IL-KUMMISSJONI EWROPEA
Brussell, 13.8.2021
COM(2021) 480 final
2021/0273(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill Internazzjonali taz-Zokkor b’rabta mal-estensjoni tal-Ftehim Internazzjonali dwar iz-Zokkor tal-1992
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna deċiżjoni li tistabbilixxi l-pożizzjoni li trid tittieħed f’isem l-Unjoni fil-Kunsill Internazzjonali taz-Zokkor, b’rabta mal-adozzjoni prevista ta’ deċiżjoni li testendi l-Ftehim Internazzjonali dwar iz-Zokkor, tal-1992 sat-31 ta’ Diċembru 2023
2.Kuntest tal-proposta
2.1.Il-Ftehim Internazzjonali dwar iz-Zokkor tal-1992
Il-Ftehim Internazzjonali dwar iz-Zokkor tal-1992 (minn hawn ’il quddiem “il-Ftehim”) għandu l-għan li jiżgura kooperazzjoni internazzjonali msaħħa b’rabta mal-kwistjonijiet dinjija taz-zokkor u oħrajn relatati; li jipprovdi forum għal konsultazzjonijiet intergovernattivi dwar iz-zokkor u dwar metodi biex tittejjeb l-ekonomija dinjija taz-zokkor; li jiffaċilita l-kummerċ billi jiġbor u jipprovdi informazzjoni dwar is-suq dinji taz-zokkor u dolċifikanti oħra; u li jinkoraġġixxi żieda fid-domanda għaz-zokkor, b’mod partikolari għal użi mhux tradizzjonali.
Il-Ftehim daħal fis-seħħ fl-1 ta’ Jannar 1993.
L-Unjoni hija parti għall-Ftehim.
2.2.Il-Kunsill Internazzjonali taz-Zokkor
Il-Kunsill Internazzjonali taz-Zokkor huwa l-korp responsabbli għall-qadi tal-funzjonijiet kollha meħtieġa biex jitwettqu d-dispożizzjonijiet tal-Ftehim. Jadotta regoli u regolamenti, inkluż ir-regoli ta’ proċedura tal-Kunsill u l-kumitati tiegħu, u r-regolamenti finanzjarji u tal-persunal tal-Organizzazzjoni Internazzjonali taz-Zokkor (“ISO”). Il-Kunsill iżomm id-dokumentazzjoni meħtieġa u jippubblika rapport annwali u informazzjoni oħra fejn xieraq.
Il-Membri tal-Ftehim għandhom 2000 vot b’kollox. Kull Membru tal-Ftehim għandu għadd speċifiku ta’ voti, li kull sena jiġi aġġustat skont kriterji definiti minn qabel fil-Ftehim. Id-deċiżjonijiet kollha tal-Kunsill għandhom jittieħdu, fil-prinċipju, b’kunsens sakemm ma jkunx stipulat mod ieħor fil-Ftehim. Fin-nuqqas ta’ kunsens, id-deċiżjonijiet għandhom isiru permezz ta’ vot ta’ maġġoranza sempliċi, sakemm il-Ftehim ma jipprevedix vot speċjali.
2.3.L-att previst tal-Kunsill Internazzjonali taz-Zokkor
Il-Ftehim ġie konkluż bid-Deċiżjoni tal-Kunsill 92/580/KEE, u daħal fis-seħħ fl-1 ta’ Jannar 1993. Ġie konkluż għal perjodu ta’ tliet snin sal-31 ta’ Diċembru 1995, u minn dakinhar ’l hawn ġie estiż regolarment għal perjodi ulterjuri ta’ sentejn, kif previst mill-Artikolu 45 tiegħu. L-aħħar li ġie estiż il-Ftehim kien f’Lulju 2019 u jibqa’ fis-seħħ sal-31 ta’ Diċembru 2021.
Waqt id-59 sessjoni tiegħu nhar is-26 ta’ Novembru 2021, il-Kunsill Internazzjonali taz-Zokkor għandu jadotta deċiżjoni dwar l-estensjoni tal-Ftehim Internazzjonali dwar iz-Zokkor tal-1992 b’sentejn oħra (“l-att previst”).
L-għan tal-att previst huwa li jippermetti lill-ISO tkompli għaddejja b’ħidmitha.
L-estensjoni tal-Ftehim se tkopri l-perjodu mill-1 ta’ Jannar 2022 sal-31 ta’ Diċembru 2023.
3.Pożizzjoni li għandha tittieħed f’isem l-Unjoni
Il-Ftehim Internazzjonali taz-Zokkor tal-1992 ġie konkluż mill-Unjoni permezz tad-Deċiżjoni 92/580/KEE, u daħal fis-seħħ fl-1 ta’ Jannar 1993 għal perjodu ta’ tliet snin sal-31 ta’ Diċembru 1995. Minn dak iż-żmien ’l hawn, ġie estiż b’mod regolari għal perjodi ulterjuri ta’ sentejn. Il-Ftehim ġie estiż l-aħħar b’deċiżjoni tal-Kunsill Internazzjonali taz-Zokkor, waqt il-55 sessjoni tiegħu nhar id-19 ta’ Lulju 2019, u se jibqa’ fis-seħħ sal-31 ta’ Diċembru 2021.
L-Unjoni minn dejjem kienet membru attiv tal-ISO, u huwa fl-interess tal-Unjoni li jkun hemm estensjoni ulterjuri tal-Ftehim b’sentejn oħra. L-Unjoni hija produttur ewlieni taz-zokkor, kif ukoll sieħba ewlenija fil-kummerċ taz-zokkor għal bosta Membri tal-ISO.
Is-87 Membru tal-ISO għandhom total ta’ 2 000 vot. L-UE tgħodd bħala Membru wieħed. Kull vot għandu piż ta’ GBP 661 għall-baġit amministrattiv tal-2021. Għall-proċeduri tal-baġit (ara l-Artikolu 25 tal-ISA tal-1992), jiġifieri biex jiġu stabbiliti l-kontributi finanzjarji annwali tal-Membri, l-għadd ta’ voti allokati lill-Unjoni huwa 538, u għaldaqstant il-kontribut dovut għall-2021 jammonta għal GBP 355 618. Dawn in-numri jiġu aġġustati kull sena.
Deċiżjoni formali dwar l-estensjoni tal-Ftehim sal-31 ta’ Diċembru 2023 hija skedata għad-59 Sessjoni tal-Kunsill Internazzjonali taz-Zokkor, li se ssir nhar is-26 ta’ Novembru 2021 f’Londra.
L-għan ta’ din il-proposta huwa li tinkiseb l-awtorizzazzjoni tal-Kunsill sabiex il-Kummissjoni tivvota, f’isem l-Unjoni, favur l-estensjoni tal-Ftehim sal-31 ta’ Diċembru 2023, fi ħdan il-Kunsill Internazzjonali taz-Zokkor.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi l-atti li jkollhom effetti legali skont ir-regoli tad-dritt internazzjonali li jirregolaw il-korp ikkonċernat. Jinkludi wkoll strumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni”.
4.1.2.Applikazzjoni għall-każ preżenti
Il-Kunsill Internazzjonali taz-Zokkor li ġie stabbilit fl-Artikoli 3 u 8 tal-Ftehim, u jistgħu jintalbu jadottaw ċertu deċiżjonijiet.
L-att previst, li l-Kunsill Internazzjonali taz-Zokkor għandu s-setgħa -jadottah f’konformità mal-Artikolu 45(2) tal-Ftehim, għandu l-effett li jestendi l-validità tal-Ftehim, li huwa ftehim internazzjonali li jorbot lill-Unjoni. Għaldaqstant, l-att previst għandu effetti legali.
L-att previst ma jissupplimentax jew ma jemendax il-qafas istituzzjonali tal-Ftehim.
Għalhekk, il-bażi ġuridika proċedurali tad-deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li fir-rigward tiegħu tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew komponenti jkun jista’ jiġi identifikat bħala dak ewlieni filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.
4.2.2.Applikazzjoni għall-każ preżenti
L-objettiv ewlieni u l-kontenut tal-att previst jirrelataw mal-politika kummerċjali komuni (il-kummerċ fi prodotti agrikoli).
Għaldaqstant, il-bażi ġuridika sostantiva tad-deċiżjoni proposta hija l-Artikolu 207 tat-TFUE.
4.3.Konklużjoni
Jenħtieġ li l-bażi ġuridika tad-deċiżjoni proposta tkun l-Artikolu 207 tat-TFUE, flimkien mal-Artikolu 218(9) tat-TFUE.
5.Pubblikazzjoni tal-att previst
Billi l-att tal-Kunsill Internazzjonali taz-Zokkor se jemenda l-Ftehim, jixraq li jiġi ppubblikat f’Il-Ġurnal Uffiċjali tal-Unjoni Ewropea wara li jiġi adottat.
2021/0273 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill Internazzjonali taz-Zokkor b’rabta mal-estensjoni tal-Ftehim Internazzjonali dwar iz-Zokkor tal-1992
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207 flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim Internazzjonali dwar iz-Zokkor tal-1992 (“il-Ftehim”) ġie konkluż mill-Unjoni permezz tad-Deċiżjoni tal-Kunsill 92/580/KEE u daħal fis-seħħ fl-1 ta’ Jannar 1993. Il-Ftehim ġie konkluż għal perijodu ta’ tliet snin sal-31 ta’ Diċembru 1995.
(2)Skont l-Artikoli 3 u 8 tal-Ftehim, il-Kunsill Internazzjonali taz-Zokkor ġiet stabbilit biex jadotta ċerti deċiżjonijiet. Skont l-Artikolu 45(2) tal-Ftehim, il-Kunsill Internazzjonali taz-Zokkor jista’ jestendi l-Ftehim għal perjodi suċċessivi ta’ mhux aktar minn sentejn kull darba. Mill-konklużjoni tiegħu ’l hawn, il-Ftehim ġie estiż regolarment għal perjodu ta’ sentejn oħra. Il-Ftehim ġie estiż l-aħħar b’deċiżjoni tal-Kunsill Internazzjonali taz-Zokkor f’Lulju 2019, u se jibqa’ fis-seħħ sal-31 ta’ Diċembru 2021.
(3)Matul id-59 sessjoni tiegħu li ser issir fis-26 ta’ Novembru 2021, il-Kunsill Internazzjonali taz-Zokkor għandu jiddeċiedi dwar l-estensjoni tal-Ftehim għal perjodu ta’ mhux aktar minn sentejn, mill-1 ta’ Jannar 2022 sat-31 ta’ Diċembru 2023.
(4)Huwa xieraq li tiġi stabbilita l-pożizzjoni li għandha tittieħed f’isem l-Unjoni fid-59 sessjoni tal-Kunsill Internazzjonali taz-Zokkor, peress li huwa fl-interess tal-Unjoni li jiġi estiż il-Ftehim,
ADOTTA DIN ID-DEĊIŻJONI:
Artikolu 1
Il-pożizzjoni li trid tittieħed f’isem l-Unjoni fid-59 sessjoni tal-Kunsill Internazzjonali taz-Zokkor għandha tkun li tivvota favur l-estensjoni tal-Ftehim Internazzjonali dwar iz-Zokkor 1992, għal perjodu ieħor ta’ mhux aktar minn sentejn mill-1 ta’ Jannar 2022 sat-31 ta’ Diċembru 2023.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
DIKJARAZZJONI FINANZJARJA
|
FinancSt/10/
LK/hn/4760052
|
|
6.22.2021.1
|
|
DATA: 28.06.2021
|
1.
|
INTESTATURA TAL-BAĠIT:
14 20 03 06 Organizzazzjonijiet u ftehimiet internazzjonali
|
APPROPRJAZZJONIJIET:
B2021 6 300 000 EUR
|
2.
|
TITOLU:
Proposta għal Deċiżjoni tal-Kunsill li tistabbilixxi l-pożizzjoni li għandha tittieħed f’isem l-Unjoni Ewropea fil-Kunsill Internazzjonali taz-Zokkor b’rabta mal-estensjoni tal-Ftehim Internazzjonali dwar iz-Zokkor tal-1992.
|
3.
|
BAŻI ĠURIDIKA: L-Artikolu 207 flimkien mal-Artikolu 218(9) tat-Trattat dwar il-Funzjonament tal-Unjoni Ewropea
|
4.
|
GĦANIJIET:
Estensjoni tal-Ftehim Internazzjonali eżistenti dwar iz-Zokkor b’sentejn oħra (mill-1 ta’ Jannar 2022 sal-31 ta’ Diċembru 2023).
|
5.
|
IMPLIKAZZJONIJIET FINANZJARJI
|
PERJODU TA’ 12-IL XAHAR
(f’miljuni ta’ EUR)
|
SENA FINANZJARJA ATTWALI
2021
(f’miljuni ta’ EUR)
|
SENA FINANZJARJA TA’ WARA
2022
(f’miljuni ta’ EUR)
|
5.0
|
NEFQA
-
IDDEBITATA LILL-BAĠIT TAL-UE
(RIFUŻJONIJIET/INTERVENTI)
-
AWTORITAJIET NAZZJONALI
-
OĦRAJN
|
|
|
0.41
|
5.1
|
DĦUL
-
RIŻORSI PROPRJI TAL-UE
(IMPOSTI / DAZJI TAD-DWANA)
-
NAZZJONALI
|
|
|
|
|
|
2023 (f’miljuni ta’ EUR)
|
|
|
5.0.1
|
NEFQA PROĠETTATA
|
0.46
|
|
|
5.1.1
|
DĦUL PROĠETTAT
|
|
|
|
5.2
|
METODU TAL-KALKOLU: Abbażi ta’ suppożizzjonijiet dwar stima tal-għadd ta’ voti (538) tal-UE (li jvarja kull sena), u dwar stima tal-ammont li għandu jitħallas għal kull vot f’GBP (661).
|
6.0
|
IL-PROĠETT JISTA’ JIĠI FFINANZJAT MILL-APPROPRJAZZJONIJIET IMDAĦĦLA FIL-KAPITOLU RILEVANTI TAL-BAĠIT ATTWALI?
|
IVA
|
6.1
|
IL-PROĠETT JISTA’ JIĠI FFINANZJAT PERMEZZ TA’ TRASFERIMENT BEJN KAPITOLI TAL-BAĠIT ATTWALI?
|
-
|
6.2
|
SE JKUN HEMM BŻONN TA’ BAĠIT SUPPLIMENTARI?
|
-
|
6.3
|
SE JKUN HEMM BŻONN LI JIDDAĦĦLU L-APPROPRJAZZJONIJIET F’BAĠITS FUTURI?
|
IVA
|
OSSERVAZZJONIJIET:
L-ammont li għandu jitħallas fir-realtà jista’ jvarja skont l-għadd finali ta’ voti li jiġu allokati lill-UE, skont l-ammont li għandu jitħallas għal kull vot f’GBP, u skont ir-rata tal-kambju EUR/GBP.
|