1.

L-iżball imwettaq fil-bidu ta’ eżerċizzju matematiku li, mill-bqija, ikun twettaq b’mod tajjeb, ġeneralment jista’ jwassal għal żewġ riżultati skont il-personalità tal-professur. Wieħed jista’ jew jirċievi kreditu għall-parti li tkun korretta jew inkella jirċievi marki strettament għall-eżerċizzju li jkun ġie kkompletat b’mod żbaljat. Jidher li jekk l-imġiba ta’ awtoritajiet tat-taxxa tkun bħal dik ta’ professuri tal-matematika, wisq probabbli huma jimmarkaw skont it-tieni xenarju, mill-inqas abbażi tal-fatti ta’ din il-kawża.

2.

B hija kumpannija stabbilita fil-Pajjiżi l-Baxxi li aġixxiet bħala intermedjarja f’katina ta’ tranżazzjonijiet li kienet tinvolvi mill-inqas tliet operaturi. B xtrat merkanzija mingħand BOP, kumpannija stabbilita fil-Polonja, u wara biegħet mill-ġdid din il-merkanzija lill-klijenti tagħha stess li kienu stabbiliti fi Stati Membri oħra.

3.

Għalkemm ma kien hemm ebda frodi f’din il-katina, u għalkemm it-taxxa fuq il-valur miżjud (VAT) kienet ġiet effettivament iddikjarata f’kull stadju, l-awtoritajiet Pollakki, madankollu, qiesu li hija kienet ġiet iddikjarata b’mod żbaljat minħabba li l-kunsinna marbuta mat-trasport li permezz tiegħu l-merkanzija kienet intbagħtet direttament mingħand BOP għal għand il-klijenti finali ta’ B kienet ġiet ikklassifikata b’mod żbaljat. Filwaqt li B ittrattat l-ewwel tranżazzjoni (il-kunsinna mingħand BOP għal għand B) bħala tranżazzjoni nazzjonali, u t-tieni waħda (il-kunsinni proprji ta’ B lill-klijenti tagħha) bħala kunsinna intra-Komunitarja, billi attribwixxiet it-trasport lil din tal-aħħar, l-awtoritajiet Pollakki daħħlu t-trasport, li ta lok għan-natura intra-Komunitarja tal-ewwel tranżazzjoni.

4.

Din ir-riklassifikazzjoni wasslet lill-awtoritajiet Pollakki biex japplikaw il-finzjoni stabbilita fl-Artikolu 41 tad-Direttiva dwar il-VAT ( 2 ) li jiddetermina li l-post ta’ akkwist intra-Komunitarju ta’ merkanzija (u, għalhekk, il-post ta’ tassazzjoni) jitqies li jinsab, fil-qasir, fit-territorju tal-Istat Membru li jkun ħareġ in-numru ta’ identifikazzjoni tal-VAT li abbażi tiegħu tkun aġixxiet il-persuna li tkun akkwistat l-merkanzija, ħlief meta dan l-akkwist ikun ġie suġġett għall-VAT fil-post fejn ikun intemm it-trasport tal-merkanzija. Peress li B ma setgħetx iġġib provi li hija kienet applikat il-VAT għall-akkwist intra-Komunitarju rriklassifikat fl-Istati Membri ta’ destinazzjoni finali tal-merkanzija, l-awtoritajiet Pollakki bbażaw ruħhom fuq in-numru ta’ identifikazzjoni tal-VAT Pollakk li B kienet użat għal dak l-akkwist sabiex titlob il-ħlas tal-VAT.

5.

In-Naczelny Sąd Administracyjny (il-Qorti Amministrattiva Suprema, il-Polonja), il-qorti tar-rinviju li ġiet adita bil-proċedura fil-kawża prinċipali, tinnota, madankollu, li kienet diġà ġiet applikata taxxa mill-klijenti ta’ B. Għaldaqstant, il-qorti tar-rinviju għandha dubji dwar jekk l-Artikolu 41 tad-Direttiva dwar il-VAT, moqri fid-dawl tal-prinċipji ta’ newtralità u ta’ proporzjonalità, jipprekludix is-sitwazzjoni riżultanti li fiha t-taxxa kienet, skont dik il-qorti, tħallset darbtejn, jiġifieri, mill-klijenti ta’ B fl-Istat Membru tad-destinazzjoni tal-merkanzija u wkoll minn B fil-Polonja b’applikazzjoni tar-regola nazzjonali li tittrasponi din id-dispożizzjoni.

6.

Skont l-Artikolu 20 tad-Direttiva dwar il-VAT:

“‘Akkwist intra-Komunitarju ta’ merkanzija’ għandha tfisser l-akkwist tad-dritt li tiddisponi bħala sid ta’ proprjetà tanġibbli mobbli, mibgħuta jew ittrasportata għand il-persuna li qed takkwista l-merkanzija, mill-bejjiegħ jew f’ismu jew il-persuna li qed takkwista l-merkanzija, fi Stat Membru minbarra dak li minnu ntbagħtet jew kienet ittrasportata l-merkanzija.

[…]”

7.

Skont l-Artikolu 40 tad-Direttiva dwar il-VAT “[i]l-post ta’ akkwist intra-Komunitarju ta’ merkanzija għandu jitqies bħala l-post li fih tispiċċa l-merkanzija mibgħuta jew ittrasportata lill-persuna li akkwistatha.”

8.

L-Artikolu 41 tad-Direttiva dwar il-VAT jgħid dan li ġej:

“Mingħajr preġudizzju għall-Artikolu 40, il-post ta’ akkwist intra–Komunitarju ta’ merkanzija kif imsemmi fl-Artikolu 2(1)(b)(i) għandu jitqies li jinsab fit-territorju ta’ l-Istat Membru li ħareġ in-numru ta’ l-identifikazzjoni tal-VAT li permezz tiegħu l-persuna li qed takkwista l-merkanzija għamlet l-akkwist, sakemm il–persuna li takkwista l-merkanzija tistabbilixxi li ġiet applikata l-VAT għal dak l-akkwist skond l-Artikolu 40.

Jekk tiġi applikata l-VAT għall-akkwist skond l-ewwel paragrafu u sussegwentement applikata, skond l-Artikolu 40, għall-akkwist fl-Istat Membru li fih tispiċċa l-merkanzija mibgħuta jew ittrasportata, l-ammont taxxabbli għandu jitnaqqas skond il-każ fl-Istat Membru li ħareġ in-numru ta’ l-identifikazzjoni tal-VAT li permezz tiegħu l-persuna li tkun akkwistat il-merkanzija tkun għamlet l-akkwist.”

9.

L-Artikolu 138(1) tad-Direttiva dwar il-VAT, fil-verżjoni tiegħu qabel l-adozzjoni tad-Direttiva (UE) 2018/1910 ( 3 ) kien jipprovdi kif ġej:

“L-Istati Membri għandhom jeżentaw il-provvista ta’ merkanzija mibgħuta jew ittrasportata lejn destinazzjoni ’l-barra mit-territroju tagħhom iżda fil-Komunità, jew mill-bejjiegħ jew f’ismu jew il-persuna li tkun qed takkwista l-merkanzija, għal persuna taxxabbli oħra, jew għal persuna legali mhux taxxabbli li tkun qed taġixxi bħala tali fi Stat Membru ieħor li mhux dak minn fejn bdiet tintbagħat jew tkun ittrasportata l-merkanzija.”

10.

L-Artikolu 1(3) tad-Direttiva 2018/1910 jipprevedi:

“L-Artikolu 138 huwa emendat kif:

11.

L-Artikolu 25 tal-ustawa z dnia 11 marca 2004 r. o podatku od towarów i usług (il-Liġi dwar it-Taxxa fuq il-Merkanzija u s-Servizzi tal‑11 ta’ Marzu 2004, iktar ’il quddiem il-“Liġi dwar il-VAT”) jgħid dan li ġej:

“1.   Akkwist intra-Komunitarju ta’ merkanzija għandu jitqies li jkun sar fit-territorju tal-Istat Membru li fih tkun tinsab il-merkanzija meta hija tasal jew meta jintemm it-trasport tagħha.

2.   Bla ħsara għall-paragrafu 1, jekk il-persuna li tkun akkwistat il-merkanzija msemmija fl-Artikolu 9(2), fil-kuntest ta’ akkwist intra-Komunitarju ta’ merkanzija, tkun tat in-numru assenjat lilha mill-Istat Membru kkonċernat għall-finijiet ta’ tranżazzjonijiet intra-Komunitarji għajr l-Istat Membru li fit-territorju tiegħu tkun tinsab il-merkanzija meta hija tasal jew meta jintemm it-trasport tagħha, l-akkwist intra-Komunitarju ta’ merkanzija għandu wkoll jitqies li jkun sar fit-territorju ta’ dan l-Istat Membru, sakemm il-persuna li tkun akkwistat il-merkanzija ma turix li l-akkwist intra-Komunitarju ta’ merkanzija:

12.

B hija kumpannija stabbilita fil-Pajjiżi l-Baxxi u rreġistrata għall-finijiet tal-VAT f’dan l-Istat Membru. Fiż-żmien rilevanti (April 2012), hija kienet irreġistrata wkoll, għall-finijiet tal-VAT, fil-Polonja.

13.

Matul dan il-perjodu, hija aġixxiet bħala intermedjarja f’katina ta’ kunsinni relatati mal-istess merkanzija u li kienet tinvolvi tliet operaturi differenti. B xtrat merkanzija mingħand BOP u mbagħad begħetha mill-ġdid lill-klijenti tagħha stess. Il-merkanzija ntbagħtet direttament mill-fornitur inizjali fil-Polonja (BOP) lill-aħħar operatur fil-katina ta’ kunsinni.

14.

Meta hija akkwistat il-merkanzija mingħand BOP B użat in-numru ta’ identifikazzjoni tal-VAT Pollakk tagħha. B qieset li dawn il-kunsinni kienu kunsinni nazzjonali u, għaldaqstant, applikat għalihom ir-rata tal-VAT ta’ 23 %. Imbagħad, B ikklassifikat il-kunsinni li hija għamlet lill-klijenti tagħha bħala kunsinni intra-Komunitarji ntaxxati b’0 %. Dawn il-klijenti ddikjaraw il-VAT applikabbli għall-akkwist intra-Komunitarju.

15.

Permezz tad-deċiżjoni tiegħu tal‑11 ta’ Ġunju 2015, id-Dyrektor Urządu Kontroli Skarbowej w R. (id-Direttur tal-Uffiċċju tal-Kontroll tat-Taxxa f’R., il-Polonja) (iktar ’il quddiem l-“awtorità tat-taxxa tal-ewwel istanza”) irriklassifika t-tranżazzjoni inkwistjoni wara li kkonkluda li l-kunsinna li lilha kellu jiġi attribwit it-trasport kienet identifikata b’mod żbaljat. Filwaqt li B attribwixxiet it-trasport lit-tieni kunsinna (magħmula minnha lill-klijenti tagħha), l-awtorità tat-taxxa tal-ewwel istanza qieset li t-trasport kellu jiġi attribwit lill-ewwel kunsinna fil-katina, magħmula minn BOP lil B. Għaldaqstant, din l-awtorità qieset li l-ewwel tranżazzjoni kienet tikkonsisti f’kunsinna intra-Komunitarja li kellha tiġi ddikjarata bħala akkwist intra-Komunitarju magħmul minn B fl-Istat Membru ta’ destinazzjoni tal-merkanzija li kien jeżiġi li B tirreġistra ruħha f’dak l-Istat Membru, filwaqt li l-kunsinni ta’ B lill-klijenti tagħha hemmhekk għandhom jiġu ntaxxati bħala tranżazzjonijiet nazzjonali.

16.

Barra minn dan, peress li B użat in-numru ta’ identifikazzjoni tal-VAT Pollakk tagħha, jiġifieri numru tal-VAT mogħti minn Stat Membru li ma kienx l-Istat Membru li fit-territorju tiegħu ntemm it-trasport tal-merkanzija inkwistjoni, l-awtorità tat-taxxa tal-ewwel istanza ddeċidiet, abbażi tal-ewwel punt tal-Artikolu 25(2) tal-Liġi dwar il-VAT, li tittrasponi l-Artikolu 41 tad-Direttiva dwar il-VAT, li B kellha tiddikjara l-VAT fuq l-akkwist intra-Komunitarju (irriklassifikat) tagħha fil-Polonja. Fl-istess waqt, hija kkonfermat li BOP kellha l-obbligu toħroġ fattura bil-VAT bir-rata ta’ 23 % fuq il-kunsinna tagħha lil B ( 4 ) u li B ma kellhiex id-dritt tnaqqas il-VAT tal-input korrispondenti ( 5 ).

17.

Permezz tad-deċiżjoni tiegħu tal‑11 ta’ Settembru 2015, id-Dyrektor Izby Skarbowej w W. (id-Direttur tal-Awla dwar it-Taxxa f’W) essenzjalment ikkonferma dawk konstatazzjonijiet ( 6 ).

18.

B ikkontestat din id-deċiżjoni quddiem id-Wojewódzki Sąd Administracyjny w Warszawie (il-Qorti Amministrattiva Reġjonali ta’ Varsavja, il-Polonja) li ċaħdet ir-rikors tagħha bħala infondat.

19.

Dik il-qorti kienet tal-istess fehma bħall-awtoritajiet tat-taxxa li B kienet ikklassifikat b’mod skorrett iż-żewġ kunsinni inkwistjoni u ddeterminat b’mod żbaljat il-kunsinna li lilha kellu jiġi attribwit it-trasport.

20.

B ippreżentat appell ta’ kassazzjoni quddiem in-Naczelny Sąd Administracyjny (il-Qorti Amministrattiva Suprema), li hija l-qorti tar-rinviju.

21.

B issostni quddiem dik il-qorti li l-Artikolu 25(1) u l-ewwel punt tal-Artikolu 25(2) tal-Liġi dwar il-VAT kienu ġew applikati b’mod żbaljat għas-sitwazzjoni tagħha minħabba li dawn id-dispożizzjonijiet japplikaw biss għal akkwisti intra-Komunitarji u mhux għal sitwazzjonijiet nazzjonali (jiġifieri, kif tispjega B, meta t-trasport ta’ merkanzija jibda fl-Istat Membru li jkun ħareġ in-numru ta’ identifikazzjoni tal-VAT). B issostni wkoll li kien hemm applikazzjoni żbaljata tal-Artikolu 25(2) tal-Liġi dwar il-VAT, kif ukoll tal-Artikolu 41 tad-Direttiva dwar il-VAT, moqri flimkien mal-Artikolu 16 tar-Regolament ta’ Implimentazzjoni (UE) 282/2011 ( 7 ), minħabba li l-Artikolu 25(2) tal-Liġi dwar il-VAT ġie applikat għal tranżazzjoni li kienet diġà ġiet intaxxata bħala tranżazzjoni nazzjonali fil-Polonja. Fl-aħħar nett, B issostni li l-ewwel punt tal-Artikolu 25(2) tal-Liġi dwar il-VAT ġie applikat b’mod żbaljat għas-sitwazzjoni tagħha minħabba li l-kunsinni inkwistjoni kienu ġew intaxxati fl-Istati Membri fejn kien intemm it-trasport (mill-klijenti tagħha stess).

22.

Il-qorti tar-rinviju tinnota li l-VAT tħallset f’kull stadju tal-katina inkwistjoni u li ma hemm xejn li juri li kien hemm frodi. Dik il-qorti tgħid li kienet B li evalwat b’mod żbaljat il-kunsinni inkwistjoni li wassal sabiex il-VAT tkun dovuta minn dan l-operatur fil-Polonja.

23.

Hija tinnota wkoll li l-awtoritajiet tat-taxxa Pollakki ma għandhomx il-kompetenza sabiex jivverifikaw il-katina kollha ta’ kunsinni inkwistjoni, li jfisser li l-VAT imħallsa mill-klijenti ta’ B fl-Istat Membru tad-destinazzjoni tal-merkanzija ma tistax tittieħed inkunsiderazzjoni. Fil-fehma tal-qorti tar-rinviju, dan iwassal għal piż fiskali sproporzjonat għal B.

24.

F’dawn iċ-ċirkustanzi, in-Naczelny Sąd Administracyjny (il-Qorti Amministrattiva Suprema) iddeċidiet li tissospendi l-proċeduri u tagħmel lill-Qorti tal-Ġustizzja d-domanda preliminari li ġejja:

“L-Artikolu 41 [tad-Direttiva dwar il-VAT] kif ukoll il-prinċipju ta’ proporzjonalità u ta’ newtralità jipprekludu l-applikazzjoni, f’sitwazzjoni bħal dik inkwistjoni fil-kawża prinċipali, ta’ dispożizzjoni nazzjonali bħall-Artikolu 25(2) [tal-Liġi dwar il-VAT] għal tranżazzjonijiet ta’ akkwist intra-Komunitarju mwettqa mill-persuna taxxabbli

25.

