2006R1184 — MT — 01.01.2014 — 004.001
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
REGOLAMENT TAL-KUNSILL (KE) Nru 1184/2006 ta' l-24 ta’ Lulju 2006 li japplika ċerti regoli ta' kompetizzjoni għall-produzzjoni ta' u kummerċ f'ċerti prodotti agrikoli (ĠU L 214, 4.8.2006, p.7) |
Emendat bi:
|
|
Il-Ġurnal Uffiċjali |
||
No |
page |
date |
||
REGOLAMENT TAL-KUNSILL (KE) Nru 1234/2007 tat-22 ta' Ottubru 2007 |
L 299 |
1 |
16.11.2007 |
|
REGOLAMENT TAL-KUNSILL (KE) Nru 361/2008 ta' l-14 ta' April 2008 |
L 121 |
1 |
7.5.2008 |
|
REGOLAMENT TAL-KUNSILL (KE) Nru 491/2009 tal-25 ta’ Mejju 2009 |
L 154 |
1 |
17.6.2009 |
|
REGOLAMENT (UE) Nru 1379/2013 TAL-PARLAMENT EWROPEW U TAL-KUNSILL tal-11 ta' Diċembru 2013 |
L 354 |
1 |
28.12.2013 |
REGOLAMENT TAL-KUNSILL (KE) Nru 1184/2006
ta' l-24 ta’ Lulju 2006
li japplika ċerti regoli ta' kompetizzjoni għall-produzzjoni ta' u kummerċ f'ċerti prodotti agrikoli
IL-KUNSILL TA’ L-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea, u partikolarment l-Artikoli 36 u 37 tiegħu,
Wara li kkunsidra l-proposta mill-Kummissjoni,
Wara li kkunsidra l-Opinjoni tal-Parlament Ewropew ( 1 ),
Billi:
(1) |
Il-kontenut tar-Regolament tal-Kunsill Nru 26 ta' l-4 ta' April 1962 li japplika ċerti regoli tal-kompetizzjoni għall-produzzjoni u għall-kummerċ ta’ prodotti agrikoli ( 2 ) ġie emendat ( 3 ). Għal aktar ċarezza u razzjonalità, l-imsemmi Regolament għandu jiġi kkodifikat. |
(2) |
Bis-saħħa ta' l-Artikolu 36 tat-Trattat waħda mill-kwistjonijiet li trid tiġi deċiża taħt il-politika agrikola komuni hi dwar jekk ir-regoli ta' kompetizzjoni mniżżlin fit-Trattat għandhomx jiġu applikati għall-produzzjoni u l-kummerċ ta' prodotti agrikoli. Għaldaqstant, id-dispożizzjonijiet ta' dan ir-Regolament għandhom ikunu ssupplimentati fid-dawl ta' l-iżviluppi f'dik il-politika. |
(3) |
Ir-regoli dwar il-kompetizzjoni relatati mal-ftehim, mad-deċiżjonijiet u mal-prattiċi msemmijin fl-Artikolu 81 tat-Trattat u ma' l-abbuż ta' pożizzjonijiet dominanti għandhom jiġu applikati għall-produzzjoni u l-kummerċ ta' prodotti agrikoli, sakemm l-applikazzjoni tagħhom ma tfixkilx il-funzjonament ta' organizzazzjonijiet nazzjonali ta' swieq agrikoli jew ma theddidx il-ksib ta' l-objettivi tal-politika agrikola komuni. |
(4) |
Għandha tingħata attenzjoni speċjali fil-każ ta' organizzazzjonijiet ta' bdiewa li għandhom l-objettiv partikolari ta' produzzjoni jew kummerċjalizzazzjoni konġunta ta' prodotti agrikoli jew l-użu ta' faċilitajiet konġunti, sakemm tali azzjoni konġunta ma teskludix l-kompetizzjoni jew thedded il-ksib ta' l-objettivi ta' l-Artikolu 33 tat-Trattat. |
