Riżoluzzjoni tal-Kunsill u tar-Rappreżentanti tal-Gvernijiet tal-Istati Membri, imlaqqgħin fil-Kunsill, dwar il-Pjan ta' Ħidma tal-Unjoni Ewropea għall-Isport

(1 ta' Lulju 2024 – 31 ta' Diċembru 2027)

(C/2024/3527)

IL-KUNSILL U R-RAPPREŻENTANTI TAL-GVERNIJIET TAL-ISTATI MEMBRI MLAQQGĦIN FIL-KUNSILL

FILWAQT LI JFAKKRU fl-Artikolu 6 tat-Trattat dwar il-Funzjonament tal-Unjoni Ewropea (TFUE), li jistabbilixxi li l-isport huwa qasam fejn l-azzjoni fil-livell tal-Unjoni Ewropea (UE) għandha tappoġġa, tikkoordina u tissupplimenta l-azzjonijiet tal-Istati Membri.

FILWAQT LI JFAKKRU fl-Artikolu 165 (1) TFUE, li skontu l-Unjoni għandha tikkontribwixxi għall-promozzjoni tal-kwistjonijiet Ewropej tal-isport, waqt li tieħu in kunsiderazzjoni n-natura speċifika tiegħu, l-istrutturi tiegħu bbażati fuq il-volontarjat u l-funzjoni soċjali u edukattiva tiegħu.

FILWAQT LI JFAKKRU fl-Artikolu 165 (2) TFUE, li skontu l-azzjoni tal-Unjoni għandha tkun immirata lejn l-iżvilupp tad-dimensjoni Ewropea fl-isport, billi tkun promossa l-ġustizzja u t-trasparenza fil-kompetizzjonijiet sportivi u l-kooperazzjoni bejn il-korpi responsabbli mill-isport, u billi tkun protetta l-integrità fiżika u morali tal-isportivi, speċjalment ta' dawk l-aktar żgħażagħ fosthom.

FILWAQT LI JIRRIKONOXXU li l-isport jista' jgħin għall-kisba tal-prijoritajiet politiċi ġenerali tal-UE, u b'mod partikolari l-miri ta' oqsma ta' politika oħra bħall-edukazzjoni, is-saħħa, iż-żgħażagħ, il-kultura, l-affarijiet soċjali, l-inklużjoni, l-ugwaljanza, l-ugwaljanza bejn il-ġeneri, l-iżvilupp urban u rurali, it-trasport, l-ambjent, it-turiżmu, l-impjiegi, l-innovazzjoni, is-sostenibbiltà, id-diġitalizzazzjoni u l-ekonomija; u li dawk l-oqsma ta' politika jistgħu jappoġġaw il-promozzjoni tal-isport abbażi ta' kooperazzjoni transsettorjali.

FILWAQT LI JISSOTTOLINJAW li, f'konformità mal-Aġenda 2030 tan-Nazzjonijiet Uniti għall-Iżvilupp Sostenibbli, l-isport huwa wkoll faċilitatur importanti tal-iżvilupp sostenibbli (1) u għalhekk jista' jgħin biex jintlaħqu l-Għanijiet ta' Żvilupp Sostenibbli (SDGs).

FILWAQT LI JIRRIKONOXXU l-Karta Ewropea tal-Isport Riveduta tal-Kunsill tal-Ewropa li għandha l-għan li tippermetti lil kull individwu jipparteċipa fl-isport u, b'mod partikolari, tiżgura li kulħadd ikollu l-opportunità li jieħu sehem fl-isport f'ambjent sikur, sigur u san (2).

FILWAQT LI JFAKKRU fir-riżoluzzjonijiet tal-Kunsill dwar il-Pjanijiet ta' Ħidma tal-Unjoni Ewropea għall-Isport 2011-2014 (3), 2014-2017 (4), 2017-2020 (5) u 2021-2024 (6).

FILWAQT LI JILQGĦU l-eżiti tal-implimentazzjoni tal-Pjan ta' Ħidma tal-UE għall-Isport 2021-2024, kif ukoll ir-rapport tal-Kummissjoni dwar l-implimentazzjoni u r-rilevanza tiegħu.

FILWAQT LI JINNOTAW ir-riżultati tal-Ewrobarometru Speċjali 525 dwar “l-isport u l-attività fiżika” (7), ir-rakkomandazzjonijiet tal-Grupp ta' Livell Għoli dwar l-Ugwaljanza bejn il-Ġeneri fl-Isport (8), l-eżiti tal-gruppi ta' esperti dwar l-isport ekoloġiku u dwar it-tisħiħ tal-irkupru u r-reżiljenza għall-kriżijiet tas-settur tal-isport matul u wara l-pandemija tal-COVID-19, kif ukoll il-ħidma li għaddejja fuq l-armonizzazzjoni tal-istatistika u d-data dwar l-isport fl-Unjoni Ewropea.

10.

FILWAQT LI JISSOTTOLINJAW l-isfidi globali li għandhom impatt ukoll fuq l-isport, bħall-pandemija reċenti tal-COVID-19, il-gwerra ta' aggressjoni tar-Russja fl-Ukrajna, u t-tensjonijiet ġeopolitiċi li jinfluwenzaw il-kompetizzjonijiet sportivi.

11.

FILWAQT LI JINNOTAW il-kawżi legali quddiem il-Qorti tal-Ġustizzja li qed iżidu l-viżibbiltà u r-rilevanza tad-dimensjoni Ewropea fl-isport.

12.

FILWAQT LI JILQĦU l-introduzzjoni tal-Azzjoni Ewlenija 1 taħt l-azzjonijiet sportivi tal-Erasmus+ relatati mal-mobbiltà tal-persunal li jaħdem f'organizzazzjonijiet sportivi, primarjament fl-isport għad-dilettanti, li jingħataw l-opportunità li jtejbu l-kompetenzi u l-kwalifiki tagħhom u jiksbu ħiliet ġodda billi jqattgħu perjodu ta' żmien barra mill-pajjiż.