Osservazzjonijiet bil-miktub f’din il-kawża ġew ippreżentati minn B, mid-Dyrektor Izby Skarbowej w W., mill-Gvern Pollakk, kif ukoll mill-Kummissjoni Ewropea. Dawn il-partijiet għamlu wkoll sottomissjonijiet orali fis-seduta tas‑27 ta’ Jannar 2022.

26.

L-applikazzjoni tal-Artikolu 41 tad-Direttiva dwar il-VAT teżiġi, inter alia, akkwist intra-Komunitarju ta’ merkanzija. Il-punt dwar jekk kunsinna speċifika f’katina (bħall-ewwel kunsinna inkwistjoni fil-kawża prinċipali) tistax tiġi kklassifikata bħala tali jiddependi mill-“attribuzzjoni tat-trasport”. Minħabba li l-partijiet ippreżentaw fehmiet differenti dwar kif din il-kwistjoni għandha tiġi evalwata, ser nibda dawn il-konklużjonijiet billi nagħmel osservazzjonijiet preliminari preċiżament fuq dan l-aspett (A). Sussegwentement ser nindirizza l-kwistjoni fil-qalba ta’ din il-kawża billi ngħaddi għar-ratio legis tal-Artikolu 41 tad-Direttiva dwar il-VAT (B) u billi neżamina l-applikazzjoni tiegħu għall-kawża prinċipali (C).

27.

Ninnota li fl-eżami tat-trattament fiskali tal-kunsinni ta’ merkanzija li jkunu jagħmlu parti minn katina, huwa tal-ikbar importanza li tiġi stabbilita l-parti eżatta f’dik il-katina li lilha għandu jiġi attribwit it-trasport li jseħħ f’dak il-kuntest. Din l-attribuzzjoni tiddetermina l-parti tal-kunsinni li għandha tiġi kklassifikata bħala kunsinna intra-Komunitarja u, li l-Istati Membri għandhom għalhekk jeżentawha mill-VAT, kif jipprovdi l-Artikolu 138(1) tad-Direttiva dwar il-VAT.

28.

Din id-dispożizzjoni, fil-verżjoni applikabbli tagħha għall-fatti fil-kawża prinċipali, kienet tipprovdi li “[l]-Istati Membri għandhom jeżentaw il-provvista ta’ merkanzija mibgħuta jew ittrasportata lejn destinazzjoni ’l barra mit-territroju tagħhom iżda fil-Komunità, jew mill-bejjiegħ jew f’ismu jew il-persuna li tkun qed takkwista l-merkanzija, għal persuna taxxabbli oħra, jew għal persuna legali mhux taxxabbli li tkun qed taġixxi bħala tali fi Stat Membru ieħor li mhux dak minn fejn bdiet tinbagħat jew tkun ittrasportata l-merkanzija.” ( 8 )

29.

Meta Qorti tal-Ġustizzja interpretat dik id-dispożizzjoni, hija ddeċidiet li, fil-kuntest ta’ katina ta’ kunsinni suċċessivi, li tagħti lok għal trasport intra-Komunitarju wieħed, it-trasport “jista’ biss ikun marbut ma’ waħda miż-żewġ kunsinni, li tkun, għaldaqstant, l-unika waħda eżentata […]” ( 9 ).

30.

Il-Qorti tal-Ġustizzja ddeċidiet li l-kwistjoni dwar liema hija, fil-katina, il-kunsinna li lilha għandu jiġi attribwit it-trasport għandha tingħata risposta abbażi ta’ evalwazzjoni globali taċ-ċirkustanzi tal-każ individwali ( 10 ). F’dan il-kuntest il-Qorti tal-Ġustizzja saħqet dwar l-importanza li jiġi ddeterminat il-mument li fih seħħ it-trasferiment tad-dritt li wieħed jiddisponi minn oġġett bħala proprjetarju ( 11 ).

31.

F’dan il-każ, B u d-Dyrektor Izby Skarbowej w W. adottaw pożizzjonijiet differenti dwar il-kwistjoni tal-attribuzzjoni tat-trasport li bih il-merkanzija ntbagħtet mingħand l-ewwel operatur fil-katina (BOP) lejn l-aħħar wieħed (il-klijenti ta’ B). Filwaqt li B qieset li dan it-trasport kellu jiġi attribwit lit-tieni kunsinna fil-katina, jiġifieri lill-kunsinni tagħha lill-klijenti proprji tagħha, id-Dyrektor Izby Skarbowej w W. qies li t-trasport kellu jkun attribwit lill-ewwel kunsinna (magħmula minn BOP lil B). Din id-differenza fil-perspettiva ġiet, għaldaqstant, riflessa fl-evalwazzjonijiet rispettivi tagħhom tal-kunsinni li jikkostitwixxu kunsinna intra-Komunitarja. Din id-diverġenza, min-naħa tagħha, affettwat il-fehmiet tagħhom dwar it-trattatament fiskali ta’ kull waħda mill-kunsinni inkwistjoni.

32.

F’din il-proċedura, B tistrieħ b’mod iktar speċifiku fuq l-Artikolu 36a tad-Direttiva dwar il-VAT insostenn tal-pożizzjoni tagħha li l-attribuzzjoni tat-trasport hija konformi mat-tieni paragrafu ta’ din id-dispożizzjoni.

33.

Nosserva li l-Artikolu 36a tad-Direttiva dwar il-VAT tabilħaqq jiċċara l-kwistjoni tal-attribuzzjoni tat-trasport f’katina ta’ kunsinni billi jipprovdi, fit-tieni paragrafu tiegħu, li “it-tluq jew it-trasport għandu jiġi attribwit biss għall-kunsinna ta’ merkanzija mill-operatur intermedjarju meta l-operatur intermedjarju [bħal B f’dan il-każ] [i]kun ikkomunika lill-fornitur tiegħu n-numru ta’ identifikazzjoni tal-VAT li jkun inħariġlu mill-Istat Membru li minnu tintbagħat jew tiġi ttrasportata l-merkanzija”. Għalhekk, kieku kienet applikabbli għal dan il-każ, din id-dispożizzjoni tkun tikkonferma l-pożizzjoni ta’ B. Madankollu, fil-fehma tiegħi, B ma tistax tistrieħ fuqha, f’dan il-każ, minħabba li din id-dispożizzjoni ddaħħlet fid-Direttiva dwar il-VAT bid-Direttiva 2018/1910 ( 12 ), jiġifieri diversi snin wara li kienet seħħet it-tranżazzjoni inkwistjoni. Bħala tali, dan l-artikolu mhux applikabbli għal dan il-każ ratione temporis. Barra minn hekk, ma nara xejn, kemm jekk huwa fil-formulazzjoni tad-Direttiva 2018/1910 jew fl-istorja leġiżlattiva tagħha, li jsostni dak li tgħid B li l-kontenut tat-tieni paragrafu tal-Artikolu 36a tad-Direttiva dwar il-VAT jirrifletti l-ġurisprudenza li diġà kienet teżisti tal-Qorti tal-Ġustizzja.

34.

Mill-proposta tal-Kummissjoni li kienet wasslet għall-adozzjoni tad-Direttiva 2018/1910 joħroġ li din id-dispożizzjoni tirriżulta għaliex l-Istati Membri kienu “talbu għal titjib leġiżlattiv sabiex tiżdied iċ-ċertezza tad-dritt għall-operaturi b’rabta mad-determinazzjoni tal-provvista fi ħdan il-katina ta’ tranżazzjonijiet li għalihom għandu jiġi attribwit it-trasport intra-Komunitarju.” ( 13 ) Xogħol preparatorju ieħor ukoll juri l-intenzjoni tal-leġiżlatur Ewropew li “jiġu evitati approċċi differenti bejn l-Istati Membri, li jistgħu jwasslu għal tassazzjoni doppja jew għal nontassazzjoni, u sabiex tissaħħaħ iċ-ċertezza legali għall-operaturi” ( 14 ). Dan it-tħassib illum huwa espress fil-premessa 6 tad-Direttiva 2018/1910.

35.

Dawn l-elementi jikkonfermaw, fil-fehma tiegħi, li l-attribuzzjoni tat-trasport fil-kawża prinċipali għandha tiġi evalwata fid-dawl tal-ġurisprudenza msemmija fil-punt 30 iktar ’il fuq, li tirrifletti s-sitwazzjoni qabel ma ġiet adottata din id-direttiva. Din il-konklużjoni hija kkorroborata min-Nota ta’ Spjegazzjoni dwar l-hekk imsejħa “Soluzzjonijiet ta’ malajr” li tgħid li “id-Direttiva dwar il-VAT, fil-formulazzjoni tagħha qabel l‑1 ta’ Jannar 2020, ma kinitx tipprovdi għal ebda regola konkreta għall-attribuzzjoni tat-trasport intra-Komunitarju tal-merkanzija” li, għalhekk kellha ssir skont “evalwazzjoni globali taċ-ċirkustanzi speċifiċi kollha […] f’kull każ partikolari” ( 15 )

36.

Wara li għamilt dawn il-kjarifiki, infakkar li hija l-qorti tar-rinviju, li għandha s-setgħa esklużiva sabiex tistabbilixxi u tevalwa l-fatti tat-tilwima fil-kawża prinċipali ( 16 ), li għandha tiddetermina l-attribuzzjoni tat-trasport fil-katina ta’ kunsinni inkwistjoni ( 17 ). L-analiżi segwenti hija, għalhekk, rilevanti biss jekk il-qorti tar-rinviju kellha tikkonferma li t-trasport għandu jiġi attribwit lill-ewwel kunsinna inkwistjoni.

37.

Akkwist intra-Komunitarju ta’ merkanzija għandu jiġi ntaxxat, b’mod ġenerali, fl-Istati Membri fejn it-trasport tal-merkanzija jintemm. Dan huwa previst fl-Artikolu 40 tad-Direttiva dwar il-VAT u jirrifletti r-regola ewlenija tar-reġim attwali tas-sistema komuni tal-VAT li jagħti l-awtorità ta’ tassazzjoni lill-Istat li fih iseħħ il-konsum finali tal-merkanzija kkunsinjata ( 18 ).

38.

B’deroga (iżda bla ħsara għal din ir-regola ewlenija msemmija l-aħħar), l-Artikolu 41 tad-Direttiva dwar il-VAT jiddetermina l-post ta’ akkwist intra-Komunitarju ta’ merkanzija (u, għalhekk, il-post ta’ tassazzjoni) bħala wkoll, fi kliem sempliċi, l-Istat Membru li jkun ħareġ in-numru ta’ identifikazzjoni tal-VAT li permezz tiegħu l-persuna li takkwista l-merkanzija tkun aġixxiet, ħlief meta l-VAT tkun ġiet applikata fil-post fejn jintemm it-trasport tal-merkanzija.

39.

Kif il-Qorti tal-Ġustizzja ddeċidiet, l-Artikolu 41 tad-Direttiva dwar il-VAT “huwa intiż, minn naħa, li jiggarantixxi l-issuġġettar [għat-taxxa] tal-akkwist intra-Komunitarju inkwistjoni u, min-naħa l-oħra, li jevita t-taxxa doppja għall-istess akkwist’ ( 19 ).

40.

L-għan li jiġi evitat telf ta’ taxxa jirrifletti l-inċertezza tal-Istat Membru li fih effettivament jintemmu l-ispedizzjoni jew it-trasport ( 20 ). Akkwist intra-Komunitarju ta’ merkanzija jiġi wara kunsinna intra-Komunitarja ta’ merkanzija li, bħala prinċipju, għandha tiġi eżentata skont l-Artikolu 138(1) tad-Direttiva dwar il-VAT ( 21 ). Għalhekk, biex jiġi evitat telf ta’ taxxa, huwa importanti li jiġi żgurat li l-istess operazzjoni tiġi suġġetta għat-taxxa mill-persuna li tagħmel l-akkwist.

41.

Huwa minnu li, biex jinkiseb dan l-għan, l-Artikolu 41 tad-Direttiva dwar il-VAT joħloq il-possibbiltà għal tassazzjoni doppja minħabba li jistabbilixxi żewġ postijiet ta’ akkwist tal-merkanzija, wieħed fl-Istat Membru li joħroġ in-numru ta’ identifikazzjoni tal-VAT, li huwa l-post fittizzju ta’ akkwist, u l-ieħor fl-Istat Membru fejn jintemm it-trasport tal-merkanzija (li huwa l-post reali ta’ akkwist).

42.

Madankollu, tali tassazzjoni doppja għandha biss tkun temporanja minħabba li t-tieni paragrafu tal-Artikolu 41 tad-Direttiva dwar il-VAT jipprovdi għal mekkaniżmu korrettiv li bih l-operatur ikkonċernat ikun jista’ juri li t-tranżazzjoni ġiet intaxxata skont l-Artikolu 40 tad-Direttiva dwar il-VAT, jiġifieri, fl-Istat Membru li fih jintemm it-trasport. F’din is-sitwazzjoni, “l-ammont taxxabbli għandu jitnaqqas skond il-każ fl-Istat Membru li ħareġ in–numru ta’ l-identifikazzjoni tal-VAT li permezz tiegħu l-persuna li tkun akkwistat il-merkanzija tkun għamlet l-akkwist.”

43.

Billi jagħmel possibbli l-użu ta’ dan il-mekkaniżmu korrettiv, l-Artikolu 41 tad-Direttiva dwar il-VAT, għalhekk, għandu l-għan li tiġi evitata tassazzjoni doppja ( 22 ). Huwa jerġa’ espressjoni oħra tal-għan li d-dħul mit-taxxa jiġi ttrasferit lill-Istat Membru fejn iseħħ il-konsum finali tal-merkanzija. ( 23 )

44.

Il-kwistjoni dwar l-applikabbiltà tal-Artikolu 41 tad-Direttiva dwar il-VAT għall-kawża prinċipali ġiet indirizzata, f’din il-kawża, minn aspetti differenti. Biex nieħu inkunsiderazzjoni dawn l-aspetti differenti, l-ewwel ser neżamina l-argument ta’ B li skontu l-Artikolu 41 tad-Direttiva dwar il-VAT qatt ma jista’ jiġi applikat minħabba li B għamlet l-akkwist permezz tan-numru ta’ identifikazzjoni tal-VAT Pollakk, jiġifieri permezz ta’ numru ta’ identifikazzjoni tal-VAT tal-Istat Membru minn fejn kienet oriġinat il-merkanzija (1).

45.

Peress li ser nikkonkludi li dan il-fatt imsemmi l-aħħar ma kienx jipprekludi l-applikazzjoni tal-Artikolu 41 tad-Direttiva dwar il-VAT fiż-żmien tal-fatti, imbagħad ser ngħaddi għad-domanda tal-qorti tar-rinviju dwar ir-rilevanza tal-fatt li l-klijenti ta’ B kienu ħallsu t-taxxa fuq it-tieni operazzjoni fil-katina inkwistjoni (2).

46.

F’dan ir-rigward, ser nikkonkludi wkoll li dan il-fatt imsemmi l-aħħar ma jaffettwax l-applikazzjoni tal-Artikolu 41 tad-Direttiva dwar il-VAT. F’dak l-istadju, ser immur lil hinn mid-domanda kif magħmula espressament u ser neżamina l-fatt li l-awtoritajiet nazzjonali ttrattaw l-ewwel kunsinna fil-katina inkwistjoni wara li din kienet ġiet irriklassifikata bħala kunsinna intra-Komunitarja mhux eżentata. Fid-dawl ta’ din iċ-ċirkustanza speċifika, nikkonkludi li l-applikazzjoni tar-regoli nazzjonali li jittrasponu l-Artikolu 41 tad-Direttiva dwar il-VAT toħloq piż fiskali sproporzjonat u hija eskluża (3).

47.

B issostni li l-Artikolu 41 tad-Direttiva dwar il-VAT ma jistax japplika fil-kawża prinċipali minħabba li fil-mument li fih B akkwistat il-merkanzija mingħand BOP, hija użat in-numru ta’ identifikazzjoni tal-VAT Pollakk tagħha, numru maħruġ mill-Istat Membru ta’ oriġini tal-merkanzija. Skont B, tali sitwazzjoni tammonta għal kunsinna nazzjonali li għaliha ma jistax japplika l-Artikolu 41 tad-Direttiva dwar il-VAT.

48.

