Dan it-test hu maħsub purament bħala għodda ta’ dokumentazzjoni u m’għandu l-ebda effett legali. L-istituzzjonijiet tal-Unjoni m'għandhom l-ebda responsabbiltà għall-kontenut tiegħu. Il-verżjonijiet awtentiċi tal-atti rilevanti, inklużi l-preamboli tagħhom, huma dawk ippubblikati fil-Ġurnal Uffiċjali tal-Unjoni Ewropea u disponibbli f’EUR-Lex. Dawk it-testi uffiċjali huma aċċessibbli direttament permezz tal-links inkorporati f’dan id-dokument

REGOLAMENT TA' IMPLIMENTAZZJONI TAL-KUMMISSJONI (UE) 2017/39

tat-3 ta' Novembru 2016

dwar ir-regoli għall-applikazzjoni tar-Regolament (UE) Nru 1308/2013 tal-Parlament Ewropew u tal-Kunsill f'dak li għandu x'jaqsam mal-għajnuna tal-Unjoni għall-provvista ta' frott u ħxejjex, banana u ħalib fl-istabbilimenti edukattivi

Artikolu 1

Kamp ta' applikazzjoni u definizzjoni

Dan ir-Regolament jistabbilixxi regoli għall-applikazzjoni tar-Regolamenti (UE) Nru 1308/2013 u (UE) Nru 1370/2013 fir-rigward tal-għajnuna tal-Unjoni għall-provvista u d-distribuzzjoni tal-frott u l-ħxejjex, tal-prodotti pproċessati tal-frott u l-ħxejjex u tal-prodotti friski tas-settur tal-banana (“il-frott u l-ħxejjex għall-iskejjel”), u tal-ħalib u l-prodotti tal-ħalib (“il-ħalib fl-iskejjel”) lit-tfal fl-istabbilimenti edukattivi, għall-miżuri edukattivi ta' akkumpanjament u għal ċerti spejjeż relatati fil-qafas tal-iskema msemmija fl-Artikolu 23 tar-Regolament (UE) Nru 1308/2013 (“l-iskema tal-iskejjel”).

Għall-finijiet tal-iskema tal-iskejjel, “sena skolastika” tfisser perjodu li jibda mill-1 ta' Awwissu sal-31 ta' Lulju tas-sena ta' wara.

Artikolu 2

Strateġiji tal-Istati Membri

L-istrateġija ta' Stat Membru kif imsemmi fl-Artikolu 23(8) tar-Regolament (UE) Nru 1308/2013 u fl-Artikolu 2 tar-Regolament Delegat (UE) 2017/40 għandha tinkludi l-elementi li ġejjin:

(a)

il-livell amministrattiv li fih se tiġi implimentata l-iskema tal-iskejjel;

(b)

il-ħtiġijiet li jridu jiġu indirizzati permezz tal-implimentazzjoni tal-iskema tal-iskejjel u l-klassifikazzjoni tagħhom f'termini ta' prijoritajiet;

(c)

ir-riżultati li mistennija jinkisbu permezz tal-implimentazzjoni tal-iskema tal-iskejjel u l-indikaturi biex titkejjel il-kisba tagħhom;

(d)

is-sitwazzjoni inizjali li fir-rigward tagħha se jitkejjel il-progress fil-kisba tar-riżultati, abbażi tad-dejta disponibbli;

(e)

il-baġit stmat għall-elementi ewlenin tal-iskema tal-iskejjel fir-rigward tal-frott u l-ħxejjex għall-iskejjel u tal-ħalib fl-iskejjel, kif ukoll il-baġit għal elementi li jikkonċernaw l-iskema sħiħa għall-iskejjel;

(f)

il-grupp fil-mira;

(g)

il-lista tal-prodotti, skont il-gruppi tal-prodotti elenkati fl-Artikolu 23(3), (4) u (5) u, jekk applikabbli, (7) tar-Regolament (UE) Nru 1308/2013, li għandhom jiġu pprovduti fi ħdan l-iskema tal-iskejjel;

(h)

jekk il-prodotti ma jkunux disponibbli mingħajr ħlas fi ħdan l-iskema tal-iskejjel, l-arranġamenti li ddaħħlu fis-seħħ biex jiġi żgurat li l-ammont tal-għajnuna tal-Unjoni huwa rifless b'mod xieraq fil-prezz ta' dawk il-prodotti;

(i)

jekk jiġu awtorizzati t-tabelli standard ta' kostijiet unitarji, il-finanzjament b'rata fissa u/jew il-finanzjament b'somma sħiħa, il-metodu ta' kalkolu ġust, ekwu u verifikabbli użat għall-istabbiliment tagħhom; jekk tintuża sistema bbażata fuq il-kost, l-arranġamenti biex tiġi vvalutata r-raġonevolezza tal-kostijiet ippreżentati mill-applikanti għall-għajnuna;

(j)

l-għanijiet u l-kontenut tal-miżuri edukattivi ta' akkumpanjament;

(k)

il-proċeduri dwar l-involviment tal-awtoritajiet u l-partijiet ikkonċernati rilevanti;

(l)

il-proċeduri biex jintgħażlu l-fornituri tal-prodotti, tal-materjali u tas-servizzi fi ħdan l-iskema tal-iskejjel;

(m)

l-arranġamenti li ddaħħlu fis-seħħ għar-reklamar tal-għoti ta' għajnuna tal-Unjoni fi ħdan l-iskema tal-iskejjel.

L-Istati Membri għandhom iqiegħdu għad-dispożizzjoni tal-Kummissjoni, fuq talba, l-informazzjoni li ġejja, jekk din ma tkunx inkluża fl-istrateġija:

(a)

il-kriterji għall-għażla tal-prodotti li se jkunu forniti fi ħdan l-iskema tal-iskejjel u l-prijorità jew il-prijoritajiet imsemmija fl-Artikolu 23(11) tar-Regolament (UE) Nru 1308/2013;

(b)

l-arranġamenti għall-forniment u/jew id-distribuzzjoni tal-prodotti, inkluż fir-rigward tal-kostijiet eliġibbli, il-frekwenza prevista u t-twaqqit tad-distribuzzjoni u, f'każ li tiġi permessa d-distribuzzjoni fil-qafas tal-ikliet regolari fl-iskejjel, il-miżuri meħuda sabiex jikkonformaw mal-Artikolu 11 tar-Regolament Delegat (UE) 2017/40;

(c)

jekk ikunu stabbiliti l-prezzijiet massimi li jridu jitħallsu mill-benefiċjarji għall-prodotti, il-materjali u s-servizzi disponibbli fi ħdan l-iskema tal-iskejjel, il-metodu ta' kalkolu ġust, ekwu u verifikabbli użat għall-istabbiliment tagħhom;

(d)

l-ammont ta' għajnuna nazzjonali jekk din l-għajnuna tingħata b'żieda mal-għajnuna tal-Unjoni għall-iskema tal-iskejjel;

(e)

jekk l-iskemi nazzjonali eżistenti jiġu estiżi jew isiru aktar effettivi permezz tal-għajnuna tal-Unjoni, l-arranġamenti li ddaħħlu fis-seħħ biex jiġi żgurat il-valur miżjud tal-iskema tal-iskejjel;

▼M5

(ea)

meta l-Istati Membri jiddeċiedu li jagħmlu pagamenti bil-quddiem ta’ għajnuna f’konformità mal-Artikolu 44(3b) tar-Regolament (UE) 2021/2116 tal-Parlament Ewropew u tal-Kunsill ( 1 ), l-ammont massimu tal-pagament bil-quddiem espress f’perċentwal tal-għajnuna li l-applikanti għall-għajnuna huma intitolati għaliha, u l-arranġamenti għall-għoti ta’ pagament bil-quddiem;

▼B

(f)

jekk jiġu distribwiti l-prodotti msemmija fl-Artikolu 23(5) tar-Regolament (UE) Nru 1308/2013, l-arranġamenti sabiex jiġi żgurat li l-għajnuna tal-Unjoni titħallas biss għall-komponent tal-ħalib ta' dawk il-prodotti, u ma taqbiżx l-ammont imsemmi fl-Artikolu 5(3) tar-Regolament (UE) Nru 1370/2013;

(g)

l-istrutturi, l-arranġamenti u l-formoli stabbiliti għall-monitoraġġ u għall-evalwazzjoni tal-iskema tal-iskejjel skont l-Artikolu 9 tar-Regolament Delegat (UE) 2017/40 u għall-verifiki b'konformità mal-Artikoli 9 u 10 ta' dan ir-Regolament.

Il-Kummissjoni għandha tippubblika l-istrateġiji tal-Istati Membri.

Artikolu 3

Talba mill-Istati Membri għall-għajnuna tal-Unjoni

L-Istati Membri għandhom jippreżentaw sal-31 ta' Jannar ta' kull sena t-talba tagħhom għall-għajnuna tal-Unjoni b'rabta mas-sena skolastika li jmiss u, jekk applikabbli, jaġġornaw it-talba għall-għajnuna tal-Unjoni b'rabta mas-sena skolastika attwali. It-talba għandha tinkludi l-informazzjoni li ġejja:

(a)

Informazzjoni relatata mas-sena skolastika li jmiss:

▼M4

(i)

l-allokazzjoni indikattiva tal-għajnuna għall-frott u l-ħxejjex għall-iskejjel u għall-ħalib għall-iskejjel stabbilita fl-Anness tad-Deċiżjoni ta’ Implimentazzjoni tal-Kummissjoni (UE) 2023/106 ( 2 );

▼B

(ii)

ir-rieda biex parti mill-allokazzjoni indikattiva għall-frott u l-ħxejjex għall-iskejjel u għall-ħalib fl-iskejjel tiġi ttrasferita għall-allokazzjoni indikattiva l-oħra, sal-perċentwal massimu msemmi fl-Artikolu 23a(4) tar-Regolament (UE) Nru 1308/2013, kif ukoll il-perċentwal u l-ammont tat-trasferiment;

(iii)

ir-rieda li tintuża aktar mill-allokazzjoni indikattiva għall-frott u l-ħxejjex għall-iskejjel u/jew għall-ħalib fl-iskejjel u l-ammont addizzjonali massimu mitlub, jekk tkun disponibbli allokazzjoni addizzjonali;

(iv)

l-ammont tal-allokazzjoni indikattiva li mhijiex mitluba, jekk ma jkunx hemm rieda li jintuża l-ammont kollu tal-allokazzjoni indikattiva għall-frott u l-ħxejjex għall-iskejjel u/jew għall-ħalib fl-iskejjel;

(v)

l-ammont totali mitlub għall-frott u l-ħxejjex għall-iskejjel u għall-ħalib fl-iskejjel.

(b)

Informazzjoni relatata mas-sena skolastika attwali:

(i)

it-trasferiment bejn l-allokazzjonijiet definittivi msemmija fl-Artikolu 23a(4)(b) tar-Regolament (UE) Nru 1308/2013;

(ii)

jekk ma jkunx hemm rieda li jintuża l-ammont kollu tal-allokazzjoni definittiva tal-għajnuna għall-frott u l-ħxejjex għall-iskejjel u/jew għall-ħalib fl-iskejjel għas-sena skolastika attwali, l-ammont li ma jkunx se jintalab għall-frott u l-ħxejjex għall-iskejjel u/jew għall-ħalib fl-iskejjel;

(iii)

ir-rieda li jintuża aktar mill-ammont kollu tal-allokazzjoni definittiva tal-għajnuna għall-frott u l-ħxejjex għall-iskejjel u/jew għall-ħalib fl-iskejjel għad-dispożizzjoni tagħhom fis-sena skolastika attwali, jekk tkun disponibbli allokazzjoni addizzjonali.