13.

FILWAQT LI JIRRIKONOXXU l-ħtieġa għal kooperazzjoni kontinwa ma' istituzzjonijiet u korpi oħra tal-UE, mal-moviment sportiv u ma' partijiet interessati rilevanti oħra, kif ukoll ma' organizzazzjonijiet governattivi u mhux governattivi internazzjonali kompetenti, bħall-Kunsill tal-Ewropa (KtE), l-Organizzazzjoni Dinjija tas-Saħħa (WHO), l-Uffiċċju tan-Nazzjonijiet Uniti kontra d-Droga u l-Kriminalità (UNODC), l-Organizzazzjoni tan-Nazzjonijiet Uniti għall-Edukazzjoni, ix-Xjenza u l-Kultura (UNESCO) u l-Aġenzija Dinjija tal-Antidoping (WADA).

JISTABBILIXXU PJAN TA' ĦIDMA TAL-UNJONI EWROPEA GĦALL-ISPORT GĦALL-PERJODU

MILL-1 TA' LULJU 2024 SAL-31 TA' DIĊEMBRU 2027

14.

Il-Pjan ta' Ħidma tal-UE jiffoka fuq l-oqsma ta' prijorità li ġejjin:

—	L-integrità u l-valuri fl-isport.

—	Id-dimensjoni soċjoekonomika u dik sostenibbli tal-isport.

—	Il-parteċipazzjoni fl-isport u fl-attività fiżika li ttejjeb is-saħħa.

Is-suġġetti ewlenin, it-temi, il-miri, il-formati ta' ħidma, l-eżiti possibbli, id-dati fil-mira u r-responsabbiltajiet speċifiċi huma stabbiliti u spjegati fl-Annessi I u II ta' dan id-dokument.

15.

L-OBJETTIVI TA' GWIDA ta' dan il-Pjan ta' Ħidma tal-Unjoni Ewropea għall-Isport (minn hawn 'il quddiem, il-Pjan ta' Ħidma tal-UE) huma li:

F'termini tal-politika tal-UE dwar l-isport,

—	Isaħħu l-isport sikur, u l-isport ibbażat fuq l-integrità u l-valuri fl-UE.

—	Jappoġġaw politika għall-isport sostenibbli u bbażata fuq l-evidenza.

—	Iżidu l-parteċipazzjoni fl-isport u fl-attività fiżika li ttejjeb is-saħħa f'kull età u jtejbu l-aċċessibbiltà għal gruppi vulnerabbli, sabiex jiġu promossi stil ta' ħajja attiva u li ma jagħmilx ħsara lill-ambjent, il-koeżjoni soċjali u ċ-ċittadinanza attiva.

—	Jappoġġaw l-isport għad-dilettanti bbażat fuq il-volontarjat sabiex tiżdied tali parteċipazzjoni fl-isport u f'attività fiżika li ttejjeb is-saħħa.

—	Jappoġġaw, jesploraw aktar u jkomplu d-diskussjonijiet li għaddejjin dwar il-karatteristiċi ewlenin ta' Mudell Ewropew tal-Isport.

—	Isaħħu u jippromwovu governanza tajba fl-isport.

—	Jinkoraġġixxu l-investiment fis-settur tal-isport, inkluż f'infrastrutturi sportivi u f'infrastrutturi rikreattivi tal-isports li jkunu sostenibbli u aċċessibbli, inkluż bil-ħsieb li tiġi limitata l-impronta tal-karbonju tas-settur.

—	Jippromwovu, permezz ta' kooperazzjoni transsettorjali, is-sensibilizzazzjoni tat-turiżmu sportiv li jista' jkollu rwol ewlieni fl-iżvilupp sostenibbli tas-settur u fil-bini tar-reżiljenza tiegħu.

—	Jappoġġaw il-ħidma fuq l-innovazzjoni u d-diġitalizzazzjoni fl-isport bħala promotur għas-saħħa, għall-prestazzjoni, għall-iżvilupp ekonomiku u għas-settur tal-isport sostenibbli.

—	Isaħħu r-reżiljenza tas-settur tal-isport għal sfidi u kriżijiet futuri, wara l-esperjenza tal-pandemija tal-COVID-19.

—

Jiżguraw, permezz ta' kooperazzjoni transsettorjali, is-sensibilizzazzjoni ta' oqsma ta' politika oħra tal-UE dwar il-kontribut importanti li l-isport jista' jagħti għat-tkabbir soċjali u sostenibbli tal-Ewropa, għas-saħħa taċ-ċittadini Ewropej, u għall-kisba tal-SDGs, filwaqt li sadanittant jitqies ukoll l-impatt li politiki oħra tal-UE jista' jkollhom fuq is-settur tal-isport.

—	Jappoġġaw u jippermettu, kif xieraq, l-implimentazzjoni sħiħa tal-programm Erasmus+ fil-qasam tal-isport.

F'termini ta' governanza u kooperazzjoni,

—

Isaħħu l-applikazzjoni u l-implimentazzjoni tad-djalogu strutturat tal-UE dwar l-isport, f'konformità mar-Riżoluzzjoni tal-Kunsill tal-2017 u l-istrutturi ewlenin tiegħu (9):

a)	il-Forum tal-UE dwar l-Isport;

b)	id-djalogu strutturat ta' livell għoli tal-UE fil-marġini tal-laqgħa tal-Kunsill tal-UE;

c)	id-djalogu strutturat tal-UE fil-livell operazzjonali dwar l-isport fil-marġini tal-laqgħa tad-Diretturi tal-Isport tal-UE jew avvenimenti informali oħra tal-Presidenza.

—

Isaħħu d-dimensjoni internazzjonali tal-politika tal-UE dwar l-isport, speċjalment permezz ta' skambji u kollaborazzjoni dwar kwistjonijiet u sfidi attwali tal-politika dwar l-isport anke mal-gvernijiet u l-partijiet ikkonċernati barra mill-UE, u permezz ta' aktar kooperazzjoni mal-Kunsill tal-Ewropa.

—	Jiżguraw kontinwità u jipprovdu segwitu għall-erba' Pjanijiet ta' Ħidma għall-Isport tal-UE preċedenti u għal dokumenti oħra tal-UE relatati mal-isport, bħal konklużjonijiet u riżoluzzjonijiet tal-Kunsill.

—	Isaħħu l-iskambju tal-għarfien u l-esperjenza bejn l-Istati Membri tal-UE u l-Kummissjoni.

16.

Dan il-Pjan ta' Ħidma tal-UE huwa strument flessibbli. Bidliet jew emendi sussegwenti jistgħu jsiru neċessarji biex ikun hemm rispons f'waqtu għal żviluppi futuri jew mhux mistennija u għal kwistjonijiet urġenti fil-qasam tal-isport u l-attività fiżika, filwaqt li jittieħed kont tal-prijoritajiet ta' presidenzi futuri tal-Kunsill.

JISTIEDNU LILL-ISTATI MEMBRI BIEX

17.

Jimpenjaw ruħhom fl-implimentazzjoni ta' dan il-Pjan ta' Ħidma tal-UE u, fejn xieraq, jikkontribwixxu bl-għarfien espert u l-esperjenza tagħhom għad-diversi formati ta' ħidma.

18.

Jieħdu kont tal-għarfien u l-eżiti miksuba fl-implimentazzjoni ta' dan il-Pjan ta' Ħidma tal-UE meta jiżviluppaw politiki dwar l-isport jew politiki rilevanti oħra fil-livell nazzjonali u subnazzjonali, filwaqt li jirrispettaw il-prinċipju tas-sussidjarjetà u l-awtonomija tal-isport.

19.

Jinfurmaw, u fejn xieraq, jikkooperaw mal-moviment sportiv nazzjonali u ma' partijiet ikkonċernati rilevanti oħra dwar il-progress tal-implimentazzjoni ta' dan il-Pjan ta' Ħidma tal-UE u jxerrdu l-eżiti, sabiex jiżguraw ir-rilevanza u l-viżibbiltà tal-attivitajiet.

20.

Ixerrdu l-aspetti rilevanti tal-ħidma tal-Kunsill fir-rigward tal-moviment sportiv u l-partijiet ikkonċernati rilevanti sabiex jiġu żgurati r-rilevanza u l-viżibbiltà tal-attivitajiet tiegħu, kif ukoll biex jittejjeb is-segwitu għar-rakkomandazzjonijiet jew l-istediniet maħruġa mill-Kunsill għall-moviment sportiv u partijiet ikkonċernati oħra.

JISTIEDNU LILL-PRESIDENZI TAL-KUNSILL BIEX

21.

Jieħdu kont ta' dan il-Pjan ta' Ħidma tal-UE meta jiżviluppaw il-programm tagħhom, jippermettu skambju ta' informazzjoni dwar il-progress tal-implimentazzjoni tiegħu fil-Grupp ta' Ħidma dwar l-Isport u jibnu fuq l-eżiti diġà miksuba.

22.

Jikkunsidraw li jorganizzaw laqgħat, abbażi tad-djalogu strutturat tal-UE dwar l-isport, ma' rappreżentanti rilevanti tal-moviment sportiv u ma' partijiet ikkonċernati oħra tal-isport. Dan jista' jsir, pereżempju, billi tiġi skambjata informazzjoni dwar l-implimentazzjoni ta' dan il-Pjan ta' Ħidma tal-UE, inkluż dwar il-ħidma futura tal-Kunsill (pereżempju modi possibbli biex jingħata kontribut għad-dokumenti li jmiss tal-Kunsill), jiġu diskussi kwistjonijiet u sfidi attwali tal-politika dwar l-isport, kif ukoll billi jiġu esplorati ambizzjonijiet reċiproċi u tiġi pprovduta informazzjoni dwar il-prijoritajiet ippjanati tal-presidenzi li jmiss tal-Kunsill.

23.

Jużaw, fejn xieraq, l-eżiti, ir-riżultati tanġibbli u r-rakkomandazzjonijiet mill-formati ta' ħidma ta' dan il-Pjan ta' Ħidma biex jappoġġaw il-ħidma tagħhom u jagħtu viżibbiltà aħjar lill-attivitajiet tal-Kunsill u tal-Kummissjoni fil-qasam tal-isport.

24.

Fi tmiem it-terminu kopert minn din ir-riżoluzzjoni, u abbażi ta' rapport li għandu jitħejja mill-Kummissjoni, jipproponu Pjan ta' Ħidma tal-UE ġdid għall-perjodu li jmiss, jekk ikun xieraq.

JISTIEDNU LILL-KUMMISSJONI BIEX

25.

Tinvolvi, flimkien mal-Istati Membri, il-moviment sportiv u partijiet ikkonċernati rilevanti oħra, fl-implimentazzjoni ta' dan il-Pjan ta' Ħidma tal-UE u tappoġġa lill-Istati Membri bl-għarfien espert u l-esperjenza tagħha mis-setturi ta' politika rilevanti kollha, filwaqt li tiżgura sinerġiji fejn possibbli, f'konformità mal-Annessi I u II ta' din ir-Riżoluzzjoni.

26.

Tiżviluppa dokument strateġiku ġdid fit-tul dwar il-futur tal-politika tal-UE dwar l-isport, inkluż dwar il-promozzjoni tal-karatteristiċi ewlenin ta' Mudell Ewropew tal-Isport (10) u dwar l-integrazzjoni tal-isport f'politiki oħra tal-UE, sa tmiem l-2026.

27.

Fejn xieraq, tipproponi reviżjoni tad-dokumenti ta' politika eżistenti, bħar-rakkomandazzjoni tal-2013 tal-Kunsill dwar il-promozzjoni transsettorjali ta' attività fiżika favur is-saħħa (HEPA) (11).

28.

Tikkontribwixxi għal politiki bbażati fuq l-evidenza fl-UE u l-Istati Membri tagħha, b'mod partikolari permezz ta' appoġġ għall-organizzazzjoni ta' attivitajiet ta' tagħlim bejn il-pari, il-ħolqien ta' għodod oħra għall-iskambju ta' prattiki tajbin u data bejn l-Istati Membri u l-partijiet ikkonċernati rilevanti, u, fejn xieraq, permezz ta' studji u stħarriġ.

29.

Tkompli tinforma u tikkonsulta, fuq bażi regolari, lill-Istati Membri, il-moviment sportiv u partijiet ikkonċernati rilevanti oħra dwar inizjattivi li għaddejjin u ppjanati u opportunitajiet ta' finanzjament eżistenti fil-qasam tal-isport kif ukoll f'oqsma ta' politika oħra tal-UE rilevanti għall-isport.

30.

Tipprovdi lill-Istati Membri b'informazzjoni aġġornata, meta possibbli, dwar politiki u programmi oħra tal-UE u l-impatt potenzjali tagħhom fuq is-settur tal-isport, kif ukoll ħarsa ġenerali lejn il-proġetti Erasmus+ rilevanti għas-suġġetti ewlenin ta' dan il-Pjan ta' Ħidma.

31.

Tikkonsulta, fejn xieraq, lill-Istati Membri minn qabel dwar l-implimentazzjoni ta' inizjattivi speċifiċi tal-Pjan ta' Ħidma tal-UE, b'mod partikolari bil-ħsieb tal-monitoraġġ tal-progress tal-inizjattivi.

32.

Tikkunsidra metodi konġunti li abbażi tagħhom l-Istati Membri, il-Kummissjoni Ewropea u l-partijiet ikkonċernati rilevanti jistgħu jiltaqgħu u jissorveljaw l-implimentazzjoni tal-Pjan ta' Ħidma tal-UE, kif ukoll jimmonitorjaw il-progress u jiddiskutu kwistjonijiet ewlenin tal-politika dwar l-isport.

33.

Tippromwovi l-integrazzjoni tal-isport u l-attività fiżika f'oqsma oħra ta' politika tal-UE u tkompli tippromwovi s-sinerġiji bejn l-isport u politiki oħra tal-UE.

34.

Ixxerred l-għarfien u l-eżiti miksuba fl-implimentazzjoni ta' dan il-Pjan ta' Ħidma tal-UE sabiex jiġu żgurati r-rilevanza prattika u l-viżibbiltà tal-attivitajiet.

35.

Tikkunsidra li tipprovdi pjattaforma online biex jiġu aċċessati rapporti, jiġu skambjati prattiki tajba jew dokumenti rilevanti u tiġi ffaċilitata aktar il-kondiviżjoni tal-informazzjoni u n-networking bejn l-Istati Membri, inkluż bl-użu ta' għodod kollaborattivi tal-IT eżistenti.

36.

Tippreżenta, matul l-ewwel nofs tal-2027 u fuq il-bażi ta' kontributi volontarji mill-Istati Membri, il-moviment sportiv u partijiet ikkonċernati rilevanti, rapport dwar l-implimentazzjoni u r-rilevanza ta' dan il-Pjan ta' Ħidma tal-UE. Dan ir-rapport ser ikun il-bażi għat-tħejjija ta' Pjan ta' Ħidma suċċessur tal-UE matul it-tieni nofs tal-2027.

JISTIEDNU LILL-MOVIMENT SPORTIV U LIL PARTIJIET IKKONĊERNATI OĦRA BIEX

37.

Jaħdmu flimkien mal-Istati Membri u mal-Kummissjoni fl-implimentazzjoni ta' dan il-Pjan ta' Ħidma tal-UE, u jikkontribwixxu bl-għarfien espert u l-esperjenza tagħhom għad-diversi formati ta' ħidma.

38.

Ixerrdu l-eżiti miksuba fl-implimentazzjoni ta' dan il-Pjan ta' Ħidma tal-UE u jqisuhom fl-attivitajiet tagħhom stess.

(1) Nazzjonijiet Uniti, Assemblea Ġenerali, Riżoluzzjoni A/RES/70/1, Transforming our world: the 2030 Agenda for Sustainable Development, paragrafu 37, 25 ta' Settembru 2015.

(2) Ir-Rakkomandazzjoni CM/Rec(2021)5 dwar il-Karta Ewropea tal-Isport Riveduta. Adottata mill-Kumitat tal-Ministri fit-13 ta' Ottubru 2021 fl-1414-il laqgħa tal-Viċi Ministri, l-Artikolu 1(1)(b).

(3) ĠU C 162, 1.06.2011, p. 1.

(4) ĠU C 183, 14.06.2014, p. 12.

(5) ĠU C 189, 15.06.2017, p. 5.

(6) ĠU C 419, 4.12.2020, p. 1.

(7) Il-Kummissjoni Ewropea, Ewrobarometru Speċjali 525, “Sport u Attività Fiżika (2022)”, 2268/SP525, Rapport sħiħ, Settembru 2022.

(8) Il-Kummissjoni Ewropea, “Lejn Aktar Ugwaljanza bejn il-Ġeneri fl-Isport, Rakkomandazzjonijiet u Pjan ta' Azzjoni Mill-Grupp ta' Livell Għoli dwar l-Ugwaljanza bejn il-Ġeneri fl-Isport”, 2022.

(9) Ir-Riżoluzzjoni tal-Kunsill u tar-Rappreżentanti tal-Gvernijiet tal-Istati Membri, imlaqqgħin fil-Kunsill, dwar l-iżvilupp ulterjuri tad-Djalogu Strutturat tal-UE dwar l-isport, ĠU C 425, 12.12.2017, p. 1.

(10) Il-karatteristiċi ewlenin ta' Mudell Ewropew tal-Isport jinsabu fir-Riżoluzzjoni tal-Kunsill u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar il-karatteristiċi ewlenin tal-Mudell Ewropew tal-Isport, ĠU C 501, 13.12.2021, p. 1.

(11) Rakkomandazzjoni tal-Kunsill tas-26 ta' Novembru 2013 dwar il-promozzjoni transettorjali ta' attività fiżika favur is-saħħa, ĠU C 354, 4.12.2013, p. 1.

ANNESS I

Qasam ta' prijorità I: L-integrità u l-valuri fl-isport

Suġġett ewlieni

Tema

Mira

Format ta' ħidma

(poss.) Eżitu / data ppjanata

Mexxej(ja)

Ambjent sikur fl-isport (1)

Il-prevenzjoni tal-fastidju, l-abbuż u l-vjolenza, inkluż il-vjolenza sesswali u kwalunkwe forma ta' diskriminazzjoni

—	Sensibilizzazzjoni

—	Skambju tal-aħjar prattiki

—	Tisħiħ tal-għarfien

Kooperazzjoni mal-Kunsill tal-Ewropa: Proġett konġunt tal-UE “Balance S4 Strengthening the Safety and Service Pillars of the Saint Denis Convention”

2024-2025

Il-Kummissjoni, l-Istati Membri

Il-ġlieda kontra d-diskors ta' mibegħda

—	L-influwenza tal-media soċjali u l-prevenzjoni tal-abbuż verbali online

—	Il-manifestazzjonijiet ta' vjolenza verbali u fiżika matul l-avvenimenti sportivi

—	Sensibilizzazzjoni

—	Skambju tal-aħjar prattiki

—	Tisħiħ tal-għarfien

Grupp tal-MKK

Għandhom jiġu deċiżi

L-Istati Membri, il-Kummissjoni

Antidoping (2)

L-iżgurar tal-koordinazzjoni u l-kondiviżjoni tal-informazzjoni, b'mod partikolari fil-kuntest tal-laqgħat tal-WADA u tal-CAHAMA

—

It-tħejjija tal-pożizzjoni tal-UE u tal-Istati Membri tagħha għal-laqgħat tal-Kumitat Ewropew Ad Hocgħall-Aġenzija Dinjija tal-Antidoping (CAHAMA) u l-Aġenzija Dinjija tal-Antidoping (WADA) f'konformità mar-riżoluzzjoni tar-Rappreżentanti tal-Gvernijiet tal-Istati Membri, imlaqqgħin fil-Kunsill, li teżamina r-rappreżentazzjoni tal-Istati Membri tal-UE fil-Bord ta' Fondazzjoni tal-WADA u l-koordinazzjoni tal-pożizzjonijiet tal-Istati Membri qabel il-laqgħat tal-WADA (jew kwalunkwe dokument sussegwenti relatat magħhom). Fil-formulazzjoni ta' pożizzjoni, tfittex sinerġiji mal-Kunsill tal-Ewropa sabiex tevita xogħol doppju jew il-ħolqien ta' strutturi paralleli (3).

Il-Kunsill (appoġġat kif meħtieġ minn esperti) u l-CAHAMA

(poss.) Koordinazzjoni u pożizzjoni tal-UE

Il-presidenzi, il-Kummissjoni

—	Ir-rieżami tal-applikazzjoni tar-riżoluzzjoni tal-2023 u l-kunsiderazzjoni ta' jekk humiex meħtieġa xi aġġustamenti.

Il-Kunsill

It-tieni nofs tal-2025

Il-presidenza DK

Sport u edukazzjoni

—	Approċċ ġdid għar-rwol tal-isport fis-sistema edukattiva

—	Skambju tal-aħjar prattiki

—	Skambju ta' opinjonijiet

(Poss.) Konklużjonijiet tal-Kunsill u dibattitu ta' orjentazzjoni fil-Kunsill

L-ewwel nofs tal-2025

Il-presidenza PL

—	L-isport bħala qafas għal ħiliet personali, soċjali u ta' tagħlim u l-promozzjoni tat-tolleranza, is-solidarjetà u l-inklużività kif ukoll valuri sportivi u valuri oħra tal-UE (4)

—	Sensibilizzazzjoni

—	Skambju tal-aħjar prattiki

—	Tisħiħ tal-għarfien

Grupp ta' Stati Membri interessati (attività ta' tagħlim bejn il-pari) dwar modi innovattivi għall-promozzjoni tal-isport u l-attività fiżika fl-iskola

2025

—	Il-ħiliet u l-kwalifiki fl-isport: l-atleti u l-persunal, b'mod partikolari l-coaches

Grupp ta' Stati Membri interessati (attività ta' tagħlim bejn il-pari) dwar l-iżvilupp tal-kwalifiki tal-coaching

u l-edukazzjoni u

l-impatt multidimensjonali

fuq is-soċjetà

2025-2027 (għad irid jiġi kkonfermat)

—	Il-karrieri doppji tal-atleti (aċċess għall-edukazzjoni u l-impjiegi, kombinazzjoni ma' karriera sportiva)

—	Sensibilizzazzjoni

—	Skambju tal-aħjar prattiki

Studju

Grupp ta' Stati Membri interessati (attività ta' tagħlim bejn il-pari)

2024-2027

2026

Il-Kummissjoni

Ugwaljanza bejn il-ġeneri

—	Żieda fil-parteċipazzjoni tan-nisa, speċjalment fost il-coaches u f'pożizzjonijiet ta' tmexxija fl-organizzazzjonijiet sportivi u l-klabbs sportivi

—	Kundizzjonijiet ugwali (inkluż il-paga) ta' atleti, coaches, uffiċjali, persunal, eċċ. nisa u rġiel.

—	Żieda fil-kopertura mill-media tal-kompetizzjonijiet sportivi tan-nisa, il-ġlieda kontra l-isterjotipi, eċċ.

—	Segwitu għall-istudju tar-rapport tal-KE “Lejn aktar ugwaljanza bejn il-ġeneri fl-isport” u r-rakkomandazzjonijiet u l-pjan ta' azzjoni mill-Grupp ta' Livell Għoli dwar l-Ugwaljanza bejn il-Ġeneri fl-Isport (5)

—	Segwitu għall-konklużjonijiet tal-Kunsill u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar in-nisa u l-ugwaljanza fil-qasam tal-isport (2023) (6)

Kooperazzjoni mal-

Ftehim Parzjali Estiż

dwar l-Isports (EPAS) tal-

Kunsill tal-Ewropa: Proġett konġunt tal-UE “All In Plus”

2023-2025

Il-Kummissjoni

Sports Tradizzjonali

L-isports tradizzjonali jenfasizzaw ir-rwol tal-isport bħala parti mill-kultura, l-istorja u t-tradizzjonijiet tal-Ewropa, kif ukoll jappoġġaw il-koeżjoni soċjali, l-integrazzjoni, il-volontarjat u ċ-ċittadinanza attiva

—	Skambju tal-aħjar prattiki

—	Tisħiħ tal-għarfien

—	Sensibilizzazzjoni (pereżempju, l-enfasi fuq l-isport Ewropew fuq il-lista tal-UNESCO ta' Wirt Kulturali Intanġibbli)

Konklużjonijiet tal-Kunsill

It-tieni nofs tal-2026

Il-Presidenza IE

Mudell Ewropew tal-Isport

L-aċċess għall-kompetizzjonijiet, mertu sportiv, integrità, solidarjetà u valuri fl-isports

—	Tisħiħ tal-għarfien

—	Segwitu għar-riżoluzzjoni tal-Kunsill u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar il-karatteristiċi ewlenin tal-Mudell Ewropew tal-Isport (2021) (7) Segwitu għall-istudju dwar il-Mudell Ewropew tal-Isport (2022) (8)

Studju dwar l-iżviluppi, it-theddid u l-opportunitajiet futuri li għandhom impatt fuq il-Mudell Ewropew tal-Isport

2024-2027

Il-Kummissjoni, l-Istati Membri

Drittijiet tal-atleti

Id-drittijiet tal-atleti u l-kundizzjonijiet tax-xogħol, b'mod partikolari dawk relatati mal-parteċipazzjoni f'avvenimenti sportivi (pereżempju d-drittijiet tal-kummerċjalizzazzjoni, il-libertà tal-espressjoni, il-protezzjoni legali, in-nondiskriminazzjoni)

—	Sensibilizzazzjoni

—	Tisħiħ tal-għarfien

—	Analiżi tas-sitwazzjoni fattwali u legali

—	Segwitu għall-istudju tal-Kummissjoni (li għandu jiġi ppubblikat fl-ewwel semestru tal-2024)

Grupp tal-MKK

—

għad irid jiġi deċiż

L-Istati Membri, il-Kummissjoni

Żvilupp u promozzjoni tal-governanza tajba fl-isport

L-identifikazzjoni tal-ostakli relatati mal-governanza li għandhom jiġu indirizzati fl-isport

—	Skambju tal-aħjar prattiki

—	Tisħiħ tal-għarfien

Il-ġlieda kontra l-manipulazzjoni tal-kompetizzjonijiet sportivi

—	Il-Konvenzjoni tal-Kunsill tal-Ewropa dwar il-Manipulazzjoni tal-Kompetizzjonijiet Sportivi (“Konvenzjoni ta' Macolin”)

—	Analiżi ta' modi biex tiġi żblukkata s-sitwazzjoni fir-rigward tal-Konvenzjoni bil-ħsieb li l-UE u l-Istati Membri kollha tagħha jkunu jistgħu jlestu l-proċessi ta' ratifika rispettivi tagħhom u jaderixxu mal-Konvenzjoni

Il-Kunsill u l-kooperazzjoni mal-Kunsill tal-Ewropa

It-tieni nofs tal-2025

Il-presidenza DK,

il-Kummissjoni

—	It-tisħiħ tal-kooperazzjoni bejn l-istati membri fil-ġlieda kontra l-manipulazzjoni tal-kompetizzjonijiet sportivi

—	Skambju tal-aħjar prattiki

—	Tisħiħ tal-għarfien

Laqgħa tad-DĠ

It-tieni nofs tal-2025

Il-presidenza DK

Qasam ta' prijorità II: Id-dimensjoni soċjoekonomika u dik sostenibbli tal-isport

Suġġett ewlieni

Tema

Mira

Format ta' ħidma

(poss.) Eżitu / data ppjanata

Mexxej(ja)

Innovazzjoni u d-diġitalizzazzjoni

—	L-innovazzjoni fl-isport f'kull dimensjoni u fil-livelli kollha tas-settur tal-isport (inkluż il-klabbs sportivi lokali)

—	Skambju tal-aħjar prattiki

—	Tisħiħ tal-għarfien

—	Sensibilizzazzjoni

—	Segwitu għall-konklużjonijiet tal-Kunsill u tar-Rappreżentanti tal-Gvernijiet tal-Istati Membri, imlaqqgħin fil-Kunsill dwar l-Innovazzjoni fl-Isport (2021) (9)

Grupp ta' Stati Membri interessati (attività ta' tagħlim bejn il-pari) dwar id-diġitalizzazzjoni fl-isport ibbażat fuq l-evidenza

tfassil tal-politika

Għandhom jiġu deċiżi

—	L-iżvilupp tal-isport elettroniku

(Poss.) Grupp ta' Stati Membri interessati u/jew komunità tal-prattika skont SHARE 2.0

Għandhom jiġu deċiżi

L-Istati Membri, il-Kummissjoni

Sport sostenibbli

—	L-edukazzjoni għal sport sostenibbli

—	Prattika, faċilitajiet u avvenimenti sportivi li ma jagħmlux ħsara lill-ambjent

—	L-evoluzzjoni tal-isport u l-prattika tiegħu fid-dawl tat-tibdil fil-klima

—	Skambju tal-aħjar prattiki

—	Tisħiħ tal-għarfien

—	Sensibilizzazzjoni

—	Segwitu għall-konklużjonijiet tal-Kunsill u tar-Rappreżentanti tal-Gvernijiet tal-Istati Membri dwar “L-isport u l-attività fiżika, strumenti promettenti biex tinbidel l-imġiba favur l-iżvilupp sostenibbli” (2022) (10)

—	Follow-up to Sport's contribution to the European Green Deal – a sport sector playbook (2023) (11)

Grupp ta' Stati Membri interessati (attività ta' tagħlim bejn il-pari)

Għandhom jiġu deċiżi

Faċilitajiet sportivi sostenibbli u ppjanar spazjali

L-ippjanar, il-kostruzzjoni u l-manutenzjoni sostenibbli u aċċessibbli

—	Skambju tal-aħjar prattiki

—	Tisħiħ tal-għarfien

—	Sensibilizzazzjoni

—	Segwitu għall-Konklużjonijiet tal-Kunsill u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar infrastruttura sostenibbli u aċċessibbli tal-isport (2022) (12)

Komunità tal-prattika taħt SHARE 2.0

2024-2027

L-Istati Membri, il-Kummissjoni

It-turiżmu sportiv

It-turiżmu sportiv bħala xprunatur għall-iżvilupp sostenibbli

—	Skambju tal-aħjar prattiki

—	Tisħiħ tal-għarfien

—	Sensibilizzazzjoni

Grupp ta' Stati Membri interessati (attività ta' tagħlim bejn il-pari)

2026

(Poss.) Konklużjonijiet tal-Kunsill u/jew konferenza u/jew diskussjoni matul il-laqgħa tad-DĠ

L-ewwel nofs tal-2026

Il-presidenza CY

Avvenimenti sportivi kbar

Il-futur tal-Ewropa bħala ospitant ta' avvenimenti sportivi ewlenin, l-ippjanar sostenibbli u r-realizzazzjoni u l-wirt ta' avvenimenti sportivi ewlenin għall-bliet u r-reġjuni

Skambju tal-aħjar prattiki

Konklużjonijiet tal-Kunsill dwar il-wirt ta' avvenimenti sportivi ewlenin

It-tieni nofs tal-2024

Il-presidenza HU

Laqgħa tad-DĠ

Lulju 2024

Il-presidenza HU

Konferenza ta' livell għoli

Settembru 2024

Il-presidenza HU

Grupp ta' Stati Membri interessati (jekk mogħtija lil Franza: minn Albertville 1992 sal-Olimpijadi tax-Xitwa tal-Alpi Franċiżi tal-2030, illustrazzjoni ta' wirt sostenibbli ta' avveniment sportiv ewlieni)

2027

Tfassil tal-politika u investimenti fl-isport

—	Il-kontribut tal-isport għall-iżvilupp reġjonali

—	Possibbiltajiet għall-użu ta' programmi ta' finanzjament tal-UE

—	Redditu soċjali fuq l-investimenti fl-isport (SROI)

—	Analiżi tas-sitwazzjoni

—	Skambju tal-aħjar prattiki

—	Tisħiħ tal-għarfien

Grupp ta' Stati Membri interessati (attività ta' tagħlim bejn il-pari dwar “l-inkoraġġiment tal-isport permezz tas-sistema tat-taxxa”)

It-tieni nofs tal-2025

—	Politiki bbażati fuq l-evidenza

—	Skambju tal-aħjar prattiki dwar kontijiet satellita għall-isport ibbażat fuq ir-Rapport tal-Kummissjoni (13)

Rapporti nazzjonali fuq bażi kompletament volontarja

2024-2027

L-Istati Membri

Riċerka u statistika dwar l-isport

—	Skambju tal-aħjar prattiki

—	Tisħiħ tal-għarfien

Konferenza jew seminar

L-ewwel nofs tal-2025

Il-presidenza PL

It-tisħiħ tar-reżiljenza tas-settur tal-isport

—	Ir-reżiljenza tal-isport għad-dilettanti: sostenibbiltà finanzjarja u ambjentali, it-tisħiħ tal-volontarjat, il-ġestjoni tar-riskju.

—	Ir-rwol tal-awtoritajiet pubbliċi

—	Opportunitajiet ta' finanzjament (SHARE 2.0)

—	Analiżi tas-sitwazzjoni

—	Skambju tal-aħjar prattiki

—	Żvilupp ta' strateġija

Studju

2024-2027

Il-Kummissjoni

Qasam ta' prijorità III: Parteċipazzjoni fl-isport u fl-attività fiżika li ttejjeb is-saħħa

Suġġett ewlieni

Tema

Mira

Format ta' ħidma

(poss.) Eżitu / data ppjanata

Mexxej(ja)

Il-ħolqien ta' opportunitajiet adegwati għall-isport u l-attività fiżika għall-ġenerazzjonijiet kollha

—	Sfidi u theddid kontemporanji li jammontaw għat-tnaqqis fil-livell tal-kundizzjoni tas-saħħa tat-tfal u ż-żgħażagħ

—	Skambju tal-aħjar prattiki

—	Tisħiħ tal-għarfien

—	Segwitu għall-konklużjonijiet tal-Kunsill u tar-Rappreżentanti tal-Gvernijiet tal-Istati Membri, imlaqqgħin fil-Kunsill, dwar l-attività fiżika tul il-ħajja (2021) (14)

Dibattitu matul il-laqgħa tad-DĠ

L-ewwel nofs tal-2025

Il-presidenza PL

—	L-iżvilupp tal-isport fuq il-post tax-xogħol

Grupp ta' Stati Membri interessati (attività ta' tagħlim bejn il-pari)

2025

—	It-tixjiħ attiv

(Poss.) Konklużjonijiet tal-Kunsill u/jew dibattitu matul il-laqgħa tad-DĠ u/jew dibattitu tal-Kunsill

L-ewwel nofs tal-2026

Il-presidenza CY

Promozzjoni

tal-attività fiżika

—	Attività fiżika tul il-ħajja

—	Kooperazzjoni transsettorjali mal-istituzzjonijiet rilevanti (pereżempju mal-iskejjel)

—	Ir-rwol tal-media u l-media soċjali

—	It-tisħiħ tal-volontarjat

—	Sensibilizzazzjoni

—	Tisħiħ tal-għarfien

—	Skambju tal-aħjar prattiki

(Poss.) Dibattitu matul il-laqgħa tad-DĠ

Lulju 2024

Il-presidenza HU

(Poss.) Reviżjoni tar-rakkomandazzjoni tal-Kunsill dwar il-promozzjoni ta' attività fiżika li ttejjeb is-saħħa fis-setturi kollha (HEPA) (2013) (15)

Għandhom jiġu deċiżi

Il-Kummissjoni, il-Presidenzi, in-Network ta' Punti Fokali tal-HEPA

Is-saħħa mentali u l-benesseri fl-isport

Il-promozzjoni tal-benefiċċji tal-isport għas-saħħa mentali u l-benesseri u l-prevenzjoni għall-atleti

Grupp tal-MKK

Għandhom jiġu deċiżi

L-Istati Membri, il-Kummissjoni

(Poss.) Dibattitu matul il-laqgħa tad-DĠ u/jew konferenza u/jw dibattitu tal-Kunsill

L-ewwel nofs tal-2026

Il-presidenza CY

(1) Artikolu 165(2) TFUE: “L-azzjoni tal-Unjoni għandha tkun immirata lejn (…) l-iżvilupp tad-dimensjoni Ewropea fl-isport, (…) billi tkun protetta l-integrità fiżika u morali tal-isportivi, speċjalment ta' dawk l-aktar żgħażagħ fosthom”.

(2) Artikolu 165(2) TFUE: “L-azzjoni tal-Unjoni għandha tkun immirata lejn (…) l-iżvilupp tad-dimensjoni Ewropea fl-isport, billi tkun promossa l-ġustizzja u t-trasparenza fil-kompetizzjonijiet sportivi (…)”.

(3) Ir-Riżoluzzjoni tar-Rappreżentanti tal-Gvernijiet tal-Istati Membri, imlaqqgħin fi ħdan il-Kunsill, li teżamina r-rappreżentazzjoni tal-Istati Membri tal-UE fil-Bord ta' Fondazzjoni tal-WADA u l-koordinazzjoni tal-pożizzjonijiet tal-Istati Membri qabel il-laqgħa tal-WADA, ĠU C 185, 26.5.2023, p. 29.

(4) L-Artikolu 165(1) TFUE: “L-Unjoni għandha tikkontribwixxi għat-tmexxija 'l quddiem tal-kwistjonijiet Ewropej tal-Isports, waqt li tieħu inkunsiderazzjoni (…) l-funzjoni soċjali u edukattiva tiegħu.”

(5) Il-Kummissjoni Ewropea, “Lejn aktar ugwaljanza bejn il-ġeneri fl-isport”, Rakkomandazzjonijiet u Pjan ta' Azzjoni Mill-Grupp ta' Livell Għoli dwar l-Ugwaljanza bejn il-Ġeneri fl-Isport, 2022.

(6) Il-Konklużjonijiet tal-Kunsill u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar in-nisa u l-ugwaljanza fil-qasam tal-isport, ĠU C, C/2023/1362, 1.12.2023.

(7) Riżoluzzjoni tal-Kunsill u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar il-karatteristiċi ewlenin tal-Mudell Ewropew tal-Isport, ĠU C 501, 13.12.2021, p. 1.

(8) Il-Kummissjoni Ewropea, Sennett, J., Le Gall, A., Kelly, G. et al., “Study on the European Sport Model – A report to the European Commission”, l-Uffiċċju tal-Pubblikazzjonijiet tal-Unjoni Ewropea, 2022.

(9) Konklużjonijiet tal-Kunsill u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar l-Innovazzjoni fl-Isport, ĠU C 212, 4.6.2021, p. 2.

(10) Il-Konklużjonijiet tal-Kunsill u tar-Rappreżentanti tal-Gvernijiet tal-Istati Membri dwar “L-isport u l-attività fiżika, strumenti promettenti biex tinbidel l-imġiba favur l-iżvilupp sostenibbli”, ĠU C 170, 25.4.2022, p. 1.

(11) Il-Kummissjoni Ewropea, “Sport's contribution to the European Green Deal – a sport sector playbook”, Uffiċċju tal-Pubblikazzjonijiet tal-Unjoni Ewropea, Rapport sħiħ, Settembru 2023.

(12) Il-Konklużjonijiet tal-Kunsill dwar infrastruttura sostenibbli u aċċessibbli tal-isport, ĠU C 494, 28.12.2022, p. 1.

(13) Il-Kummissjoni Ewropea, id-Direttorat Ġenerali għall-Edukazzjoni, iż-Żgħażagħ, l-Isport u l-Kultura, “Study on the economic impact of sport through sport satellite accounts”, l-Uffiċċju tal-Pubblikazzjonijiet, 2018; l-istudju li jmiss tal-Kummissjoni Ewropea biex jiġu armonizzati l-metodoloġiji u d-definizzjonijiet eżistenti dwar l-istatistika tal-isport biex b'hekk titwitta wkoll it-triq lejn Kont Satellita Ewropew għall-Isport futur possibbli, mistenni li jiġi ppubblikat fl-2025.

(14) Il-konklużjonijiet tal-Kunsill dwar l-attività fiżika tul il-ħajja, ĠU C 501 I, 13.12.2021, p. 1.

(15) Rakkomandazzjoni tal-Kunsill tas-26 ta' Novembru 2013 dwar il-promozzjoni transettorjali ta' attività fiżika favur is-saħħa, ĠU C 354, 4.12.2013, p. 1.