Dan it-test hu maħsub purament bħala għodda ta’ dokumentazzjoni u m’għandu l-ebda effett legali. L-istituzzjonijiet tal-Unjoni m'għandhom l-ebda responsabbiltà għall-kontenut tiegħu. Il-verżjonijiet awtentiċi tal-atti rilevanti, inklużi l-preamboli tagħhom, huma dawk ippubblikati fil-Ġurnal Uffiċjali tal-Unjoni Ewropea u disponibbli f’EUR-Lex. Dawk it-testi uffiċjali huma aċċessibbli direttament permezz tal-links inkorporati f’dan id-dokument

DEĊIŻJONI TAL-KUNSILL (PESK) 2024/254

tat-12 ta’ Jannar 2024

dwar miżuri restrittivi fid-dawl tas-sitwazzjoni fil-Gwatemala

Artikolu 1

L-Istati Membri għandhom jieħdu l-miżuri neċessarji biex jipprevjenu d-dħul fit-territorji tagħhom, jew it-tranżitu minnhom, tal-persuni fiżiċi elenkati fl-Anness.

L-Anness għandu jinkludi persuni fiżiċi:

(a)

li jkunu responsabbli għal “azzjonijiet li jimminaw id-demokrazija, l-istat tad-dritt jew it-trasferiment paċifiku tal-poter fil-Gwatemala, ikunu involuti f’dawn l-azzjonijiet, ikunu taw appoġġ lil dawn l-azzjonijiet jew ikunu ibbenefikaw minnhom, inkluż:

(i)

il-persekuzzjoni jew intimidazzjoni ta’ uffiċjali pubbliċi jew istituzzjonijiet pubbliċi involuti fi jew li jagħtu appoġġ lill-proċess elettorali, ta’ awtoritajiet eletti demokratikament jew tal-oppożizzjoni demokratika fil-Gwatemala;

(ii)

ir-ripressjoni, il-persekuzzjoni jew l-intimidazzjoni ta’ rappreżentanti tas-soċjetà ċivili jew tal-media, jew ta’ imħallfin, avukati jew prosekuturi;

(b)

li jimminaw id-demokrazija jew l-istat tad-dritt fil-Gwatemala permezz ta” mġiba finanzjarja ħażina serja li tikkonċerna fondi pubbliċi jew l-esportazzjoni mhux awtorizzata ta’ kapital;

(c)

assoċjati mal-persuni fiżiċi ddeżinjati skont il-punti (a) u (b) hawn fuq.

Il-paragrafu 1 ma għandux jobbliga lil Stat Membru li jirrifjuta d-dħul fit-territorju tiegħu ta’ ċittadini tiegħu stess.

Il-paragrafu 1 għandu jkun mingħajr preġudizzju għall-każijiet fejn Stat Membru jkun marbut minn obbligu tad-dritt internazzjonali, jiġifieri:

(a)

bħala pajjiż ospitanti ta’ organizzazzjoni intergovernattiva internazzjonali;

(b)

bħala pajjiż ospitanti ta’ konferenza internazzjonali mlaqqa’ min-Nazzjonijiet Uniti (NU) jew taħt il-patroċinju tagħhom;

(c)

skont ftehim multilaterali li jagħti privileġġi u immunitajiet; jew

(d)

skont it-Trattat ta’ Konċiljazzjoni tal-1929 (il-patt Lateran) konkluż mis-Santa Sede (Stat tal-Belt tal-Vatikan) u l-Italja.

Il-paragrafu 4 għandu japplika wkoll f’każijiet fejn Stat Membru jkun il-pajjiż ospitanti tal-Organizzazzjoni għas-Sigurtà u l-Kooperazzjoni fl-Ewropa (OSKE).

Il-Kunsill għandu jkun infurmat debitament fil-każijiet kollha fejn Stat Membru jagħti eżenzjoni skont il-paragrafi 4 jew 5.

L-Istati Membri jistgħu jagħtu eżenzjonijiet mill-miżuri imposti skont il-paragrafu 1 fejn l-ivvjaġġar ikun ġustifikat minħabba ħtieġa umanitarja urġenti jew minħabba attendenza f’laqgħat intergovernattivi jew laqgħat promossi jew ospitati mill-Unjoni, jew ospitati minn Stat Membru li jkollu l-Presidenza tal-OSKE, fejn isir djalogu politiku li jippromwovi direttament l-objettivi politiċi tal-miżuri restrittivi, inkluż appoġġ għall-istabbiltà u r-restawr tal-ordni kostituzzjonali fil-Gwatemala.

L-Istati Membri jistgħu jagħtu wkoll eżenzjonijiet mill-miżuri imposti skont il-paragrafu 1 fejn id-dħul jew it-tranżitu jkun meħtieġ biex isir proċess ġudizzjarju.

Stat Membru li jixtieq jagħti l-eżenzjonijiet imsemmija fil-paragrafu 7 jew 8 għandu jinnotifika lill-Kunsill bil-miktub. L-eżenzjoni għandha titqies bħala mogħtija dment li wieħed jew aktar mill-Istati Membri ma joġġezzjonawx bil-miktub fi żmien jumejn minn meta jirċievu n-notifika tal-eżenzjoni proposta. F’każ li wieħed jew aktar mill-Istati Membri joġġezzjonaw, il-Kunsill, li jaġixxi b’maġġoranza kwalifikata, jista’ jiddeċiedi li jagħti l-eżenzjoni proposta.

10.

