This document is an excerpt from the EUR-Lex website
Document 52023PC0041
Proposal for a COUNCIL DECISION on the position to be taken on behalf of the European Union at the eleventh meeting of the Conference of the Parties to the Stockholm Convention on Persistent Organic Pollutants as regards the proposals for amendment of Annex A to that Convention
Proposta għal DEĊIŻJONI TAL-KUNSILL dwar il-pożizzjoni li għandha tittieħed, f’isem l-Unjoni Ewropea, fil-ħdax-il laqgħa tal-Konferenza tal-Partijiet għall-Konvenzjoni ta’ Stokkolma dwar Materjal Organiku Persistenti li Jniġġes fir-rigward tal-proposti għall-emenda tal-Anness A għal dik il-Konvenzjoni
Proposta għal DEĊIŻJONI TAL-KUNSILL dwar il-pożizzjoni li għandha tittieħed, f’isem l-Unjoni Ewropea, fil-ħdax-il laqgħa tal-Konferenza tal-Partijiet għall-Konvenzjoni ta’ Stokkolma dwar Materjal Organiku Persistenti li Jniġġes fir-rigward tal-proposti għall-emenda tal-Anness A għal dik il-Konvenzjoni
COM/2023/41 final
IL-KUMMISSJONI EWROPEA
Brussell, 30.1.2023
COM(2023) 41 final
2023/0014(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed, f’isem l-Unjoni Ewropea, fil-ħdax-il laqgħa tal-Konferenza tal-Partijiet għall-Konvenzjoni ta’ Stokkolma dwar Materjal Organiku Persistenti li Jniġġes fir-rigward tal-proposti għall-emenda tal-Anness A għal dik il-Konvenzjoni
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-ħdax-il laqgħa tal-Konferenza tal-Partijiet għall-Konvenzjoni ta’ Stokkolma dwar Materjal Organiku Persistenti li Jniġġes b’rabta mal-adozzjoni prevista tad-deċiżjonijiet biex jiġi emendat l-Anness A billi jiġu miżjuda d-dechlorane plus, il-methoxychlor u l-UV-328.
2.Kuntest tal-proposta
2.1.Il-Konvenzjoni ta’ Stokkolma
Il-Konvenzjoni ta’ Stokkolma dwar Materjal Organiku Persistenti li Jniġġes (il-Konvenzjoni) għandha l-għan li tħares is-saħħa tal-bniedem u tal-ambjent minn pollutanti organiċi persistenti li jniġġsu (POPs). Il-Konvenzjoni daħlet fis-seħħ fis-17 ta’ Mejju 2004. L-Unjoni Ewropea hija parti mill-Ftehim 1 . Il-Konvenzjoni tipprovdi qafas, ibbażat fuq il-prinċipju ta’ prekawzjoni, biex jiġu eliminati l-produzzjoni, l-użu, l-importazzjoni u l-esportazzjoni ta’ POPs, biex dawn jiġu ġestiti, mormija u eliminati b’mod sikur jew biex jonqos ir-rilaxx minn produzzjoni mhux intenzjonata ta’ ċerti POPs.
2.2.Il-Konferenza tal-Partijiet
Kif stabbilit skont l-Artikolu 19 tal-Konvenzjoni, il-Konferenza tal-Partijiet hi l-korp ta’ tmexxija tal-Konvenzjoni ta’ Stokkolma. Dan il-korp normalment jiltaqa’ kull sentejn biex jimmonitorja l-implimentazzjoni tal-Konvenzjoni. Huwa jagħmel ukoll rieżami tal-prodotti kimiċi ppreżentati mill-Kumitat ta’ Rieżami tal-Pollutanti Organiċi Persistenti (POPRC) għall-kunsiderazzjoni tiegħu.
F’konformità mal-Artikolu 8(1) tal-Konvenzjoni, il-Partijiet ressqu proposti lis-Segretarjat biex id-dechlorane plus, il-methoxychlor u l-UV-328 jiġu elenkati fl-Anness A tal-Konvenzjoni, li kien rieżaminat mill-POPRC skont l-Artikolu 8(3) u (4). Il-POPRC irrakkomanda lill-Konferenza tal-Partijiet l-elenkar tal-methoxychlor fl-Anness A mingħajr eżenzjonijiet speċifiċi, u l-elenkar tad-dechlorane plus u tal-UV-328 fl-Anness A b’eżenzjonijiet speċifiċi. Il-proċedura għall-adozzjoni tal-emendi tal-Annessi hija rregolata mill-Artikolu 22 tal-Konvenzjoni.
F’konformità mal-Artikolu 23 tal-Konvenzjoni, kull parti għandha vot wieħed. Madankollu, l-organizzazzjonijiet reġjonali għall-integrazzjoni ekonomika bħalma hi l-UE jeżerċitaw id-dritt tagħhom li jivvutaw b’għadd ta’ voti li jkun ugwali għall-għadd ta’ Stati Membri tagħhom li huma partijiet mill-Konvenzjoni.
2.3.L-att previst tal-Konferenza tal-Partijiet
Fil-ħdax-il laqgħa ordinarja, il-Konferenza tal-Partijiet se tikkunsidra l-adozzjoni ta’ deċiżjonijiet biex id-dechlorane plus, il-methoxychlor u l-UV-328 jiġu elenkati fl-Anness A (l-eliminazzjoni), fl-Anness B (ir-restrizzjoni) u/jew fl-Anness C (il-produzzjoni mhux intenzjonata) tal-Konvenzjoni.
L-iskop tad-deċiżjonijiet huwa l-elenkar tagħhom fl-Annessi A, B u/jew C, li jkollu l-effett li l-prodotti kimiċi jsiru soġġetti għal miżuri mmirati biex jeliminaw jew jillimitaw il-produzzjoni u l-użu tagħhom, inkluż it-tnaqqis jew l-eliminazzjoni ta’ rilaxxi ta’ produzzjoni mhux intenzjonata ta’ POPs.
L-atti previsti se jsiru vinkolanti għall-partijiet f’konformità mal-Artikolu 22(4) tal-Konvenzjoni, li jipprevedi li: “Il-proposta, l-adozzjoni u d-dħul fis-seħħ tal-emendi għall-Annessi A, B jew C għandhom ikunu soġġetti għall-istess proċeduri bħall-proposta, l-adozzjoni u d-dħul fis-seħħ ta’ annessi addizzjonali għal din il-Konvenzjoni, ħlief li emenda għal Anness A, B jew C ma għandhiex tidħol fis-seħħ fir-rigward ta’ kwalunkwe Parti li tkun għamlet dikjarazzjoni fir-rigward tal-emenda għal dawk l-Annessi f’konformità mal-paragrafu 4 tal-Artikolu 25, f’liema każ kwalunkwe emenda bħal din għandha tidħol fis-seħħ għal tali Parti fid-disgħin jum wara d-data tad-depożitu mad-depożitarju tal-istrument ta’ ratifika, ta’ aċċettazzjoni, ta’ approvazzjoni jew ta’ adeżjoni tagħha fir-rigward tat-tali emenda.”
3.Il-pożizzjoni li trid tittieħed f’isem l-Unjoni
Il-pożizzjoni li għandha tittieħed f’isem l-Unjoni fil-ħdax-il laqgħa tal-Konferenza tal-Partijiet għall-Konvenzjoni ta’ Stokkolma dwar Materjal Organiku Persistenti li Jniġġes jenħtieġ li tappoġġa l-inklużjoni tad-dechlorane plus, tal-methoxychlor u tal-UV-328 fil-lista f’konformità mar-rakkomandazzjonijiet rilevanti tal-Kumitat ta’ Rieżami tal-Pollutanti Organiċi Persistenti (POPRC).
F’konformità mal-Artikolu 8(1) tal-Konvenzjoni, il-Partijiet ressqu l-proposti lis-Segretarjat biex id-dechlorane plus, l-methoxychlor u l-UV-328 jiġu elenkati fl-Anness A tal-Konvenzjoni, li kien rieżaminat mill-POPRC skont l-Artikolu 8(3) u (4). Il-POPRC eżamina l-proposti billi applika l-kriterji ta’ skrinjar f’konformità mal-Anness D tal-Konvenzjoni u kkonkluda li l-kriterji huma ssodisfati. Wara li evalwa l-profili tar-riskju għad-dechlorane plus, il-methoxychlor u l-UV-328, u wara li ddeċieda li dawk is-sustanzi x’aktarx, bħala riżultat tat-trasport ambjentali tagħhom fuq distanza twila, iwasslu għal effetti negattivi sinifikanti fuq is-saħħa tal-bniedem u/jew l-ambjent b’tali mod li tkun iġġustifikata azzjoni globali, il-POPRC irrakkomanda lill-Konferenza tal-Partijiet biex tikkunsidra l-elenkar tal-methoxychlor fl-Anness A mingħajr eżenzjonijiet speċifiċi, u l-elenkar tad-dechlorane plus u tal-UV-328 fl-Anness A b’eżenzjonijiet speċifiċi.
Sabiex jiġu mħarsa s-saħħa tal-bniedem u tal-ambjent minn aktar rilaxxi tad-dechlorane plus, tal-methoxychlor u tal-UV-328, huwa meħtieġ li jitnaqqsu jew jiġu eliminati l-produzzjoni u l-użu ta’ dawk il-prodotti kimiċi fil-livell globali u li jiġi appoġġat l-elenkar tagħhom fl-annessi rilevanti tal-Konvenzjoni, Il-proposta tikkumplimenta u hija koerenti mal-implimentazzjoni tar-Regolament (UE) 2019/1021, li jimplimenta l-Konvenzjoni ta’ Stokkolma fl-Unjoni. Hija kompletament konformi mal-objettiv li jiġu mħarsa s-saħħa tal-bniedem u tal-ambjent minn POPs.
Il-proposta hija koerenti mal-approċċ ġenerali tar-Regolament (KE) Nru 1107/2009 u tar-Regolament (UE) Nru 528/2012 fir-rigward tas-sustanzi PBT peress li t-tnejn jipprevedu kriterji li ma jippermettux, fil-prinċipju, it-tqegħid fis-suq u l-użu ta’ sustanzi attivi li huma PBT. Sabiex tkun żgurata l-koerenza, id-Dokument ta’ Fehim Komuni 2 jeżamina r-relazzjoni bejn il-Konvenzjoni ta’ Stokkolma, ir-Regolament (UE) 2019/1021 u r-Regolament (KE) Nru 1907/2006, fir-rigward tar-restrizzjonijiet u r-rekwiżiti ta’ awtorizzazzjoni.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi atti li għandhom effetti legali skont ir-regoli tad-dritt internazzjonali li jirregolaw il-korp inkwistjoni. Dan jinkludi wkoll l-istrumenti li ma jkollhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 3 .
4.1.2.Applikazzjoni għall-każ preżenti
Il-Konferenza tal-Partijiet hi korp stabbilit permezz ta’ ftehim, jiġifieri l-Konvenzjoni ta’ Stokkolma dwar Materjal Organiku Persistenti li Jniġġes.
L-atti li l-Konferenza tal-Partijiet qed tintalab tadotta jikkostitwixxu atti li jkollhom effetti legali. L-atti previsti se jkunu vinkolanti skont id-dritt internazzjonali f’konformità mal-Artikolu 22 tal-Konvenzjoni ta’ Stokkolma.
L-att previst la jissupplimenta u lanqas jemenda l-qafas istituzzjonali tal-Ftehim.
Għalhekk, il-bażi ġuridika proċedurali għad-deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li dwaru tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tissejjes fuq bażi ġuridika sostantiva waħda, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għall-każ preżenti
L-objettiv ewlieni u l-kontenut tal-att previst jirrigwardaw l-ambjent.
Għalhekk, il-bażi ġuridika sostantiva tad-deċiżjoni proposta hija l-Artikolu 192 tat-TFUE.
4.3.Konklużjoni
Jenħtieġ li l-bażi ġuridika tad-deċiżjoni proposta tkun l-Artikolu 192(1), flimkien mal-Artikolu 218(9) tat-TFUE.
2023/0014 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed, f’isem l-Unjoni Ewropea, fil-ħdax-il laqgħa tal-Konferenza tal-Partijiet għall-Konvenzjoni ta’ Stokkolma dwar Materjal Organiku Persistenti li Jniġġes fir-rigward tal-proposti għall-emenda tal-Anness A għal dik il-Konvenzjoni
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 192(1), flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Konvenzjoni ta’ Stokkolma dwar Materjal Organiku Persistenti li Jniġġes (il-“Konvenzjoni”), li kienet konkluża mill-Unjoni permezz tad-Deċiżjoni tal-Kunsill 2006/507/KE 4 u daħlet fis-seħħ fis-17 ta’ Mejju 2004.
(2)Skont l-Artikolu 8 tal-Konvenzjoni, il-Konferenza tal-Partijiet għall-Konvenzjoni tista’ telenka prodotti kimiċi fl-Annessi A, B u/jew C għall-Konvenzjoni kif ukoll tispeċifika il-miżuri ta’ kontroll relatati ma’ tali prodotti kimiċi.
(3)Fil-ħdax-il laqgħa tagħha, il-Konferenza tal-Partijiet għall-Konvenzjoni hija mistennija tadotta deċiżjonijiet biex telenka aktar prodotti kimiċi fl-Anness A għall-Konvenzjoni.
(4)Ikun xieraq li tiġi stabbilita l-pożizzjoni li trid tittieħed f’isem l-Unjoni fil-Konferenza tal-Partijiet, billi d-deċiżjonijiet se jkunu vinkolanti fuq l-Unjoni.
(5)Sabiex jiġu mħarsa s-saħħa tal-bniedem u tal-ambjent minn aktar rilaxxi tad-dechlorane plus, tal-methoxychlor u tal-UV-328, huwa meħtieġ li jitnaqqsu jew jiġu eliminati l-produzzjoni u l-użu ta’ dawk il-prodotti kimiċi fil-livell globali u li jiġi appoġġat l-elenkar tagħhom fl-Annessi rilevanti fil-Konvenzjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-ħdax-il laqgħa tal-Konferenza tal-Partijiet għall-Konvenzjoni ta’ Stokkolma dwar Materjal Organiku Persistenti li Jniġġes u kwalunkwe Konferenza sussegwenti tal-Partijiet filwaqt li jitqiesu r-rakkomandazzjonijiet rilevanti tal-Kumitat ta’ Rieżami tal-Pollutanti Organiċi Persistenti (POPRC), fejn il-punt fuq l-aġenda għandha tkun din li ġejja:
(a)li tappoġġa l-elenkar ta’ dechlorane plus fl-Anness A, bl-eżenzjonijiet speċifiċi rakkomandati mill-POPRC;
(b)li tappoġġa l-elenkar tal-methoxychlor fl-Anness A, mingħajr ebda eżenzjonijiet speċifiċi;
(c)to support the listing of UV-328 in Annex A, with the specific exemptions recommended by the POPRC.
Artikolu 2
Waqt laqgħat ta’ koordinazzjoni fuq il-post u mingħajr deċiżjoni ulterjuri tal-Kunsill, ir-rappreżentanti tal-Unjoni jistgħu jilħqu qbil, f’konsultazzjoni mal-Istati Membri, dwar l-irfinar tal-pożizzjoni msemmija fl-Artikolu 1, fid-dawl tal-iżviluppi fil-ħdax-il laqgħa tal-Konferenza tal-Partijiet għall-Konvenzjoni u kwalunkwe Konferenza sussegwenti tal-Partijiet fejn il-punt ikun fuq l-aġenda.
Artikolu 3
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President