Rapport Finali tal-Uffiċjal tas-Seduta (1)

Il-Każ M.9660 – Google/Fitbit

(Test b’rilevanza għaż-ŻEE)

(2021/C 194/04)

Fil-15 ta’ Ġunju 2020, il-Kummissjoni rċeviet notifika ta’ konċentrazzjoni proposta skont l-Artikolu 4 tar-Regolament dwar l-Għaqdiet (2) li permezz tagħha Google, LLC (“Google”) takkwista skont it-tifsira tal-Artikolu 3(1)(b) tar-Regolament dwar l-Għaqdiet, il-kontroll sħiħ ta’ Fitbit, Inc. (“Fitbit”) permezz tax-xiri ta’ ishma (“it-Tranżazzjoni Proposta”).

Fit-8 ta’ Lulju 2020, jiena rrikonoxxejt lil Privacy International bħala terza persuna interessata skont l-Artikolu 18(4), it-tieni sentenza, tar-Regolament dwar l-Għaqdiet, l-Artikoli 11(c) u 16(1) tar-Regolament dwar l-Implimentazzjoni tal-Konċentrazzjonijiet (3), u l-Artikolu 5 tad-Deċiżjoni 2011/695/UE.

Fl-4 ta’ Awwissu 2020, il-Kummissjoni bdiet proċedimenti skont l-Artikolu 6(1)(c) tar-Regolament dwar l-Għaqdiet (id-“Deċiżjoni skont l-Artikolu 6(1)(c)”).

Fil-21 ta’ Awwissu 2020, Google ppreżentat kummenti bil-miktub dwar id-Deċiżjoni skont l-Artikolu 6(1)(c).

Fit-2 ta’ Settembru 2020, jiena rrikonoxxejt lil BEUC, l-Organizzazzjoni Ewropea tal-Konsumaturi, bħala terza persuna interessata.

Fit-22 ta’ Settembru u fis-16 ta’ Ottubru 2020, il-Kummissjoni u Google qablu dwar estensjonijiet tal-limitu ta’ żmien għall-investigazzjoni tal-Kummissjoni, skont l-Artikolu 10(3), it-tieni subparagrafu, tar-Regolament dwar l-Għaqdiet, b’total ta’ 15-il jum ta’ xogħol.

Fit-28 ta’ Settembru 2020, Google ppreżentat impenji skont l-Artikolu 8(2) tar-Regolament dwar l-Għaqdiet sabiex tindirizza t-tħassib dwar il-kompetizzjoni identifikat mill-Kummissjoni.

Fid-29 ta’ Settembru 2020, il-Kummissjoni nediet test tas-suq dwar dawn l-impenji. Il-Kummissjoni pprovdiet lil Google b’reazzjoni dettaljata dwar l-eżitu tat-testijiet tas-suq matul diversi sejħiet f’Ottubru u fil-bidu ta’ Novembru 2020.

Fl-4 ta’ Novembru 2020, Google ppreżentat impenji riveduti skont l-Artikolu 8(2) tar-Regolament dwar l-Għaqdiet.

L-abbozz tad-deċiżjoni jiddikjara li t-Tranżazzjoni Proposta hija kompatibbli mas-suq intern u mal-Ftehim ŻEE, soġġett għal konformità sħiħa mal-impenji riveduti.

B’mod ġenerali, inqis li l-eżerċizzju effettiv tad-drittijiet proċedurali ġie osservat matul dawn il-proċedimenti.

(1)  Skont l-Artikoli 16 u 17 tad-Deċiżjoni 2011/695/UE tal-President tal-Kummissjoni Ewropea tat-13 ta’ Ottubru 2011 dwar il-funzjoni u t-termini ta’ referenza tal-uffiċjal tas-seduta f’ċerti proċedimenti dwar il-kompetizzjoni (ĠU L 275, 20.10.2011, p. 29) (“id-Deċiżjoni 2011/695/UE”).

(2)  Ir-Regolament tal-Kunsill (KE) Nru 139/2004 dwar il-kontroll ta’ konċentrazzjonijiet bejn impriżi (ĠU L 24, 29.1.2004, p. 1) (ir-“Regolament dwar l-Għaqdiet”).

(3)  Ir-Regolament tal-Kummissjoni (KE) Nru 802/2004 li jimplementa r-Regolament tal-Kunsill (KE) Nru 139/2004 dwar il-kontroll tal-konċentrazzjonijiet bejn l-impriżi (ĠU L 133, 30.4.2004, p. 1) (“ir-Regolament dwar l-Implimentazzjoni tal-Konċentrazzjonijiet”).