IL-KUMMISSJONI EWROPEA

Brussell, 28.5.2020

COM(2020) 441 final

2020/0111(NLE)

Proposta għal

REGOLAMENT TAL-KUNSILL

li jistabbilixxi Strument ta’ Rkupru tal-Unjoni Ewropea insostenn tal-irkupru wara l-pandemija tal-COVID-19

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Il-pandemija tal-COVID-19 tikkostitwixxi fi kriżi mifruxa u serja tas-saħħa pubblika. Hija taffettwa b’mod gravi liċ-ċittadini, lis-soċjetajiet u lill-ekonomiji madwar id-dinja. Il-firxa tal-kriżi tas-saħħa u r-reazzjonijiet ta’ politika biex tiġi kkontrollata huma bla preċedent. B’hekk teżisti inċertezza kbira dwar ir-riperkussjonijiet soċjoekonomiċi tagħha. F’dan l-istadju diġà huwa ċert li tippreżenta sfidi kbar u mingħajr preċedent għas-sistemi finanzjarji u ekonomiċi tal-Istati Membri. Skont it-tbassir ekonomiku tar-rebbiegħa tal-Kummissjoni 1 , il-PDG tal-UE huwa mbassar li jonqos b’madwar 7,5 % din is-sena - ferm aktar milli matul il-kriżi finanzjarja globali fl-2009 - u li jirkupra b’ 6 % biss fl-2021, filwaqt li r-rata tal-qgħad tal-UE mistennija tiżdied għal 9 % fl-2020, bir-riskju li jiżdiedu l-faqar u l-inugwaljanza.

B’rispons, l-Istati Membri adottaw miżuri eċċezzjonali ta’ natura ekonomika u finanzjarja. Flimkien mal-effett tal-hekk imsejħa “stabbilizzaturi awtomatiċi”, jiġifieri pagamenti previsti fil-qafas tal-assigurazzjoni kontra l-qgħad u tas-sistemi tas-sigurtà soċjali flimkien mat-telf ta’ dħul mit-taxxa, dawn il-miżuri għandhom impatt konsiderevoli fuq il-finanzi pubbliċi tagħhom bid-defiċit aggregat tal-amministrazzjoni pubblika jiżdied minn 0,6 % tal-PDG fl-2019 għal 8,5 % tal-PDG kemm fiż-żona tal-euro kif ukoll fl-UE din is-sena.

Ix-xokk għall-ekonomija tal-UE huwa simetriku, fis-sens li l-pandemija laqtet lill-Istati Membri kollha, madankollu l-impatt tal-pandemija jvarja b’mod konsiderevoli bejn l-Istati Membri, l-istess bħall-kapaċità tagħhom li jassorbu x-xokk ekonomiku u fiskali u jirreaġixxu għalih, skont l-istrutturi ekonomiċi speċifiċi u l-kundizzjonijiet inizjali tal-Istati Membri. B’riżultat ta’ dan hemm ir-riskju li l-kriżi tkabbar id-disparitajiet fl-Unjoni, u b’hekk thedded ir-reżiljenza ekonomika u soċjali kollettiva.

L-Unjoni aġixxiet b’mod rapidu biex tipprovdi rispons kollettiv koordinat u b’saħħtu għall-konsegwenzi soċjali u ekonomiċi tal-kriżi, fil-limiti tal-Qafas Finanzjarju Pluriennali attwali li jiskadi fl-2020. Dak ir-rispons jikkomplementa l-miżuri ekonomiċi u finanzjarji diskrezzjonali meħuda mill-Istati Membri.

Il-kriżi tista’ toħloq dannu fit-tul għat-tessut ekonomiku tal-Unjoni sakemm ma tiġix miġġielda b’rispons politiku proporzjonat, ta’ żmien qasir u medju, adottat fil-livell tal-Unjoni.

Pjan komprensiv għall-irkupru Ewropew se jkun jeħtieġ investiment pubbliku u privat massiv fil-livell Ewropew, biex l-Unjoni ssegwi b’mod sod il-perkors lejn irkupru sostenibbli u reżiljenti, bil-ħolqien ta’ impjiegi ta’ kwalità għolja u bit-tiswija tal-ħsara immedjata kkawżata mill-pandemija tal-COVID-19 filwaqt li jiġu appoġġati l-prijoritajiet ekoloġiċi u diġitali tal-Unjoni. Sabiex jiġi pprovdut il-finanzjament għall-att propost, il-Kummissjoni tipproponi emenda tal-[ORD] li tkun tawtorizza lill-Unjoni biex tissellef b’mod temporanju u eċċezzjonali l-ammont ta’ EUR 750 biljun fi prezzijiet tal-2018, biex iżżid il-limitu massimu tar-riżorsi proprji biex takkomoda l-obbligazzjonijiet u l-obbligazzjonijiet kontinġenti għas-self lill-Istati Membri. L-att propost jiddetermina l-allokazzjoni tal-fondi għall-programmi differenti tal-Unjoni skont l-istrateġija stabbilita fil-Pjan ta’ Rkupru tal-Unjoni Ewropea.

EUR 500 biljun fi prezzijiet tal-2018 se jintefqu għal appoġġ li ma jitħallasx lura, appoġġ li jitħallas lura permezz ta’ strumenti finanzjarji jew għal proviżjonament għall-garanziji baġitarji u nefqa relatata.

EUR 250 biljun fi prezzijiet tal-2018 se jintużaw biex jiġi pprovdut self lill-Istati Membri. L-Unjoni se ġġorr l-obbligazzjoni kontinġenti fil-forma ta’ garanzija għal dak is-self sakemm jitħallas lura.

L-Artikolu 3 jiffissa l-ammont massimu li jista’ jiffinanzja l-Istrument. L-Artikolu 3 jistipula wkoll b’mod ċar kif jistgħu jintużaw il-fondi, u jiddeskrivi l-programmi riċevituri, kif ukoll in-natura tal-appoġġ (għotjiet, self u garanziji). Fl-Artikoli 2 u 4 dan ir-Regolament jillimita wkoll b’mod strett l-ambitu u l-perjodu li fih jistgħu jintużaw il-fondi. Dan jeskludi li l-Istrument ta’ Rkupru tal-Unjoni Ewropea jista’ jintuża għal kwalunkwe skop għajr l-indirizzar tal-konsegwenzi ekonomiċi u soċjali diretti tal-kriżi.

