1

Ir-rikorrenti European Dynamics Luxembourg SA, Evropaïki Dynamiki – Proigmena Systimata Tilepikoinonion Pliroforikis kai Tilematikis AE, u European Dynamics Belgium SA, huma attivi fis-settur tat-teknoloġiji tal-informatika u tal-komunikazzjoni u jippreżentaw offerti b’mod regolari fil-kuntest ta’ proċeduri ta’ sejħa għal offerti mibdija minn organi u istituzzjonijiet differenti tal-Unjoni Ewropea, fosthom mill-Uffiċċju għall-Armonizzazzjoni fis-Suq Intern (Trade marks u Disinni) (UASI).

2

Permezz ta’ avviż ta’ kuntratt tat-28 ta’ Awwissu 2010, l-UASI ippubblika fis-Suppliment tal-Ġurnal Uffiċjali tal-Unjoni Ewropea (ĠU 2010/S 167‑255574) sejħa għal offerti, taħt ir-referenza AO/021/10, intitolat “Servizzi esterni marbuta mal-amminstrazzjoni ta’ programmi u ta’ proġetti u pariri tekniċi fil-qasam tat-tekonoloġiji tal-informatika”, (external service provision for programme and project management and technical consultancy in the field of information technologies) li warajh l-ewwel rikorrenti ppreżenta offerta fil-11 ta’ Ottubru 2010. Il-kuntratt li kien ser jingħata kien jikkonċerna l-provvista ta’ servizzi esterni marbuta mal-amministrazzjoni ta’ programmi u ta’ proġetti fil-qasam tat-teknoloġiji tal-informatika, kif ukoll dik ta’ pariri tekniċi marbuta ma’ kull tip ta’ sistema tal-informatika u fl-oqsma teknoloġiċi kollha.

[omissis]

4

Skont il-punt II.1.4 tal-avviż tal-kuntratt, il-kuntratt kien jikkonċerna l-għoti ta’ kuntratti kwadri (framework agreement) għal terminu massimu ta’ erba’ snin b’numru massimu ta’ tliet fornituri ta’ servizz. F’dan ir-rigward, il-punt 14.2 tal-ispeċifikazzjonijiet tal-kuntratt (tender specifications) (Anness I tal-fajl tas-sejħa għal offerti) kien jispeċifika li l-imsemmija kuntratti-kwadri għandhom jiġu konklużi skont il-mekkaniżmu msejjaħ “ta’ kaskata”. Dan il-mekkaniżmu jfisser li, jekk l-offerent ikklassifikat fl-ewwel post ma jkunx f’pożizzjoni li jipprovdi s-servizzi rikjesti, l-UASI għandu jdur lejn l-offerenti ikklassifikat fit-tieni post, u wara fuq dak ta’ warajh. Barra minn hekk, skont il-punt IV.2 tal-avviż tal-kuntratt, il-kuntratt għandu jingħata lill-offerta li tkun l-iktar vantaġġuża mil-lat ekonomiku.

5

Abbażi tal-evalwazzjoni teknika, l-ispeċifikazzjonijiet tal-kuntratt kienu jistiednu lill-offerenti jippreżentaw “il-kompiti u l-attivitajiet li għandhom jiġu eżegwiti bil-għan li jiġi ġestit u mmexxi sewwa l-proġett imsemmi fl-ipoteżi tax-xogħol Nru 1 ”. (Clearly describe and justify the tasks and activities to be executed to manage and successfully achieve the project presented in the work hypothesis 1) Din l-ipoteżi tax-xogħol, esposta fl-Anness 18 tal-ispeċifikazzjonijiet tal-kuntratt, kienet tipprevedi l-istabbiliment mill-UASI ta’ “proġett ta’ stabbiliment ta’ sistema tal-informatika”. (The OHIM is setting up a project to build an information system)

6

Għal dan l-għan, l-ispeċifikazzjonijiet tal-kuntratt kienu jiddikjaraw, fil-punt 13.3 tagħhom, ħames kriterji tal-għoti li huma kif ġej:

[omissis]

8

Permezz ta’ ittra tat-28 ta’ Marzu 2011, l-UASI informa lir-rikorrenti bir-riżultat tal-proċedura ta’ sejħa għal offerti AO/021/10 (iktar ’il quddiem id-“deċiżjoni tal-għoti”) u indikalhom li l-offerta tal-ewwel rikorrenti ġiet ikklassifikata fit-tielet post, fatt li kien jirrendiha parti kontraenti ta’ riżerva f’kaskata.

[omissis]

11

Permezz ta’ ittra tal-11 ta’ April 2011, l-UASI żvela lill-ewwel rikorrenti l-ismijiet tal-kontraenti l-oħra li ġew ikklassifikati fl-ewwel u fit-tieni post, jiġifieri l-consortium Unisys SLU u Charles Oakes & Co. Sàrl rispettivament, bis-subkuntrattur Unisys Belgium SA, minn-naħa, u ETIQ Consortium (by everis u Trasys), min-naħa l-oħra. Din l-ittra kienet tinkludi barra minn hekk tabella li tindika n-noti miksuba minn kull kontraenti għall-kriterji differenti ta’ kwalità teknika.

12

It-tabella kienet kif ġej:

13

Barra minn hekk, f’din l-ittra, l-UASI espona r-raġunijiet li abbażi tagħhom huwa kien attribwixxa lill-offerta tal-ewwel rikorrent in-numru ta’ punti indikati rispettivament fl-aħħar kolonna tat-tabella msemmija iktar ’il fuq għal kull wieħed mill-kriterji ta’ kwalità teknika rilevanti. Fir-rigward tat-tielet, ir-raba’ u l-ħames talba tal-ewwel rikorrenti (ara l-punt 9 iktar ’il fuq), l-UASI kkonferma li, skont il-linji gwida dwar l-aċċess pubbliku għad-dokumenti fil-qasam tal-kuntratti pubbliċi, (following the guidelines for the public access to documents concerning procurement and grant ward procedures) ma kienx awtorizzat li jiżvela la r-rapport ta’ evalwazzjoni, la l-ismijiet tal-membri tal-kumitat, u lanqas l-offerti finanzjarji tal-kontraenti l-oħra.

[omissis]

19

Permezz ta’ ittra konġunta tat-18 ta’ April 2011, ir-rikorrenti informaw lill-UASI bil-fatt li huma kienu jikkunsidraw li l-motivazzjoni vaga u ġenerika, kif esposta fl-ittra tiegħu tal-11 ta’ April 2011, ma kinitx suffiċjenti u li din ma kinitx tippermettilhom li jeżerċitaw id-drittijiet tagħhom. Barra minn hekk, huma tennew it-talba tagħhom li jikkomunikalhom, b’mod partikolari, l-offerti finanzjarji tal-kontraenti l-oħra kif ukoll kopja sħiħa tar-rapport ta’ evalwazzjoni. Barra minn hekk, ir-rikorrenti esponew fid-dettall, fir-rigward ta’ kull waħda mill-evalwazzjonijiet magħmula mill-UASI fuq il-kriterji differenti tal-kwalità teknika tal-offerta tagħhom, ir-raġunijiet li abbażi tagħhom, fl-opinjoni tagħhom, l-evalwazzjoni tal-awtorità kontraenti kienet difettuża u żbaljata, jew anki vvizzjata bi żbalji manifesti ta’ evalwazzjoni. Fl-aħħar, ir-rikorrenti stiednu lill-UASI sabiex jikkunsidraw mill-ġdid ir-riżultat tal-evalwazzjoni tiegħu, li jipprovdihom b’ġustifikazzjonijiet fid-dettall għad-deċiżjonijiet tiegħu u li jikkoreġi l-iżbalji manifesti ta’ evalwazzjoni invokati.

20

Permezz ta’ ittra tad-29 ta’ April 2011, l-UASI kkomunika lir-rikorrenti t-tabella li ġejja li tesponi li l-punti li kienu ġew attribwiti lill-offerta finanzjarja tagħhom kif ukoll lill-offerti l-oħra tal-kontraenti l-oħra:

Barra minn hekk, fir-rigward tal-evalwazzjoni tal-kriterji tal-għoti teknika, l-UASI indika lir-rikorrenti li huwa kien ser jagħtihom risposta sħiħa fil-ġranet ta’ xogħol suċċessivi.

[omissis]

22

Permezz ta’ ittra tat-2 ta’ Mejju 2011, trażmessa b’faks tat-12 ta’ Mejju 2011, l-UASI essenzjalment tenna l-evalwazzjonijiet tiegħu inklużi fl-ittra tiegħu tal-11 ta’ April 2011 dwar l-evalwazzjoni tal-kwalità teknika tal-offerta tal-ewwel rikorrenti.

[omissis]

28

Permezz ta’ ittra tat-13 ta’ Mejju 2011, ir-rikorrenti kkontestaw l-approċċ tal-UASI u indikaw li huma kienu issa obbligati li jippreżentaw rikors quddiem il-Qorti Ġenerali.

29

Permezz ta’ rikors ippreżentat fir-reġistru tal-Qorti Ġenerali fis-6 ta’ Ġunju 2008, ir-rikorrenti ppreżentaw dan ir-rikors.

30

Peress illi kien hemm bidla fil-kompożizzjoni tal-Awli tal-Qorti Ġenerali u l-Imħallef Relatur ġie assenjat lir-Raba’ Awla, din il-kawża ġiet għalhekk assenjata lil din l-Awla.

31

Fuq rapport tal-Imħallef Relatur, il-Qorti Ġenerali (ir-Raba’ Awla) iddeċidiet li tiftaħ il-proċedura orali.

32

It-trattazzjoni tal-partijiet u r-risposti tagħhom għall-mistoqsijiet tal-Qorti Ġenerali nstemgħu fis-seduta tal-21 ta’ Jannar 2015.

33

Waqt is-seduta, ir-rikorrenti rrinunzjaw, min-naħa, għar-raba’ motiv tagħhom, ibbażat fuq ksur, b’mod partikolari, tal-prinċipju ta’ ugwaljanza fit-trattament, tal-Artikolu 93(1)(f), tal-Artikolu 94 u tal-Artikolu 96 tar-Regolament tal-Kunsill (KE, Euratom) Nru 1605/2002, tal-25 ta’ Ġunju 2002, rigward ir-Regolament Finanazjarju applikabbli ghall-bagit generali tal-Komunitajiet Ewropej (ĠU Edizzjoni Speċjali bil-Malti, Kapitolu 1. Vol. 44, p. 74, iktar ’il quddiem ir-“Regolament finanzjarju ġenerali”), kif emendat bir-Regolament tal-Kunsill (KE, Euratom) Nru 1995/2006, tat-13 ta’ Diċembru 2006 (ĠU L 390, p. 1), u tal-Artikoli 133 u 134 tar-Regolament tal-Kummissjoni (KE, Euratom) Nru 2342/2002, tat-23 ta’ Diċembru 2002, li jippreskrivi regoli ddettaljati għall-implimentazzjoni tar-Regolament [finanzjarju ġenerali] (ĠU Edizzjoni Speċjali bil-Malti, Kapitolu 1, Vol. 4, p. 145, iktar ’il quddiem il-“modalitajiet ta’ implementazzjoni”), u, min-naħa l-oħra, għal-kap tat-talbiet tagħhom marbuta mal-kumpens għad-danni abbażi tat-telf tal-benefiċċju raġonevolment mistenni. Barra minn hekk, fid-dawl tad-digriet tat-12 ta’ Settembru 2013, European Dynamics Luxembourg et vs UASI (T‑556/11, Ġabra, EU:T:2013:514), l-UASI rrinunzja għall-motiv tiegħu ta’ inammissibbiltà dirett kontra t-talbiet għal annullament u għal kumpens. Ittieħdet nota ta’ dawn ir-rinunzji fil-verbal tas-seduta.

34

Ir-rikorrenti jitolbu li l-Qorti Ġenerali jogħġobha:

35

L-UASI jitlob li l-Qorti Ġenerali jogħġobha:

36

Insostenn tat-talba tagħhom għal annullament, ir-rikorrenti jinvokaw, wara rinunzja għar-raba’ motiv (ara l-punt 33 iktar ’il fuq), tliet motivi.

37

Permezz tal-ewwel motiv tagħhom, ir-rikorrenti jallegaw li l-UASI kiser l-ewwel paragrafu tal-Artikolu 100(2) tar-Regolament finanzjarju ġenerali u l-Artikolu 149 tal-modalitajiet ta’ eżekuzzjoni kif ukoll l-obbligu ta’ motivazzjoni, fis-sens tat-tieni paragrafu tal-Artikolu 296 TFUE, billi rrifjuta li jagħtihom spjegazzjoni jew ġustifikazzjoni suffiċjenti għad-deċiżjoni tal-għoti.

38

Permezz tat-tieni motiv tagħhom, ir-rikorrenti jinvokaw “ksur tal-ispeċifikazzjonijiet tal-kuntratt” (infringement of the tender specifications), sa fejn l-UASI ikkunsidra, għad-detriment tagħhom, kriterji tal-għoti ġodda li ma humiex inklużi fl-imsemmija speċifikazzjonijiet tal-kuntratt.

39

Permezz tat-tielet motiv tagħhom, ir-rikorrenti jilmentaw li l-UASI wettaq diversi żbalji manifesti ta’ evalwazzjoni.

40

Il-Qorti Ġenerali tqis opportun li jiġi evalwat, qabel xejn, it-tieni motiv, suċċessivament, it-tielet motiv u, finalment, l-ewwel motiv.

41

Fil-kuntest ta’ dan il-motiv, ir-rikorrenti jikkontestaw, b’mod partikolari, l-analiżi komparattiv, fid-dawl tal-ewwel kriterju tal-għoti, tal-offerta tagħhom meta mqabbla mal-offerti tal-kontraenti l-oħra, li l-awtorità kontraenti esposti fl-ittra tagħha tat-2 ta’ Mejju 2011. F’din l-ittra, ġie indikat dwar dan is-suġġett, b’mod partikolari, li “[...] l-offerti [tal-kontraenti l-oħra] li jissodisfaw l-ewwel kriterju tal-għoti b’mod tajjeb ħafna, jew anki b’mod eċċellenti, jipprovdu għal ‘użu tajjeb ħafna tal-kwadru Prince2, billi jispjegaw qabel xejn il-kuntest’ qabel ma jiddefinixxu l-mod dan ser jintuża għall-UASI, b’tali mod li l-imsemmija offerti jkopru l-aspetti kemm teoretiċi kif ukoll parttiki tal-użu tal-kwadru Prince2”. Barra minn hekk, skont din l-istess ittra, dawn l-offerti “jidentifikaw l-amminstrazzjoni tat-tibdil u l-komunikazzjoni bħala żewġ kompiti l-iktar essenzjali għas-suċċess tal-proġett ” (ara l-punt 23 iktar ’il fuq).

42

Skont ir-rikorrenti, essenzjalment, din l-evalwazzjoni tal-awtorità kontraenti ma hijiex sostnuta mill-ispeċifikazzjonijiet tal-kuntratt u hija msejsa fuq elementi, fosthom il-metodoloġija Prince2, li ma nġabux għall-konjizzjoni tal-offerenti b’mod tempestiv. Lanqas ma jirriżulta mill-ispeċifikazzjonijiet tal-kuntratt li ż-żewġ sotto-kriterji “amminstrazzjoni tat-tibdil” u “komunikazzjoni” kienu, mill-perspettiva tal-UASI, l-“iktar essenzjali”. Għalhekk, l-awtorità kontraenti introduċiet a posteriori kriterju ġdid u attribwiet piż ġdid għall-imsemmija sotto-kriterji.

43

Skont l-UASI, dan il-motiv huwa bbażat fuq qari żbaljat tal-ittra tiegħu tat-2 ta’ Mejju 2011, li ma tirrilevax l-introduzzjoni ta’ kriterji tal-għoti ġodda. Min-naħa, l-UASI ifakkar li, skont l-ewwel kriterju tal-għoti, l-offerenti kienu mistiedna li jiddeskrivu l-kompiti u l-attivitajiet li huma kienu sejrin iwettqu inkonnessjoni mal-amministrazzjoni tal-proġetti. Issa, Prince2 huwa wieħed mill-metodoloġiji disponibbli li r-rikorrenti stess għażlu għal dan l-għan. Min-naħa l-oħra, il-fatt li ġie indikat li l-aħjar offerti “identifikaw l-amminstrazzjoni tat-tibdil u l-komunikazzjoni bħala ż-żewġ kompiti l-iktar essenzjali għas-suċċess tal-proġett” bl-ebda mod ma jekwivali għal introduzzjoni ta’ kriterju tal-għoti ġdid u lanqas mal-applikazzjoni ta’ fattur ta’ ppeżar a posteriori, peress li l-ispeċifikazzjonijiet tal-kuntratt jispeċifikaw li l-offerenti għandhom jiddeskrivu l-kompiti u l-attivitajiet li huma sejrin jeżegwixxu inkonnessjoni mal-amministrazzjoni tal-proġetti, fosthom il-proċess ta’ amministrazzjoni tat-tibdil u l-pjanijiet ta’ komunikazzjoni. L-ebda nota speċifika ma kienet assoċjata ma’ dawn is-sotto-kriterji u l-UASI sempliċiment ikkonferma li kontraenti l-oħra fehmu korrettament li l-amministrazzjoni tat-tibdil u l-komunikazzjoni kienu jirrappreżentaw iż-żewġ kompiti l-iktar essenzjali.

44

Hemm lok li jitfakkar li, skont il-prinċipju ta’ ugwaljanza fit-trattament, l-awtorità kontraenti hija obbligata li tiżgura f’kull stadju ta’ proċedura ta’ sejħa għal offerti, ir-rispett tal-prinċipju ta’ ugwaljanza fit-trattament, u konsegwentement, ta’ ugwaljanza tal-opportunitajiet bejn l-offerenti. Bl-istess mod, il-prinċipju ta’ ugwaljanza fit-trattament ifisser li l-offerenti għandhom ikunu f’pożizzjoni ta’ ugwaljanza kemm fil-mument meta dawn jippreparaw l-offerti tagħhom kif ukoll fil-mument meta dawn jiġu evalwati mill-awtorità kontraenti. Dan jimplika, b’mod iktar partikolari, li l-kriterji tal-għoti għandhom jiġu fformulati, fl-ispeċifikazzjonijiet tal-kuntratt jew fl-avviż tal-kuntratt, b’mod li jkunu jippermettu lil kull offerent raġonevolment informat u normalment diliġenti li jinterpretahom bl-istess mod, waqt l-evalwazzjoni tal-offerti, peress li dawn il-kriterji għandhom jiġu applikati b’mod oġġettiv u uniformi fir-rigward tal-offerenti kollha (sentenza tas-17 ta’ Frar 2011, Il-Kummissjoni vs Ċipru, C‑251/09, EU:C:2011:84, punti 39 u 40; ara wkoll, f’dan is-sens, is-sentenza tal-25 ta’ Ottubru 2012, Astrim u Elyo Italia vs Il-Kummissjoni, T‑216/09, EU:T:2012:574, punti 35 u 36 u l-ġurisprudenza ċċitata). Barra minn hekk, il-prinċipju ta’ trasparenza, li essenzjalment għandu l-għan li jiggarantixxi l-assenza ta’ riskju ta’ favoritiżmu u ta’ arbitrarjetà min-naħa tal-awtorità kontraenti, jimplika li l-kundizzjonijiet u l-modalitajiet tal-proċedura tal-għoti għandhom jiġu fformulati b’mod ċar, preċiż u inekwivoku fl-avviż tal-kuntratt jew fl-ispeċifikazzjonijiet tal-kuntratt b’mod, l-ewwel nett, li jippermetti lill-offerenti raġonevolment informati u normalment diliġenti kollha li jifhmu l-portata eżatta u li jinterpretawhom bl-istess mod u, it-tieni nett, li tqiegħed lill-awtorità kontraenti f’pożizzjoni li tivverifika effettivament jekk l-offerti tal-offerenti jikkorrispondux għall-kriterji li jirregolaw il-kuntratt inkwistjoni (ara, f’dan is-sens, is-sentenzi Astrim u Elyo L-Italja vs Il-Kummissjoni, iċċitata iktar ’il fuq, EU:T:2012:574, punt 37, u tas-16 ta’ Settembru 2013, Spanja vs Il-Kummissjoni, T‑402/06, Ġabra, EU:T:2013:445, punt 67 u l-ġurisprudenza ċċitata).

45

Fir-rigward tal-ewwel ilment, ibbażat fuq il-fatt li l-UASI applika kriterju tal-għoti mhux previst fl-ispeċifikazzjonijiet tal-kuntratt, huwa, ċertament, korrett li l-kwadru jew il-metodoloġija Prince2 ma hijiex imsemmija fih b’mod espress, peress li l-ewwel kriterju tal-għoti jirrikjedi, b’mod partikolari, li “l-offerent jippreżenta l-kompiti u l-attivitajiet li huwa sejjer iwettaq fil-qasam tal-amminstrazzjoni tal-proġett, abbażi tal-metodoloġija u l-esperjenza tiegħu”. Madankollu, minn naħa, jirriżulta b’mod ċar mill-offerta tal-ewwel rikorrenti li l-metodoloġija hemm proposta hija “ibbażata fuq il-metodu ta’ amminstrazzjoni tal-proġett Prince2 tal-OGC, li taqa’ taħt l-aħjar prattiki u hija adottata b’mod regolari fuq l-iskala internazzjonali, u tintuża sabiex jiġi ddefinit approċċ tal-proġetti fil-kuntest tal-ITIL”, u li l-imsemmi metodu “huwa l-metodoloġija dominanti applikabbli fil-proġett”. (is based on the widely accepted internationally OGC best practice project method PRINCE2 and is used to describe an approach to projects within the ITIL context … PRINCE2 will be the dominant methodology to be applied in the project; Project Management Methodology Overview and Standards). Min-naħa l-oħra, huwa stabbilit li l-offerti tal-kontraenti l-oħra huma msejsa wkoll fuq il-metodoloġija Prince2, fatt li ppermetta lill-awtorità kontraenti li twettaq l-analiżi komparattiva msemmija fil-punt 41 iktar ’il fuq.

46

F’dawn iċ-ċirkustanzi, l-ilment tar-rikorrenti li l-UASI stabbilixxa a posteriori kriterju tal-għoti ġdid, jiġifieri l-metodoloġija Prince2, li la kien previst fl-ispeċifikazzjonijiet tal-kuntratt u lanqas ikkomunikat, tempestivament, lill-offerenti, ma jistax jintlaqa’. Fil-fatt, l-evalwazzjoni mill-UASI tal-offerta tal-ewwel rikorrenti kienet manifestament iggwidata mill-kriterju “abbażi tal-metodoloġija u tal-esperjenza tiegħu”, fatt li ma huwiex ikkontestat mill-fatt li, fil-każ ta’ din l-offerta u fil-każ tal-offerti tal-kontraenti l-oħra, din il-metodoloġija tikkorrispondi preċiżament għal dik tal-Prince2. Għall-kuntrarju, dan il-fatt fih innifsu juri li l-kontraenti kollha kienu fehmu sewwa li l-ewwel kriterju tal-għoti jippermettilhom li jibbażaw l-offerta tagħhom fuq l-imsemmija metodoloġija. Għalhekk, ma jistax jiġi lmentat li l-awtorità kontraenti pparagunat l-offerti kkonċernati fid-dawl tal-kriterji ta’ din l-istess metodoloġija, fatt li seta’ biss jiffaċilita l-paragun tal-kwalitajiet rispettivi tagħhom u li jippromwovi l-oġġettività tal-evalwazzjoni komparattiva. Fl-aħħar, ir-rekwiżiti tal-imsemmi kriterju tal-għoti għandhom jiġu distinti b’mod ċar mill-punt 2.3 tal-Anness II tal-ispeċifikazzjonijiet tal-kuntratt li jistabbilixxi li “[i]l-metodoloġija użata mill-UASI għall-amminstrazzjoni tal-proġett huwa adattament personalizzat tal-Prince2” (The methodology used by the OHIM for project management is a customization of PRINCE2) li fih hemm indikat b’mod ċar li dan “għandu jitpoġġa għad-dispożizzjoni tal-kontraent [biss] fil-bidu tal-kuntratt-kwadru”, (The methodology will be made available to the contractor at the beginning of the framework contract) b’tali mod li din ma tistax tikkostitwixxi mudell li għandhom jiġi adattati miegħu l-offerti.

47

Għaldaqstant, l-ewwel ilment għandu jiġu miċħud bħala infondat.

48

Fir-rigward tat-tieni ilment, il-Qorti Ġenerali tikkunsidra li r-rikorrenti jsostnu ġustament li l-awtorità kontraenti effettivament tat lis-sotto-kriterji “amminstrazzjoni tat-tibdil” u “komunikazzjoni” piż ikbar mis-sotto-kriterji l-oħra stabbiliti fi ħdan l-ewwel kriterju tal-għoti. Fil-fatt, il-motivazzjoni inekwivoka esposta fl-ittra tal-UASI tat-2 ta’ Mejju 2011, li l-offerti tal-kontraenti l-oħra “jidentifikaw l-amminstrazzjoni tat-tibdil u l-komunikazzjoni bħala ż-żewġ kompiti l-iktar essenzjali għas-suċċess tal-proġett” (as the two most essential tasks for the success of the project), ma tistax tinftiehem mod ieħor. Hija turi li l-awtorità kontraenti ikkonfermat l-approċċ propost mill-kontraenti l-oħra billi bbażat ruħha fuq ippeżar tal-imsemmija sotto-kriterji li ma jirriżultawx mill-kliem tal-ewwel kriterju tal-għoti. Issa, fid-dawl tal-ġurisprudenza ċċitata fil-punt 44 iktar ’il fuq, l-awtorità kontraenti ma tistax twettaq ippeżar tas-sotto-kriterji li ma tkun ġabet preliminarjament għall-konjizzjoni tal-offerenti (ara, f’dan is-sens, is-sentenza tal-24 ta’ Jannar 2008, Lianakis et, C‑532/06, Ġabra, EU:C:2008:40, punt 38).

