31.3.2011

MT

Il-Ġurnal Uffiċjali tal-Unjoni Ewropea

C 99/31

---

Sejħa għal turija ta’ interess għal esperti Xjentifiċi sabiex jiġu kkunsidrati għal sħubija fil-panils Xjentifiċi u fil-Kumitat Xjentifiku tal-Awtorità Ewropea dwar is-Sigurtà fl-Ikel (Parma, Italja)

2011/C 99/06

—	Il-Panil dwar is-Saħħa u l-Benesseri tal-Annimali (AHAW);

—	Il-Panil dwar l-Addittivi fl-Ikel u Sorsi Nutrijenti miżjudin fl-ikel (ANS);

—	Il-Panil dwar il-Perikli Bijoloġiċi (BIOHAZ);

—	Il-Panil dwar il-Materjali ta’ Kuntatt mal-Ikel, Enzimi, Togħmiet u għajnuniet fl-Ipproċessar (CEF)

—	Il-Panil dwar il-Kontaminanti fil-katina tal-ikel (CONTAM);

—	Il-Panil dwar l-Addittivi tal-Għalf u prodotti jew sustanzi użati fl-għalf tal-annimali (FEEDAP);

—	Il-Panil dwar Organiżmi Modifikati Ġenetikament (GMO);

—	Il-Panil dwar Prodotti tad-dieta, nutrizzjoni u allerġiji (NDA);

—	Il-Panil dwar is-Saħħa tal-Pjanti (PLH);

—	Il-Panil dwar Prodotti ta’ Protezzjoni tal-Pjanti u r-residwi tagħhom (PPR);

—	Il-Kumitat Xjentifiku (SC)

Ref.: EFSA/E/2011/001

1.   Suġġett tas-sejħa

Din is-sejħa hija indirizzata għal xjenzjati li jixtiequ li jiġu kkunsidrati għal sħubija fil-Kumitat Xjentifiku (SC – Scientific Committee) tal-Awtorità Ewropea tas-Sigurtà tal-Ikel (EFSA) jew f’wieħed mill-Panils Xjentifiċi tal-EFSA fuq, b’mod partikolari: Is-Saħħa u l-Benesseri tal-Annimali (AHAW), l-Addittivi fl-Ikel u Sorsi Nutrijenti miżjudin fl-ikel (ANS), Perikli Bijoloġiċi (BIOHAZ), Materjali ta’ Kuntatt mal-Ikel, Enzimi, Togħmiet u għajnuniet fl-Ipproċessar (CEF), Kontaminanti fil-katina tal-ikel (CONTAM), Addittivi tal-Għalf u prodotti jew sustanzi użati fl-għalf tal-annimali (FEEDAP), Organiżmi Modifikati Ġenetikament (OMGs), Prodotti tad-dieta, nutrizzjoni u allerġiji (NDA), is-Saħħa tal-Pjanti (PLH), il-Prodotti ta’ Protezzjoni tal-Pjanti u r-residwi tagħhom (PPR).

Il-membri attwali tal-Kumitat Xjentifiku u ta’ tmienja mill-Panils Xjentifiċi (kollha għajr ANS u CEF) qegħdin iservu mandat ta’ tliet snin li huwa mistenni li jiskadi f’nofs l-2012. Il-membri l-ġodda sejrin jinħatru għall-mandat ta’ tliet snin ta’ wara li sejjer jibda f’nofs l-2012 u li sejjer jintemm f’nofs l-2015.

Fir-rigward tal-membri tal-Panils Xjentifiċi tal-ANS u CEF, il-mandat ta’ tliet snin li sejjer jibda f’nofs l-2011 huwa mistenni li jiskadi f’nofs l-2014. Membri ġodda sabiex jimlew il-postijiet vakanti f’dawn il-panils jistgħu jinħatru mil-lista ta’ riservi stabbilita bħala riżultat ta’ din is-sejħa. L-istess lista ta’ riservi tista’ sservi wkoll sabiex taħtar membri ġodda tal-Panils Xjentifiċi tal-ANS u CED għall-mandat ta’ tliet snin ta’ wara, li jibda f’nofs l-2014 u li sejjer jintemm f’nofs l-2017.

L-esperti inklużi fil-listi ta’ riservi eżistenti, jiġifieri, dawk stabbiliti bħala riżultat tas-sejħiet li ġejjin: EFSA/E/2009/001 (“il-lista ta’ riservi tal-2009”) u kemm EFSA/E/2010/001 kif ukoll EFSA/E/2010/002 (“il-lista ta’ riservi 2011”) għandhom jissottomettu applikazzjoni ġdida għas-sejħa l-ġdida jekk huma jixtiequ li jiġu kkunsidrati għal sħubija fil-Kumitat Xjentifiku jew fil-Panils Xjentifiċi fl-2012 jew jekk jixtiequ jiġu inklużi fil-lista ta’ riservi tal-2012.

Il-lista ta’ riservi tal-2009 u l-lista ta’ riservi tal-2011 sejrin jingħalqu dalwaqt hekk kif tkun stabbilita l-lista ta’ riservi tal-2012.

2.   L-Awtorità Ewropea dwar is-Sigurtà fl-Ikel

L-Awtorità Ewropea dwar is-Sigurtà fl-Ikel (EFSA) hija l-qafas ewlieni tal-Unjoni Ewropea (UE) għall-valutazzjoni tar-riskji fir-rigward tas-sigurtà tal-ikel u tal-għalf. B’kollaborazzjoni mill-qrib mal-awtoritajiet nazzjonali u b’konsultazzjoni miftuħa mal-imsieħba tagħha, l-EFSA tipprovdi pariri xjentifiċi indipendenti u komunikazzjoni ċara fuq riskji eżistenti u emerġenti bbażati fuq l-aktar metodoloġiji xjentifiċi u dejta xjentifika aġġornata disponibbli. Il-parir xjentifiku tagħha huwa l-bażi tal-politiki u deċiżjonijiet tal-ġesturi tar-riskji fl-Istituzzjonijiet Ewropej tal-Istati Membri tal-UE.

L-EFSA tlaqqa’ flimkien lill-aqwa esperti Ewropej disponibbli fil-valutazzjoni tar-riskji fil-qasam tas-sigurtà tal-ikel u tal-għalf, li jaġixxu b’kapaċità indipendenti għal organizzazzjoni awtonoma u mmexxija minnha stess biex tipprovdi lill-Istituzzjonijiet Ewropej u lill-Istati Membri b’parir xjentifiku tal-ogħla livell.

L-Awtorità hija impenjata li tosserva l-istandards ewlenin ta’ eċċellenza xjentifika, onestà, trasparenza, indipendenza u ta’ rispons f’waqtu. Billi taħdem b’mod indipendenti, miftuħ u trasparenti, l-EFSA twassal l-aqwa parir xjentifiku possibbli u għalhekk tikkontribwixxi sabiex issaħħaħ is-sistema Ewropea tas-sigurtà tal-ikel u tal-għalf.

Għal aktar informazzjoni dwar l-EFSA, jekk jogħġbok irreferi għar-Regolament ta’ Stabbiliment tagħha:

http://eur-lex.europa.eu/LexUriServ/LexUriServ.do?uri=CONSLEG:2002R0178:20090807:MT:PDF

3.   Il-Panils Xjentifiċi u l-Kumitat Xjentifiku tal-EFSA

Il-Panils Xjentifiċi huma responsabbli għall-għoti ta’ opinjonijiet xjentifiċi tal-Awtorità u pariri oħrajn kif meħtieġ, kull wieħed fi ħdan il-qasam tal-kompetenza tiegħu. Jipproduċu opinjonijiet xjentifiċi kif ukoll pariri għall-ġesturi tar-riskji. Dan jgħin biex jiġi pprovdut bażi soda għall-formolazzjoni tal-politiki Ewropej u tal-leġiżlazzjoni Ewropea u dan jappoġġa lill-ġesturi tar-riskji fit-teħid tad-deċiżjonijiet.

Il-Panils Xjentifiċi huma normalment magħmulin minn wieħed u għoxrin (21) espert xjentifiku indipendenti. Il-Kumitat Xjentifiku huwa magħmul mill-Presidenti ta’ kull Panil Xjentifiku u minn sitt (6) esperti xjentifiċi oħrajn.

Il-Membri tal-Kumitat u tal-Panils Xjentifiċi jinħatru għal mandat ta’ tliet snin li jista’ jiġġedded darbtejn. Il-membri huma mistennija li jattendu u li jikkontribwixxu b’mod attiv fil-laqgħat kollha tal-Panil tal-Kumitat Xjentifiku jew tal-Panil Xjentifiku fejn jiġu adottati l-opinjonijiet, id-dikjarazzjonijiet jew id-dokumenti ta’ gwida.

Dawn l-opinjonijiet, id-dikjarazzjonijiet u d-dokumenti ta’ gwida xjentifiċi huma ppubblikati fil-Ġurnal tal-EFSA, pubblikazzjoni ta’ kull xahar li hija indiċjata fid-databases biblijografiċi għax-xogħol tal-EFSA.

L-applikanti jiġu riferuti għall-Anness I ippubblikat fis-sit elettroniku tal-EFSA biex jikkonsultaw id-deskrizzjoni dettaljata tal-kompiti tal-Kumitat Xjentifiku u tal-Panils Xjentifiċi.

L-applikanti huma rrakkomandati li jagħtu attenzjoni partikolari għall-Anness I meta jħejju l-applikazzjonijiet tagħhom. Fil-kuntest tal-evalwazzjoni, fir-rigward ta’ jekk jissodisfawx ir-rekwiżiti tal-għażla (ara sezzjoni 5 taħt), sejra tingħata l-konsiderazzjoni dovuta għall-adegwatezza tal-profili tal-applikanti fir-rigward tal-kompiti tal-Kumitat Xjentifiku jew tal-Panils Xjentifiċi.

Għal iktar informazzjoni dwar l-għażla tal-Membri tal-Kumitat Xjentifiku u tal-Panils Xjentifiċi jekk jogħġbok irreferi għal “Decision of the Executive Director concerning the selection of members of the Scientific Committee, Scientific Panels and external experts”(“Deċiżjoni tad-Direttur Eżekuttiv dwar l-għażla ta’ membri tal-Kumitat Xjentifiku, Panils Xjentifiċi u esperti esterni”

http://www.efsa.europa.eu/en/keydocs/docs/expertselection.pdf

Għal iktar informazzjoni dwar l-istabbiliment u l-operazzjonijiet tal-Panils Xjentifiċi u l-Gruppi ta’ Ħidma tagħhom, jekk jogħġbok irreferi għal “Decision of the Management Board concerning the establishment and operations of the Scientific Committee, Scientific Panels and of their Working Groups” (“Deċiżjoni tal-Bord Amministrattiv dwar l-istabbiliment u l-operazzjonijiet tal- Kumitat Xjentifiku, Panils Xjentifiċi u tal-Gruppi ta’ Ħidma tagħhom”).

http://www.efsa.europa.eu/en/keydocs/docs/paneloperation.pdf

4.   L-irwol tal-membri tal-Panils Xjentifiċi u tal-Kumitat Xjentifiku tal-EFSA

Il-membri tal-Kumitat Xjentifiku u tal-Panils Xjentifiċi huma xjenzati esperjenzati u indipendenti magħżulin u maħturin skont ir-regoli tal-EFSA u r-Regolament ta’ Stabbiliment tal-EFSA.

Matul il-mandat tagħhom, il-membri fil-kariga fil-Kumitat Xjentifiku u fil-Panils Xjentifiċi sejrin jintalbu jwettqu d-dmirijiet li ġejjin:

—	Jikkontribwixxu għad-diskussjoni, it-tħejjija u l-adozzjoni ta’ opinjonijiet xjentifiċi tal-Panil Xjentifiku u/jew il-Kumitat Xjentifiku u l-gruppi ta’ ħidma tagħhom;

—	L-għoti ta’ parir xjentifiku fuq kwistjonijiet li jaqgħu fi ħdan il-kompetenza tal-Panil Xjentifiku u/jew tal-Kumitat Xjentifiku;

—	L-għoti ta’ pariri dwar it-twettiq u l-organizzazzjoni ta’ attivitajiet xjentifiċi tal-Panil Xjentifiku u/jew tal-Kumitat Xjentifiku.

