EUR-Lex Access to European Union law
This document is an excerpt from the EUR-Lex website
Document 52018PC0324
Proposal for a REGULATION OF THE EUROPEAN PARLIAMENT AND OF THE COUNCIL on the protection of the Union's budget in case of generalised deficiencies as regards the rule of law in the Member States
Proposta għal REGOLAMENT TAL-PARLAMENT EWROPEW U TAL-KUNSILL dwar il-protezzjoni tal-baġit tal-Unjoni f’każ ta’ nuqqasijiet ġeneralizzati fir-rigward tal-istat tad-dritt fl-Istati Membri
Proposta għal REGOLAMENT TAL-PARLAMENT EWROPEW U TAL-KUNSILL dwar il-protezzjoni tal-baġit tal-Unjoni f’każ ta’ nuqqasijiet ġeneralizzati fir-rigward tal-istat tad-dritt fl-Istati Membri
COM/2018/324 final - 2018/0136 (COD)
IL-KUMMISSJONI EWROPEA
Brussell, 2.5.2018
COM(2018) 324 final
2018/0136(COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar il-protezzjoni tal-baġit tal-Unjoni f’każ ta’ nuqqasijiet ġeneralizzati fir-rigward tal-istat tad-dritt fl-Istati Membri
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi
Kif spjegat fil-Komunikazzjoni mill-Kummissjoni ta’ Frar 2018 “Qafas Finanzjarju Pluriennali ġdid u modern għal Unjoni Ewropea li tagħti riżultati fuq il-prijoritajiet tagħha b'mod effiċjenti wara l-2020” 1 , l-Unjoni hija komunità ta’ dritt u l-valuri tagħha jikkostitwixxu l-bażi stess tal-eżistenza tagħha. Dawn jidħlu fl-istruttura ġuridiku u istituzzjonali kollha tagħha u fil-politiki u fil-programmi kollha tagħha. Għalhekk ir-rispett ta’ dawn il-valuri jrid jiġi żgurat fil-politiki kollha tal-Unjoni. Dan jinkludi fil-baġit tal-UE, fejn ir-rispett tal-valuri fundamentali huwa prekundizzjoni essenzjali għall-ġestjoni finanzjarja soda u effettiva tal-fondi tal-UE. Ir-rispett tal-istat tad-dritt huwa importanti għaċ-ċittadini Ewropej, kif ukoll għall-inizjattivi kummerċjali, għall-innovazzjoni u għall-investiment. L-ekonomija Ewropea tiffjorixxi l-aktar meta l-qafas ġuridiku u istituzzjonali jaderixxi bis-sħiħ mal-valuri komuni tal-Unjoni.
Il-potenzjal tal-baġit tal-UE jista’ jinkiseb kompletament, biss jekk l-ambjent ekonomiku, regolatorju u amministrattiv fl-Istati Membri jkun wieħed ta’ appoġġ. Bil-Qafas Finanzjarju Pluriennali attwali, l-Istati Membri kollha u l-benefiċjarji diġà huma meħtieġa juru li l-qafas regolatorju tal-ġestjoni finanzjarja huwa sod, li r-regolamentazzjoni rilevanti tal-UE tkun qed tiġi implimentata b’mod korrett, u li teżisti l-kapaċità amministrattiva u istituzzjonali meħtieġa biex il-finanzjament tal-UE jkun suċċess. Barra minn hekk, il-kondizzjonalità politika tista’ trawwem kooperazzjoni bejn l-Istati Membri f’oqsma fejn l-ekonomiji ta’ skala jew l-esternalitajiet huma sinifikanti. Ġew introdotti wkoll dispożizzjonijiet ġodda skont il-Qafas Finanzjarju Pluriennali 2014 – 2020 biex jiġu evitati sitwazzjonijiet fejn l-effettività tal-finanzjament tal-UE tkun imxekkla minn politiki ekonomiċi u fiskali mhux sodi.
Ir-rispett effettiv tal-istat tad-dritt huwa prerekwiżit għall-fiduċja li l-infiq tal-UE fl-Istati Membri huwa protett biżżejjed. Kif spjegat fil-Komunikazzjoni tal-Kummissjoni tal-2014 “Qafas ġdid tal-UE biex jissaħħaħ l-Istat tad-Dritt”, 2 l-istat tad-dritt huwa s-sinsla ta’ kull demokrazija kostituzzjonali moderna. Huwa wieħed mill-prinċipji fundamentali li jirriżultaw mit-tradizzjonijiet kostituzzjonali komuni tal-Istati Membri kollha tal-Unjoni Ewropea. Għalhekk, dan huwa wieħed mill-valuri ewlenin li fuqhom hija bbażata l-Unjoni, kif imsemmi fl-Artikolu 2 tat-Trattat dwar l-Unjoni Ewropea, kif ukoll bil-Preamboli tat-Trattat u l-Karta tad-Drittijiet Fundamentali. Dan jiżgura li l-azzjonijiet mill-Istat jitwettqu f'qafas ġuridiku effettiv u affidabbli, li jkunu jistgħu jiġu skrutinizzati u jekk meħtieġ sfidati, u li jkun jista’ jingħata rimedju effettiv.