L-ammonti msemmija f'dan l-Artikolu għandhom jiġu espressi f'EUR.

▼M5

Artikolu 3a

Applikazzjonijiet għal pagamenti bil-quddiem ta’ għajnuna ppreżentati minn applikanti għall-għajnuna

L-Istati Membri li jiddeċiedu li jagħmlu pagamenti bil-quddiem ta’ għajnuna, f’konformità mal-Artikolu 44(3b) tar-Regolament (UE) 2021/2116, għandhom jiddeterminaw il-forma, il-kontenut, il-frekwenza u l-iskadenza tal-applikazzjonijiet għall-pagamenti bil-quddiem ta’ għajnuna ppreżentati mill-applikanti għall-għajnuna.

L-Istati Membri għandhom jispeċifikaw id-dokumenti li għandhom jiġu ppreżentati b’appoġġ għall-applikazzjonijiet għall-pagamenti bil-quddiem ta’ għajnuna, inklużi d-dokumenti meħtieġa għall-kalkolu tal-ammont li l-applikanti huma intitolati għalih.

▼B

Artikolu 4

Applikazzjoni għall-għajnuna ppreżentata mill-applikanti għall-għajnuna

L-Istati Membri għandhom jiddeċiedu dwar il-forma, il-kontenut u l-frekwenza tal-applikazzjonijiet għall-għajnuna skont l-istrateġija tagħhom u r-regoli stabbiliti fil-paragrafi 2 sa 6.

▼M5

1a.

L-applikanti għall-għajnuna għandhom jippreżentaw applikazzjoni għall-għajnuna, inkluż meta jkun tħallas pagament bil-quddiem, biex jitolbu r-rimborż tal-ispejjeż imġarrba fl-implimentazzjoni tal-attivitajiet tal-iskema tal-iskejjel. L-applikazzjoni għall-għajnuna tista’ tiġi ppreżentata biss wara l-implimentazzjoni sħiħa tal-attivitajiet li l-applikazzjoni għall-għajnuna hija relatata magħhom.

▼B

L-applikazzjonijiet għall-għajnuna relatati mal-provvista u mad-distribuzzjoni tal-prodotti għandhom jinkludu mill-inqas l-informazzjoni li ġejja:

(a)

il-kwantitajiet tal-prodotti distribwiti skont il-gruppi tal-prodotti kif imsemmija fil-paragrafi (3), (4), (5) u, jekk applikabbli, (7) tal-Artikolu 23 tar-Regolament (UE) Nru 1308/2013;

(b)

l-identifikazzjoni tal-applikant u l-isem u l-indirizz jew in-numru uniku tal-identifikazzjoni tal-istabbilimenti jew tal-awtoritajiet edukattivi li lilhom ġew distribwiti dawk il-kwantitajiet;

(c)

l-għadd ta' tfal fir-reġistru tal-iskola fil-bidu tas-sena skolastika fl-istabbiliment jew fl-istabbilimenti edukattivi intitolati li jirċievu l-prodotti koperti mill-iskema tal-iskejjel matul il-perjodu kopert mill-applikazzjoni għall-għajnuna.

▼M5

2a.

Meta jkun sar pagament bil-quddiem, l-applikazzjoni għall-għajnuna għandha tinkludi informazzjoni dwar l-ammont ta’ dak il-pagament bil-quddiem.

▼B

L-applikazzjonijiet għall-għajnuna relatati mal-provvista u mad-distribuzzjoni tal-prodotti u mal-miżuri edukattivi ta' akkumpanjament jistgħu jkopru perjodi ta' bejn ġimagħtejn u s-sena skolastika sħiħa.

L-applikazzjonijiet għall-għajnuna għandhom jiġu ppreżentati fi żmien tliet xhur minn tmiem il-perjodu li jkopru jew, fil-każ ta' applikazzjonijiet għall-għajnuna relatati mal-monitoraġġ, l-evalwazzjoni jew ir-reklamar, mid-data tal-konsenja tal-materjal jew tas-servizz.

Jekk il-limitu ta' żmien imsemmi fil-paragrafu 4 jinqabeż b'anqas minn 60 jum kalendarju, l-għajnuna għandha titħallas iżda għandha titnaqqas kif ġej:

(a)

b'5 % jekk il-limitu ta' żmien jinqabeż b'1 sa 30 jum kalendarju;

(b)

b'10 % jekk il-limitu ta' żmien jinqabeż b'31 sa 60 jum kalendarju.

Ladarba l-limitu ta' żmien jinqabeż b'aktar minn 60 jum kalendarju, l-għajnuna għandha tkompli titnaqqas b'1 % għal kull jum addizzjonali, ikkalkulat fuq il-bilanċ li jifdal.

▼M5

L-Istati Membri għandhom jispeċifikaw id-dokumenti li jiġu ppreżentati b’sostenn għall-applikazzjonijiet għall-għajnuna. Bħala rekwiżit minimu, l-ammonti mitluba fl-applikazzjonijiet għall-għajnuna għandhom ikunu sostnuti b’evidenza dokumentata li turi:

(a)

li l-kwantitajiet ġew fornuti jew distribwiti u/jew il-materjali jew is-servizzi twasslu għall-fini tal-iskema tal-iskejjel; u

(b)

meta l-Istat Membru juża sistema bbażata fuq il-kostijiet, il-prezz tal-prodotti, tal-materjali jew tas-servizzi fornuti, distribwiti jew ikkonsenjati, flimkien ma’ riċevuta jew prova ta’ pagament jew ekwivalenti.

