IL-KUMMISSJONI EWROPEA

Brussell, 14.9.2015

COM(2015) 444 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

IT-TMIEN RAPPORT FINANZJARJU TAL-KUMMISSJONI LILL-PARLAMENT EWROPEW U LILL-KUNSILL dwar il-FOND AGRIKOLU EWROPEW TA' GARANZIJA

IS-SENA FINANZJARJA TAL-2014

{SWD(2015) 172 final}

WERREJ

1.PROĊEDURA TAL-BAĠIT

2.POŻIZZJONI TAL-LIKWIDITÀ U ĠESTJONI TAL-APPROPRJAZZJONIJIET

3.L-IMPLIMENTAZZJONI TAL-BAĠIT TAL-FAEG GĦALL-2014

4.KUMMENTI DWAR L-IMPLIMENTAZZJONI TAL-BAĠIT TAL-FAEG GĦALL-2014

5.IMPLIMENTAZZJONI TAD-DĦUL ALLOKAT

6.TQASSIM SKONT IT-TIP TA’ NEFQA

1.PROĊEDURA TAL-BAĠIT 1

1.1.Il-proċedura tal-baġit tal-2014 - L-Abbozz tal-Baġit tal-2014 u l-Ittra ta’ Emenda 2/2014

Il-Kummissjoni adottat l-Abbozz tal-Baġit tal-2014 u pproponietu lill-Awtorità Baġitarja fit-28 ta’ Ġunju 2013. L-abbozz tal-baġit tal-2014 ġie adottat aktar tard milli fis-snin ta’ qabel minħabba n-negozjati li għaddejjin bħalissa dwar il-qafas finanzjarju pluriennali (QFP) għall-2014 sal-2020. L-approprjazzjonijiet ta’ impenn proposti għall-FAEG kienu jammontaw għal EUR 43 778.1 miljun.

Il-Kunsill u l-Parlament Ewropew adottaw il-pożizzjoni tagħhom dwar l-abbozz tal-baġit tal-2014 fit-2 ta’ Settembru 2013 u fit-23 ta’ Ottubru 2013 rispettivament. Il-Kunsill żamm il-livell tal-approprjazzjonijiet ta’ impenn u ta’ pagament għall-FAEG filwaqt li l-Parlament Ewropew żied dan il-livell bi 28 miljun Euro kemm għall-approprjazzjonijiet ta’ impenn kif ukoll għall-approprjazzjonijiet ta’ pagament.

Fil-15 ta’ Ottubru 2013, il-Kummissjoni adottat l-Ittra ta’ Emenda Nru 2 għall-abbozz tal-baġit tal-2014, u fiha żammet ir-rekwiżiti tal-approprjazzjonijiet ta’ impenn għall-FAEG f’livell ta’ EUR 43 778.1 miljun bħalma kienu fl-abbozz tal-baġit tal-2014.

F’konformità mal-Artikolu 25 tar-Regolament (UE) Nru 1306/2013, fis-snin finanzjarji mill-2014 sal-2020, il-baġit tal-FAEG għandu jinkludi riżerva għall-kriżijiet fis-settur agrikolu. Barra minn hekk, fl-abbozz tal-baġit tal-Kummissjoni u fl-ittra ta’ emenda għall-2014, il-livell ta’ approprjazzjonijiet ta’ impenn meħtieġa biex ikopru l-ħtiġijiet tal-FAEG qabeż il-limitu massimu nett tal-QFP għan-nefqa marbuta mas-suq u għall-pagamenti diretti. B’hekk, biex tiġi stabbilita r-riżerva għall-kriżijiet għas-sena baġitarja tal-2014 u biex jitħares il-livell massimu nett tal-FAEG, il-Kummissjoni stabbiliet, skont l-Artikolu 26 tal-istess Regolament, rata ta’ aġġustament għall-pagamenti diretti permezz tal-mekkaniżmu ta’ dixxiplina finanzjarja 2 . Abbażi tal-informazzjoni l-ġdida mogħtija fl-ittra ta’ emenda, il-Kunsill wara adatta din ir-rata ta’ aġġustament 3 .

1.2.L-adozzjoni tal-baġit għall-2014

Intlaħaq qbil dwar il-baġit għall-2014 fil-proċedura ta’ konċiljazzjoni f’Novembru tal-2013. Fit-12 ta’ Novembru 2013, il-Kunsill u l-Parlament Ewropew qablu dwar pakkett ta’ kompromess. Fl-aħħar, il-Parlament Ewropew adotta l-baġit għall-2014 fit-13 ta’ Novembru 2013. Il-baġit għall-2014 kien jinkludi approprjazzjonijiet ta’ impenn ta’ EUR 43 778.1 miljun u approprjazzjonijiet ta’ pagament ta’ EUR 43 776.96 miljun għall-miżuri tas-suq u għall-għajnuniet diretti fil-qasam tal-agrikoltura (il-qasam tal-politika numru 05 - L-agrikoltura u l-iżvilupp rurali). Id-differenza bejn l-approprjazzjonijiet ta’ impenn u l-approprjazzjonijiet ta’ pagament ġejja minħabba l-fatt li, għal ċerti miżuri li huma implimentati direttament mill-Kummissjoni, jintużaw approprjazzjonijiet differenzjati. Dawn il-miżuri għandhom x’jaqsmu l-aktar mal-promozzjoni tal-prodotti agrikoli u mal-istrateġija tal-politika u l-miżuri ta’ koordinazzjoni għall-agrikoltura.

B’mod speċifiku, mill-approprjazzjonijiet ta’ impenn ivvutati għall-FAEG għall-qasam tal-politika numru 05, EUR 2 233.4 miljun kienu previsti għall-miżuri tas-suq fil-kuntest tal-Kapitolu 05 02 u EUR 41 447.3 miljun kienu previsti għall-għajnuniet diretti fil-kuntest tal-Kapitolu 05 03. Barra minn hekk, EUR 60.2 miljun kienu previsti għall-awditjar tan-nefqa agrikola fil-kuntest tal-Kapitolu 05 07 u EUR 29.3 miljun kienu previsti għall-istrateġija tal-politika u għall-miżuri ta’ koordinazzjoni fil-kuntest tal-Kapitolu 05 08.

Ara l-Anness 1 għal aktar dettalji dwar dan.

1.3.Id-dħul allokat għall-FAEG 4

Skont l-Artikolu 43 tar-Regolament (UE) Nru 1306/2013 dwar il-finanzjament tal-Politika Agrikola Komuni, id-dħul li joriġina mill-korrezzjonijiet finanzjarji skont id-deċiżjonijiet tal-approvazzjoni tal-konformità, minn irregolaritajiet u mill-imposta fuq il-ħalib huwa indikat bħala dħul allokat għall-finanzjament tan-nefqa tal-FAEG. Skont dawn ir-regoli, id-dħul allokat jista’ jintuża biex ikopri l-finanzjament ta’ xi nefqa tal-FAEG. F’każ li xi parti minn dan id-dħul ma tintużax, din tingħadda awtomatikament għas-sena tal-baġit ta’ wara.

Fiż-żmien li ġie stabbilit il-baġit għall-2014, saret stima ta’ dan id-dħul kemm għall-ammont li kien mistenni jinġabar matul is-sena tal-baġit tal-2014, kif ukoll għall-ammont li kien mistenni jingħadda mis-sena tal-baġit tal-2013 għall-2014. Din l-istima kienet tammonta għal EUR 1 464 miljun, u tqieset meta l-Awtorità Baġitarja adottat il-baġit għall-2014. B’mod speċifiku:

–Id-dħul mill-korrezzjonijiet ta’ wara l-approvazzjoni tal-konformità u mill-irregolaritajiet ġie stmat li kien ta’ EUR 638 miljun u EUR 165 miljun rispettivament, filwaqt li d-dħul mill-imposta fuq il-ħalib ġie stmat li kien ta’ EUR 46 miljun. B’hekk, ġie stmat li l-ammont totali ta’ dħul allokat li kien mistenni jinġabar matul is-sena tal-baġit tal-2014 kien ta’ EUR 849 miljun.

–Ġie stmat li l-ammont ta’ dħul allokat li kien mistenni jingħadda mis-sena tal-baġit tal-2013 għall-2014 kien se jammonta għal EUR 615-il miljun.

Fil-baġit tal-2014, il-Kummissjoni allokat dan id-dħul allokat, li oriġinarjament kien ġie stmat li kien ta’ EUR 1 464 miljun, għal żewġ skemi b’dan il-mod:

–EUR 464 miljun għall-fondi operattivi għall-organizzazzjonijiet tal-produtturi fis-settur tal-frott u l-ħaxix, u

–EUR 1 000 miljun għall-iskema ta’ pagament uniku (l-għajnuniet diretti).

L-Awtorità Baġitarja eventwalment ivvutat favur approprjazzjonijiet li jammontaw għal EUR 285 miljun u EUR 30 083 miljun għal dawn iż-żewġ skemi rispettivament, skont il-proposti tal-Kummissjoni. L-ammont totali tal-approprjazzjonijiet ivvutati u tad-dħul allokat imsemmi hawn fuq jikkorrispondi għal stima totali tal-approprjazzjonijiet disponibbli ta’ EUR 749 miljun għall-fondi operattivi għall-organizzazzjonijiet tal-produtturi fis-settur tal-frott u l-ħaxix u ta’ EUR 31 083 miljun għall-iskema ta’ pagament uniku.

1.4.Is-sehem tal-baġit tal-FAEG mill-baġit totali tal-UE

L-Anness 2 jagħti s-sehem finali tal-baġit tal-FAEG (l-approprjazzjonijiet ta’ impenn) mill-baġit totali tal-UE għal kull sena tal-perjodu mill-2008 sal-2014.

2.POŻIZZJONI TAL-LIKWIDITÀ U ĠESTJONI TAL-APPROPRJAZZJONIJIET 

2.1.Il-ġestjoni tal-approprjazzjonijiet

2.1.1.Approprjazzjonijiet disponibbli għas-sena finanzjarja tal-2014

2.1.2.Eżekuzzjoni baġitarja tal-approprjazzjonijiet disponibbli għas-sena finanzjarja tal-2014

(1) Ammonti impenjati. L-impenji u l-pagamenti mingħajr id-dħul allokat li wasal għall-ġestjoni kondiviża: EUR 43 233 320 312.15.

Għas-sena finanzjarja tal-2014, l-ammont tal-approprjazzjonijiet ta’ impenn li ntużaw fir-realtà kien jammonta għal EUR 44 292 653 015.06, filwaqt li dak għall-approprjazzjonijiet ta’ pagament kien jammonta għal EUR 44 286 688 787.98.

2.1.3.Eżekuzzjoni baġitarja tal-approprjazzjonijiet ivvutati – In-nefqa b’ġestjoni diretta li għamlet il-Kummissjoni

Fil-baġit tal-2014 kienu previsti approprjazzjonijiet ta’ impenn ta’ EUR 45.4 miljun għan-nefqa b’ġestjoni diretta. Fl-2014 intrabat ammont ta’ EUR 45.2 miljun għal dan. Il-bilanċ ta’ dawn l-approprjazzjonijiet, jiġifieri EUR 0.2 miljun, ġie kkanċellat.

Il-biċċa l-kbira tal-approprjazzjonijiet ta’ impenn tal-FAEG għan-nefqa b’ġestjoni diretta tal-Kummissjoni huma approprjazzjonijiet differenzjati. It-trasferiment awtomatiku għall-2015, li għandu x’jaqsam biss mal-approprjazzjonijiet mhux differenzjati, jammonta għal EUR 16.1 miljun.

2.2.Il-pagamenti ta’ kull xahar

2.2.1.Pagamenti ta’ kull xahar lill-Istati Membri b’ġestjoni kondiviża

2.2.1.1.Pagamenti ta’ kull xahar għall-provvediment tan-nefqa

L-Artikolu 18(1) tar-Regolament (UE) Nru 1306/2013 6 jiddikjara li “il-pagamenti ta’ kull xahar għandhom isiru mill-Kummissjoni għal infiq magħmul mill-aġenziji tal-pagamenti akkreditati [tal-Istati Membri] matul ix-xahar ta’ referenza”. Il-pagamenti ta’ kull xahar għandhom isiru lil kull Stat Membru mhux aktar tard mit-tielet jum tax-xogħol tat-tieni xahar wara dak li fih tkun saret in-nefqa.

Il-pagamenti ta’ kull xahar huma rimborż tan-nefqa netta li tkun diġà saret (wara li jitnaqqas id-dħul), u jkunu disponibbli abbażi tad-dikjarazzjonijiet ta’ kull xahar mibgħuta mill-Istati Membri 7 . L-aġġornament tan-nefqa u tad-dħul li jsir kull xahar fil-kotba isirulu verifiki u korrezzjonijiet abbażi tad-dikjarazzjoni ddettaljata 8 . Barra minn hekk, dawn il-pagamenti jsiru finali wara l-verifiki tal-Kummissjoni skont il-proċedura tal-approvazzjoni tal-kontijiet tal-kontabilità.

Il-pagamenti magħmula mill-Istati Membri mis-16 ta’ Ottubru 2013 sal-15 ta’ Ottubru 2014 huma koperti mis-sistema ta’ pagamenti ta’ kull xahar. Il-pagamenti li jifdal isiru direttament mill-Kummissjoni għal għadd limitat ta’ miżuri.

Għas-sena finanzjarja tal-2014, l-ammont nett totali tal-pagamenti ta' kull xahar li saru, wara t-tnaqqis tal-approvazzjoni u korrezzjonijiet oħra, kien ta’ EUR 43 233 320 312.15.

2.2.1.2.Deċiżjonijiet dwar il-pagamenti ta’ kull xahar għall-2014

Għas-sena finanzjarja tal-2014, il-Kummissjoni adottat tnax-il deċiżjoni dwar il-pagamenti ta’ kull xahar. Barra minn hekk, f’Diċembru tal-2014 ġiet adottata deċiżjoni addizzjonali dwar il-pagamenti ta' kull xahar li taġġusta dawk il-pagamenti li kienu ngħataw diġà għan-nefqa totali li saret matul is-sena.

3.L-IMPLIMENTAZZJONI TAL-BAĠIT TAL-FAEG GĦALL-2014

3.1.L-użu tal-approprjazzjonijiet tal-baġit tal-FAEG

L-implimentazzjoni tal-baġit ammontat għal EUR 44 292.7 miljun. Din in-nefqa ġiet iffinanzjata mill-approprjazzjonijiet inizjali tal-baġit u billi ntuża d-dħul allokat għall-qasam tal-politika numru 05 - L-Agrikoltura u l-iżvilupp rurali, li kien magħmul mill-ammont kollu ta' EUR 710.2 miljun ttrasferiti mill-2013 u minn parti mid-dħul allokat miġbur fl-2014, li kien jammonta għal EUR 672.9 miljun minn għadd totali ta' EUR 1 014.2 miljun.

Fil-qasam tal-politika numru 05 - L-agrikoltura u l-iżvilupp rurali, in-nefqa għall-miżuri tas-suq kienet ta’ EUR 2 478.7 miljun, u dik għall-għajnuniet diretti kienet ta’
EUR 41 659.7 miljun. In-nefqa mġarrba għal ċerti miżuri tas-suq u għajnuniet diretti qabżet l-approprjazzjonijiet ivvutati tal-baġit, u kienet parzjalment koperta mit-trasferimenti ta’ approprjazzjonijiet minn partiti oħra tal-baġit u parzjalment mid-dħul li kien allokat għall-baġit tal-FAEG.

Għal dettalji dwar l-implimentazzjoni tal-baġit skont il-qasam tal-politika, jekk jogħġbok ara l-Anness 3.

L-Anness 5 jagħti rendikont tan-nefqa għall-miżuri tas-suq, il-pagamenti diretti u l-awditjar tan-nefqa agrikola skont il-partita u l-Istat Membru.

4.KUMMENTI DWAR L-IMPLIMENTAZZJONI TAL-BAĠIT TAL-FAEG GĦALL-2014

Hawn taħt qed jingħataw kummenti fil-qosor dwar l-implimentazzjoni tal-approprjazzjonijiet tal-baġit tal-FAEG għall-2014, kif ukoll dwar l-użu tad-dħul allokat disponibbli fl-2014 għall-iktar oqsma importanti, ibbażati fuq id-dettalji mogħtija fl-Anness 3.

4.1.Il-Kapitolu 05 02: Interventi fis-swieq agrikoli

4.1.1.Daħla

Il-pagamenti totali għal dan il-kapitolu tal-baġit tal-2014 kienu ta’ EUR 2 478.7 miljun u dawn ġew iffinanzjati mill-approprjazzjonijiet ivvutati u minn dħul allokat li kien ta’ EUR 302.7 miljun. Dan id-dħul allokat intuża biex ikopri n-nefqa mġarrba fis-settur tal-frott u l-ħaxix (NB: għad-dettalji dwar dan, ara l-punt 4.1.4). Approprjazzjonijiet ta’ EUR 57.4 miljun ġew ittrasferiti għal partijiet oħra tal-baġit tal-FAEG. Il-bilanċ li kien għad fadal mid-dħul allokat miġbur fl-2014 kien ta’ EUR 291.6 miljun, u dan ġie ttrasferit għall-2015. Fil-każ ta’ partiti li għalihom il-ħtiġijiet qabżu l-approprjazzjonijiet baġitarji, in-nefqa addizzjonali ġiet koperta billi saru trasferimenti minn partiti oħra tal-baġit. Bl-istess mod, għall-miżuri tas-suq u l-għajnuniet diretti, fejn intużaw inqas approprjazzjonijiet tal-baġit milli mistenni, l-approprjazzjonijiet disponibbli li rriżultaw minn dan ġew ittrasferiti għal partiti oħra tal-baġit sabiex ikopru n-nefqa addizzjonali skont kif kien meħtieġ.

4.1.2.Programmi tal-ikel

Ta’ min jinnota li l-2013 kienet l-aħħar sena ta’ implimentazzjoni tal-programmi tal-ikel fil-kuntest tal-FAEG. Abbażi tar-Regolament (UE) Nru 223/2014, mill-1 ta’ Jannar 2014, dawn il-programmi qed jiġu implimentati permezz tal-Fond għal Għajnuna Ewropea għall-Persuni l-Aktar fil-Bżonn li huwa ffinanzjat mill-intestatura 3 tal-QFP.

Minħabba f’hekk, ma kien hemm l-ebda approprjazzjoni tal-FAEG prevista għal dawn il-programmi fil-baġit tal-2014. Madankollu, il-kontijiet tal-FAEG juru li l-Istati Membri rkupraw u ddikjaraw lill-FAEG ammont ta’ EUR 7.2 miljun li kien tħallas qabel l-2014.

4.1.3.Żejt taż-żebbuġa

Il-fatt li ntefqu EUR 2.3 miljun inqas milli previst kellu x’jaqsam l-iktar mal-għajnuna għall-finanzjament ta’ programmi ta’ ħidma għal titjib fil-kwalità. L-organizzazzjonijiet tal-operaturi approvati ma implimentawx il-programmi ta’ ħidma tagħhom għall-2013 u l-2014 sal-punt previst fil-baġit tal-2014 għal dawn il-programmi. Barra minn hekk, intużaw kemm kemm inqas flus, jiġifieri EUR 0.2 miljun inqas, għall-pagament tal-fajls pendenti li għandhom x’jaqsmu mal-iskemi preċedenti tas-settur taż-żejt taż-żebbuġa, minħabba li l-Istati Membri ddikjaraw nefqa li kienet inqas mill-approprjazzjonijiet previsti fil-baġit tal-2014 għal dawn l-iskemi.

4.1.4.Frott u ħaxix

Il-baġit tal-2014 ippreveda approprjazzjonijiet totali disponibbli ta’ EUR 1 140.7 miljun sabiex jiġu koperti l-ħtiġijiet tal-miżuri kollha ta’ dan is-settur. L-Awtorità Baġitarja vvutat approprjazzjonijiet ta’ EUR 676.7 miljun għal dan minħabba li qieset id-dħul stmat allokat lil dan is-settur, li kien jammonta għal EUR 464 miljun. In-nefqa mġarrba mill-Istati Membri fl-2014 kienet ta’ EUR 1 010.5 miljun. L-iskemi kollha ffinanzjati minn dan l-Artikolu ġew implimentati f’livell li kien inqas milli mistenni meta mqabbel mal-ħtiġijiet totali stmati fil-baġit tal-2014. Il-bilanċ ta’ EUR 291.6 miljun tad-dħul allokat li ma ntużax ġie ttrasferit għas-sena tal-baġit tal-2015 biex ikopri l-ħtiġijiet ta’ dik is-sena.

Fejn jidħlu l-fondi operattivi għall-organizzazzjonijiet tal-produtturi, li għandhom l-għan li jiffinanzjaw il-programmi tagħhom ta’ titjib fil-kwalità tal-produzzjoni u ta’ promozzjoni u kummerċjalizzazzjoni, ġie stmat li l-ammont tal-ħtiġijiet għal dawn il-programmi għall-2014 kien ta’ EUR 749 miljun. Minn dan l-ammont totali, l-Awtorità Baġitarja vvutat approprjazzjonijiet li kienu jammontaw għal EUR 285 miljun, minħabba li qieset id-dħul stmat li kien ġie allokat għall-finanzjament ta’ din l-iskema, li kien jammonta għal EUR 464 miljun. Eventwalment, l-Istati Membri ġarrbu nefqa ta’ EUR 724.4 miljun, li kienet inqas mill-ammont totali ta’ approprjazzjonijiet disponibbli, l-iktar minħabba li l-pagamenti li saru għall-ewwel porzjon tal-pjanijiet tal-organizzazzjonijiet tal-produtturi approvati fl-2014 kienu inqas milli kien previst inizjalment.

Barra minn hekk, in-nefqa tal-Istati Membri għall-għajnuna għall-gruppi tal-produtturi għar-rikonoxximent preliminari kienet madwar EUR 56.7 miljun inqas mill-approprjazzjonijiet tal-baġit tal-2014 disponibbli. L-impatt tad-dispożizzjonijiet tranżitorji 9 , li llimitaw iż-żieda annwali tal-programmi approvati, kienu ferm iktar sinifikanti milli kienet ipprevediet fil-bidu l-Kummissjoni.

Fl-aħħar nett, intużaw madwar EUR 48.3 miljun inqas mill-baġit tal-2014 għall-Iskema tal-Frott għall-Iskejjel, l-iktar minħabba li ċerti Stati Membri ġarrbu nefqa li kienet inqas mill-allokazzjoni baġitarja. Fil-fatt, fil-baġit tal-2014 kien hemm is-suppożizzjoni li l-pakkett miżjud previst ta’ EUR 150 miljun għal din l-iskema kien se jibda jiġi applikat b’mod parzjali mis-sena skolastika tal-2013 sal-2014, iżda fl-aħħar mill-aħħar dan beda jseħħ biss mis-sena skolastika tal-2014 sal-2015.

4.1.5.Prodotti tas-settur tal-vitikultura

L-Istati Membri ġarrbu nefqa ta’ EUR 1 019.5 miljun għall-programmi nazzjonali ta’ appoġġ fl-2014, filwaqt li l-approprjazzjonijiet previsti għalihom fil-baġit tal-2014 kienu ta’ EUR 1 083 miljun. Dan in-nuqqas ta’ eżekuzzjoni tal-ammont kollu ġej min-nefqa iktar baxxa li ċerti Stati Membri kellhom fl-ewwel sena tal-programmi l-ġodda tal-2014 sal-2018, li bdew jiġu implimentati xi ftit tard, speċjalment fejn jidħlu l-miżuri tal-“promozzjoni” u tal-“investiment fl-intrapriżi”.

Fl-aħħar nett, l-Istati Membri ddikjaraw nefqa ta’ EUR 2.9 miljun għal skemi differenti ta’ għajnuna li jmorru lura għall-kampanja ta’ kummerċjalizzazzjoni tal-2007 sal-2008 u aktar.

4.1.6.Ħalib u prodotti tal-ħalib

F’dak li għandu x’jaqsam mal-għajnuna għall-ħżin privat tal-butir, ġew previsti approprjazzjonijiet ta’ EUR 6 miljun fil-baġit tal-2014, filwaqt li n-nefqa mġarrba kienet ta’ EUR 4.1 miljun minħabba ż-żmien medju iqsar tal-ħżin għall-kwantitajiet ta’ butir ikkonċernati.

F’dak li għandu x’jaqsam mal-iskema tal-ħalib għall-iskejjel, l-Istati Membri kkonċernati kważi kollha nefqu inqas mill-ammont tal-approprjazzjonijiet previsti fil-baġit tal-2014 għas-sena skolastika tal-2013 sal-2014, u b’hekk kien hemm nuqqas ta’ eżekuzzjoni ta’ madwar EUR 7.4 miljun.

4.1.7.Il-laħam tal-majjal, il-bajd u t-tjur, it-trobbija tan-naħal u prodotti oħrajn li ġejjin mill-annimali

Għall-bilanċi pendenti tar-rifużjonijiet fuq l-esportazzjoni għall-prodotti tal-laħam tal-majjal ipproċessat u għat-tjur u għall-bajd, l-Istati Membri nefqu madwar EUR 1.2 miljun, filwaqt li għall-għajnuna speċifika għat-trobbija tan-naħal nefqu kważi l-livell tal-approprjazzjonijiet miżmuma fil-baġit tal-2014. Fl-aħħar nett, ta’ min jinnota li l-kontribut tal-UE għall-miżuri eċċezzjonali ta’ sostenn għas-suq fil-Polonja u l-Litwanja, skont ir-Regolamenti ta’ Implimentazzjoni tal-Kummissjoni (UE) Nru 324/2014 u Nru 428/2014, kien ta’ EUR 0.8 miljun, kif indikat fil-partita 05 02 15 99.

4.2.Il-Kapitolu 05 03: Għajnuniet diretti

L-approprjazzjonijiet ivvutati għal dan il-kapitolu kienu ta’ EUR 41 447.3 miljun, filwaqt li n-nefqa mġarrba kienet ta’ madwar EUR 41 659.7 miljun. Din l-implimentazzjoni apparentement żejda kienet ġejja l-iktar mill-fatt li parti mill-iskema ta’ pagament uniku kienet prevista li tiġi ffinanzjata mid-dħul allokat.

4.2.1.L-Artikolu 05 03 01: Għajnuniet diretti diżakkoppjati

L-iskemi ewlenin iffinanzjati mill-approprjazzjonijiet ta’ dan l-Artikolu huma l-iskema ta’ pagament uniku (SPU), l-iskema ta’ pagament uniku skont l-erja (SPUE) u l-appoġġ speċifiku diżakkoppjat skont l-Artikolu 68 tar-Regolament tal-Kunsill (KE) Nru 73/2009. L-iskemi ta’ għajnuna kollha li jidħlu f’dan l-Artikolu jitħallsu b’mod indipendenti mill-produzzjoni iżda b’ċerti kundizzjonijiet, pereżempju l-fatt li titħares il-kundizzjonalità. In-nefqa mġarrba għall-iskemi kollha li jidħlu f’dan l-Artikolu kienet ta’ EUR 38 952.1 miljun u b’hekk qabżet l-approprjazzjonijiet ta’ EUR 38 252 miljun ivvutati għall-2014 b’EUR 700.1 miljun, minħabba li parti mill-ħtiġijiet għal dan is-settur ġiet iffinanzjata mid-dħul allokat (NB: id-Dokument ta’ Ħidma tal-Persunal tal-Kummissjoni jagħti iktar dettalji dwar dan il-punt).

4.2.2.L-Artikolu 05 03 02: Għajnuniet diretti oħrajn

L-approprjazzjonijiet ta’ dan l-Artikolu jkopru n-nefqa għal għajnuniet diretti oħrajn li għalihom l-Istati Membri għażlu li jżommu ċertu rabta bejn il-pagament tal-għajnuna u l-produzzjoni għal għadd ta’ setturi, b’kundizzjonijiet iddefiniti sewwa u b’limiti ċari, sabiex ma tiġix abbandunata din il-produzzjoni. Tlettax-il skema huma ffinanzjati permezz ta’ dan l-Artikolu.

Għal dawn l-iskemi, il-Kummissjoni kienet stmat li kien se jkun hemm bżonn ta’ approprjazzjonijiet li jammontaw għal EUR 2 770.2 miljun fl-2014. L-Istati Membri nefqu EUR 2 707.6 miljun għalihom (NB: id-Dokument ta’ Ħidma tal-Persunal tal-Kummissjoni jagħti iktar dettalji dwar dan il-punt).

4.2.3.L-Artikolu 05 03 09: Rimborż tal-għajnuniet diretti b’rabta mad-dixxiplina finanzjarja

L-Awtorità Baġitarja ma allokat l-ebda approprjazzjoni għal dan l-Artikolu. Dan l-Artikolu ġie stabbilit għall-ewwel darba fis-sena tal-baġit tal-2014 biex jiġi ffaċilitat il-ġbir tal-approprjazzjonijiet ivvutati mhux impenjati. It-trasferiment ta’ dawn l-approprjazzjonijiet, sa limitu ta’ 2 % tal-approprjazzjonijiet inizjali tal-FAEG b’ġestjoni kondiviża, saret sabiex fl-2015 jiġi ffinanzjat ir-rimborż tad-dixxiplina finanzjarja applikata għall-għajnuniet diretti għas-sena kalendarja tal-2013 10 .

L-ammont tad-dixxiplina finanzjarja li ġie applikat fir-realtà għas-sena tat-talbiet tal-2013 b’kollox kien ta’ EUR 868.2 miljun. Dan l-ammont ma jaqbiżx il-limitu ta’ 2 % tal-approprjazzjonijiet inizjali tal-FAEG b’ġestjoni kondiviża. Dan l-ammont kien kopert minn trasferiment ta’ EUR 424.5 miljun tal-approprjazzjonijiet mhux impenjati mill-Artikolu 05 03 10, li jinvolvi r-riżerva għall-kriżijiet fis-settur agrikolu (NB: jekk jogħġbok ara l-punt 4.2.4) u żdied bi trasferiment ta’ EUR 398.9 miljun u ta’ EUR 44.8 miljun ta’ approprjazzjonijiet mhux impenjati mill-partita 05 03 01 01 u mill-partita 05 03 01 02 rispettivament.

4.2.4.L-Artikolu 05 03 10: Riżerva għall-kriżijiet fis-settur agrikolu

L-approprjazzjonijiet ta’ dan l-Artikolu huma maħsuba biex ikopru n-nefqa għall-miżuri li jridu jittieħdu biex jiġu ffaċċjati l-kriżijiet il-kbar li jolqtu l-produzzjoni jew id-distribuzzjoni agrikola. Ir-riżerva għandha tiġi stabbilita billi, fil-bidu ta’ kull sena, jiġi applikat tnaqqis għall-għajnuniet diretti permezz tal-mekkaniżmu ta’ dixxiplina finanzjarja skont l-Artikoli 25 u 26 tar-Regolament (UE) Nru 1306/2013, kif ukoll skont l-Artikolu 8 tar-Regolament (UE) Nru 1307/2013. Din ir-riżerva ma tistax taqbeż ammont annwali massimu ta’ EUR 400 miljun (fi prezzijiet tal-2011). Għas-sena tal-baġit tal-2014, l-ammont ekwivalenti tar-riżerva għall-kriżijiet fi prezzijiet attwali kien ta’ EUR 424.5 miljun. Ir-riżerva ma ntużatx fis-sena finanzjarja tal-2014.

Għalhekk, sa tmiem is-sena finanzjarja, dan l-ammont mhux użat tar-riżerva ġie ttrasferit lejn il-partita tal-baġit 05 03 09 sabiex jiġi ttrasferit għas-sena finanzjarja ta’ wara u sabiex isir ir-rimborż aħħari kif deskritt fil-punt 4.2.3 hawn fuq.

4.3.Il-Kapitolu 05 07: Awditjar tan-nefqa agrikola

4.3.1.L-Artikolu 05 07 01: Kontroll tan-nefqa agrikola

Dan l-Artikolu jinvolvi l-miżuri li ttieħdu biex jissaħħu l-mezzi tal-kontrolli fuq il-post u biex jittejbu s-sistemi ta’ verifika sabiex jiġi limitat ir-riskju ta’ frodi u ta’ irregolaritajiet li jagħmlu dannu lill-baġit tal-Unjoni. Huwa jinkludi wkoll in-nefqa li tista’ tkun meħtieġa sabiex jiġu ffinanzjati ċerti korrezzjonijiet li jista’ jkun hemm bżonn favur l-Istati Membri, li jkunu marbutin mal-kontabbiltà u mal-konformità (NB: id-Dokument ta’ Ħidma tal-Persunal tal-Kummissjoni jagħti iktar dettalji dwar dan il-punt).

4.3.2.L-Artikolu 05 07 02: Soluzzjoni tat-tilwim

L-approprjazzjonijiet ta’ dan l-Artikolu huma maħsuba biex ikopru n-nefqa li għaliha l-Kummissjoni tista’ tinżamm responsabbli permezz ta’ deċiżjoni ta’ qorti tal-ġustizzja, fosthom l-ispejjeż tal-ħlas tat-talbiet għad-danni u l-imgħax. Fis-27 ta’ Settembru 2012, il-Qorti Ewropea tal-Ġustizzja qatgħet is-sentenza fil-Każijiet Magħquda C-113/10, C-147/10 u C-234/10 (is-sentenza fil-każ ta’ Jülich-II). Il-baġit tal-2014 ippreveda approprjazzjonijiet ta’ EUR 53.4 miljun għall-pagament tal-imgħax kumpensatorju lill-operaturi skont din is-sentenza. Madankollu, l-Istati Membri ġarrbu u ddikjaraw nefqa ta’ madwar EUR 92.3 miljun, li kienet ogħla mill-approprjazzjonijiet previsti fil-baġit tal-2014. Għaldaqstant, ġew ittrasferiti approprjazzjonijiet ta’ EUR 38.9 miljun minn partiti oħra tal-baġit tal-2014 sabiex jiġi ffinanzjat ir-rimborż tal-ammont kollu tal-imgħax kumpensatorju li ddikjaraw l-Istati Membri kkonċernati.

5.IMPLIMENTAZZJONI TAD-DĦUL ALLOKAT 

5.1.Id-dħul allokat għall-FAEG

Id-dħul allokat li ġie ttrasferit fir-realtà mill-2013 għall-2014 kien ta’ EUR 710.2 miljun, u dan intuża kompletament għall-finanzjament tan-nefqa tas-sena tal-baġit tal-2014, skont l-Artikolu 14 tar-Regolament Finanzjarju. Kif juri l-Anness 4-II, dan l-ammont ikopri n-nefqa ta’ EUR 270.3 miljun għall-fondi operattivi għall-organizzazzjonijiet tal-produtturi fis-settur tal-frott u l-ħaxix, u n-nefqa ta’ EUR 439.9 miljun għall-iskema ta’ pagament uniku.

F’dak li għandu x’jaqsam mad-dħul allokat miġbur fl-2014, l-Anness 4-I juri li dan id-dħul kien jammonta għal EUR 1 014.2-il miljun, u li dan kien ġej mill-affarijiet li ġejjin:

–il-korrezzjonijiet tal-proċedura tal-approvazzjoni tal-konformità, li kienu jammontaw għal EUR 815.6-il miljun;

–id-dħul mill-irregolaritajiet, li kien jammonta għal EUR 150.3 miljun; u

–il-ġbir tal-imposta fuq il-ħalib, li kien jammonta għal EUR 48.3 miljun.

Parti mid-dħul allokat miġbur fl-2014, li kienet tammonta għal EUR 672.9 miljun, intużat biex tiġi koperta n-nefqa mġarrba għall-fondi operattivi għall-organizzazzjonijiet tal-produtturi fis-settur tal-frott u l-ħaxix (jiġifieri EUR 32.4 miljun) u għall-iskema ta’ pagament uniku (jiġifieri EUR 640.5 miljun).

Il-bilanċ tad-dħul allokat miġbur fl-2014, li kien jammonta għal EUR 341.3 miljun, ġie ttrasferit awtomatikament għall-baġit tal-2015 biex jiffinanzja l-ħtiġijiet baġitarji ta’ dik is-sena.

Għal aktar dettalji dwar dan, ara l-Annessi 4-I u 4-II.

6.TQASSIM SKONT IT-TIP TA’ NEFQA 

In-nefqa totali tal-FAEG tammonta għal EUR 44 292.7 miljun. Minn hawn ’il quddiem, din in-nefqa hija mqassma skont il-kategoriji ewlenin tar-rappurtar, flimkien mal-perċentwali li dawn jirrappreżentaw fin-nefqa totali tal-FAEG għall-2014.

Ħżin

In-nefqa għall-ħżin kienet tammonta għal EUR 5.1 miljun, jiġifieri għal 0.01 % tan-nefqa totali. Dan l-ammont jirrappreżenta l-aktar in-nefqa mġarrba għall-ħżin privat tal-butir.

Rifużjonijiet fuq l-esportazzjoni

In-nefqa għar-rifużjonijiet fuq l-esportazzjoni kienet tammonta għal EUR 4.5 miljun, jiġifieri għal 0.01 % tan-nefqa totali, u kellha x’taqsam l-iktar mal-ħlas tal-bilanċi pendenti għall-esportazzjonijiet taċ-ċereali u tat-tjur li saru fl-imgħoddi.

Miżuri oħra tas-suq

Minbarra l-ħżin u r-rifużjonijiet fuq l-esportazzjoni, in-nefqa għall-miżuri l-oħra tas-suq kienet tammonta għal EUR 2 579.6 miljun, jiġifieri għal 5.8 % tal-ammont totali għas-sena. Din il-kategorija tkopri n-nefqa li hija marbuta b’mod ewlieni maż-żejt taż-żebbuġa, mal-frott u l-ħaxix, mal-inbid, mal-pjanti tessili, mal-POSEI, mal-miżuri ta’ promozzjoni, mal-ħalib u l-prodotti tal-ħalib u mat-trobbija tan-naħal. Din in-nefqa tinkorpora ammonti żgħar oħra u tinkludi l-korrezzjonijiet li ġejjin mill-approvazzjoni tal-kontijiet u mis-soluzzjoni tat-tilwim.

Għajnuniet diretti

In-nefqa għall-għajnuniet diretti kienet ta’ EUR 41 659.7 miljun, jiġifieri ta’ 94 % mill-ammont totali.

Nefqa b’ġestjoni diretta

Din in-nefqa kienet ta’ EUR 45.2 miljun (f’approprjazzjonijiet ta’ impenn), jiġifieri ta’ 0.1 % mill-ammont totali, u tħallset direttament mill-Kummissjoni. Din kienet tkopri b’mod ewlieni n-nefqa marbuta mal-kontabilità tal-azjendi agrikoli, l-istħarriġ dwar l-istrutturi tal-azjendi agrikoli, l-informazzjoni dwar il-PAK, l-għajnuna teknika, eċċ.

Żvilupp rurali b'dik li kienet il-Garanzija tal-FAEGG

Ma tista’ ssir l-ebda approprjazzjoni ta’ impenn iktar għal dawn il-programmi. L-Istati Membri issa qed jagħlqu dawn il-programmi u qed jirkupraw l-ammonti li tħallsu bi żball. L-ammont finali nett irkuprat permezz ta’ dan l-Artikolu kien ta’ madwar EUR 1.4 miljun.

L-evoluzzjoni tat-tqassim tan-nefqa tal-FAEG skont it-tip għall-perjodu mill-2008 sal-2014 hija mogħtija fl-Anness 6.

(1)  Din il-proċedura hija spjegata fl-Anness 1.

(2)  Ir-Regolament ta’ Implimentazzjoni tal-Kummissjoni (UE) Nru 964/2013 (ĠU L 268, 10.10.2013, p. 5).

(3)  Ir-Regolament tal-Kunsill (UE) Nru 1181/2013 (ĠU L 313, 22.11.2013, p. 13).

(4) Dawn l-ammonti mhumiex imdaħħlin fil-linji tad-dħul tal-baġit (l-oġġett 670 għad-dħul allokat għall-FAEG), iżda huma msemmija fil-kummenti baġitarji dwar dan l-oġġett.

(5) p.m.: “pour mémoire”.

(6) ĠU L 347, 20.12.2013, p. 549.

(7) L-Istati Membri jibagħtu dawn id-dikjarazzjonijiet tan-nefqa ta' kull xahar permezz tad-dikjarazzjoni tal-għaxar jum tax-xahar N+1.

(8) L-Istati Membri jibagħtu d-dikjarazzjonijiet iddettaljati kull xahar (permezz tat-tabella 104) fl-għoxrin jum tax-xahar N+1.

(9)  Ir-Regolament ta’ Implimentazzjoni tal-Kummissjoni (UE) Nru 302/2012 tal-4 ta’ April 2012.

(10)  Dawn l-approprjazzjonijiet jistgħu jiġu ttrasferiti skont l-Artikolu 169(3) tar-Regolament Finanzjarju, jiġifieri r-Regolament (UE, Euratom) Nru 966/2012 u, skont l-Artikolu 26(5) tar-Regolament (UE) Nru 1306/2013, l-Istati Membri għandhom jirrimborżaw lir-riċevituri finali li huma suġġetti, fis-sena finanzjarja li lejha jkunu ġew ittrasferiti l-approprjazzjonijiet, għall-applikazzjoni tad-dixxiplina finanzjarja skont l-Artikolu 26(1) sa (4) tiegħu.

IL-KUMMISSJONI EWROPEA

Brussell, 14.9.2015

COM(2015) 444 final

ANNESSI

tar-

RAPPORT TAL-KUMMISSJONI LILL-PARLAMENT EWROPEW U LILL-KUNSILL

IT-TMIEN RAPPORT FINANZJARJU TAL-KUMMISSJONI LILL-PARLAMENT EWROPEW U LILL-KUNSILL dwar il-FOND AGRIKOLU EWROPEW TA' GARANZIJA

IS-SENA FINANZJARJA TAL-2014

{SWD(2015) 172 final}