(1)

Il-Fond Ewropew għall-Affarijiet Marittimi, is-Sajd u l-Akkwakultura (il-"FEMSA") jenħtieġ li jiġi stabbilit għall-perijodu mill-1 ta' Jannar 2021 sal-31 ta' Diċembru 2027 sabiex id-durata tiegħu jiġi allinjat ma’ dik tal-qafas finanzjarju pluriennali (il-"QFP 2021-2027") stabbilit permezz tar-Regolament tal-Kunsill (UE, Euratom) 2020/2093 (4). Jenħtieġ li dan ir-Regolament jistabbilixxi l-prijoritajiet tal-FEMSA, il-baġit tiegħu u r-regoli speċifiċi biex jingħata l-finanzjament tal-Unjoni, li jikkomplementaw ir-regoli ġenerali applikabbli għall-FEMSA skont ir-Regolament (UE) 2021/1060 tal-Parlament Ewropew u tal-Kunsill (5). Il-FEMSA jenħtieġ li jkollu l-għan li jidderieġi l-finanzjament mill-baġit tal-Unjoni biex isostni l-Politika Komuni tas-Sajd (il-PKS), il-politika marittima tal-Unjoni u l-impenji internazzjonali tal-Unjoni fil-qasam tal-governanza tal-oċeani. Dan il-finanzjament huwa mezz ewlieni li jiffaċilita s-sajd sostenibbli u l-konservazzjoni tar-riżorsi bijoloġiċi tal-baħar, għas-sigurtà tal-ikel permezz tal-provvista ta' prodotti tal-frott tal-baħar, għat-tkabbir ta' ekonomija blu sostenibbli, u biex l-ibħra u l-oċeani jkunu f'saħħithom, siguri, sikuri, nodfa u ġestiti b'mod sostenibbli.

(2)

Bħala attur dinji fil-qasam tal-oċeani u wieħed fost l-akbar produtturi ta' frott tal-baħar, l-Unjoni għandha responsabbiltà kbira ta' protezzjoni, ta' konservazzjoni u ta' użu sostenibbli tal-oċeani u r-riżorsi tagħhom. Tabilħaqq, il-preżervazzjoni tal-ibħra u tal-oċeani hija essenzjali għall-popolazzjoni dinjija li qiegħda tikber b'mod mgħaġġel. Hija wkoll ta' interess soċjoekonomiku għall-Unjoni billi ekonomija blu sostenibbli tagħti spinta lill-investiment, lill-impjiegi u lit-tkabbir, trawwem ir-riċerka u l-innovazzjoni u tikkontribwixxi għas-sigurtà tal-enerġija permezz tal-enerġija mill-oċeani. Barra minn hekk, il-kontroll effiċjenti tal-fruntieri u l-ġlieda globali kontra l-kriminalità marittima huma essenzjali għal ibħra u oċeani siguri u sikuri, biex b'hekk jiġi indirizzat it-tħassib taċ-ċittadini dwar is-sigurtà.

(3)

Ir-Regolament (UE) 2021/1060 ġie adottat biex tittejjeb il-koordinazzjoni u biex tiġi armonizzata l-implimentazzjoni tal-appoġġ mill-Fondi taħt ġestjoni kondiviża (il-"Fondi"), bl-għan ewlieni li jiġi ssimplifikat b'mod koerenti t-twettiq tal-politiki. Dak ir-Regolament japplika għall-parti tal-FEMSA li hija taħt ġestjoni kondiviża. Il-Fondi għandhom objettivi komplimentari u jikkondividu l-istess mod ta' ġestjoni. Għaldaqstant, ir-Regolament (UE) 2021/1060 jistipula sensiela ta' objettivi ġenerali komuni u prinċipji ġenerali, bħas-sħubija u l-governanza f'diversi livelli. Dak ir-Regolament fih ukoll l-elementi komuni tal-ippjanar strateġiku u tal-ipprogrammar, fosthom dispożizzjonijiet dwar il-Ftehim ta' Sħubija li ser jiġi konkluż ma' kull Stat Membru, u jistipula approċċ komuni għall-orjentazzjoni tal-prestazzjoni tal-Fondi. Għalhekk, dan jistipula kondizzjonijiet abilitanti, rieżami tal-prestazzjoni u arranġamenti għall-monitoraġġ, ir-rappurtar u l-evalwazzjoni. Barra minn hekk, jistipula dispożizzjonijiet komuni fir-rigward tar-regoli ta' eliġibbiltà, u huma stabbiliti arranġamenti speċjali għall-istrumenti finanzjarji, għall-użu tal-InvestEU stabbilit bir-Regolament (UE) 2021/523 tal-Parlament Ewropew u tal-Kunsill (6) , għall-iżvilupp lokali mmexxi mill-komunità (CLLD) u għall-ġestjoni finanzjarja. Xi arranġamenti ta' ġestjoni u kontroll huma wkoll komuni għall-Fondi kollha. Il-komplementarjetajiet bejn il-Fondi, inkluż il-FEMSA, u programmi oħrajn tal-Unjoni, jenħtieġ li jkunu deskritti fil-Ftehim ta' Sħubija, f'konformità mar-Regolament (UE) 2021/1060.

(4)

Ir-Regolament (UE, Euratom) 2018/1046 tal-Parlament Ewropew u tal-Kunsill (7) (ir-"Regolament Finanzjarju") japplika għall-FEMSA . Ir-Regolament Finanzjarju jistabbilixxi regoli dwar l-implimentazzjoni tal-baġit tal-Unjoni, inkluż ir-regoli dwar għotjiet, premjijiet, akkwist, ġestjoni indiretta, strumenti finanzjarji, garanziji baġitarji, assistenza finanzjarja u r-rimborż ta' esperti esterni.

(5)

Ir-regoli finanzjarji orizzontali adottati mill-Parlament Ewropew u mill-Kunsill fuq il-bażi tal-Artikolu 322 tat-Trattat dwar il-Funzjonament tal-Unjoni Ewropea (TFUE) japplikaw għal dan ir-Regolament. Dawk ir-regoli huma stabbiliti fir-Regolament Finanzjarju u b'mod partikolari jiddeterminaw il-proċedura għall-iffissar u l-implimentazzjoni tal-baġit permezz ta' għotjiet, premjijiet, ġestjoni indiretta, strumenti finanzjarji, garanziji baġitarji, assistenza finanzjarja u r-rimborż ta’ esperti esterni u filwaqt li jipprevedu t-twettiq ta' verifiki rigward ir-responsabbiltà tal-atturi finanzjarji. Ir-regoli adottati abbażi tal-Artikolu 322 TFUE jinkludu wkoll reġim ġenerali ta' kondizzjonalità għall-protezzjoni tal-baġit tal-Unjoni.

(6)

Taħt ġestjoni diretta, jenħtieġ li l-FEMSA jiżviluppa sinerġiji u komplementarjetajiet ma' fondi u programmi oħrajn rilevanti tal-Unjoni. Jenħtieġ li jippermetti wkoll il-finanzjament fil-forma ta' strumenti finanzjarji f'operazzjonijiet ta' taħlit implimentati skont ir-Regolament (UE) 2021/523.

(7)

L-appoġġ fil-qafas tal-FEMSA jenħtieġ li jkollu valur miżjud Ewropew ċar, fost l-oħrajn, billi jindirizza b'mod proporzjonat il-fallimenti tas-suq jew is-sitwazzjonijiet ta' investiment subottimali, u jenħtieġ li ma jidduplikax il-finanzjament privat jew jimlielu postu u lanqas li jfixkel il-kompetizzjoni fis-suq intern.

(8)

L-Artikoli 107, 108 u 109 TFUE jenħtieġ li japplikaw għall-għajnuna mogħtija mill-Istati Membri lill-impriżi fis-settur tas-sajd u tal-akkwakultura skont dan ir-Regolament. Madankollu, minħabba l-karatteristiċi speċifiċi ta’ dak is-settur, jenħtieġ li dawk l-Artikoli ma japplikawx għall-pagamenti li jsiru mill-Istati Membri skont dan ir-Regolament u li huma fil-kamp ta' applikazzjoni tal-Artikolu 42 TFUE.

(9)

It-tipi ta' finanzjament u l-metodi tal-implimentazzjoni skont dan ir-Regolament jenħtieġ li jintgħażlu abbażi ta' kemm jistgħu jilħqu l-prijoritajiet stabbiliti għall-azzjonijiet u jagħtu r-riżultati, b'kont meħud, b'mod partikolari, tal-ispejjeż tal-kontrolli, il-piż amministrattiv u r-riskju ta' nuqqas ta’ konformità mistenni. Dan jenħtieġ li jinkludi konsiderazzjoni tal-użu ta' ammonti f'daqqa, rati fissi u spejjeż unitarji, kif ukoll finanzjament mhux marbut ma' spejjeż kif imsemmi fl-Artikolu 125(1) tar-Regolament Finanzjarju.

(10)

Il-QFP 2021-2027 jipprevedi li l-baġit tal-Unjoni jkompli jsostni s-sajd u l-politiki marittimi. Bil-prezzijiet attwali, il-baġit tal-FEMSA huwa mistenni li jammonta għal EUR 6 108 000 000. Ir-riżorsi tal-FEMSA jenħtieġ li jinqasmu bejn il-ġestjoni kondiviża u l-ġestjoni diretta u indiretta. EUR 5 311 000 000 jenħtieġ li jkunu allokati għas-sostenn b'ġestjoni kondiviża u EUR 797 000 000 għas-sostenn b'ġestjoni diretta u indiretta. Sabiex tkun żgurata l-istabbiltà, b'mod partikolari fejn għandu x'jaqsam mal-kisba tal-objettivi tal-PKS, id-definizzjoni tal-allokazzjonijiet nazzjonali b'ġestjoni kondiviża għall-perijodu ta' ipprogrammar tal-2021 sal-2027 jenħtieġ li tkun ibbażata fuq l-ishma tal-2014-2020 skont ir-Regolament (UE) Nru 508/2014 tal-Parlament Ewropew u tal-Kunsill dwar il-Fond Ewropew għall-Affarijiet Marittimi u s-Sajd (8) (il-FEMS). Jenħtieġ li jiġu riżervati ammonti speċifiċi għar-reġjuni ultraperiferiċi, għall-kontroll u għall-infurzar u għall-ġbir u l-ipproċessar tad-data kemm għall-ġestjoni tas-sajd kif ukoll għall-finijiet xjentifiċi, filwaqt li l-ammonti għal ċerti investimenti f'bastimenti tas-sajd u għall-waqfien permanenti u temporanju mill-attivitajiet tas-sajd jenħtieġ li jkunu limitati.

(11)

Is-settur marittimu tal-Ewropa jimpjega aktar minn 5 miljun persuna u jiġġenera kważi EUR 750 000 000 000 f'fatturat u EUR 218 000 000 000 f'valur miżjud gross fis-sena, b'potenzjal li joħloq ħafna aktar impjiegi. L-istima tal-output tal-ekonomija globali tal-oċeani attwalment hija ta' EUR 1 300 000 000 000, u tista' tirdoppja sal-2030. Il-ħtieġa li jintlaħqu l-miri tal-emissjonijiet tas-CO2, li tiżdied l-effiċjenza fl-użu tar-riżorsi u li titnaqqas l-impronta ambjentali tal-ekonomija blu sostenibbli kienet forza sinifikanti wara l-innovazzjoni f'setturi oħrajn bħal dak tat-tagħmir marittimu, tal-bini tal-bastimenti, tal-osservazzjoni tal-oċeani, tat-tħammil, tal-protezzjoni tal-kosta, u tal-bini marittimu. L-investiment fl-ekonomija marittima ġie pprovdut permezz tal-fondi strutturali tal-Unjoni, b'mod partikolari l-Fond Ewropew għall-Iżvilupp Reġjonali (il-FEŻR) u l-FEMSA. Jistgħu jintużaw għodod ġodda tal-investiment, bħall-InvestEU biex jintlaħaq il-potenzjal tat-tkabbir tas-settur marittimu.

(12)

Jenħtieġ li l-FEMSA jkun ibbażat fuq erba' prijoritajiet: it-trawwim tas-sajd sostenibbli u r-restawr u l-konservazzjoni tar-riżorsi bijoloġiċi akkwatiċi; it-trawwim ta' attivitajiet ta' akkwakultura sostenibbli, u l-ipproċessar u l-kummerċjalizzazzjoni ta' prodotti tas-sajd u tal-akkwakultura, u b'hekk isir kontribut għas-sigurtà tal-ikel fl-Unjoni; l-iffaċilitar ta' ekonomija blu sostenibbli f'żoni kostali, żoni interni u gżejjer, u t-trawwim tal-iżvilupp ta' komunitajiet ta' sajd u ta' akkwakultura; it-tisħiħ tal-governanza tal-oċeani internazzjonali u l-iffaċilitar ta' ibħra u oċeani siguri, mingħajr periklu, nodfa u ġestiti b'mod sostenibbli. Dawk il-prijoritajiet jenħtieġ li jiġu segwiti permezz ta' ġestjoni kondiviża, diretta u indiretta.

(13)

Il-FEMSA jenħtieġ li jkun ibbażat fuq arkitettura sempliċi mingħajr ma jiġu predefiniti miżuri u regoli tal-eliġibbiltà ddettaljati fil-livell tal-Unjoni b'mod preskrittiv iżżejjed. Minflok, jenħtieġ li jkunu deskritti objettivi speċifiċi wiesgħa skont kull prijorità. Għaldaqstant, jenħtieġ li l-Istati Membri jħejju l-programmi tagħhom fejn jindikaw l-aħjar mezzi biex jintlaħqu dawk l-objettivi. Għadd ta' miżuri diversi identifikati f'dawk il-programmi mill-Istati Membri jistgħu jiġu appoġġati skont ir-regoli stipulati f'dan ir-Regolament u fir-Regolament (UE) 2021/1060, dment li jkunu koperti mill-objettivi speċifiċi identifikati f'dan ir-Regolament. Madankollu, jenħtieġ li tiġi stipulata lista ta' operazzjonijiet li mhumiex eliġibbli biex jiġu evitati impatti detrimentali f'termini ta' konservazzjoni tas-sajd. Barra minn hekk, l-investimenti u l-kumpensi għall-flotta tas-sajd jenħtieġ li jkunu strettament ikkondizzjonati mill-konsistenza tagħhom mal-objettivi ta' konservazzjoni tal-PKS.

(14)

L-Aġenda 2030 għall-Iżvilupp Sostenibbli tan-Nazzjonijiet Uniti ("l-Aġenda 2030") identifikat il-konservazzjoni tal-oċeani u l-użu sostenibbli tagħhom bħala wieħed mis-17-il Għan ta' Żvilupp Sostenibbli (SDGs), jiġifieri SDG 14 ("Il-konservazzjoni u l-użu sostenibbli tal-oċeani, l-ibħra u r-riżorsi tal-baħar għall-iżvilupp sostenibbli"). L-Unjoni hija impenjata bis-sħiħ lejn dak il-għan u lejn l-implimentazzjoni tiegħu. F'dan il-kuntest, ħadet l-impenn li tippromwovi ekonomija blu sostenibbli li tkun konsistenti mal-ippjanar tal-ispazju marittimu, mal-konservazzjoni tar-riżorsi bijoloġiċi u mal-kisba ta' status ambjentali tajjeb, kif stabbilit fid-Direttiva 2008/56/KE tal-Parlament Ewropew u tal-Kunsill (9), kif ukoll li tipprojbixxi ċerti forom ta' sussidji tas-sajd li jkomplu jżidu mal-kapaċità żejda u mas-sajd eċċessiv, li telimina s-sussidji li jgħinu s-sajd illegali, mhux irrapportat u mhux irregolat (IUU) u li ma tintroduċix sussidji ġodda ta' dan it-tip. Jenħtieġ li dak ir-riżultat tal-aħħar jinkiseb min-negozjati fi ħdan l-Organizzazzjoni Dinjija tal-Kummerċ (WTO) dwar is-sussidji għas-sajd. Barra minn hekk, waqt in-negozjati tad-WTO fis-Summit Dinji dwar l-Iżvilupp Sostenibbli fl-2002 u fil-Konferenza tan-Nazzjonijiet Uniti dwar l-Iżvilupp Sostenibbli (Rio+20) fl-2012, l-Unjoni ħadet l-impenn li telimina s-sussidji li jikkontribwixxu għall-kapaċità żejda fis-sajd u għas-sajd eċċessiv.

(15)

Bħala riflessjoni tal-importanza tal-indirizzar tat-tibdil fil-klima skont l-impenji tal-Unjoni għall-implimentazzjoni tal-Ftehim ta' Pariġi, u l-impenn għall-Għanijiet ta' Żvilupp Sostenibbli tan-Nazzjonijiet Uniti, jenħtieġ li l-azzjonijiet skont dan ir-Regolament jikkontribwixxu għall-kisba ta' mira biex 30 % tan-nefqa kollha skont il-QFP 2021-2027 tiġi ddedikata għall-integrazzjoni tal-objettivi klimatiċi u li jikkontribwixxu għall-ambizzjoni li 7,5 % tal-infiq annwali taħt il-QFP 2021-2027 jiġi ddedikat għall-objettivi tal-bijodiversità fl-2024 u 10 % tal-infiq annwali taħt il-QFP 2021-2027 għall-objettivi tal-bijodiversità fl-2026 u l-2027, filwaqt li titqies is-sovrapożizzjoni eżistenti bejn l-għanijiet fil-qasam tal-klima u tal-bijodiversità.

(16)

Il-FEMSA jenħtieġ li jikkontribwixxi għall-kisba tal-objettivi ambjentali tal-Unjoni, u dawk ta' mitigazzjoni tat-tibdil fil-klima u l-adattament għalih. Jenħtieġ li dak il-kontribut jiġi traċċat permezz tal-applikazzjoni tal-markaturi ambjentali u klimatiċi tal-Unjoni u jiġi rrappurtat b'mod regolari f'konformità mar-Regolament (UE) 2021/1060.

(17)

F'konformità mal-Artikolu 42 tar-Regolament (UE) Nru 1380/2013 tal-Parlament Ewropew u tal-Kunsill (10) , għajnuna finanzjarja mill-Unjoni fil-kuntest tal-FEMSA jenħtieġ li tkun ikkondizzjonata mill-konformità mar-regoli tal-PKS. L-applikazzjonijiet mingħand operaturi li jkunu wettqu ksur serju tar-regoli tal-PKS jenħtieġ li ma jintlaqgħux.

(18)

Sabiex jiġu indirizzati l-kondizzjonijiet speċifiċi tal-PKS imsemmija fir-Regolament (UE) Nru 1380/2013, u biex jgħin biex jiġu rispettati r-regoli tal-PKS, jenħtieġ li jiġu stabbiliti dispożizzjonijiet addizzjonali mar-regoli dwar l-interruzzjoni, is-sospensjoni u l-korrezzjonijiet finanzjarji kif stipulat fir-Regolament (UE) 2021/1060. Meta Stat Membru jonqos milli jikkonforma mal-obbligi tiegħu skont il-PKS, jew meta l-Kummissjoni jkollha l-provi li jissuġġerixxu tali nuqqas ta' konformità, jenħtieġ li l-Kummissjoni tkun tista' tinterrompi l-iskadenzi tal-pagamenti bħala miżura ta' prekawzjoni. Barra mill-possibbiltà li tiġi interrotta l-iskadenza tal-pagamenti, u biex jiġi evitat ir-riskju li jitħallas infiq mhux eliġibbli, jenħtieġ li l-Kummissjoni tkun tista' tissospendi l-pagamenti u timponi l-korrezzjonijiet finanzjarji f'każijiet ta' ksur serju tar-regoli tal-PKS minn xi Stat Membru.

(19)

F'dawn l-aħħar snin ittieħdu passi biex l-istokkijiet tal-ħut inġiebu lura f'livelli tajbin, biex tiżdied il-profitabbiltà tal-industrija tas-sajd tal-Unjoni, u biex jiġu kkonservati l-ekosistemi tal-baħar. Madankollu, għad fadal sfidi sostanzjali biex jintlaħqu bis-sħiħ l-objettivi soċjoekonomiċi u ambjentali tal-PKS, b'mod partikolari l-objettivi tal-irkupru u ż-żamma tal-popolazzjonijiet tal-ispeċijiet mistada 'l fuq mil-livelli li jistgħu jipproduċu r-rendiment massimu sostenibbli (MSY), tal-eliminazzjoni tal-qabdiet mhux mixtieqa u għall-istabbiliment ta' żoni ta' rkupru tal-istokkijiet tal-ħut. Il-kisba ta' dawk l-objettivi teħtieġ appoġġ kontinwu lil hinn mill-2020, speċjalment fil-baċiri tal-baħar fejn il-progress kien aktar bil-mod.

(20)

Jenħtieġ li l-FEMSA jikkontribwixxi għall-kisba tal-objettivi ambjentali, ekonomiċi, soċjali u tal-impjiegi tal-PKS, kif stipulat fl-Artikolu 2 tar-Regolament (UE) Nru 1380/2013, b'mod partikolari l-objettivi li jiġu rkuprati u jinżammu l-popolazzjonijiet tal-ispeċijiet mistada 'l fuq minn livelli li jistgħu jipproduċu MSY, li jiġu evitati u mnaqqsa, kemm jista' jkun, qabdiet mhux mixtieqa u li jiġu minimizzati l-impatti negattivi tal-attivitajiet tas-sajd fuq l-ekosistema tal-baħar. Tali appoġġ jenħtieġ li jiżgura li l-attivitajiet tas-sajd ikunu ambjentalment sostenibbli fit-tul u jkunu ġestiti b'mod li jkun konsistenti mal-objettivi stipulati fl-Artikolu 2 tar-Regolament (UE) Nru 1380/2013, bil-ħsieb li jinkisbu benefiċċji ekonomiċi, soċjali u tal-impjiegi, li jikkontribwixxu għad-disponibbiltà ta' provvisti ta' ikel tajjeb għas-saħħa u li jikkontribwixxu għal standard tal-għajxien ġust għal dawk li jiddependu fuq l-attivitajiet tas-sajd, filwaqt li jitqiesu s-sajd kostali u l-aspetti soċjoekonomiċi. Dak l-appoġġ jenħtieġ li jinkludi l-innovazzjoni u l-investiment fi prattiki u tekniki tas-sajd b'impatt baxx, selettivi, reżiljenti għall-klima u b'livell baxx ta' karbonju.

(21)

Is-sajd huwa essenzjali għall-għajxien u għall-patrimonju kulturali ta' bosta komunitajiet kostali fl-Unjoni, speċjalment f'dawk fejn is-sajd kostali fuq skala żgħira jaqdi rwol importanti. Billi l-età medja ta' ħafna komunitajiet ta' sajjieda hija ogħla minn 50 sena, it-tiġdid tal-ġenerazzjonijiet u d-diversifikazzjoni tal-attivitajiet għadhom ta' sfida. B'mod partikolari, il-ħolqien u l-iżvilupp ta' attivitajiet ekonomiċi ġodda fis-settur tas-sajd minn sajjieda żgħażagħ huwa ta' sfida finanzjarja u jikkostitwixxi element li jenħtieġ li jitqies fl-allokazzjoni u l-mira tal-fondi taħt il-FEMSA. Dan l-iżvilupp huwa essenzjali għall-kompetittività tas-settur tas-sajd fl-Unjoni. Konsegwentement, jenħtieġ li jkun disponibbli appoġġ għal sajjieda żgħażagħ li jibdew attivitajiet tas-sajd sabiex jiġi ffaċilitat l-istabbiliment tagħhom. Sabiex tiġi żgurata l-vijabbiltà ta' attivitajiet ekonomiċi ġodda appoġġati taħt il-FEMSA, l-appoġġ jenħtieġ li jkun bil-kondizzjoni li jinkisbu l-esperjenza u l-kwalifiki adegwati. Fejn jingħata appoġġ għall-bidu ta' negozju għall-akkwist ta' bastiment tas-sajd, dan jenħtieġ li jikkontribwixxi biss għall-akkwist tal-ewwel bastiment tas-sajd jew ta' sehem ta' kontroll tiegħu.

(22)

L-evitar ta' qabdiet mhux mixtieqa huwa wieħed mill-isfidi ewlenin tal-PKS. F'dak ir-rigward, l-obbligu legali li l-qabdiet kollha jinħattu l-art involva bidliet sinifikanti u importanti fil-prattiki tas-sajd għas-settur, xi drabi bi spiża finanzjarja importanti. Għalhekk jenħtieġ li jkun possibbli li l-FEMSA jappoġġa l-innovazzjoni u l-investimenti li jikkontribwixxu għall-implimentazzjoni sħiħa tal-obbligu ta' ħatt l-art, kif ukoll għall-iżvilupp u l-implimentazzjoni ta' miżuri ta' konservazzjoni li jikkontribwixxu għas-selettività. Jenħtieġ li jkun possibbli li tingħata rata ta' intensità ta' għajnuna ogħla lill-investimenti fi rkaptu tas-sajd selettiv, fit-titjib tal-infrastrutturi tal-portijiet u fil-kummerċ ta' qabdiet mhux mixtieqa, minn dik li tapplika għal operazzjonijiet oħrajn. Jenħtieġ li jkun possibbli wkoll li tingħata rata ta' intensità tal-għajnuna massima ta' 100 % għat-tfassil, l-iżvilupp, il-monitoraġġ, l-evalwazzjoni u l-ġestjoni ta' sistemi trasparenti għall-iskambju ta' opportunitajiet tas-sajd bejn l-Istati Membri ("skambji ta' kwoti"), biex jiġi mmitigat l-effett tal-"ispeċi bi kwota limitanti" kkawżat mill-obbligu ta' ħatt l-art.