Fil-każ ta’ applikazzjonijiet għall-għajnuna relatati mal-miżuri edukattivi ta’ akkumpanjament, il-monitoraġġ, l-evalwazzjoni u r-reklamar, l-evidenza dokumentata għandha tinkludi wkoll it-tqassim finanzjarju skont l-attività u d-dettalji tal-kostijiet relatati.

Artikolu 5

Pagament ta’ għajnuna, inklużi pagamenti bil-quddiem ta’ għajnuna

Il-pagamenti bil-quddiem ta’ għajnuna għandhom jitħallsu biss mill-awtorità kompetenti mal-preżentazzjoni ta’ applikazzjoni f’konformità mal-Artikolu 3a ta’ dan ir-Regolament u, meta tkun meħtieġa d-depożitu tal-garanzija msemmija fl-Artikolu 15b tar-Regolament Delegat tal-Kummissjoni (UE) 2022/127 ( 3 ), tal-evidenza dokumentata tad-depożitu tal-garanzija, sakemm l-awtorità kompetenti ma jkollhiex diġà prova li l-garanzija tkun ġiet iddepożitata.

L-għajnuna għar-rimborż tal-ispejjeż imġarrba fl-implimentazzjoni tal-iskema tal-iskejjel għandha titħallas biss mill-awtorità kompetenti mal-preżentazzjoni ta’ applikazzjoni flimkien mal-evidenza dokumentata meħtieġa f’konformità mal-Artikolu 4. L-għajnuna għandha titħallas fi żmien 3 xhur mid-data tal-preżentazzjoni tal-applikazzjoni għall-għajnuna għajr jekk ikunu ġew miftuħa inkjesti amministrattivi.

Meta jkun sar ħlas ta’ pagament bil-quddiem, il-pagament tal-għajnuna jkun ugwali għad-differenza bejn l-ammont tal-għajnuna li għandha titħallas u l-ammont ta’ pagament bil-quddiem imħallas.

▼B

Artikolu 6

Trasferimenti bejn l-allokazzjonijiet

It-trasferimenti bejn l-allokazzjonijiet indikattivi, skont l-Artikolu 23a(4)(a) tar-Regolament (UE) Nru 1308/2013, għandhom isiru fit-talba għall-għajnuna tal-Unjoni msemmija fl-Artikolu 3 ta' dan ir-Regolament.

▼M5

It-trasferimenti bejn l-allokazzjonijiet definittivi, f’konformità mal-Artikolu 23a(4), it-tielet subparagrafu, il-punt (b) tar-Regolament (UE) Nru 1308/2013, meta ma jkun sar l-ebda trasferiment bejn l-allokazzjonijiet indikattivi, għandhom jiġu nnotifikati fit-talba għall-għajnuna tal-Unjoni msemmija fl-Artikolu 3 ta’ dan ir-Regolament jew fin-notifika msemmija fit-tieni subparagrafu ta’ dan il-paragrafu.

Meta l-Istati Membri jagħmlu trasferimenti ta’ allokazzjonijiet definittivi wara l-31 ta’ Jannar f’konformità mal-ewwel subparagrafu ta’ dan il-paragrafu, huma għandhom jinnotifikawhom lill-Kummissjoni sal-31 ta’ Awwissu ta’ wara s-sena skolastika kkonċernata.

▼B

Artikolu 7

Riallokazzjoni tal-għajnuna tal-Unjoni

Abbażi tal-ammonti tal-għajnuna tal-Unjoni mitluba skont l-Artikolu 3 ta' dan ir-Regolament, il-Kummissjoni għandha talloka mill-ġdid l-allokazzjonijiet indikattivi mhux mitluba jew partijiet minnhom mhux mitluba skont l-Artikolu 5(5) tar-Regolament (UE) Nru 1370/2013.

Ma għandu jingħata l-ebda ammont addizzjonali lil Stat Membru għall-grupp ta' prodotti li minnu l-Istat Membru kkonċernat ikun għamel trasferiment għall-grupp l-ieħor ta' prodotti skont l-Artikolu 6(1).

Jekk Stat Membru ma jippreżentax talba skont l-Artikolu 3, l-allokazzjonijiet indikattivi ta' dan l-Istat Membru għandhom jitqiesu bħala mhux mitluba.

Il-Kummissjoni tista' tqassam mill-ġdid kwalunkwe allokazzjonijiet definittivi mhux mitluba jew partijiet minnhom mhux mitluba għas-sena skolastika attwali kif notifikat skont l-Artikolu 3(b) fost dawk l-Istati Membri li nnotifikaw ir-rieda tagħhom li jużaw aktar mill-allokazzjonijiet definittivi tagħhom.

Din ir-ridistribuzzjoni għandha ssir fi ħdan l-allokazzjoni għall-frott u l-ħxejjex għall-iskejjel jew għall-ħalib fl-iskejjel, abbażi tal-allokazzjonijiet indikattivi tal-Istati Membri li jippreżentaw it-talba. Jekk applikabbli, l-ammonti mhux mitluba mill-Istati Membri fi ħdan l-istess allokazzjoni jistgħu jiġu ddistribwiti lill-Istati Membri li talbu ammonti addizzjonali għall-allokazzjoni l-oħra.

▼M1

L-ammont tal-allokazzjoni indikattiva li jista’ jiġi riallokat lil Stat Membru ieħor skont il-paragrafu 1 għandu jkun ibbażat fuq il-livell ta’ użu tal-allokazzjoni definittiva tal-għajnuna tal-Unjoni fis-sena skolastika ta’ qabel għall-frott u l-ħxejjex għall-iskejjel u għall-ħalib fl-iskejjel rispettivament minn dak l-Istat Membru. Filwaqt li jitqiesu d-dikjarazzjonijiet tan-nefqa mibgħuta lill-Kummissjoni dwar in-nefqa li tkun saret sal-31 ta’ Diċembru tas-sena ta’ qabel is-sottomissjoni tat-talba għal għajnuna tal-Unjoni skont l-Artikolu 10 tar-Regolament ta’ Implimentazzjoni tal-Kummissjoni (UE) Nru 908/2014 ( 4 ), l-ammont tal-allokazzjoni definittiva għandu jiġi kkalkulat kif ġej:

(a)

meta l-użu tal-allokazzjoni definittiva jkun ta’ 50 % jew inqas, ma għandha tingħata l-ebda allokazzjoni addizzjonali;

(b)

meta l-użu tal-allokazzjoni definittiva jaqbeż il-50 % iżda jkun ta’ 75 % jew inqas, l-allokazzjoni addizzjonali massima għandha tkun limitata għal 50 % tal-allokazzjoni indikattiva;

(c)

meta l-użu tal-allokazzjoni definittiva jaqbeż il-75 %, l-allokazzjoni addizzjonali massima ma għandhiex tkun limitata.

Il-kalkolu deskritt fl-ewwel subparagrafu ma għandux japplika għall-Istati Membri ġodda li japplikaw l-iskema għall-iskejjel jew għal wieħed mill-komponenti tagħha matul l-ewwel sentejn ta’ implimentazzjoni.

▼M2

Artikolu 8

Monitoraġġ u evalwazzjoni

Il-monitoraġġ imsemmi fl-Artikolu 9 tar-Regolament Delegat (UE) 2017/40 għandu jiġbed konklużjonijiet abbażi tad-data li tfeġġ mill-obbligi ta’ ġestjoni u kontroll, inklużi dawk stipulati fl-Artikoli 4 u 5 ta’ dan ir-Regolament.

L-Istati Membri għandhom jissottemettu r-rapport ta’ monitoraġġ annwali tagħhom imsemmi fl-Artikolu 9(3) tar-Regolament Delegat (UE) 2017/40 lill-Kummissjoni sal-31 ta’ Jannar tas-sena kalendarja wara tmiem is-sena skolastika inkwistjoni.

L-Istati Membri għandhom jissottomettu lill-Kummissjoni r-rapport ta’ kontroll annwali tagħhom dwar il-kontrolli fuq il-post imwettqa u s-sejbiet relatati msemmija fl-Artikolu 9(4) ta’ dak ir-Regolament sal-31 ta’ Ottubru tas-sena kalendarja wara tmiem is-sena skolastika inkwistjoni.

Ir-rapport ta’ evalwazzjoni jew, jekk Stat Membru jimplimenta l-iskema tal-iskejjel fil-livell reġjonali, l-għadd korrespondenti ta’ rapporti ta’ evalwazzjoni msemmija fl-Artikolu 9(2) tar-Regolament Delegat (UE) 2017/40 għandu jikkonċerna l-implimentazzjoni tal-iskema tal-iskejjel fl-ewwel ħames (5) snin skolastiċi ta’ kull perjodu kopert mill-istrateġija mfassla fil-livell nazzjonali jew reġjonali skont l-Artikolu 23(8) tar-Regolament (UE) Nru 1308/2013.

L-Istati Membri għandhom jissottmettu ir-rapport jew rapporti ta’ evalwazzjoni tagħhom lill-Kummissjoni sal-1 ta’ Marzu tas-sena kalendarja wara tmiem dawk il-ħames (5) snin skolastiċi. L-ewwel rapporti ta’ evalwazzjoni għandhom jiġu sottomessi sal-1 ta’ Marzu 2023.

Ir-rekwiżiti minimi għall-għamla u l-mili tar-rapport jew ir-rapporti ta’ evalwazzjoni huma stipulati fl-Anness ma’ dan ir-Regolament. L-Istati Membri għandhom jiżguraw li r-rapport jew rapporti sottomessi lill-Kummissjoni ma jinkludux data personali.

Il-Kummissjoni għandha tippubblika r-rapporti ta’ monitoraġġ annwali u r-rapporti ta’ evalwazzjoni sottomessi skont it-tieni sottoparagrafu tal-paragrafu 1 u l-paragreafu 2.

▼B

Artikolu 9

Verifiki amministrattivi

▼M5

L-Istati Membri għandhom jieħdu l-miżuri kollha meħtieġa sabiex jikkonformaw ma’ dan ir-Regolament. Dawk il-miżuri għandhom jinkludu verifika amministrattiva sistematika tal-applikazzjonijiet kollha għal pagamenti bil-quddiem ta’ għajnuna msemmija fl-Artikolu 3a u l-applikazzjonijiet għall-għajnuna msemmija fl-Artikolu 4, qabel il-pagament. L-Istati Membri għandhom jivverifikaw kull applikazzjoni, kampjun rappreżentattiv tad-dokumenti ta’ sostenn ippreżentati mal-applikazzjoni għall-għajnuna.

▼M5 —————

▼B

Il-verifiki amministrattivi mwettqa fir-rigward tal-għajnuna mitluba għall-monitoraġġ, l-evalwazzjoni, ir-reklamar u l-miżuri edukattivi ta' akkumpanjament, għandhom jinkludu l-verifika tal-konsenja tal-materjal u tas-servizzi u l-veraċità tan-nefqa ddikjarata.

▼M5

F’każ ta’ għajnuna marbuta mal-provvista u mad-distribuzzjoni tal-prodotti u mal-miżuri edukattivi ta’ akkumpanjament, il-verifiki amministrattivi għandhom jitwettqu fir-rigward tal-applikazzjonijiet għall-għajnuna msemmija fl-Artikolu 4 u għandhom ikunu ssupplimentati b’verifiki fuq il-post b’konformità mal-Artikolu 10.

▼B

Artikolu 10

Verifiki fuq il-post

▼M3

Il-verifiki fuq il-post għandhom jinkludu, b’mod partikulari, verifika tal-elementi li ġejjin:

(a)

ir-rekords imsemmija fl-Artikolu 6 tar-Regolament Delegat (UE) 2017/40, billi jikkonfermaw u jikkomplementaw il-verifiki amministrattivi b’dokumentazzjoni rilevanti inklużi dokumenti finanzjarji bħal fatturi ta’ xiri u bejgħ, noti ta’ konsenja, estratti bankarji jew prova oħra ta’ pagament u r-reġistrazzjoni tagħhom fil-kontabbiltà;

(b)

l-użu tal-prodotti f’konformità mar-Regolament (UE) Nru 1308/2013, mar-Regolament Delegat (UE) 2017/40 u ma’ dan ir-Regolament;

(c)

l-implimentazzjoni ta’ miżuri edukattivi ta’ akkumpanjament biex jappoġġaw id-distribuzzjoni ta’ prodotti, fejn il-verifika fuq il-post issir fil-bini tal-istabbiliment edukattiv jew fejn il-verifika fuq il-post tikkonċerna l-applikazzjoni għall-għajnuna b’rabta mal-miżuri edukattivi ta’ akkumpanjament;

(d)

l-użu ta’ għodod ta’ reklamar xierqa, fejn il-verifika fuq il-post issir fil-bini tal-istabbiliment edukattiv.

▼B

►M2 Għandhom jitwettqu kontrolli fuq il-post matul is-sena skolastika li magħha jkunu konnessi (il-perjodu N) u/jew matul id-disa’ (9) xhur segwenti (il-perjodu N+1). ◄

Il-verifiki fuq il-post jistgħu jsiru matul l-implimentazzjoni tal-miżuri edukattivi ta' akkumpanjament.

Kull verifika fuq il-post għandha titqies li hija lesta ladarba jinħareġ ir-rapport ta' kontroll korrispondenti, kif imsemmi fil-paragrafu 6.

L-għadd totali ta' verifiki fuq il-post għandhom ikopru mill-inqas 5 % tal-għajnuna ddikjarata fil-livell nazzjonali u mill-anqas 5 % tal-applikanti kollha għall-għajnuna li jittrattaw il-provvista u d-distribuzzjoni tal-prodotti u l-miżuri edukattivi ta' akkumpanjament fir-rigward ta' kull sena skolastika.

Meta l-għadd tal-applikanti għall-għajnuna fi Stat Membru jkun anqas minn mija, il-verifiki fuq il-post għandhom jitwettqu fl-istabbilimenti ta' mhux anqas minn ħames applikanti.

Meta l-għadd tal-applikanti għall-għajnuna fi Stat Membru jkun anqas minn ħamsa, il-verifiki fuq il-post għandhom jitwettqu fl-istabbilimenti tal-applikanti kollha.

Meta l-applikant, li ma jkunx stabbiliment edukattiv, japplika għall-għajnuna marbuta mal-provvista u mad-distribuzzjoni tal-prodotti, il-verifika fuq il-post imwettqa fl-istabbiliment ta' dak l-applikant għandha tkun issupplimentata minn verifiki fuq il-post fl-istabbiliment ta' mill-inqas żewġ stabbilimenti edukattivi jew ta' mill-inqas 1 % tal-istabbilimenti edukattivi rreġistrati mill-applikant b'konformità mal-Artikolu 6 tar-Regolament Delegat (UE) 2017/40, skont liema minnhom ikun l-akbar.

Meta l-applikant japplika għall-għajnuna marbuta mal-miżuri edukattivi ta' akkumpanjament, il-verifiki fuq il-post fl-istabbiliment tal-applikant jistgħu jiġu sostitwiti, abbażi ta' analiżi tar-riskju, minn verifiki fuq il-post fil-postijiet fejn jitwettqu l-miżuri ta' akkumpanjament. Fuq il-bażi tal-analiżi tar-riskju, l-Istati Membri għandhom jiffissaw il-livell ta' tali verifiki fuq il-post.

Fuq il-bażi tal-analiżi tar-riskju, l-awtorità kompetenti għandha tagħżel dawk l-applikanti li għandhom jiġu soġġetti għal verifiki fuq il-post.

Għal dan l-għan, l-awtorità kompetenti għandha tqis b'mod partikolari dan li ġej:

(a)

iż-żoni ġeografiċi differenti;

(b)

in-natura rikorrenti tal-iżbalji u s-sejbiet tal-verifiki li jkunu twettqu fis-snin ta' qabel;

(c)

l-ammont ta' għajnuna involuta;

(d)

it-tip ta' applikanti;

(e)

it-tip ta' miżura edukattiva ta' akkumpanjament, jekk ikun hemm.

Sakemm l-iskop tal-verifiki ma jiġix ippreġudikat, jista' jingħata avviż bil-quddiem, limitat b'mod strett għall-perjodu taż-żmien minimu neċessarju.

L-awtorità kompetenti ta' kontroll għandha tfassal rapport ta' kontroll dwar kull verifika fuq il-post. Ir-rapport għandu jiddeskrivi preċiżament il-prodotti differenti kkontrollati.

Ir-rapport ta' kontroll għandu jkun maqsum fil-partijiet li ġejjin:

(a)

parti ġenerali li jkun fiha, b'mod partikolari, l-informazzjoni li ġejja:

(i)

il-perjodu kopert, l-applikazzjoni jew l-applikazzjonijiet għall-għajnuna vverifikati, il-kwantitajiet tal-prodotti li għalihom tkun intalbet l-għajnuna fil-każ ta' applikazzjonijiet li għandhom x'jaqsmu mal-provvista u mad-distribuzzjoni tal-prodotti, l-istabbilimenti edukattivi li jkunu qed jipparteċipaw, stima bbażata fuq id-dejta disponibbli dwar l-għadd ta' tfal li għalihom tħallset l-għajnuna u l-ammont finanzjarju involut;

(ii)

il-persuni responsabbli preżenti;

(b)

parti li tiddeskrivi, b'mod separat, il-verifiki mwettqa, u li jkun fiha, b'mod partikolari, l-informazzjoni li ġejja:

(i)

id-dokumenti li ġew ivverifikati;

(ii)

in-natura u l-ammont ta' verifiki li jkunu twettqu;

(iii)

ir-rimarki u s-sejbiet.

▼M2

Ir-rapporti tal-kontroll kollha għandhom jitlestew sa mhux aktar tard minn disa’ (9) xhur wara tmiem is-sena skolastika.

▼M2 —————

▼B

Artikolu 11

Irkupru tal-pagamenti mhux dovuti

Għall-irkupru tal-ammonti mħallsa bi żball, għandu japplika, mutatis mutandis, l-Artikolu 7 tar-Regolament ta' Implimentazzjoni (UE) Nru 809/2014.

Artikolu 12

Reklamar

Meta l-Istati Membri jiddeċiedu li ma jużawx il-kartellun imsemmi fl-Artikolu 12 tar-Regolament Delegat (UE) 2017/40, fl-istrateġija tagħhom għandhom jispjegaw b'mod ċar kif se jgħarrfu lill-pubbliku dwar il-kontribuzzjoni finanzjarja tal-Unjoni għall-iskema tal-iskejjel tagħhom.

Il-mezzi ta' komunikazzjoni u l-miżuri tar-reklamar imsemmija fl-Artikolu 12 tar-Regolament Delegat (UE) 2017/40, kif ukoll il-materjali edukattivi u l-għodod li għandhom jintużaw fi ħdan il-miżuri edukattivi ta' akkumpanjament, għandhom juru l-bandiera Ewropea u jsemmu “l-Iskema tal-iskejjel” u sakemm id-daqs tal-materjali u l-għodod ma jeskludix dan, il-kontribuzzjoni finanzjarja tal-Unjoni.

Ir-referenzi għall-kontribuzzjoni finanzjarja tal-Unjoni għandhom jirċievu mill-anqas l-istess viżibbiltà bħall-kontribuzzjonijiet minn entitajiet privati jew pubbliċi oħra li jkunu qed jappoġġaw l-iskema tal-iskejjel tal-Istat Membru.

L-Istati Membri jistgħu jkomplu jużaw il-ħażniet eżistenti ta' kartelluni u għodod oħra ta' reklamar skont ir-Regolamenti (UE) 2016/248 u (KE) Nru 657/2008.

Artikolu 13

Notifiki

In-notifiki mill-Istati Membri lill-Kummissjoni għandhom isiru b'mezzi elettroniċi, billi jintużaw l-ispeċifikazzjonijiet tekniċi għat-trasferiment tad-dejta li l-Kummissjoni għamlet disponibbli.

Il-forma u l-kontenut ta' dawk in-notifiki għandhom jiġu ddefiniti fuq il-bażi tal-mudelli li l-Kummissjoni qegħdet għad-dispożizzjoni tal-Istati Membri, wara li jkun ġie informat il-Kumitat għall-Organizzazzjoni Komuni tas-Swieq Agrikoli.

Artikolu 14

Dħul fis-seħħ u applikazzjoni

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan japplika għall-għajnuna għas-sena skolastika 2017/2018 u għas-snin skolastiċi ta' wara.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

▼M2

ANNESS

IR-REKWIŻITI MINIMI GĦALL-GĦAMLA U L-MILI TAR-RAPPORTI TA’ EVALWAZZJONI MSEMMIJA FL-ARTIKOLU 8(2)

1. Sommarju eżekuttiv

—

Sejbiet tal-evalwazzjoni

—

Konklużjonijiet u rakkomandazzjonijiet

2. Introduzzjoni

—

Għan u skop tar-rapport ta’ evalwazzjoni

—

Deskrizzjoni qsajra tal-proċess ta’ evalwazzjoni

3. Metodoloġija

—

It-tfassil tal-evalwazzjoni u l-metodi użati

—

Mistoqsijiet dwar l-evalwazzjoni, kriterji ta’ ġudizzju, indikaturi

—

Għejjun tad-data u tekniki għall-ġbir tad-data

—

Kwalunkwe limitazzjonijiet u soluzzjonijiet misjuba

4. Valutazzjoni tal-funzjonament tal-iskema ta’ iskejjel

—

Loġika ta’ intervent jew konessjonijiet bejn il-ħtiġijiet identifikati, l-objettivi mnaqqxa fl-istrateġija u l-attivitajiet imwettqa

—

Xejriet jew tendenzi ewlenin fit-tfal/skejjel parteċipanti

—

Forniment/tqassim tal-frott, il-ħxejjex, il-ħalib u l-prodotti mill-ħalib għall-iskejjel u l-prijorita għal frott u ħxejjex friski u ħalib għax-xorb

—

Miżuri edukattivi akkompanjanti

—

Azzjonijiet ta’ komunikazzjoni u informazzjoni

—

Arranġamenti u dispożizzjonijiet ewlenin għall-implimentazzjoni

—

Involviment tal-awtoritajiet tas-saħħa/nutrizzjoni, awtoritajiet pubbliċi oħra u partijiet ikkonċernati privati assoċjati mal-ippjanar, l-implimentazzjoni, il-monitoraġġ u l-evalwazzjoni tal-iskema

5. Tweġibiet għal mistoqsijiet komuni dwar l-evalwazzjoni

5.1. L-iskema tal-iskejjel kemm żiedet il-konsum kumplessiv mit-tfal ta’ frott, ħxejjex u ħalib u prodotti mill-ħalib, b’mod konformi mar-rakkomandazzjonijiet nazzjonali għal dieta sana tal-grupp tal-età fil-mira?

Indikaturi:

—

Bidla fil-konsum dirett jew indirett mit-tfal ta’ frott u ħxejjex friski (kwantità u/jew frekwenza)

—

Bidla fil-konsum dirett jew indirett mit-tfal ta’ ħalib tax-xorb (kwantità u/jew frekwenza)

—

Bidla fil-perċentwal ta’ tfal li jissodisfaw il-konsum rakkomandat ta’ kuljum ta’ frott u ħxejjex

—

Bidla fil-perċentwal ta’ tfal li jissodisfaw ir-rakkomandazzjonijiet mill-awtoritajiet nazzjonali tas-saħħa u n-nutrizzjoni dwar il-konsum ta’ kuljum ta’ ħalib tax-xorb, u prodotti oħra tal-ħalib bla zokkor, togħmiet, frott, ġwież jew kawkaw miżjuda u b’mod konformi mal-livelli rakkomandati nazzjonalment ta’ livelli ta’ xaħam u sodju għall-grupp ta’ età fil-mira

5.2. L-iskema tal-iskejjel kemm edukat lit-tfal dwar abitudnijiet ta’ ikel tajbin għas-saħħa?

Indikaturi:

—

Bidla fl-attitudni tat-tfal lejn il-konsum tal-frott, il-ħxejjex, il-ħalib u l-prodotti mill-ħalib, b’mod konformi mar-rakkomandazzjonijiet nazzjonali għal dieta tajba għas-saħħa tal-grupp ta’ età fil-mira

—

Bidla fl-għarfien mit-tfal tal-benefiċċji għas-saħħa mill-komsum ta’ frott u ħxejjex friski, il-ħalib tax-xorb u l-prodotti mill-ħalib bla zokkor, togħmiet, frott, ġwież jew kawkaw miżjuda u b’mod konformi mal-livelli rakkomandati nazzjonalment ta’ livelli ta’ xaħam u sodju għall-grupp ta’ età fil-mira

6. Konklużjonijiet u rakkomandazzjonijiet

—

Effettività tal-iskema

—

Lezzjonijiet mitgħallma

—

Rakkomandazzjonijiet għal titjib

7. Annessi

Dettalji tekniċi tal-evalwazzjoni inklużi kwestjonarji, referenzi u sorsi.

( 1 ) Ir-Regolament (UE) 2021/2116 tal-Parlament Ewropew u tal-Kunsill tat-2 ta’ Diċembru 2021 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolament (UE) Nru 1306/2013 (ĠU L 435, 6.12.2021, p. 187).

( 2 ) Id-Deċiżjoni ta’ Implimentazzjoni tal-Kummissjoni (UE) 2023/106 tal-11 ta’ Jannar 2023 li tistabbilixxi l-allokazzjonijiet indikattivi tal-għajnuna tal-Unjoni lill-Istati Membri għall-frott u l-ħxejjex għall-iskejjel u għall-ħalib għall-iskejjel għall-perjodu mill-1 ta’ Awwissu 2023 sal-31 ta’ Lulju 2029 (ĠU L 12, 13.1.2023, p. 84).

( 3 ) Ir-Regolament Delegat tal-Kummissjoni (UE) 2022/127 tas-7 ta’ Diċembru 2021 li jissupplimenta r-Regolament (UE) 2021/2116 tal-Parlament Ewropew u tal-Kunsill b’regoli dwar l-aġenziji tal-pagamenti u korpi oħrajn, il-ġestjoni finanzjarja, l-approvazzjoni tal-kontijiet, il-garanziji u l-użu tal-euro (ĠU L 20, 31.1.2022, p. 95).

( 4 ) Ir-Regolament ta’ Implimentazzjoni tal-Kummissjoni (UE) Nru 908/2014 tas-6 ta’ Awwissu 2014 li jistabbilixxi r-regoli għall-applikazzjoni tar-Regolament (UE) Nru 1306/2013 tal-Parlament Ewropew u tal-Kunsill fir-rigward tal-aġenziji tal-pagamenti u korpi oħra, il-ġestjoni finanzjarja, l-approvazzjoni ta’ kontijiet, ir-regoli dwar kontrolli, garanziji u trasparenza (ĠU L 255, 28.8.2014, p. 59).

		Il-Ġurnal Uffiċjali
		Nru	Paġna	Data
►M1	REGOLAMENT TA’ IMPLIMENTAZZJONI TAL-KUMMISSJONI (UE) 2019/1983 tat-28 ta’ Novembru 2019	L 308	82	29.11.2019
►M2	REGOLAMENT TA’ IMPLIMENTAZZJONI TAL-KUMMISSJONI (UE) 2020/1239 tas-17 ta’ Ġunju 2020	L 284	3	1.9.2020
►M3	REGOLAMENT TA’ IMPLIMENTAZZJONI TAL-KUMMISSJONI (UE) 2022/246 tat-13 ta’ Diċembru 2021	L 41	8	22.2.2022
►M4	REGOLAMENT TA’ IMPLIMENTAZZJONI TAL-KUMMISSJONI (UE) 2023/102 tal-11 ta’ Jannar 2023	L 12	1	13.1.2023
►M5	REGOLAMENT TA’ IMPLIMENTAZZJONI TAL-KUMMISSJONI (UE) 2023/1449 tat-12 ta’ Ġunju 2023	L 179	5	14.7.2023