•Konsistenza ma’ politiki oħra tal-Unjoni

L-Istrument ta’ Rkupru tal-Unjoni Ewropea jipprovdi finanzjament għall-miżuri u l-azzjonijiet li għandhom jitwettqu kif deskritt fil-Pjan tal-Irkupru tal-Unjoni Ewropea. Ir-riżorsi miġbura permezz tal-ħruġ se jintużaw għall-programmi tal-Unjoni li jaqgħu fil-qafas finanzjarju pluriennali li jmiss fl-oqsma li ġejjin:

·L-għoti ta’ appoġġ fil-forma ta’ għotjiet u self biex jiġu implimentati pjanijiet ta’ rkupru u ta’ reżiljenza tal-Istati Membri skont il-Faċilità ta’ Rkupru u ta’ Reżiljenza;

·L-għoti ta’ appoġġ ġdid ta’ investiment fil-qafas tal-garanziji baġitarji eżistenti u proposti (FEIS/InvestEU), fost l-oħrajn għal (1) kumpaniji milquta mill-kriżi iżda vijabbli biex joħorġu mill-kriżi, b’mod partikolari biex titħaffef it-tranżizzjoni ekoloġika u diġitali; (2) appoġġ immirat għal proġetti ta’ interess strateġiku Ewropew għal ktajjen ta’ provvista tas-suq intern biex tiġi żviluppata l-awtonomija strateġika tal-UE f’setturi u kapaċitajiet ewlenin;

·Appoġġ imsaħħaħ għar-reġjuni u s-setturi milquta mill-kriżi permezz ta’ miżuri tal-politika ta’ koeżjoni msaħħa;

·L-appoġġ għar-riċerka u l-innovazzjoni b’rispons għall-pandemija tal-COVID-19;

·It-tisħiħ tal-livell ta’ tħejjija għall-kriżijiet u t-titjib tar-reżiljenza strateġika tas-sistemi tal-kura tas-saħħa tal-Unjoni;

·Il-mitigazzjoni tal-impatt tal-pandemija tal-COVID-19 fuq it-tranżizzjoni ġusta lejn ekonomija ekoloġika fit-territorji;

·L-appoġġ għall-miżuri li jindirizzaw l-impatt tal-pandemija tal-COVID-19 fuq l-iżvilupp rurali;

·L-appoġġ għall-pajjiżi sħab, b’mod partikolari fil-Balkani tal-Punent, fil-Viċinat u fl-Afrika, fl-isforzi tagħhom biex jiġġieldu u jirkupraw mill-impatt tal-pandemija u biex isaħħu r-reżiljenza tagħhom.

L-azzjonijiet u l-miżuri se jitwettqu f’konformità mal-kundizzjonijiet stipulati fl-atti bażiċi li jistabbilixxu l-istrumenti ta’ politika. Minħabba f’hekk il-Kummissjoni qed tippreżenta b’mod parallel il-proposti leġiżlattivi neċessarji li jiżguraw li dawk l-istrumenti ta’ politika jistgħu jirċievu d-dħul assenjat estern li jirriżulta mill-implimentazzjoni ta’ dan ir-Regolament.    

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

L-Artikolu 122 tat-Trattat dwar il-Funzjonament tal-Unjoni Ewropea jipprevedi l-possibbiltà ta’ miżuri, deċiżi fi spirtu ta’ solidarjetà bejn l-Istati Membri, li jkunu xierqa għas-sitwazzjoni ekonomika. Is-sitwazzjoni attwali hija bla preċedent. Hija kkaratterizzata minn diffikultajiet serji li huma kkawżati minn ċirkostanzi eċċezzjonali li mhumiex fil-kontroll tal-Istati Membri. Għaldaqstant, huwa xieraq li jiġu adottati miżuri temporanji eċċezzjonali skont l-Artikolu 122 TFUE insostenn tal-irkupru u tar-reżiljenza fl-Unjoni.

•Sussidjarjetà (għall-kompetenza mhux esklużiva)

L-objettiv segwit b’dan l-istrument ma jistax jinkiseb b’mod suffiċjenti mill-Istati Membri individwalment minħabba l-iskala tal-miżuri li jeħtieġ li jittieħdu. L-Istrument ta’ Rkupru tal-Unjoni Ewropea jippermetti lill-Unjoni tikkomplementa l-miżuri ekonomiċi u finanzjarji tal-Istati Membri, b’mod partikolari fil-forma ta’ “stabbilizzaturi awtomatiċi” u miżuri ekonomiċi u finanzjarji diskrezzjonarji, b’żieda rapida, immirata u sinifikanti fin-nefqa diskrezzjonarja.

Tali mobilizzazzjoni komplementari tal-fondi tiżgura li s-suq intern ma jiġix imminat mid-differenzi fl-abbiltà tal-Istati Membri li jimmobilizzaw il-fondi, u fi spirtu ta’ solidarjetà tipprovdi finanzjament anki lill-Istati Membri li għandhom spazju fiskali limitat għan-nefqa diskrezzjonarja. Barra minn hekk tiżgura li n-nefqa ssir fuq il-bażi ta’ strateġija ekonomika koerenti kkoordinata bejn l-Istati Membri.

Hija biss tali azzjoni konġunta motivata minn spirtu ta’ solidarjetà bejn l-Istati Membri fi żmien ta’ kriżi li tista’ tiżgura li jiġu mobilizzati riżorsi suffiċjenti għall-ġenerazzjoni ta’ interventi effettivi mill-Unjoni fl-oqsma jew is-setturi l-iktar milquta.

•Proporzjonalità

•Għażla tal-istrument

Il-Kummissjoni tqis li jkun opportun li taġixxi permezz ta’ regolament minħabba l-applikabbiltà diretta u immedjata tiegħu u l-ambitu ġenerali tiegħu.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Konsultazzjonijiet mal-partijiet ikkonċernati

•Ġbir u użu tal-għarfien espert

•Valutazzjoni tal-impatt

•Idoneità regolatorja u simplifikazzjoni

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

2020/0111 (NLE)

Proposta għal

REGOLAMENT TAL-KUNSILL

li jistabbilixxi Strument ta’ Rkupru tal-Unjoni Ewropea insostenn tal-irkupru wara l-pandemija tal-COVID-19

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 122 tiegħu,

Wara li kkunsidra l-proposta tal-Kummissjoni Ewropea,

Billi:

(1)Sabiex irażżnu t-tixrid tal-marda tal-coronavirus (“COVID-19”), li fil-11 ta’ Marzu 2020 kienet iddikjarata pandemija mill-Organizzazzjoni Dinjija tas-Saħħa, l-Istati Membri adottaw sett ta’ miżuri mingħajr preċedent.

