19.7.2007   

MT

Il-Ġurnal Uffiċjali ta’ l-Unjoni Ewropea

L 187/1

(1)

Fl-applikazzjoni tal-konklużjonijiet tan-negozjati kummerċjali multilaterali tal-Laqgħa ta' l-Urugwaj, il-Regolament (KE) Nru 3223/94 jistipula l-kriterji għall-istabbiliment mill-Kummissjoni tal-valuri fissi ta' l-importazzjoni minn pajjiżi terzi, għall-prodotti u għall-perjodi msemmijin fl-Anness tiegħu.

(2)

Fl-applikazzjoni tal-kriterji msemmija hawn fuq, il-valuri fissi ta' l-importazzjoni għandhom ikunu ffissati fil-livelli msemmija fl-Anness ta' dan ir-Regolament,

19.7.2007   

MT

Il-Ġurnal Uffiċjali ta’ l-Unjoni Ewropea

L 187/3

(1)

Il-prezz tas-suq tal-Komunità għall-karkassi tal-majjal, kif imsemmi fl-Artikolu 4(2) tar-Regolament (KEE) Nru 2759/75, għandu jiġi stabbilit billi jiġu kkalkolati l-prezzijiet reġistrati f'kull Stat Membru b'koeffiċjenti li jirriflettu d-daqs relattiv tal-merħla tal-majjali f'kull Stat Membru.

(2)

Dawn il-koeffiċjenti għandhom jiġu ddeterminati fuq in-numru ta’ majjali magħduda fil-bidu ta’ Diċembru ta’ kull sena skond id-Direttiva tal-Kunsill 93/23/KEE ta’ l-1 ta’ Ġunju 1993 dwar stħarriġ ta’ statistika li trid tkun imwettqa dwar il-produzzjoni tal-majjal (2).

(3)

Fuq il-bażi tar-riżultati taċ-ċensiment ta’ Diċembru 2006, il-koeffiċjenti ta’ kalkolu ġodda għandhom jiġu stabbiliti għas-sena tas-suq 2007/08 u r-Regolament tal-Kummissjoni (KE) Nru. 1201/2006 għandu jiġi mħassar (3).

(4)

Billi s-sena tas-suq 2007/08 tibda fl-1 ta’ Lulju 2007, dan ir-Regolament għandu jiġi applikat minn din id-data.

(5)

Il-miżuri previsti f’dan ir-Regolament huma konformi ma’ l-opinjoni tal-Kumitat tal-Ġestjoni tal-Laħam tal-Majjal,

19.7.2007   

MT

Il-Ġurnal Uffiċjali ta’ l-Unjoni Ewropea

L 187/5

(1)

Ir-Regolament (KE) Nru 808/2004 stabbilixxa qafas komuni għall-produzzjoni sistematika ta’ statistika Komunitarja dwar is-soċjetà ta’ l-informazzjoni.

(2)

Skond l-Artikolu 8(1) tar-Regolament (KE) Nru 808/2004 jinħtieġu miżuri ta’ implimentazzjoni biex tiġi ddeterminata d-data li trid tiġi pprovduta għat-tħejjija ta’ l-istatistika ddefinita fl-Artikoli 3 u 4 ta’ dak ir-Regolament u l-iskadenzi għat-trażmissjoni tagħha.

(3)

Il-miżuri stipulati f’dan ir-Regolament huma skond l-opinjoni tal-Kumitat tal-Programm Statistiku, stabbilit mid-Deċiżjoni tal-Kunsill 89/382/KEE, Euratom (2),

19.7.2007   

MT

Il-Ġurnal Uffiċjali ta’ l-Unjoni Ewropea

L 187/20

(1)

Ir-Regolament (KE) Nru 616/2007 fetaħ kwoti tariffarji għall-importazzjoni tal-prodotti tas-settur tal-laħam tat-tjur.

(2)

L-applikazzjonijiet għal-liċenzji ta’ l-importazzjoni introdotti matul l-ewwel sebat ijiem tax-xahar ta’ Lulju 2007 għas-subperjodu mill-1 ta’ Ottubru 2007 sal-31 ta’ Diċembru 2007 għal ċerti kwoti, ogħla mill-kwantitajiet disponibbli. Jeħtieġ għalhekk li jiġi determinat sa liema punt jistgħu jinħarġu l-liċenzji għall-importazzjoni, billi jiġi stabbilit il-koeffiċjent ta’ allokazzjoni li għandu jkun applikat għall-kwantitajiet mitluba.

(3)

L-applikazzjonijiet għal-liċenzji ta’ l-importazzjoni introdotti matul l-ewwel sebat ijiem tax-xahar ta’ Lulju 2007 għas-subperjodu mill-1 ta’ Ottubru 2007 sal-31 ta’ Diċembru 2007 huma, għal ċerti kwoti, anqas mill-kwantitajiet disponibbli. Jeħtieġ għalhekk li jiġu ddeterminati l-kwantitajiet li għalihom ma tressqux l-applikazzjonijiet, dawn ta’ l-aħħar għandhom jiżdiedu mal-kwantità fissa għas-subperjodu tal-kwota sussegwenti,

19.7.2007   

MT

Il-Ġurnal Uffiċjali ta’ l-Unjoni Ewropea

L 187/22

(1)

Bl-ittra datata l-5 ta’ Marzu 2005, reġistrata bħala riċevuta fit-13 ta’ Diċembru 2005 u supplimentata bl-ittra datata d-9 ta’ Jannar 2006, reġistrata bħala riċevuta fit-12 ta’ Jannar 2006, l-awtoritajiet Taljani nnotifikaw lill-Kummissjoni dwar il-miżura msemmija hawn fuq skond l-Artikolu 88(3) tat-Trattat tal-KE. Wara talba mill-Kummissjoni datata s-6 ta’ Marzu 2006, l-awtoritajiet Taljani ipprovdew tagħrif addizzjonali b’ittra datata s-6 ta’ April 2006.

(2)

Bl-ittra datata s-7 ta’ Ġunju 2006, il-Kummissjoni għarrfet lill-Italja li kienet iddeċidiet sabiex tibda l-proċedura stabbilita fl-Artikolu 88(2) tat-Trattat ta’ KE fir-rigward tal-miżura.

(3)

Id-Deċiżjoni tal-Kummissjoni sabiex tibda l-proċedura kienet ippubblikata fil-Ġurnal Uffiċjali ta’ l-Unjoni Ewropea  (2). Il-Kummissjoni seħjet lill-partijiet interessati sabiex iressqu l-kummenti tagħhom.

(4)

Il-Kummissjoni rċeviet kummenti mill-partijiet interessati. Għaddiethom lill-Italja, li ingħatat l-opportunità li tirreaġixxi; il-kummenti tagħha waslu bl-ittri datati t-13 ta’ Settembru 2006 u d-29 ta’ Settembru 2006.

(5)

Fuels bl-emulsjoni huma taħlita ta’ madwar 15 % ilma u 85 % żejt tal-fuel jew nafta. Għandhom inqas impatt fuq l-ambjent mill-fuels konvenzjonali. Studji riċenti (3) juru li ż-żieda ta’ l-ilma mal-fuels twassal għal kwalità aħjar ta’ kombustjoni f’termini ta’ emissjonijiet. Il-vaporizzazzjoni ta’ l-ilma waqt il-proċess ta’ kombustjoni żżid il-firxa ta’ fuel li tirriżulta f’iżjed spazju ta’ kuntatt bejn il-fuel u l-arja. Dan inaqqas l-emissjonijiet tal-partikolati ta’ PM b’59 %. Il-vaporizzazzjoni ta’ l-ilma tnaqqas ukoll it-temperatura ta’ kombustjoni, b’hekk tnaqqas il-formazzjoni ta’ ossidi ta’ nitroġenu (NOx) b’6 %. Il-proċess effiċjenti ta’ kombustjoni jnaqqas il-monossidu tal-karbonju (CO) bi 32 % (4).

(6)

Madanakollu, il-produzzjoni u l-ħażna ta’ l-emulsjonijiet huma għalja u għalhekk il-prezz għat-taħlita finali hu ogħla mill-prezz tas-suq għal fossil fuels. L-emulsjonijiet għandhom kontenut ta’ enerġija ta’ 10 % inqas mill-fuel konvenzjonali. L-użu ta’ emulsjonijiet jikkawża spejjeż operattivi addizzjonali, per eżempju, l-ispejjeż ta’ l-ipproċessar mill-ġdid f’perjodi li jwaqqaf iż-żewġ komponenti milli jisseparaw, it-tindif ta’ tankijiet u l-ħtieġa għal sistemi ta’ ċirkolazzjoni mill-ġdid ta’ prodotti.

(7)

L-emulsjonijiet ġew adottati fl-Italja għat-trasport pubbliku, il-ġbir ta’ skart u t-trasport ta’ prodotti (madwar 9 000 vettura) minn aktar minn 80 muniċipalità (5). L-emulsjonijiet jintużaw ukoll għall-iskop ta’ tisħin fi djar privati (madwar 100 dar) u bini pubbliku bħal mużewijiet, skejjel u universitajiet (madwar 300 bini msaħħan).

(8)

L-emulsjonijiet li jinsabu fis-suq Taljan huma prinċipalment ibbażati fuq taħlitiet ta’ nafta/ilma b’kontenut baxx ta’ kubrit u jintużaw għat-trapsort u għat-tisħin. Fl-2005 l-emulsjonijiet użati għat-trasport kienu kollha bbażati fuq iż-nafta, filwaqt li l-emulsjonijiet użati għat-tisħin kienu bbażati jew fuq iż-nafta jew fuq fuel tqil b’kontenut baxx ta’ kubrit. Emulsjonijiet oħra ta’ żejt karburanti tqil imsemmija fin-notifika - b’kontenut ta’ kubrit għoli jew baxx għall-użu industrijali u kontenut għoli ta’ kubrit għat-tisħin – ma kinux fis-suq fl-2005. Meta mqabbel mal-konsum ta’ fuels konvenzjonali, il-konsum ta’ emulsjonijiet fl-Italja hu pjuttost marġinali. Il-volumi ikkunsmati f’tunellati ta’ emulsjonijiet u ta’ fuels konvenzjonali fl-2005 kienu kif ġej:

(9)

Fil-Komunità l-emulsjonijiet jintużaw prinċipalment fl-Italja. Madanakollu, l-użu ta’ din it-teknoloġija fit-trasport pubbliku tinsab f’fażi sperimentali f’ċerti Stati Membri, bħal Franza, ir-Renju Unit u r-Repubblika Ċeka.

(10)

Il-miżura għandha l-għan li tippromwovi l-użu ta’ fuels ta’ emulsjoni billi tiżgura li jkunu disponibbli bi prezz raġjonevoli. L-għajnuna tikkumpensa d-differenza fl-ispiża bejn il-fuels konvenzjonali u l-emulsjonijiet. B’dan il-mod, tindirizza l-falliment fis-suq, jiġifieri li l-benefiċċji ambjentali ta’ l-emulsjonijiet mhumiex riflessi fil-prezz tas-suq tal-fuels konvenzjonali.

(11)

Il-miżura għandha tapplika għal sena: mill-1 ta’ Jannar 2006 sal-31 ta’ Diċembru 2006. Il-baġit ippjanat huwa ta’ EUR 8.9 miljun. Il-benefiċjarji ta’ l-iskema jkunu bejn 11 u 50 produttur ta’ emulsjonijiet.

(12)

L-Artikolu 18(1) tad-Direttiva tal-Kunsill 2003/96/KE tas-27 ta’ Ottubru 2003 li tirristruttura l-qafas Komunitarju għat-tassazzjoni ta’ prodotti ta’ enerġija u elettriċità (“Direttiva tat-taxxa dwar l-Enerġija”) (6), u b’mod partikolari r-raba’ inċiż tal-punt 8 fl-Anness II tiegħu, ippermettew lill-Italja sabiex tapplika dazju mnaqqas għal emulsjonijiet ta’ ilma mħallta ma’ nafta jew żejt karburanti sa tmiem l-2005. L-Italja nnotifikat il-miżura għall-perjodu mill-1 ta’ Jannar 2006 sal-31 ta’ Diċembru 2006, u għas-sena 2006 l-Italja fi ħsiebha tapplika l-iskema billi tuża d-dispożizzjonijiet ġenerali tad-Direttiva dwar it-Taxxa fuq l-Enerġija.

(13)

Meta mqabbla mar-rata normali għal fossil fuels li tapplika fl-Italja, il-vantaġġi tal-miżura f’termini ta’ rati mnaqqsa huma kif ġej (it-tnaqqis jingħata kollu għal kull litru ta’ l-emulsjoni ta’ nafta u għal kull kilogramm ta’ żejt karburanti tqil in kwistjoni):

In-notifika ssemmi wkoll rati ta’ taxxa mnaqqsa għal emulsjonijiet li ma jinsabux fis-suq bħal emulsjonijiet ta’ ilma/żejt karburanti tqil għall-użu industrijali b’kontenut għoli u baxx ta’ kubrit (EUR 41.6 u EUR 20.8 rispettivament) u emulsjoni ta’ żejt karburanti tqil b’livelli għoli ta’ kubrit għall-użu ta’ tisħin (EUR 99.3).

(14)

Fl-ittra tagħha tas-6 ta’ Marzu 2006, il-Kummissjoni talbet lill-awtoritajiet Taljani sabiex jissospendu l-għoti ta’ l-għajnuna taħt l-iskema kurrenti sar-rkupru ta’ kwalunkwe għajnuna inkompatibbli mill-kumpaniji li huma soġġetti għal deċiżjoni ta’ għajnuna mill-Istat negattiva, u b’mod partikolari d-Deċiżjoni tal-Kummissjoni 2000/128/KE tal-11 ta’ Mejju 1999 dwar l-għajnuna mogħtija mill-Italja sabiex tippromwovi l-impjiegi (ĠU L 42, 15.2.2000, p. 1), id-Deċiżjoni tal-Kummissjoni 2003/193/CE dwar l-eżenzjoni mit-taxxa u self privileġġjat favur utilitajiet pubbliċi fl-Italja (7), id-Deċiżjoni tal-Kummissjoni 2004/800/KE tat-30 ta’ Marzu 2004 dwar l-iskema ta’ għajnuna mill-Istat stabbilita mill-Italja li tipprevedi miżuri urġenti sabiex jassistu l-impjiegi (8), u d-Deċiżjoni tal-Kummissjoni 2005/315/KE ta’ l-20 ta’ Ottubru 2004 dwar l-iskema ta’ għajnuna implimentata mill-Italja għal kumpaniji li jinvestu f’muniċipalitajiet effettwati serjament minn diżastri naturali fl-2002 (9).

(15)

Fil-każ ta’ emulsjonijiet ta’ nafta użati bħala fuel għall-vetturi l-Italja tapplika rata minima ta’ taxxa ta’ EUR 302 biss għall-parti mit-taħlita li hija fossil fuel. Għalhekk it-taxxa finali għall-emulsjoni hija ta’ EUR 256.7. Il-Kummissjoni iddubitat dwar jekk l-eżenzjoni ta’ taxxa għal emulsjonijiet użati bħala fuel għall-vetturi ikkonformatx mal-livell ta’ tassazzjoni applikabbli taħt id-Direttiva dwar it-Taxxa fuq l-Enerġija u li ma effettwatx il-kundizzjonijiet kummerċjali jew ħolqot distorsjoni tal-kompetizzjoni sa punt kuntrarju għall-interess komuni.

