(1)

Id-Direttiva 2003/87/KE ġiet emendata mid-Direttiva (UE) 2023/959 (2) biex tinkludi l-emissjonijiet tat-trasport marittimu fis-sistema għall-iskambju ta’ kwoti tal-emissjonijiet ta’ gassijiet serra ġewwa l-Unjoni (l-“EU ETS”).

(2)

Sabiex jitnaqqas ir-riskju ta’ waqfiet evażivi fil-portijiet minn bastimenti tal-kontejners lejn portijiet barra mill-Unjoni u r-rilokazzjoni tal-attivitajiet tat-trażbord tal-kontejners lejn portijiet barra mill-Unjoni, id-Direttiva 2003/87/KE tipprevedi esklużjoni mid-definizzjoni ta’ “port tal-waqfa” ta’ waqfiet ta’ bastimenti tal-kontejners f’port ġar tat-trażbord tal-kontejners identifikat fl-att ta’ implimentazzjoni adottat skont l-Artikolu 3ga(2) ta’ dik id-Direttiva.

(3)

F’konformità mal-Artikolu 3ga(2), it-tieni subparagrafu, tad-Direttiva 2003/87/KE, biex port jiġi identifikat bħala port ġar tat-trażbord tal-kontejners, dan jeħtieġ li jkun jissodisfa diversi kriterji. Is-sehem tal-port mit-trażbord tal-kontejners irid jaqbeż il-65 % tat-traffiku totali tal-kontejners ta’ dak il-port matul il-perjodu ta’ 12-il xahar l-aktar reċenti li għalih tkun disponibbli data rilevanti. Il-port irid ikun jinsab barra mill-Unjoni iżda inqas minn 300 mil nawtiku minn port taħt il-ġuriżdizzjoni ta’ Stat Membru. Madankollu, l-att ta’ implimentazzjoni ma għandux jidentifika portijiet li jinsabu f’pajjiż terz li għalih dak il-pajjiż terz effettivament japplika miżuri ekwivalenti għad-Direttiva 2003/87/KE.

(4)

East Port Said jinsab inqas minn 300 mil nawtiku minn port taħt il-ġuriżdizzjoni ta’ Stat Membru. Is-sehem ta’ East Port Said mit-trażbord tal-kontejners jaqbeż il-65 % tat-traffiku totali tal-kontejners ta’ dak il-port matul il-perjodu ta’ 12-il xahar l-aktar reċenti li għalih tkun disponibbli data rilevanti. L-Eġittu ma japplikax miżuri ekwivalenti għad-Direttiva 2003/87/KE għal East Port Said. Għaldaqstant, East Port Said jenħtieġ li jiġi identifikat bħala port ġar tat-trażbord tal-kontejners.

(5)

Tanger Med jinsab inqas minn 300 mil nawtiku minn port taħt il-ġuriżdizzjoni ta’ Stat Membru. Is-sehem ta’ Tanger Med mit-trażbord tal-kontejners jaqbeż il-65 % tat-traffiku totali tal-kontejners ta’ dak il-port matul il-perjodu ta’ 12-il xahar l-aktar reċenti li għalih tkun disponibbli data rilevanti. Il-Marokk ma japplikax miżuri ekwivalenti għad-Direttiva 2003/87/KE għal Tanger Med. Għaldaqstant, Tanger Med jenħtieġ li jiġi identifikat bħala port ġar tat-trażbord tal-kontejners.

(6)

Il-Kummissjoni jenħtieġ li timmonitorja l-implimentazzjoni tal-EU ETS fir-rigward tat-trasport marittimu, b’mod partikolari biex tiġi identifikata mġiba evażiva sabiex din l-imġiba tiġi indirizzata fi stadju bikri. Fejn xieraq, il-Kummissjoni jenħtieġ li tipproponi miżuri biex tiġi indirizzata l-imġiba evażiva.

(7)

Biex jiġi żgurat il-funzjonament effettiv tal-EU ETS, li għandha tkun tinkludi l-emissjonijiet mit-trasport marittimu rilaxxati mill-1 ta’ Jannar 2024, dan ir-Regolament jenħtieġ li japplika minn dik id-data.

(8)

Il-miżuri previsti f’dan ir-Regolament huma skont l-opinjoni tal-Kumitat dwar it-Tibdil fil-Klima,