(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni tal-L-valina prodotta mill-Escherichia coli CCTCC M2020321 bħala addittiv fl-għalf għall-ispeċijiet kollha tal-annimali. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) ta’ dak ir-Regolament.

(3)

L-applikazzjoni tikkonċerna l-awtorizzazzjoni tal-L-valina prodotta mill-Escherichia coli CCTCC M2020321 bħala addittiv fl-għalf għall-ispeċijiet kollha tal-annimali, biex tiġi kklassifikata fil-kategorija tal-addittivi “addittivi nutrittivi”, u fil-grupp funzjonali “aċidi amminiċi, l-imlieħ u l-analogi tagħhom”.

(4)

Fl-opinjoni tagħha tas-27 ta’ Jannar 2022 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, bil-kundizzjonijiet tal-użu proposti, l-valina prodotta mill-Escherichia coli CCTCC M2020321, meta tissupplimenta d-dieta b’ammonti xierqa, ma għandhiex effetti negattivi fuq is-saħħa tal-annimali, fuq is-saħħa tal-konsumaturi jew fuq l-ambjent. Rigward is-sikurezza tal-addittiv għall-utenti, l-Awtorità ma setgħetx tasal għal konklużjoni dwar jistax ikun tossiku meta jittieħed man-nifs, jistax ikun irritant tal-ġilda jew tal-għajnejn, jew jistax ikun sensitizzatur respiratorju jew dermali, u osservat li l-attività endotossina tal-addittiv mhijiex ta’ periklu għall-utenti li jmissu l-addittiv. Barra minn hekk, l-Awtorità kkonkludiet li dan l-addittiv huwa meqjus li hu sors tal-aċidu amminiku essenzjali L-valina fin-nutrizzjoni tal-annimali, u li biex ikun effikaċi fir-ruminanti, l-addittiv irid ikun protett kontra d-degradazzjoni fil-kirxa. L-Awtorità mhijiex tal-fehma li hemm għalfejn jiġu stipulati rekwiżiti speċifiċi għas-sorveljanza ta’ wara t-tqegħid fis-suq. Ivverifikat ukoll ir-rapport dwar il-metodu ta’ analiżi tal-addittiv fl-għalf ippreżentat mil-Laboratorju ta’ Referenza stabbilit bir-Regolament (KE) Nru 1831/2003.

(5)

Fid-dawl tal-opinjoni tal-Awtorità, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti negattivi fuq is-saħħa tal-bniedem, b’mod partikolari fir-rigward tal-utenti tal-addittiv.

(6)

Il-valutazzjoni tal-L-valina prodotta mill-Escherichia coli CCTCC M2020321 turi li l-kundizzjonijiet għall-awtorizzazzjoni, kif previsti fl-Artikolu 5 tar-Regolament (KE) Nru 1831/2003, huma ssodisfati.

(7)

Għaldaqstant jenħtieġ li l-użu ta’ din is-sustanza kif speċifikat fl-Anness ta’ dan ir-Regolament jiġi awtorizzat.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,