10.3.2010   

MT

Il-Ġurnal Uffiċjali tal-Unjoni Ewropea

L 60/17

(1)

Ir-Regolamenti tal-Kummissjoni (KE) Nru 451/2000 (2) u (KE) Nru 703/2001 (3) jistipulaw regoli dettaljati għall-implimentazzjoni tat-tieni stadju tal-programm ta’ ħidma msemmi fl-Artikolu 8(2) tad-Direttiva tal-Kunsill 91/414/KEE u jistabbilixxu lista ta’ sustanzi attivi li għandhom jiġu vvalutati, bl-għan tal-inklużjoni possibbli tagħhom fl-Anness I tad-Direttiva 91/414/KEE. Din il-lista tinkludi l-malatajon. Permezz tad-Deċiżjoni tal-Kummissjoni 2007/389/KE (4) ġie deċiż li l-malatajon ma jkunx inkluż fl-Anness I tad-Direttiva 91/414/KEE.

(2)

Skont l-Artikolu 6(2) tad-Direttiva 91/414/KEE n-notifikant oriġinali ressaq applikazzjoni ġdida li titlob l-applikazzjoni tal-proċedura mgħaġġla prevista fl-Artikoli 14 sa 19 tar-Regolament tal-Kummissjoni (KE) Nru 33/2008 tas-17 ta’ Jannar 2008 li jistipula regoli dettaljati għall-applikazzjoni tad-Direttiva tal-Kunsill 91/414/KEE fir-rigward ta’ proċedura regolari u aċċellerata għall-valutazzjoni ta’ sustanzi attivi li kienu jagħmlu parti mill-programm ta’ ħidma msemmi fl-Artikolu 8(2) ta’ dik id-Direttiva iżda li ma ġewx inklużi fl-Anness I tagħha (5).

(3)

L-applikazzjoni ġiet ippreżentata lir-Renju Unit, li ssostitwixxa lill-Finlandja u li oriġinarjament kien maħtur bħala l-Istat Membru relatur bir-Regolament (KE) Nru 451/2000. Il-perjodu ta’ żmien għall-proċedura mgħaġġla ġie rispettat. L-ispeċifikazzjoni tas-sustanza attiva hi l-istess bħas-suġġett tad-Deċiżjoni 2007/389/KE filwaqt li l-użu inizjalment sostnut fuq it-tuffieħ ġie sostitwit mill-frawli u r-rata ta' applikazzjoni ġiet imnaqqsa. L-applikazzjoni tikkonforma wkoll mar-rekwiżiti proċedurali u sostantivi li fadal tal-Artikolu 15 tar-Regolament (KE) Nru 33/2008.

(4)

Ir-Renju Unit analizza l-informazzjoni l-ġdida u d-dejta mressqa min-notifikant u ħejja rapport addizzjonali fi Frar 2009.

(5)

Ir-rapport addizzjonali ġie rivedut inter pares mill-Istati Membri u mill-EFSA u ġie ppreżentat lill-Kummissjoni fis-17 ta’ Lulju 2009 fil-format tar-Rapport Xjentifiku tal-EFSA għall-malatajon (6). Dan ir-rapport ġie rivedut mill-Istati Membri u mill-Kummissjoni fi ħdan il-Kumitat Permanenti dwar il-Katina Alimentari u s-Saħħa tal-Annimali u ġie ffinalizzat fit-22 ta’ Jannar 2010 fil-format tar-rapport ta’ reviżjoni tal-Kummissjoni għall-malatajon.

(6)

Il-valutazzjoni ġdida mill-Istat Membru relatur u l-konklużjoni l-ġdida mill-EFSA kkonċentraw fuq it-tħassib li jwassal għan-noninklużjoni. Dan it-tħassib kien jikkonċerna b'mod partikolari l-preżenza fil-materjal tekniku ta' livelli varji ta' isomalatajon, impurità li tikkontribwixxi b'mod sinifikanti għal-livell ta' tossiċità tal-malatajon u li l-ġenotossiċità tagħha ma tistax tiġi eskluża. Minħabba dan il-fatt kien impossibbli li jiġi vvalutat ir-riskju għall-operaturi, il-ħaddiema u n-nies fil-qrib. Barra minn hekk, l-informazzjoni dwar l-effetti ta' ċerti metaboliti tossikoloġikament rilevanti kienet insuffiċjenti, u għalhekk, ma ntweriex li l-esponiment stmat tal-konsumaturi li jirriżulta minn konsum akut u kroniku ta' għelejjel li jittieklu, hu aċċettabbli.

(7)

Tressqet informazzjoni u dejta ġdida min-notifikant fid-dossier il-ġdid u saret valutazzjoni ġdida, kif inkluż fir-rapport addizzjonali u fil-konklużjonijiet tal-EFSA. Dik id-dejta ġdida turi li l-ġenotossiċità tal-malatajon li jkun fih mhux aktar minn 2 g/kg isomalatajon tista' tiġi eskluża. Għalhekk, kien possibbli li jiġu ddeterminati livelli aċċettabbli ta' esponiment tal-operaturi, il-ħaddiema u n-nies fil-qrib. L-użu minn dawk mhux professjonisti jista', madankollu, iqajjem tħassib, billi wieħed ma jistax jassumi li dawn jirrikorru għat-tagħmir ta’ protezzjoni personali xieraq. Għaldaqstant, dan l-użu ma jistax jiġi awtorizzat.

(8)

Bla ħsara għal dawk il-konklużjonijiet, hu xieraq li tinkiseb iktar informazzjoni dwar ċerti punti speċifiċi. L-Artikolu 6(1) tad-Direttiva 91/414/KE jistipula li l-inklużjoni ta’ sustanza fl-Anness I tista’ tkun suġġetta għall-kundizzjonijiet. Għalhekk, hu xieraq li n-notifikant jippreżenta aktar informazzjoni rigward il-konsum mill-konsumaturi, il-valutazzjoni tar-riskju akut u fuq medda twila ta' żmien għal għasafar insettivori, u dwar il-kwantifikazzjoni tal-potenza differenti tal-malaoxon u l-malatajon, qabel ma jingħataw l-awtorizzazzjonijiet. Fir-rigward tal-esponiment tal-konsumatur, l-informazzjoni disponibbli bħalissa tippermetti madankollu li wieħed jikkonkludi li r-riskju hu aċċettabbli, minħabba l-marġni kbir ta' sikurezza li jeżisti.

(9)

Għaldaqstant, id-dejta u l-informazzjoni addizzjonali pprovduti min-notifikant jippermettu li jiġu eliminati l-punti speċifiċi ta' tħassib li wasslu għan-noninklużjoni. Ma tqajmet l-ebda mistoqsija xjentifika miftuħa oħra.

(10)

Mill-bosta eżamijiet li saru ħareġ li l-prodotti għall-protezzjoni tal-pjanti li fihom il-malatajon jistgħu jkunu mistennija li jissodisfaw, b'mod ġenerali, ir-rekwiżiti stabbiliti fl-Artikolu 5(1) (a) u (b) tad-Direttiva 91/414/KEE, b'mod partikolari fir-rigward tal-użi li ġew eżaminati u rrapportati fid-detall fir-rapport ta' reviżjoni tal-Kummissjoni. Għaldaqstant, huwa xieraq li l-malatajon jiġi inkluż fl-Anness I, biex jiġi assigurat li fl-Istati Membri kollha jkunu jistgħu jingħataw l-awtorizzazzjonijiet tal-prodotti għall-protezzjoni tal-pjanti li fihom din is-sustanza skont id-dispożizzjonijiet ta’ dik id-Direttiva.

(11)

Għaldaqstant, huwa xieraq li d-Diretttiva 91/414/KEE tiġi emendata skont dan.

(12)

Il-miżuri stipulati f’din id-Direttiva huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali,