2000R0099 — MT — 28.12.2005 — 001.001
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
IR-REGOLAMENT TAL-KUNSILL (KE, EURATOM) Nru 99/2000 tad-29 ta' Diċembru, 1999, dwar l-għoti ta' għajnuna lill-Istati sieħba fl-Ewropa tal-Lvant u ta' l-Asja Ċentrali (ĠU L 012, 18.1.2000, p.1) |
Emendat bi:
|
|
Il-Ġurnal Uffiċjali |
||
No |
page |
date |
||
IR-REGOLAMENT TAL-KUNSILL (KE) Nru 2112/2005 tal-21 ta’ Novembru 2005 |
L 344 |
23 |
27.12.2005 |
IR-REGOLAMENT TAL-KUNSILL (KE, EURATOM) Nru 99/2000
tad-29 ta' Diċembru, 1999,
dwar l-għoti ta' għajnuna lill-Istati sieħba fl-Ewropa tal-Lvant u ta' l-Asja Ċentrali
IL-KUNSILL TA' L-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea, u partikolarment l-Artikolu 308 tiegħu,
Wara li kkunsidra t-Trattat li jistabbilixxi l-Komunità Ewropea ta' l-Enerġija Atomika, u partikolarment l-Artikolu 203 tiegħu,
Wara li kkunsidra l-proposta tal-Kummissjoni ( 1 ),
Wara li kkunsidra l-opinjoni tal-Parlament Ewropew,
Billi:
(1) |
Wara l-laqgħa tal-Kunsill Ewropew f'Dublin u f'Ruma fl-1990, il-Komunità nidiet programm ta' għajnuna teknika biex issostni r-riforma u l-qawmien mill-ġdid ta' l-ekonomija ta' dik li qabel kienet l-Unjoni tar-Repubbliki Sovjetiċi Soċjalisti; |
(2) |
Ir-Regolament tal-Kunsill (Euratom, KE) Nru 1279/96 tal-25 ta' Ġunju, 1996, dwar l-għoti ta' għajnuna għal riforma u qawmien mill-ġdid ta' l-ekonomija fl-Istati ġodda ndipendenti u fil-Mongolja ( 2 ), semma’ l-kundizzjonijiet biex tingħata dik l-għajnuna, u ħaseb biex din issir mill-1 ta' Jannar, 1996, sal-31 ta' Diċembru, 1999; |
(3) |
Dik l-għajnuna diġà ħalliet effett imdaqqas għal riformi fl-Istati sieħba fl-Ewropa tal-Lvant u l-Asja Ċentrali msemmija fil-lista fl-Anness (“l-Istati sieħba”); |
(4) |
Referenza finanzjarja ta' l-infiq, skond it-tifsira ta' punt 34 tal-Ftehim Interistituzzjonali tas-6 ta' Mejju 1999, bejn il-Parlament Ewropew, il-Kunsill u l-Kummissjoni, dwar dixxiplina fl-estimi u titjib fil-proċedura ta' l-estimi ( 3 ), tinsab f'dan ir-Regolament, sa kemm idum fis-seħħ, u mingħajr ma jolqot b'daqshekk is-setgħat ta' l-awtorità dwar l-estimi kif huma mfissra fit-Trattat; |
(5) |
Dik l-għajnuna kollha tibda tinħass biss f'qafas ta' progress lejn soċjetajiet demokratiċi ħielsa u miftuħa li jirrispettaw id-drittijiet tal-bniedem, id-drittijiet tal-minoranzi u d-drittijiet tal-popli ndiġeni, u lejn sistemi ekonomiċi maħsuba għas-suq; |
(6) |
Jenħtieg li jkun hemm aktar għajnuna biex jinġieb ’ il quddiem il-ħarsien nukleari fil-pajjiżi sieħba; |
(7) |
L-għajnuna tissokta tingħata jagħti sehem biex jintlaħqu għanijiet komuni, l-aktar f'dak li għandu x’ jaqsam mal-Ftehim ta' Sħubija u Kooperazzjoni u mal-Ftehim ta' Kooperazzjoni Ekonomika magħmula ma' l-Istati sieħba; |
(8) |
Meta, skond kif japplika, fl-għoti ta' għajnuna taħt dan ir-Regolament għandhom jitqiesu l-Istrateġiji Komuni adottati mill-Kunsill Ewropew; |
(9) |
Jixraq li jkunu stabbiliti prijoritajiet għal din l-għajnuna li jkunu msejsa, fost l-oħrajn, fuq l-interessi komuni tal-Komunità u l-Istati sieħba; |
(10) |
L-għajnuna għandha tqis il-ħtiġijiet u l-prijoritajiet differenti tar-reġjuni ewlenin milqutin b'dan ir-Regolament; |
(11) |
L-esperjenza wriet li għajnuna mill-Komunità tkun aktar effettiva meta din toqgħod fuq numru limitat ta' oqsma ġewwa kull Stat sieħeb; |
(12) |
Għandu jitħeġġeġ l-iżvilupp bejn Stati ta' rabtiet ekonomiċi u t-tixrid tal-kummerċ li jwasslu għal riforma u ri-strutturazzjoni ekonomika; |
(13) |
Għandha titħeġġeġ il-kooperazzjoni reġjonali u sub-reġjonali, l-aktar dwar id-Dimensjoni tat-Tramuntana u r-reġjun tal-Baħar l-Iswed; |
(14) |
Għandha titħeġġeġ il-kooperazzjoni bejn il-fruntieri, l-aktar f'dak li għandu x’jaqsam ma' fruntieri bejn l-Istati sieħba u l-Unjoni Ewropea, bejn l-Istati sieħba u l-Ewropa Ċentrali u tal-Lvant, u bejn l-Istati sieħba nfushom; |
(15) |
Għall-għan tar-riforma u ri-strutturazzjoni ekonomika li jinsabu għaddejjin bħalissa, u għal tmexxija effettiva ta' dan il-programm, jenħtieġ li jkun hemm ħsieb fuq medda ta' snin; |
(16) |
Biex ir-riforma tinżamm fit-tul jenħtieġ li l-aspetti soċjali tar-riforma u l-iżvilupp tas-soċjetà ċivili jingħataw l-importanza li jixirqilhom; |
(17) |
L-integrazzjoni ta' aspetti ambjentali fl-għajnuna hija meħtieġa biex ir-riformi ekonomiċi u l-iżvilupp jinżammu fit-tul; |
(18) |
L-iżvilupp tar-riżorsi umani, magħduda l-edukazzjoni u t-taħriġ, għandu tifsira għar-riforma u għar-ristrutturazzjoni; |
(19) |
Il-kwalità ta' l-għajnuna għandha tittejjeb billi jintgħażlu għadd ta' proġetti b'kompetizzjoni; |
(20) |
Sabiex jintlaħqu sewwa il-ħtiġijiet l-aktar ta' malajr ta' l-Istati sieħba fil-bidla ekonomika li għaddejjin minnha bħalissa, jenħtieġ li parti mill-għotja ta' flus titħalla tintuża għall-finanzjament ta' investimenti li jkunu ekonomikament b'saħħithom, l-aktar fl-oqsma ta' kooperazzjoni bejn fruntieri, il-promozzjoni ta' intrapriżi żgħar u ta' daqs medju (SMEs), infrastruttura ambjentali u firxa ta' sistemi ta' mportanza strateġika għall-Komunità; |
(21) |
Għajnuna Komunitarja tista’, skond kif ikun xieraq, tkun tant effettiva, effiċjenti u viżibbli daqs kemm titwettaq b'mod deċentraliżżat; |
(22) |
Għandu jkun żgurata li jkun hemm kompetizzjoni effettiva bejn intrapriżi, organizzazzjonijiet u stituzzjonijiet interessati li jieħdu sehem fl-inizjattivi ffinanzjati mill-programm; |
(23) |
Għajnuna Komunitarja tkun l-aktar effettiva meta l-impenn ta' l-Istati sieħba jkun assigurat; |
(24) |
Jixraq li l-Kummissjoni tkun megħjuna fit-twettieq ta' għajnuna Komunitarja permezz ta' kumitat magħmul minn rappreżentanti ta' l-Istati Membri; |
(25) |
Il-miżuri meħtieġa għall-implimentazzjoni ta' dan ir-Regolament għandhom ikunu adottati skond id-Deċiżjoni tal-Kunsill 1999/468/KE tat-28 ta' Ġunju, 1999, li jgħid x'inhuma l-proċeduri għall-eżerċizzju tas-setgħat ta' implimentazzjoni mogħtija lill-Kummissjoni ( 4 ); |
(26) |
Proċeduri għal offerti u l-għoti ta' kuntratti għandhom ikunu skond ir-Regolament Finanzjarju applikabbli għall-Estimi Ġenerali ta' l-Unjoni Ewropea (ir-“Regolament Finanzjarju”); |
(27) |
Id-dispożizzjonijiet dwar offerti u l-għoti ta' kuntratti, kif ukoll il-prinċipji li jirregolaw l-għoti ta' kuntratti, għandhom jibqgħu jgħoddu sa ma tkun daħlet fis-seħħ leġislazzjoni li temenda it-Titolu IX tar-Regolament Finanzjarju, sabiex ikun hemm il-bażi għal dispożizzjonijiet ta' implimentazzjoni li jkunu jgħoddu għal programmi kollha tal-Komunità dwar għajnuna barranija; |
(28) |
Minbarra għal persuni naturali u legali mill-Istati Membri u l-Istati sieħba, sehem f'offerti għandu jkun miftuħ ukoll għal persuni naturali u legali minn pajjiżi li jgawdu mill-programmi Phare, u, fejn ikunu jenħtieġu kwalifiki speċifiċi, għal pajjiżi mill-Mediterran; |
(29) |
Għandhom isiru kull sena rapporti dwar kif ikun qed jitwettaq il-programm ta' għajnuna; |
(30) |
Għall-adozzjoni ta' dan ir-Regolament it-Trattati ma jsemmux setgħat ħlief dawk ta' l-Artikolu 308 tat-Trattat KE, u l-Artikolu 203 tat-Trattat KEEA, |
ADOTTA DAN IR-REGOLAMENT:
Artikolu 1
Programm li jmexxi ’ l quddiem il-bidla għal ekonomija tas-suq u li jseddaq id-demokrazija u l-istat tad-dritt fl-Istati sieħba msemmija fil-lista f'L-Anness I (hawn ’il quddiem imsejħa bħala “l-Istati sieħba”) għandu jitwettaq mill-Komunità mill-1 ta' Jannar 2000, sal-31 ta' Diċembru 2006, skond il-kriterji msemmija f'dan ir-Regolament.
Artikolu 2
1. Il-programm għandu jkun imsejjes fuq il-prinċipji u l-għanijiet msemmija fil-Ftehim ta' Sħubija u Kooperazzjoni u l-Ftehim Kummerċjali u Ekonomiku, li fil-qafas tagħhom il-Komunità, l-Istati Membri tagħha u l-Istati sieħba jaħdmu flimkien f'inizjattivi ta' interess komuni.
2. L-għan tal-programm għandu jkun li jinkiseb l-aħjar effett billi joqgħod fuq numru limitat ta' inizjattivi ta' siwi, iżda li ma jħallix barra proġetti żgħar meta dawk il-proġetti jkun hekk jixirqilhom. Għal dan il-għan, il-programmi ndikattivi u ta' ħidma msemmija hawn taħt, għandhom jolqtu sa mhux aktar minn tlieta mill-oqsma komuni tas-setturi ta' kooperazzjoni li jikkwalifikaw u li huma msemmija f'L-Anness II. Fejn ikun jgħodd, appoġġ għal ħarsien nukleari għandu jingħata flimkien mat-tliet oqsma. Il-programm għandu jqis il-ħtiġijiet u ħwejjeġ oħra differenti li jiġu minn ta' quddiem fir-reġjuni ewlenin milquta mir-Regolament, u l-aktar il-ħtieġa li jinġiebu 'l quddiem id-demokrazija u l-istat tad-dritt.
3. Għandhom jitqiesu l-aktar:
— il-ħtieġa li jitnaqqsu r-riskji ambjentali u l-inkwinament, magħdud l-inkwinament bejn fruntieri,
— il-ħtieġa li jinġieb 'il quddiem l-użu sostenibbli ta' riżorsi naturali, magħduda riżorsi ta' enerġija, u
— l-aspetti soċjali tal-bidla.
4. L-għan tal-programm għandu jkun li jġib 'il quddiem kooperazzjoni bejn Stati u bejn reġjuni, u bejn il-fruntieri ta' l-Istati sieħba nfushom, bejn l-Istati sieħba u l-Unjoni Ewropea, u bejn l-Istati sieħba u l-Ewropa Ċentrali u tal-Lvant.
Kooperazzjoni bejn stati u bejn reġjuni għandha sservi fl-ewwel lok biex tgħin lill-Istati sieħba biex jindikaw u jmexxu ħidmiet li l-aħjar li jsiru hu minn ħafna pajjiżi flok minn pajjiż waħdu, bħalma huma l-promozzjoni ta' firxa ta' sistemi, kooperazzjoni dwar l-ambjent u ħidmiet fl-oqsma tal-ġustizzja u affarijiet interni.
Kooperazzjoni bejn fruntieri għandha sservi fl-ewwel lok biex:
(a) tgħin reġjuni tal-fruntiera biex jegħlbu l-problemi partikulari tagħhom ta' żvilupp;
(b) tħeġġeġ biex firex ta' sistemi fuq iż-żewġ naħat tal-fruntiera jingħaqdu, bħal per eżempju, faċilitajiet f'postijiet fejn jinqasmu fruntieri;
(ċ) tħaffef il-proċess tal-bidla fl-Istati sieħba permezz tal-kooperazzjoni tagħhom ma’ reġjuni tal-fruntiera ta' l-Unjoni Ewropea jew l-Ewropa Ċentrali u tal-Lvant;
(d) tnaqqas ir-riskji ambjentali u l-inkwinament bejn il-fruntieri.
5. Dwar ħarsien nukleari, il-programm għandu joqgħod fuq tliet prijoritajiet:
(a) illi jagħti appoġġ biex tinġieb 'il quddiem kultura effettiva dwar ħarsien nukleari skond il-prinċipji tal-Konvenzjoni dwar ħarsien nukleari, l-aktar permezz ta' appoġġ kontinwu lil korpi regolatorji u, fuq livell ta' makkinarju, permezz ta' għajnuna fuq il-post, magħduda provvisti ta' apparat, meta dik l-għajnuna tkun l-aktar meħtieġa;
(b) illi jagħti appoġġ lill-iżvilupp u t-twettieq ta' pjani dwar enerġija maħruqa, tneħħija ta' mpjanti u trattament ta' skart nukleari, magħduda r-reġjuni tar-Russja tal-Majjistral, u dan f’qafas ta' kooperazzjoni internazzjonali usa;
(ċ) illi jagħti sehmu għal inizjattivi internazzjonali relevanti bl-appoġġ tal-Komunità Ewropea, bħalma hija l-inizjattiva G7/UE dwar l-għeluq ta' Chernobyl.
Il-programm għandu wkoll jagħti appoġġ għal applikazzjoni ta' mezzi ta' ħarsien biżżejjed ta' materjal nukleari.
6. Il-programm għandu jqis:
— il-ħtiġijiet u l-prijoritajiet differenti u li qed jinbidlu ta' l-Istati sieħba, kull wieħed minnhom u bħala reġjuni, u, fost ħwejjeġ oħra, il-qafas tat-tkabbir ta' l-Unjoni;
— il-kapaċita’ ta' l-Istati sieħba li jagħmlu tagħhom dak li jieħdu;
— il-progress fi Stati sieħba lejn riforma demokratika u maħsuba għas-suq.
Għandhom jitwettqu miżuri li jqisu l-kriterji li ġejjin:
— il-ħtieġa ta' żvilupp ekonomiku sostenibbli;
— l-effett soċjali ta' miżuri ta' riforma;
— il-promozzjoni ta' opportunitajiet indaqs għan-nisa;
— l-użu sostenibbli ta' riżorsi naturali u rispett lejn l-ambjent.
IT-TITOLU I
PROGRAMMI NDIKATTIVI U TA' ĦIDMA
Artikolu 3
1. L-għajnuna għandha tkun applikata fil-qafas ta' programmi nazzjonali, multi-nazzjonali u programmi oħra.
2. Il-programmi nazzjonali u multi-nazzjonali għandu jkollhom programmi ndikattivi u ta' ħidma.
3. Programmi ndikattivi li jolqtu perjodi minn tlieta sa erba’ snin għandhom isiru skond il-proċedura msemmija fl-Artikolu 13(2). Dawn il-programmi għandhom ifissru l-għanijiet u l-għamla ewlenin ta' l-għajnuna mill-Komunità fl-oqsma ta' kooperazzjoni msemmija f'L-Anness II, u għandhom, sakemm jistgħu, ikollhom magħhom stimi finanzjarji ndikattivi. Qabel ma jsiru programmi ndikattivi, il-Kummissjoni għandha tiddiskuti mal-Kumitat imsemmi fl-Artikolu 13(1) il-prijoritajiet li jkunu jridu jiġu identifikati flimkien ma' l-Istati sieħba.
4. Programmi ta' ħidma bbażati fuq il-programmi ndikattivi msemmija fil-paragrafu 3 għandhom ikunu adottati kull sena jew sentejn skond il-proċedura msemmija fl-Artikolu 13(2). Dawn il-programmi ta' ħidma għandhom jinkludu lista tal-proġetti li jkunu ser jiġu ffinanzjati fl-oqsma ta' kooperazzjoni msemmija f'L-Anness II. Il-kontenut tal-programmi għandu jintwera b’dettalji sewwa, sabiex il-Kumitat imsemmi fl-Artikolu 13(1) ikun jista' jagħti l-opinjoni tiegħu.
5. Il-miżuri mfissra fil-programmi ta' ħidma nazzjonali għandhom iservu biex fuqhom isiru ftehim finanzjarji li jkunu jaqblu dwarhom il-Kummissjoni u kull Stat sieħeb. Dawn għandhom ikunu bbażati fuq djalogu li jqis l-interessi komuni tal-Komunità u l-Istati sieħba, l-aktar fil-qafas tal-Ftehim ta' Sħubija u Kooperazzjoni.
6. Jekk iċ-ċirkustanzi jkunu hekk jitolbu, il-programmi ndikattivi u ta' ħidma jistgħu jinbidlu fiż-żmien meta jkunu qed isiru, skond il-proċedura msemmija fl-Artikolu 13(2).
Artikolu 4
1. B'żieda mal-programm ta' ħidma nazzjonali, skema ta' inċentivi hija mwaqqfa biex iddaħħal element ta' kompetizzjoni fl-allokazzjoni ta' riżorsi, sabiex tinġieb ’l quddiem il-kwalità. Sabiex tkun assigurata konċentrazzjoni, proġetti ffinanzjati taħt din l-iskema għandhom ikunu marbuta ma l-oqsma komuni ta' kooperazzjoni mniżżla fil-programmi ndikattivi nazzjonali msemmija fl-Artikolu 3.
2. L-iskema għandha tiġi mdaħħla bil-mod u għandha tqis il-ħila amministrattiva ta' l-Istati sieħba differenti. Fl-ewwel sena tat-tħaddim tagħha, id-daqs ta' l-iskema m'għandux jaqbeż l-10 % ta' l-estimi kollha tal-programm. Fis-snin ta' wara, dan il-proporzjon jista’ jiżdied sa b'5 % kull sena.
3. Meta titqies l-esperjenza tas-snin l-imgħoddija, magħdud it-tqassim ġeografiku, għandhom isiru sforzi speċjali biex jinġieb 'il quddiem is-sehem fl-iskema ta' l-Istati sieħba kollha, partikolarment dawk li l-aktar li jiltaqgħu ma' diffikultajiet biex jiksbu suċċess f'din l-iskema.
4. Il-programm ta' skema ta' inċentivi kull sena, magħduda l-kriterji għall-għażla ta' proġetti u d-daqs tiegħu, għandhom ikunu miftiehma skond il-proċedura msemmija fl-Artikolu 13(2).
IT-TITOLU II
MIŻURI LI GĦANDU JKOLLHOM APPOĠĠ
Artikolu 5
1. Fil-qafas tal-programmi msemmija f'Titolu I li jikkonsisti primarjament f'għajnuna teknika, dawn li ġejjin għandu jkollhom appoġġ:
— trasferiment ta' tagħlim u tagħrif, magħdud it-taħriġ;
— kooperazzjoni ndustrijali u sħubija fit-twaqqif ta' istituzzjonijiet imsejsa fuq kooperazzjoni bejn organizzazzjonijiet pubbliċi u privati mill-Unjoni Ewropea u Stati sieħba;
— fuq bażi ta' każ b'każ, l-ispiża raġjonevoli ta' provisti meħtieġa għat-twettieq ta' l-għajnuna; f’każijiet partikolari, bħalma huma ħarsien nukleari, ġustizzja u affarijiet interni, u kooperazzjoni bejn fruntieri, tista tkun magħduda żieda fil-provvisti;
— investiment u attivitajiet li jkollhom x'jaqsmu ma’ investiment. Għajnuna tista tinkludi dik teknika biex tħaffef u ssotni l-investimenti, u jista’ jkollha magħha wkoll finanzjament għall-investiment, kif muri f'L-Anness III, l-aktar fl-oqsma ta' kooperazzjoni bejn fruntieri, promozzjoni ta' intrapriżi żgħar u ta' daqs medju, infrastruttura ambjentali u firxa ta' sistemi.
2. L-għajnuna għandha tolqot ukoll spejjeż li jkollhom x'jaqsmu mat-tħejjija, it-twettieq, is-sorveljanza, il-verifika u l-valutazzjoni tal-programm, kif ukoll l-ispejjeż dwar informazzjoni.
3. Il-miżuri jistgħu jsiru, skond kif jixraq, b’mod deċentraliżżat. Dawk li fl-aħħarnett igawdu mill-għajnuna tal-Komunità għandu jkollhom x’ jaqsmu mill-qrib fit-tħejjija u l-eżekuzzjoni tal-proġetti. Fejn ikun possibbli, l-identifikazzjoni u t-tħejjija tal-proġetti għandhom isiru fuq il-livell reġjonali u lokali.
4. Jekk ikun jixraq, proġetti għandhom jitwettqu f'fażijiet, b'mod li ma jfixkilx il-kontinwità tal-ħidmiet. Appoġġ għal fażijiet ta' wara jkun jiddependi fuq it-twettieq b'suċċess tal-fażijiet ta' qabel.
5. Is-sehem ta' esperti lokali fit-twettieq ta' proġetti għandu jkun imħeġġeġ.
IT-TITOLU III
DISPOŻIZZJONIJIET FINANZJARJI
Artikolu 6
1. L-ammont ta' referenza finanzjarja għat-twettieq tal-programm għall-perjodu 2000 sa 2006 għandu jkun ta' EUR 3 138 miljun.
Il-voti ta' kull sena għandhom ikunu awtoriżżati mill-awtorità ta' l-estimi fil-limiti tal-prospetti finanzjarji.
2. Massimu ta' 20 % ta' l-estimi ta' kull sena jista’ jitħalla biex jitħallas l-investiment imsemmi fl-Anness III. Massimu ta' 20 % ta' l-estimi ta' kull sena jista' jitħalla lill-“Iskema ta' Inċentivi” kif muri fl-Artikolu 4.
Artikolu 7
1. Il-miżuri msemmija f'dan ir-Regolament li jitħallsu mill-estimi ġenerali ta' l-Unjoni Ewropea għandhom ikunu amministrati mill-Kummissjoni skond ir-Regolament Finanzjarju applikabbli għalihom.
2. Il-Kummissjoni għandha toqgħod mal-prinċipji ta' tmexxija finanzjarja tajba u, partikularment, dawk ta' ekonomija u prezz tajjeb msemmija fir-Regolament Finanzjarju.
Artikolu 8
1. Għajnuna mill-Komunità għandha ġeneralment tkun f'forma ta' għotjiet. Dawn jistgħu iħallu flus biex jitħallsu proġetti jew miżuri oħra ta' kooperazzjoni.
2. Deċiżjonijiet finanzjarji u kuntratti li jirriżultaw minn din l-għajnuna għandhom jipprovdu espressament li l-Kummissjoni u l-Qorti ta' l-Awdituri jagħmlu sorveljanza u superviżjoni finanzjarja u kontroll fuq il-post, jekk ikun meħtieġ.
Artikolu 9
1. In-nefqa tal-proġett f'valuta lokali għandha tkun dik tal-Komunità biss skond kemm ikun tassew meħtieġ.
2. Il-ko-finanzjament ta' proġetti mill-Istati sieħba għandu jkun tassew imħeġġeġ.
3. Taxxi, dażji u x-xiri ta' proprjetà mmobbli m'għandhomx jitħallsu mill-Komunità.
Artikolu 10
Id-dispożizzjonijiet li ġejjin dwar offerti u l-għoti ta' kuntratti, kif ukoll il-prinċipji li jolqtu l-għoti ta' kuntratti msemmija f'L-Anness IV għandhom jibqgħu jgħoddu sakemm tidħol fis-seħħ leġislazzjoni li temenda Titolu IX tar-Regolament Finanzjarju, sabiex tipprovdi l-bażi għall-implimentazzjoni ta' dispożizzjonijiet li jkunu jgħoddu għall-programmi kollha ta' għajnuna barranija tal-Komunità.
Artikolu 11
1. Il-Kummissjoni għandha tagħmel azzjonijiet skond il-programmi ta' ħidma msemmija fl-Artikolu 3(4) u skond it-Titolu IX tar-Regolament Finanzjarju, kif ukoll skond l-Artikolu 12 ta' dan ir-Regolament.
2. Il-Kummissjoni għandha tagħti lill-Istati sieħba sett ta' regoli dwar id-definizzjoni tal-proġetti.
3. Kuntratti ta' provvista u xogħlijiet għandhom jingħataw permezz ta' sejħiet miftuħa għall-offerti, ħlief fil-każijiet imsemmija fl-Artikolu 116 tar-Regolament Finanzjarju. ►M1 L-oriġini tal-provvisti u l-materjali mixtrija taħt dan ir-Regolament għandha tkun determinata ulterjorment skond ir-regoli ta’ l-oriġini u d-derogi minnhom, kif jinsabu fir-Regolament (KE) Nru 2112/2005 tal-21 ta’ Novembru 2005 dwar l-aċċess għall-għajnuna esterna tal-Komunità ( 5 ). ◄
4. Sehem għal sejħiet għal offerti u kuntratti għandhom ikunu miftuħa b'mod indaqs għal persuni naturali u legali fl-Istati Membri, fl-Istati sieħba, u fil-pajjiżi li jgawdu mill-programm Phare. Sehem ta' persuni naturali u legali minn pajjiżi tal-Mediterran b'rabtiet tradizzjonali fl-ekonomija, kummerċ jew ġeografija jistgħu jkunu awtoriżżati mill-Kummissjoni każ b'każ jekk dawk il-programmi jew proġetti jkun jenħtiġilhom forom speċifiċi ta' taħriġ espert li jkun jinsab sewwasew f'dawk il-pajjiżi. ►M1 L-eliġibilità għall-parteċipazzjoni fil-proċeduri tas-sejħiet ta’ l-offerti taħt dan ir-Regolament għandha tiġi determinata ulterjorment skond ir-regoli ta’ l-eliġibilità u d-derogi minnhom stabbiliti hawn, kif jinsabu fir-Regolament (KE) Nru 2112/2005. ◄
5. Fil-każ ta' ko-finanzjament, is-sehem ta' pajjiżi terzi nteressati f'sejħiet għal offerti u kuntratti jista’ jkun awtoriżżat mill-Kummissjoni, iżda kull każ għalih. F'dawn il-każijiet is-sehem ta' intrapriżi minn pajjiżi terzi għandu jitħalla biss jekk tingħata reċiproċità. ►M1 Il-parteċipazzjoni fil-proċeduri kontrattwali implimentati permezz ta’ organizzazzjoni internazzjonali jew ko-finanzjament ma’ pajjiż terz tiġi definita ulterjorment fir-Regolament (KE) Nru 2112/2005. ◄
Artikolu 12
Sejħiet miftuħa għal offerti għal għoti ta' kuntratti ta' provvisti skond l-Artikolu 114 tar-Regolament Finanzjarju għandhom iħallu żmien biex fih tintbagħat offerta ta' mhux anqas minn 52 jum mid-data li fiha jintbagħat l-avviż lill-Ġurnal Uffiċjali tal-Komunitajiet Ewropej.
Kuntratti ta' servizz għandhom, bħala regola ġenerali, jingħataw permezz ta' sejħiet ristretti għal offerti u permezz ta' ftehim privat għal ħidmiet ta' mhux aktar minn EUR 200 000.
IT-TITOLU IV
DISPOŻIZZJONIJIET ĠENERALI
Artikolu 13
1. Il-Kummissjoni għandha tkun assistita mill-Kumitat għal għajnuna lill-Istati Ġodda Indipendenti u l-Mongolja (hawn 'il quddiem imsejjaħ bħala “il-Kumitat”).
2. Meta ssir referenza għal dan il-paragrafu, l-Artikoli 4 u 7 tad-Deċiżjoni 1999/468/KE għandhom japplikaw.
Il-perjodu msemmi fl-Artikolu 4(3) tad-Deċiżjoni 1999/468/KE għandu jkun ta' tliet xhur.
3. Il-Kumitat għandu jagħmel ir-regoli tal-proċedura tiegħu.
Artikolu 14
Il-Kummissjoni għandha, flimkien ma’ l-Istati Membri u skond skambju reċiproku u regolari ta' informazzjoni, magħdud l-iskambju ta' informazzjoni fuq il-post, tara li jkun hemm il-koordinazzjoni effettiva ta' l-għajnuna mogħtija mill-Komunità u mill-Istati Membri ndividwali, sabiex tiżdied il-koerenza u l-kumplimentarjetà tal-programmi ta' kooperazzjoni tagħhom.
Għandu jkun hemm koordinazzjoni regulari bejn il-Kummissjoni u l-Istati Membri; magħduda l-koordinazzjoni fuq il-post imniżżla fil-kuntratti tagħhom ma’ l-Istati sieħba, kemm fit-tifsira tal-programm u fl-istadju tat-twettieq tal-programm.
Fit-twettieq ta' programmi ta' kooperazzjoni bejn fruntieri li fihom ikun hemm Stati Membri, pajjiżi tal-Phare u Stati sieħba, il-Kummissjoni għandha tara li jkun hemm koordinazzjoni effettiva u konsistenti ma’programmi mħallsa mill-fondi strutturali, minn programmi tal-Komunità għall-għajnuna barranija u minn inizjattivi ta' għajnuna bilaterali.
B'żieda ma’ dan, il-Kummissjoni għandha tiżgura li jkun hemm koordinazzjoni u kooperazzjoni ma' l-istituzzjonijiet finanzjarji internazzjonali u kontributuri oħra.
Fil-qafas tal-għajnuna mogħtija bis-saħħa ta' dan ir-Regolament, il-Kummissjoni għandha ġġib 'il quddiem ko-finanzjament ma' għaqdiet pubbliċi jew privati fl-Istati Membri.
Artikolu 15
1. Kull sena l-Kummissjoni għandha tippreżenta rapport fuq il-progress fit-twettieq tal-programm ta' għajnuna. Dan ir-rapport għandu jkollu fih valutazzjoni tal-għajnuna diġà mogħtija, flimkien ma’ kemm il-programm ħalla effett, kif ukoll tagħrif dwar ir-riżultati ta' dak li sar fis-sorveljanza matul is-sena. Ir-rapport għandu jkun indirizzat lill-Istati Membri, lill-Parlament Ewropew, lill-Kunsill, lill-Kumitat Ekonomiku u Soċjali u lill-Kumitat tar-Reġjuni.
2. Fid-dawl ta' dawn ir-rapporti, il-Kummissjoni tista’ tagħmel proposti lill-Kunsill biex ibiddel dan ir-Regolament.
3. B’żieda ma' dan, il-Kummissjoni għandha tara li jkun hemm tagħrif dwar statistika għall-għaqdiet imsemmija fil-paragrafu 1 dwar l-għoti tal-kuntratti. Il-kontenut u l-forma tat-tagħrif dwar statistika li għandu jingħata għandhom ikunu diskussi mal-Kumitat imsemmi fl-Artikolu 13(1).
Artikolu 16
Meta element essenzjali biex il-kooperazzjoni permezz ta' għajnuna tissokta jkun nieqes, l-aktar f'każijiet ta' ksur ta' prinċipji demokratiċi u tad-drittijiet tal-bniedem, il-Kunsill jista’, fuq proposta mill-Kummissjoni, li jaġixxi b'maġġoranza kwalifikata, jiddeċiedi x'miżuri xierqa jieħu dwar għajnuna lil Stat sieħeb.
L-istess proċedura tista’ tapplika bħala l-aħħar miżura f'każijiet ta' ksur serju ta' l-obbligi ta' l-Istati sieħba kif imsemmija fil-Ftehim ta' Sħubija u Kooperazzjoni.
Artikolu 17
Dan ir-Regolament għandu jidħol fis-seħħ fit-tielet jum wara li jkun ippubblikat fil-Ġurnal Uffiċjali tal-Komunitajiet Ewropej.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
L-ANNESS I
STATI SIEĦBA MSEMMIJA FL-ARTIKOLU 1
Armenja
Azerbajġan
Belarus
Ġeorġja
Kazakstan
Kirgizstan
Moldova
Mongolja
Federazzjoni Russa
Taġikistan
Turkmenistan
Ukrajna
Uzbekistan
L-ANNESS II
OQSMA TA' KOOPERAZZJONI MSEMMIJA FL-ARTIKOLU 2(2) U L-ARTIKOLU 3(3) U (4)
1. |
Appoġġ għal riforma istituzzjonali, legali u amministrattiva: — żvilupp ta' l-istat tad-dritt, — appoġġ għal tfassil ta' politika effettiva, — riforma ta' l-amministrazzoni pubblika fuq livell nazzjonali, reġjonali u lokali, — appoġġ għal korpi eżekuttivi u leġislattivi (nazzjonali, reġjonali, lokali), — appoġġ għal dak li jsir fil-oqsma tal-ġustizzja u affarijiet interni, — tisħiħ tal-qafas legali u regolatorju, — appoġġ għall-implimentazzjoni ta' obbligi internazzjonali, — appoġġ lis-soċjeta ċivili, — appoġġ lill-edukazzjoni u t-taħriġ. |
2. |
Appoġġ lis-settur privat u għajnuna għal żvilupp ekonomiku: — promozzjoni ta' intrapriżi żgħar u ta' daqs medju, — żvilupp tas-sistemi ta' servizzi bankarji u finanzjarji, — promozzjoni ta' intrapriża privata, magħduda l-intrapriżi flimkien, — kooperazzjoni ndustrijali, magħduda r-riċerka, — privatizzazzjoni, — ristrutturazzjoni ta' intrapriżi, — promozzjoni ta' kummerċ u investimenti permezz ta' qafas maħsub għas-suq. |
3. |
Appoġġ biex ikunu milqugħa l-konsegwenzi soċjali tal-bidla: — riforma tas-sistemi tas-saħħa, pensjoni, ħarsien soċjali u ta' assigurazzjoni, — għajnuna biex jitnaqqas l-effett soċjali tar-ri-strutturazzjoni ndustrijali, — għajnuna għal rikostruzzjoni soċjali, — żvilupp ta' servizzi ta' mpjiegi, magħdud it-taħriġ mill-ġdid. |
4. |
Żvilupp ta' firxa ta' sistemi ta' infrastruttura: — firxa ta' sistemi ta' trasport, — firxa ta' sistemi ta' telekomunikazzjoni, — provvista ta' enerġija u firxa ta' sistemi ta' ġarr, — qsim bejn il-fruntieri. |
5. |
Promozzjoni tal-ħarsien ta' l-ambjent u kontroll tar-riżorsi naturali: — żvilupp ta' politika u ħidma sostenibbli dwar ambjent, — promozzjoni biex livelli ambjentali jkunu jaqblu ma’ dawk ta' l-Unjoni Ewropea, — titjib ta' teknoloġiji ta' l-enerġija fil-provvista u fl-użu aħħari. — promozzjoni ta' użu sostenibbli u kontroll ta' riżorsi naturali, magħduda l-użu bil-qies ta' l-enerġija, l-użu sewwa ta' l-enerġija u titjib ta' l-infrastruttura ambjentali. |
6. |
Żvilupp ta' l-ekonomija rurali: — qafas legali u regolatorju, magħduda l-privatizzazzjoni ta' l-art, — żieda fl-aċċess għall-finanzi u l-promozzjoni tat-taħriġ, — titjib fit-tqassim ta' u l-aċċess għas-swieq, |
Fejn ikun japplika, għandu jkun hemm appoġġ għal ħarsien nukleari skond il-prijoritajiet imsemmija fl-Artikolu 2(5).
L-ANNESS III
FINANZJAMENT TA' INVESTIMENT
Finanzjament ta' l-investiment għandu jkun ġustifikat permezz tal-kriterji li ġejjin:
— l-effett multipliku, li bih għajnuna mill-Komunità tkun multiplikata b'investiment minn għejun oħra;
— minbarra dan, meta għajnuna mill-Komunità tħeġġeg investiment li ma kienx ikun jista’ jsir mod ieħor;
— oqsma ta' interess għall-Komunità.
Il-finanzjament ta' l-investimenti jista’ jieħu l-forma ta' ko-finanzjament ma’ għejun oħra ta' finanzjament ta' investimenti jew, f'każi eċċezzjonali, investiment waħdu.
Setturi ta' prijorità għal finanzjament ta' investimenti jistgħu jinkludu: kooperazzjoni bejn fruntieri, magħduda l-infrastruttura tal-fruntieri, il-promozzjoni ta' intrapriżi żgħar u ta' daqs medju, infrastruttra ambjentali u firxa ta' sistemi. M'għandux ikun hemm finanzjament dirett f'ishma u f'sehem f'kumpanniji individwali.
L-ANNESS IV
PRINĊIPJI LI FUQHOM JINGĦATAW KUNTRATTI B'OFFERTI, L-AKTAR B'OFFERTI RISTRETTI
1. |
Mas-“Sejħa għal min joffri” għandu jkun hemm it-tagħrif kollu meħtieġ għal kull min joffri u jkun reġistrat fuq il-lista ta' l-għazla ta' l-aħħar jew li jitlob dan it-tagħrif bi tweġiba għall-pubblikazzjoni ta' avviż ta' offerta bil-miftuħ. Dan it-tagħrif għandu jkollu l-aktar il-kriterji ta' valutazzjoni. Il-valutazzjoni teknika ta' l-offerta tista’ tiġbor fiha intervisti mal-persuni proposti fl-offerta. |
2. |
Il-Kummissjoni għandha tmexxi l-kumitati kollha ta' valutazzjoni u għandha tqabbad għadd biżżejjed ta' esperti biex jivvalutaw qabel ma l-offerti jinħarġu. Wieħed mill-esperti għandu jkun mill-istituzzjoni li tkun ghamlet it-talba mill-pajjiż benefiċjarju. min jagħmel valutazzjonijiet għandu jiffirma dikjarazzjoni ta' imparzjalità. |
3. |
Il-valutazzjoni ta' l-offerta ssir skond il-qies tal-kwalità teknika mqabbla mal-prezz. Il-qies taż-żewġ kriterji għandu jitħabbar f'kull sejħa għal offerti. Il-valutazzjoni teknika għandha ssir l-aktar skond il-kriterji li ġejjin: organizzazzjoni, skeda ta' żmien, metodi u pjani proposti tax-xogħol biex jingħata s-servizz, kwalifiki, esperjenza, il-ħiliet tal-persuni msemmija biex jagħtu s-servizzi u l-użu ta' kumpaniji u esperti lokali, kif dawn jintegraw fil-proġett, u sehemhom biex ir-riżultati tal-proġett ikunu sostenibbli. sperjenza speċifika fil-programm Tacis ta' min jagħmel offerta ma titqiesx. |
4. |
Dawk li joffru u ma jintgħażlux għandhom ikunu avżati b'ittra, li jkun fiha x'juri għaliex ma intgħażlux u l-isem magħżul ta' min offra. |
5. |
Kull persuna naturali jew legali nvoluta fit-tħejjija ta' proġett m'għandhiex ikollha sehem fit-twettieq tal-proġett. Jekk min joffri u jieħu sehem iħaddem, fi żmien sitt xhur mit-tmiem tas-sehem tagħha fil-proċess ta' l-offerti, lil dik il-persuna, tkun liema tkun il-pożizzjoni tagħha, min ikun offra jista’ ma jitħalliex jieħu sehem fil-proġett. Kull min joffri u jkun imsemmi fil-lista ta' l-għażla ta' l-aħħar m'għandux jitħalla jieħu sehem fil-valutazzjoni ta' dik l-offerta. |
6. |
Il-Kummissjoni għandha tara li kull tagħrif kummerċjali sensittiv li jkollu x'jaqsam ma’ offerta proposta jibqa kunfidenzjali. |
7. |
Meta intrapriża, organizzazzjoni jew istituzzjoni jkollha raġunijiet serji biex titlob reviżjoni ta' offerta, għandu dejjem ikun hemm il-possibiltà li t-talba tmur għand il-Kummissjoni. Meta jiġri hekk, għandha tingħata tweġiba tajba lil min ikun għamel it-talb. |
8. |
Fil-każijiet ta' għoti ta' kuntratti wara sejħiet restrittivi għal offerti, kif imsemmi fl-Artikolu 116 tar-Regolament Finanzjarju, kull turija bil-miktub ta' interess għandha tkun reġistrata mill-Kummissjoni, li għandha tuża din ir-reġistrazzjoni meta tagħmel il-lista ta' l-għażla ta' l-aħħar. Minbarra dan, jista’ jitqies tagħrif ieħor, partikolarment mir-reġistru ċentrali konsultattiv tat-Tacis, meta ssir il-lista ta' l-għażla ta' l-aħħar. Dan ir-reġistru għandu jkun miftuħ għal intrapriżi, organizzazzjonijiet u istituzzjonijiet kollha nteressati fir-reġistrazzjoni. |
9. |
Meta ssir il-lista ta' l-għażla ta' l-aħħar, il-Kummissjoni għandha timxi skond il-kwalifiki, interess u disponibbiltà ta' intrapriża, organizzazzjoni jew istituzzjoni. L-għadd ta' intrapriżi, organizzazzjonijiet u istituzzjonijiet fil-lista ta' l-għażla ta' l-aħħar għandu jiddependi mid-daqs u l-komplessità tal-proġett u għandu joffri l-iktar għażla wiesgħa possibbli. Intrapriżi, organizzazzjonijiet u istituzzjonijiet li jkunu wrew interess bil-miktub fi proġett għandhom ikunu avżati jekk daħlux jew le fil-lista ta' l-għażla ta' l-aħħar. |
10. |
Kull sena l-Kummissjoni għandha tagħti lill-Kumitat imsemmi fl-Artikolu 13(1), lista ta' l-intrapriżi, l-organizzazzjonijiet u l-istituzzjonijiet li jkunu intgħażlu. |
11. |
Fi proġetti komplessi ħafna, il-Kummissjoni tista’ tħajjar lil intrapriżi, organizzazzjonijiet u istituzzjonijiet li jkunu nżammu fil-lista ta' l-għażla ta' l-aħħar biex jagħmlu konsorzja bejniethom. F'dawn il-każijiet dan is-suġġeriment, kif ukoll il-lista kollha ta' l-għażla ta' l-aħħar, għandhom jintbagħtu lill-intrapriżi, organizzazzjonijiet u istituzzjonijiet kollha li jkunu nżammu fiha. |
12. |
F'offerti ristretti għandu jkun hemm żmien ta' mhux anqas minn 60 jum kalendarju bejn l-opinjoni finali mogħtija mill-Kumitat imsemmi fl-Artikolu 13(1), u l-ħruġ ta' l-offerti. Minkejja dan, f’każijiet ta' malajr, dan iż-żmien jista jitqassar mill-Kummissjoni, iżda din għandha tagħti tifsira dettaljata lil dak il-Kumitat. Stedina għal offerta ristretta għandha tħalli żmien ta' 60 jum kalendarju mid-data tal-wasla tal-ittra ta' stedina. F'każijiet ta' malajr, dan iż-żmien jista’ jitnaqqas, iżda m'għandu qatt ikun ta' anqas minn 40 jum kalendarju. F'każijiet eċċezzjonali, dan iż-żmien jista jiżdied mill-Kummissjoni, iżda din għandħha tagħti tifsira dettaljata lill-Kumitat imsemmi fl-Artikolu 13(1). Kull tiskambju ta' żmien għandu jkun mgħarraf kif jixraq lil intrapriżi, organizzazzjonijiet u istituzzjonijiet interessati. |
( 1 ) ĠU C 37, tal-11.2.1999, p. 8.
( 2 ) ĠU L 165, ta' l-4.7.1996, p. 1.
( 3 ) ĠU C 172, tat-18.6.1999, p. 1.
( 4 ) ĠU L 184, tas-17.7.1999, p. 23.
( 5 ) ĠU L 344, 27.12.2005, p. 23.