49

F’dan ir-rigward, minn naħa, jeħtieġ li jiġi ppreċiżat li l-“amminstrazzjoni tat-tibdil” u l-“pjan ta’ komunikazzjoni” jikkostitwixxu biss żewġ sotto-kriterji fosthom assjem ta’ seba’ sotto-kriterji li kienu elenkati fl-istess livell u fuq bażi mhux esklużiva fil-kuntest tal-ewwel kriterju tal-għoti, jiġifieri l-kontroll progressiv, il-proċedura ta’ amministrazzjoni tal-kwistjonijiet li jinqalgħu, il-proċedura ta’ amministrazzjoni tat-tibdil, l-amministrazzjoni tal-proċeduri ta’ intervent ta’ eskalazzjoni, il-programm ta’ kapitalizzazzjoni tal-esperjenza, il-pjan ta’ komunikazzjoni u l-proċeduri ta’ aċċettazzjoni tal-prodott li għandu jingħata, u li għalihom l-awtorità kontraenti tipprevedi li tagħti numru massimu ta’ 40 punt (ara l-punt 5 iktar ’il fuq). Issa, la mill-kliem tal-imsemmi kriterju u lanqas minn passaġġi rilevanti oħra tal-ispeċifikazzjonijiet tal-kuntratt ma jirriżulta li l-awtorità kontraenti kellha l-intenzjoni, fejn xieraq u għal raġunijiet speċifiċi mhux żvelati, li tagħti importanza differenti għal dawn is-sotto-kriterji għall-finijiet tal-preżentazzjoni tal-proġett imsemmi fl-ipoteżi ta’ xogħol Nru 1, jew anki li tagħti, abbażi tal-evalwazzjoni tal-offerti magħmula fid-dawl tal-ewwel kriterju tal-għoti, marki ftit jew wisq għolja skont jekk l-imsemmija offerti jaċċettawx wieħed jew l-ieħor mis-sotto-kriterji. Dan jgħodd b’mod partikolari għalhekk għas-sotto-kriterji “amminstrazzjoni tat-tibdil” u “pjan ta’ komunikazzjoni” li dwarhom l-ispeċifikazzjonijiet tal-kuntratt jonqsu milli jindikaw li l-awtorità kontraenti tikkunsidrahom bħala li jirrappreżentaw “iż-żewġ kompiti l-iktar essenzjali għas-suċċess tal-proġett”.

50

Min-naħa l-oħra, skont l-espożizzjoni ġenerali, fl-ispeċifikazzjonijiet tal-kuntratt, l-offerenti kellhom jissodisfaw rekwiżiti, fejn dawn tal-aħħar kienu mistiedna jippreżentaw “il-kompliti u l-attivitajiet li għandhom jiġu eżegwiti bil-għan li jiġi ġestit u mmexxi sewwa l-proġett imsemmi fl-ipoteżi tax-xogħol Nru 1 ”, (the tasks and activities to be executed to manage and successfully achieve the project presented in the work hypothesis 1) li kienet tinsab fl-ispeċifikazzjonijiet tal-kuntratt esposta u kienet tipprevedi l-istabbiliment mill-UASI ta’ “proġett għall-kostruzzjoni ta’ sistema tal-informatika” (project to build an information system). Minn dan jirriżulta li d-deskrizzjoni fl-offerti suġġetti għal kompiti u attivitajiet marbuta mas-sotto-kriterji differenti abbażi tal-ewwel kriterju tal-għoti neċessarjament tirreferi għall-imsemmi proġett li kien, min-definizzjoni tiegħu, l-istess għall-offerenti kollha.

51

F’dawn iċ-ċirkustanzi, il-parti tas-sentenza “identifikaw l-amminstrazzjoni tat-tibdil u l-komunikazzjoni bħala ż-żewġ kompiti l-iktar essenzjali għas-suċċess tal-proġett” tista’ tinftiehem biss bħala li tinkludi ġudizzju suġġettiv ta’ portata assoluta u ġenerali dwar l-importanza partikolari tas-sotto kriterji “ġesjoni tat-tibdil” u “pjan ta’ komunikazzjoni” (“l-iktar essenzjali”) fil-kuntest tal-proġett previst mill-UASI abbażi tal-ipoteżi tax-xogħol Nru 1 (“għas-suċċess tal-proġett”), li kienu ttieħdu inkunsiderazzjoni fl-offerti tal-offerenti l-oħra, u, għall-kuntrarju, bi kritika għall-offerta tal-ewwel rikorrenti fis-sens li ma segwietx approċċ analogu għal dak propost mill-imsemmija offerenti dwar dan is-suġġett.

52

F’dan ir-rigward, l-UASI ma huwiex fondat li jsostni, essenzjalment, li l-motivazzjoni msemmija iktar ’il fuq għandha tinftiehem bħala ġudizzju suġġettiv dwar il-kwalità tajba tal-offerti tal-offerenti l-oħra bbażata fuq l-identifikazzjoni ta’ żewġ sotto-kriterji partikolari, jiġifieri l-“amminstrazzjoni tat-tibdil” u l-“komunikazzjoni”, peress li dan il-ġudizzju ma huwiex separabbli minn valorizzazzjoni preliminari u astratt partikolari tal-imsemmija sotto-kriterji meta mqabbla mal-ħames sotto-kriterji l-oħra elenkati fi ħdan l-ewwel kriterju tal-għoti. Barra minn hekk, anki jekk għar-raġunijiet invokati fil-punti 48 sa 51 iktar ’il fuq, ma jidhirx kredibbli l-fatt li l-awtorità kontraenti ma tatx marki speċifiċi mit-total disponibbli ta’ 40 punt għas-sotto-kriterji differenti hemm previsti (ara wkoll il-punti 93 u 94 iktar ’il fuq).

53

Għalhekk, jeħtieġ li jiġi konkluż li l-ġudizzju suġġettiv negattiv imwettaq mill-awtorità kontraenti fuq l-offerta tal-ewwel rikorrenti fuq dan il-punt ma huwiex appoġġat mill-kliem tal-ewwel kriterju tal-għoti. Fuq kollox, l-ippeżar sottostanti dan il-ġudizzju ma jirriżultax b’mod suffiċjentement ċar, preċiż u inekwivoku mill-imsemmi kriterju sabiex jippermetti lill-offerenti kollha raġonevolment informati u normalment diliġenti li jifhmu l-portata eżatta u li jinterpretawh bl-istess mod. Billi wettaq, għall-kuntrarju tar-rekwiżiti li jirriżultaw mill-ġurisprudenza ċċitata fil-punti 44 u 48 iktar ’il fuq, ippeżar tas-sotto-kriterji differenti fi ħdan l-imsemmi kriterju tal-għoti li la kien previst mill-ispeċifikazzjonijiet tal-kuntratt u lanqas ikkomunikat minn qabel lill-offerenti, l-UASI b’hekk kiser, għad-detriment tar-rikorrenti, il-prinċipju ta’ ugwaljanza tal-opportunità u ta’ trasparenza.

54

Għalhekk, it-tieni ilment għandu jiġi milqugħ.

55

Għalhekk, it-tieni motiv għandu jiġi parzjalment miċħud u parzjalment milqugħ.

56

Ir-rikorrenti jikkunsidraw li l-unika informazzjoni difettuża pprovduta mill-UASI tikkonsisti f’diversi żbalji gravi u manifesti ta’ evalwazzjoni, li fl-assenza tagħhom l-offerta tal-ewwel rikorrenti setgħet tiġi kklassifikata fl-ewwel post skont il-mekkaniżmu ta’ kaskata. Fl-opinjoni tagħhom, dawn l-iżbalji jivvizzjaw l-evalwazzjoni tal-awtorità kontraenti fir-rigward ta’ kull wieħed mill-kriterji tal-għoti previsti mill-ispeċifikazzjonijiet tal-kuntratt. F’dan il-kuntest, ir-rikorrenti jikkontestaw b’mod partikolari il-kummentarji negattivi esposti fl-ittra tal-UASI tal-11 ta’ April u tat-2 ta’ Mejju 2011.

57

Fir-rigward tal-evalwazzjoni tal-awtorità kontraenti inkonnessjoni mal-ewwel kriterju tal-għoti, ir-rikorrenti jinvokaw ħdax-il ilment li jeħtieġ li jiġu evalwati, sussegwentement, jew b’mod individwali, jew – meta jissoprapożizzjonaw lil xulxin – b’mod konġunt. F’dan ir-rigward, hemm lok li jitfakkar li l-imsemmi kriterju tal-għoti jirrikjedi li l-offerent li jippreżenta “il-kompiti u l-attivitajiet li huwa għandu jwettaq fil-qasam tal-amminstrazzjoni tal-proġett, abbażi tal-metodoloġija u l-esperjenza tiegħu”, obbligu li għandu jinkludi, b’mod partikolari, iżda mhux esklużivament, seba’ sotto-kriterji, jiġifieri l-kontroll progressiv, il-proċedura ta’ amministrazzjoni tal-kwistjonijiet li jinqalgħu, il-proċedura ta’ amministrazzjoni tat-tibdil, l-amministrazzjoni tal-proċeduri ta’ intervent ta’ eskalazzjoni, il-programm ta’ kapitalizzazzjoni tal-esperjenza, il-pjan ta’ komunikazzjoni u l-proċeduri ta’ aċċettazzjoni tal-prodott li għandu jingħata (ara l-punt 5 iktar ’il fuq).

58

Barra minn hekk, għandu jiġi enfasizzat li l-awtorità kontraenti għandha setgħa diskrezzjonali wiesgħa fir-rigward tal-elementi li għandhom jitqiesu sabiex tittieħed deċiżjoni li jingħata kuntratt f’sejħa għal offerti u li l-istħarriġ tal-Qorti Ġenerali għandu jkun limitat għall-verifika li r-regoli tal-proċedura u tal-motivazzjoni huma osservati, kif ukoll tal-preċiżjoni materjali tal-fatti kif ukoll tal-assenza ta’ żball gravi u ċar ta’ evalwazzjoni u ta’ użu ħażin ta’ poter (ara s-sentenza tat-23 ta’ Novembru 2011, bpost vs Il-Kummissjoni, T‑514/09, EU:T:2011:689, punt 121 u l-ġurisprudenza ċċitata).

81

Permezz tas-sitt ilment, ir-rikorrenti jikkontestaw l-evalwazzjoni tal-UASI li amministratur ta’ programm, amministratur prinċipali ta’ proġett u amministratur ta’ proġett ma kinux neċessarji għal kull proġett. Fid-dawl tar-rekwiżiti tal-ipoteżi ta’ xogħol Nru 1, ir-rikorrenti ippreżentaw u ġġustifikaw, fil-Kapitoli 2 u 4 tal-offerta tagħhom, abbażi tal-esperjenza tagħhom, kif rikjest mill-ispeċifikazzjonijiet tal-kuntratt, il-proposta tagħhom li jistabbilixxu uffiċċju tal-proġett, li jinkludi amministratur tal-programm u amministratur prinċipali tal-proġett.

82

Jeħtieġ li jitfakkar li, fl-ittra tiegħu tal-11 ta’ April 2011, l-UASI irrileva li “il-proġetti msemmija fl-offerta [tar-rikorrenti] ma kinux kollha jirrikjedu amministratur tal-programm, amministratur prinċipali tal-proġett u ta’ amministratur tal-proġett”. Fl-atti tiegħu quddiem il-Qorti Ġenerali, l-UASI kkonferma li kien b’mod żbaljat li r-rikorrenti ppreżumew li l-UASI jmexxi l-proġetti kollha tiegħu fil-kuntest tal-istess programm, fatt li wassalhom sabiex jipproponu soluzzjoni permezz ta’ amministratur tal-programm, amministratur prinċipali tal-proġett u ta’ amministratur tal-proġett għal kull proġett. Issa, id-daqs limitat u l-portata limitata tal-proġett li għandu jintuża bħala eżempju, jiġifieri l-ipoteżi ta’ xogħol Nru 1, ma ġġustifikax l-użu ta’ dawn it-tliet profili.

83

F’dan ir-rigward, hemm lok li jitfakkar li jirriżulta mid-deskrizzjoni ġenerali, fl-ispeċifikazzjonijiet tal-kuntratt, tar-rekwiżiti li għandhom jiġu ssodisfatti mill-offerenti li dawn tal-aħħar kienu obbligati jippreżentaw “il-kompiti u l-attivitajiet li għandhom jiġu eżegwiti bil-għan li jiġi ġestit u mmexxi sewwa l-proġett imsemmi fl-ipoteżi tax-xogħol Nru 1”. Barra minn hekk, l-ipoteżi ta’ xogħol Nru 1, kif esposta fl-Anness 18 tal-ispeċifikazzjonijiet tal-kuntratt sempliċiment isemmi “proġett ta’ kostruzzonjoni ta’ sistema tal-informatika” u mhux programm li jiġbor fih il-proġetti differenti ta’ dan it-tip, b’tali mod li l-awtorità kontraenti setgħet validament tikkritika l-proposta mir-rikorrenti ta’ amministratur tal-programm.

84

Għall-kuntrarju, mill-ispeċifikazzjonijiet tal-kuntratt ma jirriżultax biċ-ċarezza u bil-preċiżjoni rikjesti fis-sens tal-ġurisprudenza ċċitata fil-punt 44 iktar ’il fuq, b’mod partikolari mill-ewwel kriterju tal-għoti u mid-definizzjoni tal-ipoteżi ta’ xogħol Nru 1 li l-UASI kellu l-intenzjoni li jistieden lill-offerenti jippreżentaw soluzzjoni li lanqas ma tiġbor fiha l-profili tal-amministraturi prinċipali tal-proġett u tal-amministratur tal-proġett kif propost mir-rikorrenti. Bl-istess mod, l-UASI baqa’ ma spjegax il-motivi għaliex il-proposta ta’ tali profili hija inkompatibbli mal-ipoteżi ta’ xogħol Nru 1. Fl-aħħar, b’differenza mid-difiża tiegħu invokata fir-rigward tal-ewwel sal-ħames ilment, l-UASI ma invokax li, fuq dan il-punt, ir-rikorrenti ddevjaw mill-metodoloġija Prince2. Issa, fid-dawl tan-nuqqas ta’ preċiżjoni tal-ispeċifikazzjonijiet tal-kuntratt dwar dan is-suġġett, hemm lok li jitfakkar li r-rikorrenti kienu liberi, skont l-ewwel kriterju tal-għoti, li jippreżentaw il-kompiti u l-attivitajiet li għandhom jitwettqu fil-qasam tal-amministrazzjoni tal-proġett abbażi tal-metodoloġija proprja tagħhom u tal-esperjenza proprja tagħhom.

85

Fid-dawl, b’mod partikolari, ta’ dan in-nuqqas ta’ preċiżjoni tal-ispeċifikazzjonijiet tal-kuntratt kif ukoll tan-natura suċċinta u vaga tal-ġudizzju tal-kumitat tal-evalwazzjoni, huwa impossibbli, kemm għar-rikorrenti kif ukoll għall-Qorti Ġenerali, li jivverifikaw il-plawżibbiltà tal-kritika invokata dwar l-inklużjoni ta’ amministratur prinċipali ta’ proġett u ta’ amministratur ta’ proġett u, għaldaqstant, li jiġi deċiż jekk din kinitx ivvizzjata bi żball manifest ta’ evalwazzjoni.

86

F’dawn iċ-ċirkustanzi, hemm lok li jiġi konkluż li jeżisti nuqqas ta’ motivazzjoni fuq dan il-punt fis-sens tat-tieni paragrafu tal-Artikolu 296 TFUE, moqri flimkien mal-Artikolu 100(2) tar-Regolament finanzjarju ġenerali (ara l-punti 125 sa 135 iktar ’il quddiem).

87

Permezz tat-tmien ilment, ir-rikorrenti jikkontestaw il-kummentarju finali tal-kumitat ta’ evalwazzjoni abbażi tal-ewwel kriterju tal-għoti, li ‘‘[l-]globalità tal-offerta tal-[ewwel rikorrenti] hija operazzjonali ħafna minflok strateġika (very operational instead of strategic) u tiffoka fuq tip ieħor ta’ amministratur tal-proġett differenti minn dak previst mill-UASI”. Dan il-kummentarju huwa arbitrarju u mhux sostnut mill-ispeċifikazzjonijiet tal-kuntratt. L-offerta tal-ewwel rikorrent tissodisfa r-rekwiżiti kollha tal-ispeċifikazzjonijiet tal-kuntratt u tal-prattiki tajba tas-settur tal-amministrazzjoni tal-proġett, jiġifieri Prince2. F’dan ir-rigward, ir-rikorrenti jagħmlu riferiment għall-punt 4.1.1 tal-offerta tagħhom, intitolat “Struttura tal-organizzazzjoni”, (Organisation structure) li tipproponi struttura unifikata u ċċentralizzata li fil-kuntest tagħha kull proġett, inklużi l-proġetti indipendenti, bħal dawk imsemmija fl-ipoteżi tax-xogħol Nru 1, jew proġetti li jaqgħu fi programm, ser jiġu diretti, immexxija, ikkontrollati u segwiti mill-uffiċċju tal-proġett. L-amministratur tal-programm ikun membru tal-uffiċċju tal-proġett u jkollu kmand globali filwaqt li jeżerċita kontroll ġenerali fuq il-proġetti kollha u fuq il-programmi mwettqa skont il-kuntratt-kwadru sabiex b’hekk jiżgura l-amministrazzjoni effikaċi, omoġenja u adegwata tagħhom. Għaldaqstant, billi ppenalizza l-offerta tal-ewwel rikorrenti abbażi ta’ rekwiżit mhux previst fl-ispeċifikazzjonijiet tal-kuntratt, jiġifieri l-fatt li “l-UASI [kien] iddirieġa il-proġetti kollha tiegħu fl-istess programm”, l-UASI wettaq żball manifest ta’ evalwazzjoni.

88

Fil-pendenzi tal-kawża, l-UASI sempliċiment invoka dwar dan is-suġġett l-argument imfakkar fil-punt 82 iktar ’il fuq. Issa, skont il-premessi esposti fil-punt 84 iktar ’il fuq, għandu jiġi rrilevat li, fl-assenza ta’ kriterji suffiċjentement ċari u preċiżi esposti fl-ispeċifikazzjonijiet tal-kuntratt, il-kummentarju finali tal-kumitat ta’ evalwazzjoni, fuq kollox il-kritika vaga bbażata fuq il-fatt li l-UASI kien jipprevedi “tip ieħor ta’ amminstrazzjoni tal-proġett”, ma tinftiehemx, b’tali mod li la r-rikorrenti u lanqas il-Qorti Ġenerali ma jistgħu jivverifikaw il-plawżibbiltà tagħha u, għaldaqstant, il-kwistjoni dwar jekk din il-kritika hijiex ivvizzjata bi żball manifest ta’ evalwazzjoni. Dan iktar u iktar peress li, skont l-ewwel kriterju tal-għoti, l-offerenti kienu obbligati li jippreżentaw il-kompiti u l-attivitajiet li għandhom iwettqu fil-qasam tal-amministrazzjoni tal-proġett, abbażi tal-metodoloġija proprja tagħhom u tal-esperjenza proprja tagħhom u, għaldaqstant, mhux abbażi ta’ prattika jew esperjenza possibbli tal-UASI mhux deskritta fl-ispeċifikazzjonijiet tal-kuntratt.

89

F’dawn iċ-ċirkustanzi, hemm lok li jiġi konkluż li jeżisti nuqqas ta’ motivazzjoni dwar dan il-punt fis-sens tat-tieni paragrafu tal-Artikolu 296 TFUE, moqri flimkien mal-Artikolu 100(2) tar-Regolament finanzjarju ġenerali (ara l-punti 125 sa 135 iktar ’il fuq).

90

Permezz tas-seba’ u l-ħdax ilment, ir-rikorrenti jikkontestaw, essenzjalment, ir-risposta allegatament difettuża, evażiva u vaga tal-UASI, fl-ittra tiegħu tat-2 ta’ Mejju 2011, b’mod partikolari dwar l-immarkar u l-evalwazzjoni komparattiva tal-offerta tagħhom, fid-dawl tal-ewwel kriterju tal-għoti, meta mqabbla mal-offerti l-oħra tal-kontraenti l-oħra. L-UASI sempliċiment jesponi b’mod vag li ż-żewġ offerti l-oħra ġew ikkunsidrati bħala aħjar sa fejn dawn jippreżentaw kull waħda “aspetti teoretiċi u prattiċi tal-użu tal-kwadru Prince2” u “jidentifikaw l-amministrazzjoni tat-tibdil u l-komunikazzjoni bħala żewġ kompiti l-iktar essenzjali għas-suċċess tal-proġett”. Madankollu, fil-punti 2.1.1 u 2.1.2 tal-offerta tagħhom, ir-rikorrenti ippreżentaw huma wkoll l-aspetti teoretiċi u prattiċi tal-metodoloġija Prince2 tal-amministrazzjoni tal-proġett u pprovdew proposta fid-dettall tal- amministrazzjoni tat-tibdil u l-komunikazzjoni applikati għall-każ tal-proġett tal-UASI. Barra minn hekk, fil-punti 2.2 sa 2.11 tal-imsemmija offerta, huma esponew, fid-dettall, l-aspetti prattiċi tal-użu tal-approċċ metodoloġiku tagħhom ibbażat fuq Prince2 għall-amministrazzjoni tal-proġett u għall-eżekuzzjoni tal-kompiti ta’ amministrazzjoni tal-proġett abbażi tal-ipoteżi ta’ xogħol Nru 1. Bl-istess mod, il-punt 2.5 ta’ din l-offerta jiddeskrivi b’mod iċċirkustanzjat l-approċċ li għandu jiġi segwit sabiex jiġi amministrat it-tibdil, u l-punti tiegħu 2.10 u 2.8 jesponu l-pjan ta’ komunikazzjoni u l-proċeduri ta’ intervent ta’ eskalazzjoni proposti, mingħajr l-UASI ma pprovda spjegazzjoni dwar l-allegati difetti jew dwar il-kontenut allegatament aħjar tal-offerti l-oħra f’dan ir-rigward (id-disa’ ilment). Barra minn hekk, l-ewwel kriterju tal-għoti ma kienx jeżiġi li tiġi speċifikata l-importanza tal-kompiti proposti fil-qasam tal-amministrazzjoni tal-proġett, fatt li kien imur kontra l-prattiki tajba u l-metodoloġiji stabbiliti ferm fl-iskala internazzjonali. Fi kwalunkwe każ, ir-rikorrenti ppreżentaw metodoloġija ta’ amministrazzjoni tal-proġett iddefinita sewwa, koerenti u adegwatament strutturata, li tipprovdi li l-proċessi, attivitajiet u kompiti ta’ amministrazzjoni huma kollha essenzjali għall-għeluq b’suċċess tal-proġett (are essential for the successful execution of the project) (l-għaxar ilment). Fl-aħħar, l-UASI ma jiġġustifikax il-marka dgħajfa ħafna ta’ 22.81 punt mogħtija lill-offerta tal-ewwel rikorrenti fir-rigward tal-ewwel kriterju tal-għoti, filwaqt li l-offerta tal-kontraenti kklassifikata fl-ewwel post kisbet in-numru massimu ta’ 40 punt (il-ħdax ilment).

91

Jeħtieġ li jsir riferiment, qabel xejn, għall-premessi esposti fil-punti 48 sa 53 iktar ’il fuq b’risposta għat-tieni motiv, li jinvoka l-fatt li l-ġudizzju komparattiv negattiv fir-rigward tal-offerta tal-ewwel rikorrenti li l-offerti tal-kontraenti l-oħra “kienu jidentifikaw l-amministrazzjoni tat-tibdil u l-komunikazzjoni bħala ż-żewġ kompiti l-iktar essenzjali għas-suċċess tal-proġett” kien ivvizzjat bi ksur tal-prinċipji ta’ ugwaljanza fl-opportunità u ta’ trasparenza, sa fejn ma huwiex sostnut mill-kliem tal-ewwel kriterju tal-għoti u, għaldaqstant, jaqa’ taħt ippeżar mhux ikkomunikat minn qabel lill-offerenti tas-sotto-kriterji differenti fi ħdan l-istess kriterju tal-għoti. Minn dan jirriżulta neċessarjament li dan il-ġudizzju ma huwiex plawżibbli u huwa vvizzjat ukoll minn żball manifest ta’ evalwazzjoni fl-ippeżar tal-imsemmija sotto-kriterji.

92

Sussegwentement, fil-pendenzi tal-kawża, l-UASI ma qiesx li għandu jieħu pożizzjoni fuq l-argument iċċirkustanzjat tar-rikorrenti, u lanqas fuq il-mod kif il-kumitat ta’ evalwazzjoni kien wasal għal għadd magħqud ta’ 22.81 fuq total ta’ 40 punt fir-rigward tal-offerta tal-ewwel rikorrenti, kif tiddikjara l-ittra tal-UASI tat-2 ta’ Mejju 2011. Madankollu, waqt is-seduta, b’risposta għal domanda preċiża tal-Qorti Ġenerali, l-UASI essenzjalment spjega li, f’dan il-każ, l-evalwazzjoni tal-evalwaturi tal-offerta tal-ewwel rikorrent ma wettqitx formula matematika li wasslet għat-tnaqqis ta’ ċerti punti skont is-sotto-kriterju jew għal ċerti kummentarji negattivi, peress li l-imsemmija evalwaturi taw marka globali għall-kwalità ġenerali tal-parti kollha tal-imsemmija offerta abbażi tal-ewwel kriterju tal-għoti. F’dan ir-rigward, l-istabbiliment ta’ marka li tinkludi żewġ ċifri wara l-punt (22.81) huwa dovut għall-fatt li l-offerti ġew evalwati minn diversi evalwaturi li l-marki tagħhom qabel xejn magħduda flimkien ġew sussegwentement diviżi bin-numru tal-imsemmija evalwaturi.

93

Issa, il-Qorti Ġenerali tikkunsidra li dawn l-ispjegazzjonijiet, mhux esposti fl-ittra tal-UASI tat-2 ta Mejju 2011, huma tardivi u wkoll ma humiex plawżibbli. F’dan ir-rigward, fin-nuqqas ta’ preċiżjoni fl-ispeċifikazzjonijiet tal-kuntratt dwar l-ippeżar effettiv tas-sotto-kriterji differenti fi ħdan l-ewwel kriterju tal-għoti u ta’ prova dokumentarja ppreżentata mill-UASI għal dan l-għan, għandu jiġi miċħud bħala mhux kredibbli l-argument tiegħu li l-evalwaturi ma rabtux l-għoti ta’ ċerti marki mal-imsemmija sotto-kriterji li kienu enumerati fil-kuntest tal-imsemmi kriterju tal-għoti u li skontu l-offerenti setgħu jilħqu numru massimu ta’ 40 punt. Sussegwentement, kif sostnew ir-rikorrenti waqt is-seduta, ma iktar ma jidhirx kredibbli li l-evalwaturi ma użawx formula matematika jew, tal-inqas, ma tawx frazzjonijiet ta’ marki għas-sotto-kriterji għall-finijiet tal-evalwazzjoni tal-offerti fid-dawl tal-imsemmi kriterju tal-għoti. Fil-fatt, anki jekk jiġi preżunt li l-evalwazzjonijiet magħquda ġew diviżi bin-numru totali ta’ evalwaturi, kif jippretendi l-UASI, fl-assenza ta’ tali approċċ matematiku jew ta’ allokazzjoni ta’ frazzjonijiet tal-marki għas-sotto-kriterji, ma kienx possibbli li tinkiseb marka magħquda li tinkludi żewġ ċifri wara l-punt. Għaldaqstant, l-argument tal-UASI li huwa ta marka globali għall-parti kollha tal-offerta tal-ewwel rikorrenti abbażi tal-ewwel kriterju tal-għoti ma jistax jintlaqa’.

94

Għandu jiġi kkonstatat li l-ittra tal-UASI tat-2 ta’ Mejju 2011 ma tipprovdi l-ebda spjegazzjoni rilevanti għal dan is-suġġett. Fil-fatt, l-imsemmija ittra sempliċiment tikkonstata b’mod vag li “l-offerti [tal-kontraenti l-oħra] li jissodisfaw l-ewwel kriterju tal-għoti b’mod tajjeb ħafna jew anki b’mod eċċellenti, jippreżentaw użu tajjeb ħafna tal-kwadru Prince2, billi jispjegaw qabel xejn il-kwadru qabel ma jiddefinixxu l-mod kif sejjer jintuża mill-UASI, b’tali mod li l-imsemmija offerti jkopru l-aspetti kemm teoretiċi kif ukoll prattiċi tal-użu tal-kwadru Prince2”. Barra minn hekk, l-UASI sempliċiment jirrileva li dawn l-offerti “jidentifikaw l-amministrazzjoni tat-tibdil u l-komunikazzjoni bħaż-żewġ kompiti l-iktar essenzjali għas-suċċess tal-proġett” sabiex jikkonkludi li, “[b’] paragun, il-kumitat ta’ evalwazzjoni sab proposti ta’ kwalità aħjar minn dawk [tar-rikorrenti]”. Issa, fid-dawl ta’ dawn il-kunsiderazzjonijiet ta’ evalwazzjoni mhux preċiżi u difettużi esposti f’din l-ittra, li jkopru biss għadd ta’ sotto-kriterji tal-ewwel kriterju tal-għoti u jonqsu milli jindikaw il-marka preċiża li l-awtorità kontraenti kellha l-intenzjoni li tagħti lil kull wieħed minn dawn is-sotto-kriterji, kif ukoll tas-silenzju tal-ispeċifikazzjonijiet tal-kuntratt dwar l-ippeżar ta’ dawn is-sotto-kriterji fl-intier tagħhom, la r-rikorrenti u lanqas il-Qorti Ġenerali ma jinsabu f’pożizzjoni li jifhmu l-mod kif l-awtorità kontraenti tat, fil-kuntest tal-evalwazzjonijiet tagħha individwali u komparattivi tal-offerti magħmula, il-marki disponibbli abbażi tal-ewwel kriterju tal-għoti u tas-sotto-kriterji differenti tiegħu.

95

Konsegwentement, ħlief għall-konstatazzjoni tal-iżball manifest ta’ evalwazzjoni msemmija fil-punt 90 iktar ’il fuq, il-Qorti Ġenerali ma tistax tikkonkludi dwar l-eżistenza jew meno ta’ tali żbalji manifest f’dan ir-rigward, preċiżament peress li d-deċiżjoni tal-għoti ma tinkludix motivazzjoni suffiċjenti fis-sens tat-tieni paragrafu tal-Artikolu 296 TFUE, moqri flimkien mal-ewwel paragrafu tal-Artikolu 100(2) tar-Regolament finanzjarju ġenerali (ara l-punti 125 sa 135 iktar ’il fuq).

96

Fid-dawl ta’ dawn il-kunsiderazzjonijiet kollha preċedenti, b’riżerva għall-evalwazzjoni tal-ewwel motiv, ibbażat fuq nuqqas ta’ motivazzjoni, id-disa’ ilment ta’ din il-parti tat-tielet motiv, marbuta mal-ewwel kriterju ta’ evalwazzjoni, għandha tintlaqa’ sa fejn din tikkonċerna l-iżball manifest ta’ evalwazzjoni kkonstatat fil-punt 91 iktar ’il fuq u l-imsemmija parti għandha tiġi miċħuda fil-kumplament tagħha, bħala infondata.

97

Ir-rikorrenti jikkontestaw l-evalwazzjoni negattiva tal-offerta tagħhom fid-dawl tat-tieni kriterju tal-għoti, kif esposta fl-ittra tal-11 ta’ April 2011, li tiddikjara li ma hemm “l-ebda eżempju ta’ prodott li għandu jingħata għall-istudju tal-każ: rekord ta’ kuljum, reġistru tal-elementi ta’ konfigurazzjoni, rapporti fuq l-indikaturi prinċipali”. Insostenn ta’ din il-parti, fl-ewwel lok, huma jinvokaw, essenzjalment, li l-UASI ma wieġeb għal ebda waħda mill-kontestazzjonijiet iċċirkustanzjati li huma kienu fformulaw dwar dan is-suġġett fl-ittra tagħhom tat-18 ta’ April 2011. Fil-fatt, l-ispeċifikazzjonijiet tal-kuntratt ma eżiġewx tali eżempju, iżda biss li jiġu ppreżentati il-kompiti u l-attivitajiet li għandhom jitwettqu fil-qasam tal-pariri tekniċi. Fit-tieni lok, il-punt 6.2 tal-offerta tal-ewwel rikorrenti jipprovdi eżempji tal-forma u mudelli użati għal kull prodott li għandu jiġi pprovdut, fatt li finalment ġie ammess mill-UASI. Dawn il-mudelli huma eżawrjenti u suffiċjentement iċċirkustanzjati sa fejn huma jippreżentaw l-istruttura, it-taqsimiet u l-kontenut eżatt tas-servizzi li għandhom jiġu pprovduti fil-kuntest tax-xenarju ipotetiku espost fl-ispeċifikazzjonijiet tal-kuntratt. Fit-tielet lok, fl-ittra tat-2 ta’ Mejju 2011, l-UASI ma spjegax kif il-kontraenti l-oħra kienu taw prova ta’ eżempji tajbin ħafna tal-prodotti li għandhom jiġu pprovduti, u lanqas ir-raġunijiet li abbażi tagħhom l-offerti tagħhom instabu li huma ta’ kwalità aħjar minn dawn tar-rikorrenti. L-elementi invokati mill-UASI ma humiex prodotti li għandhom jiġu pprovduti li jaqgħu taħt il-provvista ta’ servizzi ta’ pariri tekniċi, iżda biss prodotti li għandhom jiġu pprovduti marbuta mal-amministrazzjoni ta’ proġett u huma ssuġġeriti mill-metodoloġija Prince2. Waqt is-seduta, ir-rikorrenti żiedu li, kif espost fil-kontra-replika, fil-kuntest tal-evalwazzjoni tal-offerti abbażi tat-tieni kriterju tal-għoti, l-UASI ddeċieda b’mod pożittiv dwar is-sottomissjoni mill-kontraenti ta’ kampjuni tal-proġetti preċedenti, fatt li jwassal, minn naħa, sabiex jiġi introdott a posteriori sotto-kriterju ġdid u, min-naħa l-oħra, sabiex jitħallat illegalment il-kriterju tal-għażla tal-esperjenza mal-kriterju tal-għoti inkwistjoni. Madankollu, mill-punti 11 tal-ispeċifikazzjonijiet tal-kuntratt taħt it-titolu “Sottomissjonijiet ta’ eżempji” (Submission of samples) jirriżulta b’mod ċar li “is-sottomissjoni ta’ offerta ma hijiex suġġetta għall-obbligu li tkun akkumpanjata minn eżempji”. (The submission of a tender is not subject to submitting any samples).

98

L-UASI itenni li t-terminu “eżempju” użat fl-ittra tal-11 ta’ April 2011 għandu jinftiehem bħala li jfisser, essenzjalment “li jipprovdi preżentazzjoni” tas-servizzi proposti. F’dan ir-rigward, l-ispeċifikazzjonijiet tal-kuntratt eżiġew deskrizzjoni tal-mod kif il-kompiti u l-attivitajiet jiġu eżegwiti u, għaldaqstant, li tingħata preżentazzjoni adegwata tas-servizzi, sostnuta minn kampjuni tal-imsemmija servizzi pprovduti abbażi tal-ipoteżi ta’ xogħol Nru 1. Il-kummentarju negattiv dwar il-fatt li l-offerta tal-ewwel rikorrent tinkludi biss ħames “kampjuni verġni” jipprova l-kwalità baxxa tagħha u li r-rikorrenti kienu konxji min-neċessità li jinkludu fl-offerta tagħhom kampjuni tas-servizz. Issa, b’differenza mill-kampjuni ppreżentati minn kontraenti oħra, b’mod partikolari minn Accenture, li kisbet il-marka massima fuq dan il-punt, il-kampjuni verġni ppreżentati mir-rikorrenti ma ġewx adattati għall-ipoteżi ta’ xogħol Nru 1. Waqt is-seduta, l-UASI ppreċiża li, b’dan, huwa ma evalwax l-esperjenza passata tal-offerenti, iżda ħa inkunsiderazzjoni biss il-fatt li l-kampjuni sottomessi ta’ prodotti li għandhom jiġi pprovduti kienu jippreżentaw valur miżjud sa fejn dawn juru li l-imsemmija offerenti kienu fehmu sewwa l-bżonnijiet tal-UASI u dan kien neċessarju.

99

Hemm lok li jitfakkar, qabel xejn, li, minn naħa, it-tieni kriterju tal-għoti kien jipprevedi li “l-offerenti għandu jippreżenta l-kompiti u l-attivitajiet li huwa għandu jwettaq fil-qasam tal-pariri tekniċi, abbażi tal-metodoloġija u l-esperjenza tiegħu, inkluż b’mod partikolari (iżda mhux esklużivament) [...] evalwazzjoni tal-arkitettura; analiżi tal-prestazzjoni; evalwazzjoni tas-sigurtà; [u] integrazzjoni f’sistemi oħra” u, li, min-naħa l-oħra, l-offerta tal-ewwel rikorrenti 24.5 minn total ta’ 30 punt abbażi tal-imsemmi kriterju tal-għoti, filwaqt li l-kontraenti l-oħra ingħataw 28 u 20 punt rispettivament.

100

Sussegwentement, għandu jiġi kkonstatat li l-kritika ddikjarata fl-ittra tal-UASI tal-11 ta’ April 2011, li l-offerta tal-ewwel rikorrenti ma tippreżenta “l-ebda eżempju ta’ prodott li għandu jiġi pprovdut għall-istudju tal-każ [...]”, hija bbażata fuq fatti mhux ikkontestati, peress li r-rikorrenti llimitaw ruħhom għas-sottomissjoni tal-kampjuni verġni jew ta’ sempliċi mudelli vojta li ġew annessi mal-punt 6.2 tal-offerta tagħhom.

101

Madankollu, ma jirriżultax mill-ispeċifikazzjonijiet tal-kuntratt u, b’mod partikolari, tat-tieni kriterju tal-għoti, li l-offerenti kienu jew obbligati li jippreżentaw “eżempj[i] tal-prodott li għandu jiġi pprovdut għall-istudju tal-każ”, jew li tali preżentazzjoni setgħet tiġi kkunsidrata mill-awtorità kontraenti bħala li għandha valur miżjud, kif jippretendi l-UASI fil-pendenzi tal-kawża. Għall-kuntrarju, kif isostnu r-rikorrenti, il-punt 11 tal-ispeċifikazzjonijiet tal-kuntratt, taħt it-titolu “Sottomissjoni ta’ eżempji”, (Submission of samples) kien jipprevedi b’mod ċar li “is-sottomissjoni ta’ offerta ma hijiex suġġetta għall-obbligu li tkun akkumpanjata minn eżempji”. (The submission of a tender is not subject to submitting any samples) F’dan ir-rigward, għandu jiġi miċħud l-argument mhux kredibbli tal-UASI li t-terminu “eżempju” użat fl-ittra tal-11 ta’ April 2011 għandu jinftiehem bħala li jfisser, essenzjalment, “li jipprovdi preżentazzjoni” tas-servizzi proposti, peress li l-kummentarju negattiv “l-ebda eżempju ta’ prodott li għandu jiġi pprovdut għall-istudju tal-każ [...]” jista’ jinftiehem biss f’dan is-sens li, skont l-awtorità kontraenti, ir-rikorrenti naqsu milli jippreżentaw tali eżempji. Barra minn hekk, il-motivi li abbażi tagħhom l-awtorità kontraenti kkunsidrat li l-offerta tal-ewwel rikorrenti kienet tipproponi preżentazzjoni insuffiċjenti tal-elementi “rekord ta’ kuljum, reġistru tal-elementi ta’ konfigurazzjoni, rapporti fuq l-indikaturi prinċipali” (daily log, configuration item record, highlight reports) ma jirriżultawx b’mod preċiż biżżejjed mill-imsemmija ittra.

102

Dawn il-kunsiderazzjonijiet huma suffiċjenti sabiex jiġi kkonstatat li l-kummentarju negattiv espost fl-ittra tal-UASI tal-11 ta’ April 2011 ma jsibx appoġġ fl-ispeċifikazzjonijiet tal-kuntratt u, għaldaqstant, huwa vvizzjat bi żball manifest ta’ evalwazzjoni, mingħajr il-bżonn li jiġu eżaminati l-ilmenti l-oħra invokati mir-rikorrenti f’dan il-kuntest.

103

Għaldaqstant, il-parti ta’ dan il-motiv marbuta mal-evalwazzjoni tal-offerta tal-ewwel rikorrenti fir-rigward tat-tieni kriterju tal-għoti għandha tintlaqa’.

104

Hemm lok li jitfakkar li t-tielet kriterju tal-għoti kien jeżiġi min-naħa tal-offerenti li jiddeterminaw l-“allokazzjoni tal-isforz stmat għal kull kompitu u għal kull attività tal-amministrazzjoni tal-proġett” u li, f’dan ir-rigward, l-offerta tal-ewwel rikorrenti ingħatat biss erba’ punti minn total ta’ għaxar punti. Insostenn ta’ din il-marka, l-UASI kkonferma, fl-ittra tiegħu tal-11 ta’ April 2011, fir-rigward tal-aspetti negattivi, li “proġett li ma huwiex marbut ma’ programm (skont l-ipoteżi ta’ xogħol Nru. 1) ma tirrikjedi l-ebda amministratur ta’ programm [;] preżenza ta’ numru kbir ta’ livelli ta’ spejjeż ġenerali [;] l-isforz stmat li ġie allokat għall-amministrazzjoni tal-proġett jirrappreżenta 24 % tal-assjem tal-isforz imwettaq fil-proġett ippreżentat fl-ipoteżi ta’ xogħol Nru. 1”. Fl-ittra tiegħu tat-2 ta’ Mejju 2011, l-UASI ippreċiżat mill-ġdid li “proposti aħjar ma jissarfux fi sforz għal amministartur ta’ programm u b’hekk jiġġustifikaw dan il-punt bħala konsegwenza” u li, “[b’] paragun, il-kumitat ta’ evalwazzjoni [kienet] ippreferiet dan l-approċċ u tatu marka aħjar”.

[omissis]

107

Fir-rigward, qabel xejn, tal-iżball fil-kalkolu jew ta’ apprezzament tal-fatti dwar l-isforz stmat allokat għall-amministrazzjoni tal-programm, jiġifieri ta’ 12 % minflok ta’ 24 %, hemm lok li jiġi rrilevat li, matul il-proċedura ta’ sejħa għal offerti, l-UASI kien irrikonoxxa l-eżistenza ta’ tali żball u, fil-pendenzi tal-kawża, ipproduċa nota interna tal-24 ta’ April 2011 li tippreżenta kalkoli alternattivi li jippermettu li jiġi kkunsidrat li, anki mingħajr l-iżball fil-kalkolu jew fl-ipoteżi tal-għoti ta’ numru massimu ta’ għaxar punti lill-offerta tal-ewwel rikorrenti, din tal-aħħar kienet tiġi kklassifikata fit-tielet post skont il-mekkaniżmu ta’ kaskata. Issa, tali sempliċi żbalji fattwali u fil-kalkolu, peress li ma jistgħux jinċidu fuq ir-riżultat ta’ proċedura, ma jistgħux jiġġustifikaw l-annullament tal-att ikkontestat (ara, f’dan is-sens, is-sentenzi tad-19 ta’ Ottubru 2005, Freistaat Thüringen vs Il-Kummissjoni, T‑318/00, Ġabra, EU:T:2005:363, punt 191 u ġurisprudenza ċċitata, u tad-19 ta’ Marzu 2010, Evropaïki Dynamiki vs Il-Kummissjoni, T‑50/05, Ġabra, EU:T:2010:101, punt 159).

108

Għaldaqstant, dan l-iżball fattwali mhux ikkontestat ma jistax jagħti lok għal konstatazzjoni ta’ illegalità li tiġġustifika l-annullament tad-deċiżjoni tal-għoti.

[omissis]

111

Għaldaqstant, l-ilmenti diretti kontra l-evalwazzjoni tal-awtorità kontraenti fir-rigward tat-tielet kriterju tal-għoti għandhom jiġu miċħuda fit-totalità tagħhom.

Fuq l-allegati żbalji manifesti ta’ evalwazzjoni marbuta mar-raba’ kriterju tal-għoti

[omissis]

121

Minn dawn il-kunsiderazzjonijiet preċedenti kollha jirriżulta li, b’riżerva għall-evalwazzjoni tal-ewwel motiv, ibbażat fuq nuqqasijiet ta’ motivazzjoni, għandhom jintlaqgħu, minn naħa, id-disa’ ilment tal-ewwel parti, marbuta mal-ewwel kriterju ta’ evalwazzjoni, sa fejn din tikkonċerna l-iżball manifest ta’ evalwazzjoni kkonstatat fil-punt 91 iktar ’il fuq, u, min-naħa l-oħra, it-tieni parti, marbuta mat-tieni kriterju tal-għoti, fit-totalità tagħha (ara l-punti 97 sa 103 iktar ’il fuq), u li l-kumplament tat-tielet motiv għandu jiġi miċħud.

122

Permezz tal-ewwel motiv tagħhom, ir-rikorrenti jinvokaw atti diversi ta’ ksur tal-Artikolu 100(2) tar-Regolament finanzjarju ġenerali, tal-Artikolu 149 tal-metodi ta’ eżekuzzjoni kif ukoll tal-obbligu ta’ motivazzjoni fis-sens tat-tieni paragrafu tal-Artikolu 296 TFUE.

123

F’dan il-kuntest, ir-rikorrenti jitolbu lill-Qorti Ġenerali li tordna lill-UASI li jipproduċi l-verżjonijiet sħaħ u mhux kunfidenzjali tal-offerti tal-kontraenti l-oħra kif ukoll ir-rapport ta’ evalwazzjoni sħiħ, inklużi l-kummentarji marbuta mal-imsemmija offerti. Barra minn hekk, ir-rikorrenti jallegaw essenzjalment li l-estratti mir-rapport ta’ evalwazzjoni li jinkludi l-evalwazzjoni tal-offerta tagħhom huma, minħabba n-natura difettuża u vaga tagħhom, ivvizzjati b’nuqqas ta’ motivazzjoni li jimpedihom milli jsostnu b’mod utli d-drittijiet tagħhom u jirrendu, tal-inqas parzjalment, impossibbli stħarriġ tal-legalità tad-deċiżjoni tal-għoti mill-Qorti Ġenerali. Dan huwa partikolarment veru fir-rigward tal-motivi difettużi u insuffiċjenti esposti fl-ittra tal-UASI tat-2 ta’ Mejju 2011, li kienu intiżi li jiġġustifikaw l-evalwazzjoni komparattiva tal-offerta tal-ewwel rikorrenti meta mqabbla ma’ dawn tal-kontraenti l-oħra.

124

L-UASI jikkontesta dawn l-argumenti u jitlob li tiġi miċħuda t-talba għal miżuri ta’ organizzazzjoni tal-proċedura jew ta’ istruzzjoni tar-rikorrenti.

125

It-tieni nett, għandu jitfakkar li, skont ġurisprudenza stabbilita, fil-każijiet fejn l-istituzzjonijiet tal-Unjoni għandhom setgħa diskrezzjonali sabiex ikunu jistgħu jwettqu l-funzjonijiet tagħhom, l-osservanza tal-garanziji mogħtija mill-ordinament ġuridiku tal-Unjoni fil-proċeduri amministrattivi għandha importanza iktar u iktar fundamentali. F’dan ir-rigward, hemm lok li jitfakkar li, meta, bħal f’dan il-każ, l-istituzzjonijiet, organi jew korpi tal-Unjoni jkollhom, fil-kwalità tagħhom ta’ awtoritajiet kontraenti, setgħa diskrezzjonali wiesgħa, l-osservanza tal-garanziji kkonferiti mill-ordinament ġuridiku tal-Unjoni fil-proċeduri amministrattivi tassumi importanza iktar u iktar fundamentali. Fost dawn il-garanziji hemm, b’mod partikolari, l-obbligu li l-istituzzjoni kompetenti timmotiva b’mod suffiċjenti d-deċiżjonijiet tagħha. Għalhekk, huwa biss b’dan il-mod li l-qorti tal-Unjoni tkun f’pożizzjoni li tivverifika jekk l-elementi ta’ fatt u ta’ dritt li fuqhom jiddependi l-eżerċizzju tas-setgħa diskrezzjonali ġewx sodisfatti (sentenzi tal-21 ta’ Novembru 1991, Technische Universität München, C‑269/90, Ġabra, EU:C:1991:438, punt 14; tal-20 ta’ Mejju 2009, VIP Car Solutions vs Il-Parlament, T‑89/07, Ġabra, EU:T:2009:163, punt 61, u tat-12 ta’ Diċembru 2012, Evropaïki Dynamiki vs EFSA, T‑457/07, EU:T:2012:671, punt 42).

126

Skont l-obbligu ta’ motivazzjoni previst fit-tieni paragrafu tal-Artikolu 296 TFUE, l-awtur ta’ att għandu jkun juri b’mod ċar u mhux ekwivoku ir-raġunament tiegħu b’mod li jkun, minn naħa, jippermetti lill-persuni kkonċernati li jifhmu l-ġustifikazzjonijiet tal-miżura meħuda bil-għan li jsostnu d-drittijiet tagħhom u, min-naħa l-oħra, jippermetti lill-qorti teżerċita l-istħarriġ tagħha. Barra minn hekk, dan ir-rekwiżit ta’ motivazzjoni għandu jiġi evalwat skont iċ-ċirkustanzi tal-każ ineżami, b’mod partikolari l-kontenut tal-att, in-natura tal-motivi invokati u l-interess li d-destinatarji jew persuni oħra kkonċernati direttament u individwalment mill-att jista’ jkollhom li jirċievu spjegazzjonijiet (ara s-sentenza tal-21 ta’ Frar 2013, Evropaïki Dynamiki vs Il-Kummissjoni, T‑9/10, EU:T:2013:88, punti 25 u 26 u l-ġurisprudenza ċċitata). Barra minn hekk, l-obbligu ta’ motivazzjoni jikkostitwixxi rekwiżit proċedurali li għandu jiġi distint mill-kwistjoni tal-fondatezza tal-motivazzjoni, li taqa’ taħt il-legalità sostanzjali tal-att kontenzjuż (ara s-sentenza tat-22 ta’ Mejju 2012, Evropaïki Dynamiki vs Il-Kummissjoni, T‑17/09, EU:T:2012:243, punt 40 u l-ġurisprudenza ċċitata).

127

Fil-qasam tal-għoti tal-kuntratti pubbliċi, l-ewwel paragrafu tal-Artikolu 100(2) tar-Regolament finanzjarju ġenerali kif ukoll l-Artikolu 149(3) tal-modalitajiet ta’ eżekuzzjoni jispeċifikaw il-kundizzjonijiet li fihom l-awtorità kontraenti tissodisfa l-obbligu ta’ motivazzjoni tagħha fir-rigward tal-offerenti.

128

Għalhekk, skont l-ewwel subparagrafu tal-Artikolu 100(2) tar-Regolament finanzjarju ġenerali, “[l]-awtorità tal-kuntratti [awtorità kontraenti] għandha tinnotifika lill-kandidati jew lill-appaltaturi [offerenti] kollha li l-applikazzjonijiet jew l-offerti tagħhom huma miċħuda bil-bażi li fuqhom tkun ittieħdet id-deċiżjoni, u lill-appaltaturi kollha li l-offerti tagħhom huma ammissibbli u li jagħmlu talba bil-miktub, bil-karatteristiċi u l-vantaġġi relattivi ta’ l-appaltatur b’suċċess [offerent magħżul] u l-isem ta’ l-appaltatur li lilu jingħata il-kuntratt”.

129

F’dan ir-rigward, minn ġurisprudenza stabbilita jirriżulta li, abbażi ta’ din id-dispożizzjoni, ma jistax jiġi rikjest mill-awtorità kontraenti li din tittrażmetti lill-offerent li l-offerta tiegħu ma tkun ingħażlet, minn naħa, minbarra l-motivi taċ-ċaħda ta’ din tal-aħħar, sinteżi ddettaljat tal-mod kif kull dettall tal-offerta tiegħu ttieħed inkunsiderazzjoni abbażi tal-evalwazzjoni ta’ din tal-aħħar u, min-naħa l-oħra, fil-kuntest tal-komunikazzjoni tal-karatteristiċi u tal-vantaġġi marbuta mal-offerta magħżula, analiżi komparattiv fid-dettall ta’ din tal-aħħar u tal-offerta tal-offerent eskluż. Bl-istess mod, l-awtorità kontraenti ma hijiex obbligata li tipprovdi lill-offerent eskluż, fuq talba bil-miktub ta’ dan tal-aħħar, kopja sħiħa tar-rapport ta’ evalwazzjoni (sentenza tal-4 ta’ Ottubru 2012, Evropaïki Dynamiki vs Il-Kummissjoni, C‑629/11 P, EU:C:2012:617, punti 21 sa 23; Digrieti tal-20 ta’ Settembru 2011, Evropaïki Dynamiki vs Il-Kummissjoni, C‑561/10 P, EU:C:2011:598, punt 27, u tad-29 ta’ Novembru 2011, Evropaïki Dynamiki vs Il-Kummissjoni, C‑235/11 P, EU:C:2011:791, punti 50 u 51). Il-Qorti tal-Unjoni għandha tivverifika madankollu jekk il-metodu applikat mill-awtorità kontraenti għall-evalwazzjoni teknika tal-offerti huwiex iddikjarat b’mod ċar fl-ispeċifikazzjonijiet tal-kuntratt, inklużi l-kriterji differenti tal-għoti, il-piż rispettiv tagħhom fl-evalwazzjoni, jiġifieri fil-kalkolu tal-marka totali, kif ukoll in-numru minimu u massimu ta’ punti għal kull kriterju (ara, f’dan is-sens, is-sentenza Evropaïki Dynamiki vs Il-Kummissjoni, iċċitata iktar ’il fuq, EU:C:2012:617, punt 29).

130

Il-ġurisprudenza ppreċiżat ukoll li, meta l-awtorità kontraenti tibgħat ittra, wara talba għal spjegazzjonijiet supplimentari rigward deċiżjoni tal-għoti qabel ma jitressaq rikors, imma wara d-data stabbilita mill-Artikolu 149(3) tal-modalitajiet ta’ eżekuzzjoni, din l-ittra tista’ wkoll tittieħed inkunsiderazzjoni sabiex jiġi eżaminat jekk il-motivazzjoni f’dan il-każ kinitx biżżejjed. Fil-fatt, l-obbligu ta’ motivazzjoni għandu jiġi evalwat skont l-elementi ta’ informazzjoni li r-rikorrenti kellha fil-mument ta’ meta ġie ppreżentat ir-rikors, filwaqt li, madankollu, l-istituzzjoni ma hijiex awtorizzata tissostitwixxi b’motivazzjoni kompletament ġdida l-motivazzjoni tal-bidu (ara, f’dan is-sens, is-sentenza Evropaïki Dynamiki vs Il-Kummissjoni, punt 125 iktar ’il fuq, EU:T:2013:88, punti 27 u 28 u l-ġurisprudenza ċċitata).

131

Preliminarjament, jeħtieġ li jiġi rrilevat li, skont il-ġurisprudenza ċċitata fil-punt 129 iktar ’il fuq, l-awtorità kontraenti ma hijiex obbligata li tagħti lill-offerent eskluż aċċess għall-verżjoni sħiħa tal-offerta tal-kontraent li jkun ingħata l-kuntratt inkwistjoni, u lanqas għal dik tar-rapport ta’ evalwazzjoni. Barra minn hekk, f’dan il-każ, fid-dawl tal-atti tal-partijiet, tal-atti inseriti fil-proċess u tar-riżultati tas-seduta, il-Qorti Ġenerali tikkunsidra li hija suffiċjentement informata sabiex tagħti deċiżjoni fuq il-kawża odjerna (ara, f’dan is-sens, is-sentenza tas-16 ta’ Novembru 2006, Peróxidos Orgánicos vs Il-Kummissjoni, T‑120/04, Ġabra, EU:T:2006:350, punt 80), b’tali mod li ma hemmx lok li tintlaqa’ t-talba għal miżuri ta’ organizzazzjoni tal-proċedura jew għal miżuri istruttorji tar-rikorrenti (ara, f’dan is-sens, is-sentenza tal-24 ta’ Settembru 2009, Erste Group Bank et vs Il-Kummissjoni, C‑125/07 P, C‑133/07 P u C‑137/07 P, Ġabra, EU:C:2009:576, punt 319, u d-Digriet tal-10 ta’ Ġunju 2010, Thomson Sales Europe vs Il-Kummissjoni, C‑498/09 P, EU:C:2010:338, punt 138).

132

Sussegwentement, fir-rigward tal-motivi invokati a posteriori mill-UASI, jiġifieri fl-ittri tiegħu tal-11 ta’ April u tat-2 ta’ Mejju 2011, ma huwiex ikkontestat li l-imsemmija ittri jikkostitwixxu bħala tali elementi addizzjonali ta’ motivazzjoni tad-deċiżjoni tal-għoti, abbażi tal-ewwel paragrafu tal-Artikolu 100(2) tar-Regolament finanzjarju ġenerali kif ukoll tal-Artikolu 149(3) tal-modalitajiet ta’ eżekuzzjoni, li l-Qorti Ġenerali hija ammessa li tieħu inkunsiderazzjoni. Fi kwalunkwe każ, anki jekk l-ittra tal-UASI tat-2 ta’ Mejju 2011 ġiet trażmessa lir-rikorrenti biss permezz ta’ faks tat-12 ta’ Mejju 2011, jiġifieri wara l-iskadenza tat-terminu previst fl-Artikolu 149(3) tal-modalitajiet ta’ eżekuzzjoni, ikkalkolat sa mill-ewwel talba tar-rikorrenti li saret fit-30 ta’ Marzu 2011, din l-ittra tista’ tittieħed inkunsiderazzjoni għall-finijiet tal-eżami tan-natura suffiċjenti tal-motivazzjoni tad-deċiżjoni tal-għoti (ara l-ġurisprudenza ċċitata fil-punt 130 iktar ’il fuq).

133

Għalhekk għad irid jiġi ddeterminat jekk u sa liema punt dawn l-ittri huma vvizzjati b’nuqqas ta’ motivazzjoni, preċiżament minħabba li ma ppremettewx lir-rikorrenti li jagħrfu l-ġustifikazzjoni tal-miżura adottata bil-għan li jsostnu d-drittijiet tagħhom u li l-Qorti tal-Unjoni teżerċita l-istħarriġ tagħha tal-legalità fuq il-mertu.

134

F’dan ir-rigward, jeħtieġ li jitfakkar li, fil-kuntest tal-evalwazzjoni tat-tielet motiv, fir-rigward tas-sitt u t-tmien sal-ħdax ilment marbuta mal-ewwel kriterju tal-għoti kif ukoll il-parti li tikkonċerna r-raba’ kriterju tal-għoti, il-Qorti Ġenerali ma hijiex f’pożizzjoni li twettaq stħarriġ tal-legalità tal-mertu tad-deċiżjoni tal-għoti sa fejn din hija bbażata fuq l-evalwazzjoni individwali u komparattiva tal-offerti fir-rigward tal-kriterji tekniċi tal-għoti inkwistjoni. Issa, l-evalwazzjonijiet ikkontestati jikkostitwixxu elementi ta’ motivazzjoni essenzjali neċessarji għall-komprensjoni tajba tar-rekwiżiti li jirriżultaw mill-ispeċifikazzjonijiet tal-kuntratt, fosthom l-ippeżar ta’ ċerti sotto-kriterji, u mill-evalwazzjoni individwali u komparattiva tal-offerti mill-awtorità kontraenti f’dan ir-rigward (ara l-punti 81 sa 86, 87 sa 89 u 90 sa 95 iktar ’il fuq).

135

Minn dan jirriżulta li d-deċiżjoni tal-għoti hija vvizzjata minn diversi nuqqasijiet ta’ motivazzjoni fis-sens tal-Artikolu 100(2) tar-Regolament finanzjarju ġenerali, moqri flimkien mat-tieni paragrafu tal-Artikolu 296 TFUE, u li l-ewwel motiv għandu jintlaqa’.

136

Fid-dawl ta’ dawn il-kunsiderazzjonijiet preċedenti kollha, minħabba żbalji sostanzjali u proċedurali mwettqa mill-UASI, kif ikkonstatati fil-kuntest tal-ewwel sat-tielet motiv, hemm lok li tiġi annullata d-deċiżjoni tal-għoti fit-totalità tagħha, inkluża sa fejn din tikklassifika lill-kontraenti l-oħra fl-ewwel u fit-tieni post skont il-mekkaniżmu ta’ kaskata (ara t-tieni inċiż tal-punt 34 iktar ’il fuq).

137

Fir-rigward tat-talba għal kumpens, hemm lok li jitfakkar li, fis-seduta, ir-rikorrenti llimitaw il-portata tal-imsemmija talba billi rrinunzjaw għall-kumpens għad-danni naxxenti mit-telf tal-benefiċċju raġonevolment mistenni, li tiegħu ittieħdet nota fil-verbal tas-seduta (ara l-punt 33 iktar ’il fuq). Permezz ta’ dan, ir-rikorrenti ppreċiżaw li ma għadhomx iridu jiksbu kumpens għat-telf tal-kuntratt inkwistjoni, iżda sempliċiment kumpens għat-telf ta’ opportunità li jikkonkludu l-imsemmi kuntratt bħala kontraenti kklassifikata fl-ewwel post, li huwa differenti mit-telf tal-kuntratt fih innifsu (ara, f’dan is-sens, is-sentenzi tal-21 ta’ Mejju 2008, Belfass vs Il-Kunsill, T‑495/04, Ġabra, EU:T:2008:160, punt 124, u tal-20 ta’ Settembru 2011, Evropaïki Dynamiki/BEI, T‑461/08, Ġabra, EU:T:2011:494, punt 210), kif ukoll il-kumpens għad-danni morali subit minħabba l-preġudizzju għar-reputazzjoni u l-kredibbiltà tagħhom.

138

Skont ir-rikorrenti, essenzjalment, l-għoti tad-danni fil-forma ta’ tali kumpens huwa neċessarju minħabba r-rifjut “irriversibbli” li dawn jingħataw il-kuntratt inkwistjoni, peress li dan tal-aħħar ikun probabbilment eżegwit kompletament fid-data tal-għoti tas-sentenza li ttemm l-istanza tal-kawża. Fil-fatt, anki jekk jiġi preżunt li l-Qorti Ġenerali tannulla d-deċiżjoni tal-għoti u li l-UASI jorganizza proċedura ġdida ta’ sejħa għal offerti, il-kundizzjonijiet “kompetittivi” tal-għoti tal-kuntratt inkwistjoni ma jkunux l-istess, (the contract could not repeat the same competitive conditions as those of the contested procedure) u dan ikun jekwivali għat-telf ċert ta’ opportunità u jikkawżalhom preġudizzju gravi. Għalhekk, billi ffirma kuntratt mal-kontraenti l-oħra, l-UASI ħoloq sitwazzjoni fattwali irrevokabbli (irrevocable factual situation) li għandha l-effett ta’ telf definittiv u irrimedjabbli tal-opportunità tagħhom li jingħataw il-kuntratt. Dawn huwa preġudizzju ċert – peress li huwa ekonomikament valutabbli minkejja l-inċertezza dwar il-kwantifikazzjoni eżatta tiegħu – li r-rikorrenti jivvalorizzaw f’dan il-każ, billi jieħdu kont tal-valur tal-kuntratt, tal-kumplessità tal-kwistjonijiet tekniċi u tal-prestiġju tal-awtorità kontraenti, għas-somma ta’ EUR 650000. F’dan il-kuntest, ir-rikorrenti jikkontestaw li l-perijodu kuntrattwali inizjali ta’ sena u l-estensjoni possibbli tiegħu ta’ tliet snin, kif ukoll il-libertà tal-UASI li jgħaddi ordnijiet speċifiċi lill-kontraenti, jaffettwaw ir-rabta kawżali bejn l-aġir illegali tal-awtorità kontraenti u l-preġudizzju subit. Fi kwalunkwe każ, l-osservanza tal-prinċipju fundamentali ta’ protezzjoni ġudizzjarja effettiva jimponi l-obbligu li jiġi kkumpensat b’mod sħiħ it-telf mill-offerent milqut b’mod negattiv.

139

L-UASI jikkontesta dan l-argument u, b’mod partikolari, l-ammont tad-danni abbażi tat-telf ta’ opportunità jew tal-preġudizzju għar-reputazzjoni jew għall-kredibbiltà tar-rikorrenti, l-eżistenza ta’ tali preġudizzju u, fid-dawl tas-setgħa diskrezzjonali wiesa’ tal-awtorità kontraenti, ir-rabta kawżali bejn l-illegalitajiet allegati u l-imsemmi preġudizzju, min-naħa, u l-preġudizzju allegatament subit, min-naħa l-oħra.

140

Skont ġurisprudenza stabbilita, ir-responsabbiltà mhux kuntrattwali tal-Unjoni, fis-sens tat-tieni paragrafu tal-Artikolu 340 TFUE, għal aġir illegali tal-organi tagħha hija suġġetta għall-eżistenza ta’ numru ta’ kundizzjonijiet, jiġifieri l-illegalità tal-aġir li huma akkużati bih l-istituzzjonijiet, ir-realtà tad-dannu u l-eżistenza ta’ rabta kawżali bejn l-aġir allegat u d-dannu invokat (ara s-sentenza tal-15 ta’ Ottubru 2013, Evropaïki Dynamiki vs Il-Kummissjoni, T‑474/10, EU:T:2013:528, punt 215 u l-ġurisprudenza ċċitata).

141

F’dan ir-rigward, hemm lok li jitfakkar li t-talba għall-kumpens hija bbażata fuq l-istess illegalitajiet bħal dawk invokati insostenn tat-talba għall-annullament tad-deċiżjoni tal-għoti u li din tal-aħħar hija bbażata fuq diversi illegalitajiet sostanzjali, fosthom ksur tal-prinċipji ta’ ugwaljanza fl-opportunità u ta’ trasparenza (ara l-punt 53 iktar ’il fuq) u fuq żbalji ta’ evalwazzjoni (ara l-punti 95, 101 u 120 iktar ’il fuq), kif ukoll fuq diversi nuqqasijiet ta’ motivazzjoni (ara l-punti 86, 89, 95, 134 u 135 iktar ’il fuq).

142

Madankollu, fir-rigward tal-eżistenza ta’ rabta kawżali bejn l-imsemmija illegalitajiet sostanzjali u proċedurali u d-danni allegatament subiti, jirriżulta minn ġurisprudenza stabbilita li nuqqas ta’ motivazzjoni ma jistax bħala tali jwassal għar-responsabbiltà tal-Unjoni, b’mod partikolari peress li ma huwiex ta’ natura li juri li, fl-assenza tiegħu, il-kuntratt seta’, jew anki kellu, jingħata lir-rikorrenti (ara, f’dan is-sens, is-sentenzi tal-20 ta’ Ottubru 2011, Alfastar Benelux vs Il-Kunsill, T‑57/09, EU:T:2011:609, punt 49; tas-17 ta’ Ottubru 2012, Evropaïki Dynamiki vs Il-Qorti tal-Ġustizzja, T‑447/10, EU:T:2012:553, punt 123, u tal-14 ta’ Jannar 2015, Veloss International u Attimedia vbs Il-Parlament, T‑667/11, EU:T:2015:5, punt 72).

143

Għaldaqstant, f’dan il-każ, ma huwiex possibbli li tiġi rrikonoxxuta l-eżistenza ta’ rabta kawżali bejn in-nuqqasijiet ta’ motivazzjoni kkonstatati u d-danni invokati mir-rikorrenti.

144

Għall-kuntrarju, fir-rigward tar-rabta kawżali bejn l-illegalitajiet sostanzjali kkonstatati, jiġifieri l-ksur tal-prinċipji ta’ ugwaljanza tal-opportunità u ta’ trasparenza u l-iżbalji manifesti ta’ evalwazzjoni, min-naħa, u t-telf ta’ opportunità, min-naħa l-oħra, l-UASI ma jistax sempliċement jallega li, fid-dawl tas-setgħa diskrezzjonali wiesgħa tiegħu bħala awtorità kontraenti, huwa ma kienx obbligat li jiffirma il-kuntratt-kwadru mar-rikorrenti (ara, f’dan is-sens, is-sentenza Evropaïki Dynamiki vs BEI, punt 137 iktar ’il fuq, EU:T:2011:494, punt 211). F’dan il-każ, għandu jiġi kkonstatat li l-illegalitajiet sostanzjali mwettqa mill-awtorità kontraenti fil-kuntest tal-evalwazzjonijiet individwali u komparattivi tal-offerti tal-kontraenti kienu ta’ natura li jinċidu fuq l-opportunità tal-ewwel rikorrent li tiġi kklassifikata fl-ewwel jew fit-tieni post fil-mekkaniżmu ta’ kaskata. Dan jgħodd ukoll b’mod partikolari għall-evalwazzjoni komparattiva tal-imsemmija offerti abbażi tal-ewwel kriterju tal-għoti li fiha l-UASI kien iggwidat minn qari manifestament żbaljat tal-ispeċifikazzjonijiet tal-kuntratt, li permezz tiegħu l-offerta tal-ewwel rikorrenti kisbet biss 22.81 minn total ta’ 40 punt. Minn dan jirriżulta wkoll li, anki jekk jittieħed kont tas-setgħa diskrezzjonali wiesa’ tal-awtorità kontraenti dwar l-għoti tal-kuntratt inkwistjoni, it-telf tal-opportunità subit f’dan il-każ mill-ewwel rikorrenti tikkostitwixxi preġudizzju reali u ċert fis-sens tal-ġurisprudenza (ara, f’dan is-sens u b’analoġija, is-sentenza tad-9 ta’ Novembru 2006, Agraz et vs Il-Kummissjoni, C‑243/05 P, Ġabra, EU:C:2006:708, punti 26 sa 42; konklużjonijiet tal-Avukat Ġenerali Cruz Villalón fil-Kawża Giordano vs Il-Kummissjoni, C‑611/12 P, Ġabra, EU:C:2014:195, punt 61, u s-sentenza Evropaïki Dynamiki vs BEI, punt 137 iktar ’il fuq, EU:T:2011:494, punti 66 u 67). Fil-fatt, f’dan il-każ, is-sempliċi fatt li l-ewwel rikorrenti ġiet ikklassifikata fit-tielet post fil-mekkaniżmu ta’ kaskata u li b’hekk ġiet aċċettata bħala kontraenti possibbli, ma tirrendix wisq kredibbli l-ipotesi li l-awtorità kontraenti setgħet titwassal sabiex ma tatihiex il-kuntratt inkwistjoni.

145

Barra minn hekk, kif isostnu ġustament ir-rikorrenti, f’sitwazzjoni bħal dik f’dan il-każ, li fiha, fi tmiem il-proċedura kontenzjuża quddiem il-Qorti Ġenerali, kien jeżisti riskju kbir li l-kuntratt inkwistjoni jkun diġà eżegwit, l-assenza stess ta’ rikonoxximent mill-qorti tal-Unjoni tat-telf ta’ tali opportunità u tan-neċessità li jingħata kumpens f’dan ir-rigward imur kontra l-prinċipju ta’ protezzjoni ġudizzjarja effettiva sanċit fl-Artikolu 47 tal-Karta tad-Drittijiet Fundamentali tal-Unjoni Ewropea. Fil-fatt, f’tali sitwazzjoni, l-annullament retroattiv ta’ deċiżjoni tal-għoti ma jipprovdi l-ebda vantaġġ lill-offerenti eskluż, b’tali mod li t-telf tal-opportunità jippreżenta ruħu bħala irrimedjabbli. Barra minn hekk, jeħtieġ li jittieħed kont tal-fatt li, minħabba kundizzjonijiet li jirregolaw il-proċeduri għal miżuri provviżorji quddiem il-President tal-Qorti Ġenerali, l-offerent li l-offerta tiegħu tkun ġiet evalwata u eskluża illegalment rarament ikun fil-prattika, f’pożizzjoni li jikseb sospensjoni tal-eżekuzzjoni ta’ tali deċiżjoni [Digriet tat-23 ta’ April 2015, Il-Kummissjoni vs Vanbreda Risk & Benefits, C‑35/15 P(R), Ġabra, EU:C:2015:275; Digriet tal-4 ta’ Frar 2014, Serco Belgium et vs Il-Kummissjoni, T‑644/13 R, Ġabra, EU:T:2014:57, punti 18 et seq].

146

Konsegwentement, il-Qorti Ġenerali tqis li, f’dan il-każ, huwa neċessarju li jingħata kumpens lill-ewwel rikorrenti abbażi tat-telf ta’ opportunità sa fejn id-deċiżjoni tal-għoti, anki f’każ li din tiġi annullata b’effett retroattiv, fil-prattika xejnet definittivament il-possibbiltà li din ikollha l-offerta tagħha kklassifikata aħjar u, għaldaqstant, l-opportunità tagħha li tingħata ftehimiet ta’ eżekuzzjoni speċifiċi fil-kuntest tal-implementazzjoni ta’ kuntratt kwadru.

147

Madankollu, fir-rigward tal-portata tal-kumpens għad-danni marbuta mat-telf ta’ opportunità, stmati mir-rikorrenti li jammontaw għal EUR 650000, il-Qorti Ġenerali ma tinsabx f’pożizzjoni, f’dan l-istadju tal-proċedura, fid-dawl tal-elementi tal-proċess, li tiddeċiedi definittivament fuq l-ammont tal-kumpens li l-Unjoni għandha tagħti lill-ewwel rikorrenti. Peress li l-kwistjoni tal-evalwazzjoni tad-dannu għadha ma tistax tiġi deċiża u għal kunsiderazzjonijiet marbuta mal-ekonomija tal-ġudizzju, għandha tingħata deċiżjoni, inizjalment, permezz ta’ sentenza interlokutorja, dwar ir-responsabbiltà tal-Unjoni. Id-determinazzjoni tal-ammonti tal-kumpens li jirriżultaw mill-illegalitajiet mwettqa mill-UASI huwa rriżervat għal fażi ulterjuri, jew bi ftehim komuni tal-partijiet, jew inkella mill-Qorti Ġenerali f’każ ta’ nuqqas ta’ tali ftehim (ara, f’dan is-sens, is-sentenza tas-16 ta’ Settembru 2013, ATC et vs Il-Kummissjoni, T‑333/10, Ġabra, EU:T:2013:451, punt 199 u l-ġurisprudenza ċċitata).

148

Madankollu, għal dan l-għan, f’dan il-każ, kemm il-partijiet kif ukoll il-Qorti Ġenerali huma mfakkar li jieħdu inkunsiderazzjoni l-aspetti li ġejjin.

149

Fl-ewwel lok, hemm lok li jittieħed kont tal-fatt li l-valur stmat tal-kuntratt inkwistjoni, kif iddikjarat fl-avviż tal-kuntratt, huwa ta’ EUR 13000000 minbarra t-taxxi għal perijodu massimu ta’ eżekuzzjoni tal-kuntratt kwadru ta’ erba’ snin u, għaldaqstant, il-valur tal-kisba tal-kuntratt-kwadru għall-ewwel sena huwa tal-inqas ta’ EUR 3250000.

150

Fit-tieni lok, jeħtieġ li tiġi ddeterminata r-rata ta’ probabbiltà ta’ suċċess tal-offerta tal-ewwel rikorrenti, jiġifieri l-probabbiltà li tipi kklassifikata fl-ewwel jew fit-tieni post skont il-mekkaniżmu ta’ kaskata, fl-assenza tal-illegalitajiet sostanzjali differenti mwettqa mill-UASI waqt il-proċedura ta’ sejħa għal offerti. F’dan ir-rigward, għandu jittieħed inkunsiderazzjoni l-fatt li l-offerti tekniċi u finanzjarji tal-ewwel rikorrenti ġew ikklassifikati kull waħda fit-tieni post (ara t-tabelli esposti fil-punti 12 u 20 iktar ’il fuq) u li, skont il-metodu tal-kalkolu espost fil-punt 13.5 tal-ispeċifikazzjonijiet tal-kuntratt, l-ippeżar tal-imsemmija offerti għall-finijiet tal-għoti tal-kuntratt inkwistjoni kien ta’ 50/50.

151

Fit-tielet lok, hemm lok li jittieħed inkunsiderazzjoni l-fatt li l-kuntratt-kwadru jingħata u jiġi ffirmat biss għal perijodu inizjali ta’ sena u li ma teżisti l-ebda ċertezza li dan tal-aħħar jiġi mġedded mill-UASI għat-tliet snin suċċessivi (ara l-punt 14.3 tal-ispeċifikazzjonijiet tal-kuntratt u l-punt 1.2.5 tal-abbozz tal- kuntratt-kwadru). Jeħtieġ ukoll li tiġi evalwata l-probabbiltà li l-ewwel kontraenti ikun kapaċi jissodisfa r-rekwiżiti tal-ordnijiet differenti maħruġa mill-awtorità kontraenti kemm matul l-ewwel sena ta’ eżekuzzjoni tal-kuntratt kwadru kif ukoll matul is-snin suċċessivi fil-każ ta’ tiġdid ta’ dan tal-aħħar. Issegwi n-neċessità li tiġi aġġustata r-rata ta’ probabbiltà ta’ suċċess skont l-assenza ta’ ċertezza ta’ tiġdid tal-kuntratt-kwadru u tal-inkapaċità eventwali tal-imsemmi kontraenti sabiex jeżegwixxi l-imsemmija ordnijiet.

152

Fir-raba’ lok, jeħtieġ li jiġu ddeterminati d-danni li jistgħu jiġu rriżarċiti filwaqt li jittieħed kont tal-benefiċċju nett li seta’ jinkiseb mill-ewwel rikorrenti matul l-eżekuzzjoni tal-kuntratt-kwadru. F’dan ir-rigward, hemm lok li jitfakkar li r-rikorrenti sostnew, matul is-sena 2006, fil-kuntest ta’ proġetti kummerċjali, l-ewwel rikorrenti kien kiseb benefiċċju gross ta’ 10.33 %.

153

Fil-ħames lok, hemm lok li jiġu dedotti l-benefiċċji miksuba b’mod ieħor mill-ewwel rikorrenti minħabba n-nuqqas tal-għoti tal-kuntratt inkwistjoni bil-għan jiġi evitat kumpens żejjed.

154

Fis-sitt lok, bil-għan li jiġi ddeterminat l-ammont totali li jista’ jiġi rriżarċit abbażi tat-telf tal-opportunità, hemm lok li jiġi mmultiplikat il-benefiċċju nett stabbilit mar-rata ta’ probabbiltà ta’ suċċess.

155

Fl-aħħar, fir-rigward tal-allegat preġudizzju għar-reputazzjoni u għall-kredibbiltà tar-rikorrenti, huwa suffiċjenti li jiġi kkonstatat li mill-ġurisprudenza jirriżulta li annullament eventwali mill-Qorti Ġenerali tad-deċiżjoni tal-għoti huwa, fil-prinċipju, suffiċjenti sabiex jiġi rrimedjat il-preġudizzju naxxenti mill-imsemmija danni (ara, f’dan is-sens, id-digriet tal-20 ta’ Settembru 2005, Deloitte Business Advisory vs Il-Kummissjoni, T‑195/05 R, Ġabra, EU:T:2005:330, punt 126), mingħajr il-bżonn li jiġi deċiż jekk il-klassifikazzjoni, jekk applikabbli, mhux iġġustifikata, tal-offerta tal-ewwel rikorrenti fit-tielet post skont il-mekkaniżmu ta’ kaskata minflok fl-ewwel jew fit-tieni post tikkostitwixxix tali preġudizzju.

156

Għalhekk, fid-dawl tal-kunsiderazzjonijiet preċedenti kollha, hemm lok li tintlaqa’ t-talba għad-danni tar-rikorrenti sa fejn din tipprevedi l-kumpens għat-telf ta’ opportunità u li tiġi miċħuda fil-kumplament tagħha.

157

Fir-rigward tal-ammont riżarċibbli abbażi tat-telf ta’ opportunità, jeħtieġ lil-partijiet jiġu mistiedna, b’riżerva għal deċiżjoni ulterjuri tal-Qorti Ġenerali, li jilħqu ftehim fuq l-ammont fid-dawl tal-kunsiderazzjonijiet preċedenti u li jittrażmettulha, f’terminu ta’ tliet xhur dekorribbli mid-data tal-għoti ta’ din is-sentenza, l-ammont pagabbli, stabbilit bi ftehim komuni, jew, fin-nuqqas, li jwasslulha, fl-istess terminu, il-kwantifikazzjoni tad-dannu tagħhom (ara, f’dan is-sens, is-sentenza ATC et vs Il-Kummissjoni, punt 147 iktar ’il fuq, EU:T:2013:451, punt 101).

158

L-ispejjeż għandhom jiġu rriżervati.

Għal dawn il-motivi,

IL-QORTI ĠENERALI (Ir-Raba’ Awla)

taqta’ u tiddeċiedi: