1.

teħid ta' sforzi għall-preservazzjoni ta’ l-integrità ta’ l-NPT u t-tisħiħ ta’ l-implimentazzjoni tiegħu;

2.

rikononoxximent li l-NPT huwa strument multilaterali uniku u li ma jistax jiġi sostitwit għaż-żamma u r-rinfurzar tal-paċi, is-sigurtà u l-istabbiltà internazzjonali, minħabba li jistabbilixxi qafas legali għall-prevenzjoni ta' proliferazzjoni miżjuda ta' armi nukleari, għall- żvilupp tas-sistema ta' verifika li tiggarantixxi li Stati li m'għandhomx armi nukleari jużaw l-enerġija nukleari biss għall-finijiet paċifiċi, u li jirrappreżenta l-bażi essenzjali għall-kisba tad-diżarm nukleari skond l-Artikolu VI tiegħu;

3.

ħidma lejn l-adeżjoni universali għall-NPT;

4.

enfażi tal-ħtieġa assoluta għal konformità sħiħa mad-dispożizzjonijiet kollha ta' l-NPT mill-Istati kollha li huma Partijiet;

5.

sejħa lill-Istati kollha li ma jifformawx parti mill-NPT biex jimpenjaw ruħhom għan-non-proliferazzjoni u għad-diżarm u sejħa lil dawk l-Istati biex isiru Stati li huma Parti mill-NPT bħala Stati li m'għandhomx armi nukleari;

6.

rikonoxximent li avvenimenti serji ta' proliferazzjoni nukleari seħħew mit-tmiem tal-Konferenza ta' Reviżjoni ta' l-2000;

7.

enfażi tal-ħtieġa li jissaħħaħ ir-rwol tal-Kunsill tas-Sigurtà tan-NU, bħala arbitru finali, sabiex jieħu azzjoni adegwata fil-każ ta' non-konformità ma' l-obbligi ta' l-NPT, bi qbil ma' l-Istatut ta' l-Aġenzija Internazzjonali għall-Enerġija Atomika (IAEA), inkluża l-applikazzjoni ta' salvagwardji;

8.

ġbid ta' l-attenzjoni għall-implikazzjonijiet potenzjali għall-paċi u s-sigurtà internazzjonali ta' irtirar mill-NPT. Għandha tiġi mħeġġa l-adozzjoni ta' miżuri li jiskuraġġixxu l-irtirar mill-imsemmi Trattat;

9.

sejħa għas-sospenzjoni tal-koperazzjoni nukleari meta l-IAEA ma tistax tipprovdi assigurazzjonijiet adegwati li programm nukleari ta' l-Istat hu mfassal esklussivament għall-finijiet paċifiċi, sa tali żmien meta l-Aġenzija tista' tipprovdi tali assigurazzjonijiet;

10.

sejħa lill-Istati kollha fir-reġjun biex jagħmlu mill-Lvant Nofsani żona verifikabbli b'mod effettiv ħielsa minn armi nukleari u armi oħra ta' qerda tal-massa u s-sistemi ta' kunsinna tagħhom, bi qbil mar-Riżoluzzjoni dwar il-Lvant Nofsani adottata fil-Konferenza ta' Reviżjoni u Estensjoni ta' l-1995;

11.

billi s-sigurtà fl-Ewropa hi marbuta mas-sigurtà fil-Meditterran, tingħata l-għola prijorità lill-implimentazzjoni tar-reġim ta' non-proliferazzjoni nukleari fir-reġjun;

12.

rikonoxximent ta' l-importanza taż-żoni ħielsa mill-armi nukleari għall-paċi u s-sigurtà, abbażi ta' arranġamenti bejn l-Istati tar-reġjun konċernat li daħħlu għalihom b'mod ħieles;

13.

enfażi tal-ħtieġa li jsir kollox possibbli biex jiġi pprevenut ir-riskju ta' terroriżmu nukleari, marbut ma' l-aċċess terroristiku possibbli għal armi jew materjali nukleari li jistgħu jiġu wżati fil-manifattura ta' oġġetti għat-tixrid radjoloġiku u, f'dan il-kuntest, enfażi fuq il-ħtieġa għal konformità ma' obbligi taħt ir-Riżoluzzjoni 1540(2004) tal-Kunsill tas-Sigurtà. Sejħa għal sigurtà iktar stretta għal sorsi radjoattivi ta' attività għolja. Għandu jingħata sostenn lill-azzjoni tal-G8 u l-IAEA f'dan ir-rigward;

14.

rikonoxximent li, fid-dawl taż-żieda tat-theddida ta’ proliferazzjoni nukleari u ta' terroriżmu, l-Inizjattiva ta’ Sigurtà mill-Proliferazzjoni, l-inizjattiva globali għat-tnaqqis tat-theddid u l-inizjattiva ta’ sħubija globali tal-G-8 għandhom jiġu approvati;

15.

sejħa għall-adeżjoni universali mal-Ftehim ta’ Salvagwardji Komprensivi u Protokolli Addizzjonali;

16.

rikonoxximent li l-Ftehim ta' Salvagwardji Komprensivi u Protokolli Addizzjonali għandhom effett ta' deterrent fuq il-proliferazzjoni nukleari u jifformaw l-istandard ta' verifika tal-lum, u tkomplija fil-ħidma għal traċċabbiltà miżjuda ta' kwalunkwe ksur ta' l-obbligi ta' l-NPT;

17.

ħidma għar-rikonoxximent mill-Bord ta’ Gvernaturi ta’ l-IAEA li l-konklużjoni ta’ Ftehim ta’ Salvagwardji Komprensivi u ta' Protokoll Addizzjonali huwa l-istandard ta’ verifika ta' llum;

18.

enfażi tar-rwol uniku ta' l-IAEA fil-verifika tat-twettiq mill-Istati ta' l-impenji tagħhom ta' non-proliferazzjoni nukleari u biex tgħinhom, meta mitluba, biex jirristrinġu s-sigurtà ta' materjali u installazzjonijiet nukleari, u sejħa lill-Istati biex jagħtu sostenn lill-Aġenzija;

19.

rikonoxximent ta' l-importanza ta’ kontrolli effettivi adegwati fuq l-esportazzjonijiet, bi qbil mar-Riżoluzzjoni 1540 (2004) tal-Kunsill tas-Sigurtà u skond l-Artikolu III.2 ta’ l-NPT;

20.

implimentazzjoni, fil-livell nazzjonali, ta' kontrolli effettivi fuq l-esportazzjoni, it-transitu, u r-riesportazzjoni, inklużi liġijiet u regolamenti adatti għal dak il-għan;

21.

dħul fis-seħħ ta' sanzjonijiet kriminali effettivi bħala deterrent għall-esportazzjoni, it-transitu, it-trasbord, is-sensar, it-traffikar u l-finanzjament relatat, bi qbil mar-Riżoluzzjoni 1540 (2004) tal-Kunsill tas-Sigurtà;

22.

inkoraġġiment għall-Kumitat ta' Zangger u l-Grupp ta' Fornituri Nukleari biex jaqsmu l-esperjenza tagħhom dwar il-kontrolli fuq l-esportazzjoni, sabiex l-Istati kollha jkunu jistgħu jgawdu mill-arranġamenti tal-Kumitat ta' Zangger u l-linji gwida tal-Grupp ta' Fornituri Nukleari (NSG);

23.

li tiġi mfakkra l-ħtieġa biex jissaħħu l-Linji Gwida ta' l-NSG f'data kmieni, biex jiġu adattati għall-isfidi ġodda ta' non-proliferazzjoni;

24.

sejħa lill-Istati Partijiet għall-Konvenzjoni dwar il-Protezzjoni Fiżika ta' Materjal Nukleari biex jaħdmu għal konklużjoni rapida ta' Konvenzjoni emendata;

25.

rikonoxximent tad-dritt ta' Stati Partijiet għall-NPT għal enerġija nukleari għal finijiet paċifiċi, skond l-Artikolu IV tiegħu, b'kont meħud ta' l-Artikoli I, II u III tiegħu;

26.

enfażi fuq l-importanza ta' koperazzjoni internazzjonali kontinwa sabiex jissaħħu s-sigurtà nukleari, l-amministrazzjoni sigura ta' l-iskart u l-protezzjoni radjoloġika u sejħa lill-Istati li għadhom m'għamlux dan biex jaċċedu għall-konvenzjonijiet rilevanti kollha malajr kemm jista' jkun u jimplimentaw b'mod sħiħ l-impenji konsegwenti;

27.

osservazzjoni li l-Istati Partijiet għall-NPT, bi qbil ma' l-Artikolu IV tiegħu, jistgħu jirrikkorru għall-użu paċifiku ta' l-enerġija nukleari, fost oħrajn fil-qasam tal-produzzjoni ta' l-elettriku, ta' l-industrija, tas-saħħa u ta' l-agrikultura;

28.

inkoraġġiment għall-formulazzjoni ta' garanziji ta' aċċess għas-servizzi relatati mal-karburant nukleari, jew għall-karburant stess, soġġetti għall-kondizzjonijiet adegwati;

29.

osservazzjoni tar-rapport tal-grupp ta' esperti ta' l-IAEA dwar approċċi multinazzjonali għaċ-ċiklu ta' karburant nukleari u l-promozzjoni ta' bidu bikri għall-iskrutinju tiegħu mill-IAEA;

30.

enfażi, waqt li jiġu rikonoxxuti r-reduzzjonijiet ta' armi nukleari li saru mill-aħħar tal-Gwerra Bierda, fuq il-ħtieġa għal reduzzjoni ġenerali tal-ħażniet nukleari fil-kisba ta' diżarm nukleari sistematiku gradwali taħt l-Artikolu VI ta' l-NPT u tiġi milqugħa, f'dan il-kuntest, ir-ratifika tat-Trattat ta' Moska mill-Federazzjoni Russa u l-Istati Uniti ta' l-Amerika fl-2003, waqt li tiġi enfasizzata l-ħtieġa għal iktar progress fir-reduzzjoni tal-ħażniet tagħhom;

31.

enfażi fuq il-ħtieġa li jiġu implimentati d-dikjarazzjonijiet magħmula mill-Presidenti tar-Russja u l-Amerika fl-1991 u l-1992 dwar reduzzjonijiet unilaterali tal-ħażniet tagħhom ta' armi nukleari mhux strateġiċi u sejħa lill-Istati kollha b'armi nukleari mhux strateġiċi biex jinkluduhom fil-proċessi tagħhom ta' kontroll ta' l-armi ġenerali u ta' diżarm, bil-ħsieb tar-reduzzjoni u l-eliminazzjoni tagħhom;

32.

rikonoxximent ta' l-applikazzjoni tal-prinċipju ta' irriversibbiltà biex jiggwida l-miżuri kollha fil-qasam tad-diżarm nukleari u l-kontroll ta’ l-armi, bħala kontribut għaż-żamma u r-rinfurzar tal-paċi, is-sigurtà u l-istabbiltà internazzjonali, waqt li jitqiesu dawn il-kondizzjonijiet;

33.

rikonoxximent ta' l-importanza, mill-perspettiva ta' diżarm nukleari, tal-programmi għall-qerda u l-eliminazzjoni ta' l-armi nukleari u ta' l-eliminazzjoni ta' materjal fissili kif definit fil-kwadru ta' l-isħubija dinjija tal-G8;

34.

li jsiru sforzi biex tiġi żgurata t-trasparenza bħala miżura volontarja ta' bini tal-fiduċja biex jiġi sostnut aktar progress fid-diżarm;

35.

billi t-Trattat dwar il-Projbizzjoni Totali ta' Provi Nukleari (CTBT) jifforma parti essenzjali tad-diżarm nukleari u r-reġim ta' non-proliferazzjoni u bil-ħsieb tad-dħul fis-seħħ malajr kemm jista' jkun tiegħu, mingħajr kondizzjonijiet, issir sejħa lill-Istati, b'mod partikolari dawk elenkati fl-Anness II, biex jiffirmaw u jirratifikaw it-Trattat mingħajr dewmien u mingħajr kondizzjonijiet u, sakemm jidħol fis-seħħ it-Trattat, issir sejħa lill-Istati kollha biex isegwu moratorju u jieqfu milli jieħdu kwalunkwe azzjoni li tmur kontra l-obbligi u d-dispożizzjonijiet tat-Trattat. Enfażi ta' l-importanza tal-ħidma tal-Kummissjoni ta' Tħejjija ta' l-Organizzazzjoni tat-Trattat dwar il-Projbizzjoni Totali ta' Provi Nukleari u sostenn attiv tal-ħidma tar-Rappreżentant Speċjali ta' l-Istati li rratifikaw it-Trattat u li għandhom jippromwovu l-adeżjoni universali għat-Trattat;

36.

appell mill-ġdid lill-Konferenza ta' Diżarm għall-bidu immedjat u l-konklużjoni bikrija ta' Trattat non-diskriminatorju u applikabbli universalment li jipprojbixxi l-produzzjoni ta' materjal fissili għal armi nukleari jew oġġetti esplossivi nukleari oħra, mingħajr pre-kondizzjonijiet u waqt li jinżamm preżenti r-rapport tal-kordinatur speċjali u l-mandat inkluż fih u, sakemm jidħol fis-seħħ dan it-Trattat, issir sejħa lill-Istati kollha biex jiddikjaraw u jżommu moratorju fuq il-produzzjoni ta' materjal fissili għal armi nukleari jew oġġetti esplossivi nukleari oħra. L-UE tilqa' l-azzjoni ta' dawk mill-ħames Stati li għandhom armi nukleari li ordnaw il-moratorju rilevanti;

37.

sejħa lill-Istati kollha kkonċernati biex jieħdu miżuri prattiċi adegwati sabiex jitnaqqas ir-riskju ta’ gwerra nukleari aċċidentali;

38.

tkomplija tal-valutazzjoni tal-kwistjoni ta' assigurazzjonijiet fil-qasam tas-sigurtà għall-Istati li m'għandhomx armi nukleari li jiffurmaw Parti mill-NPT;

39.

sejħa lill-Istati li għandhom armi nukleari biex jaffermaw mill-ġdid l-assigurazzjonijiet eżistenti fil-qasam tas-sigurtà innotati mill-Kunsill tas-Sigurtà tan-Nazzjonijiet Uniti fir-Riżoluzzjoni 984 (1995) u biex jiffirmaw u jirratifikaw il-protokolli rilevanti dwar iż-żoni ħielsa mill-armi nukleari, stabbiliti wara l-konsultazzjonijiet meħtieġa, waqt li jkun rikonoxxut li assigurazzjonijiet fil-qasam tas-sigurtà bbażati fuq it-Trattati huma disponibbli għal tali żoni;

40.

enfażi fuq il-ħtieġa għal diżarm ġenerali;

41.

enfażi fuq l-importanza ta' adeżjoni għal u implimentazzjoni universali tal-Konvenzjoni dwar l-Armi Bijoloġiċi u Tossiniċi (BTWC), il-Konvenzjoni dwar l-Armi Kimiċi (CWC) u l-konvenzjonijiet, il-miżuri u l-inizjattivi li jikkontribwixxu għall-kontroll ta' l-armi konvenzjonali;

42.

sejħa għal adeżjoni universali għal u implimentazzjoni effettiva tal-Kodiċi ta' Kondotta ta' l-Aja kontra l-Proliferazzjoni tal-Missili Ballistiċi;

43.

ħidma għar-riżoluzzjoni tal-problemi ta' nuqqas ta' stabbiltà u sigurtà reġjonali u tas-sitwazzjonijiet ta' konflitt li ħafna drabi huma l-oriġini ta' programmi ta' l-armi.