Il-kostituzzjonijiet u s-sistemi ġudizzjarji differenti tal-Istati Membri tal-UE huma, fil-prinċipju, imfassla tajjeb biex jiżgura l-istat tad-dritt u mgħammra b’salvagwardji intrinsiċi biex jipproteġu liċ-ċittadini kontra kull theddida għall-istat tad-dritt. Madankollu, għadd ta’ avvenimenti reċenti wrew dgħufijiet ġeneralizzati fis-sistemi nazzjonali ta’ kontroll u bilanċ u wrew kif nuqqas ta’ rispett għall-istat tad-dritt jista’ jsir kwistjoni ta’ tħassib serju u komuni fl-Unjoni Ewropea kollha. Ir-riżultat kien talba ċara minn istituzzjonijiet bħall-Parlament Ewropew kif ukoll mill-pubbliku inġenerali lill-UE biex jittieħdu azzjonijiet biex jiġi protett l-istat tad-dritt.
Din l-azzjoni ttieħdet bl-għodod disponibbli u nkisbu riżultati. Madankollu, meta wieħed iqis ir-rabta bejn ir-rispett lejn l-istat tad-dritt u l-fiduċja reċiproka u s-solidarjetà finanzjarja bejn l-Istati Membri tal-Unjoni Ewropea, u li l-mekkaniżmi ta’ kontroll ma jistgħux ikunu effettivi sakemm ma jkunux sostnuti minn applikazzjoni effettiva ta’ kontroll amministrattiv u legali u minn rimedji fil-każ ta’ għemil ħażin, l-obbligi eżistenti li jiġu żgurati sistemi effettivi ta’ kontroll jenħtieġ li jkunu ssupplimentati minn miżuri li jiżguraw ir-rispett tal-istat tad-dritt.
Sabiex jiġu protetti l-interessi finanzjarji tal-Unjoni kontra r-riskju ta’ telf finanzjarju kkawżat minn nuqqasijiet ġeneralizzati fir-rigward l-istat tad-dritt f’xi Stat Membru, l-Unjoni Ewropea jenħtieġ tingħatalha l-possibbiltà tadotta miżuri xierqa f’każijiet bħal dawn. Dan jenħtieġ ikun fuq il-bażi ta’ deċiżjoni tal-Kunsill wara proposta mill-Kummissjoni. Id-Deċiżjoni għandha titqies li ġiet adottata mill-Kunsill, sakemm dan ma jiddeċidix, b’maġġoranza kwalifikata, li jiċħad il-proposta tal-Kummissjoni fi żmien xahar mill-adozzjoni tagħha mill-Kummissjoni. Il-Parlament Ewropew ukoll jenħtieġ li jkun involut bis-sħiħ fl-istadji kollha.
Jeħtieġ li l-miżuri jiġu adottati f’rispett sħiħ tal-prinċipji tat-trasparenza u tal-proporzjonalità. Huwa wkoll importanti li jiġi żgurat li l-konsegwenzi tal-miżuri jkollhom rabta suffiċjenti mal-għan tal-finanzjament. Dan juri wkoll il-bżonn li jiġi żgurat li l-konsegwenzi jaqgħu fuq dawk responsabbli għan-nuqqasijiet identifikati. Għalhekk, jenħtieġ jiġi rifless il-fatt li l-benefiċjarji individwali tal-finanzjament tal-UE, bħalma huma l-istudenti f’Erasmus, ir-riċerkaturi jew l-organizzazzjonijiet tas-soċjetà ċivili, ma jistgħux jitqiesu bħala responsabbli għal dan il-ksur.
Din il-proposta tistabbilixxi r-regoli meħtieġa għall-protezzjoni tal-baġit tal-Unjoni f’każ ta’ nuqqasijiet ġeneralizzati fir-rigward l-istat tad-dritt fl-Istati Membri Il-proposta tista’ tkun integrata fir-Regolament Finanzjarju abbażi tal-istess bażi ġuridika, meta ssir ir-reviżjoni tiegħu fil-futur.
•Konsistenza mad-dispożizzjonijiet eżistenti tal-politika
Il-proposta se tikkontribwixxi għall-iżgurar tar-rispett għall-istat tad-dritt fl-Istati Membri kollha f’konformità mal-Artikolu 2 TUE u biex jiġi protett il-baġit tal-Unjoni.
•Konsistenza ma’ politiki oħra tal-Unjoni
Billi tikkontribwixxi biex jiġi żgurat ir-rispett għall-istat tad-dritt u l-implimentazzjoni xierqa tal-baġit tal-Unjoni, il-proposta se tappoġġa l-politiki l-oħra kollha tal-Unjoni, b’mod partikolari f’dak li għandu x’jaqsam mal-fondi tal-Unjoni.
2.IL-BAŻI ĠURIDIKA, IS- SUSSIDJARJETÀ U L-PROPORZJONALITÀ
•Il-bażi ġuridika
Il-proposta hija bbażata fuq l-Artikolu 322(1)(a) tat-Trattat dwar il-Funzjonament tal-Unjoni Ewropea u fuq l-Artikolu 106a tat-Trattat li jistabbilixxi l-Komunità Ewropea tal-Enerġija Atomika.
•Is-Sussidjarjetà (għall-kompetenza mhux esklużiva)
Ir-regoli finanzjarji li jirregolaw il-baġit tal-Unjoni skont l-Artikolu 322 tat-Trattat dwar il-Funzjonament tal-UE ma setgħux jiġu adottati fil-livell tal-Istati Membri.
•Il-proporzjonalità
Il-proposta tipprevedi miżuri proporzjonati għal nuqqasijiet ġeneralizzati fir-rigward tal-istat tad-dritt, inklużi s-sospensjoni u t-tnaqqis ta’ finanzjament taħt impenji eżistenti, jew il-projbizzjoni li jiġu konklużi impenji ġodda ma’ kategoriji speċifiċi ta’ benefiċjarji. Il-proporzjonalità se tkun żgurata b’mod partikulari billi jitqiesu s-serjetà tas-sitwazzjoni, iż-żmien li għadda mindu seħħ l-aġir rilevanti, id-duratura u r-rikorrenza tiegħu, l-intenzjoni u l-livell ta’ kollaborazzjoni tal-Istat Membru biex itemm il-ksur tal-istat tad-dritt u l-effetti ta’ dak in-nuqqas fuq il-fondi rispettivi tal-Unjoni.
•L-għażla tal-istrument
Meta wieħed iqis li l-objettiv huwa li jingħata kontribut għall-implimentazzjoni korretta tal-baġit ġenerali tal-Unjoni; il-proposta tieħu l-forma ta’ Regolament awtonomu bbażat fuq l-Artikolu 322 TFUE, l-istess bażi ġuridika tar-Regolament Finanzjarju 3 .
3.RIŻULTATI TAL-EVALWAZZJONIJIET RETROSPETTIVI, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•L-evalwazzjonijiet retrospettivi/kontrolli tal-idoneità tal-leġiżlazzjoni eżistenti
Ma hemm l-ebda programm attwali komparabbli. Madankollu hemm esperjenza miġbura mill-indirizzar fil-livell tal-Unjoni Ewropea ta’ kwistjonijiet li jikkonċernaw l-istat tad-dritt fl-Istati Membri. Dan wera li, filwaqt li jeżistu ċerti għodod, dawn mhumiex imfassla speċifikament biex jindirizzaw sitwazzjonijiet fejn l-implimentazzjoni tal-fondi tal-Unjoni tkun tista’ titqiegħed f’riskju minħabba nuqqasijiet f’dak li għandu x’jaqsam mal-istat tad-dritt.
•Il-konsultazzjonijiet mal-partijiet konċernati
Ma sarux konsultazzjonijiet ma’ partijiet konċernati, iżda s-suġġett ġie diskuss b’mod wiesa’, inkluż fil-Parlament Ewropew u fil-Kunsill.
•Il-kompetenza esterna
Meta tfasslu r-regoli attwali tqiesu sorsi esterni, b’mod partikolari l-Kunsill tal-Ewropa. L-użu tal-għarfien espert estern mill-Kunsill tal-Ewropa huwa prevista wkoll, fejn xieraq, meta jiġu implimentati l-miżuri proposti.
•Il-valutazzjoni tal-impatt
Ma saret l-ebda valutazzjoni tal-impatt billi l-miżura għandha bħala l-uniku objettiv tagħha li tevita li l-baġit tal-Unjoni jintlaqat ħażin minn sitwazzjonijiet fejn nuqqas ġeneralizzat f’dak li għandu x’jaqsam mal-istat tad-dritt fi Stat Membru jaffettwa jew iqiegħed f’riskju l-ġestjoni finanzjarja soda u l-protezzjoni tal-interessi finanzjarji tal-Unjoni. Għalhekk l-għażliet kienu li jew jinżamm l-istatus quo, bla ebda proċedura finanzjarja speċifika f’każ ta’ problemi relatati mal-istat tad-dritt u li potenzjalment jaffettwaw il-ġestjoni soda tal-fondi tal-Unjoni, jew li tiġi żviluppata tali proċedura.
•Id-drittijiet fundamentali
Il-proposta se jkollha impatt pożittiv fuq id-drittijiet fundamentali billi se żżid il-livell attwali ta’ protezzjoni kontra nuqqasijiet fir-rigward tal-istat tad-dritt.
4.L-IMPLIKAZZJONIJIET BAĠITARJI
Billi żżid il-protezzjoni kontra prattiki, ommissjonijiet jew miżuri possibbli minn awtoritajiet pubbliċi li jaffettwaw l-istat tad-dritt f’dak l-Istat Membru u li jaffettwaw jew jirriskjaw li jaffettwaw il-kapaċità tiegħu li jimplimenta l-obbligi baġitarji tiegħu, il-proposta se jkollha impatt pożittiv fuq il-ġestjoni finanzjarja soda tal-baġit ġenerali tal-Unjoni.
5.ELEMENTI OĦRA
•Pjanijiet ta’ implimentazzjoni u arranġamenti għall-monitoraġġ, l-evalwazzjoni u r-rappurtar
Il-Kummissjoni se tivvaluta s-sitwazzjoni fl-Istat Membru konċernat sabiex jiġi deċiż jekk jistax jiġi propost li jitneħħew il-miżuri.
•Spjegazzjoni fid-dettall tad-dispożizzjonijiet speċifiċi tal-proposta
Il-proposta tibni fuq il-Komunikazzjoni tal-Kummissjoni tal-2014 “Qafas ġdid tal-UE biex jissaħħaħ l-Istat tad-Dritt” 4 , u l-Komunikazzjoni tal-Kummissjoni ta’ Frar 2018 “Qafas Finanzjarju Pluriennali ġdid u modern għal Unjoni Ewropea li tagħti riżultati fuq il-prijoritajiet tagħha b'mod effiċjenti wara l-2020” 5 , kif ukoll l-istandards u l-prinċipji żviluppati mill-Kunsill tal-Ewropa.
L-Artikolu 1 jispeċifika s-suġġett u l-ħtieġa li jiġi protett il-baġit tal-Unjoni kontra nuqqasijiet ġeneralizzati fir-rigward tal-istat tad-dritt fi Stat Membru, li jista’ jaffettwa jew jiriskja li jaffettwa l-ġestjoni finanzjarja soda u l-protezzjoni tal-interessi finanzjarji tal-Unjoni.
L-Artikolu 2 jistipula d-definizzjonijiet.
L-Artikolu 3 jispjega l-miżuri li se jittieħdu biex tiġi indirizzata sitwazzjoni ta’ nuqqasijiet ġeneralizzati fir-rigward tal-istat tad-dritt. Dan l-Artikolu jispjega liema funzjonijiet partikolari tal-istat jistgħu jiġu affettwati u jkollhom impatt negattiv fuq il-ġestjoni finanzjarja soda tal-fondi tal-Unjoni.
L-Artikolu 4 jelenka t-tip ta’ miżuri li jistgħu jittieħdu u jikkjarifika li dawn għandhom jiġu indirizzati lejn l-Istati Membri bħala r-riċevituri tal-fondi tal-Unjoni.
L-Artikolu 5 jistabbilixxi l-proċeduri li jenħtieġ li jiġu segwiti mill-Kummissjoni meta tipproponi miżuri lill-Kunsill, li jenħtieġ jiddeċiedi permezz ta’ votazzjoni b'maġġoranza kwalifikata inversa.
L-Artikolu 6 jistabbilixxi l-proċedura biex jitneħħew il-miżuri meta s-sitwazzjoni li jkunu mmirati lejha tkun ġiet indirizzata fl-Istat Membru partikolari, kif ukoll il-konsegwenzi tat-tneħħija f’termini baġitarji.
L-Artikolu 7 jirrigwarda l-informazzjoni pprovduta lill-Parlament Ewropew.
L-Artikolu 8 fih id-dispożizzjonijiet finali.
2017/ (COD)
2018/0136 (COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar il-protezzjoni tal-baġit tal-Unjoni f’każ ta’ nuqqasijiet ġeneralizzati fir-rigward tal-istat tad-dritt fl-Istati Membri
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 322(1)(a) tiegħu,
Wara li kkunsidraw it-Trattat li jistabbilixxi l-Komunità Ewropea tal-Enerġija Atomika, u b'mod partikolari l-Artikolu 106a tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Qorti tal-Awdituri 6 ,
Filwaqt li jaġixxu skont il-proċedura leġiżlattiva ordinarja
Billi:
(1)L-istat tad-dritt huwa wieħed mill-valuri essenzjali li fuqhom hija mibnija l-Unjoni. Kif imsemmi fl-Artikolu 2 tat-Trattat dwar l-Unjoni Ewropea, dawn il-valuri huma komuni għall-Istati Membri kollha.
(2)L-istat tad-dritt jitlob li s-setgħat pubbliċi kollha jaġixxu fil-limiti stabbiliti mil-liġi, skont il-valuri tad-demokrazija u tad-drittijiet fundamentali, u taħt il-kontroll ta’ qrati indipendenti u imparzjali. Dan jirrikjedi, b’mod partikolari, li jkunu rispettati 7 l-prinċipji tal-legalità 8 , taċ-ċertezza legali 9 , tal-projbizzjoni tal-arbitrarjetà tas-setgħat eżekuttivi 10 , tas-separazzjoni tas-setgħat 11 , u tal-protezzjoni ġudizzjarja effettiva minn qrati indipendenti 12 .
(3)L-istat tad-dritt huwa prerekwiżit għall-protezzjoni tal-valuri fundamentali l-oħra li fuqhom hija msejsa l-Unjoni, bħalma huma l-libertà, id-demokrazija, l-ugwaljanza u r-rispett għad-drittijiet tal-bniedem. Ir-rispett tal-istat tad-dritt huwa marbut intrinsikament mar-rispett tad-demokrazija u tad-drittijiet fundamentali: ma jistax ikun hemm demokrazija u rispett għad-drittijiet fundamentali mingħajr rispett lejn l-istat tad-dritt u vice versa.
(4)Kull meta l-Istati Membri jimplimentaw il-baġit tal-Unjoni, u jkun xi jkun il-metodu ta’ implimentazzjoni li jużaw, ir-rispett tal-istat tad-dritt huwa prekondizzjoni essenzjali biex jikkonformaw mal-prinċipji tal-ġestjoni finanzjarja soda stabbilit fl-Artikolu 317 tat-Trattat dwar il-Funzjonament tal-Unjoni Ewropea.
