EUR-Lex Access to European Union law
This document is an excerpt from the EUR-Lex website
Document 52020PC0171
Proposal for a DECISION OF THE EUROPEAN PARLIAMENT AND OF THE COUNCIL amending Decision (EU) 2020/265 as regards adjustments to the amounts mobilised from the Flexibility Instrument for 2020 to be used for migration, refugee inflows and security threats, for immediate measures in the framework of the COVID-19 outbreak and for reinforcement of the European Public Prosecutor's Office
Proposta għal DEĊIŻJONI TAL-PARLAMENT EWROPEW U TAL-KUNSILL li temenda d-Deċiżjoni (UE) 2020/265 fir-rigward tal-aġġustamenti għall-ammonti mmobilizzati mill-Istrument ta’ Flessibbiltà għall-2020 biex jintużaw għall-migrazzjoni, id-dħul ta’ rifuġjati u t-theddid għas-sigurtà, għal miżuri immedjati fil-qafas tat-tifqigħa tal-COVID-19 u għat-tisħiħ tal-Uffiċċju tal-Prosekutur Pubbliku Ewropew
Proposta għal DEĊIŻJONI TAL-PARLAMENT EWROPEW U TAL-KUNSILL li temenda d-Deċiżjoni (UE) 2020/265 fir-rigward tal-aġġustamenti għall-ammonti mmobilizzati mill-Istrument ta’ Flessibbiltà għall-2020 biex jintużaw għall-migrazzjoni, id-dħul ta’ rifuġjati u t-theddid għas-sigurtà, għal miżuri immedjati fil-qafas tat-tifqigħa tal-COVID-19 u għat-tisħiħ tal-Uffiċċju tal-Prosekutur Pubbliku Ewropew
COM/2020/171 final
IL-KUMMISSJONI EWROPEA
Brussell, 2.4.2020
COM(2020) 171 final
Proposta għal
DEĊIŻJONI TAL-PARLAMENT EWROPEW U TAL-KUNSILL
li temenda d-Deċiżjoni (UE) 2020/265 fir-rigward tal-aġġustamenti għall-ammonti mmobilizzati mill-Istrument ta’ Flessibbiltà għall-2020 biex jintużaw għall-migrazzjoni, id-dħul ta’ rifuġjati u t-theddid għas-sigurtà, għal miżuri immedjati fil-qafas tat-tifqigħa tal-COVID-19 u għat-tisħiħ tal-Uffiċċju tal-Prosekutur Pubbliku Ewropew
MEMORANDUM TA’ SPJEGAZZJONI
Fis-27 ta’ Novembru 2019, il-Parlament Ewropew u l-Kunsill iddeċidew li jimmobilizzaw l-Istrument ta’ Flessibbiltà għall-ammont ta’ EUR 778,1 miljun għall-intestatura 3, Sigurtà u Ċittadinanza, kif propost mill-Kummissjoni (id-Deċiżjoni (UE) 2020/265 1 ).
Fis-27 ta’ Marzu 2020, il-Kummissjoni ppreżentat l-abbozz ta' baġit emendatorju (ABE) Nru 1/2020 2 . Dan kien jinkludi, fost l-oħrajn , żieda kumplessiva ta’ EUR 423,3 miljun fl-approprjazzjonijiet ta' impenn taħt l-intestatura 3 biex tindirizza l-ħtiġijiet li jirriżultaw minn pressjoni migratorja miżjuda fil-Greċja, biex jiffinanzjaw miżuri immedjati meħtieġa fil-qafas tat-tifqigħa tal-COVID-19 (l-ewwel ħażna ta’ apparat mediku li qatt saret taħt rescEU) u biex jiżdied il-baġit għall-Uffiċċju tal-Prosekutur Pubbliku Ewropew. Fl-ABE Nru 1/2020 il-Kummissjoni pproponiet li jintuża l-Marġni Globali għall-Impenji (global margin for commitments — GMC) għall-ammont ta’ EUR 350,0 miljun disponibbli mill-2018 biex ikopri parti minn din iż-żieda relatata mal-migrazzjoni. Il-Kummissjoni pproponiet ukoll li l-parti li jifdal miż-żieda (EUR 73,3 miljun) tiġi ffinanzjata billi l-ammont immobilizzat mill-Istrument ta’ Flessibbiltà jiġi aġġustat skont dan u biex l-iskop tad-Deċiżjoni (UE) 2020/265 3 jiġi estiż.
Il-Kummissjoni llum qed tippreżenta l-abbozz ta' baġit emendatorju Nru 2/2020 4 , li jinkludi żieda addizzjonali tal-approprjazzjonijiet ta' impenn taħt l-intestatura 3 ta’ EUR 3 000,0 miljun biex ikopru r-riattivazzjoni tal-Istrument għall-Appoġġ ta' Emerġenza fi ħdan l-Unjoni (Emergency Support Instrument –– ESI) biex jgħin lill-Istati Membri jindirizzaw il-konsegwenzi tat-tifqigħa tal-COVID-19 u biex isaħħaħ aktar il-Mekkaniżmu tal-Unjoni għall-Protezzjoni Ċivili/rescEU sabiex tiġi ffaċilitata l-ħażna u l-koordinazzjoni usa’ tad-distribuzzjoni tar-riżorsi essenzjali madwar l-Ewropa. Minħabba n-nuqqas ta’ spazju għal riallokazzjonijiet taħt l-intestatura 3 u f’konformità mal-proposta, ippreżentata llum ukoll, li jiġi emendat ir-Regolament tal-QFP biex jitneħħew il-limitazzjonijiet fil-kamp ta’ applikazzjoni ta’ dan l-istrument 5 , il-Kummissjoni qed tipproponi fl-ABE Nru 2/2020 l-użu tal-GMC għall-ammont sħiħ disponibbli taħt dan l-istrument speċjali ta’ EUR 2 042,4 miljun 6 biex ikopri din iż-żieda.
Barra minn hekk, din id-deċiżjoni proposta ta’ mobilizzazzjoni tal-Istrument ta’ Flessibbiltà temenda d-Deċiżjoni (UE) 2020/265 tas-27 ta’ Novembru 2019 u tissostitwixxi l-emenda ppreżentata flimkien mal-ABE Nru 1/2020. Il-proposta l-ġdida għaldaqstant tkopri ż-żidiet kombinati tal-approprjazzjonijiet ta' impenn għall-intestatura 3 inklużi kemm fl-ABE Nri 1 u 2/2020, iżżid l-ammont totali biex ikun mobilizzat għal EUR 1 094,4 miljun 7 u teżawrixxi l-ammont disponibbli taħt dan l-istrument għall-2020.
Minħabba li l-użu tal-GMC fl-ABE Nru 2/2020 u din id-deċiżjoni ta’ mobilizzazzjoni proposta tal-Istrument ta’ Flessibbiltà mhumiex biżżejjed biex ikopru l-ħtiġijiet ta’ finanzjament tal-ESI, il-Kummissjoni qed tagħmel ukoll proposta separata 8 , flimkien mal-ABE Nru 2/2020, biex jiġi mmobilizzat il-Marġni ta' Kontinġenza għall-2020 b’ammont ta’ EUR 714,6 miljun.
L-approprjazzjonijiet ta’ pagament indikattivi li jikkorrispondu mal-mobilizzazzjoni aġġornata tal-Istrument ta’ Flessibbiltà huma ppreżentati fit-tabella ta’ hawn taħt:
(f’miljuni ta’ EUR, bil-prezzijiet kurrenti)
|
Sena |
Approprjazzjonijiet ta’ pagament relatati mal-mobilizzazzjoni tal-istrument ta’ flessibbiltà fl-2020 |
|
2020 |
574,6 |
|
2021 |
413,7 |
|
2022 |
66,2 |
|
2023 |
39,9 |
|
Total |
1 094,4 |
Proposta għal
DEĊIŻJONI TAL-PARLAMENT EWROPEW U TAL-KUNSILL
li temenda d-Deċiżjoni (UE) 2020/265 fir-rigward tal-aġġustamenti għall-ammonti mmobilizzati mill-Istrument ta’ Flessibbiltà għall-2020 biex jintużaw għall-migrazzjoni, id-dħul ta’ rifuġjati u t-theddid għas-sigurtà, għal miżuri immedjati fil-qafas tat-tifqigħa tal-COVID-19 u għat-tisħiħ tal-Uffiċċju tal-Prosekutur Pubbliku Ewropew
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea,
Wara li kkunsidraw il-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta' baġit u dwar ġestjoni finanzjarja tajba 9 , u b’mod partikolari l-punt 12 tiegħu,
Wara li kkunsidraw il-proposta tal-Kummissjoni Ewropea,
Billi:
(1)L-Istrument ta’ Flessibbiltà huwa maħsub biex jippermetti l-finanzjament ta’ nefqa identifikata b’mod ċar li ma setgħetx tiġi ffinanzjata fil-limiti massimi disponibbli ta’ intestatura waħda jew aktar tal-baġit ġenerali tal-Unjoni.
(2)Il-limitu massimu tal-ammont annwali disponibbli għall-Istrument ta’ Flessibilità huwa ta’ EUR 600 000 000 (prezzijiet tal-2011), kif stipulat fl-Artikolu 11 tar-Regolament tal-Kunsill (UE, Euratom) Nru 1311/2013 10 , miżjud, fejn applikabbli mill-ammonti li skadew li saru disponibbli skont it-tieni subparagrafu tal-paragrafu 1 ta’ dak l-Artikolu.
(3)Fis-27 ta’ Novembru 2019, il-Parlament Ewropew u l-Kunsill adottaw id-Deċiżjoni (UE) 2020/265 11 li timmobilizza l-Istrument ta' Flessibbiltà biex jipprovdi l-ammont ta’ EUR 778 074 489 f’approprjazzjonijiet ta' impenn fl-intestatura 3 (Sigurtà u Ċittadinanza) għas-sena finanzjarja 2020 biex jiġu ffinanzjati miżuri fil-qasam tal-migrazzjoni, tar-refuġjati u tas-sigurtà.
(4)L-abbozz ta' baġit emendatorju Nru 1/2020 12 jinkludi żieda ta’ approprjazzjonijiet ta' impenn għall-intestatura 3 ta’ EUR 423 300 000 biex tindirizza l-ħtiġijiet li jirriżultaw mill-pressjoni migratorja miżjuda fil-Greċja, biex tiffinanzja miżuri immedjati fil-kuntest tat-tifqigħa tal-COVID-19 u biex tkopri żieda fil-baġit għall-Uffiċċju tal-Prosekutur Pubbliku Ewropew. Minn din iż-żieda kumplessiva, EUR 350 000 000 huma koperti mill-użu tal-Marġni Globali għall-Impenji stabbilit fl-Artikolu 14 tar-Regolament tal-Kunsill (UE, Euratom) Nru 1311/2013, u EUR 73 300 000 permezz ta’ mobilizzazzjoni addizzjonali tal-Istrument ta’ Flessibbiltà għall-2020. Huwa neċessarju wkoll li jiġi aġġustat il-profil tal-pagament indikattiv.
(5)L-abbozz ta' baġit emendatorju Nru 2/2020 13 jinkludi żieda addizzjonali tal-approprjazzjonijiet ta’ impenn taħt l-intestatura 3 ta’ EUR 3 000 000 000 biex ikopru r-riattivazzjoni tal-Istrument għall-Appoġġ ta' Emerġenza fi ħdan l-Unjoni (Emergency Support Instrument –– ESI) biex jgħin lill-Istati Membri jindirizzaw il-konsegwenzi tat-tifqigħa tal-COVID-19 u biex isaħħaħ aktar il-Mekkaniżmu tal-Unjoni għall-Protezzjoni Ċivili/rescEU sabiex tiġi ffaċilitata l-ħażna u l-koordinazzjoni usa’ tad-distribuzzjoni tar-riżorsi essenzjali madwar l-Ewropa. Minn din iż-żieda, EUR 2 042 402 163 huma koperti mill-użu tal-Marġni Globali għall-Impenji stabbilit fl-Artikolu 14 tar-Regolament tal-Kunsill (UE, Euratom) Nru 1311/2013, u EUR 243 039 699 permezz ta’ mobilizzazzjoni addizzjonali tal-Istrument ta’ Flessibbiltà għall-2020. Huwa neċessarju wkoll li jiġi aġġustat il-profil tal-pagament indikattiv.
(6)Jenħtieġ għalhekk li d-Deċiżjoni (UE) 2020/265 tiġi emendata skont dan.
(7)Jenħtieġ li din id-Deċiżjoni tidħol fis-seħħ fl-istess jum tal-emenda tal-baġit tal-2020 minħabba li l-Istrument ta’ Flessibbiltà jippermetti l-finanzjament ta’ xi azzjonijiet li jaqbeż il-limitu massimu stabbilit għall-baġit tal-2020 fil-qafas finanzjarju pluriennali.
ADOTTAW DIN ID-DEĊIŻJONI:
Artikolu 1
L-ewwel subparagrafu tal-paragrafu 1 tal-Artikolu 1 tad-Deċiżjoni (UE) 2020/265 huwa emendat kif ġej: “EUR 778 074 489” hija sostitwita b’“EUR 1 094 414 188”.
It-tieni subparagrafu tal-paragrafu 1 huwa sostitwit bi: “L-ammonti msemmija fl-ewwel subparagrafu għandhom jintużaw biex jiffinanzjaw miżuri biex jindirizzaw l-isfidi kontinwi tal-migrazzjoni, tad-dħul ta’ rifuġjati u tat-theddid għas-sigurtà, kif ukoll il-kriżi attwali tas-saħħa fl-Unjoni Ewropea li tirriżulta mit-tifqigħa tal-COVID-19, u l-ħtiġijiet akbar tal-Uffiċċju tal-Prosekutur Pubbliku Ewropew.”
Fl-ewwel subparagrafu tal-paragrafu 2, il-punti (a) sa (d) huma sostitwiti b’dan li ġej:
“(a) EUR 574 652 355 fl-2020;
(b) EUR 413 658 806 fl-2021;
(c) EUR 66 154 477 fl-2022;
(d) EUR 39 948 550 fl-2023.”
Artikolu 2
Din id-Deċiżjoni għandha tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell,
Għall-Parlament Ewropew Għall-Kunsill
Il-President Il-President
Id-Deċiżjoni (UE) 2020/265 tal-Parlament Ewropew u tal-Kunsill tas-27 ta’ Novembru 2019 dwar il-mobilizzazzjoni tal-Istrument ta’ Flessibilità għall-finanzjament ta’ miżuri baġitarji immedjati biex jiġu indirizzati l-isfidi kontinwi tal-migrazzjoni, tad-dħul tar-rifuġjati u tat-theddid għas-sigurtà (ĠU L 058, 27.2.2020, p. 51)
