25.10.2007   

MT

Il-Ġurnal Uffiċjali ta’ l-Unjoni Ewropea

L 281/8

(1)

It-tnaqqis tal-piż amministrattiv impost fuq l-impriżi mil-leġiżlazzjoni preżenti tal-Komunità huwa element kruċjali fit-titjib tal-kompetittività tagħhom u biex jintlaħqu l-objettivi ta' l-aġenda ta' Liżbona.

(2)

Ir-Regolament (KE) Nru 853/2004 jistabbilixxi regoli speċifiċi ta’ iġjene ta' l-ikel li joriġina mill-annimali għall-operaturi fin-negozju ta' l-ikel. Dan ir-Regolament jistipula li l-operaturi fin-negozju ta' l-ikel iridu jkunu konformi mad-dispożizzjonijiet rilevanti ta' l-Anness III mehmuż miegħu.

(3)

Ir-rekwiżiti tat-Taqsima VIII ta' l-Anness III tar-Regolament (KE) Nru 853/2004 dwar vapuri impenjati fil-produzzjoni primarja u operazzjonijiet assoċjati jissupplimentaw dawk stabbiliti fl-Anness I tar-Regolament (KE) Nru 852/2004 tal-Parlament Ewropew u tal-Kunsill tad-29 ta' April 2004 dwar l-iġjene tal-prodotti ta' l-ikel (2). B'mod partikolari, dawk il-vapuri għandhom jieħdu nota u jżommuha fil-kotba tagħhom tal-miżuri stabbiliti għall-kontroll ta' perikli b'mod xieraq u għal tul xieraq ta' żmien.

(4)

L-esperjenza wriet li għall-operaturi fin-negozju ta' l-ikel involuti fis-sajd mal-kosta fuq skala żgħira fi ħdan it-tifsira ta' l-Artikolu 26 tar-Regolament tal-Kunsill (KE) Nru 1198/2006 tas-27 ta' Lulju 2006 dwar il-Fond Ewropew għas-Sajd (3), dan ir-rekwiżit jista' joħloq piż amministrattiv addizzjonali. Huwa għalhekk xieraq li tiġi stipulata deroga minn dan ir-rekwiżit għal dawn l-operaturi.

(5)

It-Taqsima XIV ta’ l-Anness III tar-Regolament (KE) Nru 853/2004 jistipula r-rekwiżiti għall-produzzjoni tal-ġelatina maħsuba għall-konsum mill-bniedem. Hija tispeċifika li meta l-ġelatina tkun immanifatturata mill-għadam tar-ruminanti, trid tiġi prodotta bl-użu ta' proċess uniku li jiżgura li l-materjal kollu ta' l-għadam jiġi soġġett għal trattament alkalin ta' soluzzjoni saturata ta' ġir (pH > 12,5) għal perjodu ta' mhux inqas minn 20 jum bi trattament ta' sħana ta' mhux anqas minn 138 °C għal mhux anqas minn erba' sekondi, wara li tkun ġiet imfarrka fin fin u jitneħħielha x-xaħam bil-misħun u ttrattata bl-ispirtu tal-melħ miżjud bl-ilma (b'konċentrazzjoni minima ta' 4 % u pH < 1,5) għal tul ta' perjodu ta' mhux inqas minn jumejn.

(6)

Il-Bord Xjentifiku dwar il-Perikli Bijoloġiċi ta' l-Awtorità dwar is-Sikurezza ta' l-Ikel adotta fit-18 ta' Jannar 2006 opinjoni dwar “L-Istima kwantitattiva tar-riskju ta' BSE għall-bniedem mill-ġelatina fir-rigward tar-riskju ta' residwu ta' BSE”. Fit-18 ta' Mejju 2006, adotta opinjoni oħra dwar “L-istima kwantitattiva tar-riskju ta' BSE għall-bniedem mix-xewka dahar tal-bovini inkluża l-ganglia mill-għerq tax-xewka dahar fir-rigward tar-riskju ta' residwi ta' BSE”. Skond iż-żewġ opinjonijiet, il-proċessi ta' produzzjoni li jinvolvu proċess bl-aċidu jew proċess ta' sħana u pressjoni jiżguraw rispettivament tnaqqis ta' possibilità ta' infezzjoni ta' BSE ekwivalenti jew ogħla meta mqabbel mal-livell ta' sikurezza miksub bl-applikazzjoni tal-proċess bl-alkali mitlub fil-preżent mit-Taqsima XIV ta' l-Anness III tar-Regolament (KE) Nru 853/2004. Il-kondizzjonijiet għall-produzzjoni tal-ġelatina għandhom għalhekk jiġu emendati skond dan.

(7)

Kien hemm diffikultajiet fl-interpretazzjoni tad-dispożizzjonijiet dwar użu possibbli ieħor tal-ġelatina u l-kollaġini prodotti skond id-dispożizzjonijiet stipulati fit-Taqsimiet XIV u XV ta' l-Anness III tar-Regolament (KE) Nru 853/2004 f'xi Stati Membri. Huwa għalhekk xieraq li jiġu ċċarati dawn id-dispożizzjonijiet sabiex l-implimentazzjoni tagħhom tkun armonizzata.

(8)

Ir-Regolament (KE) Nru 853/2004 għandu għalhekk jiġi emendat skond dan.

(9)

Il-miżuri previsti f’dan ir-Regolament huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,