2003R0782 — MT — 20.04.2009 — 002.001
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
IR-REGOLAMENT (KE) Nru 782/2003 TAL-PARLAMENT EWROPEW U TAL-KUNSILL dwar il-projbizzjoni tal-komposti ta' l-organotin fuq il-bastimenti (ĠU L 115, 9.5.2003, p.1) |
Emendat bi:
|
|
Il-Ġurnal Uffiċjali |
||
No |
page |
date |
||
REGOLAMENT TAL-KUMMISSJONI (KE) Nru 536/2008 tat-13 ta’ Ġunju 2008 |
L 156 |
10 |
14.6.2008 |
|
REGOLAMENT (KE) Nru 219/2009 TAL-PARLAMENT EWROPEW U TAL-KUNSILL tal-11 ta' Marzu 2009 |
L 87 |
109 |
31.3.2009 |
IR-REGOLAMENT (KE) Nru 782/2003 TAL-PARLAMENT EWROPEW U TAL-KUNSILL
dwar il-projbizzjoni tal-komposti ta' l-organotin fuq il-bastimenti
IL-PARLAMENT EWROPEW U L-KUNSILL TA' L-UNJONI EWROPEA,
Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 80(2) tiegħu,
Wara li kkunsidraw l-proposta mill-Kummissjoni ( 1 ),
Wara li kkunsidraw l-opinjoni tal-Kumitat Ekomomiku u Soċjali Ewropew ( 2 ),
Wara li kkonsultaw lill-Kumitat tar-Reġjuni,
Filwaqt li jaġixxu skond il-proċedura stabbilita fl-Artikolu 251 tat-Trattat ( 3 ),
Billi:
(1) |
Il-Komunità tinsab imħassba serjament bl-effetti ta' ħsara tal-komposti ta' l-organotin użati fis-sistemi ta' l-antifouling (kontra l-ħaxix tal-baħar u l-organiżmi l-oħra li jikbru mal-karini tal-bastimenti), u b'mod partikolari l-kisjiet tat-tributiltin (TBT). |
(2) |
Konvenzjoni Internazzjonali dwar il-kontroll tas-sistemi ta' l-antifouling (il-Konvenzjoni AFS) kienet adottata fil-5 ta' Ottubru 2001 f'Konferenza diplomatika (il-Konferenza AFS) miżmuma taħt il-patroċinju ta' l-Organizzazzjoni Internazzjonali Marittima (l-IMO) li għaliha attendew l-Istati Membri tal-Komunità. |
(3) |
Il-Konvenzjoni AFS hija konvenzjoni qafas li jippermetti l-projbizzjoni tas-sistemi ta' ħsara ta' l-antifouling fuq il-bastimenti skond il-proċeduri ddefiniti tajjeb ħafna espressi fid-Dikjarazzjoni ta' Rio dwar l-Ambjent u l-Iżvilupp. |
(4) |
F'dan l-istadju, il-Konvenzjoni AFS tipprojbixxi biss l-applikazzjoni tal-komposti ta' l-organotin fuq il-bastimenti. |
(5) |
Dati fissi ta' l-appliklazzjoni ġew inklużi fil-Konvenzjoni AFS: l-1 ta' Jannary 2003 għall-projbizzjoni ta' l-applikazzjoni tal-komposti ta' l-organotin fuq il-bastimenti u l-1 ta' Jannar 2008 għall-eliminazzjoni tal-komposti ta' l-organotin minn fuq il-bastimenti. |
(6) |
Il-Konvenzjoni AFS trid tidħol fis-seħħ 12-il xahar wara r-ratifika tagħha minn mill-inqas 25 Stat li jirrappreżentaw mill-inqas 25 % tat-tunnellaġġ metriku fid-dinja. |
(7) |
L-Istati Membri għandhom jirratifikaw il-Konvenzjoni AFS ma' l-ewwel opportunità. |
(8) |
L-Istati Membri għandhom jitqiegħdu fl-aħjar pożizzjoni possibbli għar-ratifika bil-ħeffa tal-Konvenzjoni AFS. Għandu jiġi mneħħi kull xkiel li jista' jimpedixxi din ir-ratifika. |
(9) |
Il-Konferenza AFS, konxja li ż-żmien li jifdal sa l-1 ta' Jannar 2003 jista' ma jkunx biżżejjed għalbiex jgħin id-dħul fis-seħħ tal-Konvenzjoni AFS sa din id-data, u bix-xewqa li l-komposti ta' organotin għandhom jieqfu effettivament milli jiġu applikati mit-trasport bil-baħar mill-1 ta' Jannar 2003, talbet fir-Riżoluzzjoni Nru 1 tal-Konferenza AFS illi l-Istati Membri ta' l-IMO jagħmlu ħilithom kollha għalbiex iħejju li jimplimentaw il-Konvenzjoni AFS bħala materija ta' urġenza, u ħeġġet lill-industriji rilevanti li jżommu lura mill-marketing, il-bejgħ u l-applikazzjoni tal-komposti ta' l-organotin sa din id-data. |