Il-membri tal-Kumitat Xjentifiku u tal-Panils Xjentifiċi jistgħu jintgħażlu bħala Presidenti, viċi-presidenti u rapporteurs tal-Kumitat Xjentifiku, Panils Xjentifiċi u tal-gruppi ta’ ħidma tagħhom b’mod konformi mad-Deċiżjoni tal-Bord ta’ Ġestjoni tal-EFSA (1) dwar l-istabbiliment u l-operazzjonijiet tal-Kumitat Xjentifiku u tal-Panils Xjentifiċi.

Kundizzjonijiet ġenerali:

Membri ta’ Panils Xjentifiċi u tal-Kumitat Xjentifiku sejrin jintalbu jattendu għal laqgħat ta’ jumejn li normalment isiru f’Parma, l-Italja. Dawn il-laqgħat isiru bejn sitta u għaxar darbiet fis-sena.

Barra minn hekk, Membri tal-Panils Xjentifiċi u tal-Kumitat Xjentifiku huma mistennija li jipparteċipaw, kif xieraq, f’xi laqgħat tal-gruppi ta’ ħidma li huma stabbiliti jew mill-Panils Xjentifiċi jew mill-Kumitat Xjentifiku. Dawn il-laqgħat normalment jiġu organizzati bejn sitta u tlettax-il darba fis-sena.

L-attendenza fil-laqgħa tal-Panils Xjentifiċi, tal-Kumitat Xjentifiku jew tal-gruppi ta’ ħidma teħtieġ xi ammont ta’ xogħol preparatorju, inkluż qari minn qabel u abbozzar ta’ dokumenti. Il-laqgħat u ħafna mid-dokumenti huma bl-Ingliż.

L-applikanti huma meħtieġa li jesprimu l-impenn tagħhom li, jekk jinħatru, huma jipparteċipaw fl-attivatijiet tal-Kumitat Xjentifiku jew tal-Panils Xjentifiċi.

L-EFSA sejra, skont ir-regoli finanzjarji tagħha, tħallas l-ispejjeż tal-vjaġġi, benefiċċji ta’ kuljum u tal-akkomodazzjoni tal-membri. Indennizz speċjali jitħallas għal kull jum sħiħ ta’ attendenza għal laqgħa (2).

5.   Proċedura tal-Għażla

L-applikanti huma meħtieġa li jindikaw fil-formola tal-applikazzjoni tagħhom massimu ta’ tliet (3) preferenzi għal dawk il-Panils Xjentifiċi u/jew għal dak il-Kumitat Xjentifiku li huma jixtiequ japplikaw għalih, skont l-ordni ta’ preferenza.

Il-membri li jkunu għadhom kif temmew tliet mandati konsekuttivi fil-Kumitat Xjentifiku jistgħu japplikaw għal sħubija f’Panil Xjentifiku. Bl-istess mod, Membri li jkunu għadhom kif temmew tliet mandati konsekuttivi f’Panil Xjentifiku jistgħu japplikaw għal sħubija fil-Kumitat Xjentifiku jew f’Panil Xjentifiku differenti.

Ir-rekwiżiti

A.   Kriterji ta’ eliġibilità

Il-ħtiġijiet li ġejjin għandhom jiġu ssodisfati sabiex l-applikanti jitqiesu bħala eleġibbli:

(i)

Livell ta’ edukazzjoni li jikkorrespondi għal studji universitarji mitmuma ta’ mill-inqas erba’ (4) snin attestati b’diploma fl-oqsma li ġejjin: Xjenza tal-Agronomija/Agrikoltura, Nutrizzjoni tal-Annimali, Biokimika, Bioloġija, Kimika, Ekotossikoloġija, Xjenza Ambjentali, Epidemjoloġija, Mikrobioloġija tal-Ikel, Teknoloġija tal-Ikel, Mediċina Umana, Xjenza tal-Ħajja, Mediċina Okkupazzjonali, Farmakoloġija, Farmaċija, Saħħa Pubblika, Tossikoloġija, Mediċina Veterinarja u oqsma relatati;

(ii)	Barra minn hekk, mill-inqas għaxar (10) snin ta’ esperjenza professjonali relevanti għall-kompetenza tal-Panil(s) magħżul(a) miksubin wara li tkun inkisbet id-diploma;

(iii)

Għarfien eċċellenti tal-lingwa Ingliża (3);

(iv)	L-applikanti jridu jimlew id-Dikjarazzjoni tal-Interessi nkluża fl-applikazzjoni b’mod estensiv, preċiż u komplet (4). Jekk jogħġbok innota li jekk ma timlix din il-parti tal-formola b’mod komplet, dan iwassal sabiex l-applikazzjoni tiegħek tiġi rifjutata (5);

(v)

L-applikanti jridu jkunu ċittadini ta’ Stat Membru tal-Unjoni Ewropea, tal-pajjiżi fl-Assoċjazzjoni Ewropea għall-Kummerċ Ħieles (EFTA) jew tal-pajjiżi Kandidati tal-Unjoni. Esperti minn pajjiżi terzi jistgħu japplikaw ukoll iżda jiġu kkunsidrati biss għal sħubija meta l-livell meħtieġ ta’ ħila ma jkunx jista’ jinstab fost ċittadini tal-pajjiżi tal-UE, tal-EFTA jew tal-Pajjiżi Kandidati għal sħubija fl-UE.

B.   Kriterji tal-Għażla – Evalwazzjoni

L-applikazzjonijiet li jissodisfaw ir-rekwiżiti ta’ eleġibilità (ara sezzjoni 5. A) sejrin jiġu ammessi għal evalwazzjoni komparattiva mwettqa mill-EFSA fuq il-bażi tal-kriterji ta’ għażla indikati hawn taħt.

L-applikanti huma mħeġġa ħafna li jimlew il-formola tal-applikazzjoni fis-sezzjonijiet kollha bl-informazzjoni u l-evidenza kollha meħtieġa, minħabba li din sejra tifforma l-bażi għall-evalwazzjoni tagħhom.

L-evalwazzjoni tal-applikazzjoni kollha meqjusin eleġibbli sejra ssir permezz ta’ medda ta’ punteġġi minn 0 (żero) sa 5 (ħamsa) għal kull kriterju ta’ għażla indikat hawn taħt. Sabiex jirrifletti l-importanza relattiva tal-kriterji ta’ għażla differenti, sejjer jiġi attribwit koeffiċjent ta’ peżar (koeffiċjenti ta’ peżar huma stabbiliti għall-Kumitat Xjentifiku). Kull applikazzjoni sejra tikseb medda ta’ punteġġ ta’ bejn 0 (żero) u 100 (mija).

Il-kriterji tal-għażla li ġejjin se jkunu eżaminati:

—

Esperjenza fit-twettiq ta’ valutazzjoni xjentifika tar-riskju u/jew fl-għoti ta’ parir xjentifiku f’oqsma relatati mas-sigurtà tal-ikel u tal-għalf f’oqsma ta’ kompetenza u ħila esperta tal-Kumitat Xjentifiku jew tal-Panils Xjentifiċi ppreferuti. (Għall-Panils Xjentifiċi massimu ta’ 25 punt minn 100 – Koeffiċjent ta’ Għoti tal-Punti ta’ 5; għall-Kumitat Xjentifiku massimu ta’ 30 punt minn100 – Koeffiċjent ta’ Għoti tal-Punti ta’ 6);

—

Eċċellenza xjentifika li tista’ tingħata prova tagħha f’qasam wieħed, jew preferibbilment f’aktar minn wieħed, relatata mal-qasam kopert mill-Kumitat Xjentifiku jew mill-Panil Xjentifiku ppreferut. (Għall-Panils Xjentifiċi massimu ta’ 20 punt minn 100 – Koeffiċjent ta’ Għoti tal-Punti ta’ 4; għall-Kumitat Xjentifiku massimu ta’ 15-il punt minn100 – Koeffiċjent ta’ Għoti tal-Punti ta’ 3);

—	Esperjenza ta’ ħidma xjentifika fl-istudju tal-pari (peer-reviewing) u l-pubblikazzjonijiet, preferibbilment f’oqsma relatati mal-qasam ittrattat mill-Kumitat Xjentifiku jew mill-Panil Xjentifiku ppreferut. (Massimu 15-il punt minn 100 – Koeffiċjent ta’ Għoti tal-Punti ta’ 3);

—	Ħila li ssir analiżi ta’ informazzjoni u ta’ faxxikli kumplessi, ħafna drabi minn firxa wiesgħa ta’ dixxiplini u sorsi xjentifiċi u li jitħejjew abbozzi ta’ opinjonijiet u rapporti xjentifiċi (Massimu 10 punti minn 100 – Koeffiċjent ta’ Għoti tal-Punti ta’ 2);

—	Esperjenza professjonali f’ambjent multidixxiplinarju, preferibbilment f’kuntest internazzjonali. (Massimu 10 punti minn 100 – Koeffiċjent ta’ Għoti tal-Punti ta’ 2);

—	Esperjenza fl-immaniġġjar ta’ proġetti relatati ma’ kwistjonijiet xjentifiċi. (Massimu 10 punti minn 100 – Koeffiċjent ta’ Għoti tal-Punti ta’ 2);

—	Ħiliet komunikattivi evidenzjati, ibbażati fuq esperjenza tat-tagħlim, preżentazzjonijiet pubbliċi, partiċipazzjoni attiva f’laqgħat, pubblikazzjonijiet. (Massimu 10 punti minn 100 – Koeffiċjent ta’ Għoti tal-Punti ta’ 2).

L-applikanti jistgħu jiġu kkunsidrati biss għal sħubija fil-Kumitat Xjentifiku jew fil-Panil Xjentifiku jekk l-applikazzjoni tagħhom tikseb punteġġ li jkun ogħla minn punteġġ minimu ta’ 66 punt (minn 100). L-EFSA tirriserva d-dritt li tikkonsulta mal-partijiet terzi dwar l-esperjenza professjonali tal-applikanti fil-kuntest tal-applikazzjoni tagħhom.

Barra mill-kriterji msemmija fuq, id-Dikjarazzjoni Annwali tal-Interessi sejra tiġi riveduta skont il-Proċedura tal-EFSA għall-Identifikazzjoni u l-Maniġġ ta’ Kunflitti ta’ Interess Potenzjali (6). Il-firxa ta’ kwalunkwe kunflitt ta’ interess potenzjali tiġi kkunsidrata meta tittieħed deċiżjoni dwar jekk applikant huwiex sejjer jiġi evalwat aktar.

Għal aktar informazzjoni dwar l-għażla tal-Membri tal-Kumitat u Panils Xjentifiċi jekk jogħġbok irreferi għad-“Deċiżjoni tad-Direttur Eżekuttiv dwar l-għażla tal-membri tal-Kumitat Xjentifiku, tal-Panils Xjentifiċi u esperti esterni”

http://www.efsa.europa.eu/en/keydocs/docs/expertselection.pdf

6.   Lista ta’ riserva u Ħatriet

L-Applikanti li jinstabu li jissodisfaw il-ħtiġijiet għal sħubija fi kwalunkwe Panil Xjentifiku jew Kumitat Xjentifiku jistgħu jinħatru bħala membi għal mandat ta’ tliet snin, fuq il-bażi ta’ deċiżjoni meħuda mill-Bord ta’ Amministrazzjoni tal-EFSA fuq proposta mid-Direttur Eżekuttiv tal-EFSA.

Qabel il-ħatra, l-EFSA żżomm id-dritt li tqabbel l-applikazzjoni tal-applikanti ikkunsidrati għal sħubija ma’ dokumenti u ċertifikati sabiex tikkonferma l-preċiżjoni u l-eliġibilità tal-applikazzjoni.

Applikanti li jinstabu li jissodisfaw il-ħtiġijiet għal sħubija iżda li ma jinħatrux bħala membri jistgħu jiġu inklużi fil-lista ta’ riżerva.

L-applikanti jistgħu, bil-kunsens minn qabel tagħhom, ikunu assenjati għal Panil Xjentifiku anke jekk ma jkunux applikaw b’mod speċifiku għal sħubija f’dak il-Panil. Jistgħu wkoll ikunu mistiedna sabiex jikkontribwixxu bħala esperti esterni għall-attivitiajiet ta’ Panil Xjentifiku jew Kumitat Xjentifiku jew wieħed mill-Gruppi ta’ Ħidma tal-Panils Xjentifiċi u tal-Kumitat Xjentifiku.

Membri tal-Kumitat Xjentifiku jew tal-Panils Xjentifiċi jistgħu jiġu sostitwiti jew, skont iċ-ċirkostanzi, in-numru tagħhom jista’ jiżdied. Membri li jkunu qed jieħdu post ħadd ieħor jew membri ġodda jintgħażlu mil-lista ta’ riżerva, u jkunu proposti mid-Direttur Eżekuttiv lill-Bord ta’ Amministrazzjoni, wara konsultazzjoni mal-President tal-Kumitat Xjentifiku jew mill-Panil Xjentifiku kkonċernat.

7.   Database tal-esperti

Il-kandidati eleġibbli kollha sejrin ikunu mistiedna biex japplikaw fid-database tal-esperti tal-EFSA.

Għal aktar informazzjoni dwar id-database tal-esperti tal-EFSA:

http://www.efsa.europa.eu/EFSA/AboutEfsa/WhoWeAre/efsa_locale-1178620753812_1178712806106.htm

8.   Indipendenza u dikjarazzjonijiet ta’ impenn u interess

Il-membri tal-Kumitat Xjentifiku u tal-Panils Xjentifiċi jinħatru fuq bażi personali. L-applikanti huma meħtieġa jinkludu dikjarazzjoni li huma sejrin ikunu impenjati li jaġixxu b’mod indipendenti minn kull influwenza barranija, kif ukoll dikjarazzjoni tal-interessi li jistgħu jitqiesu bħala ta’ preġudizzju għall-indipendenza tagħhom (ara l-kriterju ta’ eliġibilità iv). L-applikanti huma responsabbli għall-kontenut tad-dikjarazzjoni sottomessa li sejra tiġi vvalutata mill-EFSA skont il-Proċedura tal-EFSA għall-Identifikazzjoni u l-Maniġġ ta’ Kunflitti ta’ Interessi Potenzjali.

Ara hawn taħt għal xi eżempji ta’ x’jitqies bħala Kunflitt ta’ Interess:

—   Eżempju 1: membru ta’ Panil Xjentifiku partikolari għandu ishma f’diversi kumpaniji li jipproduċu jew iqiegħdu fis-suq prodotti li s-sigurtà tagħhom hija vvaluta minn dak il-Panil/Kumitat Xjentifiku.

—   Eżempju 2: membru ta’ Panil Xjentifiku partikolari jinħatar minn assoċjazzjoni ta’ produtturi bħala konsulent indipendenti sabiex jiprovdi pariri xjentifiċi dwar l-istess prodotti li s-sigurtà tagħhom hija vvalutata minn dak il-Panil/Kumitat Xjentifiku.

Għal aktar informazzjoni dwar id-Dikjarazzjonijiet tal-Interessi:

Il-politika tal-EFSA dwar id-dikjarazzjonijiet tal-interessi http://www.efsa.europa.eu/en/keydocs/docs/doipolicy.pdf

Dokument ta’ gwida dwar id-dikjarazzjonijiet tal-interessi http://www.efsa.europa.eu/en/keydocs/docs/doiguidance.pdf

Proċedura għall-identifikazzjoni u l-maniġġ ta’ kunflitti ta’ interess potenzjali http://www.efsa.europa.eu/en/keydocs/docs/doiconflicts.pdf

9.   Opportunitajiet indaqs

L-EFSA tagħti attenzjoni kbira għall-applikazzjoni tal-prinċipji ta’ trattament ugwali fil-proċeduri tagħha.

10.   Sottomissjoni tal-applikazzjonijiet

Il-kandidati huma mitluba li jissottomettu l-applikazzjoni tagħhom flimkien mad-Dikjarazzjoni tal-Interessi b’mod elettroniku permezz tal-websajt tal-EFSA: http://www.efsa.europa.eu

L-applikazzjonijiet jitqiesu ammissibbli biss jekk formola tal-applikazzjoni mimlija kif meħtieġ tiġi sottomessa online. Applikazzjonijiet mibgħuta b’posta rreġistrata jiġu aċċettati b’eċċezzjoni, f’każ ta’ nuqqas serju tas-sistema online tal-IT.

Applikazzjonijiet mibgħuta permezz ta’ posta elettronika.

Il-kandidati huma ġentilment mitluba biex jimlew l-applikazzjoni tagħhom bl-Ingliż biex jiffaċilitaw il-proċedura tal-għażla.

L-applikanti kollha jiġu infurmati permezz tal-posta dwar ir-riżultat tal-proċess tal-għażla.

L-informazzjoni personali li l-EFSA titlob mingħand l-applikanti tiġi pproċessata skont ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta' individwu fir-rigward ta' l-ipproċessar ta' data personali mill-istituzzjonijiet u l-korpi tal-Komunità u dwar il-moviment liberu ta' dak id-data (7).

L-għan tal-ipproċessar tad-dejta personali huwa li jiġu mmaniġġjati l-applikazzjonijiet għal sħubija fil-Kumitati jew Panils Xjentifiċi tal-EFSA.

11.   Data tal-għeluq sa meta jintbagħtu l-applikazzjonijiet

L-applikazzjonijiet għandhom jiġu sottomessi mhux iktar tard mill-31 ta’ Mejju 2011 f’nofs il-lejl (Ħin lokali, GMT + 1). Għall-applikazzjonijiet mibgħuta b’posta rreġistrata, id-data tat-timbru tal-posta sservi ta’ prova.

Jekk jogħġbok innota li, minħabba n-numru kbir ħafna ta’ applikazzjonijiet li nirċievu, meta d-data ta’ għeluq għas-sottomissjoni tal-applikazzjonijiet tkun fil-qrib, is-sistema jista’ jkollha problemi biex tipproċessa l-ammonti kbar ta’ dejta. Għalhekk aħna nagħtu l-parir lill-applikanti biex jibagħtu l-applikazzjoni tagħhom ħafna qabel id-data tal-għeluq.

Nota:

Fil-każ ta’ inkonsistenza jew diskrepanza bejn il-verżjoni Ingliża u kwalunkwe verżjoni lingwistika oħra ta’ din il-pubblikazzjoni, il-verżjoni bil-lingwa Ingliża għandha tipprevali.

---

(1)  Għal aktar informazzjoni, irreferi għal: http://www.efsa.europa.eu/en/keydocs/docs/paneloperation.pdf

(2)  Għal aktar informazzjoni, irreferi għal: http://www.efsa.europa.eu/efsa_rep/repository/documents/Experts_compensation_guide.pdf

(3)  “Għarfien eċċellenti” għandha tfisser li tikkorrespondi għal livell B2 jew ogħla (jiġifieri livelli C1 u C2) kif speċifikat fid-dokument ta’ referenza tal-Kunsill tal-Ewropa għall-Portafoll Ewropew tal-Lingwi (“Qafas Ewropew Komuni ta’ Referenza: Kif titgħallem, Kif tgħallem, Valutazzjoni”). Għal aktar informazzjoni, irreferi għal http://www.coe.int/T/DG4/Portfolio/?M=/main_pages/levels.html

(4)  Għal aktar gwida dwar kif timla d-Dikjarazzjoni, jekk jogħġbok irreferi għad-Dokument ta’ Gwida dwar id-Dikjarazzjonijiet ta’ Interess, disponibbli fuq is-sit elettroniku tal-EFSA fuq http://www.efsa.europa.eu/en/keydocs/docs/doiguidance.pdf

(5)  Jekk jogħġbok ara sezzjoni 8 ta’ din is-sejħa fuq Indipendenza u dikjarazzjonijiet ta’ impenn u interess.

(6)  Disponibbli fuq is-sit elettroniku tal-EFSA fuq http://www.efsa.europa.eu/en/keydocs/docs/doiconflicts.pdf

(7)  ĠU L 8, 12.1.2001, p. 1.

---