(1)

Fit-23 ta’ Mejju 2022, il-Kunsill awtorizza lill-Kummissjoni tiftaħ negozjati dwar konvenzjoni dwar l-effetti internazzjonali tal-bejgħ ġudizzjarju ta’ bastimenti. Dawn in-negozjati ġew konklużi bl-adozzjoni tat-test tal-Konvenzjoni tan-Nazzjonijiet Uniti dwar l-Effetti Internazzjonali tal-Bejgħ Ġudizzjarju ta’ Bastimenti (“il-Konvenzjoni”) mill-Assemblea Ġenerali tan-Nazzjonijiet Uniti fi New York fis-7 ta’ Diċembru 2022.

(2)

Il-Konvenzjoni ssaħħaħ il-qafas legali internazzjonali eżistenti dwar it-tbaħħir u n-navigazzjoni u tagħti kontribut utli għall-iżvilupp ta’ relazzjonijiet ekonomiċi internazzjonali armonjużi. Għalhekk huwa preferibbli li l-Konvenzjoni tiġi applikata mill-aktar fis possibbli.

(3)

L-Unjoni qed tiżviluppa kooperazzjoni ġudizzjarja f’materji ċivili b’implikazzjonijiet transfruntiera abbażi tal-prinċipju tar-rikonoxximent reċiproku tas-sentenzi u tad-deċiżjonijiet f’każijiet extraġudizzjarji. F’dak il-kuntest, il-leġiżlatur tal-Unjoni adotta, fost l-oħrajn, ir-Regolamenti (UE) Nru 1215/2012 (1) u (UE) 2020/1784 (2) tal-Parlament Ewropew u tal-Kunsill. L-Unjoni għalhekk għandha kompetenza esklużiva fuq il-materji koperti minn dawk ir-Regolamenti, filwaqt li l-materji l-oħra koperti mill-Konvenzjoni ma jaqgħux taħt dik il-kompetenza.

(4)

L-Artikolu 18(1) tal-Konvenzjoni jipprevedi li l-Organizzazzjonijiet Reġjonali għall-Integrazzjoni Ekonomika li għandhom kompetenza fuq ċerti materji rregolati mill-Konvenzjoni jistgħu jiffirmaw, jaċċettaw, japprovaw jew jaderixxu ma’ dik il-Konvenzjoni.

(5)

L-Artikolu 18(2) tal-Konvenzjoni jipprevedi li l-Organizzazzjoni Reġjonali għall-Integrazzjoni Ekonomika trid tagħmel dikjarazzjoni li tispeċifika l-materji regolati minn dik il-Konvenzjoni li fir-rigward tagħhom l-Istati membri tagħha jkunu ttrasferew il-kompetenza lil dik l-organizzazzjoni. L-Artikolu 20(1) tal-Konvenzjoni jipprevedi li dik id-dikjarazzjoni ssir fil-mument tal-iffirmar, ir-ratifika, l-aċċettazzjoni, l-approvazzjoni jew l-adeżjoni. Għaldaqstant, jenħtieġ li l-Unjoni tagħmel tali dikjarazzjoni fil-mument tal-iffirmar tal-Konvenzjoni.

(6)

Jenħtieġ lil-Konvenzjoni tiġi ffirmata f’isem l-Unjoni, soġġett għall-konklużjoni tagħha f’data aktar tard u jenħtieġ li d-Dikjarazzjoni mehmuża tiġi approvata.

(7)

F’konformità mal-Artikoli 1 u 2 tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, u mingħajr preġudizzju għall-Artikolu 4 ta’ dak il-Protokoll, l-Irlanda mhix qed tieħu sehem fl-adozzjoni ta’ din id-Deċiżjoni u mhix marbuta bih jew suġġetta għall-applikazzjoni tiegħu.

(8)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhix qed tieħu sehem fl-adozzjoni ta’ din id-Deċiżjoni u mhix marbuta biha jew suġġetta għall-applikazzjoni tagħha.