Fejn, skont il-paragrafi 4, 5, 7, 8 u 9, Stat Membru jawtorizza d-dħul fit-territorju tiegħu, jew it-tranżitu minnu, ta’ persuni elenkati fl-Anness, l-awtorizzazzjoni għandha tkun limitata għall-iskop li għalih jingħata lill-persuna kkonċernata.

Artikolu 2

Il-fondi u r-riżorsi ekonomiċi kollha li jappartjenu lil, huma proprjetà ta’, jew huma miżmuma jew ikkontrollati minn, persuna fiżika jew ġuridika, entità jew korp kif elenkat fl-Anness għandhom jiġu ffriżati.

L-ebda fond jew riżorsa ekonomika ma għandha titqiegħed għad-dispożizzjoni, direttament jew indirettament, tal-persuni fiżiċi jew ġuridiċi, entitajiet jew korpi elenkati fl-Anness, jew għall-benefiċċju tagħhom.

L-Anness għandu jinkludi persuni fiżiċi jew ġuridiċi, entitajiet jew korpi:

(a)

li jkunu responsabbli għal “azzjonijiet li jimminaw id-demokrazija, l-istat tad-dritt jew it-trasferiment paċifika tal-poter fil-Gwatemala, ikunu involuti f’dawn l-azzjonijiet, ikunu taw appoġġ lil dawn l-azzjonijiet jew ikunu ibbenefikaw minnhom, inkluż:

(i)

il-persekuzzjoni jew intimidazzjoni ta’ uffiċjali pubbliċi jew istituzzjonijiet pubbliċi involuti jew li jagħtu appoġġ lill-proċess elettorali, ta’ awtoritajiet eletti demokratikament jew tal-oppożizzjoni demokratika fil-Gwatemala;

(ii)

ir-ripressjoni, il-persekuzzjoni jew l-intimidazzjoni ta’ rappreżentanti tas-soċjetà ċivili jew tal-media, jew ta’ imħallfin, avukati jew prosekuturi;

(b)

li jimminaw id-demokrazija jew l-istat tad-dritt fil-Gwatemala permezz ta” mġiba finanzjarja ħażina serja li tikkonċerna fondi pubbliċi jew l-esportazzjoni mhux awtorizzata ta’ kapital;

(c)

assoċjati mal-persuni fiżiċi ddeżinjati skont il-punti (a) u (b) hawn fuq.

B’deroga mill-paragrafi 1 u 2, l-awtoritajiet kompetenti tal-Istati Membri jistgħu jawtorizzaw ir-rilaxx ta’ ċerti fondi jew riżorsi ekonomiċi ffriżati, jew li ċerti fondi jew riżorsi ekonomiċi jsiru disponibbli, skont dawk il-kundizzjonijiet li huma jqisu xierqa, wara li jkunu ddeterminaw li l-fondi jew ir-riżorsi ekonomiċi kkonċernati:

(a)

huma meħtieġa biex jiġu ssodisfati l-ħtiġijiet bażiċi tal-persuni elenkati fl-Anness u tal-membri tal-familja dipendenti tagħhom, inkluż pagamenti għal ikel, kera jew ipoteka, mediċini u kura medika, taxxi, primjums tal-assigurazzjoni, u ħlasijiet ta’ servizzi pubbliċi;

(b)

huma maħsuba esklużivament għall-pagament ta’ tariffi professjonali raġonevoli u għar-rimborż tal-ispejjeż imġarrba assoċjati mal-provvista ta’ servizzi ġuridiċi;

(c)

huma maħsuba esklużivament għall-pagament ta’ tariffi jew imposti ta’ servizzi ta’ kustodja jew ġestjoni normali ta’ fondi jew riżorsi ekonomiċi ffriżati;

(d)

huma meħtieġa għal spejjeż straordinarji, dment li l-awtorità kompetenti tkun innotifikat lill-awtoritajiet kompetenti tal-Istati Membri l-oħrajn u lill-Kummissjoni bir-raġunijiet li għalihom tqis li jenħtieġ li tingħata awtorizzazzjoni speċifika, mill-inqas ġimagħtejn qabel l-awtorizzazzjoni; jew

(e)

iridu jitħallsu f’kont ta’ missjoni diplomatika jew uffiċċju konsolari jew organizzazzjoni internazzjonali li tgawdi minn immunitajiet skont id-dritt internazzjonali, jew jinħarġu minn tali kont, sa fejn tali pagamenti jkunu maħsuba biex jintużaw għal finijiet uffiċjali tal-missjoni diplomatika jew l-uffiċċju konsolari jew tal-organizzazzjoni internazzjonali.

L-Istat Membru kkonċernat għandu jinforma lill-Istati Membri l-oħra u lill-Kummissjoni bi kwalunkwe awtorizzazzjoni mogħtija skont dan il-paragrafu fi żmien ġimagħtejn mill-awtorizzazzjoni.

B’deroga mill-paragrafu 1, l-awtoritajiet kompetenti tal-Istati Membri jistgħu jawtorizzaw ir-rilaxx ta’ ċerti fondi jew riżorsi ekonomiċi ffriżati, dment li jkunu ssodisfati l-kundizzjonijiet li ġejjin:

(a)

il-fondi jew ir-riżorsi ekonomiċi huma s-suġġett ta’ deċiżjoni arbitrali mogħtija qabel id-data li fiha l-persuna fiżika jew ġuridika, l-entità jew il-korp imsemmija fil-paragrafu 1 ġew elenkati fl-Anness, jew ta’ deċiżjoni ġudizzjarja jew amministrattiva mogħtija fl-Unjoni, jew ta’ deċiżjoni ġudizzjarja infurzabbli fl-Istat Membru kkonċernat, qabel jew wara dik id-data;

(b)

il-fondi jew ir-riżorsi ekonomiċi ser jintużaw esklużivament biex jissodisfaw pretensjonijiet garantiti minn tali deċiżjoni jew rikonoxxuti bħala validi f’tali deċiżjoni, fil-limiti stabbiliti mil-liġijiet u r-regolamenti applikabbli li jirregolaw id-drittijiet ta’ persuni li jkollhom tali pretensjonijiet;

(c)

id-deċiżjoni ma tkunx għall-benefiċċju ta’ persuna fiżika jew ġuridika, entità jew korp elenkati fl-Anness; u

(d)

ir-rikonoxximent tad-deċiżjoni ma jkunx imur kontra l-ordni pubbliku fl-Istat Membru kkonċernat.

L-Istat Membru kkonċernat għandu jinforma lill-Istati Membri l-oħra u lill-Kummissjoni bi kwalunkwe awtorizzazzjoni mogħtija skont dan il-paragrafu fi żmien ġimagħtejn mill-awtorizzazzjoni.

Il-paragrafu 1 ma għandux iżomm lil persuna fiżika jew ġuridika, entità jew korp elenkati fl-Anness milli jagħmlu ħlas dovut skont kuntratt jew ftehim konkluż, jew obbligu li jkun irriżulta, qabel id-data li fiha tali persuna fiżika jew ġuridika, entità jew korp ikunu ġew elenkati fih, dment li l-Istat Membru kkonċernat ikun iddetermina li l-pagament ma ġiex riċevut, direttament jew indirettament, minn persuna fiżika jew ġuridika, entità jew korp imsemmija fil-paragrafu 1.

Il-paragrafu 2 ma għandux japplika għaż-żieda ma’ kontijiet iffriżati ta’:

(a)

imgħax jew dħul ieħor fuq dawk il-kontijiet;

(b)

pagamenti dovuti skont kuntratti, ftehimiet jew obbligi li ġew konklużi jew li rriżultaw qabel id-data meta dawk il-kontijiet saru soġġetti għall-miżuri previsti fil-paragrafi 1 u 2; jew

(c)

pagamenti dovuti skont deċiżjonijiet ġudizzjarji, amministrattivi jew arbitrali mogħtija fl-Unjoni jew li huma eżegwibbli fl-Istat Membru kkonċernat, dment li kwalunkwe mgħax, dħul ieħor u pagament bħal dan jibqa’ soġġett għall-miżuri previsti fil-paragrafu 1.

Il-paragrafi 1 u 2 ma għandhomx japplikaw għall-forniment, l-ipproċessar jew il-pagament ta’ fondi, assi finanzjarji jew riżorsi ekonomiċi oħra jew għall-forniment ta’ oġġetti u servizzi, li huma neċessarji biex jiġi żgurat it-twassil f’waqtu ta’ assistenza umanitarja jew biex jiġu appoġġati attivitajiet oħra li jappoġġaw il-ħtiġijiet bażiċi tal-bniedem fejn tali assistenza u attivitajiet oħra jitwettqu minn:

(a)

in-NU, inkluż il-programmi, il-fondi u entitajiet u korpi oħra tagħha, kif ukoll l-aġenziji speċjalizzati u l-organizzazzjonijiet relatati tagħha;

(b)

organizzazzjonijiet internazzjonali;

(c)

organizzazzjonijiet umanitarji bi status ta’ osservatur mal-Assemblea Ġenerali tan-Nazzjonijiet Uniti u membri ta’ dawk l-organizzazzjonijiet umanitarji;

(d)

organizzazzjonijiet mhux governattivi ffinanzjati bilateralment jew multilateralment li jipparteċipaw fil-Pjanijiet ta’ Rispons Umanitarju tan-NU, il-Pjanijiet ta’ Rispons għar-Refuġjati tan-NU u appelli oħra tan-NU jew raggruppamenti umanitarji kkoordinati mill-Uffiċċju tan-NU għall-Koordinazzjoni tal-Affarijiet Umanitarji;

(e)

organizzazzjonijiet u aġenziji li lilhom l-Unjoni tkun tat iċ-Ċertifikat ta’ Sħubija Umanitarja jew li jkunu ċċertifikati jew rikonoxxuti minn Stat Membru f’konformità ma’ proċeduri nazzjonali;

(f)

l-aġenziji speċjalizzati tal-Istati Membri; jew

(g)

l-impjegati, il-benefiċjarji, is-sussidjarji, jew is-sħab inkarigati mill-implimentazzjoni tal-entitajiet imsemmija fil-punti minn (a) sa (f) waqt, u sal-punt, li jkunu qed jaġixxu f’dawk il-kapaċitajiet.

Mingħajr preġudizzju għall-paragrafu 8, u b’deroga mill-paragrafi 1 u 2, l-awtoritajiet kompetenti ta’ Stat Membru jistgħu jawtorizzaw ir-rilaxx ta’ ċerti fondi jew riżorsi ekonomiċi ffriżati, jew it-tqegħid għad-dispożizzjoni ta’ ċerti fondi jew riżorsi ekonomiċi, skont dawk il-kundizzjonijiet li huma jqisu xierqa, wara li jkunu ddeterminaw li l-provvista ta’ tali fondi jew riżorsi ekonomiċi tkun meħtieġa biex jiġi żgurat it-twassil fil-ħin ta’ assistenza umanitarja jew biex jiġu appoġġati attivitajiet oħrajn li jsostnu l-bżonnijiet bażiċi tal-bniedem.

