1.   L-Andorra timpenja ruħha li tittrasponi u timplimenta d-disposizzjonijiet Komunitarji msemmija fl-Anness għal din id-Deċiżjoni fi żmien 18-il xahar mid-data ta' l-adozzjoni ta' din id-Deċiżjoni,

2.   Fir-rigward tar-Regolament (KE) Nru 178/2002 tal-Parlament Ewropew u tal-Kunsill tat-28 ta' Jannar 2002 li jistabilixxi l-prinċipji ġenerali u l-ħtiġijiet tal-liġi dwar l-ikel, li jistabilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta’ sigurtà ta’ l-ikel (6) l-Andorra jeħtiġilha tittrasponi u timplimenta biss id-disposizzjonijiet dwar is-sikurezza alimentari. Il-parteċipazzjoni ta' l-Andorra fis-sistema ta' twissija rapida stabbilita mill-Artikolu 50(6) ta' dak l-istess Regolament tinfetaħ mid-data tat-trasposizzjoni fil-liġi ta' l-Andorra u l-implimentazzjoni tal-miżuri msemmija hawn fuq.

3.   L-Andorra tikkomunika lill-Kummissjoni u lill-awtoritajiet kompetenti ta' l-Istati Membri l-elenki ta' l-istabbilimenti approvati f'konformità ma' l-Artikolu 31 tar-Regolament (KE) Nru 882/2004 tal-Parlament Ewropew u tal-Kunsill tad-29 ta' April 2004 dwar kontrolli uffiċjali mwettqa sabiex tiġi assigurata l-verifika tal-konformita' mal-leġislazzjoni ta' l-għalf u ta' l-ikel, ir-regoli tas-saħħa u l-benessri ta' l-annimali (7)

4.   L-istabbilimenti fl-Andorra jkunu suġġetti għall-ispezzjonijiet Komunitarji bl-istess mod li huma l-istabbilimenti fi ħdan il-Komunità, skond l-Artikolu 45 ta' l-istess Regolament. Kif previst fit-Titolu V tar-Regolament (KE) Nru 882/2004 l-Andorra tippreżenta l-pjan tagħha għas-sorveljanza uffiċjali lis-sotto-grupp veterinarju stabbilit f'konformità ma' l-Artikolu 2 tal-Protokoll dwar kwistjonijiet veterinarji. Aġġornamenti sussegwenti tal-pjan tagħha jiġu notifikati lill-Kummissjoni u approvati minnha. Il-Kummissjoni, min-naħa tagħha, tinforma lill-Istati Membri fi ħdan il-Kumitat Permanenti dwar il-Katina Alimentari u s-Saħħa ta' l-Annimali.

5.   Għal dak li għandu x'jaqsam mal-moviment mhux kummerċjali tal-pets u għall-implimentazzjoni tal-miżura uffiċjali ta' iżolament prevista taħt il-punt (b) tat-tielet sub-paragrafu ta’ l-Artikolu 14 tar-Regolament (KE) Nru 998/2003 tal-Parlament Ewropew u tal-Kunsill tas-26 ta' Mejju 2003 dwar il-ħtiġiet rigward is-saħħa ta' l-annimali li japplikaw għall-moviment mhux kummerċjali tal-pets (8), l-Andorra tikkonkludi ftehim ma' Franza u Spanja. Biex timplimenta l-miżura taħt l-Artikolu 15 ta' dak l-istess Regolament, l-Andorra tuża l-laboratorji ddeżinjati mid-Deċiżjoni tal-Kummissjoni Nru 2004/233/KE ta' l-4 ta' Marzu 2004 li tawtorizza l-laboratorji li jivverifikaw l-effettività f'ċerti karnivori domestiċi tat-tilqim kontra l-idrofobija (9). Fl-Anness II, parti B, taqsima 2 tar-Regolament, l-Andorra titneħħa mil-lista u tiddaħħal fl-Anness II Parti B taqsima 1.