(2)Dawn il-miżuri, meħuda b’rispons għas-sitwazzjoni eċċezzjonali, li mhijiex fil-kontroll tal-Istati Membri, ikkawżaw disturbi sinifikanti tal-attivitajiet ekonomiċi li kienu riflessi fi tnaqqis qawwi fil-prodott domestiku gross u impatt sinifikanti fuq l-impjiegi, il-kundizzjonijiet soċjali, il-faqar u l-inugwaljanzi. B’mod partikolari, dawk il-miżuri fixklu l-ktajjen ta’ provvista u l-produzzjoni u kkawżaw assenzi mix-xogħol. Barra minn hekk, il-provvista ta’ ħafna servizzi saret impossibbli jew diffiċli ħafna. Fl-istess ħin, id-domanda tal-konsumaturi naqset. Ħafna negozji qed jesperjenzaw nuqqas ta’ likwidità, u s-solvenza tagħhom hija f’riskju, filwaqt li s-swieq finanzjarji huma volatili ħafna. Setturi ewlenin bħall-ivvjaġġar u t-turiżmu huma partikolarment milquta b’mod qawwi. B’mod aktar ġenerali, dawk il-miżuri diġà wasslu jew se jwasslu għal deterjorament serju tas-sitwazzjoni finanzjarja ta’ ħafna negozji fl-Unjoni.

(3)Il-kriżi nfirxet malajr fit-territorju tal-Unjoni u f’pajjiżi terzi. Għall-2020 hija prevista kontrazzjoni qawwija tat-tkabbir fl-Unjoni. Hemm ir-riskju li l-irkupru jvarja ħafna fl-Istati Membri differenti, u b’hekk tiżdied id-diverġenza bejn l-ekonomiji nazzjonali. L-abbiltà fiskali differenti tal-Istati Membri li jipprovdu appoġġ finanzjarju fejn ikun meħtieġ l-iktar għall-irkupru u d-diverġenza tal-miżuri nazzjonali tipperikola s-suq uniku kif ukoll il-koeżjoni soċjali u territorjali.

(4)Hija meħtieġa ġabra komprensiva ta’ miżuri għall-irkupru ekonomiku, li tirrikjedi ammonti sostanzjali ta’ investiment pubbliku u privat biex l-Unjoni ssegwi b’mod sod il-perkors lejn irkupru sostenibbli u reżiljenti, bil-ħolqien ta’ impjiegi ta’ kwalità għolja, bl-appoġġ għall-inklużjoni soċjali u bit-tiswija tal-ħsara immedjata kkawżata mill-pandemija tal-COVID-19 filwaqt li jiġu appoġġati l-prijoritajiet ekoloġiċi u diġitali tal-Unjoni.

(5)Din is-sitwazzjoni eċċezzjonali, li mhijiex fil-kontroll tal-Istati Membri, titlob approċċ koerenti u unifikat fil-livell tal-Unjoni. Għall-prevenzjoni tad-deterjorament ulterjuri tal-ekonomija, tal-impjiegi u tal-koeżjoni soċjali u biex tingħata spinta għal irkupru sostenibbli u reżiljenti tal-attività ekonomika, jenħtieġ li jiġi stabbilit programm eċċezzjonali u kkoordinat ta’ appoġġ ekonomiku u soċjali, fl-ispirtu ta’ solidarjetà bejn l-Istati Membri, speċjalment għal dawk li ntlaqtu b’mod partikolarment qawwi.

(6)Billi l-Istrument huwa rispons eċċezzjonali għal dawn iċ-ċirkostanzi temporanji iżda estremi, jenħtieġ li l-appoġġ fil-qafas tal-Istrument ikun magħmul disponibbli biss biex jiġu indirizzati l-konsegwenzi tal-pandemija tal-COVID-19 jew il-bżonnijiet ta’ finanzjament immedjat biex jiġi evitat li l-pandemija tal-COVID-19 tfeġġ mill-ġdid.

(7)Jenħtieġ li dan l-Istrument jiffoka partikolarment fuq il-miżuri biex jiġu restawrati s-swieq tax-xogħol, il-protezzjoni soċjali u s-sistemi tal-kura tas-saħħa, miżuri li jagħtu spinta ġdida lit-tkabbir sostenibbli u lill-impjiegi biex tissaħħaħ il-koeżjoni fost l-Istati Membri u tkun appoġġata t-tranżizzjoni tagħhom lejn ekonomija ekoloġika u diġitali, jingħata appoġġ lin-negozji affettwati mill-impatt tal-pandemija tal-COVID-19 partikolarment l-intrapriżi żgħar u medji u negozji ekonomikament vijabbli li qed jiffaċċjaw problemi ta’ solvenza, miżuri biex tissaħħaħ l-awtonomija strateġika tal-Unjoni fi ktajjen vitali tal-provvista, appoġġ għar-riċerka u l-innovazzjoni b’rispons għall-pandemija tal-COVID-19, bini tal-kapaċitajiet fil-livell tal-Unjoni biex tittejjeb it-tħejjija futura għall-kriżijiet, appoġġ għall-isforzi tat-territorji lejn tranżizzjoni ġusta, u appoġġ għaż-żoni rurali biex jindirizzaw l-impatt tal-pandemija tal-COVID-19. Ir-relazzjonijiet kummerċjali u ekonomiċi mal-pajjiżi ġirien u dawk li qed jiżviluppaw, partikolari fil-Balkani tal-Punent, pajjiżi koperti mill-Politika Ewropea tal-Viċinat u l-pajjiżi fl-Afrika, huma importanti ħafna għall-ekonomija fl-Unjoni. Minħabba f’hekk, u f’konformità mar-rwol globali u mar-responsabbiltà tal-Unjoni, jenħtieġ li jintużaw riżorsi finanzjarji biex jingħataw appoġġ u għajnuna umanitarja għall-isforzi ta’ dawk il-pajjiżi fil-ġlieda tagħhom kontra l-pandemija tal-COVID-19, biex jirkupraw minnha u jiġu rrestawrati u msaħħa r-relazzjonijiet kummerċjali u ekonomiċi bejnhom u l-Unjoni.

(8)Sabiex ikun żgurat irkupru sostenibbli u reżiljenti fl-Unjoni kollha u biex tiġi faċilitata l-implimentazzjoni tal-appoġġ ekonomiku, jenħtieġ li jintużaw il-mekkaniżmi stabbiliti tal-infiq permezz tal-programmi tal-Unjoni skont l-oqfsa finanzjarji pluriennali rilevanti. L-appoġġ fil-qafas ta’ dawn il-programmi huwa pprovdut fil-forma ta’ appoġġ li ma jitħallasx lura, self, u l-proviżjonament għall-garanziji baġitarji. Jenħtieġ li l-allokazzjoni tar-riżorsi finanzjarji tkun tirrifletti l-punt sa fejn dawk il-programmi huma kapaċi jikkontribwixxu għall-objettivi tal-Istrument.

(9)Fid-dawl tan-natura tal-miżuri li għandhom jiġu ffinanzjati, jenħtieġ li parti mill-ammonti disponibbli għal dan l-Istrument jintużaw biex jingħata self lill-Istati Membri, filwaqt li l-parti l-oħra tar-riżorsi jenħtieġ li tikkostitwixxi fi dħul assenjat estern fis-sens tal-Artikolu 21(5) tar-Regolament (UE, Euratom) 2018/1046 tal-Parlament Ewropew u tal-Kunsill 2 , u jenħtieġ li tintuża għal appoġġ li ma jitħallasx lura, strumenti finanzjarji jew il-proviżjonament għall-garanziji baġitarji u nefqa relatata mill-Unjoni. Filwaqt li l-Artikolu 12(4)(c) u l-Artikolu 14(3) tar-Regolament (UE, Euratom) 2018/1046 japplikaw għall-approprjazzjonijiet ta’ impenn u ta’ pagament magħmula disponibbli b’rabta mad-dħul assenjat estern skont dan ir-Regolament, fid-dawl tal-limiti ta’ żmien stabbiliti għat-tipi differenti ta’ appoġġ, l-approprjazzjonijiet ta’ impenn li jirriżultaw minn tali dħul assenjat estern jenħtieġ li ma jiġux awtomatikament ittrasferiti lil hinn mid-dati finali rispettivi, ħlief għal approprjazzjonijiet ta’ impenn meħtieġa għall-assistenza teknika u amministrattiva għall-implimentazzjoni tal-miżuri fil-qafas ta’ dan ir-Regolament.

(10)Jenħtieġ li l-approprjazzjonijiet ta’ impenn għall-appoġġ li ma jitħallasx lura jkunu magħmula disponibbli awtomatikament sal-ammont awtorizzat. Jenħtieġ li l-likwidità tiġi ġestita b’mod effettiv, biex il-fondi jinġabru biss meta l-impenji legali jeħtieġ li jiġu onorati permezz ta’ approprjazzjonijiet ta’ pagament korrispondenti.

(11)Minħabba l-importanza li l-ammonti jintużaw fl-ewwel snin tal-Istrument, ikun xieraq li fl-implimentazzjoni jiġi rieżaminat il-progress. Jenħtieġ li sal-31 ta’ Marzu 2023 il-Kummissjoni tħejji rapport f’dan ir-rigward.

(12)L-Artikolu 135(2) tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika 3 jipprevedi li l-emendi tad-Deċiżjoni tal-Kunsill 2014/335/UE, Euratom 4 li jiġu adottati fid-data tad-dħul fis-seħħ ta’ dan il-Ftehim jew warajha ma għandhomx ikunu japplikaw għar-Renju Unit sa fejn dawk l-emendi jkollhom impatt fuq l-obbligi finanzjarji tar-Renju Unit. L-appoġġ fil-qafas ta’ dan ir-Regolament u ż-żieda korrispondenti tal-limitu massimu tar-riżorsi proprji tal-Unjoni jkollu impatt fuq l-obbligu finanzjarju tar-Renju Unit. L-Artikolu 143(1) tal-Ftehim dwar il-Ħruġ jillimita r-responsabbiltà tar-Renju Unit rigward il-parti tiegħu ta’ obbligazzjonijiet kontinġenti tal-Unjoni għal dawk l-obbligazzjonijiet kontinġenti li jirriżultaw mill-operazzjonijiet finanzjarji deċiżi mill-Unjoni qabel id-data tad-dħul fis-seħħ tal-Ftehim dwar il-Ħruġ. Kull obbligazzjoni kontinġenti tal-Unjoni fil-qafas ta’ dan ir-Regolament hija sussegwenti għad-data tal-ħruġ tar-Renju Unit mill-Unjoni. Għaldaqstant, jenħtieġ li dan ir-Regolament ma japplikax għar-Renju Unit.  

ADOTTA DAN IR-REGOLAMENT:

Artikolu 1
Strument ta’ Rkupru tal-Unjoni Ewropea

L-Istrument ta’ Rkupru tal-Unjoni Ewropea (“l-Istrument”) huwa b’dan stabbilit insostenn tal-irkupru wara l-pandemija tal-COVID-19.

Artikolu 2
Ambitu tal-Istrument

(1)L-Istrument għandu jappoġġa l-irkupru fl-Unjoni wara l-pandemija tal-COVID-19 u għandu b’mod partikolari jiffinanzja l-miżuri li ġejjin biex jiġu indirizzati l-konsegwenzi ekonomiċi avversi tal-pandemija: 

(a)miżuri għar-restawr tal-impjiegi, għall-ħolqien tal-impjiegi u għar-restawr tas-sistemi tal-kura tas-saħħa;

(b)riformi u investimenti li jagħtu spinta ġdida lill-potenzjal tat-tkabbir, isaħħu l-koeżjoni fost l-Istati Membri u jżidu r-reżiljenza tagħhom;

(c)miżuri ta’ sostenn għan-negozji milquta mill-impatt ekonomiku tal-pandemija, partikolarment miżuri li jibbenefikaw lill-intrapriżi żgħar u medji, inkluż investiment finanzjarju dirett f’dawk l-intrapriżi;

(d)miżuri ta’ sostenn għan-negozji ekonomikament vijabbli li raw is-solvenza tagħhom ristretta minħabba l-impatt tal-pandemija tal-COVID-19, inkluż investiment finanzjarju dirett f’dawk in-negozji;

(e)miżuri li jsaħħu l-awtonomija strateġika tal-Unjoni fi ktajjen vitali tal-provvista, inkluż investiment finanzjarju dirett fin-negozji;

(f)miżuri ta’ sostenn għar-riċerka u l-innovazzjoni b’rispons għall-pandemija tal-COVID-19;

(g)miżuri ta’ sostenn biex jiżdied il-livell ta’ tħejjija għall-kriżijiet tal-Unjoni u biex ikun possibbli rispons rapidu u effettiv tal-Unjoni f’każ ta’ emerġenzi kbar; dan jinkludi t-titjib tar-reżiljenza strateġika tas-sistemi tal-kura tas-saħħa tal-Unjoni biex ikun possibbli rispons rapidu u effettiv fil-livell tal-Unjoni f’każ ta’ kriżi tas-saħħa transfruntiera ġdida; il-miżuri jinkludu l-kumulazzjoni ta’ riżerva ta’ provvisti essenzjali u ta’ tagħmir mediku u l-akkwist tal-infrastrutturi meħtieġa għaż-żamma ta’ livelli xierqa ta’ prodotti mediċi u mediċini rilevanti għall-kriżijiet;

(h)miżuri ta’ sostenn biex jiġi żgurat li t-tranżizzjoni ġusta lejn ekonomija newtrali għall-klima ma tiġix imminata mill-pandemija tal-COVID-19;

(i)miżuri ta’ sostenn li jindirizzaw l-impatt tal-pandemija tal-COVID-19 fuq l-agrikoltura u l-iżvilupp rurali.

L-Istrument għandu jipprovdi wkoll appoġġ għall-kriżi lill-pajjiżi sħab biex jiġu restawrati u mtejba r-relazzjonijiet kummerċjali u ekonomiċi tagħhom mal-Unjoni u tissaħħaħ ir-reżiljenza tagħhom.

(2)Il-miżuri msemmija fil-paragrafu 1 għandhom jitwettqu fil-qafas tal-programmi speċifiċi tal-Unjoni u f’konformità mal-atti rilevanti tal-Unjoni li jistabbilixxu r-regoli ta’ dawk il-programmi. Dawk il-miżuri għandhom jinkludu assistenza teknika u amministrattiva għall-implimentazzjoni tagħhom.

Artikolu 3
Finanzjament tal-Istrument u allokazzjoni tal-fondi

(1)L-Istrument għandu jiġi ffinanzjat sa ammont ta’ EUR 750 000 000 000 fi prezzijiet tal-2018 fuq il-bażi tal-awtonomizzazzjoni fl-Artikolu 3b tal-[ORD].

(2)L-ammont imsemmi fil-paragrafu 1 għandu jiġi allokat kif ġej:

(a) appoġġ sa EUR 433 200 000 000 fi prezzijiet tal-2018 fil-forma ta’ appoġġ li ma jitħallasx lura u appoġġ li jitħallas lura permezz ta’ strumenti finanzjarji, allokat kif ġej:

(i)sa EUR 50 000 000 000 fi prezzijiet tal-2018 għal programmi strutturali u ta’ koeżjoni tal-Qafas Finanzjarju Pluriennali 2014–2020 kif imsaħħaħ sal-2022, inkluż appoġġ għall-istrumenti finanzjarji;

(ii)sa EUR 310 000 000 000 fi prezzijiet tal-2018 għal programm li jiffinanzja l-irkupru u r-reżiljenza ekonomika u soċjali permezz tal-appoġġ għar-riformi u għall-investimenti;

(iii)sa EUR 7 700 000 000 fi prezzijiet tal-2018 għal programm relatat mas-saħħa;

(iv)sa EUR 2 000 000 000 fi prezzijiet tal-2018 għal programmi relatati mal-protezzjoni ċivili;

(v)sa EUR 13 500 000 000 fi prezzijiet tal-2018 għal programmi relatati mar-riċerka u l-innovazzjoni, inkluż appoġġ għal strumenti finanzjarji;

(vi)sa EUR 30 000 000 000 fi prezzijiet tal-2018 għal programmi li jappoġġaw lit-territorji fit-tranżizzjoni tagħhom lejn ekonomija newtrali għall-klima;

(vii)sa EUR 15 000 000 000 fi prezzijiet tal-2018 għall-iżvilupp f’żoni rurali;

(viii)sa EUR 5 000 000 000 fi prezzijiet tal-2018 għall-għoti ta’ għajnuna umanitarja barra l-Unjoni;

(b)self lill-Istati Membri sa EUR 250 000 000 000 fi prezzijiet tal-2018 għal programm li jiffinanzja l-irkupru u r-reżiljenza ekonomika u soċjali permezz tal-appoġġ għar-riformi u għall-investimenti.

(c)sa EUR 66 800 000 000 fi prezzijiet tal-2018 għal proviżjonament għall-garanziji u għal nefqa relatata għall-programmi li ġejjin:

(i)sa EUR 30 300 000 000 fi prezzijiet tal-2018 għal programmi li jimmiraw lejn operazzjonijiet [strateġiċi] li jsostnu l-investiment fil-qasam tal-politiki interni tal-Unjoni;

(ii)sa EUR 26 000 000 000 fi prezzijiet tal-2018 għal programmi li għandhom l-għan li jsaħħu s-solvenza tan-negozji ekonomikament vijabbli fl-Unjoni;

(iii)sa EUR 10 500 000 000 fi prezzijiet tal-2018 għal programmi li għandhom l-għan li jrawmu tkabbir ekonomiku sostenibbli u inklużiv barra mill-Unjoni.

Artikolu 4
Regoli għall-implimentazzjoni tal-baġit

(1)Għall-finijiet tal-Artikolu 21(5) tar-Regolament (UE, Euratom) 2018/1046, EUR 433 200 000 000 fi prezzijiet tal-2018 tal-fondi msemmija fl-Artikolu 3(1) għandhom jikkostitwixxu fi dħul assenjat estern għall-programmi tal-Unjoni msemmija fl-Artikolu 3(2) ta’ dan ir-Regolament u EUR 66 800 000 000fi prezzijiet tal-2018 ta’ dawn il-fondi għandhom jikkostitwixxu fi dħul assenjat estern għall-programmi tal-Unjoni msemmija fl-Artikolu 3(2)(c) ta’ dan ir-Regolament.

(2)EUR 250 000 000 000 fi prezzijiet tal-2018 tal-fondi msemmija fl-Artikolu 3(1) għandhom jintużaw għal self lill-Istati Membri fil-qafas tal-programmi msemmija fl-Artikolu 3(2)(b) ta’ dan ir-Regolament. 

(3)L-approprjazzjonijiet ta’ impenn li jkopru l-appoġġ imsemmi fil-punt (a) u (c) tal-Artikolu 3(2) għandhom ikunu magħmula disponibbli awtomatikament sal-ammonti msemmija fl-Artikolu 3(2)(a) u fl-Artikolu 3(2)(c) mid-data tad-dħul fis-seħħ tal-[DRP] li tipprovdi l-awtonomizzazzjoni msemmija fl-Artikolu 3(1).

(4)L-impenji legali li jwasslu għan-nefqa għall-appoġġ skont l-Artikolu 3(2)(a), u fejn xieraq fil-punt (i) tal-Artikolu 3(2)(c), għandhom jittieħdu mill-Kummissjoni jew mill-aġenziji eżekuttivi tagħha sal-31 ta’ Diċembru 2024. L-impenji legali b’ammont ta’ mill-inqas 60 fil-mija tal-ammont imsemmi fl-Artikolu 3(2)(a) għandhom jittieħdu sal-31 ta’ Diċembru 2022.

(5)Id-deċiżjonijiet dwar l-għoti ta’ self imsemmija fl-Artikolu 3(2)(b) għandhom jiġu adottati sal-31 ta’ Diċembru 2024.

(6)Il-garanziji baġitarji tal-Unjoni sa ammont li, f’konformità mar-rata ta’ proviżjonament stabbilita fl-atti bażiċi rispettivi, jikkorrispondi mal-proviżjonament għall-garanziji baġitarji msemmija fl-Artikolu 3(2)(c), skont il-profili tar-riskju tal-operazzjonijiet ta’ finanzjament u ta’ investiment appoġġati, għandhom jingħataw biss għall-appoġġ ta’ dawk l-operazzjonijiet approvati mill-kontropartijiet sal-31 ta’ Diċembru 2024. Il-ftehimiet ta’ garanzija rispettivi għandhom jipprevedu dispożizzjonijiet li jiżguraw li l-operazzjonijiet ta’ finanzjament li jikkorrispondu għal mill-inqas 60 fil-mija tal-ammont ta’ dawk il-garanziji baġitarji jiġu approvati mill-kontropartijiet sal-31 ta’ Diċembru 2022. Fejn jintuża l-proviżjonament għal appoġġ li ma jitħallasx lura b’rabta mal-operazzjonijiet finanzjarji u tal-investiment skont l-Artikolu 3(2)(c)(i), l-impenji legali relatati għandhom jittieħdu mill-Kummissjoni sal-31 ta’ Diċembru 2024. 

(7)Id-deċiżjonijiet dwar l-għoti tas-self għal assistenza makrofinanzjarja msemmija fil-punt (iv) tal-Artikolu 3(2)(c) għandhom jiġu adottati sal-31 ta’ Diċembru 2024.

(8)Il-paragrafi minn 4 sa 7 ma għandhomx japplikaw għall-miżuri msemmija fit-tieni sentenza tal-Artikolu 2(2).

(9)L-ispejjeż mill-assistenza teknika u amministrattiva għall-implimentazzjoni tal-Istrument, bħal attivitajiet preparatorji, ta’ monitoraġġ, ta’ kontroll, ta’ awditu u ta’ evalwazzjoni, inklużi s-sistemi korporattivi tat-teknoloġija tal-informazzjoni ta’ dan ir-Regolament, għandhom jiġu ffinanzjati mill-baġit tal-Unjoni.

Artikolu 5 
Rappurtar

Sal-31 ta’ Marzu 2023, il-Kummissjoni għandha tippreżenta rapport lill-Kunsill dwar il-progress miksub fl-implimentazzjoni tal-Istrument u l-użu tal-fondi allokati skont l-Artikolu 3(2).

Artikolu 6
Dħul fis-seħħ u applikazzjoni

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament ma għandux japplika għar-Renju Unit u fih. Ir-referenzi għall-Istati Membri f’dan ir-Regolament għandhom jinftiehmu li ma jinkludux lir-Renju Unit.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA / TAL-INIZJATTIVA

1.1.Titolu tal-proposta / tal-inizjattiva

1.2.Qasam/oqsma ta’ politika kkonċernat(i) fl-istruttura ABM/ABB

1.3.Natura tal-proposta / tal-inizjattiva

1.4.Objettiv(i)

1.5.Raġunijiet għall-proposta / għall-inizjattiva

1.6.It-tul ta’ żmien u l-impatt finanzjarju

1.7.Mod(i) ta’ ġestjoni ppjanat(i)

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

2.2.Sistema ta’ ġestjoni u kontroll

2.3.Miżuri għall-prevenzjoni ta’ frodi u ta’ irregolaritajiet

3.IMPATT FINANZJARJU STMAT TAL-PROPOSTA / TAL-INIZJATTIVA

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i

3.2.Impatt stmat fuq in-nefqa 

3.2.1.Sommarju tal-impatt stmat fuq in-nefqa

3.2.2.Impatt stmat fuq l-approprjazzjonijiet operazzjonali

3.2.3.Impatt stmat fuq l-approprjazzjonijiet ta’ natura amministrattiva

3.2.4.Kompatibbiltà mal-qafas finanzjarju pluriennali attwali

3.2.5.Kontribuzzjonijiet minn terzi

3.3.Impatt stmat fuq id-dħul

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA / TAL-INIZJATTIVA

1.1.Titolu tal-proposta / tal-inizjattiva

1.2.Qasam/oqsma ta’ politika kkonċernat(i) fl-istruttura ABM/ABB 5  

Affarijiet ekonomiċi u finanzjarji (Titolu 01 tal-baġit ġenerali tal-Unjoni Ewropea, Taqsima 3 il-Kummissjoni)

1.3. Natura tal-proposta / tal-inizjattiva

X Il-proposta / l-inizjattiva tirrigwarda azzjoni ġdida 

◻ Il-proposta / l-inizjattiva hija dwar azzjoni ġdida b’segwitu għal proġett pilota / azzjoni preparatorja 6  

◻ Il-proposta / l-inizjattiva hija dwar l-estensjoni ta’ azzjoni eżistenti 

◻ Il-proposta / l-inizjattiva hija dwar azzjoni diretta mill-ġdid lejn azzjoni ġdida 

1.4.Objettiv(i)

1.4.1.L-għan(ijiet) strateġiku/ċi pluriennali tal-Kummissjoni fil-mira tal-proposta / tal-inizjattiva

1.4.2.Għan(ijiet) speċifiku/ċi u l-attività/ajiet ABM/ABB ikkonċernat(i)

Speċifika l-effetti li l-proposta / l-inizjattiva jenħtieġ li jkollha fuq il-benefiċjarji / il-gruppi fil-mira.

·L-għoti ta’ appoġġ fil-forma ta’ għotjiet u self biex jiġu implimentati pjanijiet ta’ rkupru u ta’ reżiljenza tal-Istati Membri skont il-Faċilità ta’ Rkupru u ta’ Reżiljenza;

·L-għoti ta’ appoġġ ġdid ta’ investiment fil-qafas tal-garanziji baġitarji eżistenti u proposti (FEIS/InvestEU), fost l-oħrajn għal (1) kumpaniji milquta mill-kriżi iżda vijabbli biex joħorġu mill-kriżi, b’mod partikolari biex titħaffef it-tranżizzjoni ekoloġika u diġitali; (2) appoġġ immirat għal proġetti ta’ interess strateġiku Ewropew għal ktajjen ta’ provvista tas-suq intern biex tiġi żviluppata l-awtonomija strateġika tal-UE f’setturi u kapaċitajiet ewlenin;

·Appoġġ imsaħħaħ għar-reġjuni u s-setturi milquta mill-kriżi permezz ta’ miżuri tal-politika ta’ koeżjoni msaħħa;

·L-appoġġ għar-riċerka u l-innovazzjoni b’rispons għall-pandemija tal-COVID-19;

·It-tisħiħ tal-livell ta’ tħejjija għall-kriżijiet u t-titjib tar-reżiljenza strateġika tas-sistemi tal-kura tas-saħħa tal-Unjoni;

·Il-mitigazzjoni tal-impatt tal-pandemija COVID-19 fuq it-tranżizzjoni ġusta lejn ekonomija ekoloġika fit-territorji;

·Appoġġ għal miżuri li jindirizzaw l-impatt tal-pandemija tal-COVID-19 fuq l-iżvilupp rurali;

·Appoġġ lil pajjiżi sħab, b’mod partikolari fil-Balkani tal-Punent, fil-Viċinat u fl-Afrika, fl-isforzi tagħhom biex jiġġieldu u jirkupraw mill-impatt tal-pandemija u biex isaħħu r-reżiljenza tagħhom.

1.4.3.Indikaturi tar-riżultati u tal-impatt

Speċifika l-indikaturi għall-monitoraġġ tal-implimentazzjoni tal-proposta / tal-inizjattiva.

1.5.Raġunijiet għall-proposta / għall-inizjattiva

1.5.1.Rekwiżit(i) li jrid(u) jiġi/u ssodisfat(i) fi żmien qasir jew twil

1.5.2.Valur miżjud tal-involviment tal-UE

1.5.3.Tagħlimiet miksuba minn esperjenzi simili fl-imgħoddi

1.5.4.Kompatibbiltà u sinerġija possibbli ma’ strumenti xierqa oħra

1.6.Tul ta’ żmien u impatt finanzjarju

X Proposta/ inizjattiva ta’ tul ta’ żmien limitat

–X    Impatt finanzjarju mid-dħul fis-seħħ tar-Regolament għat-tlestija tal-maturità tas-self, li jikkoinċidi ma’ diversi Oqfsa Finanzjarji Pluriennali; l-ebda maturitajiet ma huma previsti qabel l-2028.

◻ Proposta / inizjattiva ta’ tul ta’ żmien mhux limitat

–Implimentazzjoni b’perjodu ta’ tnedija minn SSSS sa SSSS,

–segwit minn tħaddim fuq skala sħiħa.

1.7.Mod(i) ta’ ġestjoni ppjanat(i) 8

X Ġestjoni diretta mill-Kummissjoni

–X mid-dipartimenti tagħha, inkluż mill-persunal tagħha fid-delegazzjonijiet tal-Unjoni;

–◻    mill-aġenziji eżekuttivi

X Ġestjoni kondiviża mal-Istati Membri

X Ġestjoni indiretta billi l-kompiti tal-implimentazzjoni baġitarja jiġu inkarigati lil:

–◻ pajjiżi terzi jew il-korpi maħtura minnhom;

–◻ organizzazzjonijiet internazzjonali u l-aġenziji tagħhom (iridu jiġu speċifikati);

–X il-BEI u l-Fond Ewropew tal-Investiment;

–◻ korpi msemmija fl-Artikoli 208 u 209 tar-Regolament (UE, Euratom) 1046/2018;

–◻ korpi tal-liġi pubblika;

–◻ korpi rregolati mil-liġi privata b’missjoni ta’ servizz pubbliku sa fejn jipprovdu garanziji finanzjarji adegwati;

–◻ korpi rregolati mil-liġi privata ta’ Stat Membru li huma inkarigati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;

–◻ persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

–Jekk jiġi indikat iżjed minn mod ta’ ġestjoni wieħed, ipprovdi d-dettalji fit-Taqsima "Kummenti".

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

Speċifika l-frekwenza u l-kundizzjonijiet.

2.1.1.Riskju/i identifikat(i)

2.1.2.Informazzjoni dwar is-sistema ta’ kontroll intern li ġiet stabbilita

2.1.3.Stima tal-kostijiet u tal-benefiċċji tal-kontrolli u valutazzjoni tal-livell mistenni ta’ riskju ta’ errur

2.2.Miżuri għall-prevenzjoni ta’ frodi u ta’ irregolaritajiet

Speċifika l-miżuri ta’ prevenzjoni u ta’ protezzjoni eżistenti jew previsti.

3.IMPATT FINANZJARJU STMAT TAL-PROPOSTA / TAL-INIZJATTIVA

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i

·L-ebda linja baġitarja eżistenti

·Linji baġitarji ġodda mitluba

Skont l-ordni tal-intestaturi tal-qafas finanzjarju pluriennali u tal-linji baġitarji.

3.2.Impatt stmat fuq in-nefqa

Il-proposta ma għandha l-ebda impatt fuq in-nefqa. Linja p.m. se tinħoloq fil-proċedura baġitarja.

3.2.1.Sommarju tal-impatt stmat fuq in-nefqa

Miljuni ta’ EUR (aġġustati sa tliet pożizzjonijiet deċimali)

Miljuni ta’ EUR (aġġustati sa tliet pożizzjonijiet deċimali)

Miljuni ta’ EUR (aġġustati sa tliet pożizzjonijiet deċimali)

3.2.2.Impatt stmat fuq l-approprjazzjonijiet operazzjonali

–◻    Il-proposta / l-inizjattiva ma teħtieġx l-użu ta’ approprjazzjonijiet operazzjonali

–X    Il-proposta / l-inizjattiva teħtieġ l-użu ta’ approprjazzjonijiet operazzjonali fis-snin baġitarji 2020-2027: ħlas ta’ interessi kif indikat fit-tabella ta’ hawn fuq

3.2.3.Impatt stmat fuq l-approprjazzjonijiet ta’ natura amministrattiva

3.2.3.1.Sommarju

–◻    Il-proposta / l-inizjattiva ma teħtieġx l-użu ta’ approprjazzjonijiet ta’ natura amministrattiva

–X    Il-proposta / l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

Miljuni ta’ EUR (aġġustati sa tliet pożizzjonijiet deċimali)

2020: 10 postijiet għal 6 xhur, 5 SNEs għal 3 xhur. Mill-2021: 18-il post u 8 SNEsL-approprjazzjonijiet meħtieġa għar-riżorsi umani u għal nefqa oħra ta’ natura amministrattiva se jiġu koperti mill-approprjazzjonijiet tad-DĠ li diġà jkunu assenjati għall-ġestjoni tal-azzjoni u / jew li diġà jkunu ġew riassenjati fid-DĠ, flimkien, jekk ikun meħtieġ, ma’ kull allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

3.2.3.2.Rekwiżiti stmati ta’ riżorsi umani

–◻    Il-proposta / l-inizjattiva ma teħtieġx l-użu ta’ riżorsi umani.

–X    Il-proposta / l-inizjattiva teħtieġ l-użu ta’ riżorsi umani, kif spjegat hawn taħt:

L-istima trid tiġi espressa f’unitajiet ekwivalenti għall-full-time

DĠ BUDG huwa l-qasam ta’ politika jew it-titolu baġitarju kkonċernat.

Ir-riżorsi umani meħtieġa se jiġu koperti mill-persunal tad-DĠ li diġà jkun assenjat għall-ġestjoni tal-azzjoni u / jew li diġà jkun ġie riassenjat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

Deskrizzjoni tal-kompiti li jridu jitwettqu:

3.2.4.Kompatibbiltà mal-qafas finanzjarju pluriennali attwali

–X    Il-proposta / l-inizjattiva hija kompatibbli mal-qafas finanzjarju pluriennali attwali u propost.

–◻    Il-proposta / l-inizjattiva se tkun tinvolvi riprogrammar tal-intestatura rilevanti fil-qafas finanzjarju pluriennali.

–◻    Il-proposta / l-inizjattiva teħtieġ l-applikazzjoni tal-istrument ta’ flessibbiltà jew ir-reviżjoni tal-qafas finanzjarju pluriennali.

3.2.5.Kontribuzzjonijiet minn terzi

–Il-proposta / l-inizjattiva ma tipprevedix kofinanzjament minn partijiet terzi.

–X Il-proposta / inizjattiva tipprovdi għall-kofinanzjament stmat hawn taħt:

L-ebda kofinanzjament; madankollu, proviżjonament għal garanziji baġitarji jista’ jiġi pprovdut għal programm speċifiku tal-Unjoni sal-ammont ta’ impenji volontarji pprovduti mill-Istati Membri li jiżguraw il-ħlas lura tas-self mill-Unjoni.

3.3.Impatt stmat fuq id-dħul

–◻    Il-proposta / l-inizjattiva ma għandha l-ebda impatt finanzjarju fuq id-dħul.

–X    Il-proposta / l-inizjattiva għandha l-impatt finanzjarju li ġej:

–X    fuq id-dħul assenjat (il-linja ta’ dħul tal-baġit għad trid tiġi ddeterminata)

Matul il-perjodu ta’ implimentazzjoni, EUR 537,4 biljun (fi prezzijiet tal-2018) minn rikavati ta’ operazzjonijiet ta’ self se jikkostitwixxu dħul assenjat estern iddedikat għal għotjiet lill-Istati Membri u garanziji baġitarji.

EUR biljun (arrotondati)

(1)    It-Tbassir Ekonomiku Ewropew, Institutional Paper Nru 125. Mejju 2020.

(2)    Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).

(3)    ĠU L 29, 31.1.2020, p. 7.

(4)    Id-Deċiżjoni tal-Kunsill 2014/335/UE, Euratom tas-26 ta’ Mejju 2014 dwar is-sistema tar-riżorsi proprji tal-Unjoni Ewropea (ĠU L 168, 7.6.2014, p. 105).

(5)    Għandu jiġi determinat fil-proċeduri baġitarji tal-2020 u l-2021. ABM: ġestjoni bbażata fuq l-attività; ABB: ibbaġitjar ibbażat fuq l-attività.

(6)    Kif imsemmi fl-Artikolu 54(2)(a) jew (b) tar-Regolament Finanzjarju.

(7)    Tbassir Ekonomiku Ewropew, Dokument Istituzzjonali 125. Mejju 2020.

(8)    Id-dettalji tal-modi ta’ ġestjoni u r-referenzi għar-Regolament (UE, Euratom) 1046/2018 jinsabu fis-sit BudgWeb: http://www.cc.cec/budg/man/budgmanag/budgmanag_en.html

(9)    Is-Sena N hija s-sena li fiha tibda l-implimentazzjoni tal-proposta / tal-inizjattiva.

(10)    Assistenza u nefqa teknika u / jew amministrattiva li jappoġġaw l-implimentazzjoni ta’ programmi u / jew ta’ azzjonijiet tal-UE (li qabel kienu l-linji "BA"), riċerka indiretta u riċerka diretta.

(11)    AC = Persunal Kuntrattwali; AL = Persunal Lokali; SNE = Espert Nazzjonali Sekondat; INT = persunal tal-aġenziji; JED = Esperti Żgħażagħ f’Delegazzjonijiet.

(12)    Sottolimitu għall-persunal estern kopert minn approprjazzjonijiet operazzjonali (li qabel kienu l-linji “BA”).

(13)    Tinkludi differenzi tat-traduzzjoni.