REGOLAMENT TA’ IMPLIMENTAZZJONI TAL-KUMMISSJONI (UE) 2024/203

tat-18 ta’ Diċembru 2023

li jistabbilixxi l-format li għandu jintuża għar-rapportar ta’ irregolaritajiet li jikkonċernaw il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) skont ir-Regolament (UE) 2021/691 tal-Parlament Ewropew u tal-Kunsill

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2021/691 tal-Parlament Ewropew u tal-Kunsill tat-28 ta’ April 2021 dwar il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) u li jħassar ir-Regolament (UE) Nru 1309/2013 (1), u b’mod partikolari l-Artikolu 23(7) tiegħu,

Wara li kkonsultat lill-Kumitat tal-FEG stabbilit bl-Artikolu 26 tar-Regolament (UE) 2021/691,

Billi:

(1)

L-Istati Membri huma meħtieġa li jirrapportaw lill-Kummissjoni l-irregolaritajiet li jikkonċernaw il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) skont l-Artikolu 23(1), it-tieni subparagrafu, tar-Regolament (UE) 2021/691, u f’konformità mar-Regolament Delegat tal-Kummissjoni (UE) 2024/204 (2).

(2)

L-interessi finanzjarji tal-Unjoni jenħtieġ li jiġu protetti bl-istess mod irrispettivament mill-fondi użati biex jintlaħqu l-objettivi li għalihom ikunu ġew stabbiliti l-fondi. Għal dak l-għan, l-Artikolu 23(7) tar-Regolament (UE) 2021/691 jagħti s-setgħa lill-Kummissjoni biex tadotta regoli ta’ implimentazzjoni li jistabbilixxu l-format li għandu jintuża għar-rapportar mill-Istati Membri ta’ irregolaritajiet relatati mal-finanzjament tal-FEG. Jenħtieġ li tali regoli jkunu ekwivalenti għar-regoli dettaljati dwar ir-rapportar ta’ irregolaritajiet stabbiliti fl-Anness XII, it-Taqsima 2, tar-Regolament (UE) 2021/1060 tal-Parlament Ewropew u tal-Kunsill (3), u f’konformità mar-regoli stabbiliti fir-Regolament ta’ Implimentazzjoni tal-Kummissjoni (UE) 2024/206 (4).

(3)

Sabiex jiġu żgurati analiżi effiċjenti u ġestjoni ġenerali tal-każijiet ta’ irregolaritajiet skont it-tifsira tal-Artikolu 3(4) tar-Regolament (UE) 2021/691, l-Istati Membri huma meħtieġa jippreżentaw lill-Kummissjoni l-informazzjoni rilevanti kollha dwar l-irregolaritajiet li għandhom jiġu rrapportati skont l-Artikolu 23(1) tar-Regolament (UE) 2021/691 u f’konformità mar-Regolament Delegat (UE) 2024/204 b’mod strutturat. Sabiex jiġu protetti l-interessi finanzjarji tal-Unjoni, huwa meħtieġ li jiġu stabbiliti kundizzjonijiet uniformi għall-istruttura ta’ dik l-informazzjoni, b’mod partikolari dwar il-format tagħha.

(4)

Sabiex jinkisbu l-benefiċċji massimi mill-użu ta’ mezzi elettroniċi għall-iskambju ta’ informazzjoni filwaqt li tiġi ppreservata s-sigurtà tal-iskambji, jenħtieġ li l-Istati Membri jużaw is-Sistema ta’ Ġestjoni tal-Irregolaritajiet (Irregularity Management System, IMS) dedikata għan-notifika tal-irregolaritajiet.

(5)	L-Istati Membri u l-Kummissjoni jenħtieġ li jiżguraw li t-trasferiment ta’ data permezz tal-IMS jitwettaq b’mod sigur li jippermetti d-disponibbiltà, l-integrità, l-awtentiċità, u l-kunfidenzjalità ta’ informazzjoni.

(6)

L-użu tal-euro bħala l-unika munita għar-rapportar ta’ irregolaritajiet huwa meħtieġ biex tiġi żgurata l-komparabbiltà tal-informazzjoni rrapportata. Fir-rigward tal-Istati Membri li ma adottawx l-euro bħala l-munita tagħhom, huwa meħtieġ li tiġi ddeterminata r-rata tal-kambju li għandha tintuża biex l-ammonti kkonċernati jiġu kkonvertiti f’euro u r-rata tal-kambju għall-konverżjoni tan-nefqa li ma tkunx ġiet irreġistrata fil-kontijiet tal-awtorità responsabbli.

(7)

Peress li diġà setgħu seħħew irregolaritajiet fir-rapportar u huwa fl-interess tal-Unjoni li jiġu indirizzati tali irregolaritajiet, jenħtieġ li dan ir-Regolament japplika immedjatament. Għalhekk jenħtieġ li jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(8)	Il-Kontrollur Ewropew għall-Protezzjoni tad-Data ġie kkonsultat dwar dan ir-Regolament f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (5),

ADOTTAT DAN IR-REGOLAMENT:

Artikolu 1

Suġġett

Dan ir-Regolament jistabbilixxi l-format li għandu jintuża mill-Istati Membri għar-rapportar ta’ irregolaritajiet skont l-Artikolu 23(1), it-tieni subparagrafu, tar-Regolament (UE) 2021/691.

Artikolu 2

Format tar-rapportar

1. L-informazzjoni msemmija fl-Artikolu 3 tar-Regolament Delegat (UE) 2024/204 għandu jintbagħat lill-Kummissjoni b’mezzi elettroniċi, bl-użu tas-Sistema ta’ Ġestjoni tal-Irregolaritajiet (IMS) dedikata.

2. L-Istati Membri għandhom jibagħtu lill-Kummissjoni r-rapport inizjali dwar l-irregolaritajiet imsemmija fl-Artikolu 3(3) tar-Regolament Delegat (UE) 2024/204 mingħajr dewmien wara li jiġu skoperti l-irregolaritajiet.

3. L-Istati Membri għandhom jibagħtu r-rapporti ta’ segwitu lill-Kummissjoni skont l-Artikolu 3(5) u (6) tar-Regolament Delegat (UE) (UE) 2024/204 mingħajr dewmien wara li tinkiseb l-informazzjoni rilevanti.

Artikolu 3

L-użu tal-euro

1. L-ammonti rrapportati mill-Istati Membri għandhom jiġu indikati f’euro.

2. L-Istati Membri li ma jkunux adottaw l-euro bħala l-munita tagħhom sad-data meta r-rapport jiġi sottomess skont l-Artikolu 3 tar-Regolament Delegat (UE) 2024/204 għandhom jikkonvertu l-ammonti fil-munita nazzjonali f’euro billi jużaw r-rata tal-kambju tal-kontabbiltà ta’ kull xahar tal-Kummissjoni fix-xahar li matulu n-nefqa tkun irreġistrata fis-sistemi kontabilistiċi tal-awtorità kompetenti. Meta n-nefqa ma tkunx ġiet irreġistrata fil-kontijiet tal-awtorità kompetenti, l-aktar rata tal-kambju reċenti tal-kontabbiltà ta’ kull xahar, ippubblikata elettronikament mill-Kummissjoni fil-mument tar-rapportar inizjali, għandha tintuża għall-konverżjoni f’euro tal-ammonti fil-munita nazzjonali.

Artikolu 4

Dħul fis-seħħ

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-18 ta’ Diċembru 2023.

Għall-Kummissjoni

Il-President

Ursula VON DER LEYEN

(1) ĠU L 153, 3.5.2021, p. 48.

(2) Ir-Regolament Delegat tal-Kummissjoni (UE) 2024/204 tat-18 ta’ Diċembru 2023 li jissupplimenta r-Regolament (UE) 2021/691 tal-Parlament Ewropew u tal-Kunsill b’dispożizzjonijiet speċifiċi dwar ir-rapportar ta’ irregolaritajiet li jikkonċernaw il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) (OJ L, 2024/204, 29.2.2024, ELI: http://data.europa.eu/eli/reg_del/2024/204/oj).

(3) Ir-Regolament (UE) 2021/1060 tal-Parlament Ewropew u tal-Kunsill tal-24 ta’ Ġunju 2021 li jistipula dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew Plus, il-Fond ta’ Koeżjoni, il-Fond għal Tranżizzjoni Ġusta u l-Fond Ewropew għall-Affarijiet Marittimi, is-Sajd u l-Akkwakultura u r-regoli finanzjarji għalihom u għall-Fond għall-Ażil, il-Migrazzjoni u l-Integrazzjoni, il-Fond għas-Sigurtà Interna u l-Istrument għall-Appoġġ Finanzjarju għall-Ġestjoni tal-Fruntieri u l-Politika dwar il-Viżi (ĠU L 231, 30.6.2021, p. 159).

(4) Ir-Regolament ta’ Implimentazzjoni tal-Kummissjoni (UE) 2024/206 tat-18 ta’ Diċembru 2023 li jistabbilixxi l-frekwenza u l-format tar-rapportar ta’ irregolaritajiet li jikkonċernaw il-Fond Agrikolu Ewropew ta’ Garanzija u l-Fond Agrikolu Ewropew għall-Iżvilupp Rurali, skont ir-Regolament (UE) 2021/2116 tal-Parlament Ewropew u tal-Kunsill, u li jħassar ir-Regolament tal-Kummissjoni (UE) 2015/1975 (ĠU L, 2024/206, 29.2.2024, ELI: http://data.europa.eu/eli/reg_impl/2024/206/oj).

(5) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).