(10) |
Bħala segwiment immedjat tal-Konferenza AFS il-Kummissjoni adottat id-Direttiva tal-Kummisjoni 2002/62/KE tad-9 ta' Lulju 2002 li taddatta għall-progres tekniku għad-disa' darba l-Anness I mad-Direttiva tal-Kunsill 76/769/KEE dwar it-tqarrib lejn xulxin tal-liġijiet, ir-regolamenti u d-dispożizzjonijiet amministrattivi ta' l-Istati Membri li għandhom x'jaqsmu mar-restrizzjonijiet dwar il-marketing u l-użu tas-sustanzi u t-tħejjijiet perkolużi (il-komposti organostanniċi) ( 4 ) sabiex jipprojbixxu, mill-1 ta' Jannar 2003, il-marketing u l-użu tal-komposti organostanniċi fis-sistemi ta' kontra l-antifouling għall-bastimenti kollha, irrispettivament mit-tul tagħhom. |
(11) |
Fid-dawl tar-Riżoluzzjoni Nru 1 tal-Konferenza AFS, huma meħtieġa passi addizzjonali sabiex jiġu implimentati l-miżuri li jirrigwardaw il-komposti ta' l-organotin sabiex tiġi żgurata l-abolizzjoni ġenerali tal-kisi tat-TBT użat fuq il-bastimenti fil-Komuità kollha u l-ibħra li jdawruha fid-dati pprovduti fil-Konvenzjoni AFS. |
(12) |
Regolament huwa l-istrument legali approprjat billi jimponi fuq is-sidien tal-bastimenti u fuq l-Istati Membri, direttament u fi kwadru qasir taż-żmien, il-ħtiġiet preċiżi li jridu jiġu implimentati fl-istess waqt u fl-istess manjiera fil-Komunità kollha. Dan ir-Regolament li għandu jfittex biss li jipprojbixxi l-komposti ta' l-organotin, ma għandux jiddupplika l-Konvenzjoni AFS. |
(13) |
Dan ir-Regolament ma għandux jaffettwa r-restrizzjonijiet fuq il-marketing u l-użu ta' ċerti sustanzi u tħejjijiet perikolużi (il-komposti organostanniċi) kif stabbilit fid-Direttiva 76/769 ( 5 ). |
(14) |
L-inċertezza li tirrigwarda l-projbizzjoni totali tal-kisjiet attivi tat-TBT ma għandhiex tiġi aċċettata fil-livell Komunitarju; l-industrija tat-trasport bil-baħar imferrex mad-dinja kollha għandha tiġi magħmula konxja biċ-ċar u fi żmien mistħoqq illi, mill-1 ta Jannar 2008, il-bastimenti li jkun fihom kisja attiva tat-TBT fuq il-buq tagħhom ma jitħallewx jidħlu iktar fil-portijiet Komunitarji. |
(15) |
Il-pajjiżi terzi, b'mod partikolari jekk ma jistgħux jibbenefikaw mill-valur miżjud ta' regolament supranazzjonali, jistgħu jesperjenzjaw diffikultajiet tekniċi meta tiġi imposta, permezz tal-leġislazzjoni nazzjonali tagħhom, il-projbizzjoni dwar l-applikazzjoni tal-kisjiet tat-TBT fuq il-bastimenti tagħhom mill-jum li fih il-projbizzjoni tidħol fis-seħħ b'dan ir-Regolament. L-applikazzjoni tal-projbizzjoni f'dan ir-Regolament dwar l-applikazzjoni ta' kisjiet tat-TBT għandha għalhekk tiġi sospiża rigward il-bastimenti li jbaħħru taħt il-bandiera ta' Stat terz għall-perjodu interim taż-żmien li jibda fl-1 ta' Lulju 2003 u jtemm fid-data tad-dħul fis-seħħ tal-Konvenzjoni AFS. |
(16) |
L-Istati tal-bandiera li jkunu barrew l-użu tal-kisjiet tat-TBT fuq il-bastimenti tagħhom għandhom interess ekonomiku li jiżguraw illi l-Konvenzjoni AFS tidħol fis-seħħ malajr kemm jista' jkun, sabiex jiżguraw sitwazzjoni ta' l-istess livell mifruxa mad-dinja kollha. Dan ir-Regolament li jipprojbixxi, malajr kemm jista' jkun, lill-bastimenti kollha li jtajru l-bandiera ta' Stat Membru milli japplikaw il-kisjiet tat-TBT, għandu jikkostitwixxi inċentiv għall-Istati tal-bandiera li jirratifikaw il-Konvenzjoni AFS. |
