(1)

Id-dispożizzjonijiet li jikkonċernaw it-trattament tal-assi ta’ software vvalutati b’mod prudenzjali, li l-valur tagħhom mhuwiex affettwat materjalment mir-riżoluzzjoni, l-insolvenza jew il-likwidazzjoni ta’ istituzzjoni, ġew emendati mir-Regolament (UE) 2019/876 tal-Parlament Ewropew u tal-Kunsill (2) biex ikomplu jappoġġaw it-tranżizzjoni lejn settur bankarju aktar diġitalizzat. Ir-Regolament (UE) 2019/876 introduċa wkoll l-Artikolu 36(4) fir-Regolament (UE) Nru 575/2013, li jirrikjedi li l-Awtorità Bankarja Ewropea (“ABE”) tiżviluppa l-abbozz tal-istandards tekniċi regolatorji u jispeċifika l-applikazzjoni tat-tnaqqis marbut mal-assi ta’ software mill-entrati tal-Grad 1 tal-Ekwità Komuni. Biex tiġi żgurata l-koerenza tad-dispożizzjonijiet marbuta mal-fondi proprji u biex tiġi ffaċilitata l-applikazzjoni tagħhom, huwa xieraq li dawn l-istandards tekniċi regolatorji jiġu inkorporati fir-Regolament ta’ Delega tal-Kummissjoni (UE) Nru 241/2014 (3), li jgħaqqad l-istandards tekniċi kollha rigward il-fondi proprji.

(2)

L-awtoritajiet kompetenti mhumiex imxekkla milli jiskrutinizzaw l-assi ta’ software li istituzzjoni tinkludi fil-kapital fuq bażi ta’ każ b’każ u milli jeżerċitaw is-setgħat superviżorji tagħhom f’konformità mal-Artikolu 64 tad-Direttiva 2013/36/UE tal-Parlament Ewropew u tal-Kunsill (4), b’mod partikolari meta l-istokk ta’ investimenti f’software jista’ jirriżulta f’benefiċċju prudenzjali mhux mixtieq jew fejn ikun hemm suspett li l-livell ta’ ġudizzju li jirriżulta mill-qafas kontabilistiku applikabbli jkun intuża biex jiġi evitat dan ir-Regolament.

(3)

Minħabba d-diversità fis-software użat mill-istituzzjonijiet, huwa diffiċli li wieħed jivvaluta, b’mod ġenerali, liema assi ta’ software jista’ jkollhom valur rekuperabbli f’każ ta’ riżoluzzjoni, insolvenza jew likwidazzjoni u, f’dak il-każ, sa liema punt, jew li wieħed jidentifika kategorija speċifika ta’ software li jippreserva l-valur tiegħu anke f’xenarju bħal dan.

(4)

Barra minn hekk, valutazzjoni mill-ABE ta’ każijiet speċifiċi ta’ tranżazzjonijiet passati tagħti x’tifhem li l-assi ta’ software kollha, bla ebda distinzjoni ta’ kategoriji speċifiċi, għandhom l-istess probabbiltà li jitħassru. Anke f’dawk il-każijiet fejn il-valur tal-assi ta’ software jkun ġie ppreservat, għall-inqas parzjalment, ġeneralment il-ħajja utli ta’ dan is-software tiġi riveduta biex tqis li dak is-software jinżamm fl-użu mill-akkwirent ta’ istituzzjoni sa tmiem il-proċess ta’ migrazzjoni biss. L-evidenza miġbura turi li dan il-proċess ta’ migrazzjoni normalment għandu tul li jvarja bejn sena u tliet snin. Jenħtieġ li din it-tendenza tiġi riflessa fit-trattament prudenzjali tal-assi ta’software.

(5)

Minħabba l-valur limitat li jidher li għandhom l-assi ta’ software f’każ ta’ riżoluzzjoni, insolvenza jew likwidazzjoni ta’ istituzzjoni, huwa essenzjali li t-trattament prudenzjali ta’ dawn l-assi jsib bilanċ xieraq bejn, fuq naħa waħda, it-tħassib prudenzjali, u, fuq in-naħa l-oħra, il-valur ta’ dawk l-assi minn perspettiva kummerċjali u ekonomika. Għaldaqstant, jenħtieġ li t-trattament prudenzjali tal-assi ta’ software jinkludi ċertu marġni ta’ konservattiviżmu fuq ir-rilaxx tar-rekwiżiti tal-kapital tal-Grad 1 tal-Ekwità Komuni.

(6)

Barra minn hekk, sabiex ma jiġux introdotti piżijiet operattivi addizzjonali fuq l-istituzzjonijiet u biex tiġi ffaċilitata s-superviżjoni mill-awtoritajiet kompetenti, jenħtieġ li t-trattament prudenzjali tal-assi ta’ software jkun sempliċi biex jiġi implimentat u applikabbli fl-istituzzjonijiet kollha b’mod standardizzat. Jenħtieġ li t-trattament prudenzjali standardizzat ma jżommx lil istituzzjoni milli tkompli tnaqqas kompletament l-assi ta’ software tagħha mill-entrati tal-Grad 1 tal-Ekwità Komuni.

(7)

Minħabba l-bidliet rapidi fit-teknoloġija, l-istituzzjonijiet ta’ spiss jinvestu f’manutenzjoni, titjib jew aġġornamenti tas-software tagħhom. Biex jittaffa r-riskju ta’ arbitraġġ regolatorju, jenħtieġ li dawn l-investimenti jiġu amortizzati separatament mis-software li jinżamm, jittejjeb jew jiġi aġġornat, dment li dawn l-investimenti jiġu rikonoxxuti bħala assi intanġibbli fuq il-karta tal-bilanċ tal-istituzzjoni skont il-qafas kontabilistiku applikabbli.

(8)

Għaldaqstant, jenħtieġ li r-Regolament ta’ Delega (UE) Nru 241/2014 jiġi emendat skont dan.

(9)

Dan ir-Regolament huwa bbażat fuq l-abbozz tal-istandards tekniċi regolatorji ppreżentati mill-ABE lill-Kummissjoni.

(10)

L-ABE wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (5).

(11)

Minħabba l-adozzjoni aċċellerata tas-servizzi diġitali b’konsegwenza tal-pandemija tal-COVID-19, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,

(1)

fl-Artikolu 1, il-punt (f) huwa sostitwit b’dan li ġej:

(2)

jiddaħħal l-Artikolu 13a li ġej: