EUR-Lex Access to European Union law
This document is an excerpt from the EUR-Lex website
Document 52013SC0316
COMMISSION STAFF WORKING DOCUMENT EXECUTIVE SUMMARY OF THE IMPACT ASSESSMENT Accompanying the document Proposal for a Regulation of the European Parliament and of the Council on Money Market Funds
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT Li jakkumpanja d-dokument Proposta għal Regolament tal-Parlament Ewropew u tal-Kunsill dwar il-Fondi tas-Suq Monetarju
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT Li jakkumpanja d-dokument Proposta għal Regolament tal-Parlament Ewropew u tal-Kunsill dwar il-Fondi tas-Suq Monetarju
/* SWD/2013/0316 final */
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT Li jakkumpanja d-dokument Proposta għal Regolament tal-Parlament Ewropew u tal-Kunsill dwar il-Fondi tas-Suq Monetarju /* SWD/2013/0316 final */
1. introduzzjoni
Fl-Ewropa, il-Fondi tas-Suq Monetarju (MMFs) huma
sors importanti ta’ finanzjament għal terminu qasir ta' żmien
għall-istituzzjonijiet finanzjarji, il-korporazzjonijiet u l-gvernijiet.
Fl-Ewropa, madwar 22 % tat-titoli tad-dejn għal terminu qasir ta' żmien li
jinħarġu mill-gvernijiet jew mis-settur korporattiv huma tal-MMFs. L-MMFs
għandhom 38 % tad-dejn għal terminu qasir ta' żmien maħruġ mis-settur
bankarju[1]. Min-naħa tad-domanda, l-MMFs joffru għodda ta’
ġestjoni tal-flus kontanti għal terminu qasir ta' żmien li tipprovdi grad għoli
ta’ likwidità, diversifikazzjoni, stabbiltà tal-valur flimkien ma’ redditu
bbażat fuq is-suq. L-MMFs huma prinċipalment użati mill-korporazzjonijiet li
jfittxu li jinvestu l-flus kontanti żejda tagħhom għal terminu qasir ta’ żmien,
sakemm pereżempju tkun trid titħallas spiża ewlenija bħall-pagi. L-MMFs
għalhekk, aktar minn kwalunkwe fond ta' investiment ieħor, jirrappreżentaw
rabta kruċjali li tgħaqqad flimkien id-domanda u l-offerta ta’ flus kontanti
għal terminu qasir ta' żmien. B’immaniġġar ta’ assi ta’ madwar EUR1 000 biljun,
l-MMFs jirrappreżentaw kategorija ta’ fondi li hija distinta minn kull fond
reċiproku ieħor. Il-biċċa l-kbira tal-MMFs, madwar 80 % tal-assi u
60 % tal-għadd tal-fondi, joperaw skont ir-regoli tad-Direttiva dwar
l-Impriżi għall-Investiment Kollettiv f’Titoli Trasferibbli (Undertakings for
Collective Investment in Transferable Securities, UCITS). Id-daqs medju tal-MMF
jaqbeż sew id-daqs medju ta’ fond tal-UCITS. Pereżempju, MMF individwali jista’
jilħaq id-daqs ta’ EUR 50 biljun. L-implikazzjonijiet
sistematiċi tal-MMFs, l-interkonnettività tagħhom mal-emittenti u l-isponsors
tal-bank tagħhom, kienu fil-qalba tal-ħidma internazzjonali dwar is-sistema
bankarja parallela. Il-Bord għall-Istabilità Finanzjarja (Financial Stability
Board, FSB) u istituzzjonijiet oħra, bħalma huma l-Organizzazzjoni
Internazzjonali tal-Kummissjonijiet tat-Titoli (IOSCO) u l-Bord Ewropew dwar
ir-Riskju Sistemiku (ESRB) u analizzaw l-MMFs u l-implikazzjonijiet sistemiċi
tagħhom. L-MMFs, speċjalment dawk l-MMFs li jżommu l-prezz tal-ishma stabbli,
ġew individwati minħabba l-karatteristiċi tagħhom li huma simili għad-depożiti.
