovat li huma ħatja skont il-liġi.
6. Fid-determinazzjoni ta' kwalunkwe akkuża kriminali kontrihom, il-persuni ttrasferiti għandhom ikunu intitolati għall-garanziji minimi li ġejjin, f'ugwaljanza sħiħa:
(a) |
li jkunu infurmati fil-pront u fid-dettall b'lingwa li jifhmu bin-natura u l-kaġun tal-akkuża miġjuba kontrihom; |
(b) |
li jkollhom żmien u faċilitajiet adegwati għat-tħejjija tad-difiża tagħhom u li jikkomunikaw ma' avukat tal-għażla tagħhom; |
(c) |
li l-proċess tagħhom jinstema' mingħajr dewmien żejjed; |
(d) |
li l-proċess jinstema' fil-preżenza tagħhom, u li jiddefendu ruħhom personalment jew permezz ta' assistenza legali tal-għażla tagħhom; li jkunu infurmati, jekk ma għandhomx assistenza legali, b'dan id-dritt; u li jkollhom assistenza legali assenjata lilhom, fi kwalunkwe każ fejn l-interessi tal-ġustizzja jesiġu dan, u mingħajr ħlas mingħandhom fi kwalunkwe każ bħal dan jekk ma jkollhomx mezzi suffiċjenti sabiex iħallsu għaliha; |
(e) |
li jeżaminaw, jew tiġi eżaminata għalihom, l-evidenza kollha kontrihom, inklużi affidavits tax-xhieda li wettqu l-arrest, u li jiksbu l-attendenza u l-eżami tax-xhieda favurihom bl-istess kondizzjonijiet bħal dawk tax-xhieda kontrihom; |
(f) |
li jkollhom assistenza mingħajr ħlas ta' interpretu jekk huma ma jkunux jifhmu jew jitkellmu il-lingwa użata fil-qorti; |
(g) |
li ma tkunx sfurzata jixhdu kontrihom stess jew jammettu l-ħtija. |
7. Il-persuni ttrasferiti li liġu kkundannati għal delitt għandu jkollhom id-dritt li l-kundanna u s-sentenza jiġu riveduti jew appellati fi tribunal ogħla f'konformità mal-liġijiet tat-Tanzanija.
8. It-Tanzanija tista', wara konsultazzjoni mal-UE, tittrasferixxi tali persuni kkundannati u li qed jiskontaw is-sentenza tagħhom fit-Tanzanija lejn Stat terz li jikkonforma mal-istandards tad-drittijiet tal-bniedem, bil-għan li jiskontaw is-sentenza tagħhom f'dak l-Istat terz. Fil-każ ta' tħassib serju dwar is-sitwazzjoni tad-drittijiet tal-bniedem f'dak l-Istat terz, ma għandu jseħħ l-ebda trasferiment qabel ma tinstab soluzzjoni sodisfaċenti permezz ta' konsultazzjonijiet bejn il-Partijiet biex ikun indirizzat it-tħassib espress.
Artikolu 5
Piena
L-ebda persuna ttrasferita ma għandha tkun iġġudikata għal reat li għandu piena massima aktar ħarxa mis-sentenza ta' għomor ħabs.
Artikolu 6
Reġistri u notifiki
1. Kwalunkwe trasferiment għandu jkun is-suġġett ta' dokument adatt iffirmat minn rappreżentant tal-EUNAVFOR u rappreżentant tal-awtoritajiet kompetenti tal-infurzar tal-liġi tat-Tanzanija.
2. L-EUNAVFOR għandha tipprovdi reġistri tad-detenzjoni lit-Tanzanija fir-rigward tal-persuni ttrasferiti. Dawn ir-reġistri għandhom jinkludu l-kondizzjoni fiżika tal-persuni ttrasferiti waqt id-detenzjoni, il-ħin tat-trasferiment lill-awtoritajiet tat-Tanzanija, ir-raġuni għad-detenzjoni tagħhom, il-ħin u l-post tal-bidu tad-detenzjoni tagħhom, u kwalunkwe deċiżjoni li ttieħdet fir-rigward tad-detenzjoni tagħhom.
3. It-Tanzanija għandha tkun responsabbli biex iżomm reġistru preċiż tal-persuni ttrasferiti kollha, inkluż iżda mhux limitat għaż-żamma ta' reġistri dwar kwalunkwe proprjetà ssekwestrata, il-kondizzjoni fiżika tal-persuni, il-post fejn huma miżmuma f'detenzjoni, kwalunkwe akkuża kontrihom u kwalunkwe deċiżjoni sinifikanti li ttieħdet matul il-prosekuzzjoni u l-proċess tagħhom.
4. Dawk ir-reġistri għandhom ikunu disponibbli għar-rappreżentanti tal-UE u tal-EUNAVFOR f'konformità mal-liġijiet u r-regolamenti tat-Tanzanija fuq talba bil-miktub lill-Ministru tal-Affarijiet Barranin tat-Tanzanija.
5. Barra minn hekk, it-Tanzanija għandha tinnotifika lill-EUNAVFOR bil-post tad-detenzjoni tal-persuni ttrasferiti taħt dan il-Ftehim, bi kwalunkwe deterjorament tal-kondizzjoni fiżika tagħhom u bi kwalunkwe allegazzjoni ta' trattament mhux adatt. Ir-rappreżentanti tal-UE u tal-EUNAVFOR għandhom ikollhom aċċess għall-persuni ttrasferiti taħt dan il-Ftehim sakemm tali persuni jkunu arrestati, soġġett għall-liġijiet applikabbli, u għandhom ikunu intitolati li jinterrogawhom.
6. Fuq talba tagħhom, l-aġenziji umanitarji nazzjonali u internazzjonali għandhom ikunu jistgħu jżuru l-persuni ttrasferiti taħt dan il-Ftehim.
7. Sabiex ikun żgurat li l-EUNAVFOR tkun tista' tipprovdi assistenza f'waqtha lit-Tanzanija bl-attendenza ta' xhieda mill-EUNAVFOR u l-provvediment ta' evidenza rilevanti, it-Tanzanija għandha tinnotifika lill-EUNAVFOR bl-intenzjoni tagħha li tibda proċedimenti ta' proċess kriminali kontra l-persuni ttrasferiti u l-iskeda ta' żmien għall-provvediment tal-evidenza, u s-smigħ tal-evidenza.
Artikolu 7
L-obbligu tal-UE u l-EUNAVFOR li tiġi ffaċilitata l-investigazzjoni u l-prosekuzzjoni
1. L-UE u l-EUNAVFOR, lil-limiti tal-mezzi u l-kapaċitajiet tagħhom, għandhom jipprovdu l-assistenza kollha lit-Tanzanija bil-ħsieb tal-investigazzjoni u l-prosekuzzjoni tal-persuni ttrasferiti.
2. B'mod partikolari, l-UE u l-EUNAVFOR għandhom:
(a) |
jikkonsenjaw ir-reġistri tad-detenzjoni mfassla skont l-artikolu 6(2) ta' dan il-Ftehim; |
(b) |
jipproċessaw kull evidenza skont ir-rekwiżiti tal-awtoritajiet kompetenti tat-Tanzanija kif miftiehem fl-arranġamenti tal-implimentazzjoni deskritti fl-Artikolu 10; |
(c) |
jagħmlu ħilithom biex jipproduċu dikjarazzjonijiet jew affidavits ta' xhieda mill-persunal tal-EUNAVFOR involut fi kwalunkwe inċident marbut mat-trasferiment ta' persuni taħt dan l-Arranġament; |
(d) |
jikkonsenjaw l-proprjetà rilevanti sekwestrata kollha fil-pussess tal-EUNAVFOR; |
(e) |
jippriżervaw jew jikkonsenjaw l-proprjetà ssekwestrata rilevanti kollha, xbihat, ritratti jew kwalunkwe oġġett ta' valur evidenzjali fil-pussess tal-EUNAVFOR; |
(f) |
jiżguraw l-attendenza tax-xhieda li jappartjenu għall-EUNAVFOR għall-iskop li tingħata evidenza fil-qorti (jew permezz ta' kollegament bit-TV jew kwalunkwe mezz teknoloġiku ieħor approvat) waqt il-proċess; |
(g) |
jiffaċilitaw l-attendenza ta' tali interpreti kif tista' tkun meħtieġa mill-awtoritajiet kompetenti tat-Tanzanija għall-iskop li jiġu assistiti l-investigazzjonijiet u l-proċessi li jinvolvu l-persuni ttrasferiti. |
Artikolu 8
Relazzjoni ma' drittijiet oħra ta' persuni ttrasferiti
Xejn f'dan il-Ftehim ma huwa maħsub li jidderoga, jew jista' jiġi interpretat bħala li jidderoga, minn kwalunkwe dritt li l-persuni ttrasferiti jista' jkollhom taħt il-liġi domestika jew internazzjonali applikabbli.
Artikolu 9
Kollegament u kwistjonijiet
1. Il-kwistjonijiet kollha li jitqajmu b'rabta mal-applikazzjoni ta' dan il-Ftehim għandhom jiġu eżaminati b'mod konġunt mit-Tanzanija u l-awtoritajiet kompetenti tal-UE.
2. Sakemm ma tinkisibx riżoluzzjoni minn qabel, il-kwistjonijiet rigward l-interpretazzjoni jew l-applikazzjoni ta' dan il-Ftehim għandhom jiġu riżolti esklużivament b'mezzi diplomatiċi bejn it-Tanzanija u r-rappreżentanti tal-UE.
Artikolu 10
Arranġamenti ta' implimentazzjoni
1. Għall-finijiet tal-applikazzjoni ta' dan il-Ftehim, kwistjonijiet operattivi, amministrattivi u tekniċi jistgħu jkunu s-suġġett ta' arranġamenti implimentattivi li għandhom jiġu konklużi bejn l-awtoritajiet kompetenti tat-Tanzanija minn naħa waħda u l-awtoritajiet kompetenti tal-UE, kif ukoll l-awtoritajiet kompetenti tal-Istati Mittenti, min-naħa l-oħra.
2. L-arranġamenti ta' implimentazzjoni jistgħu, fost l-oħrajn, ikopru:
(a) |
l-identifikazzjoni ta' awtoritajiet kompetenti tal-infurzar tal-liġi tat-Tanzanija li l-EUNAVFOR tista' tittrasferilhom persuni; |
(b) |
il-faċilitajiet ta' detenzjoni fejn ser jinżammu l-persuni ttrasferiti; |
(c) |
l-immaniġġar ta' dokumenti, inklużi dawk relatati mal-ġbir ta' evidenza, li ser ikunu kkonsenjati lill-awtoritajiet kompetenti tal-infurzar tal-liġi tat-Tanzanija meta jsir it-trasferiment tal-persuni; |
(d) |
punti ta' kuntatt għan-notifiki u l-modalitajiet għall-allert mill-EUNAVFOR lill-awtoritajiet kompetenti tat-Tanzanija; |
(e) |
formoli li jintużaw għat-trasferimenti; |
(f) |
provvista ta' appoġġ tekniku, għajnuna esperta, taħriġ u assistenza oħra fir-ripatrijazzjoni, il-kustodja, id-determinazzjoni taċ-ċittadinanza, ir-rappreżentenza legali u kwistjonijiet relatati ma' obbligazzjonijiet fuq talba tat-Tanzanija sabiex jinkisbu l-objettivi ta' dan il-Ftehim. |
Artikolu 11
Dħul fis-seħħ u tmiem
1. Dan il-Ftehim għandu jiġi japplikat b'mod proviżorju mid-data meta jiġi ffirmat u għandu jidħol fis-seħħ wara li kull waħda mill-Partijiet tkun innotifikat lill-Parti l-oħra li lestiet il-proċedura interna tagħha għar-ratifika ta' dan il-Ftehim.
2. Kwalunkwe Parti tista', permezz ta' notifika bil-miktub, ittemm dan il-Ftehim. F'tali każ, it-tmiem għandu jidħol fis-seħħ tliet xhur wara d-data ta' riċevuta tan-notifika.
3. Dan il-Ftehim jista' jiġi emendat permezz ta' ftehim bil-miktub bejn il-Partijiet.
4. It-tmiem ta' dan il-Ftehim ma għandu jaffettwa ebda dritt jew obbligu li jirriżulta mill-eżekuzzjoni tiegħu qabel tali tmiem, inklużi d-drittijiet tal-persuni ttrasferiti sakemm ikunu fil-kustodja jew ikunu pproċessati fit-Tanzanija.
5. Wara t-tmiem ta' dan il-Ftehim, id-drittijiet kollha tal-UE taħt dan il-Ftehim jistgħu jkunu eżerċitati minn kwalunkwe persuna maħtura mir-Rappreżentant Għoli tal-UE għall-Affarijiet Barranin u l-Politika ta' Sigurtà. Wara t-tmiem tal-Ftehim, in-notifiki kollha li kellhom isiru lill-EUNAVFOR taħt dan il-Ftehim għandhom isiru lir-Rappreżentant Għoli tal-UE għall-Affarijiet Barranin u l-Politika ta' Sigurtà.
Magħmul fi Brussell, fl-ewwel jum ta' April tas-sena elfejn u erbatax f'żewġ oriġinali, it-tnejn bil-lingwa Ingliża.
Għall-Unjoni Ewropea
Għar-Repubblika Unita tat-Tanzanija
(1) ĠU L 301, 12.11.2008, p. 33.