(1)

Fil-kuntest ta’ mxiji kbar tal-marda ta’ l-ilsien u d-dwiefer (FMD) fl-aħħar tas-Snin Ħamsin kemm fi ħdan il-Komunità kif ukoll fil-pajjiżi qrib, ġiet stabbilita l-Kummissjoni għall-Kontroll tal-Marda ta’ l-Ilsien u d-Dwiefer (EUFMD) fi ħdan il-qafas ta’ l-Organizzazzjoni ta' l-Ikel u l-Agrikoltura (FAO) ta’ l-Organizzazzjoni tan-Nazzjonijiet Uniti.

(2)

Fis-Snin Sittin, minħabba għadd ikbar ta’ theddidiet bid-dħul ta’ varjetijiet eżotiċi ta’ l-FMD fl-Ewropa, il-pajjiżi membri ta’ l-EUFMD issejħu biex jistabbilixxu Fond Fiduċjarju bil-għan li jitwettqu l-miżuri ta’ emerġenza fil-Balkani, li jikkostitwixxu ir-rotta prinċipali għad-dħul tal-marda. Iktar tard dan il-fond ġie maqsum bejn il-Fond Fiduċjarju 911100MTF/003/KEE appoġġjat minn dawk il-pajjiżi li fl-istess żmien kienu Stati Membri tal-Komunità u bejn il-Fond Fiduċjarju 909700MTF/004/MUL appoġġjat minn pajjiżi membri ta’ l-EUFMD li f’dak iż-żmien ma kienux jew mhumiex Stati Membri tal-Komunità.

(3)

Bi qbil ma’ l-Artikolu 4 tad-Direttiva tal-Kunsill 90/423/KEE tas-26 ta’ Ġunju 1990 li temenda d-Direttiva 85/511/KEE li tintroduċi miżuri Komunitarji ta’ kontroll għall-marda ta’ l-ilsien u d-dwiefer, id-Direttiva 64/432/KEE dwar il-problemi sanitarji ta’ l-annimali li jaffettwaw il-kummerċ intra-Komunitarju fl-annimali bovini u l-ħnieżer u d-Direttiva 72/462/KEE dwar problemi ta’ spezzjonijiet sanitarji u veterinarji waqt l-importazzjoni ta’ l-annimali bovini u l-ħnieżer u laħam jew prodotti tal-laħam friski minn pajjiżi terzi ( 2 ), fl-1991, waqaf it-tlaqqim profilattiku kontra l-FMD madwar il-Komunità kollha.

(4)

Fl-istess żmien, id-Deċiżjoni 90/424/KEE pprovdiet speċifikament għall-possibilità biex tappoġġja miżuri għall-kontroll tal-marda ta' l-ilsien u d-dwiefer fil-pajjiżi terzi, b’mod partikolari bil-ħsieb li jitħarsu ż-żoni li qegħdin f’riskju fi ħdan il-Komunità.

(5)

Bl-adozzjoni tad-Direttiva tal-Kunsill 2003/85/KE tad-29 ta’ Settembru 2003 dwar miżuri Komunitarji ta’ kontroll għall-marda ta’ l-ilsien u d-dwiefer li tirrevoka d-Direttiva 85/511/KEE u d-Deċiżjonijiet 89/531/KEE u 91/665/KEE u li temenda d-Direttiva 92/46/KEE ( 3 ) l-Istati Membri kkonfermaw mill-ġdid il-projbizzjoni tat-tilqim profilattiku waqt li ġiet estiża l-possibilità għall-użu tat-tilqim ta’ emerġenza kontra l-FMD.

(6)

Numru ta’ tifqigħat ta’ l-FMD rraportati mill-1992 ’l hawn b’mod partikolari f’partijiet tal-Komunità ħdejn il-pajjiżi infettati endemikament u mxija kbira f’ċerti Stati Membri fl-2001 jitolbu għal livell għoli ta’ għarfien u tħejjija għall-mard, inkluż il-kooperazzjoni internazzjonali.

(7)

Barra minn hekk, ġew irreġistrati tifqigħat u f’ċerti każi mxiji ta’ natura gravi f’pajjiżi ħdejn l-Istati Membri li jistgħu jheddu l-istatus tas-saħħa tal-bhejjem suxxettibbli fil-Komunità.

(8)

Minħabba li qed jitfaċċaw topotipi virali ġodda u d-deterjorament tal-miżuri ta' kontroll, il-Komunità, b'kooperazzjoni mill-qrib ma' l-EUFMD u bl-użu tal-Fond Fiduċjarju 911100MTF/003/KEE, assistiet il-kampanji għat-tilqim ta’ emerġenza fit-Turkija u t-Transkawkażja.

(9)

Bi qbil mad-Deċiżjoni tal-Kummissjoni 2001/300/KE tat-30 ta’ Marzu 2001 dwar il-kooperazzjoni tal-Komunità ma’ l-Organizzazzjoni ta’ l-Ikel u l-Agrikoltura b’mod partikolari rigward l-attivitajiet mwettqa mill-Kummissjoni Ewropea għall-kontroll tal-Marda ta’ l-Ilsien u d-Dwiefer ( 4 ) il-Kummissjoni kkonkludiet “Il-Ftehim ta’ Implimentazzjoni MTF/INT/003/EEC911100 (TFEU970089129) dwar Attivitajiet Permanenti Ffinanzjati mill-KE mwettqa mill-Kummissjoni Ewropea FAO għall-Kontroll tal-Marda ta’ l-Ilsien u d-Dwiefer” li ġiet mħaddma b’suċċess sal-31 ta’ Diċembru 2004.

(10)

Il-Komunità Ewropea u n-Nazzjonijiet Uniti nhar id-29 ta’ Novembru 2003 iffirmaw Ftehim ta’ Qafas Finanzjarju u Amministrattiv, li pprovda ambjent favorevoli biex jiffaċilita li jseħħ il-Ftehim bejn il-Kummissjoni u l-Komunitajiet Ewropej u l-Organizzazzjoni ta’ l-Ikel u l-Agrikoltura tan-Nazzjonijiet Uniti, iffirmat fis-17 ta’ Lulju 2003.

(11)

Jidher xieraq li għandu jiġġedded il-Ftehim ta’ Implimentazzjoni bejn iż-żewġ organizzazzjonijiet internazzjonali u, meta wieħed iqis il-Komunità mkabbra, tiġi ffissata l-kontribuzzjoni Komunitarja lill-Fond Fiduċjarju 911100MTF/INT/003/KEE fil-livell massimu ta’ 4.5 miljun Euro għal perjodu ta' erba' snin. Il-baġit tal-Fond Fiduċjarju għall-2005 għandu jkun magħmul mill-bilanċ finali tal-fondi tiegħu disponibbli fil-25 ta’ Jannar 2005 u kontribuzzjoni Komunitarja sabiex jinġabar ammont ekwivalenti għal 2 miljun EUR f’USD. Sussegwentement in-nefqa għandha tiġi rkuprata permezz ta’ trasferimenti annwali.

(12)

Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali,