(1)

Ir-Regolament (KE) Nru 273/2004 jistabbilixxi miżuri għall-monitoraġġ tal-kummerċ tal-prekursuri tad-droga fl-Unjoni, filwaqt li r-Regolament (KE) Nru 111/2005 jirregola l-kummerċ tal-prekursuri tad-droga bejn l-Unjoni u pajjiżi terzi. L-Anness I tar-Regolament (KE) Nru 273/2004 u l-Anness tar-Regolament (KE) Nru 111/2005 fihom lista ta’ sustanzi skedati, li huma soġġetti għal diversi miżuri armonizzati ta’ kontroll u ta’ monitoraġġ previsti f’dawk ir-Regolamenti.

(2)

Bid-Deċiżjonijiet 67/6 u 67/7 tal-Kummissjoni dwar id-Drogi Narkotiċi tan-Nazzjonijiet Uniti, meħuda fis-67 sessjoni tagħha mit-18 sat-23 ta’ Marzu 2024, is-sustanzi 4-piperidon u 1-bok-4-piperidon ġew miżjuda mat-Tabella I tal-Konvenzjoni tan-Nazzjonijiet Uniti kontra t-Traffikar Illeċitu fi Drogi Narkotiċi u Sustanzi Psikotropiċi, adottata fi Vjenna fid-19 ta’ Diċembru 1988 (“il-Konvenzjoni tan-NU tal-1988”) u approvata f’isem l-Unjoni bid-Deċiżjoni tal-Kunsill 90/611/KEE (3).

(3)

Għaldaqstant, jenħtieġ li s-sustanzi 4-piperidon u 1-bok-4-piperidon jiġu inklużi fl-Anness I tar-Regolament (KE) Nru 273/2004 u fl-Anness tar-Regolament (KE) Nru 111/2005.

(4)

Is-sustanza 4-piperidon hija prekursur fi stadju bikri involut fil-biċċa l-kbira tar-rotot sintetiċi għall-fentanil u xi analogi tal-fentanil. Tista’ tintuża biex isiru N-Fenetil-4-piperidon (NPP), 4-Anilino-N-fenetilpiperidin (ANPP), N-Fenilpiperidin-4-ammina (4-AP) u norfentanil, li huma kollha sustanzi elenkati fit-Tabella I tal-Konvenzjoni tan-NU tal-1988.

(5)

Is-sustanza 1-bok-4-piperidon hija derivattiv protett kimikament ta’ 4-piperidon u tista’ tintuża biex isir terz-butil 4-anilinopiperidin-1-karbossilat (1-bok-4-AP) u sussegwentement in-norfentanil, it-tnejn li huma sustanzi elenkati fit-Tabella I tal-Konvenzjoni tan-NU tal-1988. Is-sustanza 1-bok-4-piperidon tista’ wkoll tiġi kkonvertita lura f’4-piperidon.

(6)

Kemm 4-piperidon kif ukoll 1-bok-4-piperidon huma prekursuri adattati ħafna għall-manifattura illeċita tal-fentanil u l-analogi tiegħu.

(7)

Il-fentanil u l-analogi tal-fentanil huma drogi narkotiċi qawwija ħafna, tipikament minn 10 sa 100 darba aktar b’saħħithom mill-eroina. Għaldaqstant, ammonti żgħar ta’ 4-piperidon u 1-bok-4-piperidon (firxa ta’ kg) huma biżżejjed biex jiġu mmanifatturati miljuni ta’ dożi ta’ prodotti finali (fentanili).

(8)

Għaldaqstant, 4-piperidon u 1-bok-4-piperidon jenħtieġ li jiġu inklużi fil-lista ta’ sustanzi skedati fil-livell tal-Unjoni biex jissaħħu l-kontroll u l-monitoraġġ tagħhom.

(9)

Is-sustanzi skedati elenkati fl-Anness I tar-Regolament (KE) Nru 273/2004 u fl-Anness tar-Regolament (KE) Nru 111/2005 huma maqsuma f’kategoriji li għalihom japplikaw miżuri differenti, sabiex jintlaħaq bilanċ proporzjonat bejn il-livell ta’ riskju maħluq minn kull sustanza speċifika u l-piż fuq il-kummerċ leċitu. Il-kontrolli u l-miżuri ta’ monitoraġġ l-iktar stretti japplikaw għas-sustanzi tal-Kategorija 1.

(10)

Hemm manifattura leġittima magħrufa u limitata ta’ 4-piperidon u 1-bok-4-piperidon. Għaldaqstant, l-iskedar ta’ dawn is-sustanzi fil-Kategorija 1 ikun jeħtieġ biss piż żejjed amministrattiv limitat għall-operaturi ekonomiċi u għall-awtoritajiet kompetenti fl-Unjoni.

(11)

Għalhekk jenħtieġ li r-Regolamenti (KE) Nru 273/2004 u (KE) Nru 111/2005 jiġu emendati kif xieraq.

(12)

Ir-Regolament (KE) Nru 273/2004 u (KE) Nru 111/2005 jimplimentaw b’mod konġunt ċerti dispożizzjonijiet tal-Konvenzjoni tan-NU tal-1988. Fid-dawl tar-rabta sostantiva mill-qrib bejn is-setgħat f’dawk iż-żewġ Regolamenti, jixraq li l-emendi jiġu adottati permezz ta’ att delegat uniku,