Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu

li jistabbilixxi l-Korp Volontarju Ewropew ta' Għajnuna Umanitarja (“l-Inizjattiva Voluntiera tal-Għajnuna tal-UE”)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 214(5) tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz ta' att leġiżlattiv intbagħat lill-parlamenti nazzjonali,

Filwaqt li jaġixxu skont il-proċedura leġiżlattiva ordinarja ( 1 ),

Billi:

(1)

Is-solidarjetà hija valur fundamentali tal-Unjoni u hemm potenzjal għal aktar żvilupp ta' mezzi ta' turija ta' solidarjetà taċ-ċittadini tal-Unjoni ma' nies f'pajjiżi terzi li huma vulnerabbli għal kriżijiet maħluqa mill-bniedem jew minn diżastri naturali jew affettwati minnhom. Barra minn hekk l-Unjoni, kollettivament, hija l-akbar donatur fid-dinja ta' għajnuna umanitarja, billi tipprovdi kważi 50 % tal-għajnuna umanitarja globali.

(2)	Il-volontarjat huwa espressjoni konkreta u viżibbli ta' solidarjetà li tippermetti lill-individwi jiddedikaw l-għarfien, il-ħiliet u l-ħin tagħhom għas-servizz ta' bnedmin oħra bħalhom, mingħajr motivazzjoni finanazjara.

(3)	Hemm il-ħtieġa li tiġi żviluppata aktar is-solidarjetà mal-vittmi ta' kriżijiet u diżastri fil-pajjiżi terzi kif ukoll li jiżdiedu kemm il-livelli ta' sensibilizzazzjoni kif ukoll il-viżibilità tal-għajnuna umanitarja u l-volontarjat b'mod ġenerali fost iċ-ċittadini tal-Unjoni.

(4)

Il-viżjoni tal-Unjoni ta' għajnuna umanitarja, li tinkludi għan komuni, prinċipji u prassi tajba u qafas komuni biex titwassal l-għajnuna umanitarja tal-Unjoni, hija stipulata fid-Dikjarazzjoni Konġunta mill-Kunsill u r-Rappreżentanti tal-Gvernijiet tal-Istati Membri mlaqqgħin fil-Kunsill, il-Parlament Ewropew u l-Kummissjoni Ewropea bl-isem “Il-Kunsens Ewropew dwar l-Għajnuna Umanitarja” ( 2 ). Il-Kunsens Ewropew dwar l-Għajnuna Umanitarja jenfasizza l-impenn sod tal-Unjoni biex ikun hemm approċċ ibbażat fuq il-ħtiġijiet kif ukoll biex tiddefendi u tippromwovi l-prinċipji umanitarji fundamentali tal-umanità, in-newtralità, l-imparzjalità u l-indipendenza. L-azzjonijiet tal-Korp Volontarju Ewropew ta' Għajnuna Umanitarja (“l-inizjattiva Voluntiera tal-Għajnuna tal-UE”) għandhom jiġu ggwidati mill-Kunsens Ewropew dwar l-Għajnuna Umanitarja.

(5)

L-għajnuna umanitarja tal-Unjoni titwassal f'sitwazzjonijiet fejn jistgħu joperaw strumenti oħra relatati mal-kooperazzjoni għall-iżvilupp, il-ġestjoni tal-kriżijiet u l-protezzjoni ċivili. L-inizjattiva Voluntiera tal-Għajnuna tal-UE għandha taħdem b'mod koerenti u komplementari ma' politiki u strumenti relevanti oħra tal-Unjoni u għandha tevita x-xogħol doppju, b'mod partikolari mal-politika ta' għajnuna umanitarja tal-Unjoni, il-politika ta' kooperazzjoni għall-iżvilupp u l-Mekkaniżmu tal-Unjoni għall-Protezzjoni Ċivili stabbilit bid-Deċiżjoni Nru 1313/2013/UE tal-Parlament Ewropew u tal-Kunsill ( 3 ), iċ-Ċentru ta' Koordinazzjoni tar-Reazzjoni ta' Emerġenza stabbilit b'dik id-Deċiżjoni u mas-Servizz Ewropew ta' Azzjoni Esterna (SEAE) u d-Delegazzjonijiet tal-UE sabiex tiġi kkoordinata r-reazzjoni tal-Unjoni għall-kriżijiet umanitarji f'pajjiżi terzi.

(6)

L-inizjattiva Voluntiera tal-Għajnuna tal-UE għandha tikkontribwixxi għall-isforzi biex tissaħħaħ il-kapaċità tal-Unjoni li tipprovdi assistenza umanitarja bbażata fuq il-ħtiġijiet u jissaħħu l-kapaċitajiet u r-reżiljenza tal-komunitajiet fil-pajjiżi terzi li jkunu vulnerabbli jew jintlaqtu minn diżastri. Barra minn hekk, hu importanti li tissaħħaħ il-kooperazzjoni bejn l-organizzazzjonijiet internazzjonali relevanti u sħab oħrajn umanitarji u atturi lokali u reġjonali. Dik il-kooperazzjoni għandha titwettaq f'konformità mal-azzjonijiet meħuda min-Nazzjonijiet Uniti, sabiex jiġi appoġġjat ir-rwol ċentrali u ta' koordinatur globali tal-Uffiċċju għall-Koordinazzjoni tal-Affarijiet Umanitarji tan-Nazzjonijiet Uniti (UN-OCHA).

(7)

L-għadd, l-ambitu u l-kumplessità ta' kriżijiet umanitarji fid-dinja, kemm dawk naturali kif ukoll dawk ikkaġunati mill-bniedem, żdiedu b'mod sinifikanti matul is-snin u dik it-tendenza x'aktarx li se tkompli, ħaġa li twassal għal żieda fid-domanda fuq l-atturi umanitarji biex jipprovdu reazzjoni immedjata, effikaċi, effiċjenti u koerenti u biex jappoġġjaw il-komunitajiet lokali tal-pajjiżi terzi sabiex dawn isiru anqas vulnerabbli u tissaħħaħ ir-reżiljenza tagħhom għad-diżastri.

(8)

Il-voluntiera jistgħu jikkontribwixxu għat-tisħiħ tal-kapaċità tal-Unjoni li tipprovdi għajnuna umanitarja bbażata fuq il-ħtiġijiet u bi prinċipji u jikkontribwixxu għat-titjib tal-effikaċja tas-settur umanitarju meta jkunu adegwatament magħżula, mħarrġa u ppreparati għall-mobilizzazzjoni sabiex jiġi żgurat li jkollhom il-ħiliet u l-kompetenzi meħtieġa biex jgħinu lin-nies fil-bżonn bl-aktar mod effikaċi possibbli, sakemm dawn ikunu jistgħu jistrieħu fuq appoġġ u superviżjoni suffiċjenti fil-post.

(9)

Jeżistu skemi ta' volontarjat fl-Ewropa u fid-dinja kollha li jiffukaw fuq il-mobilizzazzjoni f'pajjiżi terzi. Ħafna drabi dawn ikunu skemi nazzjonali li jiffokaw prinċipalment jew esklużivament fuq proġetti ta' żvilupp. L-inizjattiva Voluntiera tal-Għajnuna tal-UE għandha, għalhekk, iżżid il-valur billi tipprovdi opportunitajiet għall-voluntiera biex dawn jikkontribwixxu flimkien għal operazzjonijiet ta' għajnuna umanitarja, u b'hekk tissaħħaħ iċ-ċittadinanza attiva Ewropea. L-inizjattiva tista' wkoll iżżid il-valur billi trawwem il-kooperazzjoni transnazzjonali tal-organizzazzjonijiet li jipparteċipaw fl-implimentazzjoni tal-azzjonijiet taħt l-inizjattiva Voluntiera tal-Għajnuna tal-UE, u b'hekk ittejjeb ir-relazzjonijiet internazzjonali, turi stampa pożittiva tal-Unjoni fid-dinja u trawwem l-interess fil-proġetti umanitarji pan-Ewropej.

(10)	L-inizjattiva Voluntiera tal-Għajnuna tal-UE għandha tkun effikaċi f'termini ta' spiża, għandha tikkomplementa l-iskemi volontarji nazzjonali u internazzjonali eżistenti mingħajr ma tidduplikahom, u għandha tkun iffokata fuq l-indirizzar tal-ħtiġijiet konkreti u l-lakuni fil-qasam umanitarju.

(11)

Kif enfasizzat fil-Komunikazzjoni mill-Kummissjoni tat-23 ta' Novembru 2010 intitolata “Kif iċ-ċittadini tal-UE jesprimu s-solidarjetà tagħhom permezz tal-volontarjat: L-ewwel riflessjonijiet ta' Korp Volontarju Ewropew ta' Għajnuna Umanitarja”, hemm lakuni f'dan ix-xenarju ta' volontarjat umanitarju li l-inizjattiva Voluntiera tal-Għajnuna tal-UE tista' timla bil-voluntiera bil-profili adegwati mmobilizzati fil-mument it-tajjeb fil-post it-tajjeb. Dan jista' jinkiseb l-aktar billi jiġu pprovduti standards u proċeduri Ewropej dwar l-identifikazzjoni u l-għażla ta' voluntiera umanitarji, parametri li dwarhom jintlaħaq qbil komuni għat-taħriġ u t-tħejjija ta' voluntiera umanitarji għall-mobilizzazzjoni, bażi tad-data ta' voluntiera potenzjali li jiġu identifikati abbażi tal-ħtiġijiet fil-post, u opportunitajiet għall-voluntiera biex jikkontribwixxu għal-operazzjonijiet umanitarji mhux biss permezz tal-mobilizzazzjoni iżda wkoll permezz ta' appoġġ klerikali u attivitajiet ta' volontarjat onlajn.

(12)

It-taħriġ xieraq, kif ukoll is-sigurtà u s-sikurezza tal-voluntiera għandhom jibqgħu tal-akbar importanza u għandhom ikunu suġġetti għal skambji ta' informazzjoni regolari, anke mal-Istati Membri. Il-Voluntiera tal-Għajnuna tal-UE m'għandhomx jiġu mobilizzati għal operazzjonijiet li jitwettqu fix-xena ta' kunflitti armati internazzjonali u mhux internazzjonali.

(13)

L-Unjoni twettaq l-azzjonijiet ta' għajnuna umanitarja tagħha bbażati fuq il-ħtiġijiet fi sħubija ma' organizzazzjonijiet implimentattivi. Dawk l-organizzazzjonijiet għandhom jaqdu rwol sinifikanti fl-implimentazzjoni tal-inizjattiva Voluntiera tal-Għajnuna tal-UE biex jiggarantixxu t-teħid ta' responsabbiltà diretta mill-atturi fil-qasam u sabiex jimmassimizzaw l-assorbiment potenzjali tal-azzjonijiet taħt dik l-inizjattiva. L-Unjoni għandha tafda lil tali organizzazzjonijiet partikolarlment bl-identifikazzjoni, l-għażla, it-tħejjija u l-mobilizzazzjoni tal-Voluntiera tal-Għajnuna tal-UE, kif ukoll bis-segwitu matul u wara l-missjonijiet, f'konformità mal-istandards u l-proċeduri stabbiliti mill-Kummissjoni. Il-Kummissjoni għandha, meta jkun xieraq, tkun tista' tutilizza voluntiera mħarrġa u ppreparati b'suċċess għall-mobilizzazzjoni fl-uffiċċji lokali tagħha għal kompiti ta' appoġġ.

(14)

Il-Komunikazzjoni tal-Kummissjoni tal-25 ta' Ottubru 2011 bl-isem “Strateġija mġedda tal-UE 2011-2014 għal Responsabbiltà Soċjali Korporattiva” tgħid li kumpaniji privati jista' jkollhom rwol importanti u jikkontribwixxu għall-operazzjonijiet umanitarji tal-Unjoni b'mod partikolari permezz tal-volontarjat tal-impjegati.

(15)

L-inizjattiva Voluntiera tal-Għajnuna tal-UE għandha tgħin lill-Ewropej tal-etajiet kollha juru ċittadinanza Ewropea attiva. L-inizjattiva, għalhekk, għandha tikkontribwixxi għall-promozzjoni tal-volontarjat fl-Unjoni kollha u għall-iżvilupp personali u l-għarfien interkulturali tal-voluntiera parteċipanti, biex b'hekk ittejjeb il-kompetenzi u l-impjegabilità tagħhom fl-ekonomija globali.

(16)

Il-prinċipji ta' opportunitajiet indaqs u n-nondiskriminazzjoni tal-Unjoni jissuġġerixxu li ċ-ċittadini u r-residenti regolari tal-Unjoni f'kull settur tal-ħajja u f'kull età għandhom ikunu jistgħu jipparteċipaw bħala ċittadini attivi. Fid-dawl tal-isfidi speċifiċi tal-kuntest umanitarju, il-Voluntiera tal-Għajnuna tal-UE għandu jkollhom età minima ta' 18-il sena u ikunu jistgħu jirrappreżentaw diversità wiesgħa ta' profili u ġenerazzjonijiet, inklużi esperti u persuni ta' ħila rtirati.

(17)

Status legali ċar huwa prerekwiżit kruċjali għall-voluntiera biex dawn jipparteċipaw fil-mobilizzazzjoni f'pajjiżi barra l-Unjoni. It-termini li bihom jiġu mobilizzati l-voluntieri għandhom ikunu definiti kuntrattwalment, inklużi l-istandards għall-protezzjoni u s-sikurezza tal-voluntieri, ir-responsabbiltajiet tal-organizzazzjonijiet emittenti u dawk li jospitaw, il-kopertura tal-assigurazzjoni, il-kopertura tas-sussistenza, l-akkomodazzjoni u spejjeż relevanti oħra. Il-mobilizzazzjoni tal-voluntiera f'pajjiżi terzi għandha tkun suġġetta għal arranġamenti adegwati ta' sikurezza u sigurtà.

(18)

Ir-rakkomandazzjonijiet li jinsabu fl-Aġenda ta' Politika għall-Volontarjat fl-Ewropea u l-ħidma tal-organizzazzjonijiet Ewropej u internazzjonali ta' volontarjat u l-programm Voluntiera tan-Nazzjonijiet Uniti għandhom, meta jkun relevanti, jitqiesu fl-azzjonijiet tal-inizjattiva Voluntiera tal-Għajnuna tal-UE.

(19)

L-inizjattiva Voluntiera tal-Għajnuna tal-UE għandha tappoġġja l-azzjonijiet ibbażati fuq il-ħtiġijiet immirati lejn it-tisħiħ tal-kapaċitajiet tal-organizzazzjonijiet ospitanti tal-għajnuna umanitarja fil-pajjiżi terzi sabiex ittejjeb it-tħejjija u r-reazzjoni lokali għall-kriżijiet umanitarji u sabiex tiżgura l-effikaċja u s-sostenibilità tal-ħidma tal-Voluntiera tal-Għajnuna tal-UE fil-post permezz tal-ġestjoni tar-riskji ta' diżastri, it-tħejjija u r-reazzjoni, l-ikkowċjar, it-taħriġ fil-ġestjoni tal-volontarjat, kif ukoll oqsma oħra relevanti.

(20)

L-inizjattiva Voluntiera tal-Għajnuna tal-UE, meta relevanti, għandu jkollha l-għan li tikkontribwixxi għat-tisħiħ tal-perspettiva tal-ġeneri fil-politika ta' għajnuna umanitarja tal-Unjoni, billi tippromwovi reazzjoni umanitarja adegwata għall-ħtiġijiet speċifiċi tan-nisa u tal-irġiel tal-etajiet kollha. Għandha tingħata attenzjoni speċjali lill-kooperazzjoni mal-gruppi u n-netwerks tan-nisa sabiex ikunu promossi l-parteċipazzjoni tan-nisa u l-eżerċitar min-naħa tagħhom ta' karigi ta' tmexxija fl-għajnuna umanitarja u sabiex jittieħed vantaġġ mill-kapaċitajiet u l-għarfien espert tagħhom biex jikkontribwixxu għall-irkupru, il-bini tal-paċi, it-tnaqqis tar-riskji ta' diżastri u l-bini tar-reżiljenza tal-komunitajiet milquta.

(21)

Dan ir-Regolament jistabbilixxi, għat-tul kollu tal-perjodu finanzjarju, pakkett finanzjarju, li għandu jikkostitwixxi l-ammont primarju ta' referenza, skont it-tifsira tal-punt 17 tal-Ftehim Interistituzzjonali tat-2 ta' Diċembru 2013 bejn il-Parlament Ewropew, il-Kunsill u l-Kummissjoni dwar id-dixxiplina baġitarja, dwar il-kooperazzjoni f'materji marbuta mal-baġit u l-amministrazzjoni finanzjarja tajba ( 4 ), għall-Parlament Ewropew u l-Kunsill matul il-proċedura baġitarja annwali.

