(1)

Id-Direttiva tal-Kummissjon 2007/52/KE (2) daħħlet l-ethoprophos bħala sustanza attiva fl-Anness I tad-Direttiva tal-Kunsill 91/414/KEE. (3)

(2)

Is-sustanzi attivi li hemm fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u qegħdin elenkati fil-Parti A tal-Anness tar-Regolament ta' Implimentazzjoni tal-Kummissjoni (UE) Nru 540/2011 (4).

(3)

Kif stabbilit fil-Parti A tal-Anness tar-Regolament ta' Implimentazzjoni (UE) Nru 540/2011, l-approvazzjoni tas-sustanza attiva ethoprophos tiskadi fil-31 ta' Lulju 2019.

(4)

Ġiet ippreżentata applikazzjoni għat-tiġdid tal-approvazzjoni tal-ethoprophos skont l-Artikolu 1 tar-Regolament ta' Implimentazzjoni tal-Kummissjoni (UE) Nru 844/2012 (5) fil-perjodu taż-żmien previst f'dak l-Artikolu.

(5)

L-applikant ippreżenta d-dossiers supplimentari meħtieġa skont l-Artikolu 6 tar-Regolament ta' Implimentazzjoni (UE) Nru 844/2012. L-Istat Membru relatur sab li l-applikazzjoni kienet kompluta.

(6)

L-Istat Membru relatur ħejja rapport ta' valutazzjoni tat-tiġdid b'konsultazzjoni mal-Istat Membru korelatur u ppreżentah lill-Awtorità Ewropea dwar is-Sigurtà fl-Ikel (minn hawn 'il quddiem “l-Awtorità”) u lill-Kummissjoni fil-15 ta' Frar 2017.

(7)

L-Awtorità bagħtet ir-rapport ta' valutazzjoni tat-tiġdid lill-applikanti u lill-Istati Membri għall-kummenti tagħhom, u għaddiet il-kummenti li rċeviet lill-Kummissjoni. L-Awtorità ppubblikat ukoll is-sommarju tal-fajl addizzjonali.

(8)

Fit-18 ta' Mejju 2018, l-Awtorità bagħtet lill-Kummissjoni l-konklużjoni tagħha (6) dwar jekk jistax ikun mistenni li l-ethoprophos jissodisfa l-kriterji ta' approvazzjoni previsti fl-Artikolu 4 tar-Regolament (KE) Nru 1107/2009.

(9)

L-Awtorità identifikat tħassib speċifiku. B'mod partikolari, ma kienx possibbli li tintlaħaq konklużjoni dwar il-potenzjal ġenotossiku tal-ethoprophos u għalhekk ma setgħux jiġu stabbiliti valuri ta' referenza bbażati fuq is-saħħa. Għaldaqstant, il-valutazzjonijiet tar-riskji għall-konsumaturi u l-valutazzjonijiet tar-riskji mhux dijetetiċi ma setgħux jitwettqu. Barra minn hekk, ġie identifikat riskju akut għoli għall-għasafar u riskju għoli għall-artropodi mhux fil-mira li jgħixu fil-ħamrija u għall-organiżmi tal-ħamrija mill-użu tal-ethoprophos. Barra minn hekk, l-Awtorità kkonkludiet li diversi oqsma tal-valutazzjoni tar-riskju ma setgħux jiġu ffinalizzati inkluż il-valutazzjoni tal-konsumatur fir-rigward tar-residwi fl-ikel li joriġina mill-pjanti u mill-annimali, il-valutazzjoni tan-newrotossiċità tal-iżvilupp, il-valutazzjoni tal-esponiment tal-ilma ta' taħt l-art, ir-riskju fit-tul għall-għasafar, il-valutazzjoni ta' avvelenament sekondarju għall-għasafar u għall-mammiferi, ir-riskju għall-organiżmi tal-ħamrija mill-esponiment għall-metaboliti tal-ethoprophos u r-riskju għall-ħniex. Fl-aħħar nett, l-Awtorità kkonkludiet li ma setgħetx tiġi konkluża l-valutazzjoni tal-interferent endokrinali potenzjali tal-ethoprophos.

(10)

Il-Kummissjoni stiednet lill-applikant biex iressaq il-kummenti tiegħu dwar il-konklużjoni tal-Awtorità u, f'konformità mat-tielet subparagrafu tal-Artikolu 14(1) tar-Regolament ta' Implimentazzjoni (UE) Nru 844/2012, dwar l-abbozz tar-rapport ta' tiġdid. L-applikant ressaq il-kummenti tiegħu, li ġew eżaminati bir-reqqa.

(11)

Madankollu, minkejja l-argumenti mressqa mill-applikant, it-tħassib relatat mas-sustanza attiva ma setax jiġi eliminat.

(12)

B'konsegwenza ta' dan, fir-rigward ta' użu rappreżentattiv wieħed jew aktar ta' mill-inqas prodott wieħed għall-protezzjoni tal-pjanti li fih l-ethoprophos, ma ġiex stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati. Għalhekk, jixraq li ma tiġġeddidx l-approvazzjoni tas-sustanza attiva ethoprophos f'konformità mal-Artikolu 20(1)(b) ta' dak ir-Regolament.

(13)

Għalhekk, ir-Regolament ta' Implimentazzjoni (UE) Nru 540/2011 jenħtieġ li jiġi emendat skont dan.

(14)

Jenħtieġ li l-Istati Membri jingħataw żmien biżżejjed biex jirtiraw l-awtorizzazzjonijiet tal-prodotti għall-protezzjoni tal-pjanti li fihom l-ethoprophos.

(15)

Rigward il-prodotti għall-protezzjoni tal-pjanti li fihom l-ethoprophos, meta l-Istati Membri jagħtu xi perjodu ta' grazzja f'konformità mal-Artikolu 46 tar-Regolament (KE) Nru 1107/2009, dan il-perjodu jenħtieġ li jiskadi sa mhux aktar tard mill-21 ta' Marzu 2020.

(16)

Ir-Regolament ta' Implimentazzjoni tal-Kummissjoni (UE) 2018/917 (7) estenda l-perjodu ta' approvazzjoni tal-ethoprophos sal-31 ta' Lulju 2019 sabiex il-proċess ta' tiġdid ikun jista' jitlesta qabel ma tiskadi l-approvazzjoni ta' dik is-sustanza. Madankollu, billi ttieħdet deċiżjoni dwar in-nuqqas ta' tiġdid tal-approvazzjoni qabel din id-data ta' skadenza estiża, jenħtieġ li dan ir-Regolament japplika minnufih.

(17)

Dan ir-Regolament ma jipprevenix il-preżentazzjoni ta' applikazzjoni oħra għall-approvazzjoni tal-ethoprophos skont l-Artikolu 7 tar-Regolament (KE) Nru 1107/2009.

(18)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,