2.
definizzjoni
tal-problema
L-MMFs
jirappreżentaw għodda konvenjenti għall-investituri għaliex joffru
karatteristiċi analogi għad-depożiti bankarji: aċċess pront għal-likwidità u
l-istabbiltà tal-valur. L-investituri jaraw l-MMFs bħala alternattiva sigura u
aktar diversifikata mid-depożiti bankarji. Iżda fir-realtà, l-MMFs ma huma xejn
aktar minn fondi ta’ investiment klassiċi bir-riskji tas-suq inerenti marbutin
mal-investimenti. Għalhekk, meta jibdew jonqsu l-prezzijiet tal-assi li fihom
huma investiti l-MMFs, speċjalment matul sitwazzjonijiet tas-suq taħt stress,
l-MMF ma jistax dejjem iżomm il-wegħda li jifdi minnufih u li jżomm il-valur
tal-unità jew is-sehem maħruġ mill-MMF lill-investituri. Xi fondi jistgħu
"jirfdu" l-valuri kondiviżi billi jagħtu appoġġ lill-isponsor,
filwaqt li oħrajn jista' ma jkollhomx il-kapital biex jagħmlu dan. Il-parti
negattiva hija li l-investituri, hekk kif jaraw riskju li l-MMFs jistgħu jfallu
milli jżommu l-wegħda tagħhom ta' likwidità u ħlas lura stabbli fi kwalunkwe
ħin, iħallsu lura, u possibbilment iwasslu għal dik l-imsejħa
"assalt". L-assalti bankarji mill-investituri huma
kkaratterizzati minn talbiet ta’ fidi enormi u f’daqqa minn grupp kbir ta’
investituri li jridu jevitaw milli jitilfu flus u li jkunu jistgħu jifdu
bl-ogħla prezz possibbli. L-assalti bankarji mill-investituri huma
sistemikament rilevanti hekk kif iġiegħlu lill-MMFs ibiegħu l-assi tagħhom
malajr kemm jista’ jkun sabiex jissodisfaw it-talbiet ta’ fidi pendenti.
L-ispirall ta’ fidi nnifsu jkompli jgħaġġel it-tnaqqis fil-valur nett tal-assi
(net assent value, NAV) tal-fond, u b’hekk jgħarraq it-tnaqqis fin-NAV u
l-biża' li s-suq monetarju jkun kollu kemm hu instabbli. Il-problemi marbutin mal-assalti
bankarji mill-investituri huma ta’ natura sistemika minħabba: (1) Ir-rabta
mill-qrib tal-MMFs mal-ekonomija reali, (2) ir-rabta tagħhom mal-isponsers.
Barra minn hekk, l-assalti fuq l-MMFs għandhom ukoll punt ta’ protezzjoni
tal-investituri, minħabba li dawk li jifdu tard huma fi żvantaġġ inerenti meta
mqabbla ma’ dawk li jifdu kmieni. Is-suq tal-MMF huwa kkonċentrati f’numru
żgħir ta’ Stati Membri ma’ Franza, l-Irlanda u l-Lussemburgu li jirrappreżentaw
aktar minn 95 % tas-suq f’termini ta’ assi mmaniġġati. Madankollu, is-suq
huwa marbut sew ma’ pajjiżi oħra minħabba l-proporzjon għoli ta’ investimenti u
investituri transfruntiera, u l-konnessjonijiet kontaġji transfruntiera bejn
l-MMF u l-isponsor tagħhom, domiċiljati f’pajjiżi differenti.
Kontaġju lill-ekonomija reali
Matul il-kriżi, il-likwidità tal-MMF ma
kienx biżżejjed biex jissodisfa t-talbiet kollha ta’ tifdija. Dan wassal biex
xi fondi jissospendu tifdijiet jew jużaw restrizzjonijiet oħra. Li wieħed
iċaħħad lill-investituri ta’ investimenti tal-MMF għal terminu qasir ta' żmien
jista’ jkollhom riperkussjonijiet fuq l-emittenti li jiddependu fuq
finanzjament għal terminu ta' żmien qasir permezz ta’ MMF. Minħabba li l-MMFs
għandhom irwol ċentrali fil-finanzjament għal terminu ta' żmien qasir ta’
entitajiet bħal banek, korporazzjonijiet jew gvernijiet, l-assalti
mill-investituri fuq l-MMFs jistgħu jikkawżaw konsegwenzi makroekonomiċi aktar
wisgħin. Filwaqt li l-kontijiet bankarji jammontaw għall-parti l-kbira
(85 %) tal-EUR 1 000 biljun maħruġa lill-MMFs, il-gvernijiet
jirrappreżentaw sehem ta’ madwar 10 %, filwaqt li l-kontijiet
tal-korporazzjonijiet jammontaw għal madwar 5 %. Il-gvernijiet u l-korporazzjonijiet
kbar ħafna jużaw is-suq monetarju bħala mezz biex jiksbu finanzjament għal
terminu ta' żmien qasir, flimkien ma’ linji ta’ kreditu bankarji. Kwalunkwe
kontaġju għas-suq tal-finanzjament għal terminu ta' żmien qasir imbagħad jista’
jirrappreżenta wkoll diffikultajiet diretti u kbar għall-finanzjament
tal-"ekonomija reali".
Kontaġju
għall-isponsors
L-MMFs, speċjalment dawk li jwiegħdu
fidi bi prezz tas-sehem stabbli, storikament qagħdu fuq kapital diskrezzjonali
ta' sponsor biex iżommu n-NAV tagħhom fi żminijiet ta’ tnaqqis fil-valuri
tal-assi. Sponsors tal-MMF jistgħu jiddeċiedu li jipprovdu appoġġ sabiex
jikkumpensaw tnaqqis fin-NAV tal-fond tagħhom. L-isponsors sikwit jkunu
sfurzati jappoġġaw l-MMFs sponrsorjati tagħhom meta jitilfu l-valur minħabba li
jibżgħu li l-MMFs tagħhom li qed inaqqsu n-NAV, minħabba r-riskju
għar-reputazzjoni, jista' joħloq paniku li jista’ jinfirex fin-negozji l-oħra
tal-isponsor. Għall-isponsors tal-bank, ir-riskju jkun saħansitra iktar akut
minħabba li l-paniku jista' jinfirex għal bażi ta’ klijenti bl-imnut tal-bank
li mbagħad jista’ jwassal il-bank għall-inadempjenza. Matul il-kriżi, kienu osservati bosta
każijiet ta' appoġġ lill-isponsor. L-isponsors fil-biċċa l-kbira tagħhom ma
jkunux lesti biex jiffaċċaw sitwazzjonijiet bħal dawn minħabba li l-garanzija
"impliċita” ma tkunx irreġistrata bħala garanzija espliċita. L-ebda
riservi kapitali ma huma mibnija biex ikopru għal każijiet ta' appoġġ
għall-isponsor. Għalhekk, abbażi tad-daqs tal-fond u l-livell tal-pressjoni ta’
tifdija, l-appoġġ tal-isponsors jista’ jilħaq proporzjonijiet li jaqbżu
r-riżervi immedjatament disponibbli tagħhom. L-akbar fornituri tal-MMFs
jimmaniġġaw iktar minn EUR 250 biljun ta’ assi tal-MMF madwar id-dinja
filwaqt li f’xi każijiet il-flus kontanti tagħhom disponibbli faċilment
fil-karta tal-bilanċ tagħhom jammontaw għal ftit mijiet ta’ miljuni biss.
Trattament inġust tal-investituri
F’tifdija, kull ordni ta’ tifdija
jikkawża l-prezz tal-fond li tonqos għaliex il-fond huwa obbligat li jbiegħ l-assi
maż-żieda fl-ispejjeż tal-likwidità. Dan joħloq vantaġġ ta' min jidħol l-ewwel
fejn dawk li jifdu tard (ta’ spiss investituri bl-imnut) ikollhom iħallsu
l-ispejjeż assoċjati ma’ fidi bikrija. Għalhekk hemm trasferiment ta’ flus minn
persuni li jifdu tard għal dawk il-persuni li jifdu kmieni. L-ispiża
tat-tifdija tista' tirrappreżenta żvantaġġ sostanzjali minn dawk li jifdu tard
minħabba li d-differenza ta' qabel u wara x-xiri tista' tkun waħda sostanzjali.
Konsegwenzi
Minħabba li s-suq tal-flus kif ukoll
l-isponsors huma sistemikament rilevanti, il-gvernijiet jistgħu jkunu sfurzati
li jintervjenu meta s-suq tal-flus ikun qed jaffaċċa kriżi. L-awtoritajiet
tal-Istati Uniti stabbilixxew pjan biex jiggarantixxu l-flus kollha investiti
fl-MMFs. L-awtoritajiet pubbliċi fl-Ewropa kellhom jintervjenu wkoll biex
iwaqqfu l-kontaġju: Il-Ġermanja għaddiet liġi biex tistabbilizza s-suq u
l-Lussemburgu ħabbar li se jieħu l-passi kollha meħtieġa biex jistabbilizza
l-MMFs nazzjonali. Ir-reazzjonijiet differenti mill-entitajiet Ewropej ma kinux
favorevoli biex isaħħu l-istabbiltà tas-suq Ewropew b’mod sħiħ għaliex dan
ipprovoka spostamenti minn flus l-investitur għall-MMFs li bbenefikaw minn tali
garanzija. Il-konsegwenzi marbutin
mal-likwidiazzjoni tal-MMF jistgħu jkunu estremament problematiċi
għall-investitur billi l-fidi tibqa’ sospiża għal perjodu ta' żmien
potenzjalment twil ħafna u l-ammont preċiż irkuprat fl-aħħar jibqa' inċert għal
żmien twil ukoll. Fil-każ ta’ utenti korporattivi, it-tqegħid tal-flus kontanti
fl-MMF, sospensjoni tista’ twassal għal inabbiltà biex jitwettqu nefqiet
operattivi ppjanati bħall-ħlas tas-salarji.
3. Analiżi
tas-sussidjarjetà
L-approċċi
regolatorji nazzjonali huma limitati minnhom infushom għall-Istat Membru
inkwistjoni. Ir-regolamentazzjoni tal-profil tal-prodott u l-likwidità ta’ MMF
f'livell nazzjonali tinvolvi biss riskju li l-prodotti differenti jinbiegħu
kollha bħala MMF. Dan joħloq konfużjoni għall-investitur u jxekkel il-ħolqien
ta’ kundizzjonijiet ekwi madwar l-Unjoni għal dawk li joffru MMF
lill-investituri professjonali jew dawk fil-livell tal-konsumatur. Bl-istess
mod, l-approċċi nazzjonali differenti li jikkonċernaw il-karatteristiċi
essenzjali ta’ MMF iżidu r-riskju ta’ kontaġju transfruntiera, speċjalment meta
l-emittenti u l-MMFs ikunu jinsabu fi Stati Membri differenti. Barra minn hekk, minħabba li ħafna
mill-operaturi li joffru l-MMFs fl-Ewropa huma domiċiljati fi Stati Membri li
huma differenti minn dawk fejn jiġu kkummerċjalizzati l-fondi, il-ħolqien ta’
qafas b’saħħtu huwa essenzjali biex jiġi evitat kontaġju transkonfinali bejn
l-MMF u l-isponsor tiegħu. Dan huwa speċjalment akut meta l-isponsor ikun
jinsab fi Stat Membru li jaf ma jkollux ir-riżorsi baġitarji biex jiġi salvat
sponsor inadempjenti. Minħabba li l-MMFs huma fil-biċċa l-kbira tagħhom
domiċiljati f’żewġ ġuriżdizzjonijiet tal-UE (l-Irlanda u l-Lussemburgu),
iż-żewġ ġurisdizzjonijiet fejn l-ebda bank tal-isponsor ma huwa domiċiljat,
id-dimensjoni transfruniera tal-appoġġ għall-isponsor issir akuta. Għalhekk, hija meħtieġa azzjoni
fil-livell Ewropew.
4.
għanijiet
L-għanijiet ġenerali huma li: (1) Tissaħħaħ l-istabbiltà finanzjarja
fis-suq intern; (2) Tiżdied il-protezzjoni
tal-investituri tal-MMF L-ilħuq ta’ dawn l-għanijiet ġenerali
jeħtieġ it-twettiq tal-għanijiet politiċi aktar speċifiċi li ġejjin: (1) Prevenzjoni tar-riskju ta' kontaġju
lill-ekonomija reali; (2) Prevenzjoni tar-riskju ta' kontaġju
lill-isponsor; (3) Tnaqqis fl-iżvantaġġi għal dawk li
jifdu tard, speċjalment fir-rigward ta’ fidi f’kundizzjonijiet tas-suq taħt
stress. L-għanijiet speċifiċi msemmija hawn fuq
jeħtieġu l-kisba tal-għanijiet operattivi li ġejjin: (1) Jiżguraw li l-likwidità tal-fond
tkun xierqa biex jiġu indirizzati t-talbiet ta’ fidi tal-investituri. (2) Tinbidel l-istruttura tal-MMF sabiex
il-wegħda ta' stabbiltà tkun tista’ tiflaħ kundizzjonijiet ħżiena tas-suq.
5. għażliet ta'
politika
Sabiex jintlaħaq l-ewwel għan operattiv
(jiżguraw livelli adegwati ta’ likwidità tal-MMF), is-servizzi tal-Kummissjoni
analizzaw għażliet ta’ politika differenti li jkopru l-aspetti li ġejjin: Tliet
mekkaniżmi differenti ta’ fidi jew restrizzjonijiet, waħda mill-għażliet dwar
bafer tal-likwidità, għażla oħra dwar il-kwalità tal-assi u d-diversifikazzjoni
u għażliet dwar "it-tfassil tal-profil tal-konsumatur" tal-MMF. Sabiex
tissodisfa t-tieni għan operattiv (tgħammar MMF biex jifilħu kundizzjonijiet
ħżiena tas-suq), is-servizzi tal-Kummissjoni analizzaw għażliet politiċi
relatati mal-aspetti li ġejjin: għażla waħda dwar it-trasparenza, żewġ għażliet
dwar il-valutazzjoni li jeħtieġu n-NAV fluttwanti, żewġ għażliet li jimponi
bafers tan-NAV, għażla waħda dwar l-istatus ta’ bank, għażla waħda li
tikkombina n-NAV fluttwanti u l-bafer tan-NAV, u għażla waħda fuq
klassifikazzjoni.
6.
valutazzjoni
tal-impatti tal-għażliet miżmuma
Għan operattiv 1: għażliet li kellhom
l-għan li jżidu l-likwidità “kun af il-klijenti tiegħek" huma l-għażliet
miżmuma Biex jiżguraw li
l-likwidità tal-fond hija adegwata biex jiffaċċaw it-talbiet ta’ tifdija
tal-investitur, l-għażliet biex tiżdied il-likwidità ta’ assi fil-portafoll
u l-implimentazzjoni ta’ politika "kun taf il-klijenti tiegħek"
jikklassifikaw irwieħhom fil-quċċata. It-tliet għażliet ibbażati fuq li jimponu
fidi jew restrizzjonijiet, min-naħa l-oħra, inaqqsu radikalment l-attrazzjoni
tal-MMFs għall-investituri. Il-konsultazzjoni turi li dawn l-għażliet jistgħu,
min-naħa l-oħra, iwasslu għal tnaqqis fl-assi totali taħt amministrazzjoni
tal-MMFs, li jċaħħdu l-ekonomija reali ta’ għodda ta’ finanzjament importanti
għal terminu ta' żmien qasir. Barra minn hekk, dawn l-għażliet li jirrestrinġu
l-possibiltajiet tal-fidi jqajmu kwistjonijiet rigward effett antiċikliku
possibbli tagħhom, li ma jnaqqasx ir-riskju sistemiku iżda jżidu. Billi tiżdied il-likwidità tal-portafoll
u li fl-istess ħin jiġi żgurat li l-portafoll ikun diversifikat biżżejjed u
mhux investit f’assi ta’ kwalità baxxa, l-għan ta’ titjib tal-abbiltà tal-MMFs
biex jittrattaw mal-fidi jkun issodisfat aħjar. Min-naħa l-waħda l-investituri
se jgawdu minn aċċess aħjar għal-likwidità u minn tnaqqis tar-riskju u min-naħa
l-oħra dan għandu jżid l-abbiltà tal-fond biex jiffaċċa talbiet kbar ta’
tifdija. L-ispejjeż ta’ dawn l-għażliet jidhru relattivament modesti minħabba
li l-maġġoranza tal-MMFs diġà żviluppaw regoli interni li diġà jmorru f’dik
id-direzzjoni. Il-konsegwenzi f'terminu ta' żmien qasir fis-suq tad-dejn jidhru
wkoll maniġġabbli għaliex huwa biss proporzjon żgħir ħafna tal-assi li huma
investiti fit-tmiem il-kurva tar-redditu għal terminu ta' żmien qasir. Il-politika
biex tantiċipa t-talbiet ta’ tifdija kbar minnha nnifisha mhux se tipprevjeni
tifdijiet massivi iżda xorta tirrappreżenta għodda utli biex timmaniġġa
l-flussi ta’ dħul u ta’ ħruġ u tista' tiġi implimentata bi spejjeż żgħar. Għan operattiv 2: l-għażliet
bl-għan li tiżdied it-trasparenza, l-iżgurar ta' valwazzjonijiet stabbli u
l-limitazzjoni tal-użu tal-klassifikazzjonijiet huma l-alternattivi magħżula B’mod ġenerali, l-għażliet kollha
analizzati jżidu, fi gradi differenti, l-istabbiltà finanzjarja iżda l-ebda
waħda mill-għażliet ma tikseb dawn ir-riżultati mingħajr impatti negattivi.
L-alternattivi magħżula huma dawk li jilħqu l-aqwa bilanċ bejn l-istabbilità
finanzjarja u l-ispejjeż. Ir-riforma tal-metodoloġija ta’
valwazzjoni treġġa' lura l-verità evidenti li l-MMFs huma fondi mutwi normali
soġġetti għal varjazzjonijiet fil-prezzijiet. L-użu ta’ kost amortizzat u
t-tqarrib tal-metodu jippermetti lill-fond biex iżżomm prezz stabbli. Il-ħtieġa
tal-użu ta’ mmarkar ma’ valwazzjoni mmarkata jindika b’mod ċar lill-investituri
li qed jirriskjaw l-investiment tagħhom, mhux l-isponsor tal-fond. Dan inaqqas
jew saħansitra jneħħi l-inċentiv għall-isponsor sabiex jipprovdi appoġġ.
Il-kanal kontaġju għall-isponsors, is-sistema bankarja, jitnaqqas.
Il-flutwazzjoni tan-NAV hija għalhekk l-għażla li tikklassifika l-ogħla
fl-istabbilizzazzjoni tas-settur tal-MMF u, imbagħad, tillimita l-kontaġju
lis-settur bankarju. Iżda ma jistax jiġi eskluż li ċerti investituri jistgħu ma
jkunux jixtiequ jinvestu f’MMFs fluttwanti, li fl-aħħar mill-aħħar jistgħu
jwasslu għal tnaqqis għas-settur tal-MMF. L-impatti fuq il-maniġers jidhru
aktar limitati. Kif għad hemm xi dubju dwar jekk
l-investituri kollha tal-MMFs jadattawx għal struttura fluttwanti tan-NAV,
fornitur tal-MMF se jkollu l-possibbiltà li jżomm fond stabbli tan-NAV. Iżda
MMF tan-NAV stabbli jeħtieġ li jibbenefika minn bafer xieraq tan-NAV, li għandu
jiġi ffinanzjat mill-maniġer. Bl-alternattiva li
jgħaqqdu kemm in-NAV fluttwanti u l-bafer tan-NAV, il-maniġer tal-MMFs stabbli jkollhom
jiffinanzjaw bafer li jammonta minn tal-inqas għal 3 % tal-assi tal-MMFs
immaniġġati. Skont l-avvenimenti osservati tal-appoġġ mill-isponsor matul
il-kriżi (123 istanza fuq l-MMFs tal-Istati Uniti), l-appoġġ kien ogħla
minn 3 %, tliet darbiet biss. Meta fl-2008 il-Fond Primarju ta’ Riżerva
sar inadempjenti, dan tilef 3 % fuq 1,5 % skopertura lill-assi ta’
Lehman. Il-bafer mhux se jipprovdi garanzija sħiħa lid-detenturi tas-CNAV MMFs
iżda dan il-livell jilħaq bilanċ bejn il-ħtieġa li jkun hemm mudell ta’ CNAV
b’saħħtu u sigur u l-kapaċitajiet finanzjarji tal-maniġers. Filwaqt li l-għażla tan-NAV fluttwanti
għandha l-mertu li tindirizza r-riskji sistemiċi b’mod effettiv ħafna u mod
sempliċi, l-għażla li tgħaqqad iż-żewġ sistemi tirrikonoxxi l-fatt li tista’
tkun ta’ tfixkil għall-finanzjament ġenerali tal-ekonomija Ewropea jekk l-MMFs
kollha kienu obbligati li jżommu 'l fuq in-NAV tagħhom. Anki jekk NAV stabbli b’bafers tan-NAV
xierqa jkun “it-tieni l-aħjar” alternattiva għal NAV fluttwanti, il-kombinazzjoni
taż-żewġ għażliet imsemmija hawn fuq, b'kundizzjonijiet stretti, tista' tiġi
rrakkomandata sabiex jiġi żgurat li l-politika ġenerali tan-NAV fluttwanti mhux
se toħloq xkiel żejjed lill-finanzjament globali għal terminu ta' żmien qasir
tal-ekonomija Ewropea. Biex ikunu trasparenti dwar il-metodu
magħżul, il-maniġers se jkollhom iżidu t-trasparenza tagħhom lejn
l-investituri. Il-kwistjoni ta’ tifdijiet massivi wara tnaqqis
fil-klassifikazzjoni tal-kreditu jistgħu jiġu indirizzati biss billi jillimitaw
l-użu ta’ klassifikazzjonijiet, mill-inqas fil-livell tal-fond. Impatt fuq pajjiżi terzi Ix-xogħol madwar is-sistema bankarja
parallela huwa internazzjonali. Ir-rakkomandazzjonijiet ta’ IOSCO dwar l-MMFs,
kif ukoll l-approvazzjoni tagħhom mill-FSB, jeħtieġu implimentazzjoni f’kull
ġurisdizzjoni tal-G20. Huwa partikolarment importanti li jiġi żgurat li
r-riformi li għandhom isiru dwar il-likwidità u l-istabbiltà tal-MMF huma
applikati b’mod uniformi, sabiex jiġi evitat arbitraġġ regolatorju u kontaġju transġurisdizzjonali.
Għalhekk, l-alternattivi miżmuma f’din il-valutazzjoni tal-impatt jirriflettu
r-rakkomandazzjonijiet ta’ IOSCO u l-FSB. L-Istati Uniti, bħala l-akbar suq
tal-MMF fid-dinja, jeħtieġu attenzjoni speċjali. Is-swieq tal-MMF, fl-Ewropa u
fl-Istati Uniti, huma t-tnejn interkonnessi. L-MMFs ibbażati l-Istati Uniti,
huma investituri importanti fi strumenti tas-suq monetarju maħruġa fl-Ewropa.
L-MMFs tal-UE b’mod invers huma investituri importanti fi strumenti tas-suq
monetarju maħruġa fl-Istati Uniti. Bħala tali, l-MMFs fuq iż-żewġ naħat
tal-Atlantiku jirrappreżentaw sors importanti ta’ finanzjament mhux biss għal
emittenti korporattivi u banek fil-kontinent kollu tagħhom iżda għal dawk
l-entitajiet f’kontinent ieħor ukoll. L-awtoritajiet tal-Istati Uniti huma
wkoll involuti fi proċess ta’ riforma tal-MMF. Ġie stabbilit djalogu mill-qrib
mal-Istati Uniti sabiex jallinjaw il-fażijiet sussegwenti ta’ tfassil ta’
regoli.
7.
monitoraġġ
u evalwazzjoni
Evalwazzjoni ex post tal-miżuri
leġiżlattivi l-ġodda kollha hija prijorità għall-Kummissjoni. Ir-Regolament li
ġej se jkun soġġett għal evalwazzjoni kompleta sabiex jivvaluta, fost l-oħrajn,
kemm kienet effettiva u effiċjenti fl-ilħiq tal-għanijiet ippreżentati f'dan
ir-rapport u tiddeċiedi jekk humiex meħtieġa miżuri jew emendi ġodda. F’termini ta’ indikaturi u sorsi ta’
tagħrif li jistgħu jintużaw matul l-evalwazzjoni, se tintuża dejta minn sorsi
differenti. Din se tintuża biex tissorvelja l-livell ta' likwidità, it-tipi ta’
assi, l-emmittenti tal-assi u l-investituri tal-MMFs. Abbażi ta' dawn
l-indikaturi se jkun possibbli li jsiru konklużjonijiet dwar l-impatti
tar-riforma dwar l-istabbiltà finanzjarja. [1]
Fi Franza, l-MMFs ikollhom 45 % taċ-ċertifikati ta’ depożitu maħruġa
mill-banek u 35 % taċ-ċertifikati maħruġa minn korporazzjonijiet mhux
finanzjarji.