10.

Fin-nuqqas ta’ deċiżjoni negattiva, talba għall-informazzjoni jew notifika għal iktar żmien mill-awtorità kompetenti rilevanti fi żmien 5 ijiem tax-xogħol mid-data tal-wasla ta’ talba għal awtorizzazzjoni skont il-paragrafu 9, din l-awtorizzazzjoni għandha titqies li ngħatat.

11.

L-Istat Membru kkonċernat għandu jinforma lill-Istati Membri l-oħrajn u lill-Kummissjoni b’kull awtorizzazzjoni mogħtija skont il-paragrafi 9 u 10 fi żmien 4 ġimgħat minn tali awtorizzazzjoni.

Artikolu 3

Il-Kunsill, filwaqt li jaġixxi b’unanimità fuq proposta minn Stat Membru jew mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-“Rappreżentant Għoli”), għandu jistabbilixxi u jemenda l-lista fl-Anness.

Il-Kunsill għandu jikkomunika d-deċiżjoni msemmija fil-paragrafu 1, inkluż ir-raġunijiet għall-elenkar, lill-persuna fiżika jew ġuridika, entità jew korp ikkonċernati, kemm direttament, jekk l-indirizz ikun magħruf, jew inkella permezz tal-pubblikazzjoni ta’ notifika, li tipprovdi lil tali persuna fiżika jew ġuridika, entità jew korp b’opportunità li jippreżentaw xi osservazzjonijiet.

Fejn jitressqu osservazzjonijiet, jew tiġi ppreżentata evidenza sostanzjali ġdida, il-Kunsill għandu jirrieżamina d-deċiżjonijiet msemmija fil-paragrafu 1 u jinforma lill-persuna fiżika jew ġuridika, l-entità jew il-korp ikkonċernati skont il-każ.

Artikolu 4

L-Anness għandu jinkludi r-raġunijiet għall-elenkar tal-persuni fiżiċi u ġuridiċi, entitajiet u korpi msemmija fl-Artikoli 1 u 2.

L-Anness għandu jinkludi, meta tkun disponibbli, l-informazzjoni meħtieġa biex jiġu identifikati l-persuni fiżiċi jew ġuridiċi, l-entitajiet jew il-korpi kkonċernati. Fir-rigward ta’ persuni fiżiċi, tali informazzjoni tista’ tinkludi l-ismijiet u l-psewdonimi, id-data u l-post tat-twelid, in-nazzjonalità, in-numri tal-passaport u tal-karti tal-identità, il-ġeneru, l-indirizz, jekk magħruf, u l-funzjoni jew il-professjoni. Fir-rigward ta’ persuni ġuridiċi, entitajiet jew korpi, tali informazzjoni tista’ tinkludi l-ismijiet, il-post u d-data tar-reġistrazzjoni, in-numru tar-reġistrazzjoni, u l-post tan-negozju.

Artikolu 5

Il-Kunsill u r-Rappreżentant Għoli għandhom jipproċessaw data personali sabiex iwettqu l-kompiti tagħhom skont din id-Deċiżjoni, b’mod partikolari:

(a)

fir-rigward tal-Kunsill, il-preparazzjoni u l-emendar tal-Anness;

(b)

fir-rigward tar-Rappreżentant Għoli, il-preparazzjoni ta’ emendi għall-Anness.

Il-Kunsill u r-Rappreżentant Għoli jistgħu jipproċessaw, fejn applikabbli, data rilevanti b’rabta ma’ reati kriminali mwettqa minn persuni fiżiċi elenkati, u ma’ kundanni penali jew miżuri ta’ sigurtà li jikkonċernaw lit-tali persuni, biss sa fejn tali proċessar ikun meħtieġ għall-preparazzjoni tal-Anness.

Għall-finijiet ta’ din id-Deċiżjoni, il-Kunsill u r-Rappreżentant Għoli huma maħtura bħala “kontrollur” skont it-tifsira tal-Artikolu 3, il-punt (8), tar-Regolament (UE) 2018/1725 tal-Parlament Ewropew u tal-Kunsill ( 1 ), sabiex jiġi żgurat li l-persuni fiżiċi kkonċernati jkunu jistgħu jeżerċitaw id-drittijiet tagħhom skont dak ir-Regolament.

Artikolu 6

Ebda pretensjoni b’konnessjoni ma’ xi kuntratt jew tranżazzjoni, li l-prestazzjoni tagħhom tkun ġiet affettwata, direttament jew indirettament, totalment jew parzjalment, mill-miżuri imposti skont din id-Deċiżjoni, inkluż pretensjonijiet għal indennizz jew kwalunkwe pretensjoni oħra ta’ dan it-tip, bħal pretensjoni għal kumpens jew pretensjoni taħt garanzija, partikolarment pretensjoni għal estensjoni jew għall-ħlas ta’ bond, garanzija jew indennizz, b’mod partikolari garanzija finanzjarja jew indennizz finanzjarju, ta’ kwalunkwe għamla, ma għandha tiġi ssodisfata, jekk din issir minn:

(a)

persuni fiżiċi jew ġuridiċi, entitajiet jew korpi ddeżinjati elenkati fl-Anness;

(b)

kwalunkwe persuna fiżika jew ġuridika, entità jew korp li jaġixxu permezz ta’ waħda mill-persuni fiżiċi jew ġuridiċi, entitajiet jew korpi msemmija fil-punt (a) jew f’isimhom.

Artikolu 7

Għandha tkun ipprojbita l-parteċipazzjoni, bil-ħsieb jew intenzjonata, f’attivitajiet li l-objettiv jew l-effett tagħhom ikun iċ-ċirkomvenzjoni tal-projbizzjonijiet stabbiliti f’din id-Deċiżjoni.

Artikolu 8

Sabiex jiġi mmassimizzat l-impatt tal-miżuri stipulati f’din id-Deċiżjoni, l-Unjoni għandha tħeġġeġ lil Stati terzi jadottaw miżuri restrittivi simili għal dawk previsti f’din id-Deċiżjoni.

Artikolu 9

▼M2

Din id-Deċiżjoni għandha tapplika sat- ►M4 13 ta’ Jannar 2027 ◄ .

▼B

Din id-Deċiżjoni għandha tinżamm taħt rieżami kostanti. Għandha tiġġedded, jew tiġi emendata kif xieraq, jekk il-Kunsill iqis li ma jkunux intlaħqu l-objettivi tagħha.

Fir-reviżjoni tal-miżuri restrittivi meħuda skont l-Artikolu 1(2)(b) u l-Artikolu 2(3)(b), il-Kunsill għandu jqis kif inhu xieraq jekk il-persuni inkwistjoni humiex soġġetti għal proċeduri ġudizzjarji jew le fir-rigward tal-imġieba li għaliha kienu elenkati.

L-eċċezzjonijiet imsemmija fl-Artikolu 2(8), (9) u (10) fir-rigward tal-Artikolu 2(1) u (2) għandhom jiġu riveduti f’intervalli regolari u mill-inqas kull 12-il xahar jew, wara bidla fundamentali fiċ-ċirkostanzi, fuq talba urġenti ta’ kwalunkwe Stat Membru, tar-Rappreżentant Għoli, jew tal-Kummissjoni.

Artikolu 10

Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

▼M3

ANNESS

LISTA TA’ PERSUNI FIŻIĊI U ĠURIDIĊI, ENTITAJIET U KORPI MSEMMIJA FL-ARTIKOLI 1 U 2

A. Persuni Naturali

	Isem	Informazzjoni ta' identifikazzjoni	Raġunijiet għall-inklużjoni fil-lista	Data tal-elenkar
▼M4
1.	María Consuelo PORRAS ARGUETA DE PORRES	Pożizzjoni(jiet): Avukat Ġenerali tal-Gwatemala, Kap tal-Ministeru Pubbliku (Ministerio Público) tal-Gwatemala Data tat-twelid: 23.8.1953 Nazzjonalità: Gwatemaljana Numru ta’ identifikazzjoni nazzjonali: 242159605 (passaport) Sess: mara	Fil-pożizzjoni tagħha bħala Avukat Ġenerali tal-Gwatemala, l-ogħla impjegat taċ-ċivil fil-Ministeru Pubbliku (Ministerio Público) tal-Gwatemala (ekwivalenti għall-Kap tal-Uffiċċju tal-Prosekutur Pubbliku jew Kap Prosekutur), María Consuelo Porras Argueta De Porres (magħrufa wkoll bħala “Porras”) hija involuta fi sforzi biex jiġu annullati r-riżultati tal-ewwel u t-tieni ċiklu ta’ elezzjonijiet li saru f’Ġunju u f’Awwissu 2023, inkluż permezz ta’ investigazzjonijiet kriminali foloz immirati lejn it-Tribunal Elettorali Suprem, il-partit politiku Movimiento Semilla u l-President Arévalo. Barra minn hekk, taħt it-tmexxija tagħha l-Ministeru Pubbliku fetaħ proċedimenti arbitrarji kontra ġurnalisti indipendenti, prosekuturi, imħallfin, u attivisti tas-soċjetà ċivili inkluż mexxejja indiġeni u studenti. Għalhekk María Consuelo Porras Argueta De Porres hija responsabbli għal azzjonijiet li jdagħjfu d-demokrazija, l-istat tad-dritt u t-trasferiment paċifiku tal-poter fil-Gwatemala.	2.2.2024
2.	Ángel Arnoldo PINEDA ÁVILA	Pożizzjoni(jiet): Segretarju Ġenerali tal-Ministeru Pubbliku (Ministerio Público) tal-Gwatemala Data tat-twelid: 10.5.1975 Nazzjonalità: Gwatemaljana Numru ta’ identifikazzjoni nazzjonali: 238937186 (passaport) Sess: raġel	Ángel Pineda Ávila huwa s-Segretarju Ġenerali tal-Ministeru Pubbliku (Ministerio Público) tal-Gwatemala, (ekwivalenti għall-Uffiċċju tal-Prosekutur Pubbliku). Huwa t-tieni fil-kmand fil-Ministeru Pubbliku wara l-Avukat Ġenerali, u l-Kap tas-Segretarjat Ġenerali ta’ dik l-istituzzjoni. F’dik il-pożizzjoni, Ángel Pineda Ávila huwa involut fi sforzi biex jiġu annullati r-riżultati tal-ewwel u t-tieni ċiklu ta’ elezzjonijiet li saru f’Ġunju u f’Awwissu 2023, inkluż permezz ta’ investigazzjonijiet kriminali foloz immirati lejn it-Tribunal Elettorali Suprem, il-partit politiku Movimiento Semilla u l-President Arévalo. F’Diċembru 2023, huwa pparteċipa f’konferenza stampa fejn il-Ministeru Pubbliku ppreżenta pretensjonijiet li l-eżitu tal-ewwel ċiklu ta’ elezzjonijiet f’Ġunju 2023 ma kienx validu. Fl-2025, Ángel Pineda Ávila kien involut fl-investigazzjoni falza ta’ mexxejja indiġeni li kienu akkużati b’terroriżmu għall-azzjonijiet tagħhom fid-difiża tar-riżultati elettorali tal-2023. Għalhekk Ángel Pineda Ávila qed jipparteċipa f’azzjonijiet li jdagħjfu d-demokrazija, l-istat tad-dritt u t-trasferiment paċifiku tal-poter fil-Gwatemala.	2.2.2024
3.	José Rafael CURRUCHICHE CUCUL	Pożizzjoni(jiet): Kap tal-Uffiċċju tal-Prosekuzzjoni Speċjali Kontra l-Impunità, il-Ministeru Pubbliku (Ministerio Público) tal-Gwatemala Data tat-twelid: 28.7.1970 Nazzjonalità: Gwatemaljana Numru ta’ identifikazzjoni nazzjonali: 229488307 (passaport) Sess: raġel	José Curruchiche Cucul huwa l-Kap tal-Uffiċċju tal-Prosekuzzjoni Speċjali Kontra l-Impunità (FECI), li jopera taħt il-Ministeru Pubbliku (Ministerio Público) tal-Gwatemala (ekwivalenti għall-Uffiċċju tal-Prosekutur Pubbliku). Taħt it-tmexxija tiegħu, il-FECI mexxa l-investigazzjoni li għaddejja dwar il-ħolqien tal-partit politiku Movimiento Semilla tal-President Arévalo. Huwa pparteċipa personalment fir-raid mill-uffiċċju tal-Prosekutur Pubbliku fil-bini tat-Tribunal Elettorali Suprem li kien jinvolvi l-ftuħ ta’ kaxxi tal-voti ssiġillati. Barra minn hekk, huwa kien involut fit-talba għas-sospensjoni tal-personalità ġuridika ta’ Movimiento Semilla f’Lulju 2023. Minbarra dan, f’Diċembru 2023, huwa pparteċipa f’konferenza stampa fejn il-Ministeru Pubbliku ppreżenta pretensjonijiet li l-eżitu tal-ewwel ċiklu ta’ elezzjonijiet f’Ġunju 2023 ma kienx validu. Huwa kien involut personalment fl-investigazzjoni falza u fil-prosekuzzjoni falza ta’ awtoritajiet eletti demokratikament, eks rappreżentanti tal-media (bħall-ġurnalist José Rubén Zamora), kif ukoll operaturi tal-ġustizzja, speċjalment l-investigazzjoni falza u l-prosekuzzjoni falza ta’ dawk li ġġieldu kontra l-korruzzjoni u l-impunità mal-Kummissjoni Internazzjonali Kontra l-Impunità fil-Gwatemala (CICIG). Permezz ta’ dawk l-azzjonijiet, José Curruchiche Cucul huwa involut fi sforzi biex jiġu annullati r-riżultati tal-elezzjonijiet tal-2023 fil-Gwatemala. Għalhekk huwa responsabbli għal azzjonijiet li jdagħjfu d-demokrazija, l-istat tad-dritt u t-trasferiment paċifiku tal-poter fil-Gwatemala.	2.2.2024
▼M3
4.	Leonor Eugenia MORALES LAZO DE SÁNCHEZ	Pożizzjoni(jiet): Prosekutur fl-Uffiċċju tal-Prosekuzzjoni Speċjali Kontra l-Impunità, Ministeru Pubbliku (Ministerio Público) tal-Gwatemala Data tat-twelid: 19.9.1979 Nazzjonalità: Guatemaljana Numru ta' identifikazzjoni nazzjonali: 2227901800101 Sess: mara	Leonor Morales Lazo De Sánchez hija prosekutur fl-Uffiċċju tal-Prosekuzzjoni Speċjali Kontra l-Impunità (FECI), li jopera taħt il-Ministeru Pubbliku (Ministerio Público) tal-Gwatemala (ekwivalenti għall-Uffiċċju tal-Prosekutur Pubbliku). Hija involuta direttament fl-investigazzjoni li għaddejja dwar il-ħolqien tal-partit politiku Movimiento Semilla tal-President Arévalo. Wara t-tieni ċiklu tal-elezzjonijiet Presidenzjali f’Awwissu 2023, hija pparteċipat fir-raid mill-Ministeru Pubbliku fil-bini tat-Tribunal Elettorali Suprem li kien jinvolvi l-ftuħ ta’ kaxxi tal-voti ssiġillati. Hija pparteċipat ukoll f’konferenza stampa f’Diċembru 2023 fejn il-Ministeru Pubbliku ppreżenta pretensjonijiet li l-eżitu tal-ewwel ċiklu ta’ elezzjonijiet f’Ġunju 2023 ma kienx validu. Permezz ta’ dawk l-azzjonijiet, Leonor Morales Lazo De Sánchez hija involuta fi sforzi biex jiġu annullati r-riżultati tal-elezzjonijiet tal-2023 fil-Gwatemala. Għalhekk hija responsabbli għad-dgħajfien tad-demokrazija, l-istat tad-dritt u t-trasferiment paċifiku tal-poter fil-Gwatemala.	2.2.2024
5.	Fredy Raúl ORELLANA LETONA	Pożizzjoni(jiet): Imħallef tas-Seba’ Qorti Kriminali tal-Ewwel Istanza Data tat-twelid: 4.11.1982 Nazzjonalità: Guatemaljana Numru ta' identifikazzjoni nazzjonali: 253127548 (passport) Sess: raġel	Bħala Mħallef tas-Seba’ Qorti tal-Ewwel Istanza Kriminali, Fredy Orellana Letona huwa responsabbli għas-superviżjoni u l-awtorizzazzjoni tal-azzjonijiet tal-Uffiċċju tal-Prosekutur Speċjali Kontra l-Impunità (FECI), li jopera taħt Ministeru Pubbliku (Ministerio Público) tal-Gwatemala (ekwivalenti għall-Uffiċċju tal-Prosekutur Pubbliku), li jinvestiga allegati irregolaritajiet fil-ħolqien tal-partit politiku Movimiento Semilla, li l-kandidat tiegħu rebaħ it-tieni ċiklu tal-elezzjonijiet presidenzjali fil-Gwatemala f’Awwissu 2023. Bħala imħallef superviżur, Fredy Orellana Letona awtorizza raids fil-kwartieri ġenerali tal-Movimiento Semilla f’Lulju 2023 u fil-bini tat-Tribunal Elettorali Suprem f’Lulju u f’Settembru 2023. Huwa ordna wkoll is-sospensjoni proviżorja tal-personalità ġuridika ta’ Movimiento Semilla u ċaħad l-aċċess għall-fajl tal-każ għad-difiża. Huwa ffaċilita l-azzjonijiet tal-FECI li jħarrku lill-awtoritajiet eletti u lill-maġistrati tat-Tribunal Elettorali Suprem. Permezz ta’ dawk l-azzjonijiet, Fredy Orellana Letona huwa involut fi sforzi biex jiġu annullati r-riżultati tal-elezzjonijiet tal-2023 fil-Gwatemala. Għalhekk huwa responsabbli għad-dgħajfien tad-demokrazija, l-istat tad-dritt u t-trasferiment paċifiku tal-poter fil-Gwatemala.	2.2.2024
6.	Jimi Rodolfo BREMER RAMÍREZ	Pożizzjoni(jiet): Imħallef Kriminali tal-Ewwel Istanza, l-Għaxar Qorti, il-Gwatemala Data tat-twelid: 25.9.1978 Nazzjonalità: Gwatemaljana Numru ta' identifikazzjoni nazzjonali: 1913604570920 Sess: raġel	Jimi Bremer Ramírez huwa l-Imħallef Kriminali tal-Ewwel Istanza tal-Għaxar Qorti fil-Gwatemala. F'din il-kapaċità, huwa ħareġ mandati ta' arrest u awtorizza investigazzjonijiet ibbażati fuq akkużi ffabbrikati, u ssospenda s-seduti f'dawk il-każijiet u b'hekk illimita d-dritt għal smigħ pubbliku, aċċess għall-ġustizzja u d-dritt għal proċess ġust tal-konvenuti. Fi Frar 2023, bħala mħallef superviżorju, Jimi Bremer Ramírez awtorizza t-talba tal-Uffiċċju tal-Prosekutur Speċjali Kontra l-Impunità (FECI), li jopera taħt il-Ministeru Pubbliku (Ministerio Público) tal-Gwatemala (ekwivalenti għall-Uffiċċju tal-Prosekutur Pubbliku) biex jinvestiga diversi ġurnalisti mill-gazzetti El Periódico u Prensa Comunitaria, wara r-rappurtaġġ tagħhom ta' korruzzjoni f'livell għoli fil-Gwatemala. Huwa ssospenda u ddifferixxa s-seduti tal-qorti tal-fundatur ta' El Periódico José Rubén Zamora mill-inqas sitt darbiet f'waħda mill-kawżi kriminali kontrih. Barra minn hekk, Jimi Bremer Ramírez dewwem il-proċeduri fil-kawżi kriminali kontra l-eks prosekuturi Stuardo Campo u Eduardo Pantaleón, u kontra l-avukat għall-Kummissjoni Internazzjonali kontra l-Impunità fil-Gwatemala (CICIG) li m'għadhiex teżisti, Claudia González Orellana. Permezz ta' dawk l-azzjonijiet, Jimi Bremer Ramírez ħa sehem f'azzjonijiet li jdgħajfu d-demokrazija u l-istat tad-dritt fil-Gwatemala u appoġġahom, inkluż il-persekuzzjoni u l-intimidazzjoni tar-rappreżentanti tal-media, u tal-avukati u l-prosekuturi fil-Gwatemala	12.6.2025
▼M4
7.	Ricardo Rafael MÉNDEZ-RUIZ VALDÉS	Pożizzjoni(jiet): President, Foundation against Terrorism (Fundación contra el Terrorismo), FCT Data tat-twelid: 9.10.1959 Nazzjonalità: Gwatemaljana Numru ta’ identifikazzjoni nazzjonali: 268287872 (passaport) Sess: raġel Individwi assoċjati: Raúl Amílcar Falla Ovalle Entitajiet assoċjati: President, Foundation against Terrorism (Fundación contra el Terrorismo), FCT Media soċjali: https://x.com/rmendezruiz	Ricardo Méndez-Ruiz Valdés huwa l-President tal-Foundation Against Terrorism (Fundación contra el Terrorismo), FCT. L-FCT hija involuta f’kampanja ta’ prosekuzzjonijiet politikament motivati mmexxija mill-Uffiċċju tal-Avukat Ġenerali tal-Gwatemala kontra ġurnalisti, mexxejja indiġeni, prosekuturi u mħallfin li kienu involuti fl-esponiment tal-korruzzjoni u l-impunità fil-Gwatemala kif ukoll kontra l-gvern elett demokratikament tal-Gwatemala, inkluż il-President Bernardo Arévalo. L-FCT bdiet għadd kbir ta’ investigazzjonijiet kriminali kontra operaturi tal-ġustizzja, ġurnalisti u rappreżentanti tal-gvern billi ressqet ilmenti kriminali u billi aġixxiet bħala rikorrent terz fi proċedimenti kriminali li ma jirrispettawx id-drittijiet fundamentali tal-konvenuti. Permezz ta’ dawk l-azzjonijiet, Ricardo Méndez-Ruiz Valdés ħa sehem f’azzjonijiet li jdgħajfu l-istat tad-dritt fil-Gwatemala, inkluż il-persekuzzjoni u l-intimidazzjoni tar-rappreżentanti tal-media, tas-soċjetà ċivili, u tal-avukati, l-imħallfin u l-prosekuturi.	12.6.2025
8.	Raúl FALLA OVALLE	Pożizzjoni(jiet): Rappreżentant legali, Foundation against Terrorism (Fundación contra el Terrorismo), FCT Data tat-twelid: 9.11.1971 Nazzjonalità: Gwatemaljana Numru ta’ identifikazzjoni nazzjonali: 179421166 (passaport) Sess: raġel Individwi assoċjati: Ricardo Méndez-Ruiz Valdés Entitajiet assoċjati: President, Foundation against Terrorism (Fundación contra el Terrorismo), FCT Media soċjali: https://x.com/RaulFalla31	Raúl Falla Ovalle huwa r-Rappreżentant legali tal-Foundation Against Terrorism (Fundación contra el Terrorismo), FCT. L-FCT hija involuta f’kampanja ta’ prosekuzzjonijiet politikament motivati mmexxija mill-Uffiċċju tal-Avukat Ġenerali tal-Gwatemala kontra ġurnalisti, mexxejja indiġeni, prosekuturi u mħallfin li kienu involuti fl-esponiment tal-korruzzjoni u l-impunità fil-Gwatemala kif ukoll kontra l-gvern elett demokratikament tal-Gwatemala, inkluż il-President Bernardo Arévalo. L-FCT bdiet għadd kbir ta’ investigazzjonijiet kriminali kontra operaturi tal-ġustizzja, ġurnalisti u rappreżentanti tal-gvern billi ressqet ilmenti kriminali u billi aġixxiet bħala rikorrent terz fi proċedimenti kriminali li ma jirrispettawx id-drittijiet fundamentali tal-konvenuti. Permezz ta’ dawk l-azzjonijiet, Raúl Falla Ovalle jieħu sehem f’azzjonijiet li jdgħajfu l-istat tad-dritt fil-Gwatemala, inkluż il-persekuzzjoni u l-intimidazzjoni tar-rappreżentanti tal-media, tas-soċjetà ċivili, u tal-avukati, l-imħallfin u l-prosekuturi.	12.6.2025
▼M3

B. Persuni ġuridiċi, entitajiet u korpi:

Isem

Informazzjoni ta' identifikazzjoni

Raġunijiet għall-inklużjoni fil-lista

Data tal-elenkar

Foundation against Terrorism (Fundación Contra el Terrorismo), FCT

Data tar-reġistrazzjoni:

5.7.2013

Individwi assoċjati:

Ricardo Méndez-Ruiz Valdés

Raúl Amílcar Falla Ovalle

Il-Foundation Against Terrorism (Fundación contra el Terrorismo), FCT, hija involuta f'kampanja ta' prosekuzzjonijiet politikament motivati mmexxija mill-Uffiċċju tal-Avukat Ġenerali tal-Gwatemala kontra ġurnalisti, prosekuturi u mħallfin li kienu involuti fl-esponiment tal-korruzzjoni u l-impunità fil-Gwatemala kif ukoll kontra l-gvern elett demokratikament tal-Gwatemala, inkluż il-President Bernardo Arévalo. L-FCT bdiet għadd kbir ta' investigazzjonijiet kriminali kontra operaturi tal-ġustizzja, ġurnalisti u rappreżentanti tal-gvern billi ressqet ilmenti kriminali u billi aġixxiet bħala rikorrent terz fi proċedimenti kriminali li ma jirrispettawx id-drittijiet fundamentali tal-konvenuti.

Permezz ta' dawk l-azzjonijiet, l-FCT tieħu sehem f'azzjonijiet li jdgħajfu l-istat tad-dritt fil-Gwatemala, inkluż il-persekuzzjoni u l-intimidazzjoni tar-rappreżentanti tal-media, u tal-avukati, l-imħallfin u l-prosekuturi.

12.6.2025

( 1 ) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar tad-data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

		Il-Ġurnal Uffiċjali
		Nru	Paġna	Data
M1	DEĊIŻJONI TAL-KUNSILL (PESK) 2024/457 tat-2 ta’ Frar 2024	L 457	1	2.2.2024
►M2	DEĊIŻJONI TAL-KUNSILL (PESK) 2024/3198 tas-16 ta’ Diċembru 2024	L 3198	1	17.12.2024
►M3	DEĊIŻJONI TAL-KUNSILL (PESK) 2025/1199 tat-12 ta’ Ġunju 2025	L 1199	1	12.6.2025
►M4	DEĊIŻJONI TAL-KUNSILL (PESK) 2026/88 tad-9 ta’ Jannar 2026	L 88	1	12.1.2026