(17) |
Id-definizzjonijiet u l-ħtiġiet imposti f'dan ir-Regolament għandhom ikunu msejsa, safejn u sakemm possibbli, fuq dawk użati fil-Konvenzjoni AFS. |
(18) |
Sabiex tiġi żgurata l-applikazzjoni tiegħu fuq il-pjattaformi lil hemm mill-kosti, dan ir-Regolament għandu applika wkoll għall-bastimenti li joperaw taħt l-awtorità ta' Stat Membru. Ma għandu japplika għal-ebda bastiment tal-gwerra jew bastimenti oħra governattivi ġaladarba t-trattament ta' dawn il-bastimenti huwa kopert b'mod adegwat taħt il-Konvenzjoni AFS. |
(19) |
Li tiġi imposta, mill-1 ta' Lulju 2003, il-projbizzjoni tal-kisjiet attivi tat-TBT fuq il-bastimenti kollha li huma intitolati li jtajru l-bandiera ta' Stat Membru u li s-sistema tagħhom ta' l-antifouling tkun ġiet applikata, imbiddla jew mibdula wara din id-data, għandha tkun inċentiv għall-industrija tat-trasport bil-baħar sabiex timplimenta r-rakkomandazzjoni tar-Riżoluzzjoni Nru 1 tal-Konferenza AFS. |
(20) |
Huwa approprjat li jiġi stabbilit l-istess reġim ta' perizja u ċertifikazzjoni kif ipprovdut bil-Konvenzjoni AFS. Taħt dan ir-Regolament il-bastimenti kollha ta' 400 tunnellata metrika grossi u fuqhom, irrispettivament min-natura tal-vjaġġ tagħhom, għandhom jgħaddu minn perizja, filwaqt li l-bastimenti ta' 24 metru jew iktar fit-tul imma inqas minn 400 tunellata metrika grossi għandhom iġorru dikjarazzjoni tal-konformità ma' dan ir-Regolament jew mal-Konvenzjoni AFS. Il-Komunità għandu jkollha d-dritt li ddaħħal reġim armonizzat ta' perizja għal dawn il-bastimenti jekk dan jiġi ppruvat meħtieġ fi stadju iktar tard. |
(21) |
Rigward il-bastimenti ta' inqas minn 24 metru tul, mhux meħtieġ li tiġi pprovduta perizja speċifika jew dikjarazzjoni ġaladarba dawn il-bastimenti, fil-biċċa l-kbira tagħhom qxur tar-rikreazzjoni jew tas-sajd, iridu jiġu koperti b'mod adegwat skond id-dispożizzjonijiet tad-Direttiva 76/769/KEE. |
(22) |
Iċ-ċertifikati u d-dokumenti maħruġa skond dan ir-Regolament, kif ukoll iċ-Ċertifikati AFS u d-Dikjarazzjonijiet AFS maħruġa mill-Partijiet għall-Konvenzjoni AFS, għandhom jiġu rrikonoxuti. |
(23) |
Jekk il-Konvenzjoni AFS ma tkunx daħlet fis-seħħ qabel l-1 ta' Jannar 2007, il-Kummissjoni għandu jkollha l-permess li tadotta l-miżuri approprjati sabiex tippermetti lill-bastimenti li jtajru l-bandiera ta' Stat terz juru l-konformità tagħhom ma' dan ir-Regolament, kif ukoll mal-miżuri tal-kontroll ta' l-implimentazzjoni ta' dawn id-dispożizzjonijiet. |
(24) |
L-iktar reġim approprjat għall-kontroll ta' l-implimentazzjoni tal-projbizzjoni tal-kisjiet tat-TBT fuq il-bastimenti u l-ħtiġiet tal-Konvenzjoni AFS huwa dak stabbilit fid-Direttiva tal-Kunsil 95/21/KE tad-19 ta' Ġunju 1995 li tirrigwarda l-infurzar, rigward it-trasport bil-baħar li juża l-portijiet Komuntarji u t-tbaħħir fl-ibħra taħt il-ġurisdizzjoni ta' l-Istati Membri, ta' l-istandards internazzjonali għas-sigurtà tal-bastimenti, il-prevenzjoni tat-tniġġiż u l-kondizzjonijiet ta' l-għixien u tax-xogħol abbord (il-kontroll ta' l-Istat tal-port) ( 6 ) u għandhom isiru emendi għal din id-Direttiva fiż-żmien approprjat. Wara li jiġi kkunsidrat l-iskop speċifiku għal din id-Direttiva, għandhom jiġu applikati dispożizzjonijiet ekwivalenti għall-bastimenti li jtajru l-bandiera ta' Stat Membru matul dan il-perjodu interim taż-żmien. |