(22)

L-allokazzjoni tal-għajnuna finanzjarja għandha tiġi implimentata skont ir-Regolament (UE, Euratom) Nru 966/2012 tal-Parlament Ewropew u tal-Kunsill ( 5 ). Minħabba n-natura speċifika tal-azzjonijiet taħt l-inizjattiva Voluntiera tal-Għajnuna tal-UE, huwa xieraq li jkun stipulat li l-assistenza finanzjarja tista' tingħata lil persuni fiżiċi u persuni ġuridiċi rregolati bid-dritt pubbliku jew privat. Huwa wkoll importanti li jkun żgurat li r-regoli ta' dak ir-Regolament jiġu osservati, b'mod partikolari fir-rigward tal-prinċipji tal-ekonomija, l-effiċjenza u l-effikaċja stabbiliti fih.

(23)	It-titjib tal-implimentazzjoni u l-kwalità tal-infiq għandhom jikkostitwixxu prinċipji gwida biex jintlaħqu l-objettivi tal-inizjattiva Voluntiera tal-Għajnuna tal-UE, filwaqt li jiġi żgurat użu ottimu tar-riżorsi finanzjarji.

(24)

L-interessi finanzjarji tal-Unjoni għandhom jiġu mħarsa permezz ta' miżuri proporzjonali tul iċ-ċiklu tal-infiq kollu kemm hu, li jinkludu l-prevenzjoni, l-iżvelar u l-investigazzjoni ta' irregolaritajiet, l-irkupru ta' fondi mitlufa, imħallsa indebitament jew użati skorrettament u, meta jkun xieraq, penalitajiet. Għandhom jittieħdu miżuri xierqa għall-prevenzjoni tal-irregolaritajiet u l-frodi u għandhom jittieħdu l-passi meħtieġa sabiex jiġu rkuprati l-fondi mitlufa, imħallsa indebitament jew użati skorrettament skont ir-Regolament tal-Kunsill (KE, Euratom) Nru 2988/95 ( 6 ), ir-Regolament tal-Kunsill (Euratom, KE) Nru 2185/96 ( 7 ) u r-Regolament (UE, Euratom) Nru 883/2013 tal-Parlament Ewropew u tal-Kunsill ( 8 ).

(25)

Il-parteċipazzjoni ta' pajjiżi terzi, b'mod partikolari pajjiżi fil-proċess ta' adeżjoni, pajjiżi kandidati, kandidati potenzjali, pajjiżi sħab tal-Politika Ewropea tal-Viċinat u pajjiżi tal-Assoċjazzjoni Ewropea tal-Kummerċ Ħieles, għandha tkun possibbli fuq il-bażi ta' ftehimiet ta' kooperazzjoni.

(26)

Il-volontarji parteċipanti u l-organizzazzjonijiet li jimplimentaw l-azzjonijiet taħt l-inizjattiva Voluntiera tal-Għajnuna tal-UE, mill-pajjiżi li jikkooperaw, għandhom ukoll jaderixxu mal-prinċipji stipulati fil-Kunsens Ewropew dwar l-Għajnuna Umanitarja u jippromwovu l-osservanza tagħhom, b'enfasi fuq il-protezzjoni tal-“ispazju umanitarju”.

(27)

Sabiex ikun possibbli ritorn permanenti ta' informazzjoni u titjib kontinwu u biex jiżdiedu l-flessibbiltà u l-effikaċja tal-adozzjoni tagħhom, is-setgħa li jiġu adottati atti skont l-Artikolu 290 tat-Trattat għandha tiġi delegata lill-Kummissjoni fir-rigward tad-dispożizzjonijiet li jirrigwardaw l-istandards għall-għażla, il-ġestjoni u l-mobilizzazzjoni tal-Voluntiera tal-Għajnuna tal-UE, il-modifikazzjoni tal-indikaturi tal-prestazzjoni u l-prijoritajiet tematiċi u l-aġġustament tal-perċentwali għall-allokazzjoni tal-pakkett finanzjarju għall-implimentazzjoni ta' dan ir-Regolament. Huwa ta' importanza partikolari li l-Kummissjoni tagħmel konsultazzjonijiet xierqa waqt il-ħidma preparatorja tagħha, inkluż fil-livell tal-esperti. Il-Kummissjoni, meta tħejji u tfassal l-atti delegati, għandha tiżgura trażmissjoni simultanja, f'waqtha u xierqa tad-dokumenti relevanti lill-Parlament Ewropew u lill-Kunsill.

(28)

Sabiex jiġu żgurati kundizzjonijiet uniformi għall-implimentazzjoni ta' dan ir-Regolament, għandhom jiġu konferiti fuq il-Kummissjoni setgħat ta' implimentazzjoni. Dawn is-setgħat għandhom jiġu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill ( 9 ). Il-proċedura tal-eżami għandha tintuża għall-adozzjoni tal-proċeduri ta' għażla, ġestjoni u mobilizzazzjoni tal-Voluntiera tal-Għajnuna tal-UE, il-mekkaniżmu ta' ċertifikazzjoni, il-programm ta' taħriġ u l-programm annwali ta' ħidma tal-inizjattiva Voluntiera tal-Għajnuna tal-UE.

(29)	Dan ir-Regolament jirrispetta d-drittijiet fundamentali u josserva l-prinċipji li huma rikonoxxuti mill-Karta tad-Drittijiet Fundamentali tal-Unjoni Ewropea.

(30)

L-ipproċessar tad-data personali li jitwettaq fil-qafas ta' dan ir-Regolament ma jmurx lil hinn minn dak li huwa neċessarju u proporzjonat għall-finijiet tal-iżgurar tat-tħaddim mingħajr xkiel tal-inizjattiva Voluntiera tal-Għajnuna tal-UE. Kwalunkwe pproċessar tad-data personali mill-Kummissjoni jkun irregolat mir-Regolament (KE) Nru 45/2001 tal-Parlament Ewropew u tal-Kunsill ( 10 ). Kwalunkwe pproċessar tad-data personali minn organizzazzjonijiet li jimplimentaw l-azzjonijiet taħt l-inizjattiva Voluntiera tal-Għajnuna tal-UE, stabbiliti legalment fl-Unjoni, ikun irregolat mid-Direttiva 95/46/KE tal-Parlament Ewropew u tal-Kunsill ( 11 ).

(31)	Il-Kontrollur Ewropew għall-Protezzjoni tad-Data ġie kkonsultat skont l-Artikolu 28(2) tar-Regolament (KE) Nru 45/2001 u ta opinjoni fit-23 ta' Novembru 2012 ( 12 ).

(32)	Huwa xieraq li l-perijodu ta' applikazzjoni ta' dan ir-Regolament ikun allinjat mar-Regolament tal-Kunsill (UE, Euratom) Nru 1311/2013 ( 13 ). Għaldaqstant, dan ir-Regolament għandu japplika mill-1 ta' Jannar 2014,

ADOTTAW DAN IR-REGOLAMENT:

Dan ir-Regolament jistabbilixxi Korp Volontarju Ewropew ta' Għajnuna Umanitarja “l-inizjattiva Voluntiera tal-Għajnuna tal-UE”) bħala qafas għall-kontribuzzjonijiet konġunti mill-voluntiera Ewropej biex jappoġġjaw u jikkomplementaw l-għajnuna umanitarja f'pajjiżi terzi.

Dan ir-Regolament jistabbilixxi r-regoli u l-proċeduri għall-funzjonament tal-inizjattiva Voluntiera tal-Għajnuna tal-UE u regoli għall-provvediment tal-assistenza finanzjarja.

Għall-finijiet ta' dan ir-Regolament, japplikaw id-definizzjonijiet li ġejjin:

L-objettiv tal-inizjattiva Voluntiera tal-Għajnuna tal-UE għandu jkun li jikkontribwixxi għat-tisħiħ tal-kapaċità tal-Unjoni li tipprovdi għajnuna umanitarja bbażata fuq il-ħtiġijiet immirata lejn il-protezzjoni tal-ħajjiet, il-prevenzjoni u t-taffija tat-tbatija umana u l-preservazzjoni tad-dinjità tal-bniedem u għat-tisħiħ tal-kapaċitajiet u r-reżiljenza tal-komunitajiet vulnerabbli jew milquta minn diżastri f'pajjiżi terzi, partikolarment permezz tat-tħejjija għad-diżastri, it-tnaqqis tar-riskji ta' diżastri, u t-tisħiħ tal-kollegament bejn is-sokkors, ir-riabilitazzjoni u l-iżvilupp. Dak l-objettiv għandu jintlaħaq permezz tal-valur miżjud tal-kontribuzzjonijiet konġunti tal-Voluntiera tal-Għajnuna tal-UE, li jesprimu l-valuri u s-solidarjetà tal-Unjoni mal-persuni fil-bżonn u jippromwovu b'mod viżibbli sens ta' ċittadinanza Ewropea.

1. L-azzjonijiet fil-qafas tal-inizjattiva Voluntiera tal-Għajnuna tal-UE għandhom jitwettqu f'konformità mal-prinċipji tal-għajnuna umanitarja tal-umanità, in-newtralità, l-imparzjalità u l-indipendenza u mal-Kunses Ewropew dwar l-Għajnuna Umanitarja.

2. L-azzjonijiet fil-qafas tal-inizjattiva Voluntiera tal-Għajnuna tal-UE għandhom jirrispondu għall-ħtiġijiet umanitarji tal-komunitajiet lokali u għar-rekwiżiti tal-organizzazzjonijiet ospitanti u għandhom jimmiraw li jikkontribwixxu għall-effikaċja tas-settur umanitarju.

3. Is-sikurezza u s-sigurtà tal-voluntiera kandidati u l-Voluntiera tal-Għajnuna tal-UE għandhom ikunu prijorità.

4. L-inizjattiva Voluntiera tal-Għajnuna tal-UE għandha tippromwovi proġetti konġunti bbażati fuq il-ħtiġijiet u sħubijiet transnazzjonali bejn il-voluntiera parteċipanti minn pajjiżi differenti u l-organizzazzjonijiet li jimplimentaw l-azzjonijiet, kif imsemmija fl-Artikolu 10.

1. Fl-implimentazzjoni ta' dan ir-Regolament, għandhom jiġu żgurati l-koerenza u l-komplementarjetà ma' strumenti u oqsma oħra tal-azzjoni esterna tal-Unjoni kif ukoll ma' politiki relevanti oħra tal-Unjoni, b'mod partikolari l-politika dwar l-għajnuna umanitarja, il-politika dwar il-kooperazzjoni għall-iżvilupp u l-Mekkaniżmu tal-Unjoni għall-Protezzjoni Ċivili, filwaqt li jiġu evitati x-xogħol doppju u t-trikkib, u jiġi rikonoxxut li l-għajnuna umanitarja hija regolata mill-prinċipji dwar l-għajnuna umanitarja msemmija fl-Artikolu 5(1) ta' dan ir-Regolament. Għandha tingħata attenzjoni partikolari biex tiġi żgurata tranżizzjoni bla xkiel bejn is-sokkors, ir-riabilitazzjoni u l-iżvilupp.

2. Il-Kummissjoni u l-Istati Membri għandhom jikkooperaw biex jiksbu effiċjenza u effikaċja, billi jiżguraw il-konsistenza u l-koerenza bejn l-iskemi nazzjonali relevanti ta' volontarjat u l-azzjonijiet fil-qafas tal-inizjattiva Voluntiera tal-Għajnuna tal-UE. Dawk l-azzjonijiet għandhom jibnu fuq il-prassi tajba u l-programmi eżistenti relevanti u, fejn ikun xieraq, jagħmlu użu min-netwerks Ewropej stabbiliti.

3. L-Unjoni għandha trawwem il-kooperazzjoni mal-organizzazzjonijiet internazzjonali relevanti u ma' sħab oħra umanitarji u atturi lokali u reġjonali fl-implimentazzjoni tal-azzjonijiet taħt l-inizjattiva Voluntiera tal-Għajnuna tal-UE.

Fil-promozzjoni ta' reazzjoni internazzjonali koerenti għall-kriżijiet umanitarji, l-azzjonijiet fil-qafas tal-inizjattiva Voluntiera tal-Għajnuna tal-UE għandhom ikunu f'konformità ma' dawk imwettqa min-Nazzjonijiet Uniti sabiex jiġi appoġġjat ir-rwol ċentrali u ta' koordinatur globali tal-Uffiċċju għall-Koordinazzjoni tal-Affarijiet Umanitarji (UN-OCHA).

1. L-inizjattiva Voluntiera tal-Għajnuna tal-UE issegwi l-objettivi operazzjonali li ġejjin:

2. L-indikaturi msemmija fil-punti (a) sa (e) tal-paragrafu 1 għandhom jintużaw għall-monitoraġġ, il-valutazzjoni u r-reviżjoni tal-prestazzjoni kif xieraq. Dawn huma indikattivi u jistgħu jiġu emendati permezz ta' atti delegati f'konformità mal-Artikolu 24 sabiex jittieħed kont tal-esperjenza mill-kejl tal-progress.

L-inizjattiva Voluntiera tal-Għajnuna tal-UE għandha l-objettivi msemmija fl-Artikoli 4 u 7 permezz tat-tipi ta' azzjonijiet li ġejjin:

Standards u proċeduri dwar il-voluntiera kandidati u l-Voluntiera tal-Għajnuna tal-UE

1. Filwaqt li tibni fuq il-prassi relevanti eżistenti, il-Kummissjoni għandha tistabbilixxi standards u proċeduri li jkopru l-kundizzjonijiet, l-arranġamenti u r-rekwiżiti meħtieġa li għandhom jiġu applikati mill-organizzazzjonijiet emittenti u ospitanti meta jidentifikaw, jagħżlu, jippreparaw, jiġġestixxu u jimmobilizzaw il-voluntiera kandidati u l-Voluntiera tal-Għajnuna tal-UE biex jappoġġjaw l-operazzjonijiet ta' għajnuna umanitarja fil-pajjiżi terzi.

2. Il-Kummissjoni għandha tingħata s-setgħa li tadotta atti delegati skont l-Artikolu 24 biex tistabbilixxi standards dwar:

3. Il-Kummissjoni għandha tingħata s-setgħa li tadotta atti delegati biex tistabbilixxi dan li ġej:

Dawk l-atti ta' implimentazzjoni għandhom jiġu adottati skont il-proċedura ta' eżami imsemmija fl-Artikolu 26(2).

Mekkaniżmu ta' ċertifikazzjoni għall-organizzazzjonijiet emittenti u ospitanti

1. Il-Kumissjoni għandha tiżviluppa mekkaniżmu ta' ċertifikazzjoni permezz ta' atti ta' implimentazzjoni bl-involviment, jekk ikun xieraq, tas-sħab umanitarji li jiżgura li l-organizzazzjonijiet emittenti josservaw l-istandards u l-proċeduri msemmija fl-Artikolu 9, u mekkaniżmu ta' ċertifikazzjoni differenzjata għall-organizzazzjonijiet ospitanti.

Il-Kummissjoni għandha tistabbilixxi l-proċedura relatata mal-funzjonament tal-mekkaniżmi ta' ċertifikazzjoni, billi tibni fuq il-mekkaniżmi u l-proċeduri ta' ċertifikazzjoni relevanti eżistenti, permezz ta' atti ta' implimentazzjoni. Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 26(2).

2. Meta tkun qed tfassal il-mekkaniżmu ta' ċertifikazzjoni, il-Kummissjoni għandha tfittex sinerġiji mal-istrumenti ta' sħubija tal-Kummissjoni fil-qasam umanitarju u mal-istandards umanitarji eżistenti, bil-għan ta' simplifikazzjoni amministrattiva. Il-mekkaniżmu ta' ċertifikazzjoni għandu jkun inklużiv u nondiskriminatorju fir-rigward ta' kwalunkwe tip ta' organizzazzjoni eliġibbli.

3. L-organizzazzjonijiet emittenti għandhom ikunu eliġibbli għaċ-ċertifikazzjoni, jekk:

4. L-organizzazzjonijiet f'pajjiżi terzi għandhom ikunu eliġibbli bħala organizzazzjonijiet ospitanti jekk:

5. Mingħajr preġudizzju għar-rekwiżiti msemmija fil-paragrafi 3 u 4, l-organizzazzjonijiet emittenti u dawk ospitanti jistgħu jimplimentaw azzjonijiet taħt l-inizjattiva Voluntiera tal-Għajnuna tal-UE f'assoċjazzjoni ma' organizzazzjonijiet privati li jaħdmu bi skop ta' qligħ.

6. Fuq il-bażi ta' valutazzjoni minn qabel tal-ħtiġijiet, l-organizzazzjonijiet emittenti li se jiġu ċċertifikati jistgħu jibbenefikaw minn assistenza teknika mmirata lejn it-tisħiħ tal-kapaċitajiet tagħhom biex jipparteċipaw fl-inizjattiva Voluntiera tal-Għajnuna tal-UE u biex jiżguraw l-osservanza tal-istandards u l-proċeduri msemmija fl-Artikolu 9.

L-organizzazzjonijiet ospitanti li se jiġu ċċertifikati jistgħu wkoll jibbenefikaw mill-assistenza msemmija fl-ewwel subparagrafu fil-kuntest tal-azzjonijiet imsemmija fl-Artikolu 15.

7. Il-Kummissjoni għandha tippubblika l-lista tal-organizzazzjonijiet emittenti u ospitanti fiż-żmien dovut wara ċ-ċertifikazzjoni.

1. Fuq il-bażi ta' valutazzjoni minn qabel tal-ħtiġijiet fil-pajjiżi terzi mill-organizzazzjonijiet emittenti jew dawk ospitanti jew minn atturi relevanti oħra, l-organizzazzjonijiet emittenti ċċertifikati għandhom jidentifikaw u jagħżlu l-voluntiera kandidati għat-taħriġ.

2. L-identifikazzjoni u l-għażla tal-voluntiera kandidati għandhom josservaw l-istandards u l-proċeduri msemmija fl-Artikolu 9 u josservaw il-prinċipji tan-nondiskriminazzjoni u opportunitajiet indaqs.

3. Il-persuni li ġejjin li jkollhom età minima ta' 18-il sena għandhom ikunu eliġibbli biex japplikaw bħala voluntiera kandidati:

1. Filwaqt li jinbena fuq il-programmi u l-proċeduri eżistenti u bl-involviment, jekk ikun xieraq, ta' istituzzjonijiet speċjalizzati, il-Kummissjoni għandha tistabilixxi programm ta' taħriġ biex iħejji lill-voluntiera kandidati għall-mobilizzazzjoni biex jappoġġjaw u jikkomplementaw l-għajnuna umanitarja.

2. Il-voluntiera kandidati li jkunu ġew identifikati u magħżula f'konformità mal-Artikolu 11 għandhom ikunu eliġibbli biex jieħdu sehem fil-programm ta' taħriġ implimentat minn organizzazzjonijiet kwalifikati. L-ambitu u l-kontenut individwali tat-taħriġ li kull kandidat voluntier jeħtieġ li jagħmel għandhom jiġu stabbiliti mill-organizzazzjoni emittenti ċertifikata kkonċernatat, b'konsultazzjoni mal-organizzazzjoni ospitanti ċċertifikata, fuq il-bażi tal-ħtiġijiet, waqt li titqies l-esperjenza preċedenti tal-voluntier kandidat u l-mobilizzazzjoni prevista.

3. Bħala parti mit-taħriġ tagħhom u, b'mod partikolari, it-tħejjija tagħhom għall-mobilizzazzjoni, il-voluntiera kandidati jistgħu jintalbu jagħmlu apprendistat f'organizzazzjonijiet emittenti ċċertifikati, meta jkun possibbli f'pajjiż ieħor għajr il-pajjiż ta' oriġini tagħhom.

4. Mingħajr preġudizzju għall-paragrafu 3, il-voluntiera kandidati li ma jkunux ibbenefikaw minn apprendistat jistgħu jingħataw, meta jkun xieraq, tħejjija addizzjonali ta' qabel il-mobilizzazzjoni speċifikament imfassla għall-ħtiġijiet u ċ-ċirkostanzi speċjali tal-mobilizzazzjoni. Din it-tħejjija u l-apprendistat għandhom josservaw l-istandards u l-proċeduri għat-tħejjija msemmija fl-Artikolu 9.

5. Il-programm ta' taħriġ għandu jinkludi valutazzjoni ta' kemm il-voluntiera kandidati huma preparati biex jiġu mmobilizzati biex jappoġġjaw u jikkomplementaw l-għajnuna umanitarja fil-pajjiżi terzi u biex jaqdu l-ħtiġijiet lokali. Dik il-valutazzjoni għandha ssir b'kooperazzjoni mal-organizzazzjonijiet emittenti.

6. Il-Kummissjoni għandha tadotta l-arranġamenti għall-programm ta' taħriġ u l-proċedura għall-valutazzjoni ta' kemm il-voluntiera kandidati huma ppreparati għall-mobilizzazzjoni permezz ta' atti ta' implimentazzjoni. Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 26(2).

1. Il-voluntiera kandidati li jkunu għaddew b'suċċess mill-valutazzjoni msemmija fl-Artikolu 12(5) għandhom jitqiesu li jkunu Voluntiera tal-Għajnuna tal-UE u għandhom ikunu eliġibbli għall-mobilizzazzjoni. Dawn għandhom jiddaħħlu bħala tali fil-bażi tad-data tal-Voluntiera tal-Għajnuna tal-UE.

2. Il-Kummissjoni għandha tistabbilixxi, iżżomm u taġġorna l-bażi tad-data tal-Voluntiera tal-Għajnuna tal-UE, inklużi fir-rigward tad-disponibilità u l-eliġibilità tal-Voluntiera tal-Għajnuna tal-UE għall-mobilizzazzjoni, u tirregola l-aċċess għaliha u l-użu tagħha. L-ipproċessar tad-data personali miġbura f'din il-bażi tad-data jew għaliha għandu jitwettaq, fejn rilevanti, f'konformità mad-Direttiva 95/46/KE u r-Regolament (KE) Nru 45/2001.

1. Il-Voluntiera tal-Għajnuna tal-UE imdaħħla fil-bażi tad-data jistgħu jiġu mobilizzati biex jappoġġjaw u jikkomplementaw l-għajnuna umanitarja kif definit fil-punt (d) tal-Artikolu 3:

2. Il-mobilizzazzjoni għandha taqdi l-ħtiġijiet reali espressi fil-livell lokali mill-organizzazzjonijiet ospitanti.

3. Għall-mobilizzazzjoni kif imsemmi fil-punt (a) tal-paragrafu 1, l-organizzazzjonijiet emittenti ċċertifikati għandhom jiżguraw l-osservanza tal-istandards u l-proċeduri msemmija fl-Artikolu 9. Il-Voluntiera tal-Għajnuna tal-UE m'għandhomx jiġu mobilizzati għal operazzjonijiet fix-xena ta' kunflitti internazzjonali u mhux internazzjonali.

4. L-organizzazzjonijiet emittenti ċċertifikati għandhom jinformaw lill-awtoritajiet nazzjonali relevanti tal-Istati Membri u ta' pajjiżi parteċipanti oħra, f'konformità mal-Artikolu 23, qabel ma wieħed miċ-ċittadini tagħhom jiġi mobilizzat bħala EU Aid Volunteer, f'konformità mal-istandards u l-proċeduri msemmija fl-Artikolu 9.

5. It-termini speċifiċi tal-mobilizzazzjoni u r-rwol tal-Voluntiera tal-Għajnuna tal-UE għandhom ikunu stabbiliti, f'konsultazzjoni mill-qrib mal-organizzazzjonijiet ospitanti, f'kuntratt bejn l-organizzazzjonijiet emittenti u l-Voluntiera tal-Għajnuna tal-UE, inklużi d-drittijiet u l-obbligi, it-tul u l-post tal-mobilizzazzjoni u l-kompiti tal-Voluntiera tal-Għajnuna tal-UE.

6. Għall-mobilizzazzjoni kif imsemmija fil-punt (b) tal-paragrafu 1, il-Kummissjoni għandha tiffirma kuntratt ta' mobilizzazzjoni ta' voluntier mal-Voluntiera tal-Għajnuna tal-UE li jiddefinixxi t-termini u l-kundizzjonijiet speċifiċi tal-mobilizzazzjoni. Il-kuntratti ta' mobilizzazzjoni ta' voluntier ma għandhomx jikkonferixxu lill-voluntier drittijiet u obbligi li jirriżultaw mir-Regolamenti tal-Persunal tal-Uffiċjali tal-Unjoni Ewropea u l-Kundizzjonijiet ta' Impjieg ta' Impjegati Oħra tal-Unjoni Ewropea stipulati fir-Regolament tal-Kunsill (KEE, Euratom, KEFA) Nru 259/68 ( 14 ).

7. Kull EU Aid Volunteer għandu jkollu mentor magħżul mill-organizzazzjoni ospitanti biex jissorvelja u jappoġġja lill-EU Aid Volunteer matul il-mobilizzazzjoni.

Bini tal-kapaċitajiet għall-għajnuna umanitarja tal-organizzazzjonijiet ospitanti

Fuq il-bażi ta' valutazzjoni minn qabel tal-ħtiġijiet f'pajjiż terz mill-organizzazzjonijiet emittenti u dawk ospitanti jew minn atturi relevanti oħra, il-Kummissjoni għandha tappoġġja azzjonijiet immirati lejn it-tisħiħ tal-kapaċitajiet tal-organizzazzjonijiet ospitanti fil-qasam tal-għajnuna umanitarja sabiex ittejjeb it-tħejijja u r-reazzjoni lokali għall-kriżijiet umanitarji u biex jiġi żgurat impatt effettiv u sostenibbli tal-ħidma tal-Voluntiera tal-Għajnuna tal-UE fil-post, inklużi:

1. Il-Kummissjoni għandha tistabbilixxi u tmexxi netwerk għall-inizjattiva Voluntiera tal-Għajnuna tal-UE li jkun magħmul minn:

2. In-netwerk għall-inizjattiva Voluntiera tal-Għajnuna tal-UE, b'mod partikolari, għandu:

1. Il-Kummissjoni għandha tappoġġja azzjonijiet ta' informazzjoni pubblika, komunikazzjoni u sensibilizzazzjoni biex tippromwovi inizjattiva Voluntiera tal-Għajnuna tal-UE viżibbli u biex tinkoraġġixxi l-volontarjat fl-għajnuna umanitarja fl-Unjoni u fl-Istati Membri tagħha kif ukoll fil-pajjiżi terzi li jibbenefikaw mill-azzjonijiet taħt dik l-inizjattiva.

2. Il-Kummissjoni għandha tiżviluppa pjan ta' komunikazzjoni dwar l-objettivi, l-azzjonijiet u r-riżultati viżibbli tal-inizjattiva Voluntiera tal-Għajnuna tal-UE li għandu jiddefinixxi attivitajiet ta' komunikazzjoni u disseminazzjoni diretti lejn il-pubbliku, b'mod partikolari lejn il-voluntiera kandidati potenzjali futuri u l-benefiċjarji tal-azzjonijiet taħt dik l-inizjattiva. Dak il-pjan ta' komunikazzjoni għandu jiġi implimentat mill-Kummissjoni u mill-benefiċjarji, b'mod partikolari l-organizzazzjonijiet emittenti u ospitanti, kif ukoll il-Voluntiera tal-Għajnuna tal-UE.

1. L-azzjonijiet imsemmija fl-Artikolu 8 għandhom ikunu eliġibbli għal għajnuna finanzjarja, inklużi l-miżuri meħtieġa għall-implimentazzjoni tagħhom kif ukoll miżuri meħtieġa mmirati biex isaħħu l-koordinazzjoni bejn l-inizjattiva Voluntiera tal-Għajnuna tal-UE u skemi oħra relevanti fil-livell nazzjonali u dak internazzjonali li jibnu fuq il-prassi tajba eżistenti.

2. L-assistenza finanzjarja li hemm referenza għaliha fil-paragrafu 1 tista' tkopri wkoll l-ispejjeż marbuta mal-attivitajiet ta' tħejjija, monitoraġġ, kontroll, awditjar u valutazzjoni, li huma meħtieġa għall-ġestjoni tal-inizjattiva Voluntiera tal-Għajnuna tal-UE u għall-ilħiq tal-objettivi tagħha.

3. L-ispejjeż imsemmijin fil-paragrafu 2 jistgħu, b'mod partikolari, ikopru studji, laqgħat ta' esperti, azzjonijiet ta' informazzjoni u komunikazzjoni kif stipulati fl-Artikolu 17, inkluża l-komunikazzjoni korporattiva tal-prijoritajiet tal-politika tal-Unjoni, sakemm ikunu relatati mal-objettivi tal-inizjattiva Voluntiera tal-Għajnuna tal-UE, spejjeż marbuta man-netwerks tat-teknoloġija tal-informazzjoni li jiffokaw fuq l-ipproċessar u l-iskambju ta' informazzjoni (inkluża l-interkonnessjoni tagħhom mas-sistemi eżistenti jew ma' sistemi futuri mfassla biex jippromwovu l-iskambju tad-data intersettorjali u t-tagħmir relatat), kif ukoll kwalunkwe spiża oħra ta' assistenza teknika u amministrattiva mġarrba mill-Kummissjoni.

L-assistenza finanzjarja skont dan ir-Regolament tista' tingħata lil persuni fiżiċi u lil persuni ġuridiċi, kemm jekk regolati mid-dritt privat jew minn dak pubbliku, li mbagħad jitqiesu bħala benefiċjarji finanzjarji fit-tifsira tar-Regolament (UE, Euratom) Nru 966/2012.

1. Il-pakkett finanzjarju għall-implimentazzjoni ta' dan ir-Regolament għall-perjodu mill-1 ta' Jannar 2014 sal-31 ta' Diċembru 2020 għandu jkun ta' EUR 147 936 000 fi prezzijiet attwali. L-approprjazzjonijiet annwali għandhom jiġu awtorizzati mill-Parlament Ewropew u l-Kunsill fil-limiti tal-qafas finanzjarju pluriennali. Jekk ikun meħtieġ, l-approprjazzjonijiet ta' pagament jistgħu jiddaħħlu fil-baġit lil hinn mill-2020 biex ikopru spejjeż simili, sabiex ikunu jistgħu jiġu ġestiti l-pagamenti tal-azzjonijiet li ma jkunux għadhom tlestew sal-31 ta' Diċembru 2020.

2. Il-pakkett finanzjarju msemmi fil-paragrafu 1 għandu jiġi allokat, matul il-perjodu 2014–2020, skont l-objettivi operazzjonali, il-prijoritajiet tematiċi u l-perċentwali stipulati fl-Anness.

3. Il-Kummissjoni għandha tingħata s-setgħa li tadotta atti delegati, f'konformità mal-Artikolu 24, biex temenda l-prijoritajiet u taġġustja kull waħda miċ-ċifri fl-Anness b'iktar minn 10 punti perċentwali u sa 20 punt perċentwali. Tali aġġustament għandu jsir biss wara r-riżultati ta' reviżjoni mill-Kummissjoni tal-prijoritajiet tematiċi u l-perċentwali stipulati fl-Anness fid-dawl tar-riżultat tal-evalwazzjoni interim imsemmija fil-punt (b) tal-Artikolu 27(4), f'liema każ l-atti delegati jiġu adottati sat-30 ta' Ġunju 2018.

4. Meta, fil-każ ta' reviżjoni meħtieġa tar-riżorsi baġitarji disponibbli għall-appoġġ għall-azzjonijiet ta' reazzjoni ta' emerġenza, raġunijiet imperattivi ta' emerġenza jirrikjedu hekk, il-Kummissjoni għandha tingħata s-setgħa li tadotta atti delegati biex tirrevedi kull waħda miċ-ċifri stipulati fl-Anness b'iktar minn 10 punt perċentwali u sa 20 punt perċentwali, fil-limiti tal-allokazzjonijiet baġitarji disponibbli u f'konformità mal-proċedura prevista fl-Artikolu 25.

1. Il-Kummissjoni għandha timplimenta l-assistenza finanzjarja f'konformità mar-Regolament (UE, Euratom) Nru 966/2012.

2. L-assistenza finanzjarja skont dan ir-Regolament tista' tieħu kwalunkwe waħda mill-forom previsti mir-Regolament (UE, Euratom) Nru 966/2012.

3. Sabiex timplimenta dan ir-Regolament, il-Kummissjoni tadotta programm ta' ħidma annwali tal-inizjattiva Voluntiera tal-Għajnuna tal-UE permezz ta' atti ta' implimentazzjoni. Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 26(2). Il-programm ta' ħidma annwali għandu jistabbilixxi l-objettivi li jiġu segwiti, ir-riżultati mistennija, il-metodu ta' implimentazzjoni u l-ammont tan-nefqa totali relatata. Il-programm ta' ħidma annwali għandu jkun fih ukoll id-deskrizzjoni tal-azzjonijiet li jridu jiġu ffinanzjati, indikazzjoni tal-ammonti allokati għal kull azzjoni, b'kunsiderazzjoni tal-ħtiġijiet valutati meta jkun xieraq, u skeda indikattiva taż-żmien ta' implimentazzjoni. Rigward l-għotjiet, il-programm ta' ħidma annwali għandu jinkludi l-prijoritajiet, il-kriterji essenzjali tal-evalwazzjoni u r-rata massima ta' kofinanzjament. Il-programm ta' ħidma annwali jistabbilixxi wkoll l-parteċipazzjoni ta' pajjiżi terzi bil-kundizzjonijiet imsemmija fl-Artikolu 23.

1. Il-Kummissjoni għandha tieħu miżuri xierqa li jiżguraw li, meta jiġu implimentati l-azzjonijiet iffinanzjati taħt l-inizjattiva Voluntiera tal-Għajnuna tal-UE, l-interessi finanzjarji tal-Unjoni jkunu protetti bl-applikazzjoni ta' miżuri preventivi kontra l-frodi, il-korruzzjoni u kwalunkwe attività illegali oħra, permezz ta' kontrolli effikaċi u, jekk jiġu żvelati irregolaritajiet, permezz tal-irkupru tal-ammonti mħallsa indebitament u, meta jkun xieraq, permezz ta' sanzjonijiet effikaċi, proporzjonati u dissważivi.

2. Il-Kummissjoni jew ir-rappreżentanti tagħha u l-Qorti tal-Awdituri għandu jkollhom is-setgħa tal-awditjar, abbażi ta' dokumenti u fil-post, fuq il-benefiċjarji tal-għajnuna finanzjarja, il-kuntratturi u s-sottokuntratturi kollha li rċevew fondi tal-Unjoni taħt l-inizjattiva Voluntiera tal-Għajnuna tal-UE.

3. L-Uffiċċju Ewropew Kontra l-Frodi (OLAF) għandu jitħalla jwettaq verifiki u spezzjonijiet fil-post fuq l-operaturi ekonomiċi kkonċernati direttament jew indirettament minn tali finanzjament f'konformità mal-proċeduri stabbiliti fir-Regolament (Euratom, KE) Nru 2185/96 u r-Regolament (Euratom, KE) Nru 883/2013 bil-għan li jistabbilixxi jekk saritx frodi, korruzzjoni jew xi attività illegali oħra li tolqot l-interessi finanzjarji tal-Unjoni b'rabta ma' ftehim ta' għoti, deċiżjoni ta' għoti jew kuntratt iffinanzjati taħt l-inizjattiva Voluntiera tal-Għajnuna tal-UE.

4. Mingħajr preġudizzju għall-paragrafi 1 u 2, il-ftehimiet ta' kooperazzjoni ma' pajjiżi terzi u ma' organizzazzjonijiet internazzjonali, il-ftehimiet ta' għoti, id-deċiżjonijiet ta' għoti u l-kuntratti li jirriżultaw mill-implimentazzjoni ta' dan ir-Regolament għandhom jagħtu s-setgħa espressament lill-Kummissjoni, lill-Qorti tal-Awdituri u lill-OLAF biex jagħmlu tali awditjar, kontrolli u spezzjonijiet fil-post, b'osservanza dovuta tal-garanziji proċedurali relevanti kollha.

1. L-inizjattiva Voluntiera tal-Għajnuna tal-UE għandha tkun miftuħa għall-parteċipazzjoni ta':

2. Il-voluntiera parteċipanti u l-organizzazzjonijiet li jimplimentaw l-azzjonijiet taħt l-inizjattiva Voluntiera tal-Għajnuna tal-UE, mill-pajjiżi li jikkooperaw, għandhom josservaw ukoll il-prinċipji ġenerali msemmija fl-Artikolu 4.

3. Il-kooperazzjoni mal-pajjiżi parteċipanti msemmija fil-paragrafu 1għandha tkun imsejsa, fejn ikun relevanti, fuq il-fatt li approprjazzjonijiet addizzjonali mingħand il-pajjiżi parteċipanti jsiru disponibbli f'konformità mal-proċeduri li għandhom jiġu miftiehma ma' dawk il-pajjiżi.

1. Is-setgħa ta' adozzjoni ta' atti delegati tingħata lill-Kummissjoni skont il-kundizzjonijiet stabbiliti f'dan l-Artikolu.

2. Is-setgħa ta' adozzjoni ta' atti delegati msemmija fl-Artikolu 7(2), l-Artikolu 9(2), l-Artikolu 20(3) u l-Artikolu 20(4) għandha tingħata lill-Kummissjoni għal perjodu ta' seba' snin mill-25 ta' April 2014.

3. Id-delega tas-setgħa msemmija fl-Artikolu 7(2), l-Artikolu 9(2) u l-Artikolu 20(3) tista' tiġi revokata fi kwalunkwe mument mill-Parlament Ewropew jew mill-Kunsill. Deċiżjoni ta' revoka għandha ttemm id-delega tas-setgħa speċifikata f'dik id-deċiżjoni. Hija għandha ssir effettiva fil-jum wara l-pubblikazzjoni tad-deċiżjoni f'Il-Ġurnal Uffiċjali tal-Unjoni Ewropea jew f'data aktar tard speċifikata fiha. Ma għandha taffettwa l-validità ta' ebda att delegat diġà fis-seħħ.

4. Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

5. Att delegat adottat skont l-Artikolu 7(2), l-Artikolu 9(2) u l-Artikolu 20(3) għandu jidħol fis-seħħ biss jekk la l-Parlament Ewropew u lanqas il-Kunsill ma jesprimu oġġezzjoni fi żmien perjodu ta' xahrejn min-notifika ta' dak l-att lill-Parlament Ewropew u lill-Kunsill jew jekk, qabel l-iskadenza ta' dak il-perjodu, il-Parlament u l-Kunsill it-tnejn li huma jkunu infurmaw lill-Kummissjoni li mhumiex se joġġezzjonaw. Dak il-perjodu għandu jiġi estiż b'xahrejn fuq inizjattiva tal-Parlament Ewropew jew tal-Kunsill.

1. F'ċirkostanzi eċċezzjonali u debitament iġġustifikati l-atti delegati adottati skont dan l-Artikolu għandhom jidħlu fis-seħħ mingħajr dewmien u għandhom japplikaw sakemm ma tkun ġiet espressal-ebda oġġezzjoni f'konformità mal-paragrafu 2. In-notifika ta' att delegat lill-Parlament Ewropew u lill-Kunsill għandha tagħti r-raġunijiet li għalihom tkun intużat il-proċedura ta' urġenza.

2. Il-Parlament Ewropew jew il-Kunsill jistgħu joġġezzjonaw għal att delegat bi bqil mal-proċedura msemmija fl-Artikolu 24(5). F'tali każ, il-Kummissjoni għandha tirrevoka l-att mingħajr dewmien wara n-notifika tad-deċiżjoni ta' oġġezzjoni mill-Parlament Ewropew jew mill-Kunsill.

1. Il-Kummissjoni għandha tkun assistita mill-kumitat stabbilit skont l-Artikolu 17(1) tar-Regolament tal-Kunsill (KE) Nru 1257/96 ( 15 ). Dak il-kumitat għandu jkun kumitat skont it-tifsira tar-Regolament (UE) Nru 182/2011.

2. Meta ssir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.

1. L-azzjonijiet taħt l-inizjattiva Voluntiera tal-Għajnuna tal-UE li jirċievu assistenza finanzjarja għandhom jiġu mmonitorjati regolarment sabiex tkun segwita l-implimentazzjoni tagħhom, u jiġu evalwati regolarment permezz ta' evalwazzjoni esterna indipendenti biex jiġu vvalutati l-effiċjenza, l-effikaċja u l-impatti tagħhom fir-rigward tal-objettivi tal-inizjattiva Voluntiera tal-Għajnuna tal-UE. Il-monitoraġġ u l-evalwazzjoni għandhom jinkludu r-rapporti msemmija fil-paragrafu 4 u attivitajiet oħra dwar aspetti speċifiċi ta' dan ir-Regolament li jistgħu jitnedew fi kwalunkwe ħin matul l-implimentazzjoni tiegħu.

2. L-organizzazzjonijiet emittenti li jimmobilizzaw Voluntiera tal-Għajnuna tal-UE f'operazzjonijiet barra l-Unjoni għandhom ikunu responsabbli għall-monitoraġġ tal-attivitajiet tagħhom u jissottomettu lill-Kummissjoni rapporti ta' monitoraġġ fuq bażi regolari filwaqt li jissalvagwardjaw id-drittijiet kollha tal-voluntiera individwali fir-rigward tal-protezzjoni tad-data personali.

3. L-evalwazzjonijiet għandhom jagħmlu użu mill-istandards eżistenti ta' evalwazzjoni, inklużi dawk żviluppati mill-Kumitat għall-Għajnuna fl-Iżvilupp tal-Organizzazzjoni għall-Kooperazzjoni Ekonomika u l-Iżvilupp, bl-objettiv li jitkejjel l-impatt għat-terminu twil tal-inizjattiva Voluntiera tal-Għajnuna tal-UE fuq l-għajnuna umanitarja. Fil-fażi ta' evalwazzjoni, il-Kummissjoni għandha tiżgura konsultazzjoni regolari mal-partijiet interessati relevanti kollha, inklużi l-voluntiera, l-organizzazzjonijiet emittenti u dawk ospitanti, il-popolazzjoni u l-komunitajiet lokali megħjuna, l-organizzazzjonijiet umanitarji u l-ħaddiema fil-post. Ir-riżultati tal-evalwazzjoni għandhom jaffettwaw it-tfassil tal-programmi u l-allokazzjoni tar-riżorsi.

5. Il-Kummissjoni għandha tirrevedi l-miżuri stipulati f'dan ir-Regolament sal-1 ta' Settembru 2019 u, meta jkun xieraq wara l-konklużjoni tar-rapport ta' evalwazzjoni interim imsemmi fil-punt (b) tal-paragrafu 4 ta' dan l-Artikolu, takkumpanja dik ir-reviżjoni bi proposta leġiżlattiva dwar modifika ta' dan ir-Regolament.

6. Il-Kummissjoni għandha tinforma wkoll regolarment lis-SEAE dwar l-attivitajiet tal-inizjattiva Voluntiera tal-Għajnuna tal-UE f'konformità mal-arranġamenti ta' ħidma relevanti.

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

OBJETTIVI OPERAZZJONALI, PRIJORITAJIET TEMATIĊI U PERĊENTWALI GĦALL-ALLOKAZZJONI TAL-PAKKETT FINANZJARJU GĦALL-IMPLIMENTAZZJONI TA' DAN IR-REGOLAMENT

Il-mobilizzazzjoni tal-Voluntiera tal-Għajnuna tal-UE biex jappoġġjaw u jikkomplementaw l-għajnuna umanitarja

Din il-prijorità tematika għandha tindirizza l-objettiv operazzjonali taħt il-punt (a) tal-Artikolu 7(1) (Kontribuzzjoni għaż-żieda u t-titjib tal-kapaċità tal-Unjoni li tipprovdi għajnuna umanitarja):

Il-bini tal-kapaċitajiet tal-Voluntiera tal-Għajnuna tal-UE u l-organizzazzjonijiet implimentattivi: 55 % +/- 10 punti perċentwali

Din il-prijorità tematika għandha tindirizza l-objettiv operazzjonali taħt il-punt (b) tal-Artikolu 7(1) (Titjib tal-ħiliet, l-għarfien u l-kompetenzi tal-voluntiera fil-qasam tal-għajnuna umanitarja u t-termini u l-kundizzjonijiet tal-involviment tagħhom); il-punt (c) tal-Artikolu 7(1) (Bini tal-kapaċitajiet tal-organizzazzjonijiet ospitanti u trawwim tal-volontarjat f'pajjiżi terzi); u l-punt (e) tal-Artikolu 7(1) (Titjib tal-koerenza u l-konsistenza tal-volontarjat fl-Istati Membri kollha sabiex jittejbu l-opportunitajiet għaċ-ċittadini tal-Unjoni biex jipparteċipaw f'attivitajiet u operazzjonijiet ta' għajnuna umanitarja):

Din il-prijorità tematika għandha tindirizza l-objettiv operazzjonali taħt il-punt (d) tal-Artikolu 7(1) Komunikazzjoni tal-prinċipji tal-Unjoni dwar l-għajnuna umanitarja kif miftiehma fil-Kunsens Ewropew dwar l-Għajnuna Umanitarja).

( 1 ) Pożizzjoni tal-Parlament Ewropewa tal-25 ta' Frar 2014 (għadha mhijiex ippubblikata fil-Ġurnal Uffiċjali) u Deċiżjoni tal-Kunsill tas-18 ta' Marzu 2014.

( 3 ) Deċiżjoni Nru 1313/2013/UE tal-Parlament Ewropew u tal-Kunsill tas- 17 ta' Diċembru 2013 dwar Mekkaniżmu tal-Unjoni għall-Protezzjoni Ċivili (ĠU L 347, 20.12.2013, p. 924).

( 5 ) Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta' Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (ĠU L 298, 26.10.2012, p. 1).

( 6 ) Regolament tal-Kunsill (KE, Euratom) Nru 2988/95 tat-18 ta' Diċembru 1995 dwar il-protezzjoni tal-interessi finanzjarji tal-Komunitajiet (ĠU L 312, 23.12.1995, p. 1).

( 7 ) Regolament tal-Kunsill (Euratom, KE) Nru 2185/96 tal-11 ta' Novembru 1996 dwar il-verifiki u l-ispezzjonijiet fil-post imwettqa mill-Kummissjoni sabiex tipproteġi l-interessi finanzjarji tal-Komunitajiet Ewropej kontra l-frodi u irregolaritajiet oħra (ĠU L 292, 15.11.1996, p. 2).

( 8 ) Regolament (UE, Euratom) Nru 883/2013 tal-Parlament Ewropew u tal-Kunsill tal-11 ta' Settembru 2013 dwar investigazzjonijiet immexxija mill-Uffiċċju Ewropew Kontra l-Frodi (OLAF) u li jħassar ir-Regolament tal-Parlament Ewropew u tal-Kunsill (KE) Nru 1073/1999 u r-Regolament tal-Kunsill (Euratom) Nru 1074/1999 (ĠU L 248, 18.9.2013, p. 1).

( 9 ) Regolament (UE) Nru 182/2011 tal-Parlament Ewropew u tal-Kunsill tas-16 ta' Frar 2011 li jistabbilixxi r-regoli u l-prinċipji ġenerali dwar il-modalitajiet ta' kontroll mill-Istati Membri tal-eżerċizzju mill-Kummissjoni tas-setgħat ta' implimentazzjoni (ĠU L 55, 28.2.2011, p. 13).

( 10 ) Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu fir-rigward tal-ipproċessar ta' data personali mill-istituzzjonijiet u l-korpi tal-Komunità u dwar il-moviment liberu ta' dik id-data (ĠU L 8, 12.1.2001, p. 1).

( 11 ) Direttiva tal-Parlament Ewropew u tal-Kunsill 95/46/KE tal-24 ta' Ottubru, 1995 dwar il-protezzjoni ta' individwi fir-rigward tal-ipproċessar ta' data personali u dwar il-moviment liberu ta' dik id-data (ĠU L 281, 23.11.1995, p. 31).

( 13 ) Regolament tal-Kunsill (UE, Euratom) Nru 1311/2013 tat-2 ta' Diċembru 2013 li jistabbilixxi l-qafas finanzjarju pluriennali għas-snin 2014-2020 (ĠU L 347, 20.12.2013, p. 884).

( 14 ) Regolament tal-Kunsill (KEE, Euratom, KEFA) Nru 259/68 tad-29 ta' Frar 1968 li jistabbilixxi r-Regolamenti tal-Persunal tal-Uffiċjali u l-Kondizzjonijiet tal-impjieg ta' Ħaddiema Oħra tal-Komunitajiet Ewropej u li jistabbilixxi miżuri temporanji applikabbli għall-Uffiċjali tal-Kummissjoni (ĠU L 56, 4.3.1968, p. 1).

( 15 ) Regolament tal-Kunsill (KE) Nru 1257/96 tal-20 Ġunju 1996 rigward l-għajnuna umanitarja (ĠU L 163, 2.7.1996, p. 1).