(5) |
Sabiex jiġi evitat sew li jiġi kompromess l-iżvilupp ta’ politika agrikola komuni u sew biex tiġi żgurata ċ-ċertezza fil-liġi u t-trattament mhux diskriminatorju ta' l-impriżi konċernati, il-Kummissjoni għandu jkollha kompetenza esklussiva, soġġetta għar-reviżjoni mill-Qorti tal-Ġustizzja, li tistabbilixxi jekk il-kondizzjonijiet previsti fiż-żewġ premessi preċedenti rigward il-ftehim, id-deċiżjonijiet u l-prattiċi msemmija fl-Artikolu 81 tat-Trattat, humiex sodisfatti. |
(6) |
Sabiex jiġu implimentati, bħala parti mill-iżvilupp tal-politika agrikola komuni, ir-regoli dwar l-għajnuna għall-produzzjoni u l-kummerċ ta' prodotti agrikoli, il-Kummissjoni għandha tkun f’pożizzjoni li tfassal lista ta' l-għajnuna eżistenti, ġdida jew proposta, sabiex tagħmel osservazzjonijiet xierqa lill-Istati Membri u sabiex tipproponilhom miżuri xierqa, |
ADOTTA DAN IR-REGOLAMENT:
Artikolu 1
Dan ir-Regolament jistipula r-regoli li jikkonċernaw l-applikabbiltà tal-Artikoli 101 sa 106 u ċerti dispożizzjonijiet tal-Artikolu 108(1) u (3) tat-Trattat dwar il-Funzjonament tal-Unjoni Ewropea (TFUE) fir-rigward tal-produzzjoni jew tal-kummerċ tal-prodotti elenkati fl-Anness I mat-TFUE bl-eċċezzjoni tal-prodotti koperti mir-Regolament tal-Kunsill (KE) Nru 1234/2007 ( 4 ) u r-Regolament (UE) Nru 1379/2013 tal-Parlament Ewropew u tal-Kunsill ( 5 ).
Artikolu 1a
L-Artikoli 81 sa 86 tat-Trattat u d-dispożizzjonijiet għall-implimentazzjoni tagħhom għandhom, suġġetti għall-Artikolu 2 ta' dan ir-Regolament, japplikaw għall-ftehim, deċiżjonijiet u prattika kollha msemmija fl-Artikoli 81(1) u 82 tat-Trattat li huma rigward il-produzzjoni ta' jew għall-kummerċ tal-prodotti msemmija fl-Artikolu 1.
Artikolu 2
1. L-Artikolu 81(1) tat-Trattat ma għandux japplika għal dawk il-ftehim, deċiżjonijiet u prattika msemmija fl-Artikolu 1a ta' dan ir-Regolament li huma parti integrali minn organizzazzjoni tas-suq nazzjonali jew li huma meħtieġa għall-kisba ta' l-objettivi stabbiliti fl-Artikolu 33 tat-Trattat.
B’mod partikolari, dan m'għandux japplika għall-ftehim, deċiżjonijiet u prattiċi tal-bdiewa, l-assoċjazzjonijiet tal-bdiewa, jew l-assoċjazzjonijiet ta' dawn l-assoċjazzjonijiet li jappartjienu lil Stat Membru wieħed u li jirrigwardaw il-produzzjoni jew il-bejgħ ta' prodotti agrikoli jew l-użu ta' faċilitajiet konġunti għall-ħażna, it-trattament jew l-ipproċessar ta' prodotti agrikoli, u li skond dawn ma hemm l-ebda obbligu li jintalbu prezzijiet identiċi, għajr jekk il-Kummissjoni ssib li l-kompetizzjoni hija b’hekk eskluża jew li l-objettivi ta' l-Artikolu 33 tat-Trattat huma mhedda.
2. Wara li tikkonsulta lill-Istati Membri u tisma’ lill-impriżi jew lill-assoċjazzjonijiet ta' l-impriżi kkonċernati u lil kull persuna fiżika jew ġuridika oħra li hi tqis xierqa, il-Kummissjoni għandu jkollha l-kompetenza esklussiva, soġġetta għar-reviżjoni mill-Qorti tal-Ġustizzja, li tistabbilixxi, permezz ta' deċiżjoni li għandha tiġi ppubblikata, liema ftehim, deċiżjonijiet jew prattiċi jissodisfaw il-kondizzjonijiet speċifikati fil-paragrafu 1.
Il-Kummissjoni għandha hekk tiddetermina fuq inizjattiva tagħha stess jew fuq talba ta' awtorità kompetenti ta' Stat Membru jew ta’ impriża jew assoċjazzjoni ta' impriżi interessati.
3. Il-pubblikazzjoni għandha tiddikjara l-ismijiet tal-partijiet u l-kontenut prinċipali tad-deċiżjoni. Għandha tqis l-interess leġittimu ta' l-impriżi f'dik li hija l-protezzjoni tas-sigrieti kummerċjali tagħhom.
Artikolu 3
L-Artikolu 88(1) u ta' l-ewwel sentenza ta' l-Artikolu 88(3) tat-Trattat għandhom japplikaw għall-għajnuniet mogħtija għall-produzzjoni ta', jew għall-kummerċ tal-prodotti msemmija fl-Artikolu 1.
Artikolu 4
Ir-Regolament Nru 26 għandu jitħassar.
Referenzi għar-Regolament imħassar għandhom jinftiehmu bħala referenzi għal dan ir-Regolament u għandhom jinqraw skond it-tabella ta’ korrelazzjoni fl-Anness II.
Artikolu 5
Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali ta' l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
ANNESS I
Regolament imħassar flimkien ma’ l-emenda tiegħu
Regolament tal-Kunsill Nru 26 |
(ĠU 30, 20.4.1962, p. 993/62) |
Regolament tal-Kunsill Nru 49 |
(ĠU 53, 1.7.1962, p. 1571/62) L-Artikolu 1(1)(g) biss |
ANNESS II
Tabella ta’ korrelazzjoni
Regolament Nru 26 |
Dan ir-Regolament |
Artikolu 1 |
Artikolu 1 |
Artikolu 2(1) |
Artikolu 2(1) |
Artikolu 2(2) |
Artikolu 2(2), l-ewwel subparagafu |
Artikolu 2(3) |
Artikolu 2(2), it-tieni subparagrafu |
Artikolu 2(4) |
Artikolu 2(3) |
Artikolu 3 |
— |
Artikolu 4 |
Artikolu 3 |
— |
Artikolu 4 |
Artikolu 5 |
Artikolu 5 |
— |
Anness I |
— |
Annes II |
( 1 ) Opinjoni tal-Parlament Ewropew tas-27 ta' April 2006 (għada mhix ippubblikata fil-Ġurnal Uffiċjali).
( 2 ) ĠU 30, 20.4.1962, p. 993/62. Regolament kif emendat bir-Regolament Nru 49 (ĠU 53, 1.7.1962, p. 1571/62).
( 3 ) Ara l-Anness I.
( 4 ) Regolament tal-Kunsill (KE) Nru 1234/2007 tat- 22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) (ĠU L 299, 16.11.2007, p. 1).
( 5 ) Regolament (UE) Nru 1379/2013 tal-Parlament Ewropew u tal-Kunsill ta' 11 ta’ Diċembru 2013 dwar l-organizzazzjoni komuni tas-swieq tal-prodotti tas-sajd u tal-akkwakultura, li jemenda r-Regolamenti tal-Kunsill (KE) Nru 1184/2006 u (KE) Nru 1224/2009 u jħassar ir-Regolament tal-Kunsill (KE) Nru 104/2000 (ĠU L 354, 28.12.2013, p. 1).