1)

L-Artikolu 10(2)(f) moqri flimkien mal-Artikolu 13(j) tad-Direttiva 2008/48/KE tal-Parlament Ewropew u tal-Kunsill tat-23 ta’ April 2008 dwar ftehim ta’ kreditu għall-konsumatur u li tħassar id-Direttiva tal-Kunsill 87/102/KEE (1) fil-kuntest tal-prinċipju ta’ effettività tad-dritt tal-Unjoni u tal-għan ta’ din id-direttiva kif ukoll fid-dawl tal-Artikolu 3(1) u (2) moqri flimkien mal-Artikolu 4(1) tad-Direttiva tal-Kunsill 93/13/KEE tal-5 ta’ April 1993 dwar klawżoli inġusti f’kuntratti mal-konsumatur (2), għandu jiġi interpretat fis-sens li jipprekludi l-prassi li f’kuntratti ta’ kreditu għall-konsumaturi, li l-kontenut tagħhom ma huwiex riżultat ta’ ftehim individwali bejn il-bejjiegħ jew fornitur (kreditur) u l-konsumatur (il-persuna li tissellef), jiġu inklużi dispożizzjonijiet li jipprevedu interessi mhux biss fuq l-ammont mogħti lill-konsumatur iżda wkoll spejjeż ta’ kreditu mhux marbuta ma’ interessi (bħal kummissjonijiet jew onorarji oħra li ma jifformawx parti mill-ammont ta’ kreditu mħallas lill-konsumatur, jiġifieri li ma humiex inklużi fl-ammont totali tal-kreditu, u li jagħmlu parti mill-ammont totali dovut lill-konsumatur bi ħlas għat-twettiq tal-obbligi tiegħu taħt il-kuntratt ta’ kreditu għall-konsum)?

2)

L-Artikolu 10(2)(f) u (g) tad-Direttiva 2008/48 fil-kuntest tal-prinċipju ta’ effettività tad-dritt tal-Unjoni u tal-għan ta’ din id-direttiva kif ukoll fid-dawl tal-Artikolu 5 tad-Direttiva 93/13, għandu jiġi interpretat fis-sens li jipprekludi prassi li f’kuntratti ta’ kreditu għall-konsumaturi, li l-kontenut tagħhom ma huwiex riżultat ta’ ftehim individwali bejn il-bejjiegħ jew fornitur (kreditur) u l-konsumatur (il-persuna li tissellef), jiġu inklużi dispożizzjonijiet li jiżvelaw biss ir-rata ta’ interessi tal-kreditu jew il-valur totali kkwantifikat tal-interessi kkapitalizzati espress bħala ammont li l-konsumatur huwa obbligat iħallas bi twettiq tal-obbligu tiegħu li jirriżulta minn tali kuntratt, mingħajr ma l-konsumatur jiġi informat b’mod ċar u inekwivoku li l-bażi għall-kalkolu tal-interessi kkapitalizzati (espress bħala ammont ikkwantifikat) huwa ammont li ma huwiex l-ammont tal-kreditu effettivament imħallas lill-konsumatur u, b’mod partikolari, li huwa s-somma tal-ammont tal-kreditu mħallas lill-konsumatur, kif ukoll spejjeż ta’ kreditu mhux marbuta ma’ interessi (bħal kummissjonijiet jew onorarji oħra li ma jifformawx parti mill-ammont ta’ kreditu mogħti lill-konsumatur, u li jagħmlu parti mill-ammont totali dovut lill-konsumatur bi ħlas għat-twettiq tal-obbligi tiegħu taħt il-kuntratt ta’ kreditu għall-konsum)?