1.

Permezz ta’ dawn l-appelli, diversi operaturi tas-sistema tat-trażmissjoni tal-elettriku (iktar ’il quddiem it-“TSOs”) ( 2 ) qegħdin jitolbu l-annullament ta’ żewġ sentenzi tal-Qorti Ġenerali tal‑15 ta’ Frar 2023, Austrian Power Grid et vs ACER ( 3 ), kif ukoll Austrian Power Grid et vs ACER ( 4 ) (iktar ’il quddiem is-“sentenzi appellati”).

2.

Permezz ta’ dawn is-sentenzi, il-Qorti Ġenerali ċaħdet ir-rikorsi għal annullament ippreżentati minn ċerti TSOs kontra żewġ deċiżjonijiet tas‑16 ta’ Lulju 2020 tal-Bord tal-Appell tal-Aġenzija tal-Unjoni Ewropea għall-Kooperazzjoni tar-Regolaturi tal-Enerġija (ACER), li jikkonfermaw il-validità tad-deċiżjonijiet li ġejjin ta’ din l-Aġenzija:

3.

L-appelli jqajmu, essenzjalment, żewġ kwistjonijiet, waħda ta’ natura iktar ġenerali u l-oħra ta’ natura estremament teknika. Il-kwistjoni f’dawn iż-żewġ appelli hija dwar jekk il-Qorti Ġenerali wettqitx żbalji ta’ liġi:

4.

L-Artikolu 20 (“Pjattaforma Ewropea għall-iskambju ta’ enerġija tal-ibbilanċjar mir-riżervi għar-restawr tal-frekwenza b’attivazzjoni manwali”) jindika li:

“1.   Sa sena wara d-dħul fis-seħħ ta’ dan ir-Regolament, it-TSOs kollha għandhom jiżviluppaw proposta għall-qafas ta’ implimentazzjoni għal pjattaforma Ewropea għall-iskambju tal-enerġija tal-ibbilanċjar mir-riżervi għar-restawr tal-frekwenza b’attivazzjoni manwali.

2.   Il-pjattaforma Ewropea għall-iskambju tal-enerġija tal-ibbilanċjar mir-riżervi għar-restawr tal-frekwenza b’attivazzjoni manwali, imħaddma mit-TSOs jew permezz ta’ entità maħluqa mit-TSOs infushom, għandha tkun ibbażata fuq il-prinċipji tal-governanza u proċessi tan-negozju komuni u għandha tinkludi, tal-anqas, il-funzjoni ta’ ottimizzazzjoni tal-attivazzjoni u l-funzjoni tal-issetiljar TSO-TSO. Din il-pjattaforma Ewropea għandha tapplika mudell multilaterali bejn TSO-TSO, b’listi komuni skont il-mertu biex jiġu skambjati l-offerti kollha għall-enerġija tal-ibbilanċjar mill-prodotti standard għar-riżervi għar-restawr tal-frekwenza b’attivazzjoni manwali, ħlief għall-offerti li ma jkunux disponibbli skont l-Artikolu 29(14).

3.   Il-proposta msemmija fil-paragrafu 1 għandha tinkludi tal-inqas l-affarijiet li ġejjin:

[…]

4.   Sa sitt xhur wara l-approvazzjoni tal-proposta għal qafas ta’ implimentazzjoni għal pjattaforma Ewropea għall-iskambju tal-enerġija tal-ibbilanċjar mir-riżervi għar-restawr tal-frekwenza b’attivazzjoni manwali, it-TSOs kollha għandhom jiddeżinjaw lill-entità/jiet proposti, inkarigati biex joperaw il-pjattaforma Ewropea b’konformità mal-paragrafu 3(e).

5.   Sa tmintax-il xahar wara l-approvazzjoni tal-proposta għal qafas ta’ implimentazzjoni għal pjattaforma Ewropea għall-iskambju tal-enerġija tal-ibbilanċjar mir-riżervi għar-restawr tal-frekwenza b’attivazzjoni manwali, it-TSOs kollha jistgħu jiżviluppaw proposta għall-modifika tal-pjattaforma Ewropea għall-iskambju tal-enerġija tal-ibbilanċjar minn riżervi għar-restawr tal-frekwenza b’attivazzjoni manwali skont il-paragrafu 1. Il-modifiki proposti għandhom ikunu appoġġati minn analiżi tal-kostijiet u l-benefiċċji magħmula mit-TSOs kollha skont l-Artikolu 61. Il-proposta għandha tiġi nnotifikata lill-Kummissjoni.

[…].”

5.

L-Artikolu 21 (“Pjattaforma Ewropea għall-iskambju tal-enerġija tal-ibbilanċjar mir-riżervi għar-restawr tal-frekwenza b’attivazzjoni awtomatika”) jispjega dan permezz ta’ termini simili għall-Artikolu 20.

6.

L-Artikolu 37 (“Il-kalkolu tal-kapaċità transżonali”) jipprovdi li:

“1.   Wara l-ħin tal-għeluq tan-negozju transżonali tal-istess ġurnata, it-TSOs għandhom jaġġornaw kontinwament id-disponibbiltà tal-kapaċità transżonali għall-iskambju tal-enerġija tal-ibbilanċjar jew għat-tħaddim tal-proċess tan-nettjar tal-iżbilanċi. Il-kapaċità transżonali għandha tiġi aġġornata kull darba li porzjon tal-kapaċità transżonali tkun intużat jew fejn il-kapaċità transżonali tkun ġiet ikkalkulata mill-ġdid.

2.   Qabel l-implimentazzjoni tal-metodoloġija tal-kalkolu tal-kapaċità skont il-paragrafu 3, it-TSOs għandhom jużaw il-kapaċità transżonali li jifdal wara l-ħin tal-għeluq tan-negozju transżonali tal-istess ġurnata.

3.   Sa ħames snin wara d-dħul fis-seħħ ta’ dan ir-Regolament, it-TSOs kollha ta’ reġjun tal-kalkolu tal-kapaċità għandhom jiżviluppaw metodoloġija għall-kalkolu tal-kapaċità transżonali fil-perjodu taż-żmien tal-ibbilanċjar għall-iskambju tal-enerġija tal-ibbilanċjar jew għat-tħaddim tal-proċess tan-nettjar tal-iżbilanċi. Tali metodoloġija għandha tevita d-distorsjonijiet tas-suq u għandha tkun konsistenti mal-kalkolu tal-kapaċità transżonali applikat fil-perjodu taż-żmien tal-istess ġurnata stabbilit skont ir-Regolament (UE) 2015/1222.”

7.

Fl-Artikolu 6 (“Kompiti tal-ACER marbutin mal-awtoritajiet regolatorji”), il-punt 10, jipprovdi li:

“L-ACER għandu jkollha l-kompetenza li tadotta deċiżjonijiet individwali dwar kwistjonijiet regolatorji li jkollhom effetti fuq il-kummerċ transfruntier jew is-sigurtà tas-sistemi transfruntiera li jeħtieġu deċiżjoni konġunta ta’ mill-anqas żewġ awtoritajiet regolatorji, fejn dawk il-kompetenzi jkunu ġew konferiti lill-awtoritajiet regolatorji skont wieħed mill-atti ġuridiċi li ġejjin:

L-ACER għandha tkun kompetenti tadotta deċiżjonijiet individwali kif speċifikat fl-ewwel subparagrafu fis-sitwazzjonijiet li ġejjin:

L-awtoritajiet regolatorji kompetenti jistgħu jitolbu, b’mod konġunt, li l-perjodu msemmi fil-punt (a) tat-tieni subparagrafu ta’ dan il-paragrafu jiġi estiż b’perjodu sa sitt xhur, ħlief f’każijiet skont l-Artikolu 4(7) ta’ dan ir-Regolament jew skont il-punt (c) tal-Artikolu 59(1) jew il-punt (f) tal-Artikolu 62(1) tad-Direttiva (UE) 2019/944.

Meta l-kompetenzi biex tittieħed deċiżjoni dwar kwistjonijiet transfruntiera msemmija fl-ewwel subparagrafu jkunu ġew ikkonferiti lill-awtoritajiet regolatorji f’kodiċijiet tan-netwerk jew linji gwida ġodda adottati bħala atti delegati wara l‑4 ta’ Lulju 2019, l-ACER għandha tkun kompetenti biss fuq bażi volontarja skont il-punt (b) tat-tieni subparagrafu ta’ dan il-paragrafu, fuq talba minn mill-inqas 60 % tal-awtoritajiet regolatorji kompetenti. Fejn ikunu involuti żewġ awtoritajiet regolatorji biss, kwalunkwe waħda minnhom tista’ jirreferi l-każ lill-ACER.

Sal‑31 ta’ Ottubru 2023, u kull tliet snin wara dan, il-Kummissjoni għandha tippreżenta rapport lill-Parlament Ewropew u lill-Kunsill dwar il-ħtieġa possibbli li jissaħħaħ aktar l-involviment tal-ACER fis-soluzzjoni ta’ każijiet ta’ nuqqas ta’ qbil bejn l-awtoritajiet regolatorji dwar deċiżjonijiet konġunti dwar kwistjonijiet li dwarhom ġew ikkonferiti l-kompetenzi fuq dawk l-awtoritajiet regolatorji permezz ta’ att delegat wara l‑4 ta’ Lulju 2019 Meta jkun il-każ, ir-rapport għandu jkun akkumpanjat bi proposta leġislattiva biex dawn is-setgħat jiġu mmodifikati jew biex is-setgħat meħtieġa jiġu ttrasferiti lill-ACER.”

8.

Il-punti 2 sa 18 tas-sentenzi appellati jiddeskrivu l-fatti li taw lok għaż-żewġ tilwimiet fit-termini miġbura fil-qosor hawn taħt.

9.

Wara d-dħul fis-seħħ tar-Regolament 2017/2195, fit‑18 ta’ Diċembru 2017, it-TSOs kollha fasslu, f’konformità mal-Artikolu 20(1) ta’ dan ir-regolament, proposta ta’ metodoloġija mFRR u, b’applikazzjoni tal-Artikolu 21(1) tiegħu, proposta ta’ metodoloġija aFRR.

10.

Fit‑18 ta’ Diċembru 2018, it-TSOs, f’konformità mal-Artikolu 5(1) u (2)(a) tar-Regolament 2017/2195, bagħtu għall-approvazzjoni tagħhom lill-awtoritajiet regolatorji nazzjonali kollha (iktar ’il quddiem l-“ARN”), il-proposti tagħhom ta’ metodoloġiji aFRR u mFRR.

11.

L-ACER esprimiet in-nuqqas ta’ qbil tagħha ma’ dawn l-ewwel proposti u t-TSOs bagħtulha t-tieni u t-tielet proposta addizzjonali, inkluż ċerti varjanti.

12.

Fit‑18 ta’ Diċembru 2019, b’risposta għal posta elettronika tal-ACER tas‑17 ta’ Diċembru 2019, it-TSOs bagħtu lill-ACER verżjoni emendata tat-tielet proposta aFRR u tat-tielet proposta mFRR. Huma kkonfermaw li entità waħda (TSO wieħed jew kumpannija li tappartjeni għat-TSOs) għandha tieħu r-responsabbiltà sabiex teżerċita l-funzjonijiet speċifikament meħtieġa biex topera l-pjattaformi aFRR u mFRR, jiġifieri, l-ottimizzazzjoni tal-attivazzjoni u tal-likwidazzjoni TSO–TSO, u li, fir-rigward tal-implimentazzjoni tal-ġestjoni tal-kapaċità, li kienet funzjoni ta’ pjattaformi multipli, din tista’ tiġi fdata lil entità waħda oħra (TSO wieħed jew kumpannija li tappartjeni għat-TSOs).

13.

Fl‑20 ta’ Diċembru 2019, l-ACER fasslet verżjoni finali tal-abbozzi ta’ deċiżjoni tagħha dwar il-metodoloġiji aFRR u mFRR, li hija kkomunikat lit-TSOs.

14.

Fl‑24 ta’ Jannar 2020, l-ACER adottat id-Deċiżjoni 02/2020, dwar il-metodoloġija aFRR, u d-Deċiżjoni 03/2020, dwar il-metodoloġija mFRR.

15.

Fit‑23 ta’ Marzu 2020, Austrian Power Grid, ČEPS, a.s., Polskie sieci elektroenergetyczne S.A., Red Eléctrica de España, S. A., RTE Réseau de transport d’électricité u Svenska kraftnät, appellaw, abbażi tal-Artikolu 28 tar-Regolament (UE) 2019/942, id-Deċiżjoni 02/2020, appell inizjalment irreġistrat bin-numru A‑001‑2020, quddiem il-Bord tal-Appell tal-ACER. TenneT TSO BV u TenneT TSO GmbH ippreżentaw appell quddiem il-Bord tal-Appell tal-ACER kontra, b’mod partikolari, id-Deċiżjoni 02/2020, li inizjalment kienet irreġistrata bin-numru A‑004‑2020. Wara li kkonstata li dawn l-appelli kellhom l-istess suġġett, il-Bord tal-Appell ġabarhom flimkien taħt in-numru A‑001‑2020 (magħquda).

16.

Fis‑16 ta’ Lulju 2020, il-Bord tal-Appell ikkonferma d-Deċiżjoni 02/2020, u ċaħad l-appelli fil-Każ A‑001‑2020 (magħquda).

17.

L-istess TSOs ippreżentaw żewġ appelli kontra d-Deċiżjoni 03/2020, dwar il-metodoloġija mFRR, quddiem il-Bord tal-Appell tal-ACER, li ġew magħquda u rreġistrati taħt in-numru A‑002‑2020 (magħquda).

18.

Fis‑16 ta’ Lulju 2020, il-Bord tal-Appell ikkonferma d-Deċiżjoni 03/2020, u ċaħad l-appelli fil-Każ A‑002‑2020 (magħquda).

19.

Fit‑30 ta’ Settembru 2020, diversi TSOs ippreżentaw żewġ rikorsi għal annullament kontra d-Deċiżjonijiet A‑001‑2020 u A‑002‑2020 tal-Bord tal-Appell tal-ACER, tas‑16 ta’ Lulju 2020, li jikkonfermaw id-Deċiżjonijiet 02/2020 u 03/2020 tal-ACER.

20.

Fil‑15 ta’ Frar 2023, il-Qorti Ġenerali ċaħdet dawn ir-rikorsi għal annullament permezz tas-sentenzi appellati.

21.

L-appellanti (Polskie sieci elektroenergetyczne, RTE Réseau de transport d’électricité, Svenska kraftnät u TenneT TSO) jitolbu li l-Qorti tal-Ġustizzja jogħġobha:

22.

L-ACER titlob li l-Qorti tal-Ġustizzja jogħġobha:

23.

Fl-appelli tagħhom, l-appellanti jinvokaw żewġ aggravji għall-annullament tas-sentenzi appellati:

24.

Qabel ma nanalizza kull wieħed minn dawn iż-żewġ aggravji, ser nesprimi ruħi dwar l-eċċezzjonijiet fir-rigward tal-ammissibbiltà tal-appell.

25.

L-ACER issostni li l-appelli huma inammissibbli minħabba li:

26.

L-eċċezzjoni doppja ta’ inammissibbiltà għandha tiġi miċħuda.

27.

