(1)

Ir-Regolament (KE) Nru 1907/2006 jistabbilixxi l-obbligazzjonijiet tar-reġistrazzjoni tal-manifatturi jew ta’ l-importaturi Komunitarji ta’ sustanzi waħedhom, fi preparati jew f’oġġetti, kif ukoll id-dispożizzjonijiet dwar il-valutazzjoni tas-sustanzi u l-obbligi ta’ utenti “downstream”. L-Artikolu 2(7)(a) ta’ dak ir-Regolament jistipula li s-sustanzi inklużi fl-Anness IV huma eżentati mit-Titoli II, V u VI ta’ l-istess Regolament billi hemm magħrufa informazzjoni suffiċjenti dwar dawn is-sustanzi sabiex ikunu kkunsidrati bħala sustanzi li jikkawżaw riskju minimu minħabba l-proprjetajiet intrinsiċi tagħhom. Barra dan, l-Artikolu 2(7)(b) ta’ l-istess Regolament jistipula li sustanzi koperti mill-Anness V huma eżentati mill-istess titoli tar-Regolament, billi r-reġistrazzjoni hija meqjusa bħala mhux adegwata jew mhux meħtieġa għal dawn is-sustanzi u l-eżenzjoni tagħhom minn dawn it-titoli ma tippreġudikax l-għanijiet ta' dan ir-Regolament.

(2)

L-Artikolu 138(4) ta’ dak ir-Regolament jesiġi li l-Kummissjoni twettaq reviżjoni ta' l-Annessi IV u V sa l-1 ta’ Ġunju 2008 bil-ħsieb li tipproponi emendi għalihom, jekk ikun opportun.

(3)

Ir-reviżjoni li twettqet mill-Kummissjoni skond l-Artikolu 138(4) wriet li tliet sustanzi elenkati fl-Anness IV għandhom jitneħħew minn dak l-Anness, billi m’hemmx magħrufa informazzjoni suffiċjenti dwar dawn is-sustanzi sabiex ikunu kkunsidrati bħala sustanzi li jikkawżaw riskju minimu minħabba l-proprjetajiet intrinsiċi tagħhom. Dan japplika fil-każ tal-vitamina A, billi s-sustanza tista’ tikkawża riskji sinifikanti ta’ tossiċità għar-riproduzzjoni. Dan il-każ japplika wkoll għall-karbonju u għall-grafite, b’mod partikolari minħabba l-fatt li n-numri EINECS u/jew CAS ikkonċernati jintużaw biex jidentifikaw forom ta’ karbonju u grafite fl-iskala nano, li ma jissodisfawx il-kriterji ta’ inklużjoni f’dan l-Anness.

(4)

Barra dan, tliet gassijiet nobbli (elju, neon u kżenu) jissodisfaw il-kriterji għall-inklużjoni fl-Anness IV u għandhom għalhekk jitressqu mill-Anness V għal hemm. Gass ieħor nobbli, kripton, li jissodisfa l-kriterji għall-inklużjoni fl-Anness IV, għandu għalhekk jiżdied fl-Anness għal raġunijiet ta’ konsistenza. Tliet sustanzi oħra (fruttożju, galattożju u lattożju) għandhom jiżdiedu għaliex ġew identifikati bħala sustanzi li jissodisfaw il-kriterji għall-inklużjoni fl-Anness IV. Il-franka għandha titħassar mill-Anness IV għaliex hija minerali u diġà hija eżentata fl-Anness V. Finalment, ċerti entrati eżistenti dwar żjut, xaħmijiet, xama’, aċidi xaħmin u l-imluħ tagħhom għandhom jitħassru, għaliex dawk is-sustanzi mhux kollha jissodisfaw il-kriterji għall-inklużjoni fl-Anness IV u l-inklużjoni tagħhom f’entrata ġenerika fl-Anness V tidher aktar konsistenti, bl-użu ta’ formulazzjoni biex tiġi limitata l-eżenzjoni għal sustanzi bi profil ta' periklu aktar baxx.

(5)

Ir-reviżjoni li twettqet mill-Kummissjoni skond l-Artikolu 138(4) tar-Regolament uriet li ċerti emendi għandhom isiru wkoll fl-Anness V. Għandu jiżdied il-manjeżju, billi ġie identifikat bħala sustanza li tissodisfa l-kriterji għall-inklużjoni fl-Anness V. Barra minn hekk, huwa xieraq li jiżdiedu ċerti tipi ta’ ħġieġ u ta’ frits taċ-ċeramika li ma jissodisfawx il-kriterji ta’ klassifikazzjoni definiti fid-Direttiva tal-Kunsill 67/548/KEE (2) u li, addizzjonalment, ma fihomx kostitwenti perikolużi ogħla mil-limiti ta’ konċentrazzjoni rilevanti, sakemm ma hemmx data xjentifika speċifika li tagħti prova li dawn il-kostitwenti mhumiex disponibbli. Ċerti żjut veġetali, xaħmijiet u xama’ u żjut ta’ l-annimali, xaħmijiet u xama’, kif ukoll il-gliċerol, li jinkisbu minn sorsi naturali, li mhumiex modifikati kimikament u li ma għandhomx proprjetajiet perikolużi għajr għal fjammabiltà u irritazzjoni tal-ġilda jew ta’ l-għajnejn, għandhom jiżdiedu fl-Anness V sabiex it-trattament ta’ sustanzi komparabbli jkun aktar konsistenti u sabiex tiġi limitata l-eżenzjoni għal sustanzi bi proprjetajiet ta’ periklu baxx. L-istess japplika għal ċerti aċidi xaħmin, li jinkisbu minn sorsi naturali u li mhumiex modifikati kimikament u li ma għandhomx proprjetajiet ta’ periklu għajr għal fjammabiltà u irritazzjoni tal-ġilda jew ta’ l-għajnejn. Iż-żieda ta’ żjut, xaħmijiet, xama’ u aċidi xaħmin fl-Anness V tikkorrispondi mat-tħassir ta’ ċerti sustanzi individwali ta’ dawn il-gruppi elenkati fl-Anness IV.

(6)

L-emendi stipulati f’dan ir-Regolament, b’mod partikolari l-kompost u l-bijogass, huma mingħajr preġudizzju għal-leġiżlazzjoni Komunitarja dwar l-iskart.

(7)

Il-miżuri stipulati f’dan ir-Regolament huma skond l-opinjoni tal-Kumitat stabbilit skond l-Artikolu 133 tar-Regolament (KE) Nru 1907/2006,