2002R0843 — MT — 06.01.2005 — 003.001
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
|
IR-REGOLAMENT TAL-KUMMISSJONI (KE) Nru 843/2002 tal-21 ta’ Mejju 2002 (ĠU L 134, 22.5.2002, p.24) |
Emendat bi:
|
|
|
Il-Ġurnal Uffiċjali |
||
|
No |
page |
date |
||
|
IR-REGOLAMENT TAL-KUMMISSJONI (KE) Nru 46/2003 tal-10 ta’ Jannar 2003 |
L 7 |
61 |
11.1.2003 |
|
|
IR-REGOLAMENT TAL-KUMMISSJONI (KEE) Nru 907/2004 tad-29 ta' April, 2004 |
L 163 |
50 |
30.4.2004 |
|
IR-REGOLAMENT TAL-KUMMISSJONI (KE) Nru 843/2002
tal-21 ta’ Mejju 2002
li jippreskrivi l-istandard ta’ kwalità fil-bejgħ tal-frawli u li jemenda r-Regolament (KEE) Nru 899/87
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat ir-Regolament tal-Kunsill (KE) Nru 2200/96 tat-28 ta’ Ottubru 1996 dwar l-organizzazzjoni komuni tas-suq fil-frott u l-ħxejjex ( 1 ), kif l-aħħar emendat bir-Regolament (KE) Nru 545/2002 ( 2 ), u b’mod partikolari l-Artikolu 2(2) u l-Artikolu 3(3)(ċ) tiegħu,
Billi:|
(1) |
Il-frawli huma fost il-prodotti li jidhru fl-Anness 1 tar-Regolament (KE) Nru 2200/96 li għalihom iridu jiġu adottati standards ta’ kwalità. Ir-Regolament tal-Kummissjoni (KEE) Nru 899/87 tat-30 ta’ Marzu 1987 li jippreskrivi standards ta’ kwalità għaċ-ċirasa u l-frawli ( 3 ), kif l-aħħar emendat bir-Regolament (KE) Nru 888/97 ( 4 ), ġie emendat u ma jistax jiggarantixxi aktar kjarezza legali. |
|
(2) |
Għal skopijiet ta’ kjarezza, ir-regoli fuq il-frawli għandhom jiġu mifruda minn dawk ta’ prodotti oħra taħt ir-Regolament (KEE) Nru 899/87. F’din l-okkażjoni, bl-iskop li tiġi protetta t-trasparenza fis-suq dinji, għandu jiġi kkunsidrat l-istandard tal-kwalità fil-frawli rakkomandat mill-Grupp tax-Xogħol fuq l-Istandardizzazzjoni ta’ Prodotti li Jitħassu Malajr u l-Iżvilupp ta’ Kwalità tal-Kummissjoni Ekonomika tal-Ġnus Magħquda għall-Ewropa (UN/ECE). Ir-regoli li jikkonċernaw il-frawli għandhom għaldaqstant jiġu miktuba mill-ġdid u għal din ir-raġuni r-Regolament (KEE) Nru 899/87 għandu jiġi emendat. |
|
(3) |
Bl-applikazzjoni ta’ standards ġodda ta’ kwalità għandhom jitneħħew mis-suq prodotti li l-kwalità tagħhom mhix sodisfaċenti, il-produzzjoni ssir konformi mal-ħtiġijiet tal-konsumatur kif ukoll jiġi iffaċilitat il-kummerċ ibbażat fuq kompetizzjoni leali, u b’hekk jiġi megħjun titjib fil-profitti. |
|
(4) |
L-istandards ta’ kwalità huma applikabbli fil-fażijiet kollha tal-marketing. It-trasport fit-tul, il-ħżin tal-prodotti għal aktar minn ċertu perjodu u l-proċessi varji li minnhom jgħaddu l-prodotti, jistgħu jikkawżaw ċertu grad ta’ taħsir minħabba l-proċess bioloġiku tal-prodotti jew in-natura ta’ taħsir malajr tagħhom. Dan it-taħsir għandu jiġi kkunsidrat meta jiġu applikati l-istandards ta’ kwalità fl-istadji tal-bejgħ wara li jkun sar id-dispaċċ. Peress illi prodotti tal-Klassi “Extra” iridu jiġu magħżula u ppakkjati b’attenzjoni partikolari, fil-każ tagħhom għandhom jiġu kkunsidrati biss in-nuqqas ta’ freskezza u l-istat ta’ nefħa tagħhom. |
|
(5) |
Waħda mill-kondizzjonijiet minimi tal-frawli hija li għandhom ikunu mmaturaw biżżejjed. Id-data xjentifika u teknika eżistenti ma tippermittix li jiġu definiti kriterji ta’ min wieħed joqgħod fuqhom u oġġettivi biex tista’ tiġi assessjata din il-kondizzjoni. |
|
(6) |
Il-bejgħ ta’ frawli, mingħajr ir-rimja, ta’ ċerti varjetajiet li malajr iwaqqgħu r-rimja tagħhom fi żmien il-ħsad, huwa tradizzjonali fir-reġjun tal-produzzjoni ġewwa l-Finlandja u ġewwa d-Danimarka. Dawn iż-żewġ Stati Membri għamlu talba, skond ir-Regolament (KE) Nru 2200/96, biex il-frawli li jiġu prodotti u kkunsmati f’dawk ir-reġjuni m’għandhomx għalfejn jikkonformaw ma’ dawk l-istandards ta’ kwalità. Dan ir-Regolament għandu għalhekk jinkludi deroga li taħseb għal dan. |
|
(7) |
Il-miżuri li hemm maħsuba f’dan ir-Regolament huma skond l-opinjoni tal-Kumitat tal-Ġestjoni dwar il-Frott Frisk u l-Ħxejjex, |
ADOTTAT DAN IR-REGOLAMENT:
L-Artikolu 1
L-istandard ta’ kwalità għall-frawli li jaqa’ taħt il-kodiċi NM 0810 10 00 għandu jkun kif hemm iddikjarat fl-Anness.
L-istandard ta’ kwalità għandu japplika fil-fażijiet kollha tal-marketing taħt il-kondizzjonijiet preskritti fir-Regolament (KE) Nru 2200/96.
Madankollu, fil-fażijiet ta’ wara dak tad-dispaċċ, il-prodotti jistgħu juru b’relazzjoni mal-kondizzjonijiet ta’ l-istandard tal-kwalità:
(a) nuqqas żgħir ta’ freskezza u ta’ stat ta’ nefħa;
(b) fir-rigward ta’ prodotti li mhumiex klassifikati taħt il-Klassi “Extra”, taħsir żgħir ħafna minħabba l-proċess ta’ żvilupp tagħhom u t-tendenza li jkollhom li jitħassru.
L-Artikolu 2
1. Minkejja d-disposizzjonijiet ta’ dan ir-Regolament, il-frawli ta’ dawk il-varjetajiet li malajr iwaqqgħu r-rimja tagħhom fi żmien il-ħsad jistgħu jinbiegħu mingħajr rimja fir-reġjun tal-produzzjoni ġewwa l-Finlandja u ġewwa d-Danimarka.
2. Għall-applikazzjoni ta’ paragrafu 1, kull pakkett jew lott għandu jkollu muri fuqu, minbarra l-indikazzjoni l-oħra meħtieġa, l-indikazzjoni li ġejja:
— bil-Finlandiż:
—
“myydään ainoastaan… (reġjun tal-produzzjoni),”,
— bid-Daniż:
—
“må kun sælges i… (reġjun tal-produzzjoni),”,
— bl-Isvediż:
—
“får endast säljas i… (reġjun tal-produzzjoni).”.
L-Artikolu 3
Ir-Regolament (KEE) Nru 899/87 huwa emendat kif ġej:
(a) It-titolu qiegħed jiġi sostitwit b’dan li ġej: “Regolament tal-Kummissjoni (KEE) Nru 899/87 tat-30 ta’ Marzu 1987 li jippreskrivi standards ta’ kwalità għaċ-ċirasa”.
(b) L-Artikolu 1(1) qiegħed jiġi sostitwit b’dan li ġej:
“1. L-istandards ta’ kwalità għaċ-ċirasa, li taqa’ taħt il-kodiċi NM 0809 20 95, għandhom ikunu kif imniżżla fl-Anness.”;
(ċ) L-Anness II huwa mħassar.
(d) Fl-Anness I, il-kliem “L-Anness I” qegħdin jiġu sostitwiti bil-kelma li ġejja: “L-Anness”.
L-Artikolu 4
Dan ir-Regolament għandu jidħol fis-seħħ fl-għoxrin ġurnata wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.
Għandu japplika mill-ewwel ġurnata tat-tielet xahar wara li jkun daħal fis-seħħ.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
L-ANNESS
STANDARD TA’ KWALITÀ GĦALL-FRAWLI
I. DEFINIZZJONI TAL-PRODOTT
Dan l-istandard ta’ kwalità japplika għall-frawli ta’ varjetajiet (imnissla bil-koltivazzjoni) mkabbra mill-ġenus Fragaria L. li jitwasslu friski għand il-konsumatur, filwaqt li jiġu esklużi frawli għall-ipproċessar industrijali.
II. DISPOSIZZJONIJIET LI JIKKONĊERNAW IL-KWALITÀ
L-Iskop ta’ l-istandard ta’ kwalità huwa li jiġu definiti l-kondizzonijiet meħtieġa tal-frawli wara l-proċess tal-preparazzjoni u l-imballaġġ.
A. Kondizzjonijet minimi meħtieġa
Fil-klassijiet kollha, soġġett għad-disposizzjonijiet speċjali għal kull klassi u t-tolleranzi permissibbli, il-frawli għandhom ikunu:
— intatti,
— tajbin; prodotti li jkunu affettwati mit-taħsir u d-deterjorazzjoni li jagħmilhom mhux tajbin għall-konsum tan-nies huma esklużi,
— nodfa, prattikament li jkunu ħielsa minn kull materja barranija li tkun tidher,
— jidhru friski, imma mhux maħsula,
— prattikament ħielsa minn insetti,
— prattikament ħielsa minn ħsara ikkaġunata minn insetti,
— bir-rimja (ħlief fil-każ ta’ frawli selvaġġ); ir-rimja u z-zokk (jekk ikun hemm) iridu jkunu friski u ħodor,
— ħielsa minn umdità esterna anormali,
— ħielsa minn riħa u/jew togħma barranija.
Il-frawli għandhom ikunu ġew maqtugħa bl-attenzjoni.
Iridu jkunu kibru biżżejjed u jkunu juru kondizzjoni sodisfaċenti ta’ maturità. Il-kobor u l-kondizzjoni tagħhom iridu jkunu tax-xorta li tippermettilhom:
— li jifilħu għat-trasport u t-tqandil, u
— li jaslu f’kondizzjoni sodisfaċenti fil-post tad-destinazzjoni.
B. Klassifikazzjoni
Il-frawli jiġi klassifikat fi tliet klassijiet kif definiti hawn taħt:
(i) Klassi “Extra”
Il-frawli f’din il-klassi għandu jkun ta’ kwalità superjuri. Irid ikun karatteristiku tal-varjetà partikolari.
Irid ikun ileqq fl-apparenza, filwaqt illi jaħseb għall-karatteristiċi tal-varjetà.
Irid ikun ħieles mill-ħamrija.
Irid ikun ħieles minn difetti bl-eċċezzjoni ta’ difetti superfiċjali żgħar ħafna bil-kondizzjoni li dawn ma jaffettwawx id-dehra ġenerali tal-prodott, il-kwalità, iż-żamma tal-kwalità u l-preżentazzjoni fil-pakkett.
(ii) Klassi I
Il-frawli f’din il-klassi jrid ikun ta’ kwalità tajba. Fejn jidħol il-kulur u l-forma, irid ikun karatteristiku tal-varjetà partikolari.
Id-difetti żgħar li ġejjin, madankollu, huma permissibbli bil-kondizzjoni li dawn ma jaffettwawx id-dehra ġenerali tal-prodott, il-kwalità, iż-żamma tal-kwalità u l-preżentazzjoni fil-pakkett:
— difett żgħir fil-forma,
— roqgħa bajda, li ma teċċedix wieħed minn għaxra ta’ l-erja tal-wiċċ tal-frotta,
— marki żgħar ta’ tagħfis fil-wiċċ.
Għandhom ikunu prattikament ħielsa mill-ħamrija.
(iii) Klassi II
Din il-klassi tinkludi frawli li ma jikkwalifikawx biex jiġu inklużi fil-klassijiet aktar għolja, imma li jissodisfaw il-kondizzjonijiet minimi meħtieġa speċifikati hawn fuq.
Id-difetti li ġejjin jistgħu jkunu permissibbli bil-kondizzjoni li l-frawli jibqgħu jżommu l-karatteristiċi essenzjali tagħhom fejn jirrigwarda l-kwalità, iż-żamma tal-kwalità u l-preżentazzjoni:
— difetti fil-forma,
— roqgħa bajda li ma tkunx akbar minn wieħed minn ħamsa ta’ l-erja tal-wiċċ tal-frotta,
— tbenġil ħafif li jkun xott u mhux probabbli li jinxtered,
— traċċi żgħar ta’ ħamrija.
III. DISPOSIZZJONIJIET LI JIKKONĊERNAW ID-DAQS
Id-daqs jiġi determinat bid-dijametru massimu tas-sezzjoni ekwatorjali.
Il-frawli għandu jkun tad-daqsijiet minimi li ġejjin:
— Klassi “Extra”: 25 mm,
— Klassi I u II: 18 mm.
M’hemmx daqs minimu għall-frawli selvaġġi.
IV. DISPOSIZZJONIJIET LI JIKKONĊERNAW IT-TOLLERANZI
Tolleranzi fir-rigward ta’ kwalità u daqs għandhom jiġu permessi f’kull pakkett għall-prodott li ma jissodisfax il-kondizzjonijet tal-klassi indikata.
A. Tolleranzi tal-kwalità
(i) Klassi “Extra”
5 % bin-numru jew bil-piż tal-frawli li ma jissodisfawx il-kondizzjonijiet tal-klassi imma li jossodisfaw dawk ta’ Klassi I jew, b’mod eċċezzjonali, fil-limiti tat-tolleranzi ta’ dik il-klassi. Minn dawn il-5 % mhux aktar minn total ta’ 2 % jista’ jikkonsisti minn frott imħassar.
(ii) Klassi I
10 % bin-numru jew bil-piż tal-frawli li ma jissodisfawx il-kondizzjonijiet tal-klassi imma li jissodisfaw dawk ta’ Klassi II jew, b’mod eċċezzjonali, fil-limiti tat-tolleranzi ta’ dik il-klassi. Minn dawn l-10 %, mhux aktar minn total ta’ 2 % jista’ jikkonsisti minn frott imħassar.
(iii) Klassi II
10 % bin-numru jew bil-piż tal-frawli li ma jossodisfawx la l-kondizzjonijiet tal-klassi u lanqas il-kondizzjonijet minimi meħtieġa, bl-eċċezzjoni ta’ prodott affettwat bit-taħsir, tbenġil aħrax jew kull deterjorament ieħor li jagħmilhom mhux tajba biex jittieklu mill-bniedem. Minn dawn l-10 %, mhux aktar minn total ta’ 2 % jista’ jikkonsisti minn frott imħassar.
B. Tolleranzi tad-daqs
Għall-klassijiet kollha: 10 % bin-numru jew bil-piż tal-frawli li ma jikkonformawx mad-daqs minimu.
V. DISPOSIZZJONIJIET LI JIKKONĊERNAW IL-PREŻENTAZZJONI
A. Uniformità
Il-kontenut ta’ kull pakkett għandu jkun uniformi u jkun fih biss frawli ta’ l-istess oriġini, varjetà u kwalità.
Fil-każ tal-klassi “Extra”, il-frawli, bl-eċċezzjoni tal-frawli tal-bosk, irid ikun b’mod partikolari uniformi u regolari fir-rigward tal-grad ta’ maturità, kulur u daqs. Fi Klassi I, il-frawli jistgħu jkunu anqas uniformi fid-daqs.
Il-parti li tidher tal-kontenut tal-pakkett trid tkun rappreżentattiva tal-kontenut kollu.
Minkejja d-dispożizzjonijiet preċedenti f’dan il-punt, prodotti kopriti b’dan ir-Regolament jistgħu jiġu mħallta, f’pakketti ta’ bejgħ ► ta' piż nett inqas jew daqs tliet kilogrammi ◄ , b’tipi differenti ta’ frott u ħaxix frisk skond il-kondizzjonijiet tar-Regolament tal-Kummisjoni (KE) Nru 48/2003 ( 5 ).
B. Imballaġġ
Il-frawli għandhom jiġu ppakkjati b’mod li l-prodott ikun protett kif suppost.
Il-materjal li jintuża għal ġewwa l-pakkett irid ikun ġdid, nadif u ta’ kwalità li tiġi evitata kull ħsara minn barra jew minn ġewwa għall-prodott. L-użu ta’ materjali, partikolarment karta jew timbri li jkun fihom speċifikazzjonijiet tan-negozju huwa permess bil-kondizzjoni li l-istampar u t-tqegħid tat-tikketti jkun sar bl-użu ta’ linka li mhix tossika jew kolla.
Il-frott ta’ Klassi “Extra” għandu jkun ippreżentat b’mod l-aktar tajjeb.
Il-pakketti jridu jkunu ħielsa minn kull ħaġa barranija.
Tikketti li jitwaħħlu individwalment fuq il-prodott għandhom ikunu hekk li meta jitneħħew ma jħallux warajhom traċċi ta' kolla li jidhru u li dawn ma jwasslux għal difetti fil-ġilda.
VI. DISPOSIZZJONIJIET LI JIKKONĊERNAW L-IMMARKAR
Kull pakkett irid ikollu fuqu l-partikolaritajiet li ġejjin, f’ittri miġbura flimkien fuq l-istess naħa, immarkati b’mod li jinqara sew u li ma jitħassrux, u li jidhru min-naħa ta’ barra:
A. Identifikazzjoni
L-isem u l-indirizz ta' min jippakkja u ta' min jibgħat.
Dan id-dettall jista' jinbidel:
— fil-każ tal-pakkjar kollu ħlief pakkjar li jkun lest minn qabel, bil-marka ta' kowd maħruġa uffiċjalment u aċċettata li tirrappreżenta lil min ippakkja u/jew lil min ikun jibgħat, indikata f'konnessjoni mill-qrib bir-riferenza “Min Ippakkja u/jew Min Qed Jibgħat” (jew abbrevjazzjonijiet li jfissru l-istess);
— fil-każ biss ta' pakkjar li jkun tlesta minn qabel, b'isem u l-indirizz ta' bejjiegħ stabbilit fil-Komunità indikat b'konnessjoni mill-qrib bid-dettall “Ippakkjat għal:” jew b'xi dettall li jfisser l-istess. F'dan il-każ, it-tikkettjar għandu jinkludi wkoll xi kowd li jirrappreżenta lil min ippakkja u/jew lil min ikun qed jibgħat. Il-bejjiegħ irid jagħti l-informazzjoni kollha meqjusa bħala meħtieġa mill-korp ta' spezzjoni dwar it-tifsira ta' dan il-kowd.
B. Natura tal-prodott
— “Frawli”, jekk il-kontenut tal-pakkett ma jkunx jidher min-naħa ta’ barra.
— Isem tal-varjetà (mhux obbligatorju).
Ċ. Oriġini tal-prodott
— L-isem tal-pajjiż ta’ l-oriġini u, mhux obbligatorju, id-distrett fejn sar it-tkabbir jew l-isem nazzjonali, reġjonali jew lokali tal-post.
D. Speċifikazzjonijiet Kummerċjali
— Klassi.
E. Marka uffiċjali tal-kontroll (mhux obbligatorja)
L-ippakkjar m'għandux għalfejn juri d-dettalji msemmija fl-ewwel subparagrafu, meta dan ikun jinkludi pakkjar lest għall-bejgħ, li jkun jidher biċ-ċar minn barra u li jkun fih dawn id-dettalji. Dan il-pakkjar m'għandux ikollu indikazzjonijiet li jistgħu iqarrqu. Meta dan l-ippakkjar ikun imqiegħed fuq pallets, id-dettalji għandhom jidhru permezz ta' avviż imqiegħed f'pożizzjoni ovvja fuq għall-inqas żewġ naħat tal-pallet.
( 1 ) ĠU L 297, tal-21.11.1996, p. 1.
( 2 ) ĠU L 84, tat-28.3.2002, p. 1.
( 3 ) ĠU L 88, tal-31.3.1987, p. 17.
( 4 ) ĠU L 126, tas-17.5.1997, p. 11.
( 5 ) ĠU L 7, tal-11.1.2003, P.65.