Meta appellant jikkontesta l-interpretazzjoni jew l-applikazzjoni tad-dritt tal-Unjoni Ewropea magħmula mill-Qorti Ġenerali, huwa ammissibbli li l-kwistjonijiet ta’ liġi eżaminati fl-ewwel istanza jiġu diskussi mill-ġdid fl-istadju tal-appell. Jekk l-appell ma jkunx jista’ jiġi bbażat fuq aggravji u argumenti diġà invokati quddiem il-Qorti Ġenerali, dan jitlef parti kbira mis-sens tiegħu ( 11 ). Il-Qorti tal-Ġustizzja ddeċidiet ripetutament li appell jista’ jiġi ppreżentat fuq il-bażi ta’ aggravji li jirriżultaw mis-sentenza appellata stess u li huma intiżi sabiex jikkritikaw, fid-dritt, il-fondatezza tagħha ( 12 ).

28.

Dan huwa l-każ fil-kawża ineżami: fl-indirizzar tar-raġunijiet tagħhom għal annullament, l-appellanti jidentifikaw l-allegati żbalji ta’ liġi mwettqa mill-Qorti Ġenerali. L-invokazzjoni fil-kuntest tal-appell ta’ żbalji ta’ liġi dwar kwistjonijiet legali diġà ttrattati fl-ewwel istanza tikkorrispondi, nirrepeti, għal-loġika li fuqha huma bbażati l-appelli.

29.

Fir-rigward tal-ewwel aggravju, jekk dan jiġi milqugħ dan iwassal għall-annullament kemm tas-sentenzi kif ukoll, jekk ikun il-każ, tad-deċiżjonijiet tal-Bord tal-Appell u tad-deċiżjonijiet tal-ACER, u dan ikollu effetti fuq is-sitwazzjoni legali tal-appellanti. Għaldaqstant, dawn għandhom interess li l-ewwel aggravju tagħhom, li ma huwiex ipotetiku, jintlaqa’. Huwa biss l-eżami tal-mertu li għandu jippermetti li tingħata deċiżjoni jekk dan jintlaqax jew le.

30.

L-appellanti jqisu li l-Qorti Ġenerali wettqet żball ta’ liġi meta qieset li l-Bord tal-Appell tal-ACER wettaq stħarriġ sħiħ tad-deċiżjonijiet kontenzjużi.

31.

Fl-opinjoni tagħhom, il-Qorti Ġenerali wettqet tali żball meta injorat l-evalwazzjoni tal-Bord tal-Appell stess fir-rigward tal-intensità tal-istħarriġ li huwa japplika, u meta stħarrġet jekk l-istħarriġ kienx komplut jew le. Billi aġixxiet b’dan il-mod, il-Qorti Ġenerali ma osservatx il-ġurisprudenza tal-Qorti tal-Ġustizzja stabbilita fis-sentenza ACER vs Aquind ( 13 ).

32.

L-ACER topponi dawn l-argumenti.

33.

Fis-sentenza ACER vs Aquind, il-Qorti tal-Ġustizzja ddeċidiet li l-Bord tal-Appell tal-ACER għandu jeżerċita stħarriġ sħiħ mhux biss tal-evalwazzjonijiet legali, iżda wkoll tal-evalwazzjonijiet kumplessi ta’ natura teknika, xjentifika jew ekonomika, magħmula mill-ACER fid-deċiżjonijiet tagħha. Il-Bord tal-Appell ma jistax jillimita ruħu li jeżerċita stħarriġ ristrett, li jirrigwarda biss l-eżistenza ta’ żbalji manifesti ta’ evalwazzjoni ( 14 ).

34.

F’dan l-istadju, ma huwiex meħtieġ li jiġu spjegati f’iktar dettall ir-raġunamenti li wasslu lill-Qorti tal-Ġustizzja timponi dan il-metodu ta’ stħarriġ fuq il-Bord tal-Appell tal-ACER ( 15 ), wara li interpretat l-Artikoli 18 u 19 tar-Regolament (KE) Nru 713/2009 ( 16 ). Il-ġurisprudenza użata fis-sentenza ACER vs Aquind, ma hijiex diskussa fil-kuntest ta’ dawn l-appelli.

35.

Meta l-Bord tal-Appell tal-ACER adotta d-deċiżjonijiet kontenzjużi inkwistjoni f’din il-kawża (is-16 ta’ Lulju 2020), is-sentenza ACER vs Aquind kienet għadha ma ngħatatx. F’dak iż-żmien, il-Bord tal-Appell segwa l-prassi abitwali tiegħu, jiġifieri stħarriġ limitat ta’ evalwazzjonijiet kumplessi ta’ natura teknika, xjentifika jew ekonomika. L-eżami mill-ġdid tiegħu kien limitat għall-verifika ta’ jekk id-deċiżjonijiet tal-ACER kinux jinkludu żbalji manifesti ta’ evalwazzjoni.

36.

Fil-fehma tal-Qorti Ġenerali, mid-deċiżjonijiet ikkontestati ( 17 ) mit-TSOs jirriżulta li “l-Bord tal-Appell, f’konformità mal-prassi deċiżjonali tiegħu ta’ dak iż-żmien, wettaq stħarriġ sħiħ biss dwar l-evalwazzjonijiet legali tal-ACER fid-[Deċiżjonijiet] tagħha, iżda li huwa llimita ruħu li jwettaq biss stħarriġ limitat, għat-tfittxija ta’ żbalji manifesti, dwar l-evalwazzjonijiet fattwali kumplessi tagħha, ta’ natura teknika, billi rrikonoxxa, f’dan ir-rigward, ċertu marġni ta’ diskrezzjoni lill-ACER ( 18 )”.

37.

Madankollu, il-Qorti Ġenerali kkunsidrat li:

38.

L-approċċ tal-Qorti Ġenerali f’dawn iż-żewġ rikorsi għal annullament jikkuntrasta ma’ dak li hija stess osservat fil-Kawża T‑735/18 ( 19 ), li hija s-suġġett tas-sentenza ACER vs Aquind.

39.

Fil-Kawża T‑735/18, il-Qorti Ġenerali kkonfermat osservazzjoni analoga għal dik miktuba mill-ġdid hawnhekk, tal-Bord tal-Appell tal-ACER, u ma wettqitx il-verifika tal-kwistjoni dwar jekk, de facto, dan il-bord kienx wettaq stħarriġ sħiħ tal-evalwazzjonijiet tekniċi kumplessi.

40.

Minkejja li, fil-kawża ACER vs Aquind, l-Aġenzija sostniet li, fir-realtà, il-Bord tal-Appell kien wettaq stħarriġ sħiħ ta’ kwistjonijiet tekniċi kumplessi, il-Qorti tal-Ġustizzja kkonfermat li l-Qorti Ġenerali ma kinitx wettqet żball ta’ liġi, peress li mill-punt 52 tad-deċiżjoni tal-Bord tal-Appell kien jirriżulta espressament li dan il-bord ried jillimita l-istħarriġ tiegħu (tad-Deċiżjoni Nru 05/2018) għal żball manifest ta’ evalwazzjoni ( 20 ).

41.

Għall-kuntrarju, il-Qorti Ġenerali tadotta approċċ differenti. Minflok ma assumiet li, hekk kif kien qiegħed isostni l-Bord tal-Appell stess, l-istħarriġ li huwa applika għall-kwistjonijiet tekniċi kumplessi kien limitat, il-Qorti Ġenerali, eżaminat fil-fond id-deċiżjonijiet ikkontestati, sabiex tivverifika jekk il-Bord tal-Appell kienx wettaq dak li huwa allega li ma wettaqx.

42.

Wara din il-verifika, il-Qorti Ġenerali kkonkludiet li l-Bord tal-Appell kien stħarreġ, de facto, mingħajr limitazzjoni u b’mod sħiħ, l-evalwazzjonijiet kumplessi ta’ natura teknika tal-ACER. B’mod partikolari, hija kkonstatat li l-imsemmi bord kien ivverifika li l-proċess ta’ aġġornament kontinwu tal-kapaċità ta’ trażmissjoni transżonali disponibbli, b’mod ċentralizzat jew deċentralizzat, kien teknikament neċessarju sabiex jiġu operati l-pjattaformi aFRR u mFRR ( 21 ).

43.