(23)

Jenħtieġ li jkun possibbli li l-FEMSA jappoġġa l-innovazzjoni u l-investimenti abbord il-bastimenti tas-sajd tal-Unjoni. Dak l-appoġġ jenħtieġ li jinkludi azzjonijiet li għandhom l-għan li jtejbu s-saħħa, is-sikurezza u l-kondizzjonijiet tax-xogħol, l-effiċjenza enerġetika u l-kwalità tal-qabdiet. Dan m'għandux jinkludi l-akkwist ta' tagħmir li jżid il-kapaċità ta' bastiment tas-sajd li jsib il-ħut. Jenħtieġ li tali appoġġ ma jwassalx ukoll għal żieda fil-kapaċità tas-sajd ta' kwalunkwe bastiment individwali, ħlief jekk jirriżulta direttament minn żieda fit-tunnellaġġ gross ta' bastiment tas-sajd li hija meħtieġa għat-titjib tas-sikurezza, tal-kondizzjonijiet tax-xogħol jew tal-effiċjenza enerġetika. F'dawk il-każijiet, iż-żieda fil-kapaċità tas-sajd tal-bastiment individwali jenħtieġ li tiġi kkumpensata bl-irtirar minn qabel ta' mill-inqas l-istess ammont ta' kapaċità tas-sajd mingħajr għajnuna pubblika mill-istess taqsima tal-flotta jew minn taqsima tal-flotta fejn il-kapaċità tas-sajd ma tkunx f'bilanċ mal-opportunitajiet tas-sajd disponibbli, sabiex ma twassal għall-ebda żieda fil-kapaċità tas-sajd fil-livell tal-flotta. Barra minn hekk, jenħtieġ li l-appoġġ ma jingħatax sempliċiment għall-konformità mar-rekwiżiti li huma obbligatorji skont id-dritt tal-Unjoni, bl-eċċezzjoni tar-rekwiżiti imposti minn Stat Membru biex jiġu implimentati d-dispożizzjonijiet fakultattivi skont id-Direttiva tal-Kunsill (UE) 2017/159 (11) u fir-rigward tax-xiri, l-installazzjoni u l-ġestjoni ta' ċertu tagħmir għal finijiet ta' kontroll. Bl-istruttura mingħajr miżuri preskrittivi, jenħtieġ li tkun responsabbiltà tal-Istati Membri li jistabbilixxu r-regoli preċiżi tal-eliġibbiltà għal dawk l-investimenti. F'dak li għandu x'jaqsam mal-kondizzjonijiet tas-saħħa, tas-sikurezza u tax-xogħol abbord il-bastimenti tas-sajd, jenħtieġ li jkun permess li tingħata rata ta' intensità tal-għajnuna ogħla minn ta' operazzjonijiet oħrajn.

(24)

Huwa neċessarju li jiġu stabbiliti regoli speċifiċi ta' eliġibbiltà għal ċerti investimenti oħra appoġġati mill-FEMSA fil-flotta tas-sajd, sabiex jipprvjenu li dawk l-investimenti jikkontribwixxu għal kapaċità żejda jew sajd eċċessiv. B'mod partikolari, l-appoġġ għall-ewwel akkwist ta' bastiment użat minn sajjied żagħżugħ u għas-sostituzzjoni jew l-immodernizzar tal-magna ta' bastiment tas-sajd jenħtieġ li jkun soġġett ukoll għal kondizzjonijiet, inkluż li l-bastiment jappartjeni għal segment tal-flotta li jkun f'bilanċ mal-opportunitajiet tas-sajd disponibbli għal dak is-segment u li l-magna l-ġdida jew modernizzata ma jkollhiex aktar potenza f'kilowatts (kW) minn dik tal-magna li tkun qed tiġi sostitwita.

(25)

L-investiment fil-kapital uman jaqdi rwol essenzjali fil-kompetittività u l-prestazzjoni ekonomika tas-sajd u tal-attivitajiet marittimi. Għalhekk, jenħtieġ li jkun possibbli li l-FEMSA jappoġġa s-servizzi konsultattivi, il-kooperazzjoni bejn ix-xjentisti u s-sajjieda, it-taħriġ professjonali, it-tagħlim tul il-ħajja, kif ukoll il-promozzjoni tad-djalogu soċjali u t-tixrid tal-għarfien.

(26)

Il-kontroll tas-sajd huwa importanti immens għall-implimentazzjoni tal-PKS. Għalhekk, b'ġestjoni kondiviża, jenħtieġ li l-FEMSA jappoġġa l-iżvilupp u l-implimentazzjoni ta' sistema ta' kontroll tas-sajd tal-Unjoni kif stipulat fir-Regolament tal-Kunsill (KE) Nru 1224/2009 (12) . Ċerti obbligi stabbiliti f’dak ir-Regolament jiġġustifikaw appoġġ speċifiku mill-FEMSA, jiġifieri sistemi obbligatorji tat-traċċar tal-bastimenti u tar-rappurtar elettroniku, sistemi obbligatorji ta' sorveljanza elettronika mill-bogħod u l-kejl u r-reġistrazzjoni obbligatorji kontinwi tal-potenza propulsiva tal-magni. Barra minn hekk, l-investimenti tal-Istati Membri fl-assi tal-kontroll jistgħu jintużaw ukoll għall-fini tas-sorveljanza marittima u għall-kooperazzjoni fil-funzjonijiet tal-gwardja tal-kosta.

(27)

Is-suċċess tal-PKS jiddependi mid-disponibbiltà tal-parir xjentifiku għall-ġestjoni tas-sajd, u, għaldaqstant, mid-disponibbiltà tad-data dwar is-sajd. Minħabba l-isfidi u l-ispejjeż biex tinkiseb data affidabbli u sħiħa, jenħtieġ li jiġu appoġġati l-azzjonijiet tal-Istati Membri biex jiġbru u jipproċessaw id-data skont ir-Regolament (UE) Nru 2017/1004 tal-Parlament Ewropew u tal-Kunsill (13) u biex jikkontribwixxu għall-aħjar parir xjentifiku disponibbli. Dak l-appoġġ għandu jippermetti sinerġiji mal-ġbir u l-ipproċessar ta' tipi oħra ta' data tal-baħar.

(28)

Jenħtieġ li l-FEMSA jappoġġa implimentazzjoni effettiva bbażata fuq l-għarfien u governanza tal-PKS b'ġestjoni diretta u indiretta permezz tal-għoti tal-parir xjentifiku, il-kooperazzjoni reġjonali dwar miżuri ta' konservazzjoni, l-iżvilupp u l-implimentazzjoni ta' sistema tal-Unjoni ta' kontroll tas-sajd, it-tħaddim ta' Kunsilli Konsultattivi, u l-kontribuzzjonijiet volontarji lill-organizzazzjonijiet internazzjonali.

(29)

Sabiex jissaħħu l-attivitajiet tas-sajd ekonomikament, soċjalment u ambjentalment sostenibbli, jenħtieġ li jkun possibbli li l-FEMSA jappoġġa l-operazzjonijiet għall-ġestjoni tas-sajd u tal-flotot tas-sajd f'konformità mal-Artikoli 22 u 23 u tal-Anness II tar-Regolament (UE) Nru 1380/2013 kif ukoll l-isforzi mill-Istati Membri biex jottimizzaw l-allokazzjoni tal-kapaċità tas-sajd disponibbli tagħhom, filwaqt li jitqiesu l-ħtiġijiet tal-flotta tagħhom, u mingħajr ma tiżdied il-kapaċità tas-sajd globali tagħhom.

(30)

Minħabba l-isfidi biex jintlaħqu l-objettivi ta' konservazzjoni tal-PKS, xi drabi jibqa' meħtieġ appoġġ għall-adattament tal-flotta fir-rigward ta' ċerti segmenti tal-flotta u l-baċiri tal-baħar. Dan l-appoġġ jenħtieġ li jkun strettament immirat lejn il-ġestjoni aħjar tal-flotta u l-konservazzjoni u l-isfruttament sostenibbli tar-riżorsi bijoloġiċi tal-baħar, u jkun immirat biex jikseb bilanċ bejn il-kapaċità tas-sajd u l-opportunitajiet tas-sajd disponibbli. Għalhekk, jenħtieġ li jkun possibbli li l-FEMSA jkun jista' jappoġġa l-waqfien permanenti mill-attivitajiet tas-sajd f'segmenti tal-flotta li fihom il-kapaċità tas-sajd ma tkunx proporzjonata mal-opportunitajiet tas-sajd disponibbli. Jenħtieġ li tali appoġġ ikun għodda tal-pjanijiet ta' azzjoni għall-aġġustament tas-segmenti tal-flotta li jkollhom kapaċità strutturali żejda identifikata, kif previst fl-Artikolu 22(4) tar-Regolament (UE) Nru 1380/2013, u jenħtieġ li jkun implimentat billi jiġi skrappjat il-bastiment tas-sajd jew inkella billi jiġi dekommissjonat u ssirlu modifika retroattiva għal attivitajiet oħra. Jekk il-modifika retroattiva tkun ser twassal għal aktar pressjoni tas-sajd rikreattiv fuq l-ekosistema tal-baħar, jenħtieġ li l-appoġġ jingħata biss jekk ikun konformi mal-PKS u mal-objettivi tal-pjanijiet pluriennali rilevanti.

(31)

Sabiex jikkontribwixxi għall-objettivi ta' konservazzjoni tal-PKS jew biex jittaffew ċerti ċirkostanzi eċċezzjonali, jenħtieġ li jkun possibbli li l-FEMSA jappoġġa l-kumpens għall-waqfien temporanju mill-attivitajiet tas-sajd ikkawżat mill-implimentazzjoni ta' ċerti miżuri ta' konservazzjoni, mill-implimentazzjoni ta' miżuri ta' emerġenza, mill-interruzzjoni, minħabba raġunijiet ta' force majeure, tal-applikazzjoni ta' ftehim ta' sħubija dwar is-sajd sostenibbli (SFPA), minn diżastru naturali, minn inċident ambjentali jew minn kriżi tas-saħħa. L-appoġġ f'każ ta' waqfien temporanju kkawżat minn miżuri ta' konservazzjoni jenħtieġ li jingħata biss meta, abbażi tal-parir xjentifiku, ikun meħtieġ tnaqqis tal-isforz tas-sajd sabiex jinkisbu l-objettivi stipulati fl-Artikolu 2(2) u l-punt (a) tal-Artikolu 2(5) tar-Regolament (UE) Nru 1380/2013.

(32)

Minħabba li s-sajjieda huma esposti għal riskji ekonomiċi u ambjentali dejjem jiżdiedu, fost l-oħrajn minħabba t-tibdil fil-klima u l-volatilità tal-prezzijiet, jenħtieġ li jkun possibbli li l-FEMSA jappoġġa azzjonijiet li jsaħħu r-reżiljenza tas-settur tas-sajd, inkluż permezz ta' fondi mutwi, strumenti ta' assigurazzjoni jew skemi kollettivi oħra li jsaħħu l-kapaċità tas-settur biex jimmaniġġa r-riskji u jirreaġixxi għal avvenimenti avversi.

(33)

Is-sajd kostali fuq skala żgħira jitwettaq minn bastimenti tas-sajd tal-baħar u fl-ilmijiet interni b'tul totali ta' inqas minn 12-il metru u li ma jużawx irkaptu rmunkat, u mis-sajjieda tal-miexi, inkluż dawk li jiġbru l-frott tal-baħar bil-qoxra. Dak is-settur jirrappreżenta kważi 75 % tal-bastimenti tas-sajd kollha rreġistrati fl-Unjoni u kważi nofs l-impjiegi kollha fis-settur tas-sajd. L-operaturi tas-sajd kostali fuq skala żgħira jiddependu b'mod partikolari fuq stokkijiet tal-ħut b'saħħithom għad-dħul ewlieni tagħhom. Għalhekk, bil-għan li titħeġġeġ prattika tas-sajd sostenibbli, jenħtieġ li l-FEMSA jagħti lil dawk l-operaturi trattament preferenzjali, permezz ta' rata massima ta' intensità tal-għajnuna ta' 100 %, ħlief għall-operazzjonijiet relatati mal-ewwel akkwist ta' bastiment tas-sajd, is-sostituzzjoni jew l-immodernizzar ta' magna u l-operazzjonijiet li jżidu t-tunnellaġġ gross ta' bastiment tas-sajd għall-finijiet tat-titjib tas-sikurezza, tal-kondizzjonijiet tax-xogħol jew tal-effiċjenza enerġetika. Barra minn hekk, jenħtieġ li fil-programm tagħhom l-Istati Membri jqisu l-ħtiġijiet speċifiċi tas-sajd kostali fuq skala żgħira u jiddeskrivu t-tipi ta' azzjonijiet ikkunsidrati għall-iżvilupp tas-sajd kostali fuq skala żgħira.

(34)

Ir-rata massima ta' kofinanzjament tal-FEMSA għal kull objettiv speċifiku jenħtieġ li tkun ta' 70 % tan-nefqa pubblika eliġibbli bl-eċċezzjoni tal-kumpens għal spejjeż addizzjonali fir-reġjuni ultraperiferiċi, li għalih għandha tkun ta' 100 %.

(35)

Ir-rata ta' intensità tal-għajnuna massima jenħtieġ li tkun ta' 50 % tan-nefqa totali eliġibbli, bil-possibbiltà, f'ċerti każijiet, li jiġu stabbiliti rati derogatorji.

(36)

Ir-reġjuni ultraperiferiċi jiffaċċaw sfidi speċifiċi minħabba li huma reġjuni mbiegħda, u minħabba t-topografija u l-klima tagħhom, kif imsemmi fl-Artikolu 349 TFUE u għandhom ukoll assi speċifiċi li bihom jistgħu jiżviluppaw ekonomija blu sostenibbli. Għalhekk, għal kull reġjun ultraperiferiku, jenħtieġ li mal-programm tal-Istati Membri kkonċernati jinhemeż pjan ta' azzjoni għall-iżvilupp ta' setturi tal-ekonomija blu sostenibbli, inkluż is-sajd u l-akkwakultura sostenibbli, u jenħtieġ li tkun riżervata allokazzjoni finanzjarja biex issostni l-implimentazzjoni ta' dawn il-pjanijiet ta' azzjoni. Jenħtieġ li jkun possibbli wkoll li l-FEMSA jappoġġa l-kumpens għall-ispejjeż addizzjonali li jġarrbu l-operaturi mir-reġjuni ultraperiferiċi minħabba l-pożizzjoni jew l-insularità ta’ dawk ir-reġjuni. Dak l-appoġġ jenħtieġ li jkun limitat għal perċentwal ta' din l-allokazzjoni finanzjarja ġenerali. Barra minn hekk jenħtieġ li tiġi applikata rata ta' intensità ta' għajnuna ogħla fir-reġjuni ultraperiferiċi minn dik li tapplika għal operazzjonijiet oħrajn. Jenħtieġ li jkun possibbli għall-Istati Membri li jagħtu finanzjament addizzjonali għall-implimentazzjoni ta' dak l-appoġġ. Bħala għajnuna mill-Istat, tali finanzjament jenħtieġ li jiġi nnotifikat lill-Kummissjoni, li tista' tapprovah skont dan ir-Regolament bħala parti minn dak l-appoġġ.

(37)

B'ġestjoni kondiviża, jenħtieġ li jkun possibbli għall-FEMSA li tappoġġa l-protezzjoni u r-restawr tal-bijodiversità u tal-ekosistemi akkwatiċi, inkluż l-ilmijiet interni. Għalhekk, jenħtieġ li jingħata l-appoġġ mill-FEMSA biex jikkompensa, fost l-oħrajn, għall-ġbir passiv mis-sajjieda ta' rkaptu tas-sajd mitluf u l-ġbir tal-iskart mill-baħar, inkluż l-alka sargassum, u għall-investiment fil-portijiet biex dawn ikunu jipprovdu faċilitajiet ta' akkoljenza xierqa għal dan l-irkaptu tas-sajd mitluf u għall-iskart mill-baħar. Jenħtieġ li l-appoġġ ikun disponibbli wkoll għall-azzjonijiet favur il-kisba jew iż-żamma ta' status ambjentali tajjeb fl-ambjent tal-baħar, kif stipulat fid-Direttiva 2008/56/KE, għall-implimentazzjoni ta' miżuri ta' protezzjoni tal-ispazju stabbiliti skont dik id-Direttiva, għall-ġestjoni, ir-restawr u l-monitoraġġ taż-żoni tan-Natura 2000, f'konformità mal-oqfsa ta' azzjoni prijoritizzati stabbiliti skont id-Direttiva tal-Kunsill 92/43/KEE (14), għall-protezzjoni tal-ispeċijiet, b'mod partikolari skont id-Direttiva 92/43/KEE u d-Direttiva 2009/147/KE tal-Parlament Ewropew u tal-Kunsill (15) , kif ukoll għar-restawr tal-ilmijiet interni f'konformità mal-programm ta' miżuri stabbiliti skont id-Direttiva 2000/60/KE tal-Parlament Ewropew u tal-Kunsill (16) . Jenħtieġ li b'ġestjoni diretta l-FEMSA jappoġġa l-promozzjoni ta' ibħra nodfa u f'saħħithom u l-implimentazzjoni tal-istrateġija Ewropea għall-plastiks f'ekonomija ċirkolari li ġiet żviluppata fil-Komunikazzjoni tal-Kummissjoni tas-16 ta' Jannar 2018, bi qbil mal-għan li jinkiseb jew jinżamm status ambjentali tajjeb fl-ambjent tal-baħar.

(38)

Is-sajd u l-akkwakultura jikkontribwixxu għas-sigurtà tal-ikel u għan-nutrizzjoni. Madankollu, huwa stmat li fil-preżent l-Unjoni timporta aktar minn 60 % tal-prodotti tas-sajd tagħha, u b'hekk tiddependi ħafna mill-pajjiżi terzi. Sfida importanti hija l-promozzjoni tal-konsum tal-proteina mill-ħut prodott fl-Unjoni bi standards ta' kwalità għolja li hija disponibbli għall-konsumaturi bi prezzijiet affordabbli.

(39)

Jenħtieġ li jkun possibbli li l-FEMSA jkun jista' jappoġġa l-promozzjoni u l-iżvilupp sostenibbli tal-akkwakultura, inkluż l-akkwakultura tal-ilma ħelu, għat-trobbija ta' annimali u pjanti akkwatiċi biex jiġu prodotti l-ikel u materja prima oħra. F'xi Stati Membri għad hemm proċeduri amministrattivi kumplessi, bħal ostakli biex wieħed jikseb l-ispazju, u proċeduri peżanti biex jinkisbu l-liċenzji, li jagħmluha diffiċli għas-settur biex itejjeb l-idea pubblika tal-frott tal-baħar imrobbi, u biex jagħmlu aktar kompetittiv. Jenħtieġ li l-appoġġ mill-FEMSA jkun konsistenti mal-pjanijiet strateġiċi pluriennali nazzjonali żviluppati abbażi tar-Regolament (UE) Nru 1380/2013. B'mod partikolari jenħtieġ li jkunu eliġibbli, l-appoġġ għas-sostenibbiltà ambjentali, l-investimenti li jiġġeneraw id-dħul, l-innovazzjoni, il-ksib ta' ħiliet professjonali, it-titjib tal-kondizzjonijiet tax-xogħol, u l-miżuri ta' kumpens li jipprovdu servizzi ta' importanza kritika ta' ġestjoni tal-art u tan-natura. Jenħtieġ li jkunu eliġibbli wkoll azzjonijiet tas-saħħa pubblika, skemi ta' assigurazzjoni tal-istokkijiet tal-akkwakultura u azzjonijiet b'rabta mas-saħħa u t-trattament xieraq tal-annimali.

(40)

Is-sigurtà tal-ikel tiddependi minn swieq effiċjenti u organizzati tajjeb, li joħolqu aktar trasparenza, stabbiltà, kwalità u diversità fil-katina tal-provvista, u tiddependi wkoll mill-informazzjoni li jkollhom il-konsumaturi. Għal dak il-għan, jenħtieġ li l-FEMSA jkun jista' jappoġġa l-kummerċjalizzazzjoni tal-prodotti tas-sajd u tal-akkwakultura, bi qbil mal-objettivi stipulati fir-Regolament (UE) Nru 1379/2013 tal-Parlament Ewropew u tal-Kunsill (17) . B'mod partikolari jenħtieġ li l-appoġġ ikun disponibbli għall-ħolqien ta' organizzazzjonijiet tal-produtturi, għall-implimentazzjoni tal-pjanijiet ta' produzzjoni u ta' kummerċjalizzazzjoni, għall-promozzjoni ta' swieq ġodda u għall-iżvilupp u x-xandir ta' informazzjoni dwar is-suq.

(41)

L-industrija tal-ipproċessar taqdi rwol fid-disponibbiltà u fil-kwalità tal-prodotti tas-sajd u tal-akkwakultura. Jenħtieġ li l-FEMSA jkun jista' jappoġġa investimenti immirati f'dik l-industrija, dment li dawn jikkontribwixxu għall-kisba tal-objettivi tal-organizzazzjoni komuni tas-swieq . Għal intrapriżi oħra għajr l-intrapriżi żgħar u medji (SMEs), dan l-appoġġ jenħtieġ li jingħata biss permezz ta' strumenti finanzjarji u permezz tal-InvestEU u mhux permezz ta' għotjiet.

(42)

Jenħtieġ li jkun possibbli li l-FEMSA jappoġġa l-kumpens lill-operaturi tas-settur tas-sajd u tal-akkwakultura f'każ ta' avvenimenti eċċezzjonali li jikkawżaw tfixkil sinifikanti tas-swieq.

(43)

Il-ħolqien tal-impjiegi fir-reġjuni kostali jiddependi mill-iżvilupp ta' ekonomija blu sostenibbli mmexxi lokalment li jagħti ħajja ġdida lin-nisġa soċjali ta' dawk ir-reġjuni. Sal-2030, l-industriji u s-servizzi oċeaniċi x'aktarx li ser jiksbu riżultati aqwa minn dawk tat-tkabbir tal-ekonomija dinjija u jagħtu kontribut importanti għall-impjiegi u għat-tkabbir. Biex ikun sostenibbli, it-tkabbir blu jiddependi mill-innovazzjoni u l-investiment f'negozji marittimi ġodda, u fil-bijoekonomija, fosthom mudelli tat-turiżmu sostenibbli, l-enerġija rinnovabbli mill-oċeani, il-kostruzzjoni innovattiva ta' bastimenti ta' livell għoli u servizzi ġodda tal-portijiet, li jistgħu joħolqu l-impjiegi u fl-istess ħin itejbu l-iżvilupp lokali. Filwaqt li l-investiment pubbliku fl-ekonomija blu sostenibbli jenħtieġ li jiġi integrat fil-baġit kollu tal-Unjoni, jenħtieġ li l-appoġġ mill-FEMSA jkun iffukat speċifikament fuq il-kondizzjonijiet li jgħinu l-iżvilupp tal-ekonomija blu sostenibbli u fuq it-tneħħija tal-ostakli biex ikun iffaċilitat l-investiment u l-iżvilupp ta' swieq, teknoloġiji jew servizzi ġodda. L-appoġġ għall-iżvilupp tal-ekonomija blu sostenibbli jenħtieġ li jingħata permezz ta' ġestjoni kondiviża, diretta u indiretta.

(44)

L-iżvilupp ta' ekonomija blu sostenibbli jiddependi ħafna mis-sħubijiet bejn partijiet ikkonċernati lokali li jikkontribwixxu għall-ħajja tal-komunitajiet u tal-ekonomiji kostali u interni. Jenħtieġ li l-FEMSA jipprovdi l-għodod li jippromwovu dawn is-sħubijiet. Għal dan il-għan, jenħtieġ li jingħata appoġġ mis-CLLD b'ġestjoni kondiviża. Dak l-approċċ għandu jagħti spinta lid-diversifikazzjoni ekonomika f'kuntest lokali permezz tal-iżvilupp tas-sajd kostali u intern, tal-akkwakultura u ta' ekonomija blu sostenibbli. L-istrateġiji CLLD jenħtieġ li jiżguraw li l-komunitajiet lokali f'żoni tas-sajd jew tal-akkwakultura jisfruttaw aħjar u jibbenefikaw iżjed mill-opportunitajiet li toffri l-ekonomija blu sostenibbli billi jsaħħu r-riżorsi ambjentali, kulturali, soċjali u umani u jiksbu l-vantaġġi minnhom. Għalhekk, kull sħubija lokali jenħtieġ li tirrifletti l-fokus ewlieni tal-istrateġija tagħha billi tiżgura l-involviment bilanċjat u r-rappreżentanza mill-partijiet ikkonċernati kollha tal-ekonomija blu sostenibbli lokali.

(45)

B'ġestjoni kondiviża, jenħtieġ li l-FEMSA jkun jista' jappoġġa t-tisħiħ tal-ġestjoni sostenibbli tal-baħar u l-oċean permezz tal-ġbir, il-ġestjoni u l-użu ta' data li ttejjeb l-għarfien dwar l-istat tal-ambjent tal-baħar. Dak l-appoġġ jenħtieġ li jkun immirat biex jissodisfa r-rekwiżiti tad-Direttivi 92/43/KEE u 2009/147/KE, biex jappoġġa l-ippjanar tal-ispazju marittimu u biex itejjeb il-kwalità tad-data u l-kondiviżjoni tagħha permezz tan-network Ewropew ta' osservazzjoni u data marittima.

(46)

B'ġestjoni diretta u indiretta, jenħtieġ li l-appoġġ mill-FEMSA jiffoka fuq il-kondizzjonijiet abilitanti għal ekonomija blu sostenibbli permezz tal-promozzjoni tal-governanza u l-ġestjoni integrati tal-politika marittima, permezz tat-titjib tat-trasferiment u l-użu tar-riċerka, l-innovazzjoni u t-teknoloġija fl-ekonomija blu sostenibbli, permezz tat-titjib tal-ħiliet marittimi, tal-għarfien dwar l-oċeani u tal-kondiviżjoni tad-data soċjoekonomika dwar l-ekonomija blu sostenibbli, permezz tal-promozzjoni ta' ekonomija blu sostenibbli reżiljenti għat-tibdil fil-klima u b'livell baxx ta' karbonju, u permezz tal-iżvilupp ta' riżerva ta' proġetti u ta' strumenti finanzjarji innovattivi. Jenħtieġ li jitqiesu s-sitwazzjonijiet speċifiċi tar-reġjuni ultraperiferiċi rigward l-oqsma msemmijin hawn fuq.

(47)

60 % tal-oċeani huma 'l barra mill-konfini tal-ġuriżdizzjonijiet nazzjonali. Dan ifisser responsabbiltà internazzjonali kondiviża. Il-maġġoranza tal-problemi li jiffaċċaw l-oċeani, bħall-isfruttament żejjed, it-tibdil fil-klima, l-aċidifikazzjoni, it-tniġġis u l-bijodiversità li qed tonqos, huma ta' natura transkonfinali u għaldaqstant jeħtieġu reazzjoni kondiviża. Skont il-Konvenzjoni tan-Nazzjonijiet Uniti dwar il-Liġi tal-Baħar, li l-Unjoni tifforma Parti minnha skont id-Deċiżjoni tal-Kunsill 98/392/KE (18), twaqqfu bosta drittijiet ġuriżdizzjonali, istituzzjonijiet u oqfsa speċifiċi biex jirregolaw u jimmaniġġaw l-attività tal-bniedem fl-oċeani. F'dawn l-aħħar snin qed jidher li hemm kunsens globali dwar il-ħtieġa li l-ambjent tal-baħar u l-attivitajiet marittimi tal-bniedem jiġu ġestiti b'mod aktar effettiv biex ikunu indirizzati l-pressjonijiet li dejjem qed jiżdiedu fuq l-oċeani.

(48)

Bħala attur globali, l-Unjoni ħadet impenn qawwi li tippromwovi l-governanza internazzjonali tal-oċeani f'konformità mal-Komunikazzjoni Konġunta tal-Kummissjoni u tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà tal-10 ta' Novembru 2016 bit-titolu "Il-governanza internazzjonali tal-oċeani: aġenda għall-futur tal-oċeani tagħna". Il-politika dwar il-governanza tal-oċeani tal-Unjoni tittratta l-oċeani b'mod integrat. Il-governanza internazzjonali tal-oċeani mhux biss hija essenzjali għall-kisba tal-“Aġenda 2030”, u b'mod partikolari l-SDG 14, iżda wkoll biex tiggarantixxi ibħra u oċeani li jkunu siguri, sikuri, nodfa, u ġestiti b'mod sostenibbli għall-ġenerazzjonijiet li ġejjin. L-Unjoni teħtieġ tikseb ir-riżultati ta' dawk l-impenji internazzjonali u tkun mutur għall-governanza internazzjonali aħjar tal-oċeani fil-livelli bilaterali, reġjonali u multilaterali, inkluż fil-prevenzjoni, fl-iskoraġġiment u fl-eliminazzjoni tas-sajd IUU, mhux irrappurtat u mhux irregolat, biex ittejjeb l-istruttura tal-governanza internazzjonali tal-oċeani, biex tnaqqas il-pressjonijiet fuq l-oċeani u fuq l-ibħra, biex toħloq il-kondizzjonijiet għal ekonomija blu sostenibbli, u biex issaħħaħ ir-riċerka u d-data internazzjonali dwar l-oċeani.

(49)

L-azzjonijiet li jippromwovu l-governanza internazzjonali tal-oċeani fil-kuntest tal-FEMSA għandhom l-għan li jtejbu l-istruttura ġenerali tal-proċessi, il-ftehimiet, ir-regoli u l-istituzzjonijiet internazzjonali u reġjonali biex jirregolaw u jikkontrollaw l-attività tal-bniedem fl-oċeani. Il-FEMSA jenħtieġ li jappoġġja l-arranġamenti internazzjonali li kkonkludiet l-Unjoni f'oqsma li mhumiex koperti mill-ftehimiet ta' sħubija dwar is-sajd sostenibbli (SFPAs) stabbiliti ma' diversi pajjiżi terzi, u jiffinanzja wkoll il-kontribuzzjoni obbligatorja tas-sħubija tal-Unjoni lill-organizzazzjonijiet reġjonali għall-ġestjoni tas-sajd (RFMOs). Il-ftehimiet ta' sħubija dwar is-sajd sostenibbli u l-organizzazzjonijiet reġjonali għall-ġestjoni tas-sajd ser jibqgħu jkunu ffinanzjati taħt linji differenti tal-baġit tal-Unjoni.

(50)

Għas-sigurtà u d-difiża, il-protezzjoni tal-fruntieri u s-sorveljanza marittima mtejba huma essenzjali. Skont l-Istrateġija dwar is-Sigurtà Marittima tal-Unjoni Ewropea adottata mill-Kunsill tal-Unjoni Ewropea fl-24 ta' Ġunju 2014 u l-Pjan ta' Azzjoni tagħha adottat fis-16 ta' Diċembru 2014, il-kondiviżjoni tal-informazzjoni u l-kooperazzjoni tal-Gwardja Ewropea tal-Fruntiera u tal-Kosta bejn l-Aġenzija Ewropea għall-Kontroll tas-Sajd, l-Aġenzija Ewropea għas-Sikurezza Marittima u l-Aġenzija Ewropea għall-Gwardja tal-Fruntiera u tal-Kosta huma importanti ħafna biex jintlaħqu dawn l-objettivi. Għalhekk jenħtieġ li l-FEMSA jappoġġa s-sorveljanza marittima u l-kooperazzjoni tal-gwardja tal-kosta taħt ġestjoni kondiviża kif ukoll ġestjoni diretta, inkluż billi jinxtraw l-oġġetti meħtieġa għal operazzjonijiet marittimi bi skopijiet multipli. Jenħtieġ ukoll li jippermetti lill-aġenziji rilevanti jimplimentaw l-appoġġ fil-qasam tas-sorveljanza u s-sigurtà marittima permezz tal-ġestjoni indiretta.

(51)

B'ġestjoni kondiviża, kull Stat Membru jenħtieġ li jħejji programm uniku li jenħtieġ li jiġi approvat mill-Kummissjoni. Jenħtieġ li l-Kummissjoni tivvaluta l-abbozzi tal-programmi billi tqis il-massimizzazzjoni tal-kontribut tagħhom għall-prijoritajiet tal-FEMSA u għall-objettivi ta' reżiljenza, tranżizzjoni ekoloġika u tranżizzjoni diġitali. Meta tivvaluta l-abozz ta’ programmi, jenħtieġ li l-Kummissjoni tqis ukoll il-kontribut tagħhom għall-iżvilupp tas-sajd kostali fuq skala żgħira sostenibbli, għas-sostenibbiltà ambjentali, ekonomika u soċjali, għall-kisba tal-isfidi ambjentali u soċjoekonomiċi tal-PKS, għall-prestazzjoni soċjoekonomika tal-ekonomija blu sostenibbli, għall-konservazzjoni u r-restawr tal-ekosistemi tal-baħar, għat-tnaqqis tal-iskart fil-baħar u għall-mitigazzjoni tat-tibdil fil-klima u l-adattament għalih.

(52)

Fil-kuntest tar-reġjonalizzazzjoni u bil-ħsieb li l-Istati Membri jitħeġġu jsegwu approċċ strateġiku matul it-tħejjija tal-programmi, jenħtieġ li l-Kummissjoni tivvaluta l-abbozzi tal-programmi b'kont meħud, fejn applikabbli, tal-analiżi reġjonali tal-baċir tal-baħar żviluppata mill-Kummissjoni li tindika l-elementi tajbin u d-dgħufijiet komuni fir-rigward tal-ksib tal-objettivi tal-PKS. Dik l-analiżi jenħtieġ li tiggwida kemm lill-Istati Membri, kif ukoll lill-Kummissjoni biex jinnegozjaw kull programm, filwaqt li jitqiesu l-isfidi u l-bżonnijiet reġjonali.

(53)

Il-prestazzjoni tal-FEMSA fl-Istati Membri jenħtieġ li tiġi vvalutata abbażi tal-indikaturi. L-Istati Membri jenħtieġ li jirrappurtaw dwar il-progress lejn l-istadji importanti u l-miri stabbiliti f'konformità mar-Regolament (UE) 2021/1060. Għal dan il-għan jenħtieġ li jiġi stabbilit qafas ta' monitoraġġ u evalwazzjoni.

(54)

Sabiex tingħata informazzjoni dwar l-appoġġ mill-FEMSA għall-objettivi ambjentali u klimatiċi f'konformità mar-Regolament (UE) 2021/1060, jenħtieġ li tiġi stabbilita metodoloġija bbażata fuq it-tipi ta' intervent. Dik il-metodoloġija jenħtieġ li tkun tikkonsisti mill-assenjar ta' ponderazzjoni speċifika għall-appoġġ ipprovdut f'livell li jirrifletti sa liema punt tali appoġġ jagħti kontribut għall-objettivi ambjentali u għall-objettivi klimatiċi.

(55)

Skont il-paragrafi 22 u 23 tal-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (19), jenħtieġ li l-FEMSA jiġi evalwat abbażi tal-informazzjoni miġbura f'konformità ma' rekwiżiti speċifiċi ta' monitoraġġ, filwaqt li jiġi evitat piż amministrattiv, b'mod partikolari fuq l-Istati Membri, kif ukoll ir-regolamentazzjoni żejda. Jenħtieġ li dawk ir-rekwiżiti, fejn xieraq, jinkludu indikaturi li jistgħu jitkejlu bħala bażi għall-evalwazzjoni tal-effetti tal-FEMSA fil-prattika.

(56)

Jenħtieġ li l-Kummissjoni timplimenta azzjonijiet ta' informazzjoni u ta' komunikazzjoni relatati mal-FEMSA, u l-azzjonijiet u r-riżultati tiegħu. Ir-riżorsi finanzjarji allokati għall-FEMSA jenħtieġ li jikkontribwixxu wkoll għall-komunikazzjoni korporattiva dwar il-prijoritajiet politiċi tal-Unjoni, sakemm dawn ikunu b'rabta mal-prijoritajiet tal-FEMSA.

(57)

F'konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (20), ir-Regolament tal-Kunsill (Euratom, KE) Nru 2988/95 (21), ir-Regolament tal-Kunsill (Euratom, KE) Nru 2185/96 (22) u r-Regolament tal-Kunsill (UE) 2017/1939 (23), l-interessi finanzjarji tal-Unjoni jridu jiġu protetti permezz ta' miżuri proporzjonati, inkluż miżuri relatati mal-prevenzjoni, is-sejbien, il-korrezzjoni u l-investigazzjoni ta' irregolaritajiet, inkluż frodi, mal-irkupru ta' fondi mitlufa, imħallsa bi żball jew użati b'mod mhux korrett, u, fejn xieraq, mal-impożizzjoni ta' penali amministrattivi. B'mod partikolari, f'konformità mar-Regolamenti (Euratom, KE) Nru 2185/96 u (UE, Euratom) Nru 883/2013, l-Uffiċċju Ewropew Kontra l-Frodi (OLAF) għandu s-setgħa li jwettaq investigazzjonijiet amministrattivi, inkluż kontrolli u spezzjonijiet fuq il-post, bil-għan li jiġi stabbilit jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni. L-Uffiċċju tal-Prosekutur Pubbliku Ewropew (UPPE) għandu s-setgħa, skont ir-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffettwaw l-interessi finanzjarji tal-Unjoni kif previst fid-Direttiva (UE) 2017/1371 tal-Parlament Ewropew u tal-Kunsill (24). F'konformità mar-Regolament Finanzjarju, kwalunkwe persuna jew entità li tirċievi fondi mill-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti tal-Awdituri u, fir-rigward ta' dawk l-Istati Membri li jipparteċipaw fil-kooperazzjoni msaħħa skont ir-Regolament (UE) 2017/1939, lill-UPPE, u tiżgura li kwalunkwe parti terza involuta fl-implimentazzjoni ta' fondi tal-Unjoni tagħti drittijiet ekwivalenti. Jenħtieġ li l-Istati Membri jipprevjenu, isibu u jindirizzaw b'mod effettiv kwalunkwe irregolarità, inkluż frodi, imwettqa mill-benefiċjarji. Jenħtieġ li l-Istati Membri jirrapportaw lill-Kummissjoni dwar is-sejba ta' kwalunkwe irregolarità, inkluż frodi, u dwar kwalunkwe azzjoni ta' segwitu li jkunu ħadu fir-rigward ta' tali irregolaritajiet, kif ukoll fir-rigward ta' kwalunkwe investigazzjoni tal-OLAF.

(58)

Sabiex tiżdied it-trasparenza f'dak li għandu x'jaqsam mal-użu tal-fondi tal-Unjoni u l-ġestjoni finanzjarja tajba tagħhom, b'mod partikolari biex ikun imsaħħaħ il-kontroll pubbliku tal-flus li jintużaw, jenħtieġ li ċerta informazzjoni dwar l-operazzjonijiet iffinanzjati mill-FEMSA tiġi ppubblikata f'sit web ta’ Stat Membru, f'konformità mar-Regolament (UE) 2021/1060 dwar Dispożizzjonijiet Komuni 2021-2027. Meta Stat Membru jippubblika l-informazzjoni dwar l-operazzjonijiet iffinanzjati mill-FEMSA, iridu jiġu segwiti r-regoli dwar il-protezzjoni tad-data personali stipulati fir-Regolament (UE) 2016/679 tal-Parlament Ewropew u tal-Kunsill (25).

(59)

Sabiex jiġu ssupplimentati ċerti elementi mhux essenzjali ta' dan ir-Regolament, is-setgħa li jiġu adottati atti delegati f'konformità mal-Artikolu 290 TFUE jenħtieġ li tiġi ddelegata lill-Kummissjoni fir-rigward tal-identifikazzjoni tal-iskattar tal-limitu u l-perijodu ta' żmien tal-inammissibbiltà fir-rigward tal-kriterji ta' ammissibbiltà tal-applikazzjonijiet, fir-rigward tal-arranġamenti għall-irkupru tal-għajnuna mogħtija fil-każ ta' ksur serju, fir-rigward tad-dati rilevanti tal-bidu jew tat-tmiem tal-perijodu ta' inammissibbiltà u l-kondizzjonijiet għal perijodu mnaqqas ta' inammissibbiltà u b'rispett tad-definizzjoni ta' kriterji għall-kalkolu tal-ispejjeż addizzjonali li jirriżultaw mill-iżvantaġġi speċifiċi tar-reġjuni ultraperiferiċi. Sabiex jiġu emendati ċerti elementi mhux essenzjali ta' dan ir-Regolament, is-setgħa li jiġu adottati atti delegati f'konformità mal-Artikolu 290 TFUE jenħtieġ li tiġi ddelegata wkoll lill-Kummissjoni sabiex tippermetti l-introduzzjoni ta' indikaturi tal-prestazzjoni ewlenin addizzjonali fl-Anness I. Sabiex tiġi ffaċilitata tranżizzjoni bla xkiel mill-iskema stabbilita bir-Regolament (UE) Nru 508/2014 għall-iskema stabbilita minn dan ir-Regolament, is-setgħa li jiġu adottati atti delegati f'konformità mal-Artikolu 290 TFUE għandha tiġi ddelegata wkoll lill-Kummissjoni sabiex tissupplimenta dan ir-Regolament billi tistabbilixxi dispożizzjonijiet tranżitorji. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, ukoll fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stabbiliti fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet. B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċievuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(60)

Sabiex jiġu żgurati kondizzjonijiet uniformi għall-implimentazzjoni ta' dan ir-Regolament, jenħtieġ li l-Kummissjoni tingħata setgħat ta' implimentazzjoni fir-rigward tal-programmi ta' ħidma, l-identifikazzjoni ta' teknoloġiji effiċjenti fl-użu tal-enerġija u l-istabbiliment tal-elementi metodoloġiċi biex jitkejjel it-tnaqqis tal-emissjonijiet tas-CO2 tal-magni tal-bastimenti tas-sajd, l-okkorrenza ta' avveniment eċċezzjonali, id-definizzjoni tal-każijiet ta' nuqqas ta' konformità mill-Istati Membri li jistgħu jikkawżaw interruzzjoni tal-iskadenza tal-pagament, is-sospensjoni tal-pagamenti minħabba nuqqas serju ta' konformità minn Stat Membru, il-korrezzjonijiet finanzjarji u l-identifikazzjoni tad-data tal-implimentazzjoni tal-livell ta' operazzjoni rilevanti u l-preżentazzjoni tagħhom. Ħlief fir-rigward tal-programmi ta’ ħidma, inkluż l-assistenza teknika, u l-okkorrenza ta' avveniment eċċezzjonali, jenħtieġ li dawk is-setgħat ikunu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (26).

(61)

F'konformità mal-Artikolu 193(2) tar-Regolament Finanzjarju, jenħtieġ li jkun possibbli li tingħata għotja għal azzjoni li tkun diġà bdiet, dment li l-applikant ikun jista' juri l-ħtieġa li jibda l-azzjoni qabel il-firma tal-ftehim ta' għotja. Madankollu, l-ispejjeż imġarrba qabel id-data tal-preżentazzjoni tal-applikazzjoni għal għotja mhumiex eliġibbli, ħlief f'każijiet eċċezzjonali debitament ġustifikati. Sabiex jiġi evitat kwalunkwe tfixkil fl-appoġġ tal-Unjoni li jista' jkun ta' preġudizzju għall-interessi tal-Unjoni, jenħtieġ li jkun possibbli li fid-deċiżjoni ta' finanzjament, matul perijodu limitat ta' żmien fil-bidu tal-QFP 2021-2027, u f'każijiet debitament ġustifikati biss, tkun prevista l-eliġibbiltà tal-attivitajiet u l-ispejjeż mill-bidu tas-sena finanzjarja 2021, anki jekk dawn ġew implimentati u mġarrba qabel ma ġiet ippreżentata l-applikazzjoni għal għotja. Għall-istess raġunijiet u taħt l-istess kondizzjonijiet, huwa meħtieġ li ssir deroga mill-Artikolu 193(4) ta' dak ir-Regolament Finanzjarju fir-rigward ta' għotjiet operattivi.

(62)

Minħabba li l-għanijiet ta' dan ir-Regolament ma jistgħux jinkisbu b'mod suffiċjenti mill-Istati Membri iżda jistgħu pjuttost, minħabba l-iskala jew l-effetti tagħhom, jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-għanijiet.

(63)

Sabiex tiġi żgurata l-kontinwità fl-għoti ta' appoġġ fil-qasam ta' politika rilevanti u biex l-implimentazzjoni tkun tista' ssir mill-bidu tal-QFP 2021-2027, jenħtieġ li tiġi prevista l-applikazzjoni ta' dan ir-Regolament, b'effett retroattiv, fir-rigward tal-appoġġ b'ġestjoni diretta u indiretta mill-1 ta' Jannar 2021. Konsegwentement, jenħtieġ li dan ir-Regolament jidħol fis-seħħ b'urġenza fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea,