13.6.2006 |
MT |
Il-Ġurnal Uffiċjali ta’ l-Unjoni Ewropea |
217 |
DEĊIŻJONI Nru. 1/2004 TAL-KUNSILL TA' ASSOĊJAZZJONI UE-BULGARIJA
tat-28 ta’ Settembru 2004
li temenda l-Artikoli 2 u 3 tal-Protokoll Addizzjonali għall-Ftehim Ewropew li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Repubblika tal-Bulgarija, min-naħa l-oħra, fir-rigward ta' estensjoni tal-perijodu stabbilit fl-Artikolu 9(4) tal-Protokoll 2 tal-Ftehim Ewropew
(2005/208/KE)
IL-KUNSILL TA' ASSOĊJAZZJONI,
Wara li kkunsidra l-Ftehim Ewropew li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Repubblika tal-Bulgarija, min-naħa l-oħra (1) (minn issa ‘l quddiem imsejjaħ il-“Ftehim Ewropew”),
Wara li kkunsidra l-Protokoll Addizzjonali għall-Ftehim Ewropew, u b'mod partikolari l-Artikolu 4 tiegħu,
Billi:
(1) |
Protokoll Addizzjonali għall-Ftehim Ewropew ġie ffirmat bejn il-Partijiet fil-21 ta' Novembru 2002. |
(2) |
Skond l-Artikolu 5 tiegħu, il-Protokoll Addizzjonali japplika provviżorjament mid-data tal-firma. |
(3) |
Bidliet reċenti fil-leġiżlazzjoni Bulgara mmodifikaw id-distribuzzjoni ta' funzjonijiet bejn l-istituzzjonijiet implimentattivi. |
(4) |
Sabiex tiġi żgurata l-konformità bejn il-Protokoll Addizzjonali u l-bidliet istituzzjonali Bulgari, hu xieraq li jiġu emendati l-Artikolu 2 u l-Artikolu 3 tal-Protokoll Addizzjonali billi jiġu adattati r-referenzi għall-istituzzjonijiet Bulgari rilevanti. Dan hu meħtieġ biex jippermetti l-implimentazzjoni fil-Bulgarija tal-Protokoll Addizzjonali. |
(5) |
Skond l-Artikolu 4 tiegħu, il-Protokoll Addizzjonali jista' jiġi emendat b'deċiżjoni tal-Kunsill ta' Assoċjazzjoni, |
IDDEĊIEDA KIF ĠEJ:
Artikolu 1
L-Artikoli 2 u 3 tal-Protokoll Addizzjonali għall-Ftehim Ewropew li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Repubblika tal-Bulgarija, min-naħa l-oħra, fir-rigward ta' estensjoni tal-perijodu stabbilit fl-Artikolu 9(4) tal-Protokoll 2 tal-Ftehim Ewropew, għandhom jiġu sostitwiti b'li ġej:
“Artikolu 2
Ir-Repubblika tal-Bulgarija għandha tissottometti lill-Kummissjoni Ewropea programm ta' ristrutturar u pjanijiet ta' ħidma li jissodisfaw il-ħtiġiet elenkati fl-Artikolu 9(4) tal-Protokoll 2, u li ġew stmati u miftehma mill-Kummissjoni tagħha dwar il-Protezzjoni tal-Kompetizzjoni.
Artikolu 3
Il-Kummissjoni għandha tipprovdi stima finali ta' jekk il-programm ta' ristrutturar u l-pjanijiet ta' ħidma jissodisfawx il-ħtiġiet elenkati fl-Artikolu 9(4) tal-Protokoll 2. Il-Kunsill ta' l-Unjoni Ewropea għandu jiddeċiedi jekk il-programm u l-pjanijiet jikkonformawx mal-ħtiġiet ta' l-Artikolu hawn fuq imsemmi.
Il-Kummissjoni għandha tagħmel monitoraġġ regolari ta' l-implimentazzjoni tal-pjanijiet f'isem il-Komunità, u l-Ministeru tal-Finanzi għandu jagħmel dan għar-Repubblika tal-Bulgarija.”
Artikolu 2
Din id-deċiżjoni għandha tidħol fis-seħħ fil-jum ta' l-adozzjoni tagħha mill-Kunsill ta' Assoċjazzjoni.
Magħmula fi Brussell, nhar it-28 ta’ Settembru 2004.
Għall-Kunsill ta' Assoċjazzjoni
Il-President
S. PASSY
(1) ĠU L 358, tal-31.12.1994, p. 3.