Prodotti imballati minn qabel — kif timla u tagħmel it-tikketta tal-pakkett

SOMMARJU TA’:

Id-Direttiva 76/211/KEE dwar il-prekondizzjonament bil-piż jew bil-volum ta’ ċerti prodotti imballati minn qabel

X’INHU L-GĦAN TAD-DIRETTIVA?

Din tintroduċi leġiżlazzjoni uniformi madwar l-Istati Membri tal-Unjoni Ewropea (UE) u tistabbilixxi l-kundizzjonijiet għal pakketti imballati minn qabel* b’℮-marka. Din għandha l-għan li tiżgura li l-kwantità murija fuq il-kontenitur ta’ prodott imballat minn qabel* hija korretta u li jkun ittikkettat b’mod xieraq.

PUNTI EWLENIN

Id-direttiva ġiet emendata tul is-snin, u dan is-sommarju jirrifletti l-kontenut tagħha kif inhi bħalissa.

Kamp ta’ applikazzjoni

Id-direttiva tirrigwarda pakketti f’imballaġġ minn qabel li fihom prodotti mibjugħa individwalment b’piż jew volum kostanti li ntgħażel bil-quddiem minn min jippakkja u mhuwiex inqas minn 5 grammi jew 5 millilitri u mhux iktar minn 10 kilogrammi jew 10 litri.

L-℮-marka

Id-direttiva tistabbilixxi l-kundizzjonijiet biex il-prodott imballat minn qabel ikollu ℮-marka. L-℮-marka, imqiegħda ħdejn il-kwantità nominali*, tikkonferma l-konformità mar-regoli tal-UE dwar l-indikazzjoni tal-volum jew il-piż u dwar il-metodi ta’ kejl li għandhom jużaw il-bejjiegħa ta’ prodotti mballati minn qabel. Għalkemm l-℮-marka mhijiex obbligatorja, jekk tkun imwaħħla ma’ prodott dan ifisser li l-prodott jista’ jinbiegħ fl-Istati Membri kollha mingħajr ma jkun hemm bżonn li tiġi vverifikata l-konformità mar-rekwiżiti nazzjonali individwali.
Biex jiġi żgurat li l-kwantità murija hija korretta, pakketti bl-℮-marka fuqhom għandhom jissodisfaw ir-rekwiżiti li ġejjin.
- Il-kwantità medja ta’ prodott f’pakketti li ġejjin mill-istess lott għandha tkun ugwali għal jew akbar mill-kwantità msemmija fuq il-pakkett
- Il-kwantità nominali tirreferi biss għall-prodott. Din ma tinkludix l-imballaġġ jew kwalunkwe materjali użati biex jiġi protett, immaniġġjat jew ippreservat il-prodott, jew li jservi bħala għajnuna waqt li jintuża.
- Proporzjon limitat ħafna biss ta’ prodotti mballati minn qabel mill-istess lott jista’ jkollhom ammont iżgħar ta’ prodott minn dak indikat fuq il-pakkett, magħruf bħala “żball negattiv massimu ttollerat”. Il-punt 2.4 tal-Anness 1 tad-direttiva jistabbilixxi dan il-punt f’aktar dettall.
Billi jpoġġi l-℮-marka fuq il-prodott, min jippakkja jew l-importatur jiċċertifika li l-pakketti mballati minn qabel jissodisfaw ir-rekwiżiti ta’ din id-direttiva f’termini ta’ kwalità u kontrolli metroloġiċi (aktar dettalji fl-Anness I, Taqsima 5 tad-direttiva u fl-Anness II) .
L-ittra “e” trid titqiegħed fl-istess kamp viżiv bħall-indikazzjoni tal-piż nominali jew tal-volum nominali u għandha tkun għolja minimu ta’ 3 millimetri.

Indikazzjoni tal-piż jew tal-volum

It-tikkettar għandu jindika l-volum fil-każ ta’ prodotti likwidi u l-piż fil-każ ta’ prodotti oħrajn.
It-tikketta tal-prodott imballat minn qabel għandha tinkludi wkoll indikazzjonijiet tal-piż u tal-volum użati fil-prattika kummerċjali jew tkun konformi mar-regolamenti nazzjonali tal-pajjiż tad-destinazzjoni jekk tali indikazzjonijiet ivarjaw bejn l-Istati Membri.
L-Istati Membri la jistgħu jipprojbixxu u lanqas jirrestrinġu t-tqegħid fis-suq ta’ imballaġġ li jikkonforma mar-rekwiżiti tad-direttiva dwar l-indikazzjoni tal-volum jew il-massa u l-metodi metroloġiċi użati, u jekk ikollux l-℮-marka.

Atti delegati

Ir-Regolament Emendatorju (UE) 2019/1243 jagħti s-setgħa lill-Kummissjoni Ewropea biex tadotta atti delegati sabiex tadatta d-Direttiva 76/211/KEE għall-progress tekniku.

MINN META JIBDEW JAPPLIKAW IR-REGOLI?

Id-Direttiva 76/211/KEE kellha tiġi trasposta fil-liġi nazzjonali sat-22 ta’ Lulju 1977.
Fil-Belġju u l-Irlanda kellha tiġi trasposta fil-liġi nazzjonali sal-31 ta’ Diċembru 1979.

SFOND

Għal iktar informazzjoni ara:

Imballaġġ minn qabel (il-Kummissjoni Ewropea)
℮-marka (il-Kummissjoni Ewropea).

TERMINI EWLENIN

Pakkett imballat minn qabel. Il-kombinazzjoni ta’ prodott u l-imballaġġ individwali li fih ikun imballat minn qabel.

Prodott imballat minn qabel. Prodott hu mballat minn qabel meta jitqiegħed f’imballaġġ ta’ kwalunkwe natura mingħajr ma jkun preżenti x-xerrej u meta l-kwantità ta’ prodott li jkun hemm fl-imballaġġ ikollha valur iddeterminat minn qabel u ma tkunx tista’ tinbidel jekk ma jinfetaħx l-imballaġġ jew jgħaddi minn modifika perċetibbli.

Kwantità nominali. Il-kwantità nominali (piż nominali jew volum nominali) tal-kontenut ta’ pakkett imballat minn qabel hija l-piż jew il-volum indikat fuq il-pakkett imballat minn qabel, jiġifieri l-kwantità ta’ prodott imballat minn qabel jitqies li fih.

DOKUMENT PRINĊIPALI

Id-Direttiva tal-Kunsill 76/211/KEE tal-20 ta’ Jannar 1976 fuq l-approssimazzjoni tal-liġijiet tal-Istati Membri dwar il-prekondizzjonament bil-piż jew bil-volum ta’ ċerti prodotti f’imballaġġ minn qabel (ĠU L 46, 21.2.1976, pp. 1-11).

Emendi suċċessivi għad-Direttiva 76/211/KEE ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (UE) Nru 1169/2011 tal-Parlament Ewropew u tal-Kunsill tal-25 ta’ Ottubru 2011 dwar l-għoti ta’ informazzjoni dwar l-ikel lill-konsumaturi, li jemenda r-Regolamenti (KE) Nru 1924/2006 u (KE) Nru 1925/2006 tal-Parlament Ewropew u tal-Kunsill u li jħassar id-Direttiva tal-Kummissjoni 87/250/KEE, id-Direttiva tal-Kunsill 90/496/KEE, id-Direttiva tal-Kummissjoni 1999/10/KE, id-Direttiva 2000/13/KE tal-Parlament Ewropew u tal-Kunsill, id-Direttivi tal-Kummissjoni 2002/67/KE u 2008/5/KE u r-Regolament tal-Kummissjoni (KE) Nru 608/2004 (ĠU L 304, 22.11.2011, pp. 18-63).

Ara l-verżjoni konsolidata.

Ir-Regolament (KE) Nru 1830/2003 tal-Parlament Ewropew u tal-Kunsill tat-22 ta’ Settembru 2003 dwar it-traċċjabilità u l-ittikkettjar ta’ organiżmi modifikati ġenetikament u t-traċċjabilità ta’ prodotti ta’ l-ikel u għalf manifatturati minn organiżmi modifikati ġenetikament u li jemenda d-Direttiva 2001/18/KE (ĠU L 268, 18.10.2003, pp. 24-28).

Ara l-verżjoni konsolidata.

l-aħħar aġġornament 10.05.2022

Top