A.

billi fir-rapport tagħha dwar il-kontijiet annwali tal-Aġenzija Ewropea għall-Mediċini għas-sena finanzjarja 2009, il-Qorti tal-Awdituri esprimiet riżervi fl-opinjoni tagħha dwar il-legalità u r-regolarità tat-tranżazzjonijiet sottostanti,

B.

billi fid-Deċiżjoni hawn fuq imsemmija tal-10 ta’ Mejju 2011 il-Parlament iddeċieda li jipposponi d-deċiżjoni tiegħu dwar l-għoti tal-kwittanza lid-Direttur Eżekuttiv tal-Aġenzija għall-implimentazzjoni tal-baġit tal-Aġenzija għas-sena finanzjarja 2009,

C.

billi l-baġit tal-Aġenzija għall-2009 kien ta’ EUR 194 000 000, li kien żieda ta’ 6.28 % fuq is-sena finanzjarja 2008,

D.

billi l-baġit tal-Aġenzija hu ffinanzjat kemm mill-baġit annwali tal-Unjoni, li jirrappreżenta 18.52 % mid-dħul totali tal-2009, u aktar u aktar, minn imposti mħallsa minn kumpaniji farmaċewtiċi għal servizzi li jistgħu jkunu mifruxa fuq aktar minn sena finanzjarja waħda, u billi konsegwentement, il-kontribut ġenerali tal-Unjoni naqas b’9.2 % bejn l-2008 u l-2009,

E.

billi l-awtorità ta’ kwittanza rċeviet tweġibiet mill-Aġenzija wara r-riżoluzzjoni tal-10 ta’ Mejju 2011 hawn fuq imsemmija tal-Parlament,

F.

billi fit-tweġibiet tagħha lill-Parlament, l-Aġenzija aġġornat lill-awtorità ta’ kwittanza dwar il-livell ta’ implimentazzjoni tar-rakkomandazzjonijiet tal-IAS, filwaqt li ddikjarat li:

1.

Jirrikonoxxi li rċieva ittra mill-President tal-Bord Amministrattiv tal-Aġenzija bid-data tas-17 ta’ Ġunju 2011 li fiha jingħad li l-Aġenzija ħadet azzjonijiet biex tindirizza n-nuqqasijiet tal-2009; jieħu nota wkoll tad-dokumenti u l-annessi li rċieva mill-Aġenzija bi tweġiba għar-riżoluzzjoni tal-Parlament tal-10 ta’ Mejju 2011 hawn fuq imsemmija; jirrikonoxxi wkoll li rċieva ittra tal-Aġent Direttur Eżekuttiv tal-Aġenzija tal-10 ta’ Awwissu 2011, wara l-mistoqsijiet li tqajmu waqt id-dibattitu dwar il-kwittanza lill-Aġenzija għall-2009 fil-laqgħa tal-Kumitat tal-Parlament għall-Kontroll tal-Baġit tat-13 ta’ Lulju 2011; jiddispjaċih, madankollu, li mhux l-informazzjoni mitluba kollha kienet ippreżentata;

2.

Jinnota, madankollu, li l-Aġenzija għandha tkompli tinforma kull tliet xhur lill-awtorità ta’ kwittanza dwar ir-riżultati tal-azzjonijiet mitluba mill-awtorità ta’ kwittanza;

3.

Jenfasizza li l-awtorità ta’ kwittanza għandha tkompli tissorvelja b’attenzjoni waqt il-proċeduri ta’ kwittanza li ġejjin il-livell ta’ implimentazzjoni tal-miżuri meħuda biex jindirizzaw id-dgħufijiet serji tal-Aġenzija żvelati mir-rapporti kemm mill-Qorti tal-Awdituri kif ukoll mill-IAS; jistenna, għalhekk, li l-Aġenzija għandha tinforma lill-awtorità ta’ kwittanza dwar l-azzjonijiet implimentanti u r-riżultati tagħhom u tippreżenta d-dokumenti mitluba, speċjalment rigward il-kwistjonijiet li ġejjin:

4.

Jinnota l-informazzjoni li waslet rigward is-sistema ta’ kontroll li għandha l-għan li tevita jew li tidentifika fil-waqt l-iżbalji persistenti fil-proċeduri ta’ akkwist; jistenna li jirċievi l-pjan ta’ akkwist multiannwali; għalhekk, ifakkar lill-Aġenzija tkompli ttejjeb il-kwalità tas-sistema tagħha ta’ akkwist u biex tkun strettament konformi mar-rekwiżiti tar-regolamenti relevanti dwar l-akkwist pubbliku, sabiex tirretifika n-nuqqasijiet li indikathom il-Qorti tal-Awdituri;

5.

Jinnota l-bidu tal-azzjonijiet biex jiġi żviluppat pjan ta’ azzjoni dwar it-titjib tal-proċeduri ta’ akkwist; jistieden lill-Aġenzija tkompli għaddejja minnufih bl-adozzjoni ta’ pjan ta’ azzjoni biex issib rimedju għan-nuqqasijiet fil-proċeduri ta’ akkwist, partikolarment l-iżbalji fil-ġestjoni tal-proċeduri tal-għoti tal-kuntratti, billi tipprovdi aktar kontrolli rigorużi tekniċi u proċedurali, u biex konsegwentament tinforma lill-awtorità ta’ kwittanza;

6.

Ifakkar li fir-rapport annwali tagħha tal-2009, il-Qorti tal-Awdituri kienet iddikjarat li l-aġenzija ma wettqitx biżżejjed kontrolli biex timmitiga r-riskji ta’ żbalji f’numru ta’ proċeduri għall-akkwist ta’ kuntratti ta’ qafas kbar tal-IT; ifakkar ukoll li l-verifika wriet żbalji li affetwaw ir-regolarità ta’ dawn l-operazzjonijiet u li ffurmaw il-bażi għall-opinjoni mill-Qorti tal-Awdituri b’riżervi dwar il-legalità u r-regolarità tat-tranżazzjonijiet li fuqhom kienu bbażati l-kontijiet tal-Aġenzija;

7.

Jirrimarka li fir-rapport annwali tagħha dwar l-Aġenzija għall-2009, il-Qorti tal-Awdituri rrappurtat li madwar EUR 14 800 000 minn riport ta’ EUR 19 500 000 (38 % tal-impenji tal-Aġenzija għall-2009) kienu għal attivitajiet li kienu għadhom ma ġewx implimentati (jew, f’xi każijiet, beni li ma ngħatawx għal servizzi li jistgħu jkunu mifruxa fuq iktar minn sena finanzjarja waħda) fl-aħħar tas-sena; ifakkar għalhekk lill-Aġenzija biex tieħu azzjoni f’dan ir-rigward u jistenna b’ħerqa li jirċievi assigurazzjoni mill-Qorti tal-Awdituri dwar dan;

8.

Jieħu nota tal-informazzjoni mill-Aġenzija li mill-1 ta’ Jannar 2011, l-Aġenzija introduċiet Sistema ta’ Ppjanar tar-Riżorsi tal-Impriża (ERP), fornita minn SAP, biex issib rimedju għad-dewmien kbir fl-ordnijiet ta’ rkupru; jieħu nota li b’din is-sistema l-ġdida l-Aġenzija ddaħħal id-data mis-sistemi operazzjonali attwali tagħha (pereżempju SIAMED) permezz ta’ pannell direttament fil-modulu finanzjarju SAP;

9.

Jirrikonoxxi l-impenn tal-Aġenzija li tillimita r-riskji tagħha dovuti għal varjazzjoni tar-rata tal-kambju u li mill-11 ta’ Ġunju 2010 rrevediet il-Politika tat-Teżor tagħha billi: stabbiliet kumitat ta’ konsultazzjoni intern biex jagħti pariri lill-uffiċjal kontabilist dwar strateġiji ta’ ħħeġġjar; llimitat l-iħħeġġjar għal 50 % tar-rekwiżit stmat; u billi żgurat li r-rati li jkunu jistgħu jinkisbu fis-suq ikunu l-istess bħar-rata tal-kosting tal-baġit jew jaqbżuhom;

10.

Jieħu nota tat-tweġibiet tal-Aġenzija dwar il-konformità mal-Kodiċi ta’ Kondotta tagħha, permezz tal-istabbiliment ta’ prinċipji u gwida dwar l-indipendenza u l-kunfidenzjalità applikabbli għall-Bord Amministrattiv u għall-membri tal-kumitati, għall-esperti u għall-persunal tal-Aġenzija; konsegwentament jippretendi mill-Aġenzija li tivvaluta fid-dettall, qabel l-allokazzjoni ta’ mexxejja tat-timijiet tal-proġetti għall-prodotti, jekk l-interessi ddikjarati mill-membri tal-persunal jistgħux jinfluwenzaw l-imparzjalità u l-indipendenza tagħhom; jistenna li d-dokumenti tal-Aġenzija dwar il-kunflitti ta’ interess għandhom ikunu aġġornati;

11.

Jieħu nota tal-intenzjoni tal-Aġenzija li tapplika r-rakkomandazzjoni tal-IAS mill-verifika ta’ segwitu tiegħu tal-2010 billi tadotta approċċ ibbażat fuq ir-riskji u tiffoka l-kontrolli fuq persunal li jiddikjara l-interessi; jistieden lill-Aġenzija tinforma lill-awtorità ta’ kwittanza dwar l-iskeda ta’ żmien u dwar il-pjan biex tiġi applikata din ir-rakkomandazzjoni tal-IAS qabel tmiem l-2011;

12.

Jirrikonoxxi, madankollu, it-tweġiba tal-Aġenzija li fiha jingħad li m’hemm ebda oneru fuqha li titlob jew tissorvelja d-dikjarazzjoni annwali tal-interessi finanzjarji ta’ esperti responsabbli għall-valutazzjoni ta’ prodotti mediċinali, peress li dan huwa responsabilità tal-awtoritajiet kompetenti tal-Istati Membri (Artikolu 126b tad-Direttiva 2001/83/KE (7) kif emendata bid-Direttiva 2004/27/KE (8)); jitlob għalhekk lill-Kummissjoni biex tfakkar l-awtoritajiet rispettivi fl-Istati Membri dwar l-obbligi tagħhom f’din il-kwistjoni;

13.

Jenfasizza li mhix biss ir-reputazzjoni tal-Aġenzija li tista’ tiġi affettwata f’każijiet fejn il-valutazzjonijiet jistgħu jiġu kkontestati fuq il-bażi tal-possibilità ta’ kunflitti ta’ interess imma wkoll li kunflitti simili ta’ interess ma jiggarantixxux il-protezzjoni ottimali tas-saħħa taċ-ċittadini Ewropej;

14.

Jinnota li, mill-1 ta’ Lulju 2011, il-formola ġdida u elettronika tad-Dikjarazzjoni tal-Interessi (e-DOI) saret topera u l-esperti kollha ntalbu jimlew l-e-DOI l-ġdida u li l-e-DOIs tal-esperti kollha inklużi fil-bażi ta’ data tal-Esperti saru disponibbli għall-pubbliku fuq is-sit elettroniku tal-Aġenzija mit-30 ta’ Settembru 2011; jinnota wkoll li l-Memorandum ta’ Fehim bejn l-Aġenzija u kull Awtorità Kompetenti Nazzjonali dwar is-sorveljanza tal-livell xjentifiku u l-indipendenza tal-evalwazzjoni mwettqa mill-Awtorità Kompetenti Nazzjonali għal servizzi li għandhom jiġu pprovduti lill-Aġenzija sar effettiv mill-4 ta’ Lulju 2011;

15.

Jistieden lill-Aġenzija tinforma lill-awtorità ta’ kwittanza dwar azzjonijiet meħuda rigward kwistjonijiet relatati mal-konformità effettiva mal-Kodiċi ta’ Kondotta tagħha fir-rigward tal-ġestjoni tal-kunflitti ta’ interess;

16.

Jinsisti, imma jwissi wkoll lill-Aġenzija, li l-azzjonijiet kollha msemmija fir-rapporti rispettivi tal-awditjar, inkluż dak għas-sena 2010, għandhom ikunu implimentati għalkollox qabel il-bidu tal-proċedura ta’ kwittanza li jmiss;

17.

Jieħu nota tat-tweġiba tal-Aġenzija li fiha jingħad li sewwiet in-nuqqasijiet identifikati mill-IAS għall-għażla tal-aġenti kuntrattwali u li bdew jitħaddmu istruzzjonijiet ta’ ħidma u mudelli riveduti u li l-persunal ingħata taħriġ speċifiku; konsegwentament jistieden lill-Aġenzija żżomm lill-awtorità ta’ kwittanza aġġornata dwar il-livell ta’ implimentazzjoni ta’ dawn l-azzjonijiet; jistenna b’ħerqa li r-rapport 2010 tal-Qorti tal-Awdituri jistabbilixxi jekk l-assigurazzjoni mill-Aġenzija hijiex fondata tajjeb;

18.

Jirreferi, fir-rigward tal-osservazzjonijiet l-oħra li qed jakkumpanjaw id-Deċiżjoni tiegħu dwar il-kwittanza, li huma ta’ natura orizzontali, għar-riżoluzzoni tiegħu tal-10 ta’ Mejju 2011 (9) dwar il-prestazzjoni, il-ġestjoni finanzjarja u l-kontroll tal-aġenziji.