Fl-opinjoni tiegħi, il-Qorti Ġenerali twettaq żball ta’ liġi billi tinjora d-dikjarazzjoni tal-Bord tal-Appell. Jekk huwa jirrikonoxxi li wettaq kontroll limitat u marġinali fuq il-kwistjonijiet tekniċi kumplessi tad-deċiżjonijiet tal-ACER ikkontestati, ma narax kif tista’ tinjora din id-dikjarazzjoni u tibdilha b’waħda l-oppost tagħha.

44.

Kif issuġġerejt fil-konklużjonijiet tiegħi fil-Kawża ACER vs Aquind ( 22 ), u kif ġie kkonfermat mill-Qorti tal-Ġustizzja fis-sentenza tagħha ( 23 ), meta l-Bord tal-Appell jiddikjara li wettaq stħarriġ ristrett, limitat għall-evalwazzjoni tal-iżbalji manifesti li jikkonċernaw il-kwistjonijiet tekniċi kumplessi, tad-deċiżjonijiet tal-ACER, il-Qorti Ġenerali ma għandhiex tivverifika jekk l-imsemmi bord wettaqx “fil-prattika”stħarriġ sħiħ ta’ dawn il-kwistjonijiet.

45.

Abbażi ta’ din il-premessa, fil-kawża ineżami, il-Qorti Ġenerali kellha taċċetta bħala minnha d-dikjarazzjoni tal-Bord tal-Appell, li huwa l-iktar wieħed ikkwalifikat sabiex ikun jaf liema tip ta’ stħarriġ huwa applikat fid-deċiżjonijiet tiegħu stess.

46.

Jekk, bħal fil-kawża ineżami, il-Bord tal-Appell jiddikjara li applika stħarriġ limitat u marġinali, il-Qorti Ġenerali għandha, awtomatikament, tannulla d-deċiżjonijiet tal-imsemmi bord skont il-ġurisprudenza ACER vs Aquind. Minn dan l-annullament, il-Bord tal-Appell għandu jfassal deċiżjonijiet ġodda li fihom iwettaq stħarriġ sħiħ ta’ kwistjonijiet tekniċi kumplessi ( 24 ).

47.

Meta, għall-kuntrarju, il-Bord tal-Appell jiddikjara, f’deċiżjoni, li wettaq stħarriġ sħiħ tal-evalwazzjonijiet legali u tal-evalwazzjonijiet tekniċi kumplessi li jinsabu f’deċiżjoni tal-ACER, il-Qorti Ġenerali għandha tanalizza l-portata ta’ dan l-istħarriġ, jekk ir-rikorrenti jqisu li ma għandux il-portata dovuta jew li huwa insuffiċjenti. Jekk il-Qorti Ġenerali ma tagħmilx dan, u jekk taċċetta bħala valida l-evalwazzjoni tal-Bord tal-Appell, hija tikser id-dritt tar-rikorrenti għal protezzjoni ġudizzjarja effettiva.

48.

Il-kunsiderazzjonijiet preċedenti jwassluni sabiex nipproponi li l-ewwel aggravju jiġi milqugħ.

49.

Essenzjalment, dan l-aggravju jikkritika lill-Qorti Ġenerali talli wettqet żball ta’ liġi meta qieset li, skont ir-Regolament 2017/2195, il-“funzjoni ta’ ġestjoni tal-kapaċità ta’ trażmissjoni transżonali ta’ enerġija tal-ibbilanċjar” hija funzjoni meħtieġa għall-ġestjoni tal-pjattaformi aFRR u mFRR.

50.

Iż-żewġ argumenti inkwistjoni jsostnu, abbażi ta’ pożizzjonijiet opposti li:

51.

Minn perspettiva teknika, huwa probabbli li l-allokazzjoni ta’ din il-funzjoni lill-pjattaformi Ewropej għall-allokazzjoni tal-ibbilanċjar kienet tkun l-għażla mixtieqa. Madankollu, ser nesponi iktar ’il quddiem li din ma kinitx l-għażla tal-leġiżlatur tal-Unjoni, riflessa fl-Artikoli 20, 21 u 37 tar-Regolament 2017/2195.

52.

L-appellanti jsostnu li l-Qorti Ġenerali applikat b’mod żbaljat l-Artikoli 20, 21 u 37 tar-Regolament 2017/2195 meta evalwat il-bażijiet legali tal-funzjonijiet meħtieġa għall-operat tal-pjattaformi mFRR u aFRR. Fil-fehma tagħhom:

53.

L-appellanti jaqsmu dan l-aggravju f’żewġ partijiet, li huma marbuta mill-qrib ma’ xulxin:

54.

L-ACER tiċħad dawn l-argumenti.

55.

Qabel ma nanalizza ż-żewġ partijiet tat-tieni aggravju hekk kif maqsuma mill-appellanti, inqis li huwa utli, fid-dawl tat-tekniċità estrema tiegħu, li jiġi spjegat il-funzjonament tas-suq tal-ibbilanċjar tal-elettriku u tal-pjattaformi Ewropej maħluqa sabiex jiffavorixxu l-konnessjonijiet transkonfinali bejn is-swieq tal-ibbilanċjar tal-elettriku nazzjonali.

56.

Minħabba l-karatteristiċi fiżiċi tagħhom, hemm erba’ tipi ta’ swieq tal-elettriku bl-ingrossa msemmija fl-Artikoli 6 sa 9 tar-Regolament (UE) 2019/943 ( 26 ):

57.

Fir-rigward ta’ dawn is-swieq tal-aħħar, ir-Regolament 2017/2195 jistabbilixxi “sett ta’ regoli tekniċi, operazzjonali u marbuta mas-suq, applikabbli għall-UE kollha, biex jirregolaw il-funzjonament tas-swieq tal-ibbilanċjar tal-elettriku ( 28 ).”

58.

B’mod partikolari, ir-Regolament 2017/2195, bil-għan li jikkontribwixxi għall-iżvilupp tas-suq intern tal-elettriku fl-Unjoni, huwa intiż sabiex l-allokazzjoni tal-enerġija tas-swieq tal-ibbilanċjar, preċedentement limitat għal-livell nazzjonali, tgħaddi sabiex titwettaq progressivament, skont l-iskeda prevista fih, fil-livell Ewropew.

59.

Ir-Regolament 2017/2195 juża, għal dan l-għan, erba’ pjattaformi Ewropej għall-allokazzjoni tal-ibbilanċjar ( 29 ), waħda għal kull wieħed mill-prodotti standard tal-ibbilanċjar iddefiniti ( 30 ):

60.

It-TSOs ħatru lil Amprion GmbH u lil TransnetBW GmbH bħala entitajiet għall-iżvilupp, għall-manutenzjoni u għall-ġestjoni tal-pjattaformi mFRR u aFRR/IN ( 35 ). Hekk kif indikat l-ACER matul is-seduta, it-TSOs kellhom jinkorporaw ruħhom progressivament f’dawn il-pjattaformi matul perijodu tranżitorju, sal‑24 ta’ Ġunju 2024, iżda, fil-prattika, hemm xi dewmien fil-proċess ( 36 ).

61.

Kif jindikaw it-titoli tagħhom, id-differenza bejn il-pjattaformi mFRR u aFRR hija waħda li tiddependi fuq “jekk l-enerġija tal-ibbilanċjar hijiex attivata manwalment minn operatur jew awtomatikament f’ċirkwit magħluq ( 37 ).”

62.

L-appellanti jikkritikaw lill-Qorti Ġenerali li wettqet żball ta’ liġi meta kkunsidrat li l-kalkolu tal-kapaċità transżonali għandu jitqies bħala funzjoni meħtieġa għall-operat tal-pjattaformi mFRR u aFRR. B’dan il-mod, il-Qorti Ġenerali estendiet is-sistema prevista fl-Artikoli 20 u 21 tar-Regolament 2017/2195 għall-funzjoni msemmija fl-Artikolu 37, li jipprevedi sistema legali separata.

63.

Skont il-Qorti Ġenerali, il-Bord tal-Appell ġustament ikkonkluda li l-funzjoni ta’ ġestjoni tal-kapaċità hija funzjoni oħra mill-funzjonijiet meħtieġa sabiex jiġu operati l-pjattaformi aFRR u mFRR. Ir-raġunament tal-Qorti Ġenerali f’dan ir-rigward jista’ jinġabar fil-qosor kif ġej ( 38 ):

64.

Fid-dawl ta’ dawn il-premessi, il-Qorti tal-Ġustizzja tikkonkludi li: “[…] il-funzjoni li tippermetti li l-kapaċità tat-trażmissjoni transżonali disponibbli tiġi kkalkolata u aġġornata b’mod kontinwu, billi tiġi segwita metodoloġija armonizzata fir-rigward tat-TSO kollha, għandha tiġi kkunsidrata, fid-dawl tal-għan li jiġi żgurat operat effiċjenti u sigur tal-pjattaforma […], kemm mil-lat tekniku kif ukoll minn dak ġuridiku, funzjoni meħtieġa għall-operat tal-pjattaforma li d-disinn tagħha, kif imfakkar fl-Artikolu 21(3)(a) (Artikolu 20(3)(a)] tar-Regolament 2017/2195, irid ikun ta’ livell għoli u jikkonforma mal-prinċipji ta’ governanza u ma’ proċessi tan-negozju komuni” ( 40 ).

65.

Din l-affermazzjoni hija riprodotta f’termini analogi f’siltiet oħra tas-sentenzi appellati. B’mod partikolari, il-punt 122 tagħhom jipprovdi li “[…] l-funzjoni ta’ aġġornament kontinwu tal-kapaċità tat-trażmissjoni transżonali disponibbli, li hija sottostanti għall-funzjoni tal-ġestjoni tal-kapaċità, u, għaldaqstant, il-funzjoni tal-ġestjoni tal-kapaċità stess għandhom jiġu kklassifikati globalment bħala funzjonijiet meħtieġa għall-operat tal-pjattaforma […].”

66.

L-interpretazzjoni tiegħi tar-rabtiet bejn l-Artikolu 37 u l-Artikoli 20 u 21 tar-Regolament 2017/2195, hija differenti minn dik tal-Qorti Ġenerali. Ser nirreferi, b’mod separat, għall-Artikolu 37, minn naħa, u għall-Artikoli 20 u 21, min-naħa l-oħra, sabiex imbagħad niġbor fil-qosor l-argumenti tiegħi dwar l-interpretazzjoni magħquda ta’ dawn id-dispożizzjonijiet.

67.

L-Artikolu 37 tar-Regolament 2017/2195 jistabbilixxi s-sistema legali għall-aġġornament kontinwu tad-disponibbiltà tal-kapaċità transżonali. Skont din is-sistema, l-Artikolu 37 tar-Regolament 2017/2195:

68.

Issa, l-obbligi imposti mill-Artikolu 37 tar-Regolament 2017/2195 huma indirizzati lit-TSOs u ma jinkludu ebda allużjoni għall-pjattaformi Ewropej ta’ allokazzjoni tal-bilanċ (l-Artikoli 19 sa 22 tal-istess regolament).

69.

Fil-fehma tiegħi, li tikkoinċidi ma’ dik tal-appellanti, għandha ssir distinzjoni bejn l-obbligi imposti fuq it-TSOs u l-funzjonijiet assenjati lill-pjattaformi. Ir-Regolament 2017/2195 jittratta t-tnejn li huma, minn perspettiva sistematika, f’intestaturi differenti:

70.

Id-distinzjoni ma ssirx biss f’termini ta’ lokalizzazzjoni sistematika fir-Regolament 2017/2195. Il-qari tal-Artikolu 37 juri li dan ma jinkludi ebda riferiment, u lanqas riferiment trasversali, għall-Artikoli 20 u 21. B’mod partikolari, mill-Artikolu 37 ma jistax jiġi dedott li l-ġestjoni tal-kapaċità transżonali hija meħtieġa għall-funzjonament tal-pjattaformi mFRR u aFRR. Dak li huwa meħtieġ mill-pjattaformi hija d-data dwar il-kapaċità ta’ enerġija transżonali tal-ibbilanċjar disponibbli għall-iskambju bejn it-TSOs, sabiex tiġi implimentata l-funzjoni tal-ottimizzazzjoni tal-attivazzjoni.

71.

Il-kunċett ta’ “funzjonijiet meħtieġa għall-operat tal-pjattaforma Ewropea”, ma jagħmilx parti mill-ħamsa u erbgħin kunċett iddefiniti fl-Artikolu 2 tar-Regolament 2017/2195. Dan il-kunċett jidher biss fl-Artikoli 20 u 21 tal-istess regolament, li jipprovdu li t-tifsira tiegħu għandha tiġi mfittxija.

72.

L-ewwel punt ta’ dawn l-artikoli jipprevedi li t-TSOs għandhom jippreżentaw proposta dwar l-oqfsa ta’ implimentazzjoni tal-pjattaformi mFRR u aFRR. It-tieni punt jispeċifika l-karatteristiċi li ġejjin taż-żewġ pjattaformi: i) għandhom jiġu operati minn TSO jew minn entità maħluqa mit-TSOs infushom; ii) għandhom ikunu bbażati fuq il-prinċipji tal-governanza u proċessi tan-negozju komuni; iii) għandhom jinkludu, mill-inqas, il-funzjoni tal-ottimizzazzjoni tal-attivazzjoni u l-funzjoni tal-issetiljar TSO-TSO; iv) għandhom japplikaw mudell multilaterali bejn TSO-TSO, b’listi komuni skont il-mertu biex jiġu skambjati l-offerti kollha għall-enerġija tal-ibbilanċjar mill-prodotti standard għar-riżervi għar-restawr tal-frekwenza b’attivazzjoni (manwali jew awtomatiku).

73.

Il-proposta tat-TSOs għandha tirrispetta dawn il-karatteristiċi tal-pjattaformi u għandha tinkludi, mill-inqas, l-elementi speċifikati fl-Artikolu 20(3) u fl-Artikolu 21(3) tar-Regolament 2017/2195. Dawn l-elementi jinkludu “a) id-disinn ta’ livell għoli tal-pjattaforma Ewropea” u “c) id-definizzjoni tal-funzjonijiet meħtieġa biex titħaddem [għall-operat] il-pjattaforma Ewropea.”

74.

Bħala funzjonijiet tal-pjattaformi mFRR u aFRR, għandu neċessarjament ikun hemm dawk ta’ ottimizzazzjoni tal-attivazzjoni u ta’ issetiljar TSO-TSO. Għalhekk, it-tnejn li huma, huma funzjonijiet meħtieġa għall-operat tal-pjattaformi mFRR u aFRR. Bl-istess mod, dawn għandhom jiġu inklużi, bħala tali, fil-proposti ppreżentati mit-TSOs.

75.

Id-dibattitu kien iffokat fuq l-interpretazzjoni tal-frażi “tal-anqas” li tinsab fl-Artikolu 20(2) u fl-Artikolu 21(2) tar-Regolament 2017/2195. Skont il-Qorti Ġenerali, ir-riferiment li dawn iż-żewġ dispożizzjonijiet jagħmlu għall-funzjonijiet (minimi) ta’ ottimizzazzjoni tal-attivazzjoni u tal-issetiljar TSO–TSO ma jipprekludix lill-ACER milli timponi li l-pjattaformi jinkludu, taħt l-istess titolu ta’ funzjonijiet meħtieġa, funzjonijiet differenti minn dawn it-tnejn.

76.

Madankollu, fil-fehma tiegħi, din l-interpretazzjoni ma hijiex korretta. Il-leġiżlatur ried jagħti lill-pjattaformi kontenut minimu ta’ funzjonijiet, billi qies li tnejn biss kienu indispensabbli (“meħtieġa”) għall-operat tagħhom. Naturalment, xejn ma jipprekludi li jiżdiedu funzjonijiet oħra, bħall-funzjoni ta’ ġestjoni tal-kapaċità transżonali, iżda huma t-TSOs li għandhom jiddeċiedu jekk dawn jiġux jew ma jiġux miżjuda, u l-ACER ma hijiex awtorizzata li timponihom.

77.

It-TSOs appellanti ma jikkontestawx li d-data dwar il-kapaċità transżonali hija meħtieġa għall-funzjonament effiċjenti tal-pjattaformi tal-ibbilanċjar ( 41 ). Madankollu, minn din il-premessa ma jistax jiġi dedott li l-kalkolu ta’ din id-data għandu jitwettaq, –bħala funzjoni neċessarja– mill-entità maħtura għall-operat tal-pjattaforma jew mill-pjattaforma nnifisha.

78.

Fir-realtà, huwa l-Artikolu 37 tar-Regolament 2017/2195 li jattribwixxi lit-TSOs (u mhux lill-pjattaformi) il-kalkolu tal-kapaċità transżonali. Huma t-TSOs li huma responsabbli għall-proċess ta’ kalkolu u ta’ aġġornament tad-data dwar id-disponibbiltà ta’ din il-kapaċità.

79.

Il-fatt li din id-data hija indispensabbli għall-funzjonament tajjeb tal-pjattaformi mFRR u aFRR (punt li dwaru ma hemmx nuqqas ta’ qbil bejn il-partijiet) ma jfissirx, nirrepeti, li l-kalkoli tal-kapaċità transżonali u l-aġġornament permanenti tagħha għandhom b’mod imperattiv jiġu fdati lil dawn il-pjattaformi, permezz ta’ deċiżjoni tal-ACER. Nerġa’ nirrepeti li l-kalkolu tal-kapaċità transżonali ma għandux neċessarjament jitwettaq bħala funzjoni meħtieġa mill-pjattaformi u mill-entitajiet inkarigati mill-operat tagħhom.

80.

Id-domandi magħmula mill-Qorti tal-Ġustizzja matul is-seduta enfasizzaw li l-Artikolu 37 tar-Regolament 2017/2195 jagħti lit-TSOs, taħt is-superviżjoni tal-ARN, il-kompitu li jiġġeneraw id-data dwar il-kapaċità transżonali tal-enerġija tal-ibbilanċjar u l-aġġornament permanenti ta’ din id-data. It-TSOs biss għandhom il-mezzi tekniċi u huma kapaċi jipproduċu din id-data, b’tali mod li ma huwiex possibbli li l-funzjoni tal-ġenerazzjoni ta’ din id-data tiġi ttrasferita għall-algoritmu ta’ pjattaforma. Jekk ikun mod ieħor, jista’ jkun li s-sigurtà tal-provvista tal-elettriku, li taqa’ taħt ir-responsabbiltà tat-TSOs fir-rigward tat-territorji rispettivi tagħhom, tiġi kompromessa.

81.

Għaldaqstant, jiena tal-fehma li huwa żbaljat li jitqies li l-funzjoni ta’ ġenerazzjoni u ta’ aġġornament tad-data tal-enerġija transżonali tal-ibbilanċjar għandha titqies bħala waħda mill-funzjonijiet meħtieġa għall-operat tal-pjattaformi aFRR u mFRR. Iż-żewġ pjattaformi la jistgħu jimmaniġġjaw il-kapaċità transżonali tal-enerġija tal-ibbilanċjar u lanqas l-aġġornament tagħhom, għalkemm jeħtieġu din id-data għall-funzjonament tagħhom. It-TSOs għandhom l-obbligu li jittrażmettu tali data lill-pjattaformi b’mod individwali jew, jekk iqisu li dan ikun iktar konvenjenti, b’mod iċċentralizzat permezz ta’ modulu tal-IT komuni.

82.

Fl-ewwel lok, kif ammettiet il-Qorti Ġenerali ( 42 ), il-pjattaformi mFRR u aFRR inizjalment aġixxew mingħajr il-funzjoni ta’ ġestjoni tal-kapaċità transżonali.

83.

Dan seħħ għaliex it-TSOs, f’konformità mal-Artikolu 37(3) tar-Regolament 2017/2195, kellhom qabelxejn ifasslu metodoloġija għall-kalkolu tal-kapaċità transżonali fil-perijodu taż-żmien tal-ibbilanċjar. It-TSOs iddeċidew li din il-funzjoni għandha titwettaq permezz ta’ modulu tal-IT, b’mod ikkoordinat u ċċentralizzat, fuq livell ta’ pjattaformi multipli, u għalhekk huma kellhom minn qabel joħolqu dan il-modulu u jorganizzaw il-ġestjoni tiegħu ( 43 ).

84.

Fit-tieni lok, kif diġà indikajt, l-Artikolu 37 tar-Regolament 2017/2195 jistabbilixxi sistema legali għall-aġġornament kontinwu tad-disponibbiltà tal-kapaċità transżonali u għall-ħolqien ta’ metodoloġija għall-kalkolu ta’ din il-kapaċità. Din is-sistema legali hija differenti minn dik applikabbli għall-erba’ pjattaformi Ewropej ta’ allokazzjoni tal-ibbilanċjar (l-Artikoli 19 sa 22 tal-istess regolament). Dawn huma sistemi differenti, li jirriflettu l-għażla tal-leġiżlatur li jagħtihom kontenut awtonomu.

85.

Fit-tielet lok, il-proċedura deċiżjonali applikata għall-ħolqien tal-pjattaformi mFRR u aFRR hija differenti minn dik użata fl-Artikolu 37 tar-Regolament 2017/2195. Skont l-Artikolu 5(2) ta’ dan ir-regolament, huma l-awtoritajiet regolatorji li għandhom japprovaw il-proposti mressqa mit-TSOs dwar: “a) l-oqsfa għall-istabbiliment ta’ pjattaformi Ewropej skont l-Artikoli 20(1), 21(1) […]” u “b) l-immodifikar tal-oqsfa għall-istabbiliment ta’ pjattaformi Ewropej skont l-Artikoli 20(5) u 21(5).” Għalhekk, l-ACER, fuq proposta tat-TSOs, tiddeċiedi dwar l-oqfsa ta’ implimentazzjoni u l-emendi tagħhom fir-rigward tal-pjattaformi mFRR u aFRR/IN.

86.

B’kuntrast ma’ dan, huma t-TSOs li għandhom jipproponu u huma l-ARN tar-reġjun ikkonċernat li għandhom japprovaw, skont l-Artikolu 5(3)(f) tar-Regolament 2017/2195, il-metodoloġija għall-kalkolu tal-kapaċità transżonali għal kull reġjun ta’ kalkolu, skont l-Artikolu 37(3) ( 44 ). L-intervent tal-ACER huwa possibbli f’tali każijiet meta l-ARN ma jkunux jistgħu jaslu għal ftehim jew jitolbu lil din l-aġenzija tiddeċiedi, konformement mal-Artikolu 5(7) tar-Regolament 2017/2195 u mat-tieni subparagrafu tal-Artikolu 6(10)(b) tar-Regolament (UE) 2019/942.

87.

L-utilità u l-effiċjenza ikbar tal-inklużjoni tal-ġestjoni tal-kapaċità transżonali tal-enerġija tal-ibbilanċjar fil-pjattaformi Ewropej ma jiġġustifikawx, fil-fehma tiegħi, ir-rikonoxximent ta’ kompetenza impliċita lill-ACER sabiex tikklassifikaha bħala funzjoni meħtieġa għall-funzjonament tal-pjattaformi aFRR u mFRR. Huma t-TSOs li għandhom il-mezzi tekniċi sabiex jikkalkolaw u jaġġornaw il-kapaċità transżonali, u ma huwiex evidenti li l-pjattaformi aFRR u mFRR jistgħu jwettqu din l-attività b’mod iktar effiċjenti. Barra minn hekk, tali kompetenza impliċita tmur kontra l-Artikolu 37 tar-Regolament 2017/2195 ( 45 ).

88.

Fir-raba’ lok, l-Artikolu 37(1) tar-Regolament 2017/2195 jordna lit-TSOs jaġġornaw, b’mod kontinwu, id-disponibbiltà ta’ kapaċitajiet transżonali għall-iskambju tal-enerġija tal-ibbilanċjar. Għalhekk, kull TSO huwa obbligat jimmaniġġja l-kapaċità ta’ skambju, li huwa indispensabbli għall-iskambju transżonali tal-enerġija. L-Artikolu 37 ma jgħid xejn dwar il-fatt li din il-funzjoni għandha tingħata lill-pjattaformi Ewropej ta’ allokazzjoni tal-ibbilanċjar.

89.

Għalhekk, mill-Artikolu 37(1) tar-Regolament 2017/2195 jista’ jiġi dedott li l-informazzjoni dwar l-enerġija tal-ibbilanċjar għall-iskambju bejn iż-żoni, għandha tiġi pprovduta minn kull TSO. Kif diġà indikajt, huma t-TSOs li għandhom il-mezzi tekniċi biex jipprovdu d-data dwar il-kapaċità tal-enerġija transżonali tal-ibbilanċjar disponibbli. L-Artikolu 37(2) jelabora iktar dan l-argument billi jafferma li t-TSOs għandhom jużaw il-kapaċità transżonali li jifdal wara l-ħin tal-għeluq tas-suq transżonali tal-istess ġurnata, sakemm il-metodoloġija għall-kalkolu tal-kapaċità tiġi żviluppata u applikata skont il-punt 3.

90.

Fil-ħames lok, l-Artikolu 37(3) tar-Regolament 2017/2195 jipprevedi l-istabbiliment progressiv ta’ ġestjoni armonizzata tal-funzjoni ta’ ġestjoni tal-kapaċità transżonali tal-enerġija tal-ibbilanċjar. B’mod partikolari, huwa jipprevedi li, fi żmien ħames snin, it-TSOs kollha ta’ reġjun ta’ kalkolu tal-kapaċità jiżviluppaw metodoloġija għall-kalkolu tal-kapaċità transżonali tal-enerġija tal-ibbilanċjar. Huma għalhekk it-TSOs li għandhom ifasslu din il-metodoloġija, u huma l-ARN li għandhom japprovawha. Huma wkoll it-TSOs li għandhom l-obbligu li jiżguraw il-konsistenza mal-metodoloġija għall-kalkolu tal-kapaċità transżonali applikata għall-perijodi ta’ żmien tas-suq tal-istess ġurnata stabbilit skont ir-Regolament (UE) 2015/1222 ( 46 ).

91.

Ma jidhirlix li huwa loġiku, kuntrarjament għal dak li ssostni l-Qorti Ġenerali, li l-funzjoni ta’ ġestjoni tal-kapaċità transżonali tiġi attribwita lill-pjattaformi Ewropej u li, għall-kuntrarju, l-iżvilupp tal-metodoloġija ta’ din il-kapaċità transżonali tiġi attribwita lit-TSOs u li l-approvazzjoni tagħha tiġi attribwita lill-ARN. Għandu jkun hemm armonija bejn il-punti 1 u 3 tal-Artikolu 37 tar-Regolament 2017/2195, armonija li, fil-fehma tiegħi, ma hijiex osservata fis-sentenzi appellati.

92.

Il-Qorti Ġenerali ma tiħux inkunsiderazzjoni b’mod xieraq ir-relazzjoni bejn l-Artikolu 37(3) tar-Regolament 2017/2195 u r-Regolament (UE) 2015/1222. Kif diġà semmejt, l-ewwel dispożizzjoni teżiġi li jkun hemm koerenza bejn il-metodoloġija għall-kalkolu tal-kapaċità transżonali, żviluppata mit-TSOs, għall-enerġija tal-ibbilanċjar u għall-metodoloġija tal-kalkolu tal-kapaċità transżonali applikata għall-perijodu ta’ żmien tal-ġurnata bil-quddiem u tal-istess ġurnata. Ir-Regolament 2015/1222 jipprevedi, fl-Artikolu 15(1) tiegħu, li t-TSOs kollha għandhom jiżviluppaw b’mod konġunt proposta komuni dwar id-determinazzjoni tar-reġjuni għall-kalkolu tal-kapaċitajiet ta’ skambju; u fl-Artikolu 20(2) tiegħu, li t-TSOs kollha ta’ kull reġjun ta’ kalkolu tal-kapaċità ta’ skambju għandhom jippreżentaw proposta ta’ metodoloġija komuni għall-kalkolu tal-kapaċità fi ħdan ir-reġjun korrispondenti.

93.

Konsegwentement, ir-Regolament 2015/1222 ma jipprevedix metodoloġija komuni għat-TSOs kollha ( 47 ) għall-kalkolu tal-kapaċità transżonali f’perijodu ta’ żmien tal-ġurnata bil-quddiem u tal-istess ġurnata, iżda diversi metodoloġiji reġjonali differenti. Il-kalkolu tal-kapaċità transżonali tal-enerġija tal-ibbilanċjar ma għandux neċessarjament jitwettaq permezz ta’ metodoloġija waħda armonizzata u obbligatorja għat-TSOs kollha.

94.

Fis-sitt lok, l-interpretazzjoni sistematika u finalista tar-Regolament 2017/2195 adottata mill-Qorti Ġenerali ma hijiex determinanti sabiex tiġi identifikata l-ġestjoni tal-kapaċità transżonali tal-enerġija tal-ibbilanċjar tiġi identifikata bħala funzjoni meħtieġa għall-operat tal-pjattaformi mFRR u aFRR.

95.

Sabiex jintlaħqu l-għanijiet stabbiliti mir-Regolament 2017/2195 fil-premessi (1), (6), (7) u (10) tiegħu, kif ukoll fl-Artikolu 3 tiegħu, huwa biżżejjed li t-TSOs jipprovdu b’mod xieraq lill-pjattaformi Ewropej id-data dwar il-kapaċità transżonali tal-enerġija tal-ibbilanċjar.

96.

Għaldaqstant, l-ewwel parti tat-tieni aggravju għandha tiġi milqugħa.

97.

Permezz tat-tieni parti tat-tieni aggravju, l-appellanti jikkritikaw lill-Qorti Ġenerali talli wettqet żball ta’ liġi meta ma għamlitx distinzjoni bejn, minn naħa, l-obbligi li t-TSOs, bħala tali, għandhom fir-rigward tal-funzjonijiet “meħtieġa” għall-operat tal-pjattaformi mFRR u aFRR u, min-naħa l-oħra, id-drittijiet tagħhom li jipproponu l-inklużjoni ta’ funzjonijiet addizzjonali fuq dawn il-pjattaformi. Huma jsostnu li l-ACER ma tista’ timponi fuqhom l-inklużjoni ta’ l-ebda funzjoni addizzjonali, kuntrarjament għal dak li ġie deċiż mil-Bord tal-Appell u mil-Qorti Ġenerali.

98.

L-ACER tiċħad dan l-argument u tqis li l-interpretazzjoni tas-sentenzi appellati hija fondata fid-dritt.

99.

L-argument tal-Qorti Ġenerali, fost il-punti ta’ tluq tagħha, huwa dan li ġej:

100.

Il-Qorti Ġenerali tikkonferma, b’mod definittiv, id-deċiżjoni tal-Bord tal-Appell li, min-naħa tiegħu, jikkonferma d-deċiżjonijiet tal-ACER kuntrarji għall-pożizzjoni tat-TSOs. Hija tiddikjara li l-ġestjoni tal-kapaċità transżonali, prevista fl-Artikolu 37 tar-Regolament 2017/2195, għandha tkun “kklassifikat[a] globalment” ( 50 ) bħala funzjoni meħtieġa għall-operat tal-pjattaformi mFRR u aFRR.

101.

Fil-fehma tiegħi, wara li jiġi osservat li l-kontenut ta’ din il-parti tat-tieni aggravju jikkoinċidi, fil-parti l-kbira, ma’ dak tal-ewwel waħda, l-iżball ta’ liġi tas-sentenzi appellati jinsab, għal darba oħra fil-fatt, li ma huwiex ikkonstatat li l-funzjonijiet meħtieġa, inkwantu indispensabbli skont l-Artikoli 20 u 21 tar-Regolament 2017/2195, għall-istabbiliment tal-pjattaformi mFRR u aFRR huma, kif jindikaw dawn l-istess dispożizzjonijiet, dawk ta’ ottimizzazzjoni tal-attivazzjoni u tal-issetiljar TSO-TSO.

102.

Il-funzjoni ta’ ġestjoni u ta’ aġġornament kontinwu tal-kapaċità transżonali disponibbli ma hijiex, nirrepeti, funzjoni meħtieġa għall-funzjonament tal-pjattaformi tal-ibbilanċjar, iżda hija suġġetta għas-sistema legali, differenti, tal-Artikolu 37 tar-Regolament 2017/2195.

103.

Permezz tal-attribuzzjoni, mill-ACER u kuntrarjament għall-pożizzjoni tat-TSOs, tal-funzjoni ta’ ġestjoni u ta’ aġġornament kontinwu tal-kapaċità transżonali lill-pjattaformi mFRR u aFRR, it-TSOs u l-ARN jitilfu, fir-realtà, id-dritt mogħti lilhom mill-Artikolu 37 tar-Regolament 2017/2195. Huma għalhekk ġew imċaħħda mis-setgħa tagħhom li jiddeċiedu b’mod konġunt dwar l-aħjar mod kif jamministraw din il-funzjoni, li, skont il-proposta tagħhom, kienet li tiġi nnominata entità unika inkarigata mill-ġestjoni tal-kapaċità bħala funzjoni ta’ pjattaformi multipli.

104.

Fil-proposti ppreżentati lill-ACER għall-pjattaformi mFRR u aFRR, it-TSOs qiesu, bi qbil komuni, li l-funzjoni ta’ ġestjoni tal-kapaċità kienet, fil-fatt, funzjoni ta’ pjattaforma multipli li għandha tiġi implimentata minn dawn il-pjattaformi kollha, b’mod ikkoordinat u ċċentralizzat. Il-kalkolu tal-kapaċità transżonali jitwettaq, għat-TSOs kollha kkonċernati, permezz ta’ “modulu tal-IT tal-ġestjoni tal-kapaċitajiet” li jżid direttament ir-riżultati miksuba mal-funzjoni ta’ ottimizzazzjoni tal-attivazzjoni ta’ dawn il-pjattaformi.

105.

Fil-proposti tagħhom, it-TSOs indikaw li xtaqu jibqgħu liberi li jkunu jistgħu jafdaw il-ġestjoni tal-kapaċità, f’din il-forma kkoordinata u ċċentralizzata, lil entità li ma tkunx l-entità unika responsabbli għall-eżekuzzjoni tal-ottimizzazzjoni tal-attivazzjoni u tal-issetiljar TSO-TSO. Fl-istennija tal-implimentazzjoni tal-funzjoni tal-ġestjoni tal-kapaċità, f’din il-forma kkoordinata u ċċentralizzata, it-TSO kienu jqisu li, teoretikament, l-entità unika responsabbli għall-eżekuzzjoni tal-ottimizzazzjoni tal-attivazzjoni u tal-issetiljar TSO-TSO tista’ wkoll teżegwixxi l-ġestjoni tal-kapaċità billi ddaħħal, fil-funzjoni tal-ottimizzazzjoni tal-attivazzjoni, id-data li tkun ġiet ipprovduta minn kull wieħed mit-TSO ikkonċernati ( 51 ).

106.

Kif diġà spjegajt, ma huwiex ikkontestat li l-pjattaformi mFRR u aFRR jeħtieġu data dwar il-kapaċità transżonali tal-enerġija tal-ibbilanċjar. Issa, din id-data tista’ tiġi pprovduta lill-pjattaformi mit-TSOs u ma għandhiex neċessarjament tiġi ġestita direttament fuq dawn il-pjattaformi.

107.

Xejn ma jipprekludi lit-TSOs milli jiddeċiedu, bi qbil komuni, li jipproponu l-inklużjoni fil-pjattaformi mFRR u aFRR tal-ġestjoni tal-kapaċitajiet, bħala funzjoni addizzjonali, jekk din twassal għal żieda fl-effiċjenza. Madankollu, din hija deċiżjoni li taqa’ taħt il-kompetenza tagħhom u tal-ARN, skont l-Artikolu 37 tar-Regolament 2017/2195, u li ma tistax tiġi imposta fuqhom mill-ACER b’applikazzjoni tal-Artikoli 20 u 21 ta’ dan l-istess regolament.

108.

Għalhekk, inqis li anki t-tieni parti tat-tieni aggravju għandha tiġi milqugħa.

109.

Konformement mal-ewwel paragrafu tal-Artikolu 61 tal-Istatut tal-Qorti tal-Ġustizzja, meta l-appell jiġi milqugħ, il-Qorti tal-Ġustizzja għandha tannulla d-deċiżjoni tal-Qorti Ġenerali. F’dan il-każ, il-Qorti tal-Ġustizzja tista’ taqta’ definittivament il-kawża hija stess, meta din tkun fi stat li tiġi deċiża.

110.

Nipproponi li l-Qorti tal-Ġustizzja tilqa’ l-appelli tat-TSOs u konsegwentement tannulla s-sentenzi appellati. Ma jidhirlix li huwa possibbli li s-sentenzi appellati jiġu annullati parzjalment minħabba li l-punti vvizzjati bi żbalji ta’ liġi huma kruċjali għalihom. Għaldaqstant, huwa meħtieġ li dawn jiġu annullati fl-intier tagħhom.

111.

Barra minn hekk, inqis li l-Qorti tal-Ġustizzja għandha l-elementi neċessarji sabiex tiddeċiedi definittivament fuq l-appelli għal annullament kontra d-deċiżjonijiet ikkontestati quddiem il-Qorti Ġenerali.

112.

Għar-raġunijiet esposti iktar ’il fuq, hemm lok li t-tielet aggravju għal annullament ippreżentat quddiem il-Qorti Ġenerali jiġi milqugħ f’ dak li jirrigwarda l-ksur mill-Bord tal-Appell tal-obbligu tiegħu li jwettaq stħarriġ sħiħ tad-deċiżjonijiet tal-ACER, l-istess jgħodd għar-raba’ sat-tmien parti tat-tieni aggravju għal annullament. Konsegwentement, hemm lok li ż-żewġ deċiżjonijiet ikkontestati tal-Bord tal-Appell tal-ACER jiġu annullati fl-intier tagħhom.

113.

Skont l-Artikolu 184(2) tar-Regoli tal-Proċedura tagħha, meta l-appell ikun fondat u meta l-Qorti tal-Ġustizzja taqta’ l-kawża definittivament hija stess, din għandha tiddeċiedi dwar l-ispejjeż.

114.

Skont l-Artikolu 138(1) tal-istess regoli tal-proċedura, applikabbli għall-proċedura ta’ appell skont l-Artikolu 184(1) tagħhom, il-parti li titlef għandha tiġi kkundannata għall-ispejjeż jekk dawn ikunu ntalbu.

115.

L-appellanti talbu li l-ACER tiġi kkundannata għall-ispejjeż. Jekk, kif nissuġġerixxi, l-appelli tagħhom jiġu milqugħa, l-ACER għandha tiġi kkundannata kemm għall-ispejjeż tal-appelli kif ukoll għal dawk tal-proċeduri quddiem il-Qorti Ġenerali.

116.

Fid-dawl ta’ dak li ġie espost, nipproponi li l-Qorti tal-Ġustizzja: