19.8.2011

Il-Ġurnal Uffiċjali tal-Unjoni Ewropea

C 241/1

Memorandum ta’ Ftehim bejn il-Kummissjoni Ewropea u l-Organizzazzjoni għas-Saħħa tal-Annimali (OIE) dwar ir-relazzjonijiet ġenerali tagħhom

2011/C 241/01

Il-KUMMISSJONI EWROPEA, minn hawn ’il quddiem imsejħa “il-Kummissjoni”, u

L-ORGANIZZAZZJONI DINJIJA GĦAS-SAĦĦA TAL-ANNIMALI,

minn hawn ’il quddiem imsejħa “l-OIE”,

DETERMINATI li

—	Ikomplu jiżviluppaw aktar il-kooperazzjoni tagħhom li ġiet stabbilita formalment fl-iskambju ta' ittri bejn il-Kummissjoni u l-OIE fl-2004 u mwessgħa matul is-snin riċenti,

BILLI:

—	Il-Kummissjoni ngħatat status ta' osservatur fl-OIE,

—	Fl-2010 ġie konkluż, bejn il-Kummissjoni u l-OIE, qafas ta' ftehim bil-għan li jiġi addattat il-Ftehim dwar il-Kontribuzzjoni Standard u li jissimplifika n-negozjati kuntrattwali ta' ftehimiet individwali speċifiċi għall-kontribuzzjoni,

—	Il-Kummissjoni u l-OIE beħsiebhom ikomplu jiżviluppaw iktar il-kooperazzjoni tagħhom, u b'mod speċjali jagħrfu l-ħtieġa li jiskambjaw l-informazzjoni permezz ta' proċeduri aktar formalizzati, xi ħaġa li diġà rrikonoxxew fi skambju ta' ittri fl-2010,

FTIEHMU DAN LI ĠEJ:

1.	Il-Kummissjoni tipprovdi “punt ta' kuntatt” għat-temi tekniċi u speċjalisti kollha li jolqtu lill-OIE. Dan il-punt ta' kuntatt għandu jinżamm mid-direttur tal-Kummissjoni responsabbli għas-saħħa tal-annimali u l-benesseri tagħhom.

(a)

L-OIE taqbel li tindirizza lill-Kummissjoni fuq temi tekniċi u speċjalizzati permezz tal-punt ta' kuntatt. L-OIE b'mod partikolari taqbel li tibgħat lill-punt ta' kuntatt il-komunikazzjonijiet marbuta mal-aġendi jew ir-rapporti tal-laqgħat kollha tal-esperti, il-kwestjonarji, l-avviżi tal-konferenzi jew l-istediniet għalihom. Fil-każ ta' temi tekniċi jew speċjalizzati jew ta' komunikazzjonijiet li jolqtu lill-persunal tal-Kummissjoni b'mod dirett, l-OIE taqbel li tibgħat kopja lill-punt ta' kuntatt.

(b)

Il-Kummissjoni taqbel li tindirizza lill-OIE permezz tad-Direttur Ġenerali tagħha. Il-Kummissjoni taqbel li tibgħat lid-Direttur Ġenerali tal-OIE il-komunikazzjoni marbuta mal-avviżi tal-konferenzi jew l-istediniet għalihom. Fil-każ ta' komunikazzjoni li tolqot, b'mod dirett, lil persunal ieħor tal-OIE, il-Kummissjoni taqbel li tibgħat kopja lid-Direttur Ġenerali tal-OIE. Il-Kummissjoni taqbel li temi tekniċi u speċjalizzati li jolqtu lir-Reġjun tal-Ewropa tal-OIE jiġu segwiti permezz tal-uffiċċju subreġjonali tal-OIE fi Brussell.

(a)

L-OIE taqbel li l-punt ta' kuntatt, jew rappreżentant, jipparteċipa fl-avvenimenti li ġejjin kif speċifikat hawn taħt:

—	Sessjonijiet, laqgħat u konferenzi tal-OIE,

—	B'tal-inqas żewġ delegati fil-Kumitat Konsultattiv tal-Fond Dinji għas-Saħħa u l-Benesseri tal-Annimali tal-OIE, bil-patt li jiġu ssodisfati l-kundizzjonijiet finanzjarji relatati,

—	B'tal-inqas żewġ esperti ta' akkumpanjament fil-Kumitat Permanenti Globali tal-Qafas Globali għall-kontroll progressiv tal-Mard Transkonfinali tal-Annimali (GF-TADs);

(b)	Il-Kummissjoni taqbel li d-Direttur Ġenerali tal-OIE, jew rappreżentant, jipparteċipa fil-Grupp Konsultattiv tal-Katina Alimentari u s-Saħħa tal-Annimali u tal-Pjanti, speċjalment fil-Kumitat Konsultattiv tas-Saħħa tal-Annimali.

(a)	Il-Kummissjoni taqbel li tippromovi l-parteċipazzjoni tal-esperti tagħha fil-konferenzi u l-laqgħat tekniċi u speċjalizzati tal-OIE, inkluża l-parteċipazzjoni tagħhom bħala esperti privati fi gruppi ad hoc u fi gruppi ta' ħidma;

(b)	L-OIE taqbel li tippromovi l-parteċipazzjoni tal-esperti tagħha fil-konferenzi u l-laqgħat, is-sessjonijiet ta' taħriġ u l-konferenzi tekniċi u speċjalisti organizzati mill-Kummissjoni.

Magħmul duplikatament fi Brussell, it-18 ta’ Awwissu 2011.

Għall-Kummissjoni Ewropea

John DALLI

Membru tal-Kummissjoni

Għall-Organizzazzjoni Dinjija għas-Saħħa tal-Annimali

Bernard VALLAT

Id-Direttur Ġenerali