(5)Ġestjoni finanzjarja soda tista’ tiġi żgurata biss mill-Istati Membri jekk l-awtoritajiet pubbliċi jaġixxu f’konformità mal-liġi, u jekk il-ksur tagħha jkun segwit b’mod effettiv mis-servizzi investigattivi u ta’ prosekuzzjoni, u jekk id-deċiżjonijiet tal-awtoritajiet pubbliċi jkunu jistgħu jiġu suġġetti għal stħarriġ ġudizzjarju minn qrati indipendenti u mill-Qorti tal-Ġustizzja tal-Unjoni Ewropea.
(6)Il-korpi ġudizzjarji jenħtieġ li jaġixxu b’mod indipendenti u imparzjali u s-servizzi ta’ investigazzjoni u ta’ prosekuzzjoni jenħtieġ li jkunu jistgħu jwettqu l-funzjoni tagħhom b’mod xieraq. Dawn jenħtieġ li jkollhom biżżejjed riżorsi u proċeduri biex jaġixxu b’mod effettiv u b’rispett sħiħ għad-dritt ta’ proċess ġust. Dawn il-kundizzjonijiet huma meħtieġa bħala garanzija minima kontra deċiżjonijiet illegali u arbitrarji mill-awtoritajiet pubbliċi li jistgħu jkunu ta’ ħsara għall-interessi finanzjarji tal-Unjoni.
(7)L-indipendenza tal-ġudikatura tippresupponi, b’mod partikolari, li l-korp konċernat ikun jista’ jeżerċita l-funzjonijiet ġudizzjarji tiegħu kompletament b’mod awtonomu, mingħajr ma jkun soġġett għall-ebda restrizzjoni ġerarkika jew ikun subordinat għal kwalunkwe korp ieħor, u mingħajr ma jirċievi struzzjonijiet minn x’imkien, u li għalhekk huwa protett minn interventi jew minn pressjonijiet esterni li jistgħu jfixklu l-indipendenza tad-deċiżjoni tal-membri tiegħu u jinfluwenzaw id-deċiżjonijiet tagħhom. Il-garanziji tal-indipendenza u tal-imparzjalità jeżiġu regoli, b’mod partikolari fir-rigward tal-kompożizzjoni tal-korp u tal-ħatra, tat-tul ta’ servizz u tar-raġunijiet għar-rifjut u t-tkeċċija ta’ membri tiegħu, sabiex jitneħħa kull dubju raġonevoli li jista’ jkollhom xi wħud dwar l-impermeabbiltà ta’ dak il-korp għal fatturi esterni u dwar in-newtralità tiegħu fir-rigward tal-interessi ppreżentati quddiemu.
(8)Ir-rispett għall-istat tad-dritt huwiex importanti biss għaċ-ċittadini tal-Unjoni, iżda wkoll għall-inizjattivi imprenditorjali, għall-innovazzjoni, għall-investiment u għall-funzjonament tajjeb tas-suq intern, li jiffjorixxu l-aktar meta jkun hemm fis-seħħ qafas ġuridiku u istituzzjonali sod.
(9)L-Artikolu 19 TUE, li jagħti espressjoni konkreta għall-valur tal-istat tad-dritt stabbilit fl-Artikolu 2 TUE, jimponi fuq l-Istati Membri li jagħtu protezzjoni ġudizzjarja effettiva fl-oqsma koperti mid-dritt tal-Unjoni, inklużi dawk relatati mal-implimentazzjoni tal-baġit tal-Unjoni. L-eżistenza stess ta’ stħarriġ ġudizzjarju effettiv maħsub sabiex tiġi żgurata l-konformità mad-dritt tal-Unjoni hija essenzjali għall-eżistenza tal-istat tad-dritt u tirrikjedi qrati indipendenti 13 . Huwa essenzjali li tinżamm l-indipendenza tal-qrati, kif ikkonfermat mit-tieni subparagrafu tal-Artikolu 47 tal-Karta tad-Drittijiet Fundamentali tal-Unjoni Ewropea 14 . Dan huwa minnu, b’mod partikolari, għall-istħarriġ ġudizzjarju tal-validità ta’ miżuri, kuntratti jew strumenti oħra li jagħtu lok għal nefqa jew dejn pubbliku, fost l-oħrajn fil-kuntest tal-proċeduri tal-akkwist pubbliku li jistgħu jinġiebu quddiem il-qrati.
(10)B’hekk hemm relazzjoni ċara bejn ir-rispett tal-istat tad-dritt u l-implimentazzjoni effiċjenti tal-baġit tal-Unjoni f’konformità mal-prinċipji ta’ ġestjoni finanzjarja soda.
(11)Nuqqasijiet ġeneralizzati fl-Istati Membri fir-rigward tal-istat tad-dritt li jaffettwaw b’mod partikolari l-funzjonament tajjeb tal-awtoritajiet pubbliċi u tal-istħarriġ ġudizzjarju effettiv, jistgħu jagħmlu ħsara serja lill-interessi finanzjarji tal-Unjoni.
(12)L-identifikazzjoni ta’ nuqqas ġeneralizzat teħtieġ valutazzjoni kwalitattiva mill-Kummissjoni. Din il-valutazzjoni tista’ tkun ibbażata fuq informazzjoni minn sorsi disponibbli u istituzzjonijiet rikonoxxuti, inklużi deċiżjonijiet tal-Qorti tal-Ġustizzja tal-Unjoni Ewropea, rapporti tal-Qorti tal-Awdituri, u konklużjonijiet u rakkomandazzjonijiet ta’ organizzazzjonijiet u netwerks internazzjonali rilevanti, bħalma huma l-korpi tal-Kunsill tal-Ewropa u n-netwerks Ewropej tal-qrati supremi u l-kunsilli tal-ġudikatura.
(13)Jenħtieġ li jiġu determinati l-miżuri li se jkun possibbli li jiġu adottati f’każ ta’ nuqqasijiet ġeneralizzati u l-proċedura biex jiġu adottati. Dawn il-miżuri jenħtieġ jinkludu s-sospensjoni ta’ pagamenti u ta’ impenji, tnaqqis tal-finanzjament taħt l-impenji eżistenti, u projbizzjoni li jiġu konklużi impenji ġodda mar-riċevituri.
(14)Jenħtieġ li japplika l-prinċipju tal-proporzjonalità meta jiġu determinati l-miżuri li se jkunu adottati, b’mod partikolari billi jitqiesu s-serjetà tas-sitwazzjoni, iż-żmien li għadda mindu seħħ l-aġir rilevanti, id-duratura u r-rikorrenza tiegħu, l-intenzjoni u l-livell ta’ kollaborazzjoni tal-Istat Membru biex itemm in-nuqqas ġeneralizzat fir-rigward tal-istat tad-dritt u l-effetti ta’ dak in-nuqqas fuq il-fondi rispettivi tal-Unjoni.
(15)Sabiex tiġi żgurata l-implimentazzjoni uniformi ta’ dan ir-Regolament, u minħabba l-importanza tal-effetti finanzjarji tal-miżuri li jkunu qed jiġu imposti skont dan ir-Regolament, jenħtieġ li jiġu kkonferiti setgħat ta’ implimentazzjoni fuq il-Kunsill, li jenħtieġ jaġixxi fuq il-bażi ta’ proposta mill-Kummissjoni. Sabiex tiffaċilita l-adozzjoni tad-deċiżjonijiet li jkunu meħtieġa biex jiġu protetti l-interessi finanzjarji tal-Unjoni, jenħtieġ tintuża votazzjoni b'maġġoranza kwalifikata inversa.
(16)Qabel ma tipproponi l-adozzjoni ta’ kwalunkwe miżura skont dan ir-Regolament, il-Kummissjoni jenħtieġ tinforma lill-Istat Membru konċernat dwar għaliex hija qed tqis li f’dak l-Istat Membru jista’ hemm nuqqas ġeneralizzat rigward tal-istat tad-dritt L-Istati Membri jenħtieġ jitħallew jippreżentaw il-kummenti tagħhom. Il-Kummissjoni u l-Kunsill jenħtieġ jikkunsidraw dawn il-kummenti.
(17)Il-Kunsill jenħtieġ ineħħi l-miżuri b’effett sospensiv fuq proposta mill-Kummissjoni, jekk is-sitwazzjoni li tkun wasslet għall-impożizzjoni ta’ dawn il-miżuri tkun ġiet rimedjata biżżejjed.
(18)Il-Kummissjoni jenħtieġ iżżomm lill-Parlament Ewropew infurmat dwar kull miżura proposta u adottata skont dan ir-Regolament,
ADOTTAW DAN IR-REGOLAMENT:
Artikolu 1
Suġġett
Din ir-Regolament jistabbilixxi r-regoli meħtieġa għall-protezzjoni tal-baġit tal-Unjoni f’każ ta’ nuqqasijiet ġeneralizzati fir-rigward tal-istat tad-dritt fl-Istati Membri
Artikolu 2
Definizzjonijiet
Għall-finijiet ta' dan ir-Regolament, għandhom japplikaw id-definizzjonijiet li ġejjin:
(a)“l-istat tad-dritt” jirreferi għall-valur tal-Unjoni minquxa fl-Artikolu 2 tat-Trattat dwar l-Unjoni Ewropea, li jinkludi l-prinċipji tal-legalità, li timplika proċess trasparenti, akkontabbli, demokratiku u pluralista għall-promulgazzjoni tal-liġijiet; iċ-ċertezza tad-dritt; il-projbizzjoni tal-arbitrarjetà tas-setgħat eżekuttivi; protezzjoni ġudizzjarja effettiva minn qrati indipendenti, inkluż tad-drittijiet fundamentali; is-separazzjoni tas-setgħat u l-ugwaljanza quddiem il-liġi;
(b)“nuqqasijiet ġeneralizzati fir-rigward tal-istat tad-dritt” tfisser prassi mifruxa jew rikorrenti jew ommissjoni, jew miżura minn awtoritajiet pubbliċi li jkollha effett fuq l-istat tad-dritt;
(c)“entità tal-gvern” tfisser l-awtoritajiet pubbliċi kollha fil-livelli kollha tal-gvern, inklużi l-awtoritajiet nazzjonali, reġjonali u lokali, kif ukoll organizzazzjonijiet tal-Istati Membri, fis-sens tal-[punt 42 tal-Artikolu 2] tar-Regolament (UE, Euratom) Nru [...] (ir-“Regolament Finanzjarju”).
Artikolu 3
Miżuri
1.Miżuri xierqa għandhom jittieħdu meta nuqqas ġeneralizzat fir-rigward tal-istat tad-dritt fi Stat Membru jaffettwa jew jirriskja li jaffettwa l-prinċipji tal-ġestjoni finanzjarja soda jew il-protezzjoni tal-interessi finanzjarji tal-Unjoni, b’mod partikolari:
(a)il-funzjonament xieraq tal-awtoritajiet ta’ dak l-Istat Membru li qed jimplimentaw il-baġit tal-Unjoni, b’mod partikolari fil-kuntest tal-akkwist pubbliku jew tal-proċeduri tal-għotjiet, u meta jwettqu monitoraġġ u kontrolli;
(b)il-funzjonament xieraq tas-servizzi ta’ investigazzjoni u prosekuzzjoni pubblika fir-rigward tal-prosekuzzjoni ta’ frodi, korruzzjoni jew ksur ieħor tad-dritt tal-Unjoni b’rabta mal-implimentazzjoni tal-baġit tal-Unjoni;
(c)rieżami ġudizzjarju effettiv minn qrati indipendenti ta’ azzjonijiet jew ommissjonijiet mill-awtoritajiet imsemmija fil-punti (a) u (b);
(d)il-prevenzjoni u s-sanzjonar tal-frodi, tal-korruzzjoni jew ksur ieħor tad-dritt tal-Unjoni b’rabta mal-implimentazzjoni tal-baġit tal-Unjoni, u l-impożizzjoni ta’ pieni effettivi u dissważivi fuq dawk ir-riċevituri minn qrati nazzjonali jew minn awtoritajiet amministrattivi;
(e)l-irkupru tal-fondi mħallsa indebitament;
(f)il-kooperazzjoni effettiva u f’waqtha mal-Uffiċċju Ewropew ta’ Kontra l-Frodi u mal-Uffiċċju tal-Prosekutur Pubbliku Ewropew fl-investigazzjonijiet jew il-prosekuzzjonijiet skont l-atti legali rispettivi tagħhom u l-prinċipju tal-kooperazzjoni leali.
2.Dawn li ġejjin jistgħu, b’mod partikolari, jitqiesu bħala nuqqasijiet ġeneralizzati fir-rigward l-istat tad-dritt,
(a)it-tqiegħed f’riskju tal-indipendenza tal-ġudikatura;
(b)in-nuqqas li jiġu impediti, ikkoreġuti u ssanzjonati deċiżjonijiet arbitrarji jew illegali mill-awtoritajiet pubbliċi, inklużi mill-awtoritajiet tal-infurzar tal-liġi, iż-żamma ta’ riżorsi finanzjarji u umani li jaffettwaw il-funzjonament tajjeb tagħhom jew in-nuqqas milli jiġi żgurat li ma jeżistux kunflitti ta’ interessi;
(c)il-limitazzjoni tad-disponibbiltà u tal-effikaċja tar-rimedji legali, inkluż permezz ta’ regoli proċedurali restrittivi, nuqqas ta’ implimentazzjoni ta’ sentenzi jew il-limitazzjoni ta’ investigazzjonijiet, ta’ prosekuzzjoni u ta’ sanzjonar effettivi ta’ ksur tal-liġi.
Artikolu 4
Kontenut tal-miżuri
1.Jistgħu jiġu adottati waħda jew aktar minn dawn il-miżuri xierqa
(a)meta l-Kummissjoni timplimenta l-baġit tal-Unjoni b’ġestjoni diretta jew indiretta skont il-punti (a) u (c) tal-Artikolu 62 tar-Regolament Finanzjarju, u meta entità tal-gvern tkun ir-riċevitur:
(1)sospensjoni tal-pagamenti jew tal-implimentazzjoni tal-impenn legali jew it-terminazzjoni tal-impenn legali skont l-Artikolu [131(3)] tar-Regolament Finanzjarju;
(2)projbizzjoni li tidħol f’impenji legali ġodda;
(b)meta l-Kummissjoni timplimenta l-baġit tal-Unjoni b’ġestjoni kondiviża skont [il-punt (b) tal-Artikolu 62] tar-Regolament Finanzjarju:
(1)sospensjoni tal-approvazzjoni ta’ programm wieħed jew aktar jew tal-emendar tiegħu;
(2)sospensjoni tal-impenji;
(3)tnaqqis tal-impenji, inkluż permezz ta’ korrezzjonijiet finanzjarji jew trasferimenti għal programmi ta’ nfiq oħra;
(4)tnaqqis fil-prefinanzjament;
(5)interruzzjoni tal-iskadenzi tal-pagamenti;
(6)sospensjoni tal-pagamenti.
2.Sakemm id-deċiżjoni li tadotta l-miżuri ma tipprevedix mod ieħor, l-impożizzjoni ta’ miżuri xierqa ma għandhiex taffettwa l-obbligu tal-entitajiet governattivi msemmija fil-punt (a) tal-paragrafu 1 jew tal-Istati Membri msemmija f’punt (b) tal-paragrafu 1, li jimplimentaw il-programm jew il-fond affettwat mill-miżura, u b’mod partikolari l-obbligu li jagħmlu l-pagamenti lir-riċevituri jew lill-benefiċjarji finali.
3.Il-miżuri meħuda għandhom ikunu proporzjonati man-natura, mal-gravità u mal-ambitu tan-nuqqas ġeneralizzat fir-rigward tal-istat tad-dritt. Dawn il-miżuri għandhom, sa fejn huwa possibbli, jimmiraw lejn l-azzjonijiet tal-Unjoni affettwati jew potenzjalment affettwati minn dak in-nuqqas.
Artikolu 5
Proċedura
1.Meta l-Kummissjoni tqis li għandha raġunijiet raġonevoli biex temmen li l-kundizzjonijiet tal-Artikolu 3 huma ssodisfati, hija għandha tibgħat notifika bil-miktub lil dak l-Istat Membru, fejn tistabbilixxi r-raġunijiet li fuqhom hija bbażat il-konstatazzjonijiet tagħha
2.Il-Kummissjoni tista’ tqis l-informazzjoni kollha rilevanti, inklużi deċiżjonijiet tal-Qorti tal-Ġustizzja tal-Unjoni Ewropea, rapporti tal-Qorti tal-Awdituri, u konklużjonijiet u rakkomandazzjonijiet ta’ organizzazzjonijiet internazzjonali rilevanti.
3.Il-Kummissjoni tista’ titlob kwalunkwe informazzjoni addizzjonali meħtieġa għall-valutazzjoni tagħha, kemm qabel kif ukoll wara li tkun għamlet konstatazzjoni skont paragrafu 1.
4.L-Istat Membru konċernat għandu jipprovdi l-informazzjoni kollha meħtieġa u jista’ jagħmel osservazzjonijiet f’limitu ta’ żmien speċifikat mill-Kummissjoni, li ma għandux ikun inqas minn xahar mid-data tan-notifika tal-konstatazzjoni. Fl-osservazzjonijiet tiegħu, l-Istat Membru jista’ jipproponi l-adozzjoni ta’ miżuri ta’ rimedju.
5.Il-Kummissjoni għandha tqis l-informazzjoni li tasal u kwalunkwe osservazzjoni magħmula mill-Istat Membru konċernat, kif ukoll l-adegwatezza ta’ kwalunkwe miżura ta’ rimedju, meta tkun qed tiddeċiedi jekk tippreżentax jew le proposta għal deċiżjoni dwar miżuri xierqa.
6.Meta l-Kummissjoni tqis li nuqqas ġeneralizzat fir-rigward tal-istat tad-dritt huwa stabbilit, hija għandha tippreżenta proposta għal att ta’ implimentazzjoni dwar miżuri xierqa lill-Kunsill.
7.Id-Deċiżjoni għandha titqies li ġiet adottata mill-Kunsill, sakemm dan ma jiddeċidix, b’maġġoranza kwalifikata, li jiċħad il-proposta tal-Kummissjoni fi żmien xahar mill-adozzjoni tagħha mill-Kummissjoni.
8.Il-Kunsill, li jaġixxi b’maġġoranza kwalifikata, jista’ jemenda l-proposta tal-Kummissjoni u jadotta t-test kif emendat bħala deċiżjoni tal-Kunsill.
Artikolu 6
Tneħħija tal-miżuri
1.L-Istat Membru konċernat jista’, fi kwalunkwe ħin, jippreżenta quddiem il-Kummissjoni evidenza biex juri li nuqqas ġeneralizzat fir-rigward tal-istat tad-dritt ġie rimedjat jew ma għadux jeżisti.
2.Il-Kummissjoni għandha tivvaluta s-sitwazzjoni fl-Istat Membru konċernat. Ladarba nuqqasijiet ġeneralizzati fir-rigward tal-istat tad-dritt li fuq il-bażi tagħhom ġew adottati l-miżuri xierqa ma jibqgħux jeżistu b’mod sħiħ jew parzjalment, il-Kummissjoni għandha tippreżenta lill-Kunsill proposta għal deċiżjoni li tneħħi dawk il-miżuri b’mod sħiħ jew parzjalment. Il-proċedura stabbilita fil-paragrafi 2, 4, 5, 6 u 7 tal-Artikolu 5 għandha tapplika.
3.Meta l-miżuri li jikkonċernaw is-sospensjoni tal-approvazzjoni ta’ programm wieħed jew aktar jew tal-emendi tiegħu msemmija fil-punt (i) tal-Artikolu 4(2)(b) jew is-sospensjoni tal-impenji msemmija fil-punt (ii) tal-Artikolu 4(2)(b) jitneħħew, l-ammonti li jikkorrispondu mal-impenji sospiżi għandhom jiddaħħlu fil-baġit skont l-Artikolu 7 tar-Regolament tal-Kunsill (UE, Euratom) Nru XXXX (ir-Regolament QFP). L-impenji sospiżi tas-sena n ma jistgħux jiddaħħlu fil-baġit wara s-sena n + 2.
Artikolu 7
Informazzjoni tal-Parlament Ewropew
Il-Kummissjoni għandha tinforma minnufih lill-Parlament Ewropew dwar kwalunkwe miżura proposta jew adottata skont l-Artikoli 4 u 5
Artikolu 8
Id-dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea. Għandu japplika mill-1 ta’ Jannar 2021.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell,
Għall-Parlament Ewropew Għall-Kunsill
Il-President Il-President