Nammetti li l-fatti ta’ din il-kawża ma jirriflettux każ tipiku li wieħed jaħseb fih f’diskussjoni dwar l-Artikolu 41 tad-Direttiva dwar il-VAT. Fil-fatt, tali każ jikkonċerna tliet Stati Membri, pereżempju, b’persuna taxxabbli stabbilita fl-Olanda li takkwista, permezz tan-numru ta’ identifikazzjoni tal-VAT Olandiż tagħha, merkanzija fil-Polonja intiża sabiex tiġi kkunsinjata fil-Ġermanja ( 24 ). F’din is-sitwazzjoni, l-awtoritajiet Olandiżi jaġixxu abbażi tal-finzjoni tal-Artikolu 41 tad-Direttiva dwar il-VAT sabiex “jiggaranixxu” l-ġbir tat-taxxa, sakemm u sa meta t-taxxa ma titħallasx effettivament fl-Istat Membru tad-destinazzjoni finali tal-merkanzija (il-Ġermanja fl-eżempju mogħti).

49.

Minkejja dan, ma nara xejn fil-formulazzjoni tal-Artikolu 41 tad-Direttiva dwar il-VAT, u lanqas fil-kuntest jew fl-għan tagħha ( 25 ) li jillimita l-applikazzjoni ta’ din id-dispożizzjoni għall-każ li jinvolvi t-tliet Stati Membri u li, f’kull każ, isostni l-pożizzjoni adottata minn B, eżaminata fir-rigward tad-dispożizzjonijiet tad-Direttiva dwar il-VAT applikabbli fiż-żmien tal-fatti.

50.

Dwar, fl-ewwel lok, il-formulazzjoni, mill-Artikolu 41 tad-Direttiva dwar il-VAT jirriżulta li l-awtoritajiet tal-Istat Membru li ħareġ in-numru ta’ identifikazzjoni tal-VAT jistgħu jeżerċitaw is-setgħat tagħhom mogħtija minn din id-dispożizzjoni, meta jkun hemm akkwist intra-Komunitarju ta’ merkanzija u meta l-kummerċjant ikun aġixxa bin-numru ta’ identifikazzjoni tal-VAT maħruġ minn dan l-Istat Membru. Dawn il-kundizzjonijiet donnhom li huma ssodisfatti fil-kawża prinċipali. Għall-kuntrarju, il-formulazzjoni ta’ din il-dispożizzjoni ma tagħmel l-applikazzjoni tagħha tiddependi minn ebda identifikazzjoni tal-VAT speċifika ( 26 ).

51.

Fit-tieni lok, jekk inħarsu lejn il-kuntest normattiv usa’, B issostni li għandu jitqies l-Artikolu 20 tad-Direttiva dwar il-VAT li minnu jsegwi, skont din il-parti, li biex ikun hemm akkwist intra-Komunitarju ta’ merkanzija l-kummerċjant għandu jkun aġixxa bin-numru ta’ identifikazzjoni tal-VAT maħruġ minn Stat Membru li ma jkunx l-Istat Membru ta’ oriġini tal-merkanzija.

52.

L-Artikolu 20 tad-Direttiva dwar il-VAT jiddefinixxi l-kunċett ta’ “akkwist intra-Komunitarju ta’ merkanzija” u jgħid li huwa “l-akkwist tad-dritt li tiddisponi bħala sid ta’ proprjetà tanġibbli mobbli, mibgħuta jew ittrasportata għand il-persuna li qed takkwista l-merkanzija, mill-bejjiegħ jew f’ismu jew il-persuna li qed takkwista l-merkanzija, fi Stat Membru minbarra dak li minnu ntbagħtet jew kienet ittrasportata l-merkanzija.”

53.

B spjegat fis-seduta, essenzjalment, li l-Artikolu 41 tad-Direttiva dwar il-VAT ma jistax iwessa’ l-kunċett ta’ “akkwist intra-Komunitarju” kif iddefinit fl-Artikolu 20 tal-istess direttiva. Fil-fehma ta’ B, l-Artikolu 41 tad-Direttiva dwar il-VAT sempliċiment jistabbilixxi mekkaniżmu speċjali għat-tassazzjoni ta’ akkwisti intra-Komunitarji. Skont B, il-kunċett tal-akkwist intra-Komunitarju jitlob li l-Istati Membri minn fejn tkun telqet il-merkanzija u l-Istati Membri tad-destinazzjoni tagħha jkunu differenti. Madankollu, skont B, f’dan il-każ l-awtoritajiet Pollakki ntaxxaw l-akkwist intra-Komunitarju ta’ merkanzija fl-Istat Membru ta’ oriġini tagħha minkejja li din il-merkanzija kienet ġiet ittrasportata minn dan l-istess stat. F’tali sitwazzjoni, skont B, l-operazzjoni għandha tiġi intaxxat bħala operazzjoni nazzjonali.

54.

Bil-kontra tal-argumenti ta’ B, ma narax kif, skont ir-regoli tad-Direttiva dwar il-VAT applikabbli ratione temporis għall-kawża prinċipali, id-definizzjoni mogħtija fl-Artikolu 20 tad-Direttiva dwar il-VAT tagħmel id-determinazzjoni tan-natura intra-Komunitarja jew le dipendenti fuq l-użu ta’ numru ta’ identifikazzjoni tal-VAT speċifiku.

55.

Qabel l-adozzjoni tad-Direttiva 2018/1910 ( 27 ), il-Qorti tal-Ġustizzja bbażat ruħha fuq il-formulazzjoni tal-Artikoli 20 u 138(1) (fil-verżjoni tagħhom fis-seħħ dak iż-żmien) tad-Direttiva dwar il-VAT biex tiddeċiedi li “[i]l-post ta’ identifikazzjoni tal-VAT ta’ operatur ma huwiex kriterju ta’ klassifikazzjoni ta’ kunsinna intra-Komunitarja jew ta’ akkwist intra-Komunitarju” ( 28 ).

56.

Tabilħaqq, il-kunċett ta’ akkwist intra-Komunitarju ddefinit fl-Artikolu 20 tad-Direttiva dwar il-VAT huwa marbut mal-kunċett ta’ kunsinna intra-Komunitarja fl-Artikolu 138(1) tal-istess direttiva minħabba li, bħala prinċipju, jista’ jkun hemm akkwist intra-Komunitarju biss meta qabel ikun hemm kunsinna intra-Komunitarja ( 29 ). Minħabba li l-applikabbiltà tal-Artikolu 41 tad-Direttiva dwar il-VAT titlob li jkun hemm akkwist intra-Komunitarju, peress li jirriżulta mill-formulazzjoni tagħha li din id-dispożizzjoni hija min-naħa tagħha marbuta maż-żewġ Artikoli 20 u 138(1) tad-Direttiva dwar il-VAT. ( 30 )

57.

Ninnota li l-ġurisprudenza tal-Qorti tal-Ġustizzja msemmija fil-punt 55 ta’ dawn il-konklużjonijiet għandha llum tinqara fid-dawl ta’ emendi sussegwenti magħmula fil-formulazzjoni tal-Artikolu 138(1) tad-Direttiva dwar il-VAT. Din id-dispożizzjoni tiddefinixxi l-kundizzjonijiet sostantivi li għandhom jiġu ssodisfatti sabiex kunsinna intra-Komunitarja tiġi eżentata. B’mod iktar speċifiku u sakemm ġiet adottata d-Direttiva 2018/1910 ( 31 ), l-obbligu ta’ eżenzjoni seħħ “meta d-dritt li wieħed jiddisponi minn dak l-oġġett bħala proprjetarju jkun ġie ttrasferit lix-xerrej, meta l-fornitur jistabbilixxi li dan l-oġġett ikun intbagħat jew ġie ttrasportat fi Stat Membru ieħor u meta, wara li tkun intbagħat jew ġie ttrasportat, l-istess oġġett ikun telaq fiżikament mit-territorju tal-Istat Membru li minnu jkun ġie kkunsinnat” ( 32 ). Meta adotta d-Direttiva 2018/1910, il-leġiżlatur tal-Unjoni żied kundizzjoni ġdida li skontha “il-persuna taxxabbli jew il-persuna ġuridika mhux taxxabbli li lilha ssir il-provvista [għandha tkun] identifikata għall-finijiet tal-VAT fi Stat Membru li ma jkunx dak li minnu tkun bdiet tintbagħat jew tkun bdiet tiġi ttrasportata l-merkanzija u tkun indikat dan in-numru ta’ identifikazzjoni tal-VAT lill-fornitur” kif issa jipprovdi l-Artikolu 138(1)(b) tad-Direttiva dwar il-VAT.

58.

Minn dan isegwi li l-fatt li l-akkwirent juża numru ta’ identifikazzjoni tal-VAT, mogħti minn Stat Membru li ma jkunx dak tat-tluq tal-ispedizzjoni jew tat-trasport tal-merkanzija, sar kundizzjoni sostantiva addizzjonali biex tiġi eżentata kunsinna ta’ merkanzja intra-Komunitarja ( 33 ).

59.

Dan, fil-fehma tiegħi, għandu konsegwenza fuq l-interpretazzjoni tal-Artikolu 20 tad-Direttiva dwar il-VAT fil-verżjoni preżenti tagħha minħabba li, kif ġie nnotat fil-punt 40 ta’ dawn il-konklużjonijiet, akkwist intra-Komunitarju loġikament jiġi wara kunsinna intra-Komunitarja. Fi kliem ieħor, dak tal-ewwel ma jistax iseħħ jekk ma jkunx hemm din tal-aħħar minħabba li kunsinna intra-Komunitarja u akkwist intra-Komunitarju huma essenzjalment iż-żewġt uċuħ tal-istess munita. Min-naħa tagħha, il-bidla tal-kundizzjonijiet sostantivi għall-eżenzjoni ta’ kunsinni intra-Komunitarji skont l-Artikolu 138(1) tad-Direttiva dwar il-VAT taffettwa wkoll, fil-preżent, il-kamp ta’ applikazzjoni tal-Artikolu 41 tad-Direttiva dwar il-VAT minħabba li kif intqal, u kif B issostni, bħala prinċipju ġustament, biex japplika l-Artikolu 41 tad-Direttiva dwar il-VAT għandu jkun hemm akkwist intra-Komunitarju fis-sens tal-Artikolu 20 tad-Direttiva dwar il-VAT.

60.

Madankollu, il-bidla importanti fil-formulazzjoni tal-Artikolu 138(1) tad-Direttiva dwar il-VAT li tibdel in-numru ta’ identifikazzjoni tal-VAT minn rekwiżit formali għal wieħed sostantiv saret mil-leġiżlatur tal-Unjoni bl-adozzjoni tad-Direttiva 2018/1910 ( 34 ), filwaqt li dan il-każ għadu jaqa’ taħt ir-reġim preċedenti li skontu n-numru ta’ identifikazzjoni tal-VAT kien jitqies mhux bħala rekwiżit sostantiv iżda bħala rekwiżit formali ( 35 ). Għalhekk, kif diġà nnotajt, il-fatt li B użat in-numru ta’ identifikazzjoni tal-VAT tal-Istat Membru ta’ oriġini tal-merkanzija, minnu nnifsu, ma jeskludix in-natura intra-Komunitarja tat-tranżazzjoni u l-applikabbiltà tal-Artikolu 41 tad-Direttiva dwar il-VAT għall-fatti tal-kawża prinċipali.

61.

Wara li għidt dan, issa ser neżamina jekk iż-żewġ għanijiet segwiti permezz tal-Artikolu 41 tad-Direttiva dwar il-VAT, jiġifieri l-prevenzjoni tal-evażjoni tat-taxxa u t-tassazzjoni doppja, isostnux l-interpretazzjoni ta’ din id-dispożizzjoni li jiena qiegħed nipproponi.

62.

F’dan ir-rigward, ninnota li dawn iż-żewġ għanijiet jistgħu jkunu segwiti b’mod effettiv mill-awtoritajiet tal-Istat Membru ta’ oriġini tal-merkanzija meta dan tal-aħħar ikun ukoll l-Istat Membru li ħareġ in-numru ta’ identifikazzjoni tal-VAT użat għat-tranżazzjoni kkonċernata.

63.

Il-Qorti tal-Ġustizzja ddeċidiet li “l-għoti ta’ tali numru jipproduċi prova tal-istatus fiskali tal-persuna taxxabbli għall-finijiet tal-applikazzjoni tal-VAT u jiffaċilita l-verifiki fiskali tat-tranżazzjonijiet intra‑Komunitarji” ( 36 ). Ma hemmx raġuni sabiex wieħed jiddubita li n-numru ta’ identifikazzjoni tal-VAT jista’ jagħmel dan u jiffaċilita l-verifika fiskali meta din il-verifika ssir mill-awtoritajiet tal-Istat Membru ta’ oriġini tal-merkanzija u meta huma jaġixxu skont l-Artikolu 41 tad-Direttiva dwar il-VAT.

64.

Biex nispjega, l-Istat Membru ta’ oriġini tal-merkanzija, bħall-Polonja f’dan il-każ, ikun qiegħed jaġixxi bħala l-post meqjus bħala dak tal-akkwist intra-Komunitarju inkwistjoni, abbażi tal-finzjoni stabbilita bl-Artikolu 41 tad-Direttiva dwar il-VAT, b’tali mod li jiġi ggarantit il-ġbir tat-taxxa u l-prevenzjoni tal-evażjoni tat-taxxa. Dan l-istess Stat Membru jkun ukoll jista’ jiggarantixxi li tiġi evitata tassazzjoni doppja bl-applikazzjoni tal-mekkaniżmu korrettiv, jekk il-kummerċjant ikkonċernat iġib prova tal-ħlas fl-Istat Membru tad-destinazzjoni finali tal-merkanzija.

65.

Fi kliem ieħor, il-funzjoni li l-Istat Membru li ħareġ in-numru ta’ identifikazzjoni tal-VAT jaqdi meta jaġixxi abbażi tal-finzjoni tal-Artikolu 41 tad-Direttiva dwar il-VAT bl-ebda ma tkun imfixkla meta dan l-Istat Membru jkun ukoll il-pajjiż ta’ oriġini tal-merkanzija.

66.

Fid-dawl ta’ dawn il-kunsiderazzjonijiet, jiena tal-fehma li l-fatt li operatur intermedjarju f’katina ta’ kunsinni, bħal B, li jaġixxi matul perjodu li għalih id-Direttiva 2018/1910 ma tapplikax ratione temporis, ikun uża numru ta’ identifikazzjoni tal-VAT tal-Istat Membru ta’ oriġini tal-merkanzija, ma jaffettwax l-applikabbiltà tal-Artikolu 41 tad-Direttiva dwar il-VAT għall-akkwist magħmul minn dan l-operatur.

67.

Ma huwiex ikkontestat li, f’dan il-każ, il-VAT ġiet applikata f’kull stadju fil-katina speċifika, inkluż mill-klijenti ta’ B fuq l-akkwist ta’ merkanzija fl-Istat Membru ta’ destinazzjoni.

68.

Il-qorti tar-rinviju tisħaq fuq dan l-aħħar fatt u tistaqsi, essenzjalment, jekk dak il-fatt speċifiku jżommx lill-awtoritajiet nazzjonali milli jeżiġu li B tħallas il-VAT fuq l-akkwist intra-Komunitarju ta’ merkanzija rriklassifikat, b’applikazzjoni tad-dispożizzjoni nazzjonali li tittrasponi l-Artikolu 41 tad-Direttiva dwar il-VAT. Din id-domanda hija bbażata fuq il-premessa li ma kienx hemm frodi u li l-kummerċjant li aġixxa bħala l-operatur intermedjarju fil-katina (hawnhekk, B) wettaq żball fil-klassifikazzjoni tal-kunsinni rispettivi tat-tranżazzjoni inkwistjoni.

69.

Nifhem li l-qorti tar-rinviju hija tal-fehma li B kienet esposta għal piż fiskali sproporzjonat minħabba li, minn naħa, il-klijenti ta’ B applikaw il-VAT fl-Istat Membru ta’ destinazzjoni finali tal-merkanzija (fuq dak li x’aktarx tqies bħala akkwist intra-Komunitarju) u, min-naħa l-oħra, l-awtoritajiet tat-taxxa Pollakki talbu lil B tħallas il-VAT fuq l-ewwel kunsinna magħmula lil B minn BOP wara li din il-kunsinna ġiet irriklassifikata bħala intra-Komunitarja u suġġetta għad-dispożizzjonijiet nazzjonali li jittrasponu l-Artikolu 41 tad-Direttiva dwar il-VAT.

70.

Il-Kummissjoni, bħala prinċipju, tagħmel l-istess osservazzjoni.

71.

Madankollu, ma nqisx li l-fatt li l-klijenti ta’ B intaxxaw l-akkwist ta’ merkanzija fl-Istat Membru ta’ destinazzjoni jaqdi xi funzjoni fl-evalwazzjoni tal-applikabbiltà tal-Artikolu 41 tad-Direttiva dwar il-VAT.