(25) |
Il-miżuri meħtieġa sabiex jiġi implimentat dan ir-Regolament għandhom jiġu adottati skond id-Deċiżjoni tal-Kunsill 1999/468/KE tat-28 ta' Ġunju 1999 li tistabbilixxi l-proċeduri sabiex jiġu eżerċitati l-poteri kkonferiti fuq il-Kummissjoni ( 7 ). |
(26) |
Sabiex tiġi stmata l-kisba tal-mira ta' dan ir-Regolament, il-Kummissjoni għandha tirrapporta lill-Parlament Ewropew u lill-Kunsill u tipproponi, jekk meħtieġa, kull aġġustament approprjat għal dan ir-Regolament. |
(27) |
Id-dħul fis-seħħ ta' dan ir-Regolament għandu jkun hekk illi jippermetti l-projbizzjoni effettiva tal-komposti ta' l-organotin fuq il-bastimenti malajr kemm jista' jkun, |
ADOTTAW DAN IR-REGOLAMENT:
Artikolu 1
Għan
L-għan ta' dan ir-Regolament huwa li jnaqqas jew jelimina l-effetti negattivi fuq l-ambjent marin u s-saħħa tal-bniedem ikkaġunati mill-komposti ta' l-organotin, li jaġixxu bħal antikopri attivi fis-sistemi ta' l-antifouling użati fuq il-bastimenti li jtajru l-bandiera, jew joperaw taħt l-aworità ta' Stat Membru, u fuq il-bastimenti, tkun xi tkun il-bandiera li jtajru, li jsalpaw lejn jew mill-portijiet ta' l-Istati Membri.
Artikolu 2
Definizzjonijiet
1. Għall-għan ta' dan ir-Regolament:1.“sistema ta' l-antifouling” (kontra l-ħaxix tal-baħar u organiżmi oħra li jikbru fuq il-karini tal-bastimenti) “tfisser kisja, żebgħa, trattament fuq il-wiċċ, wiċċ jew mezzi li jiġu użati fuq bastiment għalbiex jikkontrollaw jew jipprevjienu t-twaħħil ta' organiżmi mhux mixtieqa;”
2. “tunnellaġġ metriku gross” ifisser it-tunnellaġġ metriku gross ikkalkolat skond ir-regolamenti tal-kejl tat-tunnellaġġ metriku li jinsab fl-Anness I mal-Konvenzjoni Internazzjonali tal-Kejl tat-Tunnellaġġ Metriku tal-Bastimenti tas-sena 1969, jew kull suċċessur tal-Konvenzjoni;
3. “tul” ifisser it-tul kif iddefinit fil-Konvenzjoni Internazzjonali dwar il-Linji tat-Tagħbija tas-sena 1966, kif immodifikata bil-Protokoll tas-sena 1988 li għandu x'jaqsam magħha, jew kull suċċessur tal-Konvenzjoni;
4. “bastiment” ifisser opra tal-baħar, ikun xi jkun it-tip tagħha, li topera fl-ambjent marin u tinkludi l-vetturi bil-hydrofoil, il-vetturi li jimxu fuq kuxxina ta' l-arja, is-sommersibbli, il-vetturi galleġġjanti, il-pjattaformi fissi jew li jiggalleġġjaw, l-unitajiet galleġġjanti tal-ħażna (il-FSUs) u l-unitajiet galleġġjanti tal-produzzjoni tal-ħażna u tal-ħatt (il-FSPOs);
5. “il-Konvenzjoni AFS” tfisser il-Konvenzjoni Internazzjonali dwar il-kontroll tas-sistemi ta' ħsara ta' l-antifouling fuq il-bastimenti, adottata fil-5 ta' Ottubru 2001, irrispettivament minn meta tidħol fis-seħħ;
6. “organizzazzjoni rikonoxxuta” tfisser korp magħruf skond id-dispożizzjonijiet tad-Direttiva tal-Kunsill 94/57/KE tat-22 ta' Novembru 1994 dwar ir-regoli komuni u l-istandards għall-organizzazzjonijiet ta' l-ispezzjon u l-perizja tal-bastimenti u għall-attivitajiet rilevanti ta' l-amministrazzjonijiet marittimi ( 8 );
7. “Ċertifikat AFS” ifisser iċ-ċertifikat maħruġ lill-bastimenti skond id-dispożizzjonijiet ta' l-Anness 4 mal-Konvenzjoni AFS jew, matul il-perjodu interim taż-żmien, ċertfikat maħruġ skond il-format stabbilit fl-Anness II ma' dan ir-Regolament, meta jkun maħruġ mill-amministrazzjoni ta' kull Stat Membru jew minn organizzazzjoni rikonoxxuta li taġixxi f'ismu.
8. “Dikjarazzjoni AFS” tfisser dikjarazzjoni mfassla fuq id-dispożizzjonijiet ta' l-Anness 4 mal-Konvenzjoni AFS jew, matul il-perjodu interim taż-żmien, dikjarazzjoni ffirmata mis-sid jew mill-aġent awtorizzat tas-sid u mfassla skond il-format stabbilit fl-Anness III ma' dan ir-Regolament;
(9) “Dikjarazzjoni-AFS tal-Konformità Ewropea” tfisser dokument li jirreġistra l-konformità ma’ l-Anness 1 għall-Konvenzjoni-AFS, maħruġ minn organizzazzjoni rikonoxxuta f’isem l-amministrazzjoni ta’ Stat Membru;
10. “il-perjodu interim taż-żmien” ifisser il-perjodu taż-żmien li jibda fl-1 ta' Lulju 2003 u jtemm mad-dħul fis-seħħ tal-Konvenzjoni AFS.
Artikolu 3
Kamp ta' applikazzjoni
1. Dan ir-Regolament għandu japplika għal:
(a) il-bastimenti li jtajru l-bandiera ta' Stat Membru,
(b) il-bastimenti li ma jtajrux il-bandiera ta' Stat Membru imma joperaw taħt l-awtorità ta' Stat Membru, u
(ċ) il-bastimenti li jidħlu f'port jew terminali “l barra mill-kosta ta' Stat Membru imma li ma jidħolx fil-punti (a) jew (b).”
2. Dan ir-Regolament ma għandu japplika għall-ebda basiment tal-gwerra, awżiljarju navali jew kull bastiment ieħor ippossjedut minn Stat u użat, għal issa, għas-servizz governattiv mhux kummerċjali biss.
Artikolu 4
Il-projibizzjoni ta' l-applikazzjoni tal-komposti ta' l-organotin li jaġixxu bħala bijoċidi
Mill-1 ta' Lulju 2003, il-komposti ta' l-organotin li jaġixxu bħala bijoċidi fis-sistemi ta' l-antifouling ma għandhomx jiġu applikati jew applikati mill-ġdid fuq il-bastimenti.
Madankollu, matul il-perjodu interim taż-żmien din id-dispożizzjoni għandha tapplika biss għall-bastimenti imsemmija fil-punti (a) jew (b) ta' l-Artikolu 3(1).
Artikolu 5
Il-projbizzjoni tal-ġarr tal-komposti ta' l-organotin li jaġixxu bħala bijoċidi
1. Il-bastimenti intitolati li jtajru l-bandiera ta' Stat Membru mill-1 ta' Lulju 2003, u li s-sistema tagħhom ta' l-antifouling tkun ġiet applikata, imbiddla jew mibdula wara din id-data, ma għandhomx iġorru komposta ta' l-organotin li jaġixxu bħala bijoċidi fis-sistemi ta' l-antifouling fuq il-buqijiet, jew il-partijiet esterni u l-wiċċ, għajr jekk iġorru kisja li tifforma xkiel għal dawn il-komposti sabiex jipprevjieni t-tisfija mis-sistema ta' l-antifouling li tkun imwaħħla ma' taħt il-bastiment u li ma tikkonformax.
2. Mill-1 ta' Jannar 2008 il-bastimenti imsemmija fl-Artikolu 3(1) għandhom jew ma jġorrux il-komposti ta' l-organotin li jaġixxu bħala bijoċidi fis-sistemi ta' l-antifouling fuq il-buqijiet jew il-partijiet esterni u l-wiċċ, jew iġorru kisja li tifforma xkiel għal dawn il-komposti mit-tisfija tas-sistema ta' l-antifouling li ma tikkonformax.
3. Il-paragrafi 1 u 2 ma għandhomx japplikaw għall-pjattaformi fissi u galleġġjanti, l-FSUs u l-FPSOs mibnija qabel l-1 ta' Lulju 2003 li ma kenux fil-baċin mingħajr ilma f'din id-data jew wara.
Artikolu 6
Il-perizja u ċ-ċertifikazzjoni
1. Dan li ġej għandu japplika rigward il-perizja u ċ-ċertifikazzjoni tal-bastimenti li jtajru l-bandiera ta' Stat Membru:
(a) Il-bastimenti ta' 400 tunnellata metrika grossi u fuqhom, minbarra l-pjattaformi fissi jew galleġġjanti, l-FSUs u l-FPSOs, għandu jkollhom perizja u jkunu ċċertifikati mill-1 ta' Lulju 2003 skond il-ħtiġiet stabbiliti fl-Anness I, qabel ma l-bastiment jiddaħħal għax-xogħol għall-ewwel darba, jew meta jiġu mbiddla jew mibdula s-sistemi ta' l-antifouling.
(b) Il-bastimenti ta' 24 metru tul jew iktar, imma inqas minn 400 tunnellata metrika grossi, minbarra l-pjattaformi fissi jew galleġġjanti, l-FSUs u l-FPSOs, għandhom iġorru Dikjarazzjoni AFS għalbiex juru l-konformità ma' l-Artikoli 4 u 5. ►M2 Jekk meħtieġ, il-Kummissjoni tista' tistabbilixxi reġim armonizzat ta' perizja u ċertifikazzjoni għal dawn il-bastimenti. Billi din il-miżura hija mfassla biex temenda l-elementi mhux essenzjali ta' dan ir-Regolament, hija għandha tiġi adottata skont il-proċedura regolatorja bi skrutinju msemmija fl-Artikolu 9(2). ◄
(ċ) L-Istati Membri jistgħu jistabbilixxu miżuri approprjati għall-bastimenti mhux koperti bil-punti (a) u (b) sabiex tiġi żgurata l-konformità ma' dan ir-Regolament.
2. Dan li ġej għandu japplika rigward il-konoxximent taċ-ċertifikati, id-dikjarazzjonijiet u s-sentenzi dwar il-konformità:
(a) mill-1 ta' Lulju 2003, l-Istati Membri għandhom jirrikonoxxu kull Ċertifikat AFS;
(b) sas-sena ta’ wara d-data imsemmija fil-punt (a), l-Istati Membri għandhom jirrikonoxxu kwalunkwe Dikjarazzjoni-AFS tal-Konformità Ewropea.
(ċ) mill-1 ta' Lulju 2003, l-Istati Membri għandhom jirrikonoxxu kull Dikjarazzjoni AFS.
Dawn id-dikjarazzjonijiet għandhom ikunu akkumpanjati bid-dokumentazzjoni approprjata (bħalma huma rċevuta għaż-żebgħa jew fattura tal-kuntrattur) jew ikun fihom l-endorsjar approprjat.
3. Jekk il-Konvenzjoni AFS ma tkunx daħlet fis-seħħ sa [l-1 ta' Jannar 2007], il-Kummissjoni għandha tadotta l-miżuri adatti sabiex tippermetti lill-bastimenti li jtajru l-bandiera ta' Stat terz li juru l-konformità tagħhom mal-Artikolu 5. Dawk il-miżuri, mfassla biex jemendaw l-elementi mhux essenzjali ta' dan ir-Regolament, għandhom jiġu adottati skont il-proċedura regolatorja bi skrutinju msemmija fl-Artikolu 9(2).
Artikolu 7
Il-kontroll ta' l-Istat tal-port
Matul il-perjodu interim taż-żmien l-Istati Membri għandhom japplikaw dispożizzjonijiet ekwivalenti għal dawk stabbiliti fir-Direttiva 95/21/KE għall-bastimenti ta' 400 tunnellata metrika grossi u fuqhom li jtajru l-bandiera ta' Stat Membru. Rigward l-ispezzjonijiet u l-kxif tal-kontravenzjonijiet, l-Istati Membri għandhom ikunu ggwidati mid-dispożizzjonijiet ta' l-Artikolu 11 tal-Konvenzjoni AFS.
Jekk il-Konvenzjoni AFS ma tkunx daħlet fis-seħħ fl-[1 ta' Jannar 2007], il-Kummissjoni għandha tistabbilixxi proċeduri adatti għal dawn il-kontrolli. Dawk il-miżuri, mfassla biex jemendaw l-elementi mhux essenzjali ta' dan ir-Regolament, għandhom jiġu adottati skont il-proċedura regolatorja bi skrutinju msemmija fl-Artikolu 9(2).
Artikolu 8
Sabiex jitqiesu l-iżviluppi fil-livell internazzjonali u b'mod partikolari fl-Organizzazzjoni Marittima Internazzjonali (IMO), jew biex titjieb l-effettività ta' dan ir-Regolament fid-dawl tal-esperjenza, il-Kummissjoni tista' temenda r-referenzi għall-Konvenzjoni AFS, għaċ-Ċertifikat AFS, għad-Dikjarazzjoni AFS u għad-Dikjarazzjoni dwar il-Konformità AFS u l-Annessi ma' dan ir-Regolament, inklużi l-linji gwida rilevanti tal-IMO b'rabta mal-Artikolu 11 tal-Konvenzjoni AFS. Dawk il-miżuri, mfassla biex jemendaw l-elementi mhux essenzjali ta' dan ir-Regolament, għandhom jiġu adottati skont il-proċedura regolatorja bi skrutinju msemmija fl-Artikolu 9(2).
Artikolu 9
Proċedura ta' kumitat
1. Il-Kummissjoni għandha tiġi megħjuna mill-Kumitat dwar Ibħra Protetti u l-Prevenzjoni ta' Tniġġis mill-Vapuri (COSS), stabbilit bl-Artikolu 3 tar-Regolament (KE) Nru 2099/2002 tal-Parlament Ewropew u tal-Kunsill ( 9 ).
2. Meta ssir referenza għal dan il-paragrafu, għandhom japplikaw l-Artikolu 5a(1) sa (4) u l-Artikolu 7 tad-Deċiżjoni 1999/468/KE, filwaqt li jiġu kkunsidrati d-dispożizzjonijiet tal-Artikolu 8 tagħha.
Artikolu 10
Il-valutazzjoni
Sa l-10 ta' Mejju 2004, il-Kummissjoni għandha tirrapporta lill-Parlament Ewropew u lill-Kunsill dwar l-istat tar-ratifika tal-Konvenzjoni AFS u tipprovdi t-tagħrif dwar safejn u sakemm il-komposti ta' l-organotin li jaġixxu bħala bijoċidi fis-sistemi ta' l-antifouling, għadhom jintużaw fuq il-bastimenti li ma jtajrux il-bandiera ta' Stat Membru u li jopera lejn jew mill-portijiet Komunitarji. Fid-dawl ta' dan ir-rapport, il-Kummissjoni tista' tipproponi, jekk meħtieġa, emendi għalbiex tiżgura t-tnaqqis aċċelerat tal-kontribuzzjoni mill-bastimenti li ma jtajrux il-bandiera ta' Stat Membru għall-preżenza tal-komposti ta' ħsara ta' l-anti-foulng fl-ibħra taħt il-ġurisdizzjoni ta' l-Istati Membri.
Artikolu 11
Id-dħul fis-seħħ
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
ANNESS I
Il-ħtiġiet tal-perizji u ċ-ċertifikazzjoni għas-sistemi ta' l-antifawling fuq il-bastimenti li jtajru l-bandiera ta' Stat Membru
1. Il-perizji
1.1. |
Il-bastimenti ta' 400 tunnellata metrika grossi, minbarra l-pjattaformi fissi jew galleġġjanti, l-FSUs u l-FPSOs, għandhom, mill-1 ta' Lulju 2003, ikunu bla ħsara għal dan li ġej: (a) perizja inizjali qabel ma l-bastimenti jiddaħħal għax-xogħol jew meta l-bastiment jidħol għall-ewwel darba f'baċin mingħajr ilma sabiex jiġu applikati sistemi ta' l-antifouling; u (b) perizja meta s-sistemi ta' l-antifouling jiġu mbiddla jew mibdula. Dawn il-perizji għandhom jiġu endorsjati fuq iċ-ċertifikat meħtieġ skond il-punt 2.1. |
1.2. |
Il-perizja għandha tkun hekk li tiżgura illi s-sitema ta' l-antifouling tikkonforma fis-sħiħ ma l-Artikoli 4 u 5 ta' dan ir-Regolament. |
1.3. |
Il-perizji għandhom jiġu mwettqa mill-uffiċjali awtorizzati kif mistħoqq mill-amministrazzjoni ta' l-Istat Membru, jew ta' Stat Membru ieħor, jew ta' parti għall-Konvenzjoni AFS, jew minn perit innominat għal dan il-għan minn waħda minn dawn l-amministrazzjonijiet, jew minn organizzazzjoni rikonoxxuta li taġixxi f'isem l-amministrazzjoni. |
1.4. |
Għajr jekk ipprovdut xorta oħra f'dan ir-Regolament, l-Istati Membri għandhom rigward il-perizji imsemmija fil-punt 1.1 isegwu l-ħtiġiet stabbiliti fl-Anness 4 mal-Konvenzjoni AFS, kif ukoll mal-linji gwida għall-perizji u ċ-ċertifikazzjonijiet tas-sistemi ta' l-antifouling annessi mar-Riżoluzzjoni ►M1 MEPC 102(48) ◄ , adottata fil-11 ta' Ottubru 2002 mill-Kumitat tal-Protezzjoni ta' l-Ambjent Marin ta' l-IMO. |
2. Iċ-ċertifikazzjon
2.1. |
Wara t-tkomplija tal-perizja imsemmija fil-punt 1.1 (a) jew (b), Stat Membru li jkun għadu mhux Parti għall-Konvenzjoni AFS għandu joħroġ ċertifikat skond il-format stabbilit fl-Anness II. Stat Membru li huwa Parti għall-Konvenzjoni AFS għandu joħroġ Ċertifikat AFS. |
2.2. |
Stat Membru jista' jafda Dikjarazzjoni AFS tal-Konformità għall-wiri tal-konformità mal-ħtiġiet ta' l-Artikolu 4 u 5 ta' dan ir-Regolament. Ċertifikat imsemmi fil-punt 2.1 għandu jieħu l-post ta' din id-Dikjarazzjoni AFS l-iktar tard sa sena wara d-data imsemmija fil-punt 1.1. |
2.3. |
L-Istati Membri għandhom jeħtieġu illi bastiment imsemmi fil-punt 1.1 iġorr ċertifikat maħruġ skond il-punt 2.1. |
2.4. |
L-Istati Membri għandhom, għall-għanijiet taċ-ċertifikazzjoni imsemmija fil-punt 2.1, isegwu l-ħtiġiet stabbiliti fl-Anness 4 tal-Konvenzjoni AFS. |
ANNESS II
Il-Formoli taċ-ċertifikat u tar-reġistrazzjoni tas-sistemi ta' l-antifouling
ANNESS III
ID-DIKJARAZZJONI DWAR IS-SISTEMA TA' L-ANTIFOULING GĦALL-BASTIMENTI TA' TUL TA' 24 METRU U IKTAR, IMMA INQAS MINN 400 TUNNELLATA METRIKA GROSSI
( 1 ) ĠU C 262 E, tad-29.10.2002, p. 492.
( 2 ) Opinjoni mogħtija fil-11 ta' Diċembru 2002 (għadha mhix ippubblikata fil-Ġurnal Uffiċjali).
( 3 ) Opinjoni tal-Parlament Ewropew mogħtija fil-20 ta' Novembru 2002 (għadha mhix ippubblikata fil-Ġurnal Uffiċjali) u d-Deċiżjoni tal-Kunsill tas-17 ta' Marzu 2003.
( 4 ) ĠU L 183, tat-12.7.2002, p. 58.
( 5 ) ĠU L 262, tas-27.9.1976, p. 201. Direttiva kif l-aħħar emendata bid-Direttiva tal-Kummissjoni 2003/3/KEE (ĠU L 4, tad-9.1.2003, p. 12.
( 6 ) ĠU L 157, tas-7.7.1995, p. 1. Direttiva kif l-aħħar emendata bid-Direttiva 2002/84/KE tal-Parlament Ewropew u tal-Kunsill (ĠU L 324, tad-29.11.2002, p. 53).
( 7 ) ĠU L 184, tas-17.7.1999, p. 23.
( 8 ) ĠU L 319, tat-12.12.1994, p. 20. Direttiva kif l-aħħar emendata bid-Direttiva 2002/84/KE tal-Parlament Ewropew u tal-Kunsill.
( 9 ) ĠU L 324, 29.11.2002, p. 1.