(16)

Barra minn hekk, l-awtoritajiet Taljani irrifjutaw li jimpenjaw irwieħhom sabiex jissospendu l-għoti ta’ għajnuna ġdida taħt l-iskema ta’ bħalissa lil kumpaniji li ma għamlux rifużjoni ta’ l-għajnuna inkompatibbli skond id-deċiżjoni ta’ rkupru preċedenti. Għalhekk kien impossibbli għall-Kummissjoni li tqis id-distorsjoni akkumulata li rriżultat mill-għajnuna l-antika u dik il-ġdida.

(17)

Il-partijiet interessati li ġejjin ressqu l-kummenti tagħhom fuq l-inizjazzjoni tal-proċedura: l-Unione Petrolifera fit-3 ta’ Awwissu 2006 u l-Assoċjazzjoni Ewropea tal-Manifattura taż-Żejt ta’ Emulsjoni (EEFMA) fis-7 ta’ Awwissu 2006.

(18)

L-EEFMA saħqet li ż-żjut ta’ emulsjoni huma l-uniċi żjut li jnaqqsu, simultanjament, l-ossidu ta’ nitroġenu, l-emissjonijiet ta’ partikolati u diossidu tal-karbonju ta’ makni bid-diesel mingħajr il-ħtieġa ta’ kwalunkwi modifiki tekniċi.

(19)

L-EEFMA elaborat fid-dettall dwar il-kwistjoni li ż-żieda ta’ l-ilma fin-nafta tibdel il-karatteristiċi tal-fuel. Il-preżenza ta’ l-ilma tagħti lill-emulsjoni dehra li tixbah lill-ħalib f’temperatura normali, filwaqt li n-nafta tkun ċara u trasparenti. Il-karatteristika li tiddistingwi l-emulsjoni hi l-istabbilità tagħha biċ-ċentrifugazzjoni. L-intervall ta’ densità ta’ l-emulsjoni, 842-870 kg/m3 hu konsiderevolment ogħla minn dak tan-nafta li hu ta’ 820-845 kg/m3. L-istess japplika għall-intervall ta’ viskożità f’40 °C. Il-qawwa kalorifika medja tan-nafta hi ta’ 10 500 kcal/kg, filwaqt li dik ta’ l-emulsjonijiet hija ta’ 9 300 kcal/kg. Din id-differenza tispjega l-għaliex il-konsum medju ta’ l-emulsjoni għal kull medda ta’ km hu ogħla minn dak tan-nafta.

(20)

L-Unjoni tal-Petroleum indikat li l-benefiċjarji ta’ l-għajnuna mill-Istat in kwistjoni m’humiex benefiċjarji ta’ għajnuna li tqieset bħala illegali skond id-deċiżjonijiet imsemmija fil-paragrafu 14.

(21)

L-Italja ressqet il-kummenti tagħha fil-11 ta’ Lulju 2006 u ikkummentat fuq l-osservazzjonijiet tal-partijiet terzi b’ittri datati t-13 ta’ Settembru 2006 u t-28 ta’ Settembru 2006.

(22)

L-Italja ddeskriviet il-karattru speċifiku ta’ l-emulsjonijiet fid-dettall. B’mod partikolari, l-Italja indikat li, minħabba l-istruttura fiżika tagħhom, l-emulsjonijiet għandhom jitqiesu bħala magħmula minn żewġ partijiet: waħda “attiva”, magħmula minn idrokarbonji (diesel jew żejt karburanti) u bħala tali, bil-kapaċità li tipproduċi enerġija wara l-karburazzjoni jew kombustjoni; l-oħra kompletament “passiva”, magħmula minn ilma, li hu presenti għall-iskop tat-tnaqqis ta’ emissjonijiet inkwinanti meta mqabbla ma’ diesel jew żejt karburanti użati fil-kundizzjoni pura tagħhom. L-ilma preżenti fl-emulsjonijiet jassorbi wkoll l-enerġija waqt il-proċess ta’ tisħin u jiġi trasformat fi fwar. Tali emulsjonijiet huma għalhekk prodotti b’karatteristiċi speċifiċi li huma differenti mill-prodotti ta’ petroleum tradizzjonali.

(23)

L-Italja saħqet li l-ilma hu preżenti biss b’mod temporanju fit-tħejjija għall-iskop tat-titjib fil-kombustjoni bi tnaqqis konsegwenti fl-emissjonijiet inkwinanti u benefiċċji ambjentali.

(24)

L-awtoritajiet Taljani irreferew għall-kummenti mressqa mill-Unione Petrolifera lill-Kummissjoni dwar il-kwistjoni tal-benefiċjarji ta’ l-għajnuna. Fil-kunsiderazzjoni ta’ dawn il-kummenti, l-awtoritajiet Taljani impenjaw irwieħhom sabiex jissospendu l-ħlas ta’ għajnuna jekk il-benefiċjarju tkun kumpanija li għadha ma għamlitx rifużjoni jew ma’ ħallsitx f’kont imblukkat kwalunkwe għajnuna illegali jew inkompatibbli li ngħatat fuq il-bażi ta’ waħda mill-miżuri ta’ għajnuna msemmija mill-Kummissjoni.

(25)

L-Italja nnotifikat il-miżura lill-Kummissjoni u d-dħul tagħha fis-seħħ hu soġġett għall-approvazzjoni tal-Kummissjoni, għalhekk l-Italja ikkonformat ma’ l-obbligi tagħha taħt l-Artikolu 88(3) tat-Trattat ta’ KE. Billi l-Italja nnotifikat l-għajnna għall-perjodu mill-1 ta’ Jannar 2006 sal-31 ta’ Diċembru 2006, din l-evalwazzjoni tirrigwarda biss dan il-perjodu u hi mingħajr preġudizzju għall-miżura applikata mill-Italja fl-imgħoddi.

(26)

Skond l-Artikolu 87 tat-Trattat ta’ KE, l-Għajnuna mill-Istat hi (a) kwalunkwe għajnuna mogħtija minn Stat Membru jew permezz ta’ riżorsi Statali (b) li toħloq distorsjoni fil-kompetizzjoni (ċ) billi tiffavorixxi ċerti impriżi, (d) sakemm teffettwa l-kummerċ bejn l-Istati Membri.

(27)

L-għan ta’ din il-miżura hu li tikkompensa lill-produtturi ta’ emulsjonijiet għal parti mill-ispejjeż ta’ produzzjoni tagħhom; il-miżura għalhekk tiffavorixxi ċerti impriżi u l-produzzjoni ta’ ċerti prodotti. It-tnaqqis ta’ dazju jingħata minn riżorsi ta’ l-Istat għax bit-tnaqqis tal-piż tat-taxxa fuq il-prodotti l-Istat jitlef il-qligħ.

(28)

Il-miżura hija selettiva għaliex il-produzzjoni ta’ emulsjonijiet titlob għarfien u tagħmir speċifiku u l-emulsjonijiet jinbiegħu lil numru limitat ta’ konsumaturi. Għalhekk, l-ispiża tad-dħul fis-suq ta’ l-emulsjonijiet hija waħda għolja. It-tnaqqis fir-rati ta’ taxxa għal emulsjonijiet jagħti vantaġġ biss lil numru limitat ta’ produtturi ta’ emulsjonijiet.

(29)

B’konsegwenza ta’ rifużjonijiet ta’ taxxa, il-prezzijiet għal emulsjonijiet jistgħu jitnaqqsu għal livell li jkun kompetittiv mal-fossil fuels. Billi l-emulsjonijiet iservu ta’ sostitut għall-fossil fuels, dan il-vantaġġ jista’ joħloq distorsjoni tal-kompetizzjoni fis-suq intern ta’ l-UE. Billi l-fuels huma kummerċjabbli internazzjonalment, il-miżura probabbilment teffettwa wkoll il-kummerċ bejn l-Istati Membri u għalhekk tikkostitwixxi għajnuna mill-Istat skond l-Artikolu 87 (1) tat-Trattat ta’ KE.

(30)

L-Artikolu 87 (3)(ċ) tat-Trattat tal-KE jipprovdi eżenzjoni mir-regola ġenerali ta’ inkompatibilità mas-suq komuni kif stabbilit fil-paragrafu () ta’ dak l-Artikolu għal għajnuna sabiex ikun faċilitat l-iżvilupp ta’ ċerti attivitajiet ekonomiċi jew ta’ ċerti oqsma ekonomiċi, fejn tali għajnuna ma teffettwax b’mod ħażin il-kundizzjonijiet kummerċjali sa punt kuntrarju għall-interess komuni.

(31)

Il-miżuri ta’ għajnuna proposta huma mfassla sabiex itejbu l-użu ta’ fuels li jħarsu l-ambjent sabiex jitnaqqsu l-emissjonijiet inkwinanti, inklużi l-partikolati, u jnaqqsu ftit l-emissjonijiet ta’ gass b’effett-serra. Il-Kummissjoni tinnota li t-tnaqqis ta’ dawn il-gassijiet u t-tnaqqis ta’ emissjonijiet inkwinanti kienu inkoraġġiti sa mill-1985 b’għadd ta’ miżuri Komunitarji (10), bl-aktar ħarsa riċenti tkun l-Istrateġija Tematika fuq l-Inwkinazzjoni ta’ l-Arja (11). L-għanijiet ta’ l-iskema preżenti huma konformi mal-politika ta’ l-UE f’dan is-settur.

(32)

Il-fuels ta’ emulsjoni mhumiex inklużi fid-definizzjoni ta’ sorsi ta’ enerġija li jiġġeddu fid-Direttiva 2001/77/KE tal-Parlament Ewropew u tal-Kunsill tas-27 ta’ Settembru 2001 dwar il-promozzjoni ta’ elettriċità prodotta minn sorsi ta’ enerġija li jiġġeddu fis-suq intern ta’ l-elettriċità (12) u mhumiex meqjusa bħala biofuels mid-Direttiva 2003/30/KE tal-Parlament Ewropew u tal-Kunsill tat-8 ta’ Mejju 2003 dwar il-promozzjoni ta’ l-użu ta’ biofuels jew fuels oħra li jiġġeddu għat-trasport (13). Madanakollu, l-użu ta’ fuels ta’ emulsjoni jirriżulta fi tnaqqis ta’ inkwinament u emissjonijiet ta’ gass b’effett serra. Il-miżura għalhekk fiha benefiċċju ambjentali ċar. Dan kien ikkonfermat ukoll mill-programm Auto-Oil II (14). Il-Kummissjoni tfakkar li fuels ta’ emulsjoni urew li jirriżultaw fi tnaqqis ta’ 59 % f’partikolati, 6 % tnaqqis f’ossidi ta’ nitroġenu (NOx) u 32 % tnaqqis fil-monossidu tal-karbonju (CO) (tnaqqis attwali jiddependi fuq il-proporzjon ta’ ilma-diesel). Testijiet u studji oħra rrappurtaw tnaqqis minuri fl-emissjonijiet ta’ gass b’effett-serra. Dawn il-benefiċċji huma konformi bis-sħiħ mal-politika ambjentali tal-Komunità.

(33)

Skond is-sezzjoni E.3 tal-Linji Gwida tal-Komunità dwar l-Għajnuna mill-Istat għall-ħarsien ta’ l-ambjent (15) (il-Linji Gwida dwar il-Ħarsien ta’ l-Ambjent), l-għajnuna għall-operat għall-produzzjoni ta’ enerġija li tiġġedded tkun normalment permissibbli. Il-Kummissjoni hi tal-fehma li tali għajnuna tikkwalifika għal trattament speċjali minħabba d-diffikultajiet li dawn is-sorsi kultant iltaqgħu magħhom sabiex jikkompetu b’mod effettiv mas-sorsi konvenzjonali.

(34)

Il-Punt 6 tal-Linji Gwida dwar l-Ambjent jiddefinixxi l-enerġija li tiġġedded bl-istess mod bħad-Direttiva 2001/77/KE. Kif spjegat hawn fuq, l-emulsjonijiet ma jaqgħux f’din id-definizzjoni. Għar-raġunijiet li ġejjin, madanakollu, il-Kummissjoni tqis li l-għajnuna notifikata tista’ tkun evalwata b’analoġija mal-punt E.3.3. tal-Linji Gwida Dwar l-Għajnuna Ambjentali:

(35)

Skond il-punt 56 tal-Linji Gwida dwar l-Għajnuna għall-Ambjent, l-għajnuna ta’ operat għall-produzzjoni ta’ enerġija li tiġġedded tista’ tkun permessa. Il-Punt 56 tal-Linji Gwida dwar l-Ambjent jipprevedi għajnuna sabiex tkun koperta d-differenza bejn l-ispejjeż tal-produzzjoni ta’ enerġija minn sorsi ta’ enerġija li jiġġeddu (fil-każ preżenti, l-emulsjonijiet) u l-prezz fis-suq ta’ dik l-enerġija. Dan jimplika li l-ispejjeż ta’ produzzjoni ta’ emulsjonijiet, wara li titqies l-għajnuna, m’għandhomx jikkumpensaw iżżejjed, jiġifieri m’għandhomx ikunu inqas mill-prezz tas-suq ta’ enerġija komparabbli miksuba minn għejun ta’ enerġija fossili li għaliha ma tkun ingħatat l-ebda għajnuna.

(36)

L-Italja ipprovdiet kalkoli tan-nefqa ta’ produzzjoni bbażati fuq id-data għall-2006. Il-fattur ewlieni li jiddetermina l-ispejjeż ta’ produzzjoni ta’ emulsjonijiet hu l-prezz tal-materja prima (per eżempju surfattant u anti-freeze) li jiġu miżjuda mal-fossil fuels u l-ilma. Spejjeż oħra huma dawk ta’ loġistika bħal ħażna f’tankijiet speċjali u trasport fi trakkijiet apposta. Flimkien ma’ l-ispejjeż ta’ produzzjoni tqies ukoll li, minħabba l-valur inqas ta’ enerġija ta’ emulsjonijiet meta mqabbla ma’ fossil fuels, il-konsum ta’ emulsjonijiet hu stmat li huwa 10 % ogħla. Barra minn hekk, l-użu ta’ emulsjonijiet iżid spejjeż operattivi addizzjonali fuq il-konsumaturi (per eżempju t-tindif ta’ tankijiet u sistemi ta’ ċirkolazzjoni mill-ġdid). Il-kalkoli ta’ l-ispejjeż totali tal-produzzjoni ta’ emulsjonijiet jinkludu qligħ ġust ta’ 5 %. Il-prezz tas-suq ta’ fossil fuels rappurtat mill-Italja għal tqabbil ma’ emulsjonijiet ta’ nafta hu medja tal-prezzijiet ta’ nafta fl-ewwel ħmistax-il jum ta’ Marzu 2006 (16).

(37)

Mit-tabella t’hawn taħt, li hi bbażata fuq l-informazzjoni ipprovduta mill-Italja, jidher ċar li l-għajnuna tippermetti lill-produtturi sabiex ibiegħu l-emulsjonijiet bi prezz suffiċjenti sabiex jikkompeti ma’ fossil fuels.

(38)

Sabiex tevita l-kumpens żejjed fil-perjodu sħiħ ta’ l-iskema, l-Italja impenjat ruħha li tissorvelja tibdil fil-prezzijiet ta’ fossil fuels u nefqiet ta’ produzzjoni ta’ emulsjonijiet kull sitt xhur. Fejn id-differenza bejn l-ispejjeż ta’ produzzjoni ta’ emulsjonijiet u l-prezz ta’ referenza ta’ fossil fuels taqbeż il-valur tat-tnaqqis, l-Italja taġġusta r-rifużjoni tat-taxxa sabiex tevita l-kumpens żejjed.

(39)

Il-Kummissjoni għalhekk tikkonkludi li l-għajnuna hi ristretta sabiex tkopri d-differenza bejn l-ispiża tal-produzzjoni ta’ l-enerġija minn għejun ta’ enerġija li jiġġeddu u l-prezz tas-suq ta’ dik l-enerġija u li m’hemm l-ebda kumpens żejjed fit-tifsira tal-Linji Gwida dwar l-Għajnuna Ambjentali.

(40)

Billi l-miżura tirrigwarda rifużjoni ta’ dazju għal prodott ta’ enerġija, il-Kummissjoni evalwatha wkoll fir-rigward tad-Direttiva dwar it-Taxxa fuq l-Enerġija.

(41)

Id-Direttiva dwar it-Taxxa fuq l-Enerġija tistabbilixxi livelli minimi ta’ tassazzjoni għal prodotti ta’ enerġija. Sa fejn jirrigwarda t-taħlitiet ta’ fuel, il-livell minimi huma applikabbli għall-prodotti finali. Sabiex ikunu implimentati politiki xierqa għal ċirkostanzi nazzjonali, id-Direttiva dwar it-Taxxa fuq l-Enerġija tippermetti lill-Istati Membri sabiex japplikaw eżenzjonijiet u rifużjonijiet ta’ taxxa meta ma jkunux ta’ dannu għall-operat xieraq tas-suq intern u ma jirriżultawx f’distorsjoni tal-kompetizzjoni.

(42)

Fil-prinċipju, l-Artikolu 5 tad-Direttiva dwar it-Taxxa fuq l-Enerġija jippermetti lill-Istati Membri sabiex inaqqsu r-rati ta’ taxxa ta’ prodotti ta’ fuel finali mir-rata normali għal l ivell mhux inqas mil-livell minimu ta’ tassazzjoni f’ċerti każijiet, per eżempju meta jkun hemm titjib fil-kwalità tal-fuels. L-Artikolu 16 jippermetti lill-Istati Membri sabiex japplikaw eżenzjoni jew rata mnaqqsa ta’ tassazzjoni għall-parti li tiġġedded u dik ta’ ilma tat-taħlita.

(43)

Sabiex ikun applikat l-Artikolu 5 bħala ġustifikazzjoni għar-rifużjonijiet ta’ taxxa, l-emulsjonijiet għandhom ikunu fuels ta’ kwalità mtejba meta mqabbla ma’ fossil fuels korrispondenti. It-tagħrif ipprovdut mill-Italja u l-kummenti tal-partijiet terzi juru b’mod ċar li ż-żieda ta’ l-ilma ma’ fossil fuels tibdel il-karatteristiċi fiżiċi tagħhom u ġġib benefiċċji ambjentali.

(44)

Wara li jiżdied l-ilma, il-fuel jinbidel fid-dehra, id-densità, il-viskożità u l-valur kaloriku tiegħu. Il-preżenza ta’ l-ilma ttejjeb il-kwalità ta’ kombustjoni u tirriżulta f’emissjonijiet inqas inkwinanti ta’ partikolati PM, ossidi ta’ nitroġenu u diossidu tal-karbonju. Għalhekk l-emulsjonijiet jistgħu jkunu trattati bħala titjib fil-kwalità ta’ fossil fuels bħala tali. L-applikazzjoni ta’ l-Artikolu 5 għall-emulsjonijiet jippermetti t-tnaqqis tar-rata ta’ dazju għal-livell minimu speċifikat fid-Direttiva dwar it-Taxxa fuq l-Enerġija.

(45)

Fil-każ ta’ emulsjonijiet ta’ nafta użata bħala fuel għall-vetturi, l-Italja tuża l-Artikolu 16 u, filwaqt li tibda mil-livell minimu Komunitarju ta’ tassazzjoni ta’ EUR 302, tagħmel eżenzjoni fuq il-parti ta’ l-ilma fit-taħlita. Għalhekk it-taxxa finali għal dawn l-emulsjonijiet hija 15 % inqas mir-rata minima ta’ taxxa u tammonta għal EUR 256.7.

(46)

Il-Kummissjoni sabet li, fil-każ partikolari ta’ l-emulsjonijiet, dan l-approċċ hu ġustifikat bl-Artikolu 5 u l-Artikolu 16 tad-Direttiva dwar it-Taxxa fuq l-Enerġija, meqjusa b’mod konġunt. Iż-żieda ta’ l-ilma f’fossil fuels tirriżulta fi prodott fiżikament differenti, bi kwalità mtejba ta’ kombustjoni u benefiċċji ambjentali konsegwenti. Dan iġib l-applikazzjoni ta’ l-ewwel inċiż ta’ l-Artikolu 5 tad-Direttiva. Simultanjament, il-prodott finali fih 15 % ilma, li hu eliġibbli għal koċessjonijiet fuq taxxa skond l-Artikolu 16.

(47)

Għar-raġunijiet t’hawn fuq, it-tnaqqis f’tassazzjoni għall-emulsjonijiet propost mill-Italja hu konformi mad-Direttiva dwar it-Taxxa fuq l-Enerġija.

(48)

Barra minn hekk, il-Kummissjoni indikat il-problema ta’ l-akkumulazzjoni potenzjali ta’ distorsjoni li tiġi mill-għajnuna taħt l-iskema ta’ tnaqqis tad-dazju u distorsjonijiet oħra li ġejjin minn għajnuna oħra illegali u inkompatibbli, b’mod partikolari taħt l-iskemi msemmija fil-paragrafu 14, li li għadha ma ngħatatilhiex rifużjoni. Skond id-deċiżjoni tal-Qorti tal-Ġustizzja tal-15 ta’ Mejju 1997 (17), il-kompatibilità ta’ għajnuna ġdida tista’ tiddependi fuq l-eżistenza ta’ kwalunkwe għajnuna illegali preċedenti li ma ġietx imħallsa lura, ladarba l-effett kumulattiv ta’ l-għajnuna jista’ joħloq distorsjoni fil-kompetizzjoni fis-suq komuni sa punt sinifikattiv.

(49)

Il-Kummissjoni tinnota li, f’dak li jirrigwarda l-applikazzjoni tad-deċiżjoni fuq Deggendorf, l-awtoritajiet Taljani irreferew għall-kummenti mressqa lill-Kummissjoni mill-Unione Petrolifera, li stqarru li: “il-benefiċjarji ta’ l-għajnuna in kwistjoni huma differenti mill-benefiċjarji ta’ l-hekk imsejħa għajnuna illegali”. Fil-kunsiderazzjoni ta’ dawn il-kummenti, l-awtoritajiet Taljani impenjaw irwieħhom sabiex jissospendu l-ħlas ta’ għajnuna jekk il-benefiċjarju tkun kumpanija li għadha ma għamlitx rifużjoni jew ma’ ħallsitx f’kont imblukkat kwalunkwe għajnuna illegali jew inkompatibbli li waslet fuq il-bażi ta’ waħda mill-miżuri ta’ għajnuna msemmija mill-Kummissjoni fid-deċiżjoni tagħha li tibda l-proċedura.

(50)

Il-Kummissjoni tinnota wkoll li waqt il-proċedura taħt l-Artikolu 88(2) tat-Trattat tal-KE ma rċeviet l-ebda kumment minn partijiet terzi li l-għajnuna proposta tista’ teffettwa l-kundizzjonijiet ta’ kummerċ u toħloq distorsjoni fil-kompetizzjoni sa punt kuntrarju għall-interess komuni.

(51)

Fuq il-bażi ta dak li ntqal qabel, il-Kummissjoni tikkonkludi li l-miżura hi konformi mad-dispożizzjonijiet relevanti tal-Linji Gwida dwar l-għajnuna Ambjentali applikati b’analoġija u d-dispożizzjonijiet relevanti tad-Direttiva dwar it-Taxxa fuq l-Enerġija. Barra minn hekk, l-Italja impenjat ruħha sabiex tissospendi l-għoti ta’ għajnuna ġdida taħt l-iskema ta’ bħalissa lil kumpaniji li ma għamlux rifużjoni ta’ l-għajnuna inkompatibbli skond id-deċiżjoni ta’ rkupru preċedenti relevanti. Il-miżura għalhekk tista’ titqies bħala waħda kompatibbli mas-suq komuni skond l-Artikolu 87(3)(ċ) tat-Trattat,

19.7.2007   

MT

Il-Ġurnal Uffiċjali ta’ l-Unjoni Ewropea

L 187/30

(1)

L-għajnuna mogħtija lil DAEWOO-FSO MOTOR S.A., li bidlet isimha għal Fabryka Samochodów Osobowych S.A. (iktar ‘il quddiem “FSO” jew “il-benefiċjarja”), ġiet innotifikata lill-Kummissjoni permezz ta’ ittra datata 30 ta’ April 2004 bħala għajnuna mogħtija qabel l-adeżjoni. B’ittra tad-19 ta’ Mejju 2004, il-Kummissjoni talbet lill-Polonja sabiex tissottometti ċerti dokumenti li kienu neqsin. Dawn ġew mogħtija fit-18 ta’ Ġunju 2004. Il-Kummissjoni talbet iżjed informazzjoni permezz ta’ ittra tat-2 ta’ Awwissu 2004, li l-Polonja wieġbet permezz ta’ ittra reġistrata fit-13 ta’ Settembru 2004; u b’ittra tas-6 ta’ Ottubru 2004, li l-Polonja wieġbet fit-3 ta’ Novembru 2004. Saret laqgħa fid-9 ta’ Novembru 2004.

(2)

Fil-5 ta’ Jannar 2005, l-awtoritajiet Pollakki aċċettaw li l-Kummissjoni kienet ser tittratta n-notifika tat-30 ta’ April 2004 ukoll bħala notifika taħt l-Artikolu 88 (3) tat-Trattat tal-KE fil-każ ta’ kwalunkwe miżuri li jinstabu li jikkostitwixxu għajnuna ġdida.

(3)

Permezz ta’ ittra tad-19 ta’ Jannar 2005, il-Kummissjoni nfurmat lill-Polonja li kienet iddeċidiet li tibda l-proċedura stabbilita fl-Artikolu 88(2) tat-Trattat tal-KE fir-rigward ta’ l-għajnuna li ma kinitx ingħatat qabel l-adeżjoni u li kienet tikkostitwixxi għajnuna ġdida. Id-deċiżjoni tal-Kummissjoni li tibda l-proċedura ġiet ippubblikata fil-Ġurnal Uffiċjali ta’ l-Unjoni Ewropea tas-26 ta’ April 2005 (2). Il-Kummissjoni stiednet lill-partijiet interessati sabiex jissottomettu kummenti dwar il-miżuri. L-ebda parti terza ma ssottomettiet kummenti.

(4)

F’ittra tat-28 ta’ Frar 2005, li ġiet irreġistrata fl-1 ta’ Marzu 2005, l-awtoritajiet Pollakki talbu estensjoni tal-perjodu ta’ żmien sabiex jissottomettu l-kummenti tagħhom dwar il-ftuħ ta’ proċedura formali ta’ investigazzjoni. It-tweġiba parzjali tal-Polonja ġiet sottomessa permezz ta’ ittra ta’ l-1 ta’ April 2005, li ġiet irreġistrata fl-4 ta’ April 2005. Fl-istess ittra, il-Polonja talbet estensjoni tal-perjodu ta’ żmien għall-għoti ta’ informazzjoni addizzjonali meħtieġa sabiex il-pjan ta’ ristrutturar jiġi aġġornat sal-15 ta’ April 2005. Fl-ittra tagħhom tas-27 ta’ April 2005, irreġistrata fid-29 ta’ April 2005, l-awtoritajiet Pollakki reġgħu talbu estensjoni tat-terminu ta’ żmien għall-għoti ta’ informazzjoni supplimentari sat-13 ta’ Mejju 2005. Din ġiet sottomessa permezz ta’ ittra tal-31 ta’ Mejju 2005 u rreġistrata fit-2 ta’ Ġunju 2005 u kienet tinkludi verżjoni aġġornata tal-pjan ta’ ristrutturar. Ġew sottomessi kummenti addizzjonali permezz ta’ ittra tat-13 ta’ Ġunju 2005 u rreġistrata fl-14 ta’ Ġunju 2005.

(5)

B’ittra ta’ l-4 ta’ Awwissu 2005 li ġiet irreġistrata fit-8 ta’ Awwissu 2005, il-Polonja nfurmat lill-Kummissjoni li kien irnexxielha ssib investitur ġdid għal FSO. B’ittra tat-28 ta’ Settembru 2005 li ġiet irreġistrata fid-29 ta’ Settembru 2005, l-awtoritajiet Pollakki nfurmaw lill-Kummissjoni li pjan aġġornat għar-ristrutturar, li jinkludi d-deskrizzjoni tal-mudelli prodotti, kien ser jiġi ppreżentat f’Novembru 2005. B’ittra tas-16 ta’ Novembru 2005 li ġiet irreġistrata l-għada, il-Polonja ssottomettiet il-verżjoni Ingliża tal-valutazzjoni ta’ l-ishma ta’ FSO. Il-Kummissjoni talbet informazzjoni supplimentari fit-12 ta’ Diċembru 2005. L-awtoritajiet Pollakki ssottomettew aktar informazzjoni b’ittra tal-15 ta’ Diċembru 2005, li ġiet irreġistrata fid-19 ta’ Diċembru 2005, li fiha ġie sottomess l-aġġornament tal-pjan ta’ ristrutturar li kien ġie mħabbar. Fl-istess ittra, il-Polonja nfurmat lill-Kummissjoni li kienet se tipprovdi iżjed informazzjoni fil-ġimgħat li ġejjin. Fl-ittra tagħha tat-3 ta’ Jannar 2006, li ġiet irreġistrata fil-5 ta’ Jannar 2006, il-Polonja ssottomettiet tweġiba parzjali għat-talba għal informazzjoni tal-Kummissjoni tat-12 ta’ Diċembru 2005 u talbet differiment sat-23 ta’ Jannar 2006 sabiex tipprovdi l-informazzjoni li kien fadal. B’ittra tas-26 ta’ Jannar 2006, li ġiet irreġistrata fit-30 ta’ Jannar 2006, il-Polonja ssottomettiet parti mill-informazzjoni addizzjonali u talbet estensjoni tat-terminu taż-żmien sas-6 ta’ Frar 2006. B’ittra ta’ l-14 ta’ Frar 2006 li ġiet irreġistrata fil-15 ta’ Frar 2006, il-Polonja pprovdiet il-punti neqsin fit-tweġiba għall-ittra tal-Kummissjoni tat-12 ta’ Diċembru 2005.

(6)

Fil-21 ta’ Frar 2006, fi Brussell, saret laqgħa bejn uffiċjali tal-Kummissjoni, l-awtoritajiet Pollakki, il-maniġment ta’ FSO u l-investitur AvtoZAZ. Wara l-laqgħa, fit-8 ta’ Marzu 2006, il-Kummissjoni bagħtet talba għal informazzjoni lill-Polonja. It-tweġiba tal-Polonja ntbagħtet b’ittra tas-6 ta’ April 2006, li ġiet irreġistrata l-għada. Il-Kummissjoni, b’ittra lill-Polonja tas-27 ta’ April 2006, akkordat estensjoni tat-terminu ta’ żmien għas-sottomissjoni tal-verżjoni finali tal-pjan ta’ ristrutturar sa l-20 ta’ Mejju 2006. L-informazzjoni ġiet sottomessa mill-awtoritajiet Pollakki b’ittra tat-22 ta’ Mejju 2006, li ġiet irreġistrata l-għada.

(7)

B’ittra tat-28 ta’ Ġunju 2006 u tad-29 ta’ Ġunju 2006, li t-tnejn ġew irreġistrati l-għada, l-awtoritajiet Pollakki infurmaw lill-Kummissjoni li kien għadu kemm ġie ffirmat mill-FSO ftehim għall-għoti ta’ liċenzja għall-produzzjoni ta’ mudell ta’ karrozza ġdida. Fid-29 ta’ Ġunju 2006, saret laqgħa ma’ l-awtoritajiet Pollakki.

(8)

Il-Kummissjoni, permezz ta’ ittra tal-5 ta’ Lulju 2006, talbet iżjed informazzjoni, li l-awtoritajiet Pollakki pprovdew b’ittra tad-19 ta’ Lulju 2006 u tas-27 ta’ Lulju 2006.

(9)

L-awtoritajiet Pollakki ssottomettew informazzjoni addizzjonali permezz ta’ ittra tat-30 ta’ Awwissu 2006 u waqt il-laqgħa tal-31 ta’ Awwissu 2006.

(10)

B’ittra tas-6 ta’ Settembru 2006, il-Kummissjoni talbet iżjed informazzjoni, li ngħatat b’ittra tat-3 ta’ Ottubru 2006, li ġiet irreġistrata l-għada. Il-Polonja infurmat lill-Kummissjoni li kienet se tipprovdi aktar informazzjoni fl-għaxart ijiem ta’ xogħol li kien imiss.

(11)

Il-Polonja ssottomettiet informazzjoni addizzjonali b’ittra tas-17 ta’ Ottubru 2006, li ġiet irreġistrata fid-19 ta’ Ottubru 2006. F’din l-ittra, l-awtoritajiet Pollakki talbu laqgħa mas-servizzi tal-Kummissjoni. Din il-laqgħa saret fi Brussell fis-7 ta’ Novembru 2006. L-awtoritajiet Pollakki, wara din il-laqgħa, bagħtu ittra fis-17 ta’ Novembru 2006.

(12)

FSO hija produttriċi Pollakka tal-karrozzi. L-impjant tal-produzzjoni ewlieni tal-kumpanija jinsab f’Varsavja, żona megħjuna skond l-Artikolu 87(3)(a) tat-Trattat tal-KE. Tipproduċi karrozzi tal-passiġġieri, spare parts u aċċessorji. Mill-aħħar tad-disgħinijiet, is-sors ewlieni tad-dħul tagħha kien il-produzzjoni ta’ vetturi tal-marka Daewoo Matiz u Lanos. FSO S.A. tikkontrolla 18-il sussidjarja (is-servizz, il-produzzjoni tal-komponenti, il-bejgħ) li niżlu minn […] (*) fl-1999.

(13)

Il-predeċessura ta’ FSO kienet tinsab fil-Polonja sa mill-ħamsinijiet u kienet waħda mill-akbar żewġ produtturi tal-karrozzi Pollakki. Fl-1996 ġie konkluż ftehim ta’ impriża konġunta bejn Daewoo Motor Corporation Ltd. (“DMC”) u l-Ministeru ta’ l-Industrija u l-Kummerċ. Daewoo akkwistat 70 % ta’ l-entità li kienet għadha kemm ġiet imwaqqfa DAEWOO-FSO MOTOR S.A. Madwar 25 % tal-kumpanija kienet il-proprjetà tat-Teżor ta’ l-Istat u l-bqija kienet ta’ l-azzjonisti minoritarji. Minn dakinhar, l-isem tal-kumpanija nbidel għal Fabryka Samochodów Osobowych (“FSO”).

(14)

Id-diffikultajiet ta’ FSO jirriżultaw l-aktar mill-falliment ta’ l-akbar azzjonist tagħha – DMC – fl-2000. Dan wassal għat-tnaqqis fit-talba tal-vetturi bil-marka Daewoo minħabba l-inċertezza tal-klijenti dwar id-destin ta’ FSO, id-disponibbiltà ta’ l-ispare parts u s-servizzi tat-tiswija. Minn barra dan, fil-bidu ta’ dan id-deċennju, FSO soffriet tnaqqis kbir fil-bejgħ ta’ vetturi ġodda fil-Polonja minħabba żieda sinifikanti fl-importazzjoni fil-Polonja ta’ vetturi użati mill-Punent ta’ l-Ewropa. Fl-aħħarnett, matul is-snin, iż-żewġ mudelli prodotti, peress li ma ġewx rinovati bħala mudelli kompetittivi, saru inqas attraenti fis-suq ta’ l-UE. B’konsegwenza ta’ dak imsemmi hawn fuq, il-bejgħ ta’ FSO niżel minn 189 000 karrozza (li minnhom 179 000 inbiegħu fil-Polonja) fl-1999 għal 47 000 fl-2001. FSO soffriet telf nett fl-2000, l-2001 u l-2002 li kien jammonta għal PLN 2.1 biljun (EUR 540 miljun (3)), PLN 1.1 biljun (EUR 282 miljun) u PLN 425 miljun (EUR 109 miljun) rispettivament. Fl-aħħar snin, il-maġġoranza kbira tal-karrozzi prodotti kienu Lanos li ġew esportati lejn l-Ukraina [f’kittijiet għall-immuntar] u mmuntati u mibjugħa minn AvtoZAZ li kienet bdiet kooperazzjoni kummerċjali ma’ FSO fl-2000. Il-bejgħ totali baqa’ f’livell baxx ħafna u l-kumpanija kompliet tirreġistra telf fl-operat.

Tabella 1.

(15)

Xi partijiet (notevolment l-isem tad-ditta u xi impjanti ta’ produzzjoni Ażjatiċi) tal-kumpannija falluta DMC, iżda mhux FSO, inxtraw minn General Motors u tqegħdu f’sussidjarja ġdida msejħa GM DAT, li tfisser General Motors Daewoo Auto & Technology.

(16)

FSO ilha tfittex investitur strateġiku sa minn meta bdew il-problemi. Fi Frar 2004, ikkuntattjat l-akbar 29 kumpanija tal-karrozzi u bagħtitilhom memorandum li fih preżentat lilha nnifisha bħala opportunità attraenti għall-investiment. [Xi] kumpaniji, AvtoZAZ, […], [esprimew] fi prinċipju l-interess tagħhom li jinvestu f’FSO. L-AvtoZAZ, il-konsumatur ewlieni ta’ FSO, esprima interess konkret f’kooperazzjoni usa’ ma’ FSO. Il-gvern Pollakk beda negozjati eskussivi ma’ AvtoZAZ għall-bejgħ ta’ FSO.

(17)

AvtoZAZ hija l-akbar produttriċi tal-karrozzi ġewwa l-Ukraina. Din il-kumpanija tarma karrozzi ta’ diversi marki, fosthom ZAZ (il-marka tagħha stess), Daewoo, VAZ (marka tal-kumpanija Russa Lada) u Opel (4). Hija l-proprjetà ta’ UKRAVTO, li hija s-sid ta’ l-ikbar netwerk tad-distribuzzjoni tal-karrozzi u tal-pompi tal-petrol fl-Ukraina. UKRAVTO tiddistribwixxi diversi marki fosthom ZAZ, Daewoo, Chevrolet, VAZ u Opel.

(18)

Fil-25 ta’ Ġunju 2004, ġiet iffirmata Ittra ta’ Intenzjoni bejn it-Teżor ta’ l-Istat, AvtoZAZ u FSO. Il-Kunsill tal-Ministri approva, permezz ta’ riżoluzzjoni tad-9 ta’ Novembru 2004, il-bejgħ ta’ l-ishma ta’ FSO li kienu l-proprjetà tat-Teżor ta’ l-Istat. FSO u t-Teżor ta’ l-Istat qablu li jaħtru lil KPMG bħala konsulent indipendenti sabiex jagħmel valutazzjoni tal-kumpanija. Ġew applikati l-metodu ta’ l-ispejjeż (il-valur fuq il-kotba ta’ l-assi u r-responsabbiltajiet, b’korrezzjoni fejn kien neċessarju) u l-metodu tal-likwidazzjoni (il-valur fis-suq tal-bejgħ furzat ta’ l-assi ta’ FSO wara li jitnaqqas il-passiv). Fiż-żewġ każijiet, il-valur ta’ l-ishma ta’ FSO kien fin-negattiv. Fl-istess ħin, it-Teżor ta’ l-Istat għażel it-tieni konsulent indipendenti (PriceWaterhouseCoopers) sabiex iwettaq l-istima tiegħu. Dan ikkonferma l-ewwel stima.

(19)

Il-ftehim tal-bejgħ ma’ AvtoZAZ (5) ġie iffirmat fit-30 ta’ Ġunju 2005 għall-prezz totali ta’ PLN 100. Skond dan il-ftehim, AvtoZAZ trid jimplimenta l-pjan kummerċjali nnegozjat mat-Teżor ta’ l-Istat. Dan ikopri l-perjodu 2005 – […] u jippjana t-tnedija tal-produzzjoni ta’ mudell ta’ karrozza ġdid, iż-żieda fil-volum ta’ produzzjoni u ż-żamma ta’ livell minimu ta’ impjiegi. Il-ftehim jindika li l-għajnuna mill-Istat, li hemm fil-pjan ta’ ristrutturar li ġie nnotifikat lill-Kummissjoni, se tingħata mill-gvern Pollakk, jekk din tiġi approvata mill-Kummissjoni. Ix-xerrej jiddikjara li l-għoti ta’ l-għajnuna mill-Istat lil FSO kienet waħda mill-kundizzjonaijiet għad-deċiżjoni tiegħu li jixtri l-ishma tal-kumpanija.

(20)

Sadanittant, AvtoZAZ xtrat (bi skont) minn […] li kienu kredituri ta’ FSO, 100 % tal-pretensjonijiet pendenti kontra FSO, li kienu jirrappreżentaw ammont nominali ta’ kważi […].

(21)

Fl-1999, il-bejgħ ta’ vetturi ġodda fil-Polonja kien jammonta għal 640 000 u s-sehem tas-suq ta’ FSO kien 28 %, u b’hekk, dak iż-żmien, kienet il-produttriċi tal-karrozzi ewlenija fil-Polonja. Fl-2003, in-numru tal-karrozzi mibjugħa ġewwa l-Polonja niżel għal 358 000 u s-sehem tas-suq ta’ FSO ma kienx aktar minn 2.2 % (inqas minn 8 000 karrozzi mibjugħa). Fl-2004, FSO biegħet biss 3 500 karrozza fil-Polonja. Il-kompetituri ewlenin ta’ FSO fil-Polonja (u fl-Ewropa) huma Fiat, Skoda, Renault, Toyota, Opel, Peugeot, Ford, Volkswagen u Citroen. Fis-suq Pollakk, il-proporzjon tal-bejgħ tal-vetturi importati żdied minn 25 % fl-1998 għal 75 % fl-2003.

(22)

Meta wieħed iqis l-Unjoni Ewropea, il-kapaċità ta’ produzzjoni fl-2004 (25 Stat Membru) kienet ta’ 20.8 miljun karrozza, waqt li l-volum tal-produzzjoni kien biss ta’ 14.5 miljun karrozza. B’rata ta’ użu tal-kapaċità ta’ produzzjoni ta’ 70 %, l-industrija għalhekk qegħda tbati minn kapaċitajiet żejda importanti. Waqt li l-livell tal-bejgħ ta’ FSO fl-1999 kien jikkorrispondi għall-sehem fis-suq ta’ l-UE ta’ iżjed minn 1 %, il-produzzjoni ta’ FSO fl-2004 kienet tirrappreżenta sehem fis-suq ta’ inqas minn 0.5 %.

(23)

Sa mill-2003, il-parti l-kbira tal-produzzjoni ta’ FSO tinxtara minn AvtoZAZ u tinbiegħ fis-suq ta’ l-Ukraina. Il-bejgħ ta’ karrozzi ġodda fl-Ukraina żdied b’rata mgħaġġla f’dawn l-aħħar snin. Mill-2001 sa l-2005 żdied minn 65 000 għal 265 000. F’dan il-pajjiż, il-karrozzi Daewoo prodotti minn FSO qegħdin jaffrontaw kompetizzjoni minn dawn id-ditti: VAZ (Lada), ZAZ, Chevrolet u mudelli oħra tad-Daewoo mhux prodotti minn FSO. Skoda, Opel, Toyota, Mitsubishi, Nissan, Renault u VW huma preżenti f’dan is-suq iżda għandhom ishma tas-suq iżjed limitati.

(24)

FSO tippjana wkoll li tesporta parti mill-produzzjoni tagħha lejn […]. Il-bejgħ tal-karrozzi fl-[…] kien ta’ madwar 1.6 miljun karrozza fl-2005. Il-marki domestiċi għandhom 72.5 % tas-sehem tas-suq waqt li l-karrozzi impurtati jkopru 27.5 % tal-bejgħ. Il-kwalità baxxa u d-disinn qadim tal-marki tal-karrozzi […] iżda wasslu għall-żieda permanenti fl-importazzjonijiet. Barra minn hekk, il-manifatturi tal-karrozzi barranin qegħdin jibnu faċilitajiet fil- […]. Xi 40 % tal-kumpaniji tal-karrozzi tal-punent diġà stabbilew fabbriki fiż-żona u 16 % oħra qegħdin jippjanaw li jagħmlu dan.

(25)

Kif jidher f’Tabella 2, il-meniġment beda l-attivitajiet ta’ ristrutturar ta’ FSO S.A. u s-sussidjarji tagħha hekk kif is-sitwazzjoni marret għall-agħar fl-2000, wara l-falliment ta’ DMC. Il-forza tax-xogħol ta’ FSO reġgħet ġiet imnaqqsa bi 2 222 ħaddiem bejn Jannar 2001 u Settembru 2003. Il-pjan ta’ ristrutturar innotifikat lill-Kummissjoni f’April 2004 (il-“pjan ta’ ristrutturar inizjali”) li nbeda fl-aħħar ta’ l-2003, u li għandu jitlesta fl-2007, jippjana tnaqqis addizzjonali ta’ 1 100 impjegat fin-numru tal-ħaddiema ta’ FSO S.A., u b’hekk dawk impjegati fit-tul għandhom ikunu madwar 2 000 ħaddiem. Minn dakinhar dan ġie implimentat fil-maġġorparti tiegħu. Il-forza tax-xogħol niżlet għal 2 200 persuna fl-aħħar ta’ l-2005. Sadanittant, l-awtoritajiet Pollakki ħabbru li l-livell ta’ l-aħħar jikkorrispondi għall-għan ġdid għal perjodu ta’ żmien twil. Is-sussidjarji kkontrollati minn FSO ġew ukoll ristrutturati kompletament matul dawn is-snin u l-forza tax-xogħol ġiet imnaqqsa b’mod konsiderevoli.

Tabella 2 (7)

Il-Forza tax-xogħol fl-aħħar tas-sena

(26)

Il-pjan inizjali ta’ ristrutturar, li ġie nnotifikat lill-Kummissjoni fit-30 ta’ April 2004, kien ibbażat fuq il-kundizzjoni li qabel l-2006 jinstab investitur strateġiku għal FSO. Peress li l-mument tad-dħul ta’ l-investitur ma kienx ċar meta ġie ppreparat il-pjan ta’ ristrutturar, inizjalment kien jinkludi żewġ varjanti alternattivi. Matul l-2004, meta d-dħul ta’ investitur potenzjali sar iżjed ċar, FSO ikkonfermat l-ewwel varjant ta’ ristrutturar, avolja d-dati mmirati kellhom jiġu ttardjati xi ftit. Inkludiet il-miżuri li ġejjin:

(27)

Fil-pjan inizjali ta’ ristrutturar, FSO ippjanat li fit-tul tipproduċi [bejn 130 000 u 170 000] karrozza. Bi qbil ma’ l-għan ta’ produzzjoni fit-tul tagħha, ippjanat li tillimita b’terz il-kapaċità ta’ produzzjoni eżistenti jiġifieri minn [200 000-230 000] vettura kull sena – fuq il-bażi ta’ żewġ xiftijiet u 250 ġurnata ta’ xogħol – għal [140 000-170 000]. Mill-2001, din il-kapaċità eżistenti intużat b’mod limitat (inqas minn 25 %). Wara r-ristrutturar, huwa stmat mill-awtoritajiet Pollakki li l-punt fejn FSO ma tagħmilx telf huwa ta’ [100 000-150 000] karrozza (8).

(28)

Fis-sottomissjonijiet suċċessivi tagħhom, l-awtoritajiet Pollakki nfurmaw lill-Kummissjoni dwar id-dewmien fl-implimentazzjoni tal-pjan inizjali ta’ ristrutturar u li l-għanijiet intermedjarji tal-bejgħ ma kinux intlaħqu.

(29)

Fl-2005, il-pjan ta’ ristrutturar ġie mmodifikat fis-sens li FSO ma kinitx qegħda tippjana iżjed li tiżviluppa l-mudelli ġodda tagħha stess, iżda minflok kienet se tipproduċi mudell eżistenti ta’ manifattur kbir tal-karrozzi, imsejjaħ “entità li tagħti l-liċenzja”, li m’għandiex tiġi mħawwda ma’ “l-investitur”, AvtoZAZ. Il-komponenti kollha għall-produzzjoni tagħhom għalhekk ikunu diġà disponibbli u l-ispejjeż ta’ l-investiment ikunu limitati għall-aġġustamenti teknoloġiċi għal-linji ta’ produzzjoni eżistenti ta’ FSO, sabiex jippermettu l-produzzjoni tal-mudell il-ġdid. FSO, għalhekk, sabiex tikseb dan il-pjan ġdid, kellha bżonn tattira entità li tagħti l-liċenzji.

(30)

Il-Kummissjoni tosserva li din il-modifika fil-pjan ta’ ristrutturar – li minbarra investitur tattira wkoll entità li tagħti liċenzja – saret neċessarja peress li FSO ma rnexxilhiex tattira manifattur kbir tal-karrozzi bħala investitur, li miegħu FSO setgħet tiżviluppa mudell ġdid, kif inkluż fil-pjan ta’ ristrutturar inizjali. L-investitur – AvtoZAZ – ma żviluppax mudelli tiegħu stess li huma kompetittivi fis-suq ta’ l-UE.

(31)

Wara li ġie mmodifikat skond l-iżvilupp tan-negozjati ma’ l-investitur, il-pjan ta’ ristrutturar mbagħad ġie modifikat skond l-iżvilupp tan-negozjati ma’ entitajiet potenzjali li jagħtu l-liċenzji.

(32)

Fil-verżjoni tal-pjan ta’ ristrutturar bid-data ta’ Novembru 2005, l-awtoritajiet Pollakki ndikaw li kienet se tiġi mwaqqfa sussidjarja ġdida ta’ FSO […].

(33)

Fl-[…] 2006, FSO u l-azzjonista tagħha UkrAvto ffirmaw Memorandum ta’ Ftehim ma’ GM DAT għall-produzzjoni ta’ mudell ġdid minn FSO.

(34)

Fl-aħħarnett, fl-[…] 2006, FSO u UkrAvto kkonkludew […] ftehim ma’ GM DAT għall-produzzjoni u l-[…] tal-mudell […] (Chevrolet Aveo). GM kienet qiegħda tfittex kapaċitajiet ġodda fl-[…] għall-produzzjoni ta’ dan il-mudell. Skond it-termini tal-kuntratt, FSO tista’ timmanifattura u timmonta dan il-mudell sal- […]. Tista’ tbiegħu sal-[…] fi […].

(35)

Fl-istess ħin, FSO iffirmat estensjoni ma’ GM DAT li kienet tmur lil hinn mill-[…] tal-ftehim eżistenti ta’ l-għoti tal-liċenzja għall-produzzjoni ta’ Daewoo Lanos. Skond il-kuntratt il-ġdid, FSO tista’ tipproduċi dan il-mudell sa […] u tbiegħu sa […]. Peress li l-bejgħ tal-Lanos […] żdied fl-2005 u fl-2006, FSO beħsiebha tipproduċi dan il-mudell qadim fi kwantitajiet sostanzjali sakemm tibda l-produzzjoni tal-[…] fl-aħħar tal-[…].

(36)

Fis-sottomissjonijiet ta’ informazzjoni riċenti tagħhom, l-awtoritajiet Pollakki ndikaw li FSO, b’kuntrarju ta’ dak li kien ġie imħabbar qabel, tippjana li fit-tul tbiegħ [130 000 – 170 000] karrozza, b’mod partikolari wara l-2008. Parti minn din il-produzzjoni għandha tinbiegħ fil-[…]. Ħafna mill-parti li jkun fadal ser tinbiegh fl-[…].

(37)

Fl-aħħarnett, fil-każ tar-ristrutturar finanzjarju, li hija parti mill-pjan ta’ ristrutturar, mill-2003 ttieħdu u ġew implimentati miżuri sabiex jitnaqqas id-dejn tal-kumpanija. L-ewwel, fit-22 ta’ Settembru 2003, ġie ffirmat ftehim bejn il-kredituri ewlenin ta’ FSO, jiġifieri DMC, it-Teżor ta’ l-Istat u l-[…] istituzzjonijiet finanzjarji (fosthom […] il-banek Pollakki). Il-ftehim stabbilixxa r-rati tal-kambju tal-pretensjonijiet ta’ DMC u tat-Teżor ta’ l-Istat f’ishma ta’ FSO bl-istess rata ta’ kambju. Din il-bidla saret minn dakinhar. L-istituzzjonijiet finanzjarji […] kellhom jaħfru l-maġġoranza tal-pretensjonijiet tagħhom kontra FSO. Kif ġie indikat minn dakinhar, il-banek […] biegħu (bi skont) lill-investitur il-pretensjonijiet li kien fadlilhom kontra FSO. Diġà ġew maħfura iżjed minn PLN […] miljun […]. Minbarra dan il-ftehim mal-kredituri l-kbar tagħha, FSO ippreżentat rikors fil-qorti fis-17 ta’ Settembru 2003 sabiex tibda proċeduri ta’ arranġament, li kellhom x’jaqsmu mal-kredituri ż-żgħar ta’ FSO. Dawn il-proċeduri sadanittant ġew konklużi.

Tabella 3.

Ir-ristrutturar tal-passiv

[…]

(38)

Fid-deċiżjoni tagħha ta’ ftuħ tal-proċedura formali ta’ investigazzjoni, il-Kummissjoni kkonkludiet li diġà kienu ttieħdu diversi miżuri li jikkostitwixxu għajnuna ta’ ristrutturar qabel l-adeżjoni, fl-aħħar tliet xhur ta’ l-2003 u fl-ewwel erba’ xhur ta’ l-2004. Dawn il-miżuri, għalhekk, mhumiex soġġetti għal din il-proċedura ta’ investigazzjoni li tikkonċerna biss il-miżuri ta’ għajnuna ppjanati li jingħataw qabel l-adeżjoni. L-għajnuna mogħtija qabel l-adeżjoni iżda trid tittieħed f’kunsiderazzjoni fl-evalwazzjoni tal-kumpatibbiltà, b’mod partikolari meta ssir evalwazzjoni li l-għajnuna qegħda tingħata skond il-minimu neċessarju.

(39)

L-ikbar parti ta’ l-għajnuna mogħtija wara l-adeżjoni tieħu l-forma ta’ […] % garanzija mill-Istat fuq is-self futur għall-investiment lil […]. Is-self mill-bank se jiġi indikat f’dollari Amerikani u f’ammont ta’ USD […] miljun (EUR […] miljun (9)). Il-garanzija għalhekk tesponi lill-Istat għall-pagamenti potenzjali li jammontaw għal USD 83 miljun (EUR 66 miljun) (10) It-tieni miżura importanti hija l-maħfra mill-Ministeru tal-Finanzi tal-pretensjonijiet kontra FSO li jammontaw għal PLN 34 860 000 (EUR 9 miljun).

(40)

Il-miżuri differenti huma mniżżla fit-tabella li jmiss, fuq il-bażi tas-sottomissjoni tat-3 ta’ Jannar 2006 mill-awtoritajiet Pollakki (11):

Tabella 4:

“Għajnuna mill-Istat wara l-adeżjoni”

(41)

Il-miżuri ta’ għajnuna li ġew innotifikati jammontaw għall-USD 83 miljun (EUR 66 miljun) u PLN 62 miljun (EUR 16 miljun). Bir-rata tal-kambju ta’ l-20 ta’ Ottubru 2006, il-miżuri totali ta’ għajnuna għalhekk jammontaw għal EUR 82 miljun jew PLN 318 miljun.

(42)

Numru importanti ta’ miżuri ta’ għajnuna għalhekk huma fil-forma ta’ rinunzji jew posponimenti tal-pretensjonijiet eżistenti ta’ l-Istat kontra FSO. Peress li skond l-informazzjoni li kellha l-Kummissjoni, il-ħlas ta’ dawn il-pretensjonijiet minn FSO kien għadu ma sarx, FSO kienet diġà bbenefikat mis-sospensjoni tar-rifużjoni ta’ dan il-passiv. B’riżultat ta’ dan, jista’ jitqies li dawn il-miżuri kienu diġà ġew parzjalment implimentati.

(43)

Fid-deċiżjoni tagħha ta’ ftuħ tal-proċedura, il-Kummissjoni indikat li l-kumpatibbiltà ta’ l-għajnuna l-ġdida kienet se tiġi evalwata fuq il-bażi tal-linji gwida applikabbli ta’ salvataġġ u ristrutturar. Il-Linji Gwida attwali tal-Komunità dwar l-għajnuna li jagħti l-istat għas-salvataġġ u r-ristrutturar tal-kumpaniji li jkunu f’diffikultà (12) (“il-linji gwida għall-2004”) daħlu fis-seħħ fl-10 ta’ Ottubru 2004. Għall-miżuri nnotifikati qabel din id-data, japplikaw il-linji gwida preċedenti ta’ salvataġġ u ristrutturar ta’ l-1999 (13) (“il-linji gwida”). Peress li l-miżuri ġew innotifikati fid-29 ta’ April 2004, japplikaw il-linji gwida ta’ l-1999. Il-Kummissjoni għalhekk għamlet stima inizjali ta’ l-għajnuna (l-ġdida) notifikata fuq il-bażi tal-kriterji stabbiliti f’dawn il-linji gwida.

(44)

Il-Kummissjoni kkonkludiet, l-ewwelnett, li FSO, minħabba t-telf u t-tnaqqis fil-bejgħ li għaddiet minnu fis-snin preċedenti, kienet tikkwalifika bħala kumpanija f’diffikultà skond it-taqsima 2.1 tal-linji gwida.

(45)

Fir-rigward tar-restawr tal-vijabilità, il-Kummissjoni esprimiet tħassib dwar ċerti aspetti tal-pjan. Element wieħed ta’ dan it-tħassib kellu x’jaqsam man-nuqqas ta’ ċarezza fil-livell ta’ produzzjoni ppjanat. Il-Kummissjoni rrimarkat ukoll li ma kellhiex għad-dispożizzjoni tagħha l-pjan aġġornat ta’ ristrutturar, li skond l-awtoritajiet Pollakki kien ġie nnegozjat ma’ l-investitur. Ta’ importanza wkoll kienet l-indikazzjoni tal-Kummissjoni li ma kinitx irċeviet mingħand l-awtoritajiet Pollakki servej tas-suq. Indikat li dan ta’ l-aħħar ikollu jinkludi stima tal-kapaċità totali ta’ produzzjoni u t-talba fuq il-livell tal-komunità, u kellu jikkonkludi jekk hemmx eċċess tal-kapaċità fis-suq.

(46)

Biex jiġi evitat li l-kompetizzjoni tiġi affettwata b’mod eċċessiv, il-Kummissjoni ndikat li ma setgħetx tieħu pożizzjoni finali, għaliex, fl-ewwel lok, l-awtoritajiet Pollakki ma kinux ipprovdew indikazzjonijiet jekk hemmx produzzjoni żejda fis-suq li fih topera FSO. Fit-tieni lok, il-Polonja ma kinitx indikat miżuri potenzjali li FSO u/jew l-investitur kienu qegħdin jippjanaw li jaddottaw li kienu jmorru lil hinn mit-tnaqqis tal-kapaċità, li diġà kien ġie meqjus fil-pjan ta’ ristrutturar bħala neċessarju sabiex tinkiseb vijabilità, u li setgħu jitqiesu bħala miżuri ta’ kumpens.

(47)

Fil-każ tal-limitazzjoni ta’ l-għajnuna għall-minimu neċessarju, il-Kummissjoni talbet iżjed dettalji dwar il-miżuri li huma meqjusa bħala l-kontribut tagħha stess, kif ukoll dettalji dwar l-ispejjeż għar-ristrutturar. Il-Kummissjoni esprimiet ukoll tħassib dwar jekk l-għajnuna kinitx ġiet illimitata għal minimu neċessarju peress li l-kundizzjonalità ta’ ċerti miżuri ta’ għajnuna kienu jindikaw li dawn ma kinux assolutament neċessarji.

(48)

Fl-aħħarnett, il-Kummissjoni nnutat li l-ftehim għar-ristrutturar tad-dejn li sar mal-kredituri pubbliċi fit-22 ta’ Settembru 2003 seta’ jinkludi l-għajnuna mogħtija qabel l-adeżjoni. Din l-għajnuna potenzjali, anke jekk il-kumpatibbiltà tagħha ma tistax tiġi evalwata u ma tistax tiġi rkuprata, trid xorta waħda tittieħed f’kunsiderazzjoni fl-evalwazzjoni ta’ l-għajnuna ġdida.

(49)

Fir-rigward tal-figuri kontradittorji dwar il-livelli ppjanati ta’ produzzjoni fis-snin 2005 u 2006, l-awtoritajiet Pollakki spjegaw, fl-ittra tagħhom tat-13 ta’ Ġunju 2005, li minħabba d-dewmien fid-dħul ta’ l-investitur fil-kumpanija, il-figuri kienu ġew imnaqqsa fil-verżjonijiet suċċessivi tal-pjan ta’ ristrutturar. Huma indikaw li punt fejn ma jsirx telf, stmat għal madwar [100 000 – 150 000] karrozza, għandu jintlaħaq fi […]. Fl-ittra tagħhom tat-22 ta’ Mejju 2006, l-awtoritajiet Pollakki pprovdew l-previżjonijiet tal-bejgħ għas-snin 2008 sa 2010. Fid-dokumenti sottomessi waqt il-laqgħa tal-31 ta’ Awwissu 2006, l-awtoritajiet Pollakki ħabbru l-previżjonijiet għas-snin 2006 sa l-2008, li kkonfermaw il-figuri preċedenti.

Tabella 5.

(50)

Fl-ittra tagħhom tat-3 ta’ Ottubru 2006, l-awtoritajiet Pollakki ssottomettew previżjoni miżjuda b’mod sostanzjali għas-snin 2008 sa -2010. Skond dawn ta’ l-aħħar, il-produzzjoni annwali għandha tkun (‘il fuq minn 250 000] karrozza matul dan il-perjodu.

(51)

Kif ġiet mitluba tagħmel fid-deċiżjoni tal-ftuħ, il-Polonja ssottomettiet il-verżjoni aġġornata tal-pjan ta’ ristrutturar fil-31 ta’ Mejju 2005. Il-Polonja, minn dakinhar, reġgħet issottomettiet verżjonijiet aktar ġodda. Il-pjan ta’ ristrutturar jinkludi deskrizzjonijiet tas-swieq li fihom taħdem FSO. Kif diġà ġie indikat qabel, juri li hemm kapaċitajiet żejda konsiderevoli fl-UE.

(52)

Fir-rigward tal-proposti għal miżuri ta’ kumpens, il-Polonja tindika li, l-ewwel, FSO b’mod intenzjonali tippjana li tillimita l-produzzjoni u l-bejgħ tagħha għal-livell ta’ [140 000 - 170 000] karrozza sa l-2008, minkejja li għandha l-kapaċità li tipproduċi [200 000 - 230 000] karrozza u l-possibiltajiet reali li tikseb iżjed bejgħ minn [140 000 - 170 000] karrozza. Minn barra dan, FSO illimitat wkoll in-netwerk tal-bejgħ tagħha billi naqset in-numru tal-ħwienet li jbiegħu l-karrozzi minn […] fl-2003 għal […] fl-2006. Il-kumpanija llikwidat ukoll żewġt iħwienet. It-tielet, il-kumpanija tillimita n-numru tal-pajjiżi li lejhom tesporta l-prodotti tagħha.

(53)

Fir-rigward tal-limitazzjoni ta’ l-għajnuna għall-minimu neċessarju, l-awtoritajiet Pollakki pprovdew diversi dokumenti dwar l-ammonti kkunsidrati bħala l-kontribuzzjoni tagħhom stess.

(54)

Fl-aħħarnett, il-Polonja pprovdiet kopja tal-ftehim għar-ristrutturar tad-dejn tat-22 ta’ Settembru 2003.

(55)

L-awtoritajiet Pollakki ma jikkontestawx li l-miżuri mniżżla f’Tabella 4 jikkostitwixxu għajnuna mill-Istat, kif ġie konkluż fid-deċiżjoni tal-ftuħ.

(56)

Minbarra l-miżuri mniżżla f’Tabella 4, fid-deċiżjoni ta’ ftuħ tal-proċedura, il-Kummissjoni esprimiet tħassib li l-ftehim għar-ristrutturar tad-dejn mal-kredituri pubbliċi, tat-22 ta’ Settembru 2003, seta’ jkun fih għajnuna mogħtija qabel l-adeżjoni. Infatti, il-Kummissjoni nnutat li l-istituzzjonijiet finanzjarji aċċettaw rinunzja parzjali tal-pretensjonijiet tagħhom kontra FSO bil-kundizzjoni biss li t-tnaqqis li jirriżulta minn din ir-rinunzja jiġi aċċettat mill-awtorità Pollakka tat-taxxa bħala spiża li tkun tnaqqas id-dħul taxxabbli. Il-Kummissjoni għalhekk indikat li l-Istat seta’ aċċetta konċessjoni iżjed importanti mill-partijiet privati għall-ftehim. L-awtoritajiet Pollakki pprovdew kopja tal-ftehim tat-22 ta’ Settembru 2003. Il-Kummissjoni tosserva li l-bidla tad-dejn li ġiet aċċettata mit-Teżor ta’ l-Istat issir taħt l-istess kundizzjonijiet tal-bidla tad-dejn minn DMC, li hija kumpanija tas-settur privat. Barra minn hekk, l-ammont hekk mibdul mid-DMC huwa ħafna ikbar mill-ammont mibdul mit-Teżor ta’ l-Istat. F’dawn iċ-ċirkostanzi, il-Kummissjoni tikkonkludi li din l-operazzjoni tirrispetta l-prinċipju tal-kreditur ta’ l-ekonomija tas-suq u ma tikkostitwix għajnuna mill-Istat.

(57)

Anke jekk id-dubji fuq dan is-suġġett ma ġewx espressi fid-deċiżjoni ta’ ftuħ tal-proċedura, peress li t-tranżazzjoni saret wara, il-Kummissjoni vverifikat jekk il-bejgħ ta’ l-interessi f’FSO li sar mill-Istat lil AvtoZAZ għall-[…] prezz ta’ PLN 100 fit-30 ta’ Ġunju 2005 kienx fih għajnuna favur ix-xerrej, u indirettament, favur FSO. Il-Kummissjoni analizzat ir-rapport ta’ evalwazzjoni magħmul mill-KPMG. Id-ditta ta’ konsultazzjoni tosserva li l-kumpanija tirreġistra telf kbir u li ma hemm l-ebda talba għall-prodotti tagħha. Għalhekk, il-metodu ta’ l-influss tal-flus kontanti skontati (discounted cash flows method) ma jistax jiġi applikat sew. Il-metodu ta’ l-ispejjeż u l-metodu tal-likwidazzjoni biss jistgħu jiġu applikati. Iż-żewġ metodi jikkonkludu li l-valur ta’ FSO huwa […]. PriceWaterhouseCoopers (“PWC”) fil-maġġorparti taqbel mal-konklużjonijiet tal-KPMG. Il-Kummissjoni ma sabitx żbalji evidenti f’dawn ir-rapporti u tikkonkludi li l-avvenimenti li seħħew bejn id-data ta’ l-evalwazzjoni mill-KPMG u d-data tat-tranżazzjoni ma jwasslux sabiex il-prezz ta’ l-ishma jsir […]. Il-Kummissjoni għalhekk tikkunsidra li din it-tranżazzjoni ma tinkludiex element ta’ għajnuna.

(58)

B’konklużjoni, il-miżuri mniżżla f’Tabella 4 biss jikkostitwixxu għajnuna mill-Istat soġġett għad-deċiżjoni attwali.

(59)

Fid-deċiżjoni tal-ftuħ, il-Kummissjoni kkonkludiet li l-miżuri mniżżla f’Tabella 4 ma kinux ingħataw qabel l-adeżjoni tal-Polonja fl-UE fl-1 ta’ Mejju 2004. Il-Kummissjoni, iżda, tosserva li fil-kuntratt għall-bejgħ ta’ l-ishma ta’ FSO, konkluż fit-30 ta’ Ġunju 2005 bejn il-gvern u AvtoZAZ, il-kapitolu dwar l-għajnuna mill-Istat (Artikolu 9) jindika li “Il-korpi relevanti ta’ l-amministrazzjoni pubblika, kemm-il darba jirċievu deċiżjoni mill-Kummissjoni Ewropea li tirrikonoxxi l-għajnuna ppjanata mill-Istat bħala li hija konformi mas-suq komuni, beħsiebhom jagħtu lill-Kumpanija […] għajnuna mill-Istat għar-ristrutturar. Din l-assistenza se tingħata skond it-termini pprovduti fil-pjan ta’ ristrutturar ta’ FSO li bħalissa qiegħed jiġi rivedut mill-Kummissjoni Ewropea f’każ numru K 3/2005. […] Ix-Xerrej jiddikjara li l-għoti ta’ għajnuna mill-istat lill-kumpanija, li hemm referenza għalih fi klawsola 1 hawn fuq, kien wieħed mill-kundizzjonijiet għad-deċiżjoni tiegħu li jinvesti billi jixtri l-Ishma tal-Kumpanija. […] Id-dikjarazzjonijiet tal-korpi relevanti ta’ l-amministrazzjoni pubblika dwar l-intenzjoni li tingħata għajnuna mill-istat lill-Kumpanija, li għaliha saret referenza fil-klawsola 1 hawn fuq, huma nklużi fl-Anness Numru 6 ta’ dan il-kuntratt”. Il-Kummissjoni tikkonkludi, minn dak li ntqal hawn fuq, li fit-30 ta’ Ġunju 2005, kien hemm impenn mill-Istat, li kien jorbot legalment, u li kien soġġett għall-approvazzjoni mill-Kummissjoni, sabiex jagħti l-għajnuna li ġiet innotifikata.

(60)

Il-Kummissjoni tosserva li fit-30 ta’ Ġunju 2005, u f’dati preċedenti, ma kienx ċert jekk FSO kinitx se terġa’ ssir vijabbli. Dan ġie konfermat mir-rapporti ta’ evalwazzjoni ta’ KPMG u PWC msemmija hawn fuq. B’mod partikolari, il-Kummissjoni tinnota li l-kumpanija ma kellha l-ebda persuna li tagħti l-liċenzja għall-produzzjoni ta’ mudell ġdid. Il-kumpanija ma kinitx taf x’kienet se tipproduċi fil-futur. Il-kuntratt għall-[…] ġie ffirmat biss fl-2006. Il-ftehim għall-għoti tal-liċenzja li kien jeżisti dak iż-żmien ma’ GM DAT għall-produzzjoni ta’ Lanos skada […]. Il-livell tal-produzzjoni tal-Lanos kien baxx u ma kienx biżżejjed biex ikopri l-ispejjeż.

(61)

Fil-każ ta’ l-ammont preċiż ta’ l-għajnuna inkluż fil-garanzija ta’ l-Istat li tkopri s-self għall-investiment […], l-awtoritajiet Pollakki ma’ ssottomettewx il-kalkolu tal-fattur tar-riskju li permezz tiegħu tista’ tiġi kkalkolata l-garanzija. Sa Ottubru 2006, l-awtoritajiet Pollakki dejjem indikaw li din il-garanzija kienet neċessarja, peress li l-kumpanija ma setgħetx tikseb il-finanzjament mis-suq minħabba l-esperjenzi ħżiena u t-telf li kienu għamlu l-banek mis-self preċedenti tagħhom lil FSO. Barra minn hekk, il-Kummissjoni tosserva li, kif ġie indikat, l-impenn sabiex tingħata l-garanzija ittieħed fi żmien meta r-riskju ta’ falliment kien kbir. F’dawn iċ-ċirkostanzi, il-Kummissjoni tikkunsidra li l-għajnuna inkluża fil-garanzija ta’ l-Istat tista’ tammonta ghal 100 % ta’ l-ammont tal-garanzija. Fuq il-bażi ta’ l-evalwazzjoni li saret wara fuq il-kumpatibbiltà ta’ l-għajnuna, iżda, il-Kummissjoni m’għandhiex bżonn tikkwantifika l-ammont preċiż ta’ l-għajnuna inkluż f’din il-garanzija.

(62)

Il-Kummissjoni tinnota li l-awtoritajiet Pollakki, fis-sottomissjoni tagħhom tas-17 ta’ Ottubru 2006, issuġġerew li f’dik id-data, il-kumpanija tkun tista’ tikseb self mis-suq. B’riżultat ta’ dan, il-Polonja titlob li tikkwantifika l-għajnuna nkluża fil-garanzija fuq il-bażi tat-tnaqqis tar-rata ta’ interess miksub bis-saħħa tal-garanzija. Il-Kummissjoni ma tistax taċċetta din it-talba. Infatti, f’dak il-mument, l-Istat kien diġà impenja ruħu li jagħti l-garanzija (u miżuri oħra ta’ għajnuna) u l-ammont ta’ għajnuna jrid jiġi evalwat mhux iżjed tard minn meta l-Istat jagħti l-impenn irrevokabbli li jagħti l-miżuri ta’ sostenn. Is-self kollu li jingħata mis-suq wara dik id-data, jiġi affetwat mill-għajnuna li se tingħata mill-Istat. Is-suq jieħu f’kunsiderazzjoni l-effett pożittiv dirett (u dak indirett, bħas-sejba ta’ investitur, li sar possibbli minħabba l-wegħda ta’ għajnuna) ta’ l-għajnuna fuq il-kumpanija. B’riżultat ta’ dan, il-prezz tal-finanzjament li jiġi offrut wara ma jistax jintuża bħala bażi sabiex tigi evalwata l-kwantità ta’ għajnuna fil-miżuri kuntrattwali li ġew imwegħda qabel. Minn barra dan, l-informazzjoni pprovduta mill-awtoritajiet Pollakki dwar ir-rieda tal-banek li jagħtu self mhix konklusiva u ma tagħtix provi li kwalunkwe bank kien verament lest li jagħti self ta’ l-ammont in kwistjoni lil FSO mingħajr l-għajnuna mill-istat. L-awtoritajiet Pollakki eventwalment ikkonfermaw […] fl-ittra tagħhom tas-17 ta’ Novembru 2006.

(63)

Fil-każ ta’ l-għajnuna permezz tad-differiment tat-taxxa dovuta u tar-responsabbiltajiet tas-sigurtà soċjali ta’ FSO, din hija ekwivalenti għas-self lill-kumpanija. Kif ġie ndikat, dan it-tibdil fil-pjanijiet sar f’perjodu li fih ir-riskju ta’ falliment kien għoli. F’dawn iċ-ċirkostanzi, il-Kummissjoni tikkonkludi li l-element ta’ l-għajnuna f’dawn il-posponimenti seta’ jammonta għall-ammont sħiħ li jkun ġie pospost. Fuq il-bażi ta’ l-evalwazzjoni li saret wara dwar il-kumpatibbiltà ta’ l-għajnuna, m’hemmx għalfejn li l-Kummissjoni tikkwantifika l-ammont preċiż ta’ għajnuna inkluża f’dan it-tibdil fil-pjanijiet.

(64)

B’konklużjoni, l-ammont massimu ta’ għajnuna mogħtija wara l-adeżjoni, evalwat fid-deċiżjoni attwali huwa ta’ USD 83 miljun (EUR 66 miljun) u PLN 62 miljun (EUR 16 miljun). Bir-rata tal-kambju ta’ l-20 ta’ Ottubru 2006, l-għajnuna massima għalhekk tammonta għal EUR 82 miljun jew PLN 318 miljun.

(65)

Fl-aħħarnett, fir-rigward ta’ l-ammont tal-għajnuna li jinsab fil-miżuri mogħtija qabel l-adeżjoni, il-Kummissjoni tosserva li xi wħud mill-miżuri kienu wkoll differimenti tat-taxxa u tad-dejn tas-sigurtà soċjali. Fuq il-bażi ta’ l-istess raġunament li deher qabel, il-Kummissjoni tikkonkludi li l-ammont massimu ta’ għajnuna mogħtija qabel l-adeżjoni huwa t-total tal-valur nominali tal-miżuri, jiġifieri PLN 201 miljun (EUR 51 miljun). Mhux neċessarju li l-Kummissjoni tikkwantifika b’mod preċiż l-ammont ta’ għajnuna inkluż f’dawn il-miżuri.

(66)

Kif diġà ġie indikat fid-deċiżjoni ta’ ftuħ tal-proċedura, l-għajnuna attwali hija evalwata fuq il-bażi tal-linji gwida tal-Komunità ta’ l-1999 (u mhux ta’ l-2004) dwar l-għajnuna li jagħti l-Istat għas-salvataġġ u r-ristrutturar tal-kumpaniji li jinsabu f’diffikultà. Il-Kummissjoni tikkonsidra li għajnuna għar-ristrutturar hija kompatibbli meta kull waħda mill-kundizzjonijiet stabbiliti fil-linji gwida tiġi sodisfatta (15).

(67)

Kif ġie indikat fid-deċiżjoni sabiex tibda l-proċedura, il-Kummissjoni tikkunsidra li FSO qegħda f’diffikultà u hija eliġibbli għall-għajnuna għar-ristrutturar. Kif ġie kkonfermat mill-informazzjoni sottomessa mill-awtoritajiet Pollakki, mingħajr l-għajnuna, il-kumpanija ma kinitx tkun kapaċi tattira azzjonist u entità li tagħti l-liċenzja, li kienu indispensabbli sabiex ma tfallix. Minn barra dan, mingħajr il-garanzija mill-Istat, il-banek sallum ikunu għadhom ma tawx self għall-investiment lil FSO, li huwa indispensabbli għall-produzzjoni ta’ mudell ġdid, u b’konsegwenza, sabiex il-kumpanija ma tfallix.

(68)

Il-Kummissjoni vverifikat ukoll jekk […], li jista’ jkun il-benefiċjarju ta’ self għall-investiment garantit, huwiex eligibbli. L-awtoritajiet Pollakki assiguraw li […] - jew kwalunkwe isem ieħor li jingħata – jkun sussidjarja ta’ FSO u jkun jidher fid-dikjarazzjoni finanzjarja kkonsolidata tal-grupp ta’ FSO. Fuq il-bażi ta’ l-informazzjoni pprovduta mill-Polonja, jista’ jiġi konkluż li l-ħolqien ta’ […] ma kienx jikkostitwixxi l-ħolqien ta’ kumpanija ġdida fis-sens tal-linji gwida. Peress li hija parti essenzjali tat-taqsima ekonomika li qegħda f’diffikulta, […] hija eligibbli għall-għajnuna ta’ ristrutturar.

(69)

Il-linji gwida jindikaw li “l-pjan ta’ ristrutturar, li għandu jkun qasir kemm jista’ jkun, għandu jirrestawra l-vijabilità fit-tul tal-kumpanija f’perjodu ta’ żmien raġonevoli u fuq il-bażi ta’ suppożizzjonijiet realistiċi dwar il-futur tal-kundizzjonijiet ta’ ħidma. […] It-titjib fil-vijabilità għandu jirriżulta l-aktar minn miżuri interni […]”

(70)

Kif ġie dikjarat qabel, FSO fil-futur se topera bħala produttriċi indipendenti tal-karrozzi, fis-sens li l-mudelli prodotti, immuntati u mibjugħa mid-ditta ma jiġux żviluppati fil-grupp li għalih tappartjeni (16). Għalhekk jeħtieġ li l-kumpanija tikseb ftehim għall-għoti tal-liċenzja minn manifatturi kbar tal-karrozzi li jiżviluppaw il-mudelli tagħhom stess. Dawn il-kumpaniji jistgħu jipproduċu l-mudelli tagħhom fl-impjanti tagħhom stess jew f’kumpaniji indipendenti bħal FSO. Minn dan jirriżulta li, meta tkun qegħda tipprova tikseb ftehim għall-għoti tal-liċenzja, FSO se tkun f’kompetizzjoni ma’ l-impjanti ta’ produzzjoni eżistenti tal-manifattur ikkonċernat kif ukoll ma’ produtturi indipendenti oħra. FSO jista’ jirnexxielha tikseb ftehim għall-għoti tal-liċenzja b’mod regolari u li tiġġenera profitti mill-produzzjoni tal-mudelli konċernati jekk hija tkun produttriċi ta’ fiduċja u tkun effiċjenti u jkollha bażi ta’ spejjeż baxxa.

(71)

Il-Kummissjoni tosserva li l-pjan ta’ ristrutturar għandu l-għan li jwettaq il-kundizzjoni ta’ l-aħħar.

(72)

Fil-qasam operattiv, il-kumpanija implimentat pjan ta’ ristrutturar li kien iwassal fit-tul li kellu x’jaqsam ma’ FSO u mas-sussidjarji. Uħud mill-problemi identifikati minn FSO kienu numru eċċessiv ta’ oqsma u ta’ livelli ta’ maniġment, kif ukoll struttura organizzattiva mhux adattata. FSO ddeċidiet li tnaqqas in-numru ta’ oqsma u li tgħaqqad uħud minnhom, li tnaqqas in-numru ta’ livelli ta’ maniġment u li tnaqqas in-numru ta’ pożizzjonijiet maniġerjali. Immodifikat ukoll il-funzjoni tal-mappa tad-distribuzzjoni billi kkonċentrat xi funzjonijiet u eliminat dawk żejda. B’mod ġenerali, peress li l-livell operattiv ma kienx jikkorrispondi għall-operazzjonijiet u għall-volumi proprja ta’ produzzjoni, il-kumpanija naqqset b’mod kbir il-ħaddiema tagħha, kif jidher f’Tabella 2. Il-kumpanija rristrutturat is-sussidjarji tas-servizz tagħha, is-sussidjarji tagħha li huma attivi fil-produzzjoni tal-komponenti, kif ukoll fis-sussidjarji tal-bejgħ tagħha.

(73)

Mill-aspett finanzjarju, il-kumpanija kienet mimlija dejn li hija ma setgħetx trodd lura minħabba t-telf sostanzjali li kienet ġarrbet mis-sena 2000. Kif jidher f’Tabella 3, iżda, il-kumpanija nnegozjat mal-kredituri tagħha, li aċċettaw, jew li jbiddlu l-pretensjonijiet tagħhom f’ishma jew li jirrinunzjaw għall-maġġorparti tagħhom.

(74)

Id-deskrizzjoni preċedenti turi li, kif mitluba mil-linji gwida, il-kumpanija diġà ħadet miżuri interni importanti mill-aspetti operattivi u finanzjarji sabiex terġa’ tikseb il-kompetittività tagħha. Il-perjodu ta’ ristrutturar, iżda, se jkun lest biss meta FSO tkun għamlet l-investimenti neċessarji għall-produzzjoni tal-mudell ġdid u tkun reġgħet kisbet volum ta’ produzzjoni li jkun jiġġenera profitt raġonevoli. B’konsegwenza ta’ dan, fuq il-bażi ta’ l-ippjanar attwali, il-perjodu ta’ ristrutturar għandu jitqies bħala li jispiċċa fi […].

(75)

Minbarra r-ristrutturar intern, li jagħmel lil FSO produttriċi iżjed effiċjenti, il-kumpanija, mill-2005, tibbenefika wkoll minn azzjonist ġdid - AvtoZAZ. Fil-fatt, dan jagħti lil FSO aċċess privileġġat għan-netwerk ta’ distribuzzjoni ta’ UkrAvto sabiex tbiegħ il-prodotti tagħha.

(76)

Il-Kummissjoni osservat li l-pjan ta’ ristrutturar mhuwiex ħieles mir-riskji u l-inċertezzi. Fl-ewwel lokm FSO ikollha fuq bażi regolari tagħmel offerti għall-ftehim għall-għoti tal-liċenzja li jrid ikollhom suċċess sabiex ikollha mudell x’tipproduċi. Fit-tieni lok, FSO tkun tiddependi fuq is-suċċess kummerċjali tal-vettura jew taż-żewġ vetturi prodotti, li ma jistax jiġi ggarantit. It-tielet, FSO jkollha tiġġenera biżżejjed marġini ta’ profitt bil-produzzjoni tal-mudelli kkonċernati. Minħabba l-intensità tal-kompetizzjoni fis-suq tal-karrozzi, li jidher mil-livell baxx ta’ profitt li jsir mill-produtturi ta’ vetturi ta’ massa, sabiex jinkiseb profitt ikun neċessarju li jsir titjib permanenti fl-effiċjenza u li jiġu kkontrollati l-ispejjeż. Dawn ir-riskji kollha huma parti mill-pjan ta’ ristrutturar u jistgħu, fil-każ li jimmaterjalizzaw, ma jitqisux bħala “ċirkostanzi mhux prevedibbli” fit-tifsira tal-paragrafu 48 tal-linji gwida.

(77)

Minħabba r-ristrutturar operattiv u finanzjarju li diġà kien inkiseb, iżda, l-appoġġ ta’ l-azzjonist ġdid u tal-[…] ftehim iffirmat mal-GM DAT fl-[…] 2006 għall-produzzjoni tal-[…], il-Kummissjoni tikkunsidra li hemm probabbiltà biżżejjed li l-pjan ta’ ristrutturar fit-tul jippermetti lil FSO sabiex terġa’ tikseb il-vijabilità tagħha.

(78)

Kif ġie indikat, l-industrija tal-karrozzi ta’ l-UE qegħda tbati minn kapaċitajiet żejda u qiegħed jiġi mħabbar b’mod regolari tnaqqis fin-numru tal-ħaddiema. F’dan il-kuntest, il-ħruġ tal-kumpaniji mis-suq huwa riżultat normali fis-suq. L-għajnuna li qegħda tiġi eżaminata bħalissa tfixkel din il-funzjoni u titfa’ l-piż ta’ l-aġġustament fuq produtturi oħrajn. Dawn il-kompetituri jaffrontaw kompetitur ieħor meta mqabbla mas-sitwazzjoni li fiha ma jkunx hemm l-għajnuna mill-istat li ssalva FSO mill-falliment. Sabiex jiġi evalwat id-daqs tad-distorsjoni li tirriżulta minħabba din l-għajnuna, huwa għalhekk neċessarju li wieħed janalizza f’liema suq topera FSO u min huma l-kompetituri tagħha.

(79)

Il-Kummissjoni tosserva li FSO hija attiva f’żewġt iswieq. L-ewwel nett, FSO tikkompeti sabiex tikseb il-liċenzji jew l-ordinijiet sabiex tipproduċi l-karrozzi minn manifatturi kbar eżistenti ta’ karrozzi. F’dan il-kuntest, FSO qegħda f’kompetizzjoni ma’ l-impjanti ta’ produzzjoni eżistenti – jew li huma proprjeta’ tal-manifattur kbir ikkonċernat jew li huma indipendenti – li jistgħu wkoll jipproduċu dawn il-karrozzi jew li jkun interessati li jibnuhom. Il-Kummissjoni, f’dawn l-aħħar snin, osservat li l-manifatturi kbar tal-karrozzi li huma attivi fl-UE, regolarment iqegħdu f’kompetizzjoni diversi impjanti li jinsabu f’żona ġeografika speċifika, ġeneralment fl-Ewropa (17), għall-produzzjoni ta’ mudelli speċifiċi. Minħabba din l-għajnuna, FSO tista’ ssalva mill-falliment u tista’ tikkompeti għal din il-produzzjoni għad-detriment ta’ impjanti ta’ produzzjoni oħra li jinsabu fiż-żona. Jista’ jkun li din it-tip ta’ distorsjoni forsi diġà seħħet meta FSO ngħatat il-ftehim għall-għoti tal-liċenzja […] minn GM DAT. Il-mudell […] seta’ teoretikament jiġi prodott f’impjant Ewropew ieħor. Jekk wieħed iwarrab dan il-kuntratt partikolari, il-Kummissjoni tista’, peress li FSO se tikkompeti għal ftehim għall-għoti tal-liċenzja oħra fil-futur, tassumi b’mod raġonevoli li, it-tip ta’ distorsjoni li għadha kemm ġiet deskritta se sseħħ fil-futur, għad-detriment ta’ impjanti oħra li jinsabu ġewwa l-UE. F’dan il-każ, il-Kummissjoni tosserva li t-tip ta’ karrozza li FSO beħsiebha tipproduċi bħalissa qiegħed jiġi prodott minn diversi impjanti fl-UE. Din id-distorsjoni tista’ tagħmel ħsara serja lill-impjant ta’ produzzjoni li jkun kiseb il-ftehim għall-għoti tal-liċenzja li kieku FSO ħarġet mis-suq. Il-produzzjoni ta’ mudell ta’ karrozza spiss tfisser xogħol għal mijiet (jew anke eluf) ta’ persuni matul is-snin. Il-ġid ta’ l-Istat Membru, li fih tkun tinsab il-kumpanija li l-offerta tagħha ma tkunx ġiet aċċettata, għalhekk jiġi affettwat b’mod serju bil-preżenza ta’ FSO.

(80)

It-tieni, il-mudell prodott minn FSO, se jkun f’kompetizzjoni ma’ mudelli oħrajn u se jieħu parti mis-suq mingħandhom. Il-mudelli li jikkompetu se jitilfu l-bejgħ meta mqabbla mas-sitwazzjoni li fiha ma jkunx hemm FSO. Din it-tip ta’ distorsjoni se taffwetta b’mod negattiv lill-manifatturi tal-karrozzi u l-impjanti tal-produzzjoni tagħhom li jipproduċu l-mudelli li jikkompetu magħhom. Li kieku FSO kellha toħroġ mis-suq, il-produzzjoni tal-mudelli li FSO aktarx tipproduċi kienu jingħataw lil impjanti ta’ produzzjoni oħra. Il-Kummissjoni tosserva iżda, li jekk FSO tingħata l-kuntratt, dan ikun ifisser li hija produttriċi irħas. Għalhekk, fis-suq jiġu offruti karrozzi irħas milli f’sitwazzjoni kieku FSO għalqet (18). Barra minn hekk, huwa ġeneralment rikonoxxut li ż-żieda fil-kapaċità ta’ produzzjoni disponibbli fis-suq għandha t-tendenza li tnaqqas il-prezz tal-prodott ikkonċernat. Il-prezzijiet iżjed baxxi tal-karrozzi, għalhekk, qegħdin jagħmlu ħsara lill-kompetituri. Il-Kummissjoni tosserva li, skond il-previżjonijiet inklużi fil-pjan ta’ ristrutturar, il-produzzjoni fit-tul ta’ FSO se tirrappreżenta bejn il-l u t-2 % tal-produzzjoni tal-karrozzi ġewwa l-UE. Kif ġie rikonoxxut mill-awtoritajiet Pollakki, iżda, il-karrozzi prodotti minn FSO se jkunu l-aktar f’kompetizzjoni mal-mudelli tal-karrozzi li huma ta’ daqs u prezz simili. Għalhekk, is-sehem tas-suq fuq dik is-sezzjoni partikolari ma jistax jiġi kkunsidrat bħala “negliġibbli” fit-tifsira tal-paragrafu 36 tal-linji gwida.

(81)

Il-Kummissjoni tikkonkludi mill-analiżi preċedenti li l-kompetituri ta’ FSO – l-impjanti ta’ produzzjoni li jagħmlu offerti għall-kostruzzjoni ta’ l-istess mudell, l-impjanti ta’ produzzjoni li jipproduċu l-mudelli li jikkompetu magħhom, il-manifatturi tal-karrozzi li jipproduċu mudelli kompetituri – se jiġu affettwati b’mod negattiv mill-għajnuna li se tippermetti li FSO tkompli f’suq li qiegħed ibati minn kapaċità żejda. Għalhekk, il-Kummissjoni tikkalkula li huma neċessarji miżuri sabiex tiġi llimitata d-distorsjoni li tinħoloq mill-għajnuna. Meta tkun qegħda tiddeċiedi fuq il-livell ta’ dawn il-miżuri, il-Kummissjoni tieħu f’kunsiderazzjoni l-fatturi ta’ mitigazzjoni, li l-kumpanija tinsab f’żona megħjuna u li s-sehem tas-suq huwa limitat.

(82)

Waqt il-proċeduri, l-awtoritajiet Pollakki pproponew diversi miżuri ta’ kumpens. L-ewwel l-awtoritajiet Pollakki ndikaw li FSO illimitat n-netwerk tal-bejgħ tagħha billi naqqset in-numru tal-ħwienet. Il-Kummissjoni iżda tosserva li, peress li l-bejgħ fil-Polonja naqas ħafna u xi ħwienet jew għandhom responsabbiltajiet li misshom diġà tħallsu vis-à-vis FSO jew kienu fallew, din ir-razzjonalizzazzjoni kienet neċesarja għar-raġunijiet ta’ vijabilità u sabiex jitnaqqsu l-ispejjeż tal-bejgħ. Minn barra dan, uħud minn dawn il-ħwienet ma kinux ikkontrollati minn FSO u kienet id-deċiżjoni tas-sid li ma jbiegħx iżjed il-karrozzi ta’ FSO u li jbiegħ marki oħrajn. Din il-miżura, għalhekk, mhijiex sforz addizzjonali ta’ FSO u ma tnaqqasx il-preżenza tal-kumpanija fis-swieq li tmur lil hinn minn dak li huwa ġustifikat għal raġunijiet ta’ vijabilità. Għalhekk, ma jistax jiġi aċċettat bħala miżura ta’ kumpens.

(83)

L-awtoritajiet Pollakki pproponew ukoll li FSO tillimita b’mod “volontarju” n-numru ta’ pajjiżi li lejhom tesporta l-produzzjoni tagħha. Il-Kummissjoni iżda tinnota li FSO mhijiex se tipproduċi l-mudelli tagħha stess iżda se tipproduċi fuq il-bażi tal-ftehim għall-għoti tal-liċenzja. Kuntratt bħal dan jillimita l-pajjiżi li fihom tista’ tinbiegħ il-produzzjoni. Għalhekk, din il-limitazzjoni hija parti integrali tal-pjan kummerċjali u mhijiex konċessjoni minn FSO, li ma għandha l-ebda kontroll fuqha. Minn barra dan, il-previżjonijiet tal-bejgħ għal dawn il-pajjiżi ma ġewx imsaħħa b’biżżejjed elementi.

(84)

L-awtoritajiet Pollakki pproponew li jżarmaw xi apparat fil-linji ta’ produzzjoni ta’ FSO. Dan l-apparat, iżda, xorta jrid jiġi sostitwit sabiex jiġi prodott mudell ġdid.

(85)

Fl-aħħarnett, il-Polonja ndikat li l-kapaċità ta’ produzzjoni ta’ FSO hija ta’ [200 000 – 230 000] karrozza kull sena, fuq il-bażi ta’ żewġ xiftijiet, ipproponiet li tillimita l-kapaċità ta’ produzzjoni għal [140 000 – 170 000] karrozza kull sena sa l-2008. Il-Kummissjoni tosserva li dan jikkorrispondi għal livell ta’ produzzjoni previst minn FSO għall-2008 (ara tabella 5) (19). Għalhekk, din il-miżura ma kinitx se tkun ta’ piż fuq il-kumpanija.

(86)

Bħala konklużjoni, il-miżuri kollha proposti mill-awtoritajiet Pollakki ma jirrappreżentawx il-konċessjonijiet magħmula minn FSO. Ma jnaqqsux il-preżenza fis-suq ta’ FSO iżjed minn dak li jitqies bħala ġġustifikat minħabba n-neċessità li tiġi rrestrawrata l-vijabilità. Ma jistgħux jikkompensaw għad-distorsjoni li tirriżulta minħabba l-għajnuna. Għandha tiġi evitata għalhekk id-distorsjoni mhux neċessarja tal-kompetizzjoni. Peress li l-Kummissjoni tikkunsidra li l-miżuri huma neċessarji sabiex tiġi llimitata d-distorsjoni fil-kompetizzjoni, iddeċidiet li tagħmel il-kumpatibbiltà ta’ l-għajnuna soġġetta għal dawn il-kundizzjonijiet:

(87)

Il-Kummissjoni tqis li din il-kundizzjoni hija xierqa sabiex tnaqqas id-distorsjoni fil-kompetizzjoni li tirriżulta minħabba l-għajnuna. Fuq il-bażi tal-previżjonijiet tal-produzzjoni provduti mill-awtoritajiet Pollakki, din kienet se tikkostitwixxi limitu fuq il-kumpanija għal sentejn biss jew għall-massimu ta’ tliet snin u xahrejn (23). Bħala konsegwenza, waqt dan il-perjodu din il-kundizzjoni se ġġiegħel lill-kumpanija sabiex tipproduċi u tbiegħ ftit karrozzi. Dawn il-limitazzjonijiet ifissru wkoll li l-kumpanija ma tkunx tista’ tagħmel offerti għall-ftehim għall-għoti ta’ liċenzja addizzjonali li jkun jeħtieġ produzzjoni waqt dan il-perjodu.

(88)

Billi l-livell ta’ produzzjoni jiġi ddisinjat (dewmien, livell) b’tali mod li l-effett restrittiv jiġi llimitat għal żewġ – jew għall-massimu ta’ tliet snin u xahrejn, il-Kummissjoni tieħu f’kunsiderazzjoni l-istat tar-reġjun li fih tkun il-kumpanija u s-sehem tas-suq limitat tagħha.

(89)

Fid-deċiżjoni ta’ ftuħ ta’ investigazzjoni fil-fond, il-Kummissjoni esprimiet tħassib dwar jekk kinitx neċessarja l-għajnuna kollha. B’mod partikolari, il-Kummissjoni osservat li l-għoti ta’ ċerti miżuri sar bil-kundizzjoni li jinsab investitur. B’riżultat ta’ dan, l-għajnuna kienet tidher bħala mod sabiex jiġi attirat investitur u mhux li kienet se tiġi llimitata għal dak li l-kumpanija verament kienet teħtieġ sabiex ma tfallix. L-investigazzjoni fil-fond warrbet dawn id-dubji. Infatti l-Kummissjoni tosserva li mingħajr l-appoġġ ta’ investitur u ta’ dak li jagħti l-liċenzja, il-kumpanija waħedha ma kinitx teħles mill-falliment. Infatti, FSO ma kellha l-ebda mudell x’tipproduċi u ma kellhiex il-kapaċità li tiżviluppa mudell kompletament ġdid. Minn barra dan, in-nuqqas ta’ interess muri mid-29 l-akbar manifatturi tal-karrozzi wara l-kuntatti magħmula minn FSO fi Frar 2004 juri li l-kumpanija kienet f’sitwazzjoni diffiċli ħafna u li anke bl-għajnuna ma kinitx tirrappreżenta kumpanija li kienet tidher vijabbli u li kienet tagħmel il-qligħ. Fuq il-bażi ta’ dak li diġà ntqal, il-Kummissjoni tikkonkludi li l-fatt li parti mill-għajnuna saret bil-kundizzjoni li jinstab investitur ma kienx ifisser li din l-għajnuna kienet taqbeż il-minimu neċessarju sabiex FSO terġa’ tikseb il-vijabilità.

(90)

Sabiex jiġi evalwat jekk l-għajnuna hijiex limitata għall-minimu neċessarju, il-Kummissjoni analizzat liema partijiet kienu diġà jappoġġaw u dawk li kienu se jappoġġaw l-ispejjeż tar-ristrutturar. Dawn ta’ l-aħħar għandhom x’jaqsmu l-aktar ma’ l-ispejjeż ta’ ristrutturar tal-passiv tal-kumpanija. Il-kumpanija kienet teħtieġ ukoll garanzija għall-ammont iżgħar sabiex tikseb is-self għall-investiment li jkun jiffinanzja l-modernizzazzjoni tal-linja ta’ produzzjoni li kienet neċessarja sabiex jiġi prodott il-mudell ġdid.

(91)

Kif ġie indikat qabel (ara Tabella 3), ġie iffirmat ftehim f’Settembru 2003 bejn FSO u l-kredituri ewlenin tagħha. F’dan il-kuntest, DMC ikkapitalizzat il-pretensjonijiet tagħha kontra FSO li kienu jammontaw għall-PLN [2 – 3] biljun (**)[…]. It-Teżor ta’ l-Istat għamlet l-istess għall-ammont ta’ PLN [400 – 800] miljun […]. Kif ġie indikat fil-paragrafu 0, il-Kummissjoni tqis din il-bidla bħala ħielsa mill-għajnuna. F’dan il-ftehim ta’ Settembru 2003, il-banek privati ntrabtu li jirrinunzjaw għall-pretensjonijiet tagħhom kontra FSO li kienu jammontaw għall-PLN [0.7 – 1.2] biljun […], u iżjed min-nofs ta’ dan l-impenn kien diġà ġie implimentat. Ġew ristrutturati wkoll pretensjonijiet iżgħar kontra FSO u b’hekk ġew maħfura PLN [120 – 230] miljun […] oħra. Il-bidla tad-dejn u r-rinunzji jnaqqsu direttament l-ammont ta’ għajnuna li tkun neċessarja sabiex il-kumpanija ma tfallix. Infatti, kieku dawn il-kredituri ma aċċettawx il-bidliet u r-rinunzji tal-pretensjonijiet tagħhom, il-ħlas lura ta’ dan il-passiv kien ikun dovut immedjatament u kienet tkun neċessarja għajnuna addizzjonali sabiex jiġu mħallsa lura u b’hekk jiġi evitat il-falliment ta’ FSO. B’kollox, jekk ma titqiesx l-bidla tad-dejn mit-Teżor ta’ l-Istat, il-kontribuzzjoni magħmula mill-kredituri privati ta’ FSO jammonta għall-PLN [2.8 – 4.4] biljun […].

(92)

Minbarra l-kontribuzzjoni li għadha kemm ġiet deskritta, il-Polonja indikat li f’dawn l-aħħar snin AvtoZAZ iffinanzjat minn qabel l-ordnijiet tagħha lil FSO, li kienu jirrapprezżentaw kważi l-produzzjoni kollha tal-kumpanija Pollakka. Dawn il-finanzjamenti minn qabel ippermettew lil FSO, li ma kellha l-ebda likwidità disponibbli sabiex tiffinanzja l-produzzjoni (eż tixtri l-inputs) tal-karrozzi ordnati. Dawn l-ordnijiet imħallsa minn qabel ippermettew lill-kumpanija sabiex topera f’dawn l-aħħar snin. Dawn it-tipi ta’ finanzjamenti minn qabel mhumiex prattika komuni fl-industrija tal-karrozzi, speċjalment fil-każ ta’ kumpanija li tkun f’diffikultà. Jista’ jiġi konkluż li AvtoZAZ, permezz ta’ dan il-ħlas minn qabel lil FSO kkontribwixxiet għall-finanzjament tal-kumpanija waqt din il-fażi ta’ ristrutturar. Dan il-kontribut privat huwa sinjal li s-suq jemmen fil-vijabilità tal-kumpanija. Skond l-informazzjoni sottomessa mill-awtoritajiet Pollakki, l-ammont tal-ħlas magħmul minn qabel mogħti minn AvtoZAZ, f’ċerti perjodi kien jammonta għall-USD [10 – 50] miljun […].

(93)

Kif ġie indikat, bir-rata tal-kambju ta’ l-20 ta’ Ottubru 2006, l-ammont massimu ta’ għajnuna li se tingħata wara l-adeżjoni huwa ta’ EUR 82 miljun jew PLN 318 miljun. Meta kienet qegħda tevalwa jekk l-għajnuna kinitx qegħda tiġi llimitata għall-minimu neċessarju, il-Kummissjoni kkunsidrat ukoll l-għajnuna mogħtija qabel l-adeżjoni fil-qafas ta’ l-istess ristrutturar. Kif ġie indikat qabel, il-Kummissjoni tqis li l-ammont massimu ta’ għajnuna mogħtija fil-perjodu ta’ tliet xhur qabel l-adeżjoni huwa ta’ PLN 201 miljun (EUR 51 miljun). Il-massimu ta’ l-għajnuna totali tar-ristrutturazzjjoni għalhekk jammonta għal PLN 519 miljun (EUR 133 miljun). Mill-konsiderazzjonijiet preċedenti, jista’ jiġi konkluż li l-kontribuzzjonijiet mis-settur privat ikopru iżjed minn 85 % ta’ l-ispejjeż ta’ ristrutturar, u l-għajnuna inqas minn 15 %. Anke jekk il-bidla tad-dejn (mingħajr għajnuna) mill-Istat ġiet meqjusa bħala spiża tar-ristrutturar, il-kontribuzzjoni mis-settur privat tammonta għal iżjed minn tliet kwarti ta’ l-ispejjeż għar-ristrutturar. Il-Kummissjoni tqis il-kontribuzzjoni mill-kredituri privati bħala importanti.

(94)

Fuq il-bażi ta’ dak ntqal hawn fuq, il-Kummissjoni tikkonkludi li l-għajnuna hija limitata għall-minimu neċessarju.

(95)

Fuq il-bażi ta’ l-informazzjoni pprovduta mill-awtoritajiet Pollakki, il-Kummissjoni tikkonkludi li l-kumpanija ma rċevitx għajnuna ta’ ristrutturar f’dawn l-aħħar għaxar snin. Waqt ir-ristrutturar attwali, il-miżuri ta’ l-ewwel għajnuna ngħataw fl-aħħar tliet xhur ta’ l-2003. Din il-kundizzjoni għalhekk qegħda tiġi rispettata.

(96)

Il-Kummissjoni tikkonkludi li l-għajnuna li ġiet innotifikata hija kumpatibbli mas-suq komuni jekk jiġu rispettati ċerti kundizzjonijiet.

Sors:

“Company Presentation, Fabryka Samonochodów Osobowych S.A., Warsaw 2006” (“Il-Preżentazzjoni tal-Kumpanija, Fabryka Samonochodów Osobowych S.A., Varsavja 2006”), sottomess mill-awtoritajiet Pollakki fil-31 ta’ Awwissu 2006