72.

Din il-konklużjoni tirriżulta mis-sempliċi fatt li t-taxxa applikata mill-klijenti ta’ B tirrigwarda l-akkwist minnhom ta’ merkanzija li ġiet ikkunsinjata lilhom minn B, filwaqt li l-proċedura fil-kawża prinċipali hija dwar l-applikabbiltà tal-Artikolu 41 tad-Direttiva dwar il-VAT għall-akkwist magħmul minn B tal-merkanzija li ġiet ikkunsinjata lilha minn BOP. Fi kliem ieħor, it-taxxa applikata mill-klijenti ta’ B hija taxxa applikata għat-tieni kunsinna fil-katina inkwistjoni, filwaqt li l-proċedura fil-kawża prinċipali tirrigwarda t-tassazzjoni tal-ewwel kunsinna fl-istess katina. Dawn huma żewġ operazzjonijiet differenti u, bħala tali, l-obbligu tat-taxxa relatat magħhom iqiegħed piż fuq operaturi differenti.

73.

Għalhekk, jiena tal-fehma li B ma setgħetx tistrieħ fuq l-applikazzjoni tal-VAT mill-klijenti tagħha quddiem l-awtoritajiet Pollakki skont il-mekkaniżmu korrettiv (jekk tiġi kkonfermata l-applikazzjoni tal-Artikolu 41 tad-Direttiva dwar il-VAT). Fil-fehma tiegħi, l-ewwel nett, il-formulazzjoni ta’ din id-dispożizzjoni teskludi din l-eventwalità minħabba li l-possibbiltà li tiġi applikata l-VAT fl-Istat Membru ta’ identifikazzjoni tal-VAT tgħib meta “il-persuna li takkwista l-merkanzija tistabbilixxi li ġiet applikata l-VAT għal dak l-akkwist [fl-Istat Membru ta’ destinazzjoni tal-merkanzija]” ( 37 ). Il-frażi “dak l-akkwist’ tirreferi loġikament, fil-fehma tiegħi u kif isostni essenzjalment il-Gvern Pollakk, għall-akkwist intra-Komunitarju magħmul mill-“persuna li takkwista l-merkanzija” u li x’aktarx, għalhekk, tkun responsabbli għall-ħlas tal-VAT skont l-Artikolu 41 tad-Direttiva dwar il-VAT.

74.

It-tieni, it-teħid inkunsiderazzjoni tal-applikazzjoni tal-VAT mill-klijenti ta’ B biex jiġi attenwat il-piż fiskali fuq B nnifisha ma jistax jikkontribwixxi għal ebda wieħed miż-żewġ għanijiet segwiti permezz tal-Artikolu 41 tad-Direttiva dwar il-VAT.

75.

F’dan ir-rigward, huwa ma jiżgurax il-ġbir effettiv tat-taxxa minħabba li, essenzjalment, ebda taxxa ma tkun tista’ tinġabar f’dawn il-kundizzjonijiet fuq akkwist intra-Komunitarju speċifiku abbażi tal-finzjoni stabbilita fl-Artikolu 41 tad-Direttiva dwar il-VAT. A fortiori, ma jkunx jista’ jiġi invokat il-mekkaniżmu korrettiv użat f’dawn iċ-ċirkustanzi biex tiġi evitata tassazzjoni doppja minħabba li, fis-sitwazzjoni inkunsiderazzjoni, B ma tiġix intaxxata fl-Istat Membru ta’ destinazzjoni tal-merkanzija u, bħala prinċipju, ikun hemm rimbors tat-taxxa lil kummerċjant li, f’tali sitwazzjoni, ma jkun ħallas ebda taxxa fl-Istat Membru ta’ destinazzjoni.

76.

Fid-dawl tal-kunsiderazzjonijiet preċedenti, nikkonkludi li l-Artikolu 41 tad-Direttiva dwar il-VAT u l-prinċipji ta’ newtralità u ta’ proporzjonalità ma jipprekludux l-applikazzjoni tal-Artikolu 25(2) tal-Liġi dwar il-VAT għal akkwist intra-Komunitarju ta’ merkanzija minn persuna taxxabbli meta l-persuni li jkunu kisbu l-merkanzija mingħand din il-persuna taxxabbli jkunu applikaw il-VAT fuq l-akkwist ta’ din il-merkanzija fit-territorju tal-Istat Membru fejn jintemm it-trasport.

77.

Minkejja dan, naqbel mal-qorti tar-rinviju u mal-Kummissjoni li l-fatti tal-każ kif ippreżentati fid-deċiżjoni tar-rinviju tabilħaqq donnhom jiżvelaw problema ta’ piż fiskali sproporzjonat, li, fil-fehma tiegħi, fl-aħħar mill-aħħar jeskludi l-applikazzjoni tal-Artikolu 41 tad-Direttiva dwar il-VAT fil-proċedura fil-kawża prinċipali.

78.

Madankollu, b’mod differenti mill-qorti tar-rinviju u mill-Kummissjoni, jiena tal-fehma li, sabiex jiġi evalwat jekk B kinitx suġġetta għal piż fiskali li huwa inkompatibbli mal-prinċipji ta’ newtralità u ta’ proporzjonalità tal-VAT, l-attenzjoni għandha tingħata lill-obbligi fiskali ta’ B fir-rigward tal-ewwel kunsinna inkwistjoni minħabba li dan l-operatur u din it-tranżazzjoni huma dawk li huma kkonċernati mill-proċedura fil-kawża prinċipali.

79.

F’dan ir-rigward, inqis li hemm problema minħabba li l-liġi nazzjonali li tittrasponi l-Artikolu 41 tad-Direttiva dwar il-VAT ġiet applikata għal akkwist intra-Komunitarju (irriklassifikat) li kien jikkorrispondi għal kunsinna intra-Komunitarja (irriklassifikata) li, madankollu, ma ġietx eżentata.

80.

Il-qorti tar-rinviju tosserva li, għalkemm l-awtoritajiet Pollakki rriklassifikaw il-kunsinna magħmula minn BOP lil B minn kunsinna nazzjonali għal waħda intra-Komunitarja, huma sostnew li din il-kunsinna ma setgħetx tiġi eżentata. L-awtoritajiet tat-taxxa ħadu l-pożizzjoni li BOP kienet obbligata tiġbor 23 % tal-VAT fuq il-kunsinna intra-Komunitarja rriklassifikata minħabba li B kienet użat in-numru ta’ identifikazzjoni tal-VAT Pollakk. Għalhekk, B kellha tħallas il-VAT li kienet iffatturata lilha minn BOP. Barra minn dan, kif il-qorti tar-rinviju tosserva, B ġiet irrifjutata d-dritt li tnaqqas il-VAT tal-input korrispondenti ( 38 ). Il-qorti tar-rinviju żżid ukoll li din il-kwistjoni ma hijiex koperta mid-domanda preliminari, iżda tinnota li dan ir-rifjut kien wassal sabiex B ġiet suġġetta għal total ta’ 46 % VAT.

81.

Fis-sottomissjonijiet bil-miktub tagħha, B tirreferi għal dawn il-fatti biex issostni li huma jipprekludu l-applikazzjoni tal-Artikolu 41 tad-Direttiva dwar il-VAT.

82.

Kif il-Gvern Pollakk innota ġustament fis-seduta, dawn l-elementi ma jissemmewx fid-domanda magħmula. Madankollu, peress li huma jissemmew b’mod ċar fid-deċiżjoni tar-rinviju (u B kkummentat dwarhom fis-sottomissjoni bil-miktub tagħha u fis-seduta), ser inqishom iktar ’l isfel biex nagħti lill-qorti tar-rinviju risposta utli għas-soluzzjoni tat-tilwima quddiemha. Huwa madankollu ċar li l-evalwazzjoni legali ta’ dawn l-elementi tmur lil hinn mil-limiti ta’ din il-kawża ( 39 ).

83.

Biex jinftiehem l-Artikolu 41 tad-Direttiva dwar VAT, din id-dispożizzjoni għandha titqiegħed fis-sistema ġenerali tad-Direttiva dwar il-VAT li skontha, minn naħa waħda, il-kunsinni intra-Komunitarji huma, bħala prinċipju, eżentati fl-Istati Membri ta’ oriġini tal-merkanzija u, minn-naħa l-oħra, l-akkwisti intra-Komunitarji jiġu ntaxxati fl-Istat Membru ta’ destinazzjoni ( 40 ) Dan jirriżulta mill-għan li l-ġbir ta’ dħul ta’ taxxa jsir mill-Istati Membri tal-konsum finali tal-merkanzija.

84.

Huwa fil-kuntest ta’ din l-iskema ġenerali li l-Artikolu 41 tad-Direttiva dwar il-VAT għandu l-għan li jiggarantixxi l-ġbir tal-VAT billi jistabbilixxi l-finzjoni tal-post ta’ akkwist intra-Komunitarju bħala l-Istat Membru ta’ identifikazzjoni tal-VAT. Minħabba li akkwist intra-Komunitarju ta’ merkanzija għandu, bħala prinċipju, b’korollarju tiegħu kunsinna intra-Komunitarja eżentata, huwa importanti li jiġi żgurat li l-operazzjoni riżultanti tkun intaxxata, fl-Istat Membru tal-identifikazzjoni tal-VAT jew fl-Istat Membru tal-akkwist (reali).

85.

Minkejja dan, infakkar li l-miżuri adottati mill-Istati Membri biex ikun żgurat il-ġbir korrett tat-taxxa u biex ma jkunx hemm frodi ma jistgħux jintużaw b’tali mod li jippreġudikaw in-newtralità tal-VAT li tipprekludi li operaturi ekonomiċi li jwettqu l-istess tranżazzjonijiet jiġu ttrattati b’mod differenti fir-rigward tal-ġbir tal-VAT u li tfittex teħles għalkollox lill-persuna taxxabbli mill-piż tal-VAT matul l-attivitajiet ekonomiċi tagħha ( 41 ). Barra minn dan, skont il-prinċipju ta’ proporzjonalità, il-miżuri użati biex jiġi żgurat il-ġbir effettiv tat-taxxa “m’għandhomx imorru lil hinn minn dak li huwa neċessarju għal dan il-għan” ( 42 ).

86.

Il-fatt li l-awtoritajiet nazzjonali ddeċidew li jittrattaw il-kunsinna intra-Komunitarja magħmula minn BOP lil B, wara r-riklassifikazzjoni tagħha, bħala “mhux eżentata” ifisser li t-taxxa ġiet tabilħaqq applikata għal din l-operazzjoni fil-Polonja.

87.

Filwaqt li t-tassazzjoni effettiva ta’ merkanzija fl-Istat ta’ oriġini tagħha hija bla ħsara għall-awtorità tal-Istat Membru ta’ destinazzjoni li jiġbor it-taxxa ( 43 ), jibqa’ l-fatt li din it-taxxa tirrendi diskutibbli, fil-fehma tiegħi, il-ħtieġa li jiġi applikat l-Artikolu 41 tad-Direttiva dwar il-VAT minħabba li, kif intqal iktar ’il fuq, it-taxxa ġiet applikata u ma hemmx iktar lok għal tħassib dwar eventwali evażjoni ta’ taxxa.

88.

Billi jistrieħ fuq l-iskema ġenerali li fiha l-kunsinni huma eżentati u l-akkwist suġġett għat-taxxa, l-Artikolu 41 tad-Direttiva dwar il-VAT jipprevedi l-intervent tal-Istat Membru ta’ identifikazzjoni tal-VAT sabiex ma jkunx hemm telf li jista’ jirriżulta mill-eżenzjoni mit-taxxa fil-pajjiż ta’ oriġini tal-merkanzija. Madankollu, minħabba li, f’dan il-każ, ma kienx hemm eżenzjoni fl-Istat Membru ta’ oriġini tal-merkanzija, ma kien hemm, fil-fehma tiegħi, ebda riskju ta’ evażjoni ta’ taxxa. Għalhekk, l-Istat Membru ta’ identifikazzjoni tal-VAT ma kellu l-ebda raġuni sabiex jintervjeni, kif essenzjalment issostni B.

89.

Huwa minnu li, kieku B kellha tħallas it-taxxa fuq l-akkwist intra-Komunitarju rriklassifikat tagħha fl-Istat Membru ta’ destinazzjoni tal-merkanzija, hija tkun tista’ tistrieħ fuq il-mekkaniżmu korrettiv tal-Artikolu 41 tad-Direttiva dwar il-VAT, kif il-Gvern Pollakk ikkonferma fis-seduta. Il-piż fiskali addizzjonali li issa jirriżulta mill-applikazzjoni għal B tal-Artikolu 25(2) tal-Liġi dwar il-VAT, meħud b’mod iżolat, jiġi f’dak il-każ attenwat. Madankollu, dan ma jibdilx il-premessa tal-bidu li, minħabba li l-kunsinna intra-Komunitarja inkwistjoni ma hijiex eżentata, l-applikazzjoni ta’ din id-dispożizzjoni saret superfluwa u wasslet għal piż fiskali bla bżonn.

90.

F’dawn iċ-ċirkustanzi, jiena tal-fehma li, bl-applikazzjoni tal-Artikolu 25(2) tal-Liġi dwar il-VAT għal akkwist intra-Komunitarju li jkun ġie minn kunsinna intra-Komunitarja mhux eżentata, l-awtoritajiet nazzjonali aġixxew bi ksur tal-prinċipju ta’ proporzjonalità.

91.

Il-piż fiskali bla bżonn li ġie impost fuq B minħabba l-applikazzjoni tal-Artikolu 25(2) tal-Liġi dwar il-VAT jidher li huwa jerġa’ iktar aggravat bir-rifjut li titnaqqas il-VAT tal-input imħallsa fuq l-akkwist intra-Komunitarju rriklassifikat. Ma naħsibx, madankollu, li dik iċ-ċirkustanza hija fiha nnifisha deċiżiva sabiex jiġi konkluż, kif għamilt jien, dwar l-inapplikabbiltà tal-Artikolu 41 tad-Direttiva dwar il-VAT. Fil-fehma tiegħi, dik il-konklużjoni kienet tkun l-istess ukoll jekk kellu jingħata d-dritt għal tnaqqis, għaliex din iċ-ċirkustanza ma tibdilx il-fatt li l-kunsinna intra-Komunitarja riklassifikata inkwistjoni ma ġietx eżentata, li, kif spjegajt, jirrendi superfluwa l-applikazzjoni tal-Artikolu 41 tad-Direttiva dwar il-VAT.

92.

Minn dak li ntqal hawn fuq jirriżulta li l-Artikolu 41 tad-Direttiva dwar il-VAT u l-prinċipju ta’ proporzjonalità jipprekludu l-applikazzjoni tal-Artikolu 25(2) tal-Liġi dwar il-VAT għal akkwist intra-Komunitarju ta’ merkanzija meta dan l-akkwist ikun irriżulta minn kunsinna intra-Komunitarja li ma ġietx ittrattata bħala operazzjoni eżentata, u dan għandu jiġi vverifikat mill-qorti tar-rinviju.

93.

Nipproponi li l-Qorti tal-Ġustizzja tagħti risposta lin-Naczelny Sąd Administracyjny (il-Qorti Amministrattiva Suprema) kif ġej:

L-Artikolu 41 tad-Direttiva tal-Kunsill 2006/112/KE tat‑28 ta’ Novembru 2006 dwar is-sistema komuni ta’ taxxa fuq il-valur miżjud u l-prinċipji ta’ newtralità u ta’ proporzjonalità ma jipprekludux l-applikazzjoni tal-Artikolu 25(2) tal-ustawa z dnia 11 marca 2004 r. o podatku od towarów i usług (il-Liġi dwar it-Taxxa fuq il-Merkanzija u s-Servizzi tal‑11 ta’ Marzu 2004, iktar ’il quddiem il-“Liġi dwar il-VAT”) għal akkwist intra-Komunitarju ta’ merkanzija minn persuna taxxabbli meta l-persuni li jakkwistaw il-merkanzija mingħand din il-persuna taxxabbli jkunu applikaw it-taxxa fuq il-valur miżjud (VAT) fuq l-akkwist ta’ din il-merkanzija fit-territorju tal-Istat Membru fejn jintemm it-trasport.

Madankollu, l-Artikolu 41 tad-Direttiva 2006/112 u l-prinċipju ta’ proporzjonalità jipprekludu l-applikazzjoni tal-Artikolu 25(2) tal-Liġi dwar il-VAT għal akkwist intra-Komunitarju ta’ merkanzija meta dan l-akkwist ikun irriżulta minn kunsinna intra-Komunitarja li ma ġietx ittrattata bħala operazzjoni eżentata, u dan għandu jiġi vverifikat mill-qorti tar-rinviju.