EUR-Lex Access to European Union law
This document is an excerpt from the EUR-Lex website
Document 52012DC0299
COMMUNICATION FROM THE COMMISSION TO THE EUROPEAN PARLIAMENT, THE EUROPEAN COUNCIL, THE COUNCIL, THE EUROPEAN CENTRAL BANK, THE EUROPEAN ECONOMIC AND SOCIAL COMMITTEE, THE COMMITTEE OF THE REGIONS AND THE EUROPEAN INVESTMENT BANK ACTION FOR STABILITY, GROWTH AND JOBS
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL EWROPEW, LILL-KUNSILL, LILL-BANK ĊENTRALI EWROPEW, LILL-KUMITAT EKONOMIKU U SOĊJALI EWROPEW, LILL-KUMITAT TAR-REĠJUNI U LILL-BANK EWROPEW TAL-INVESTIMENT AZZJONI GĦALL-ISTABBILTÀ, GĦAT-TKABBIR U GĦALL-IMPJIEGI
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL EWROPEW, LILL-KUNSILL, LILL-BANK ĊENTRALI EWROPEW, LILL-KUMITAT EKONOMIKU U SOĊJALI EWROPEW, LILL-KUMITAT TAR-REĠJUNI U LILL-BANK EWROPEW TAL-INVESTIMENT AZZJONI GĦALL-ISTABBILTÀ, GĦAT-TKABBIR U GĦALL-IMPJIEGI
/* COM/2012/0299 final - 2012/ () */
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL EWROPEW, LILL-KUNSILL, LILL-BANK ĊENTRALI EWROPEW, LILL-KUMITAT EKONOMIKU U SOĊJALI EWROPEW, LILL-KUMITAT TAR-REĠJUNI U LILL-BANK EWROPEW TAL-INVESTIMENT AZZJONI GĦALL-ISTABBILTÀ, GĦAT-TKABBIR U GĦALL-IMPJIEGI /* COM/2012/0299 final - 2012/ () */
1.
Introduzzjoni
Il-kriżi, li issa qed
tolqot tant partijiet mill-Ewropa, dgħajfet il-fiduċja
fil-kapaċità tas-sistema politika u ekonomika Ewropea li jirnexxielha
tilħaq l-ambizzjoni tat-Trattat tal-UE għal "żvilupp
sostenibbli... ibbażat fuq tkabbir ekonomiku bbilanċjat."
Ħafna miċ-ċittadini tagħna jinsabu rrabjati u
skunċertati kif perjodu twil ta' standards ta' għajxien li qed
jogħlew, irriżulta f'daqshekk qasir żmien, fi kriżi
finanzjarja enormi, f'nuqqas kbir ta' impjiegi u fi prospetti ta' livelli
għolja ta' dejn għal ħafna snin oħra. Id-djun,
id-defiċits u l-iżbilanċi li qed tikkonfronta l-UE llum
il-ġurnata, ma nħolqux mil-lejl għan-nhar iżda akkumulaw
matul is-snin u l-konsegwenzi soċjali tagħhom huma mifruxa ferm. Dan
huwa żmien ta' prova għall-gvernijiet nazzjonali u għall-UE.
Uħud mid-diffikultajiet attwali tagħna mxew għal ġol-UE
minħabba l-kriżi finanzjarja. Uħud minnhom nibtu minnha stess.
Bħalissa l-importanti huwa li r-rispons tagħna jkun ta' kwalità u li
jkun effettiv. Il-kriżi finanzjarja u
ekonomika enfasizzat l-interdipendenza bejn l-ekonomiji kollha tal-UE, u bejn
l-UE u ekonomiji dinjin oħra. Hija żvelat ukoll lakuni, nuqqasijiet u
żbilanċi sinifikanti fit-tfassil tal-politiki f'livell globali,
f'livell tal-UE kif ukoll f'livell nazzjonali. Minn meta feġġet
il-kriżi, l-UE u l-Istati Membri tagħha bdew jaħdmu
bis-sħiħ biex jagħmlu bidliet radikali fil-mudell ekonomiku
tal-UE u biex jerġgħu jistabbilixxu l-kompetittività tagħha. Kif
qalet il-Kummissjoni fil-Pjan Direzzjonali għall-Istabbiltà u t-Tkabbir
tagħha ta' Ottubru 2011[1], dan kien ifisser li: ·
Isir frontloading tal-politiki dwar
it-tisħiħ tal-istabbiltà u tat-tkabbir sabiex jerġa' jkun hemm
tkabbir sostenibbli u livelli għolja ta' impjiegi fl-UE. ·
Tinbena governanza ekonomika iktar soda u iktar
integrata biex l-iżbilanċi jinqabdu aktar malajr u b'hekk jiġu
korretti minn kmieni, waqt li l-politiki nazzjonali jitpoġġew
taħt sorveljanza aktar b'saħħitha fil-livell tal-UE biex
jirriflettu r-realtà li s-saħħa u l-prosperità ta' kull Stat Membru
huma marbuta ma' dawk tal-Istati Membri l-oħrajn kollha. ·
Tissaħħaħ is-sistema bankarja, billi
jkun hemm insistenza li l-banek juru l-firxa tad-dejn kollu tagħhom,
jittrattaw id-djun li għandhom mhux imħallsa u jirristrutturaw
il-mudelli kummerċjali tagħhom sabiex fil-futur ikunu jistgħu
jsellfu lil negozji u unitajiet domestiċi mingħajr ma jkun hemm
bżonn ta' salvataġġi finanzjarji ffinanzjati mill-kontribwenti
fuq l-introjtu. ·
Jingħata rispons deċiżiv
għall-problemi tal-Greċja permezz ta' żewġ pakketti
finanzjarji kbar u li jingħata appoġġ intensiv għal tkabbir
li jkun orjentat lejn programm għall-irkupru. ·
Jissaħħu s-salvagwardji finanzjarji
taż-żona tal-Euro billi jinħolqu modi ġodda ta' kif
jingħata l-appoġġ lill-Istati Membri li jkollhom livelli
għolja ħafna ta' dejn filwaqt li dawn jistabbilixxu mill-ġdid
il-finanzi pubbliċi tagħhom, billi jsibu bilanċ bejn
id-dħul u l-infiq tagħhom bil-għan li fil-futur jaslu li
jħallsu għas-servizzi soċjali, għall-kura
tas-saħħa, għall-pensjonijiet, għall-edukazzjoni u
għall-infrastruttura pubblika. Permezz tal-Pjan
Direzzjonali segwenti, għamilna progress sod iżda irregolari. Jidher
biċ-ċar li, wara t-tnaqqis fir-ritmu tal-attività ekonomika sar
ibbilanċjar mill-ġdid fl-ekonomija tagħna, kien hemm tnaqqis
tad-defiċits kbar tal-kontijiet kurrenti li ilhom jakkulumaw sa
mill-2007/8, sar aġġustament fil-pagi b'tali mod li għolew
f'pajjiżi li għandhom surplus u li naqsu f'pajjiżi
b'defiċit u fil-prezzijiet tad-djar f'diversi Stati Membri biex
reġgħu laħqu livelli li jikkonformaw aktar mal-kundizzjonijiet
ekonomiċi sottostanti. Permezz tal-appoġġ ipprovdut mis-sistema
l-ġdida tal-governanza ekonomika tal-UE, il-proċess iebes ta'
stabilizzazzjoni u ta' riforma se jirriżulta f'ekonomija tal-UE ġdida
u aktar b'saħħitha. Tkabbir dejjiemi u
sostenibbli u standards ta' għajxien ogħla jistgħu biss jinkisbu
jekk fil-bażi tagħhom ikun hemm finanzi pubbliċi stabbli,
riforma strutturali profonda u investiment immirat. Iżda l-isfidi li dawn
iġibu magħhom jistgħu jiġu kkonfrontati biss jekk ikun hemm
tkabbir suffiċjenti li jagħti sostenn lil dan il-proċess. Ma
hemm l-ebda kontradizzjoni bejn stabbiltà u tkabbir; huma
ż-żewġt uċuħ tal-istess munita. Jeħtieġ li
l-Istati Membri jikkonfrontaw in-nuqqas ta' fiduċja li hemm bħalissa
fl-ekonomija b'riformi kuraġġużi li jreġġgħu lura
t-tendenza negattiva fil-kompetittività tagħna. Jeħtieġ li
naġixxu mal-ewwel biex innaqqsu l-lakuni allarmanti li hemm
fil-kompetittività fl-UE u fiż-żona tal-Euro. Minkejja li l-UE,
bħala entità sħiħa, kienet kapaċi żżomm sehemha
fil-kummerċ dinji, jeħtieġ li nindirizzaw ukoll it-tendenza
negattiva fil-kompetittività internazzjonali u t-telf tas-sehem fis-suq, li
jidhru ċar mill-prestazzjoni ta' għadd ta' Stati Membri. Fuq perjodu ta' żmien
qasir, in-nies għandhom bżonn li jkollhom it-tama u l-perspettiva ta'
futur aħjar. Mingħajr din il-perspettiva, fit-twettiq tar-riformi
meħtieġa, se niffaċċjaw ammont dejjem ikbar ta'
diffikultajiet politiċi u soċjali li min-naħa tagħhom se
jdewmuna fil-proċess tal-irkupru. Jeħtieġ li nsibu konsensus u
li jkollna fiduċja fil-ħtieġa għall-bidla u
fl-għażliet li għandhom isiru. Is-sħab soċjali se
jkollhom irwol importanti f'dan id-djalogu. Din hija r-raġuni
għalfejn l-UE teħtieġ li ssaħħaħ il-parti
fl-istrateġija globali tagħha li hija ddedikata għat-tkabbir.
Il-bażi ta' din l-inizjattiva trid tikkombina dak li jistgħu
jagħmlu l-Istati Membri f'livell nazzjonali mal-azzjonijiet li
jistgħu jittieħdu f'livell tal-UE, filwaqt li tankra dawn l-isforzi
fl-istrateġija Ewropa 2020 u fl-istrutturi l-ġodda ta' governanza
tagħna. Diġà hemm xi komponenti ewlenin ta' din l-inizjattiva
għat-tkabbir - iżda dawn għad iridu jiġu implimentati
fis-sħiħ. Oħrajn, jekk irridu li l-potenzjal tagħhom joħroġ
fid-deher, se jkollhom bżonn ta' viżjoni, kuraġġ u sens ta'
tmexxija - iżda l-isfidi li qed tikkonfronta l-UE llum il-ġurnata
jirrikjedu li tittieħed azzjoni kuraġġuża u effettiva. F'din il-Komunikazzjoni,
il-Kummissjoni tipproponi għadd ta' elementi li jistgħu jagħmlu
parti minn inizjattiva għat-tkabbir, imsejsa fuq żewġ pilastri
li jissaħħu b'mod reċiproku: ·
Pilastru fil-livell tal-UE li jiffoka fuq
is-saħħa u s-sinerġiji li jirriżultaw minn ħidma
flimkien fil-livell tal-UE. ·
Pilastru fil-livell tal-Istati Membri bbażat
fuq il-ħruġ tal-potenzjal għat-tkabbir tar-riformi strutturali
identifikati bħala parti mis-Semestru Ewropew. B'segwitu
għal-laqgħa informali tal-Kunsill Ewropew fit-23 ta' Mejju
u bi tħejjija għall-Kunsill Ewropew ta' Ġunju, il-Kummissjoni se
tkompli taħdem fuq l-elementi kollha possibbli li jistgħu
jgħinuha trendi t-tkabbir u l-kompetittività aktar b'saħħithom.
2.
Ir-Rwol tal-UE f'inizjattiva ġdida għat-tkabbir
Fil-livell tal-UE,
aħna qbilna dwar l-istrateġija Ewropa 2020[2],
li hija mfassla biex twassal l-istampa ta' Ewropa intelliġenti, sostenibbli
u inklużiva. Din hija l-pjattaforma li fuqha ħa tinbena inizjattiva
ġdida għat-tkabbir. L-Istati Membri kollha qablu fuq il-miri
tal-istrateġija Ewropa 2020 dwar l-impjiegi, l-enerġija,
l-edukazzjoni u t-taħriġ, ir-riċerka u t-tnaqqis tal-faqar. Dawn
il-miri huma indikaturi ta' kif għandhom jiġu segwiti r-riformi
fl-Ewropa. L-implimentazzjoni tagħhom se tagħti spinta
lill-kompetittività u se tiffaċilita l-konverġenza, u dan se
jgħin biex l-UE tibda miexja lejn tkabbir akbar. Impenn aktar attiv biex nilħqu
l-mira tagħna fir-R&Ż li ninvestu 3 % mill-PDG
fir-R&Ż, jista' joħloq 3,7 miljun impjiegi u sal-2020 jista'
jkabbar il-PDG tal-UE bi EUR 800 biljun. Il-kisba tal-miri tagħna
dwar it-tibdil fil-klima u l-enerġija sal-2020, tkun tiġġenera
mal-5 miljun impjieg, iżżid is-sigurtà fl-enerġija
tal-Ewropa u tgħinna nilħqu l-għanijiet tagħna dwar
it-tibdil fil-klima. Il-ħelsien ta' mill-anqas 20 miljun persuna
mill-faqar mhux biss iservi biex itejbilhom ħajjithom, iżda jġib
miegħu wkoll benefiċċji ekonomiċi għas-soċjetà
kollha. Dawn iċ-ċifri jindikaw mhux impossibbli li noħolqu
impjiegi u opportunitajiet ta' negozju ġodda mal-UE kollha,
speċjalment billi nnaqqsu l-qgħad u noffru futur aħjar u aktar
ekoloġiku għaċ-ċittadini tagħna.
2.1.
Nisfruttaw il-potenzjal ta' tkabbir tal-Unjoni
Ekonomika u Monetarja
F'dawn l-aħħar
snin, sar ħafna xogħol biex jiġu adottati l-mekkaniżmi ta'
sorveljanza ekonomika b'saħħitha meħtieġa
għall-appoġġ tal-Unjoni Ekonomika u Monetarja. Il-mod ta' kif
l-UE u l-Istati Membri tagħha jimplimentaw din is-sistema l-ġdida, se
jiddetermina l-effettività tal-politika kif ukoll il-fiduċja fis-swieq.
Fuq perjodu ta' żmien itwal, jeħtieġ li l-integrazzjoni ssir
iktar profonda biex l-Unjoni Ekonomika u Monetarja tagħna tkun kompluta.
UE b'saħħitha teħtieġ munita stabbli. Dan il-fatt ikun ta'
ġid għall-Istati Membri kollha, kemm jekk jagħmlu parti
miż-żona tal-Euro u kemm jekk le. Il-kredibbiltà tal-Euro fis-swieq
internazzjonali tolqot il-kapaċità tal-Ewropa li tissellef il-fondi b'rati
raġonevoli u li tħallashom lura minn ekonomija b'saħħitha. ·
Il-Patt ta' Stabbiltà u Tkabbir
imsaħħaħ se jipprovdi lill-UE bl-istrumenti ta' politika
b'saħħithom u bbażati fuq ir-regoli li teħtieġ biex
tiggarantixxi l-istabbiltà fil-finanzi pubbliċi.
Għall-biċċa l-kbira tal-Istati Membri, bħalissa l-prijorità
hija dik li jikkoreġu d-defiċits eċċessivi. Apparti
t-"two pack" propost reċentement, ma hemmx bżonn immedjat
li jsir tibdil fir-regoli miftehma reċentement. Ir-regoli eżistenti
jipprovdu lok għall-ġudizzju u għad-divrenzjar bejn l-Istati
Membri skont l-ispazju fiskali u l-kundizzjonijiet makroekonomiċi
tagħhom, filwaqt li jiggarantixxu s-sostenibbiltà fit-tul tal-finanzi pubbliċi.
Il-valutazzjoni tal-miżuri baġitarji meħuda mill-Istati Membri,
partikolarment f'termini strutturali, tinsab fil-qalba tal-implimentazzjoni
tar-regoli. Il-Kummissjoni se tikkontrolla l-impatt li għandhom
ir-restrizzjonijiet ta' baġit limitat ħafna fuq it-titjib fit-tkabbir
tan-nefqa pubblika u fuq l-investiment pubbliku. Jekk ikun meħtieġ,
hija se tipprovdi gwida dwar il-lok għal possibbiltà li tittieħed
azzjoni fil-konfini tal-UE u tal-oqfsa fiskali nazzjonali. Fix-xhur li
ġejjin, se toħroġ rapport dwar il-kwalità tal-infiq pubbliku, li
se jittratta dawn il-kwistjonijiet. ·
Għamilna progress sinifikanti permezz
tat-tisħiħ tas-salvagwardji finanzjarji tagħna. Huwa
ppjanat li l-Mekkaniżmu Ewropew ta' Stabbiltà se jidħol
fis-seħħ fl-1 ta' Lulju 2012 – sena qabel kien
ippjanat – u li se jkun il-mekkaniżmu permanenti li jiffinanzja
l-ġestjoni tal-kriżi fiż-żona tal-Euro. Meta jitqiesu
l-Mekkaniżmu Ewropew ta' Stabbiltà, il-Mekkaniżmu Ewropew ta'
Stabbiltà Finanzjarja u mekkaniżmi oħra ta' ffinanzjar
għall-ġestjoni tal-kriżi kollha flimkien, it-total
tal-kapaċità ta' self tagħna issa huwa ta' EUR 800 biljun.
Flimkien maż-żieda fir-riżorsi tal-FMI, li sar ftehim fuqha
reċentement, is-salvagwardji finanzjarji Ewropej jikkontribwixxu b'mod
sinifikanti għas-sistemi globali ta' protezzjoni finanzjarja. Iżda
l-mod kif nużaw is-salvagwardji tagħna huwa wkoll ta' importanza
kruċjali. Għal dawk li jirratifikaw it-Trattat Fiskali,
il-Mekkaniżmu Ewropew ta' Stabbiltà għandu firxa ta' strumenti
ġodda li se jippermettu lill-UE tirreaġixxi b'mod effettiv
għas-sitwazzjonijiet ta' kriżi. F'dan ir-rigward, il-flessibbiltà u
r-rapidità li biha ssir l-azzjoni jkunu ta' importanza kruċjali. ·
Settur bankarju tal-UE aktar b'saħħtu: ġie evitat kollass finanzjarju u s-superviżjoni tas-settur
finanzjarju ġiet mibdula radikalment. Il-banek transkonfinali issa qed
jiġu ssorveljati minn kulleġġi ta' superviżuri u twaqqfu
tliet awtoritajiet superviżorji ġodda tal-UE. Barra minn hekk,
il-Bord Ewropew dwar ir-Riskju Sistemiku ġie stabbilit bħala
s-superviżur makroprudenzjali fil-livell tal-UE. Għadha tintħass
il-ħtieġa li titlesta r-rikapitalizzazzjoni ta' ċerti banek,
bħala parti mill-istrateġija li issa qed tiġi kkoordinata
mill-Awtorità Bankarja Ewropea. Minkejja li ċerti banek diġà qed
jagħtu lura s-self pubbliku li rċevew matul il-kriżi,
l-ispiża għall-kontribwenti fuq l-introjtu kienet enormi. Sabiex
jiġi żgurat li s-settur privat jagħti sehem xieraq fi kwalunkwe
salvataġġi finanzjarji futuri, f'Ġunju l-Kummissjoni se
tipproponi qafas komuni għall-irkupru u r-riżoluzzjoni tal-banek u
tal-kumpaniji tal-investimenti. Dan se jipprovdi sensiela ta' għodod li
jippermettu l-ġestjoni tar-riżoluzzjoni ta' istituzzjonijiet
sistematikament importanti skont kif ikun meħtieġ. ·
L-approfondiment tal-Unjoni Ekonomika u
Monetarja: Lil hinn mill-orizzont immedjat,
tenħtieġ perspettiva aktar fit-tul lejn il-futur tal-unjoni ekonomika
u monetarja tal-UE. Il-Kummissjoni se tappoġġja reazzjoni li tkun
ambizzjuża u strutturata. Il-prospetti ta' tkabbir tal-UE huma milquta
ħafna min-nuqqas ta' fiduċja li hemm bħalissa fiż-żona
tal-euro. Sakemm ma jiġux megħluba ċerti inċertezzi
ewlenin, bħal pereżempju is-sitwazzjoni fil-Greċja, se nkomplu
nitilfu l-fiduċja, u din hija neċessarja għall-ħolqien
tal-investimenti u tal-impjiegi. Sabiex jibni fuq dak li ksibna sa issa, se
jkun hemm bżonn ta' proċess li jfassal il-passi ewlenin li jwasslu
għal unjoni ekonomika u monetarja sħiħa. Li nuru
biċ-ċar id-determinazzjoni tagħna li nibqgħu naħdmu u
navvanzaw, filwaqt li nuru l-impenn politiku tal-Istati Membri lejn l-euro, se
jagħmlu parti mill-mira li niksbu mill-ġdid il-fiduċja
fiż-żona tal-euro u fil-kapaċità tagħna li negħlbu
d-diffikultajiet attwali. Dan se jirrikjedi proċess b'firxa wiesgħa
li jieħu inkunsiderazzjoni kwistjonijiet ta' natura legali. Għandu
jinkludi proċess politiku li joffri leġittimità u responsabbiltà
demokratiċi li jmexxu 'l quddiem l-integrazzjoni. It-tfassil
tal-komponenti ewlenin jista' jinkludi, fost l-oħrajn, l-avviċinament
għal unjoni bankarja b'superviżjoni finanzjarja integrata u għal
skema unika ta' garanziji tad-depożiti. Il-Kummissjoni kienet diġà
esprimiet l-ideat tagħha pubblikament fil-Green Paper[3]
ta' Novembru 2011, dwar kif iż-żona tal-euro tista' tersaq lejn
il-ħruġ konġunt tad-dejn. Jeħtieġ li jiġu
kkalkulati r-ritmu u s-sekwenza ta' dawn l-iżviluppi, li għandhom
jinkludu pjan direzzjonali kif ukoll skeda ta' żmien, iżda konferma
bikrija tal-passi li għandhom jittieħdu se tenfasizza n-natura
irreversibbli u solida tal-euro.
2.2.
Nisfruttaw il-potenzjal tas-Suq Intern
B'mod ġenerali,
is-suq intern għall-merkanzija qed jiffunzjona, iżda ma nistgħux
ngħidu l-istess ħaġa dwar is-suq intern għas-servizzi jew
dwar is-suq uniku elettroniku. Il-fatt li nippruvaw naħsdu aktar frott
mis-Suq Intern huwa wieħed mill-aktar modi effettivi biex tingħata
spinta lit-tkabbir mal-UE kollha. Il-kumpaniji innovattivi mal-ewwel
jieħdu spinta kieku tgħaddi deċiżjoni biex
fl-aħħar tiġi adottata privattiva tal-UE. Wara tant snin,
issa wasal iż-żmien li niddeċiedu. F'Ġunju,
il-Kummissjoni se tipproponi miżuri li jtejbu l-implimentazzjoni tad-Direttiva
dwar is-Servizzi. Ħafna mill-Istati Membri għażlu li
jżommu ostakli u restrizzjonijiet li jċaħħdu lilhom kif
ukoll lil Stati Membri oħra milli jgawdu mill-benefiċċji kollha
tad-Direttiva f'termini ta' kompetittività u ta' tkabbir. L-analiżi
tal-Kummissjoni tindika illi li kieku jitneħħew ir-restrizzjonijiet
kollha, ikun jista' jiżdied dħul addizzjonali ta' massimu ta'
1,8 % tal-PDG mal-ammont stmat ta' 0,8 % li diġà
ddaħħal permezz tal-implimentazzjoni parzjali tad-Direttiva. Hija
tindika wkoll li t-tnaqqis jew l-eliminazzjoni tal-ostakli jħallu effett
pożittiv fuq il-flussi tal-kummerċ u fuq l-investiment dirett barrani
kif ukoll fuq il-livelli tal-produttività f'kull Stat Membru. Dan ikun
jikkontribwixxi wkoll għall-ibbilanċjar mill-ġdid bejn
il-pajjiżi li għandhom surplus u dawk li għandhom defiċit. Aktar tard din is-sena,
hija se tipproponi Att dwar is-Suq Uniku II imfassal b'tali mod li
jikkompleta s-Suq Uniku f'oqsma ewlenin bħalma huma l-industriji
diġitali u tan-netwerks, fejn bħalissa l-UE tinsab batuta. Jekk l-UE
tiġi mgħammra bl-infrastruttura fiżika u virtwali li
teħtieġ biex tindirizza l-isfidi tas-seklu 21, ikun jista' jiġi
sfruttat il-potenzjal tat-tkabbir u tal-impjiegi. Teknoloġiji u netwerks
ġodda jistgħu jnaqqsu l-konġestjoni fl-ajru u fit-toroq tal-Ewropa,
jgħinu biex jiġu adottati grilji elettriċi intelliġenti li
jistgħu jużaw l-enerġiji rinnovabbli u jfornu l-enerġija
lill-karozzi li jaħdmu bl-elettriku u jqiegħdu
għad-dispożizzjoni tan-negozji kollha teknoloġija li ttejjeb
il-produttività bi prezz orħos, permezz tal-cloud computing.
Jeħtieġ li l-UE tinvesti f'teknoloġiji ewlenin ta'
appoġġ bħalma huma l-bijoteknoloġija,
in-nanoteknoloġija u l-mikroteknoloġija biex tinżamm
il-kompetittività industrijali futura tagħha, billi tiżviluppa
merkanzija u servizzi ġodda u billi tirristruttura mill-ġdid
il-proċessi industrijali bil-għan li timmodernizza l-industrija
tagħha. Il-Kummissjoni enfasizzat
konsistentement l-importanza li jiġu indirizzati l-ostakli fiskali
transkonfinali fis-Suq Intern. Il-progress li jsir fil-livell tal-UE jista'
jappoġġja u jiffaċilita l-azzjonijiet ta' Stati Membri
individwali biex jiksbu l-objettivi tal-istrateġija għat-tkabbir
rispettivi tagħhom, u jgħin biex jipprovdi qafas ġenerali għat-tisħiħ
tal-ġbir ta' dħul, għall-ġlieda kontra l-frodi u
għall-iżgurar ta' kundizzjonijiet ġusti u sodi
għall-kompetizzjoni. F'dan il-kuntest, jeħtieġ li
tittieħed azzjoni fil-Kunsill biex tiżblokka l-proposti
tal-Kummissjoni dwar it-tifdil u ta' dawk li jirrigwardaw il-mandati
għall-kooperazzjoni ma' pajjiżi terzi. Aktar tard din is-sena,
il-Kummissjoni se toħroġ Komunikazzjoni li tiddeskrivi b'mod
ġenerali l-għażliet biex jiġu ttrattati kwistjonijiet ta'
rifuġju fiskali u l-ippjanar aggressiv ta' taxxi. Il-Kummissjoni tqis li
l-ippjanar predatorju tat-taxxa u l-azzjoni kontra l-frodi għandhom
jiġu indirizzati fl-istess waqt. Dan jeħtieġ ħidma teknika
dettaljata u impenn politiku ċar iżda l-benefiċċji
jistgħu jkunu sostanzjali mhux biss f'termini ta' żieda fid-dħul
iżda wkoll ta' sens ta' ġustizzja u ta' kundizzjonijiet kompetittivi
aħjar. Il-qasam tat-tassazzjoni
fuq l-enerġija huwa eżempju ċar tar-relazzjoni pożittiva li
hemm bejn l-azzjonijiet tal-UE u dawk meħuda fil-livell tal-Istati Membri.
Hawnhekk, il-proposta tal-Kummissjoni li tirristruttura l-mod ta' kif
għandha tiġi ntaxxata l-enerġija, tkun tappoġġja
l-objettiv li nersqu lejn ekonomija b'livell baxx ta' emissjonijiet
tal-karbonju u li tuża l-enerġija b'mod effikaċi waqt li
fl-istess ħin innaqqsu t-tfixkil li ġej mill-fatt li jeżistu tassazzjonijiet
differenti fuq prodotti simili li jintużaw għall-istess skop.
It-tisħiħ tan-newtralità tat-taxxa u l-ippremjar ta' sorsi ta'
enerġija iktar ekoloġiċi jgħinu biex jintlaħqu l-miri
tal-UE dwar it-tnaqqis tad-Diossidu tal-Karbonju, l-effiċjenza fl-enerġija
u l-enerġija rinnovabbli.
2.3.
Nisfruttaw il-potenzjal tal-kapital uman
Fil-pakkett
reċenti tagħha dwar l-impjiegi, il-Kummissjoni pproponiet sensiela
ta' miżuri konkreti biex ikun hemm irkupru rikk fl-impjiegi mal-UE kollha.
Se tkun meħtieġa kooperazzjoni bejn il-Kummissjoni, l-Istati Membri,
is-sħab soċjali kif ukoll il-partijiet interessati pubbliċi u
privati, biex jiġu implimentati l-azzjonijiet speċifiċi proposti
bil-għan li jiġi sfruttat il-potenzjal tal-ħolqien ta' impjiegi
ta' setturi ewlenija bħal dawk tal-ICT (it-teknoloġiji
tal-informazzjoni u tal-komunikazzjoni), tal-kura tas-saħħa u
tal-ekonomija ekoloġika. Il-monitoraġġ imsaħħaħ
tal-pjanijiet nazzjonali għall-impjiegi permezz tal-valutazzjoni
komparattiva u tat-tabella ta' valutazzjoni proposti mill-Kummissjoni, se
jsaħħaħ ulterjorment l-impetu għar-riformi ta' ħolqien
ta' impjiegi, li għandhom jibbenefikaw ukoll mir-rabta aktar mill-qrib li
hemm bejn ir-rakkomandazzjonijiet speċifiċi għall-pajjiżi u
l-użu tal-fondi strutturali, b'mod partikolari l-Fond Soċjali
Ewropew, kif propost mill-Kummissjoni għall-perjodu tal-ipprogrammar li
jmiss (2014-2020). B'aktar
minn tliet miljun post tax-xogħol vakanti mal-UE kollha, jeħtieġ
li jsir investiment ikbar fil-ħiliet sabiex jiġu indirazzati l-ispariġġi
fil-ħiliet. Programmi fil-livell tal-UE bħalma huma l-Erasmus u
l-Leonardo għandhom irwol importanti biex jgħinu lin-nies jistudjaw,
jitħarrġu u jiksbu esperjenza ta' xogħol fi Stati Membri
oħra. Strumenti ġodda fil-livell tal-UE, bħalma huma l-Panorama
tal-Ħiliet u l-Passaport tal-Ħiliet, se jgħinu biex
il-ħiliet miksuba fi Stat Membru wieħed jiġu rikonoxxuti
aħjar fl-Istati Membri kollha l-oħra. Il-Kummissjoni qed taħdem
biex ittejjeb il-mobbiltà tal-ħaddiema u biex tiffaċilita t-tqabbil
tal-ħaddiema, tal-ħiliet u tal-postijiet tax-xogħol vakanti li
jkunu disponibbli. Ikun jista' jsir ħafna aktar progress kieku
jitneħħew l-ostakli legali u prattiċi li jxekklu l-moviment
liberu tal-ħaddiema, b'mod partikolari fir-rigward tal-portabbiltà
tal-pensjonijiet u tal-koordinazzjoni tad-dispożizzjonijiet tas-sigurtà
soċjali u kieku jittejjeb it-tqabbil tal-postijiet tax-xogħol ma'
dawk li jkunu qed ifittxu xogħol billi l-EURES isir għodda verament
Ewropea ddedikata għas-sejba tax-xogħol u
għar-reklutaġġ.
2.4.
Nisfruttaw is-sorsi esterni ta' tkabbir
Filwaqt li,
inġenerali l-kummerċ estern tal-UE huwa bbilanċjat,
l-analiżi tal-Kummissjoni skont il-pajjiż, turi telf inkwetanti
għal perjodu twil iżżejjed ta' xi wħud mill-Istati Membri
fejn jidħol is-sehem tagħhom fis-suq tal-esportazzjoni. Iżda din
tindika wkoll li l-Istati Membri bl-aħjar prestazzjoni użaw
it-tkabbir tagħhom fl-esportazzjoni bħala mutur għall-ekonomiji
tagħhom. Barra minn hekk, żewġ terzi mill-importazzjonijiet
tal-UE huma esportati mill-ġdid b'valur ogħla, u dan juri li l-UE
tista' biss tmur għall-aħjar jekk iżżid l-impenn
tagħha fil-kummerċ u ttejjeb ir-relazzjonijiet ta' investiment
tagħha mas-sħab ewlenin. Fil-biċċa l-kbira tiegħu,
it-tkabbir globali futur se jirriżulta mill-ekonomiji emerġenti li
għandhom potenzjal kbir ta' tkabbir. Jeħtieġ li l-UE tisfrutta
dan it-tkabbir billi tikkonkludi ftehimiet bilaterali u reġjonali dwar
il-kummerċ u l-investiment mas-sħab ewlenin. Il-ftehim dwar
il-kummerċ ħieles li sar mal-Korea u li daħal fis-seħħ
reċentement, diġà qed naħsdu l-frott minnu b'żieda ta'
20 % fl-esportazzjonijiet tal-UE matul is-sena 2011. L-UE qed
tipparteċipa attivament f'negozjati li jirrigwardaw għadd ta'
ftehimiet dwar il-kummerċ ħieles u diġà tinsab fil-proċess
li tiżviluppa oħrajn. Kieku kellhom jimmaterjalizzaw
il-benefiċċji kbar li joffru, ikun meħtieġ li nżidu
r-ritmu li bih ikunu għaddejjin in-negozjati u r-ratifika.
2.5.
Nisfruttaw il-potenzjal tal-iffinanzjar tal-UE
għat-tkabbir meħtieġ mill-Ewropa
Hemm bżonn ta' infiq
u investimenti pubbliċi mmirati anke fi żminijiet ta' konsolidazzjoni
fiskali stretta. Il-Kummissjoni kienet qed tinkoraġġixxi
l-konsolidazzjoni li tiffavorixxi t-tkabbir, waqt li
tħeġġeġ lill-Istati Membri biex jipproteġu l-infiq li
jsir fuq ir-riċerka, l-edukazzjoni, il-ġestjoni sostenibbli
tar-riżorsi naturali, l-enerġija u s-servizzi soċjali. Minkejja
li l-baġit tal-UE huwa żgħir u jammonta għal 1 % biss
mill-PDG tal-UE, huwa joffri valur miżjud enormi u jista' jservi ta' katalizzatur
għat-tkabbir mal-Ewropa kollha. ·
Il-qafas finanzjarju multiannwali
għall-perjodu 2014-2020:
il-Kummissjoni ppreżentat xi proposti biex jiġi allokat baġit
għat-tkabbir u l-investimenti tal-UE għall-perjodu finanzjarju li
jmiss. Il-proposti tal-Kummissjoni jorbtu r-rakkomandazzjonijiet
speċifiċi għall-pajjiżi ta' riforma strutturali
mal-appoġġ tal-baġit tal-UE maħsub biex jgħin
lill-Istati Membri jagħmlu t-tibdil u l-investimenti neċessarji.
Il-proposti jinkludu ideat innovattivi ddedikati għall-finanzjament
tar-riċerka u tal-innovazzjoni, għall-kollegament tal-Ewropa permezz
ta' rabtiet fl-oqsma tat-trasport, tal-enerġija u tal-broadband u
għall-imodernizzar tal-politika agrikola u għat-tisħiħ
tal-iżvilupp rurali. Aktar minn EUR 600 biljun mill-baġit propost
mill-Kummissjoni jistgħu jmorru biex jiġu ffinanzjati r-riċerka,
in-netwerks trans-Ewropej, l-investiment fil-kapital uman, il-politika ta'
koeżjoni u l-iżvilupp rurali. Meta dan l-ammont jiġi kkombinat
mal-effett ta' ingranaġġ tal-kofinanzjament nazzjonali u mal-użu
ta' strumenti finanzjarji innovattivi, huwa jirrappreżenta baġit
ewlieni għal tkabbir intelliġenti, sostenibbli u inklużiv. Il-Kummissjoni
pproponiet li jintużaw il-bonds tal-proġetti biex jiġu
ffinanzjati ċerti proġetti ta' infrastruttura u biex javvanza
l-iffinanzjar tal-għotjiet mill-baġit tal-UE. Il-bonds
tal-proġetti huma mfassla biex jistabbilixxu s-swieq tal-obbligazzjonijiet
bħala sors addizzjonali ta' ffinanzjar għall-proġetti ta'
infrastruttura u biex jistimolaw l-investiment fl-infrastruttura
strateġika ewlenija tal-UE fl-oqsma tat-trasport, tal-enerġija u
tal-broadband. L-għan huwa li jiġu attirati l-investituri
istituzzjonali lejn l-iffinanzjar mis-swieq kapitali ta' proġetti li jkunu
kummerċjalment vijabbli u li jkollhom flussi ta' flus stabbli u
previdibbli, billi tittejjeb il-kwalità tal-kreditu tal-bonds tal-proġetti
maħruġa minn kumpaniji privati. Sabiex teżamina dan
l-approċċ, il-Kummissjoni pproponiet bonds għal proġett
pilota għall-perjodu 2012-2013. Il-koleġiżlaturi qed
jaġixxu malajr biex din is-sena, il-BEI jkun jista' jippromwovi xi
proġetti pilota. ·
Il-baġit tal-UE għall-2013: il-Kummissjoni pproponiet żieda neċessarja ta' 7 %
f'approprjazzjonijiet għal pagamenti biex tkun tista' tissodisfa t-talbiet
tal-Istati Membri għall-pagament mistenni. Din iż-żieda
għadha taħt il-limitu massimu għall-approprjazzjonijiet
għal pagamenti miftiehem skont il-qafas finanzjarju attwali tal-UE. Dawn
il-pagamenti kollha se jmorru biex jagħtu sostenn lill-investiment
produttiv, lill-appoġġ għall-impjiegi u t-taħriġ u
lill-finanzjament għar-riċerka fl-Istati Membri. F'ċerti Stati
Membri, il-fondi tal-UE jikkofinanzjaw iktar minn 50 % tal-investiment
pubbliku totali, u għalhekk il-fatt li wieħed ikun jista' jonora
l-impenji tal-UE jirrappreżenta mod importanti ta' kif jiġi promoss
it-tkabbir. ·
L-immirar tal-Fondi Strutturali lejn it-tkabbir
u l-konverġenza fil-perjodu 2012-2013:
il-politika ta' koeżjoni tal-UE timmobilizza medja ta' EUR 65 biljun
fis-sena għall-investimenti li jagħtu sostenn lit-tkabbir u
lill-ħolqien tal-impjiegi. Sabiex jiġu ttrattati aħjar
il-ħtiġijiet li jirriżultaw mill-kriżi, ġew
ipprogrammati mill-ġdid EUR 17-il biljun, f'bidla notevoli tal-fondi
favur ir-riċerka u l-innovazzjoni, l-appoġġ għall-SMEs u
l-miżuri fis-suq tax-xogħol għall-persuni vulnerabbli, flimkien
ma' investimenti fl-infrastruttura u fl-effiċjenza tal-enerġija. Dawn
l-isforzi se jkomplu għaddejjin. Aktar reċentement, 'il fuq minn
EUR 7 biljun ġew ipprogrammati mill-ġdid bħala parti
mill-isforz tal-grupp tal-azzjoni pilota tal-Kummissjoni biex jiżdiedu
l-appoġġ għall-ġlieda kontra l-qgħad fost
iż-żgħażagħ u l-aċċess tal-SMEs
għall-finanzjament. ·
Iż-żieda fil-kapital imħallas
tal-Bank Ewropew tal-Investiment (BEI): sabiex ikun
konformi ma' prassi bankarja soda, il-BEI jeħtieġ żieda
fil-kapital imħallas tiegħu, jekk irid iżomm il-livell
għoli tal-attività annwali ta' self li għandu bħalissa għal
madwar EUR 65 biljun fis-sena. Hekk kif kienet ipproponiet il-Kummissjoni,
għandu jkun hemm qbil bejn il-partijiet interessati tal-Istati Membri dwar
iż-żieda ta' EUR 10 biljun f'kapital imħallas, bħala
parti mill-inizjattiva l-ġdida tal-UE għat-tkabbir. Dan il-fattur
iżid sostanzjalment is-self ġenerali b'massimu ta' EUR 180
biljun. Is-self addizzjonali li jkun permissibbli ladarba jkun hemm tali
żieda fil-kapital, għandu jinxtered mal-UE kollha, anke mal-aktar
pajjiżi vulnerabbli. Dan is-self għandu jkun maħsub biex
jgħin lis-settur tal-SMEs, inklużi f'dawk l-oqsma
bħall-effiċjenza fl-enerġija u r-rinovazzjoni residenzjali li
jistgħu jiġġeneraw l-impjiegi ferm meħtieġa fis-settur
tal-kostruzzjoni li ntlaqat ħażin u jgħin lill-UE tilħaq
l-għanijiet tagħha fir-rigward tal-klima u tal-enerġija. Jekk
jinstab qbil dwar din iż-żieda fil-kapital, il-Kummissjoni se
taħdem flimkien mal-Istati Membri biex tgħinhom jużaw parti
mill-allokazzjonijiet tal-fond strutturali tagħhom biex jaqsmu r-riskju
tas-self tal-BEI u biex jipprovdu garanziji għas-self lill-SMEs. Din
it-taħlita ta' strumenti finanzjarji tista' tagħti spinta
lill-attività ekonomika mas-setturi u r-reġjuni kollha u tgħin
lill-SMEs jegħlbu n-nuqqas ta' aċċess għall-kreditu li qed
ixekkilhom bħalissa. ·
Taxxa fuq it-tranżazzjonijiet finanzjarji: il-Kummissjoni pproponiet il-ħolqien ta' taxxa fuq
it-tranżazzjonijiet finanzjarji. F'konformità mal-proposta tagħha[4],
ir-rikavat minn taxxa bħal din (stmat għal madwar EUR 57 biljun)
jista' jintuża biex jiffinanzja l-investiment li jsaħħaħ
it-tkabbir u/jew ir-rikapitalizzazzjoni tal-banek. Il-Kummissjoni pproponiet li
wħud mir-rikavati li jkunu sejrin għall-baġit tal-UE, għandhom
jintużaw biex inaqqsu l-kontribuzzjonijiet tal-Istati Membri
għall-baġit tal-UE.
3.
Ir-Rwol tal-Istati Membri f'inizjattiva ġdida għat-tkabbir
3.1.
Nisfruttaw il-potenzjal tas-Semestru Ewropew 2012
Sabiex navviċinaw
l-għanijiet tal-istrateġija Ewropa 2020, il-Kummissjoni bagħtet
lill-Kunsill, rakkomandazzjonijiet immirati għal kull Stat Membru,
bħala parti mis-Semestru Ewropew 2012 u mill-Patt ta' Stabbiltà u Tkabbir
li ġie msaħħaħ iktar. Dawn ir-rakkomandazzjonijiet issawru
fuq analiżi fil-fond tas-sitwazzjoni ta' kull Stat Membru, fuq
l-implimentazzjoni tagħhom tar-rakkomandazzjonijiet tas-Semestru Ewropew
2011[5]
u fuq kif ġiet segwita l-gwida tal-Istħarriġ Annwali dwar
it-Tkabbir 2012[6] fl-Istati Membri. Kull
Stat Membru għandu l-partikolaritajiet tiegħu u r-rakkomandazzjonijiet
tal-Kummissjoni speċifiċi għall-pajjiżi tfasslu apposta
biex ikunu jistgħu jqisu s-saħħiet tagħhom,
id-dgħufijiet tagħhom kif ukoll il-kapaċità tagħhom li
jindirizzaw l-isfidi. Madankollu, l-ekonomiji tal-Istati Membri kollha huma marbuta
ferm ma' xulxin – mhux biss permezz ta' għażla politika, tal-istorja
u tal-ġeografija, iżda wkoll permezz tal-potenzjal dinamiku li
rriżulta minn teknoloġiji ġodda li jintegraw is-swieq flimkien
aktar malajr bħal qatt qabel. Hija din l-akkumulazzjoni tas-sitwazzjonijiet
nazzjonali li tifforma d-direzzjoni ġenerali tal-UE. L-azzjonijiet
nazzjonali (jew in-nuqqas ta' azzjoni) se jkollhom inevitabbilment konsegwenzi
pożittivi u negattivi fuq il-kumplament tal-UE, u għaldaqstant hemm
il-ħtieġa ta' sistema ta' governanza ekonomika mifruxa mal-UE kollha
li tiġi implimentata permezz tas-Semestru Ewropew (ara l-Anness 1). Għall-ewwel
darba, il-Kummissjoni wettqet ukoll analiżi fil-fond ibbażati fuq
il-proċedura tal-iżbilanċi makroekonomiċi[7].
Din il-proċedura ġiet imfassla b'tali mod li tiffavorixxi
l-istabbiltà u t-tkabbir makroekonomiċi ġenerali u biex isservi ta'
lieva għal kompetittività ikbar. L-ewwel rapport dwar il-mekkaniżmu
ta' twissija, li ġie ppublikat fi Frar, sar bl-użu ta' din
il-proċedura. F'konformità mas-sejbiet li ħarġu minn dan
ir-rapport, saret l-ewwel sensiela ta' analiżi fil-fond li jkopru tnax-il
pajjiż (il-Belġju, il-Bulgarija, id-Danimarka, Spanja, Franza,
l-Italja, Ċipru, l-Ungerija, is-Slovenja, il-Finlandja, l-Isvezja u
r-Renju Unit)[8]. Dawn ikkonfermaw
l-eżistenza ta' xi żbilanċi li minkejja li mhumiex
eċċessivi xorta waħda jirrikjedu attenzjoni partikolari;
inkluż il-kontinwità tal-proċess ta' bbilanċjar mill-ġdid
bejn il-pajjiżi li għandhom surplus u dawk li għandhom
defiċit, li għaddej bħalissa. Ir-rakkomandazzjonijiet ta'
prevenzjoni huma inklużi fir-rakkomandazzjonijiet speċifiċi
għall-pajjiżi li jkopru politiki li jappoġġjaw
il-kompetittività u l-aġġustament fis-suq tax-xogħol,
il-proċess ta' tnaqqis tad-dejn mis-setturi privati u pubbliċi kif
ukoll l-iżviluppi stabbli fis-swieq tal-assi. .
3.2.
Il-valutazzjoni u r-rakkomandazzjonijiet
tal-Kummissjoni
Il-valutazzjoni
ġenerali tal-Kummissjoni hija li l-Istati Membri qed jieħdu l-azzjoni
neċessarja biex jikkoreġu l-iżbilanċi fil-finanzi pubbliċi
tagħhom u biex jiżguraw sostenibbiltà fiskali, iżda li dawn
l-azzjonijiet mhux dejjem qed ikunu orjentati favur it-tkabbir. Il-qgħad,
b'mod partikolari fost iż-żgħażagħ, huwa problema
serja ħafna li tista' biss tissolva maż-żmien, iżda
jeħtieġ li tittieħed azzjoni immedjata biex jiżdiedu
l-impjiegi u l-produttività u biex jiġi pprovdut tqabbil ta'
xogħlijiet u ħiliet aktar b'saħħtu, li jgħin lin-nies
jerġgħu lura lejn id-dinja tax-xogħol fi swieq tax-xogħol
li jiffunzjonaw tajjeb. B'mod aktar ġenerali, għandu jiġi
indirizzat l-impatt soċjali negattiv li rriżulta mill-kriżi,
inklużi l-livelli ta' faqar. Diversi
Stati Membri, partikolarment il-pajjiżi li għaddejjin minn programm
ta' aġġustament strutturali u dawk li huma sottomessi għal
skrutinju mill-qrib tas-suq tagħhom, qed jagħmlu riformi strutturali
kbar, inkluż tas-swieq tax-xogħol tagħhom. Dawn l-isforzi huma
essenzjali biex isostnu l-irkupru u t-tkabbir dejjiemi u biex jikkontribwixxu
għat-tnaqqis ġenerali tal-iżbilanċi makroekonomiċi
fl-Ewropa. Madankollu, jeħtieġ li tittieħed azzjoni ħafna
akbar li tkun mifruxa mal-UE kollha, biex nilliberaw il-potenzjal tagħna
ta' tkabbir, biex jinbtu opportunitajiet għall-iżvilupp tan-negozji,
biex nisfruttaw il-potenzjal ta' sorsi ġodda ta' xogħlijiet,
bħal pereżempju fl-ekonomija ekoloġika, fis-servizzi,
fis-setturi tal-enerġija, fit-turiżmu u fl-ekonomija diġitali,
kif ukoll biex ngħollu l-livelli tal-ħiliet u tal-innovazzjoni.
L-azzjoni hija meħtieġa b'mod urġenti sabiex tkun ta' sostenn
għall-irkupru u għall-istandards ta' għajxien u biex
tiffaċilita l-indirizzar tal-isfidi tat-tixjiħ. Il-Kummissjoni
tinsab imħassba dwar il-fatt li l-livell tal-impenji meħuda
mill-Istati Membri mhux se jippermetti lill-UE tilħaq il-miri nominali
tagħha għall-2020 f'oqsma essenzjali bħalma huma r-rati
tal-impjiegi, ir-R&Ż, l-edukazzjoni u l-ġlieda kontra l-faqar.
Minkejja dan, il-kisba ta' dawn il-miri hija fundamentali għall-futur
tal-Ewropa. X'għandhom
jagħmlu l-Istati Membri biex jilliberaw il-potenzjal ta' tkabbir
tagħhom stess? Fl-Istħarriġ
Annwali dwar it-Tkabbir 2012, il-Kummissjoni indikat li fl-2012, l-isforzi
fil-livell nazzjonali kif ukoll f'dak tal-UE għandhom jikkonċentraw
fuq ħames prijoritajiet: ·
Issir ħidma li twassal għal
konsolidazzjoni fiskali differenzjata li tiffavorixxi t-tkabbir. ·
Jerġa' jibda jsir self normali lill-ekonomija. ·
Jiġu promossi t-tkabbir u l-kompetittività
għal-lum u għall-ġejjieni. ·
Jiġu indirizzati l-qgħad u l-konsegwenzi
soċjali tal-kriżi. ·
Tiġi mmodernizzata l-amministrazzjoni
pubblika. Din it-taqsima tiddeskrivi
fil-qosor is-sejbiet ewlenin tal-analiżi li wettqet il-Kummissjoni
għal kull pajjiż, ibbażata fuq il-programmi ta' Stabbiltà u ta'
Konverġenza tal-Istati Membri, fuq il-programmi nazzjonali ta' riforma u,
fejn relevanti, fuq l-impenji tal-Patt Euro Plus. Il-kaxxa tat-test fil-bidu
ta' kull taqsima tiddeskrivi fil-qosor ir-rakkomandazzjonijiet ewlenin
speċifiċi għall-pajjiżi u tindika kif l-implimentazzjoni
tagħhom tista' tikkontribwixxi għal prospetti ta' tkabbir nazzjonali. Issir ħidma li
twassal għal konsolidazzjoni fiskali differenzjata li tiffavorixxi
t-tkabbir Ir-rakkomandazzjonijiet speċifiċi għall-pajjiżi
dwar konsolidazzjoni fiskali li tiffavorixxi t-tkabbir għandhom
l-għan li jiżguraw li, maż-żmien, l-Istati Membri kollha
jimplimentaw politiki fiskali sodi. Dawn huma konformi mal-istrateġiji
fiskali differenzjati li jieħdu inkunsiderazzjoni l-partikolaritajiet
tal-Istati Membri, speċjalment ir-riskji fiskali u makrofinanzjarji
eżistenti. L-Istati Membri qed jingħataw il-parir li jippreservaw
l-investiment pubbliku fir-riċerka u l-innovazzjoni, fl-edukazzjoni u
fl-enerġija u li joħolqu sistemi ta' protezzjoni soċjali li
jinkludu pensjonijiet aktar sostenibbli u effettivi, billi jnaqqsu
d-defiċits tal-gvern u l-livelli tad-dejn. Hemm diversi
rakkomandazzjonijiet dwar it-tassazzjoni, maħsuba biex inaqqsu l-piż
minn fuq ix-xogħol u jitrasferixxuh fuq l-ambjent u l-konsum, biex
iżidu l-effiċjenza billi jitneħħew varji eżenzjonijiet
(inklużi r-rati mnaqqsa) kif ukoll biex jiġġieldu kontra
l-evażjoni tat-taxxa u l-ekonomija klandestina. L-Istati Membri qed
jiġu rakkomandati wkoll li jiggarantixxu dixxiplina baġitarja
f'livelli subnazzjonali. Skont
il-Patt ta' Stabbiltà u Tkabbir, 23 Stat Membru bħalissa huma
soġġetti għall-proċedura ta' defiċit
eċċessiv. Għalihom, ir-rakkomandazzjonijiet speċifiċi
għall-pajjiżi f'dan il-pakkett, jirriflettu l-ħtieġa
għall-osservanza tar-rakkomandazzjonijiet korrettivi li nħarġu
preċedentement mill-Kunsill. Fil-każ tal-Ġermanja u
tal-Bulgarija, fit-30 ta' Mejju l-Kummissjoni ddeċidiet
separatament li tipproponi t-tħassir tas-sitwazzjoni tagħhom ta'
defiċit eċċessiv. Barra minn hekk, b'segwitu
għall-valutazzjoni tal-azzjoni meħuda mill-Ungerija u f'konformità
mad-dispożizzjonijiet tar-regolament dwar il-Fond ta' Koeżjoni
tal-UE, il-Kummissjoni adottat ukoll proposta għal deċiżjoni
tal-Kunsill biex titneħħa s-sospensjoni tal-impenji tal-Fond ta'
Koeżjoni ta' Marzu 2012.
Għall-Istati Membri li ma jagħmlux parti
mill-proċedura ta' defiċit eċċessiv, ir-rakkomandazzjonijiet
speċifiċi għall-pajjiżi jinkoraġġixxu
l-awtoritajiet biex jimplimentaw pjanijiet fiskali kemm li jifavorixxu
t-tkabbir kif ukoll li jkollhom l-għan li jiksbu u li jżommu
pożizzjonijiet baġitarji li jiggarantixxu sostenibbiltà fit-tul
tal-finanzi pubbliċi, inklużi l-ispejjeż tat-tixjiħ. L-analiżi
tal-Kummissjoni tindika li l-Istati Membri mexjin tajjeb bl-isforzi
tagħhom għal konsolidazzjoni fiskali, li qed inaqqsu d-defiċits
tal-gvern. Dawn id-defiċits għandhom jonqsu minn 4.5 % fl-2011
għal 3.5 % fl-2012. Madankollu, il-proporzjoni tad-dejn tal-gvern
għadu qed jogħla, tant li se jilħaq 86 % tal-PDG fl-2012, u
r-raġuni għal dan hija r-rata aktar baxxa fit-tkabbir. Il-Kummissjoni
tqis li huwa essenzjali li jinżammu l-iskadenzi miftiehma għall-korrezzjoni
tad-defiċits eċċessivi u li jsir ċaqliq rapidu li
javviċina l-objettivi fiskali ta' terminu medju speċifikati
mill-Kunsill. Aġġustamenti fiskali bħal dawn għandhom
jitwettqu b'tali mod li jkunu jappoġġjaw tkabbir ekonomiku aktar sostenibbli,
hekk kif se jiġi deskritt hawn taħt. Dan it-tkabbir jikkonforma
mal-Patt ta' Stabbiltà u Tkabbir, li jippermetti li jitħaddmu
stabilizzaturi awtomatiċi matul l-aġġustament strutturali li
jwassal għall-korrezzjoni ta' defiċits eċċessivi u
għall-kisba eventwali tal-objettivi ta' terminu medju. Fl-istess ħin,
huwa jenfasizza l-ħtieġa li l-Istati Membri li qed
jiffaċċjaw skrutinju tas-suq mill-aktar intensi, jaħdmu
għal konsolidazzjoni ambizzjuża li saħansitra tisfida ambjent
makroekonomiku agħar milli jkun mistenni. Dawk il-pajjiżi li
ħerġin mill-proċedura ta' defiċit eċċessiv qed
jiġu rakkomandati jużaw l-ispazju fiskali disponibbli
għall-investiment li jsaħħaħ it-tkabbir. Qed jiġu
introdotti oqfsa fiskali nazzjonali msaħħa, kif meħtieġ
mil-leġiżlazzjoni tal-UE. Madankollu, jeħtieġ li jsiru
sforzi speċifiċi biex jiġi żgurat li d-dixxiplina fiskali
fil-livell tal-gvern ċentrali titpatta minn azzjoni effettiva simili li
żżomm il-finanzi pubbliċi taħt kontroll f'livelli
subnazzjonali wkoll. Dan jirrappreżenta sfida partikolari f'diversi
pajjiżi federali jew reġjonalizzati. Se jkun importanti
li jsir titjib fil-kwalità tal-finanzi pubbliċi, billi tiġi
prijoritizzata n-nefqa fil-miri tal-Ewropa 2020 u billi jiġi żgurat
li tali nefqa tkun kemm jista' jkun effiċjenti. Il-kontroll tal-UE
tal-għajnuna mill-Istat jgħin biex jippromwovi l-infiq ta' kwalità u
biex jimminimizza t-tfixkil. Reċentement, il-Kummissjoni nediet proposta
ambizzjuża ta' modernizzazzjoni tal-għajnuna mill-Istat u
l-Istati Membri se jkollhom bżonn jiżguraw konformità aħjar
mar-regoli u koordinazzjoni interna aħjar tal-interventi ta' għajnuna
mill-Istat fil-livell nazzjonali. Is-sistemi
tal-pensjonijiet qed jiġu adattati biex jikkonfrontaw l-isfidi
tat-tixjiħ tal-popolazzjoni, permezz tal-implimentazzjoni f'diversi
pajjiżi, ta' riformi kbar li l-karatteristika komuni tagħhom hija li
jtawlu l-ħajja tax-xogħol. Dawn ir-riformi huma essenzjali biex
jitrażżnu l-ispejjeż finanzjarji u biex tiġi żgurata
sostenibbiltà finanzjarja fit-tul ta' sistemi xierqa ta' protezzjoni
soċjali. Fl-istess waqt, huwa neċessarju li l-ħaddiema anzjani
jiġu attirati lejn l-impjieg u li jinżammu jaħdmu lil hinn
mill-mudelli ta' rtirar attwali, f'konformità mat-titjib fl-istennija
tal-għomor, u li jitqies il-livell tal-pensjonijiet, biex jiġi evitat
li l-anzjani jispiċċaw vittmi tal-faqar. Sar inqas progress fil-qasam
tas-sistemi tal-kura tas-saħħa, fejn il-ħtieġa
tal-aċċess għall-kura tas-saħħa u għal kura
fit-tul trid tiġi bbilanċjata mal-pressjoni finanzjarja illi dejjem
tiżdied, li tirriżulta mill-iżviluppi demografiċi. Diversi Stati Membri qed iżidu
t-taxxi biex jappoġġjaw il-konsolidazzjoni fiskali.
Il-Kummissjoni talbet li titneħħa t-tassazzjoni minn fuq
ix-xogħol biex tiġi ttrasferita fuq prattiki, konsum u proprjetà
immobbli li jagħmlu ħsara lill-ambjent, filwaqt li jiġi
żgurat li l-piż ma jaqax b'mod sproporzjonat fuq l-aktar sezzjonijiet
fqar tas-soċjetà. Waqt li għadd ta' Stati Membri żiedu b'mod
sinifikanti t-taxxi fuq il-konsum u bdew ireġġgħu lura
t-tendenza negattiva tat-tassazzjoni ambjentali, ma hemmx evidenza li kien hemm
tnaqqis ġenerali fit-tassazzjoni fuq ix-xogħol. Qed isiru xi sforzi
u għandu jkun hemm aktar biex jiġu eliminati l-eżenzjonijiet
mit-taxxa u s-sussidji, kif ukoll ir-rati mnaqqsa bħal pereżempju
għall-VAT. Qed tittieħed azzjoni biex tittejjeb il-konformità
mat-taxxa iżda għall-ġlieda kontra l-ekonomija klandestina,
jeħtieġ li jkun hemm azzjoni aktar b'saħħitha. Jerġa' jibda
jsir self normali lill-ekonomija Sabiex jerġa' jibda jsir self normali lill-ekonomija,
ir-rakkomandazzjonijiet speċifiċi għall-pajjiżi qed
jiffukaw fuq it-tlestija tar-ristrutturar tas-settur bankarju filwaqt li
jiġi evitat proċess ta' tnaqqis eċċessiv tad-dejn. Qed isiru sforzi biex
titkompla l-ħidma fuq ir-ristrutturar tas-settur finanzjarju u biex
jissaħħaħ il-qafas superviżorju, f'konformità
mal-leġiżlazzjoni tal-UE u mar-rakkomandazzjonijiet. Is-sitwazzjoni
ta' dawk il-banek li ġew esposti l-aktar għall-kriżi u li
għadhom vulnerabbli għadha sors ta' tħassib. Dan il-fatt
jispjega għalfejn fir-rakkomandazzjonijiet ta' ċerti pajjiżi qed
jintalab li jittieħdu aktar miżuri ta' ristrutturar u ta'
prekawzjoni. Li jerġa'
jiġi stabbilit livell normali ta' flussi ta' kreditu għadu
jirrappreżenta sfida f'ħafna pajjiżi, partikolarment
għall-SMEs. Filwaqt li dan huwa parzjalment spjegat mid-dgħufija
tal-karti tal-bilanċ u tal-prospetti korporattivi, il-fatt li kien hemm
nuqqas ta' mezzi xierqa li jilħqu lill-SMEs ukoll kellu rwol importanti.
Għandhom jiġu promossi gruppi ġodda ta' kapital, inkluż l-aċċess
għal self bejn il-pari, għall-ekwità privata u għall-kapital
tar-riskju. F'ċerti Stati Membri, il-fondi strutturali tal-UE jista'
jkollhom rwol importanti f'dan il-kuntest billi jiffinanzjaw is-selfiet u
l-garanziji permezz ta' strumenti speċifiċi. Bosta SMEs qed ibatu
minħabba pagamenti tard mill-awtoritajiet pubbliċi. Din il-problema
qed tiġi indirizzata mid-Direttiva l-ġdida dwar il-pagamenti tard, li
se tidħol fis-seħħ f'Marzu tal-2013. Qabel id-dħul fis-seħħ
tad-Direttiva, jista' jkun hemm bżonn ta' sforzi addizzjonali
min-naħa tal-awtoritajiet pubbliċi biex jinqata' x-xogħol b'lura
li kien akkumula fir-rigward tal-arretrati. Jiġu promossi
t-tkabbir u l-kompetittività għal-lum u għall-ġejjieni Sabiex jgħinu fil-promozzjoni tat-tkabbir u tal-kompetittività,
ir-rakkomandazzjonijiet speċifiċi għall-pajjiżi qed
jiffukaw fuq l-ambjent tan-negozju, anke billi jitnaqqas il-piż
amministrattiv u billi jiġu estiżi l-industriji tan-netwerks
bħalma huma dawk tal-enerġija, tar-rotot ferrovjarji u tat-telekomunikazzjonijiet
għall-kompetizzjoni biex joffru servizzi aħjar għan-negozji u
għaċ-ċittadini. F'ċerti każijiet, huma jirrakkomandaw
iktar indipendenza għar-regolaturi. Huma jindirizzaw l-implimentazzjoni
tad-Direttiva dwar is-Servizzi billi jitneħħew restrizzjonijiet mhux
ġustifikati jew sproporzjonati fuq l-għoti ta' servizzi, inkluża
d-diskriminazzjoni bbażata fuq in-nazzjonalità jew ir-residenza. Jitrattaw
ukoll restrizzjonijiet li hemm bħalissa fis-settur fil-livell tal-konsumaturi.
Rakkomandazzjonijiet oħrajn jittrattaw it-tisħiħ
tar-riċerka u l-innovazzjoni, it-titjib tal-effiċjenza
fir-riżorsi, u l-irbit aktar mill-qrib tal-edukazzjoni mar-rekwiżiti
tas-suq tax-xogħol. F'ħafna Stati Membri,
ċerti servizzi mhumiex aċċessibbli biżżejjed.
Implimentazzjoni aktar ambizzjuża tad-Direttiva dwar is-Servizzi tkun
tgħin, hekk kif jgħinu miżuri għat-tisħiħ
tal-kompetizzjoni u tal-kompetittività fis-settur fil-livell tal-konsumaturi,
biex jitnaqqsu l-ostakli għad-dħul u l-ħruġ ta' ditti u
biex jiġu eliminati restrizzjonijiet mhux ġustifikati
għas-servizzi ta' negozju u dawk professjonali, għall-professjonijiet
legali, għall-konsultazzjoni kontabilistika jew teknika u għas-settur
tas-saħħa u dak soċjali. L-espansjoni tas-swieq ta' akkwist
pubbliku permezz ta' tiftix attiv għal offerti transkonfinali, tkun
tistimola wkoll opportunitajiet, proċessi u innovazzjonijiet ġodda. Jeħtieġ li jsir
titjib sostanzjali fil-prestazzjoni tal-industriji tan-netwerks ewlenin
- it-trasport, l-enerġija u l-broadband. L-investiment fl-infrastrutturi
huwa neċessarju f'diversi pajjiżi biex jittejbu
l-interkonnessjonijiet, biex tiġi estiża l-fornitura u biex tkun
possibbli l-kompetizzjoni fil-prezz. Minħabba li l-opportunitajiet fiskali
biex jinbidlu l-pjanijiet huma limitati, għandhom jintużaw forom
innovattivi ta' finanzjament li jikkombinaw sorsi privati u pubbliċi,
bħall-bonds tal-proġetti tal-UE. Il-livelli tal-kompetizzjoni
għadhom baxxi f'ħafna swieq u l-qafas regolatorju mifrux mal-UE
kollha għadu mhux kompletament fis-seħħ: nofs l-Istati Membri
għadhom ma ttrasponewx id-Direttivi dwar is-Suq Intern tal-Enerġija
jew ma rnexxielhomx jittrasponuhom kif suppost. Diversi Stati Membri
jeħtieġu kompetizzjoni ikbar bejn il-fornituri tal-enerġija,
it-tneħħija tal-prezzijiet regolati u iktar indipendenza
għar-regolaturi. Huwa neċessarju li jsiru sforzi ulterjuri
fit-trasport biex jitnaqqsu l-piż regolatorju u l-ostakli
għad-dħul fis-settur ferrovjarju fl-Istati Membri l-kbar jew f'dawk
ta' tranżitu. L-aċċessibbiltà medja tal-broadband għadha baxxa
u hemm lok konsiderevoli għal titjib fis-servizzi u għal sigurtà
fl-użu tal-kummerċ elettroniku. It-titjib
fl-effiċjenza tar-riżorsi u l-avviċinament lejn ekonomija
b'livell baxx ta' emissjonijiet tal-karbonju huma essenzjali biex tiġi
żviluppata ulterjorment il-kompetittività tal-Ewropa, fid-dawl
tal-iskarsezza tar-riżorsi li dejjem qed tiżdied u tal-volatilità
fil-prezzijiet, kif ukoll tat-tibdil fil-klima li għaddej bħalissa.
L-użu aktar effiċjenti tar-riżorsi u ġestjoni aħjar
tar-riżorsi naturali se jiftħu opportunitajiet ekonomiċi
sinifikanti għat-tkabbir futur u għall-impjiegi, u dan se jwassal
għal produttività aħjar, għal spejjeż inqas u għal
iktar innovazzjoni. Huma essenzjali livelli
għolja ta' R&Ż u ta' innovazzjoni biex tinżamm
il-kompetittività tal-Ewropa. Anke jekk xi wħud mill-Istati Membri
tagħha llum il-ġurnata jinsabu fost il-mexxejja dinjin f'diversi
oqsma, l-Ewropa inġenerali qed tibda taqa' lura maż-żmien. Flok
ma ġiet separata jew miżjuda, in-nefqa pubblika fuq ir-riċerka
ġiet milquta mill-konsolidazzjoni fiskali f'ħafna Stati Membri.
Jidher biċ-ċar li hemm bżonn ta' investiment privat addizzjonali
fir-R&Ż u fejn ikun meħtieġ dan għandu jiġi
mħeġġeġ permezz ta' inċentivi pubbliċi.
Ir-riżultati tar-riċerka għandhom jitressqu viċin tas-suq
permezz tal-akkwist prekummerċjali. B'mod aktar ġenerali, bla dubju
hemm ħtieġa għal aktar sħubiji bejn l-edukazzjoni u
l-istituzzjonijiet iddedikati għat-tagħlim tul il-ħajja,
l-entitajiet tar-riċerka u n-negozji, biex isir użu sħiħ
tal-istrumenti tal-UE li hemm għad-dispożizzjoni. Jiġu
indirizzati l-qgħad u l-konsegwenzi soċjali tal-kriżi Bosta rakkomandazzjonijiet jitrattaw il-ħolqien ta'
kundizzjonijiet għal-livelli ogħla ta' impjiegi, li jżidu
l-parteċipazzjoni u jżommu lin-nies fis-suq tax-xogħol. L-aktar
punti enfasizzati huma l-ġlieda kontra l-qgħad fost
iż-żgħażagħ, it-tnaqqis tat-tluq bikri mill-iskola u
t-titjib tat-taħriġ, inkluż it-taħriġ vokazzjonali u
t-titjib tal-apprentistati. Diversi rakkomandazzjonijiet jindirizzaw
it-tnaqqis tal-faqar u l-għajnuna għall-gruppi vulnerabbli. Hemm
ukoll rakkomandazzjonijiet dwar għoti ta' appoġġ aktar
b'saħħtu u aktar personalizzat lil dawk li jkunu qed ifittxu impjieg
u dwar il-promozzjoni tal-parteċipazzjoni tan-nisa fuq bażi
full-time. L-Istati Membri huma rakkomandati wkoll jiżguraw li
l-mekkaniżmi tagħhom għall-iffissar tal-pagi jirriflettu kif
xieraq l-iżviluppi tal-produttività u jistimulaw il-ħolqien
tax-xogħol. Il-kriżi wasslet
għal żieda sinifikanti fir-rata tal-qgħad u ggravat
konsiderevolment il-prospetti ta' xogħol għal ħafna nies, li
qegħdin fir-riskju li jkollhom jirtiraw mis-suq tax-xogħol. Aktarx li
l-livelli għolja ta' qgħad se jibqgħu hekk għal ċertu
żmien minħabba d-diskrepanza fiż-żmien li hemm bejn
l-irkupru ekonomiku u t-titjib fis-suq tax-xogħol. Qed jiġu
mobilizzati politiki attivi fis-suq tax-xogħol - bħal
taħriġ għall-qiegħda u gwida mis-servizzi pubbliċi
għall-impjiegi - iżda ħafna drabi dawn ikunu batuti
minħabba immirar dgħajjef u nuqqas ta' effettività. Il-konsegwenzi
soċjali tal-kriżi qed jintħassu dejjem aktar. Il-faqar u
r-riskju tal-faqar qed jiżdiedu u l-pressjonijiet fuq l-infiq pubbliku qed
jirriżultaw f'kompromessi diffiċli għall-għoti ta' servizzi
u ta' benefiċċji soċjali. Il-qgħad fost
iż-żgħażagħ żdied drastikament, fejn
iż-żgħażagħ għandhom ċans doppju li
jispiċċaw qiegħda meta mqabbla mal-popolazzjoni adulta. Mal-UE
kollha, ir-rata tal-qgħad fost iż-żgħażagħ hija
ta' 22 % u f'ċerti Stati Membri tasal saħansitra sa 50 %. Hemm
xi esperjenzi promettenti bil-garanziji għaż-żgħażagħ
li jistgħu jiġu implimentati mal-UE kollha, anke bl-appoġġ
mill-Fond Soċjali Ewropew. Ma kienx hemm
biżżejjed progress fl-espansjoni ta' faċilitajiet tajbin
għall-but ta' kulħadd li jindukraw lit-tfal u lill-persuni
dipendenti, fit-tnaqqis tad-differenzi fil-pagi u fit-titjib tat-trattament
fiskali tat-tieni sors ta' dħul, biex tiżdied b'mod sinifikanti l-parteċipazzjoni
tan-nisa fis-suq tax-xogħol. Għad ma hemmx biżżejjed
enfażi fuq l-istrateġiji ta' tixjiħ attiv, inkluż
il-modernizzazzjoni tal-arranġamenti tax-xogħol u aċċess
usa' għat-tagħlim tul il-ħajja, li huma essenzjali
għaż-żieda fil-parteċipazzjoni tal-ħaddiema,
partikolarment għall-ħaddiema aktar anzjani. Ċerti Stati Membri
introduċew riformi mifruxa ferm tas-sistemi tagħhom tal-iffissar u
tal-indiċjar tal-pagi biex jiżguraw li maż-żmien
l-iżviluppi fil-pagi jirriflettu aħjar il-produttività. F'pajjiżi
oħra fejn il-funzjonament ta' ċerti sistemi ta' indiċjar
tal-pagi ġie identifikat bħala theddida possibbli
għall-kompetittività, il-progress li sar kien limitat. Dawn
il-pajjiżi se jkollhom bżonn isibu modi kif fil-futur,
f'konsultazzjoni ma' sħab soċjali, inaqqsu dan
l-iżvantaġġ. Xi bbilanċjar mill-ġdid li jiffavorixxi
d-domanda domestika, inkluż permezz ta' żieda fil-pagi, li sar fil-pajjiżi
li bħalissa għandhom surplus fil-kontijiet, huwa notevoli u
għandu jitkompla. Għandu jinstab bilanċ bejn l-iżgurar li
l-livelli tal-pagi ma jkunux tant għoljin li jiskoraġġixxu
r-reklutaġġ taż-żgħażagħ u ta' dawk
b'ħiliet limitati b'mod partikolari, u l-iżgurar li l-livelli ma
jkunux tant baxxi li jirriskjaw li joħolqu nasbiet ta' faqar fost dawk li
jaħdmu. Filwaqt li ċerti Stati
Membri taw bidu għal riformi mifruxa ferm tal-leġiżlazzjoni
tagħhom dwar ix-xogħol li jippermettu li jkun hemm forom aktar
flessibbli ta' kuntratti u ta' arranġamenti ta' xogħol,
f'każijiet oħra l-proċess tar-riforma jidher li għaddej
bil-mod meta mqabbel mal-urġenza tas-sitwazzjoni u mar-riskji
tas-segmentazzjoni tas-suq tax-xogħol, fejn parti kbira mill-popolazzjoni
għadha tagħmel xogħol prekarju jew tinsab barra mis-suq
tax-xogħol. Arranġamenti ta' xogħol għal żmien qasir u
prattiki interni oħra ta' flessibbiltà rriżultaw li kienu effettivi
f'diversi pajjiżi biex jiġu ppreservati l-impjiegi fl-eqqel
tal-kriżi, partikolarment fis-settur tal-manifattura. Sabiex tgħin
fl-appoġġ għall-ħolqien tax-xogħlijiet, il-Kummissjoni
għamlet xi proposti biex tinkoraġġixxi lill-Istati Membri
jsaħħu l-politiki dwar l-impjiegi[9] ħalli jkunu
jistgħu jaħtfu l-opportunitajiet ta' xogħol fl-ekonomija
ekoloġika, fis-settur tal-kura tas-saħħa u fl-ICT fejn
tikkalkula li jistgħu jinħolqu aktar minn 20 miljun impjieg. Barra
minn hekk, mobbiltà mtejba bejn l-Istati Membri, it-tqabbil tal-ħiliet u
l-postijiet tax-xogħol vakanti bejn pajjiż u ieħor jistgħu
jiġu appoġġjati mill-EURES, is-sistema tal-postijiet
tax-xogħol vakanti. Jeħtieġ li
l-isforzi li għaddejjin bħalissa biex jiġu indirizzati l-livelli
għolja ta' tluq bikri mill-iskola, inklużi l-miżuri
preventivi u r-riformi fl-edukazzjoni u fis-sistemi ta' taħriġ
vokazzjonali inklużi dawk li jagħtu spinta lill-apprentistati, isiru
aktar malajr. Dan mhux biss huwa essenzjali għall-impjegabbiltà
tal-ġenerazzjonijiet il-ġodda iżda wkoll
għall-kompetittività tal-ekonomija inġenerali, minħabba li l-UE
qed taqa' lura meta mqabbla mas-sħab kummerċjali ewlenin tagħha.
Barra minn hekk, il-bidla demografika qed toħloq riskji ġodda ta'
tqabbil ħażin tal-ħiliet u ta' nuqqasijiet, li qed iwasslu
għal pressjoni addizzjonali biex wieħed idum aktar ix-xogħol u
jkun iktar produttiv. Diversi pajjiżi jridu jagħmlu sforzi
speċifiċi biex inaqqsu l-għadd kbir ta' tfal li qed jitilqu
mill-iskola kmieni, biex itejbu l-opportunitajiet
taż-żgħażagħ fis-suq tax-xogħol u biex inaqqsu
l-qgħad fost iż-żgħażagħ. B'mod aktar
ġenerali, jeħtieġ li l-livelli kollha jtejbu l-prestazzjoni
edukattiva tagħhom, inkluż it-taħriġ vokazzjonali u
l-livell universitarju. F'ħafna mill-Istati Membri hemm lok
għall-iżvilupp tal-iskemi għall-apprentistati. Inġenerali,
għad hemm ħafna xi jsir biex l-edukazzjoni u t-taħriġ jaslu
jorbtu mal-ħtiġijiet futuri tas-suq tax-xogħol u biex dawn
jantiċipawhom bil-għan li jiffaċilitaw it-tranżizzjoni
mill-iskola għax-xogħol. Tiġi
mmodernizzata l-amministrazzjoni pubblika Ir-rakkomandazzjonijiet speċifiċi għall-pajjiżi
dwar l-amministrazzjoni pubblika jittrattaw is-servizzi mogħtija
lin-negozji, jindirizzaw id-dewmien fis-sistema legali u l-użu
tal-e-government (gvern elettroniku) biex jiġi ffaċilitat il-kuntatt
maċ-ċittadini u man-negozji. Diversi rakkomandazzjonijiet ikopru
wkoll il-kwistjoni tat-tisħiħ tal-kapaċità amministrattiva li
tittratta l-fondi tal-UE. Bħalissa l-amministrazzjonijiet
pubbliċi tal-UE kollha jinsabu taħt pressjoni: mhux biss qed
jiffaċċjaw tnaqqis fil-baġits u fil-livelli tal-personal
iżda qed ikollhom jadattaw ukoll għall-aspettattivi soċjetali u
tan-negozji li qed isiru dejjem aktar eżiġenti. Hekk kif
l-integrazzjoni politika u ekonomika miexja 'l quddiem, jeħtieġ li
jimplimentaw regoli tal-UE dejjem aktar sofistikati u eżiġenti. Amministrazzjonijiet
dgħajfa f'diversi Stati Membri jikkawżaw problemi li jvarjaw minn
diffikultajiet biex isir negozju għal implimentazzjoni fqira tal-fondi
tal-UE u traspożizzjoni fqira tal-liġi tal-UE. L-isfida li jiġu
żgurati servizzi pubbliċi ta' kwalità għolja tirrikjedi
innovazzjoni teknoloġika u organizzattiva, bħal avviċinament
determinat lejn l-użu tal-gvern elettroniku. Għadd ta'
amministrazzjonijiet jistgħu jibbenefikaw minn skambju aktar intensiv
tal-aħjar prassi. Jeħtieġ li tittejjeb l-effiċjenza
tas-sistemi tal-ġustizzja ċivili f'ħafna pajjiżi,
b'mod partikolari billi jitnaqqas ix-xogħol b'lura, billi jitħaffu
l-proċedimenti ġudizzjarji u billi jiġu introdotti forom
alternattivi ta' riżoluzzjoni tat-tilwim. Minħabba l-pressjoni li
hemm fuq il-finanzi pubbliċi, il-fondi tal-UE jikkostitwixxu lieva
essenzjali li tistimula l-ekonomija u li tiffinanzja proġetti konkreti li
jrawmu t-tkabbir f'ħafna pajjiżi. Hemm bżonn li
tissaħħaħ il-governanza tal-istituzzjonijiet pubbliċi billi
jiġi professjonalizzat ulterjorment is-servizz ċivili, billi
tittejjeb il-ġestjoni tar-riżorsi umani, billi jittejbu
l-kapaċitajiet analitiċi u billi jiġu żgurati l-kontinwità
u l-istabbiltà tal-persunal kompetenti. Ir-regoli ġew simplifikati
fil-livell tal-UE u l-Kummissjoni qed tassisti lill-Istati Membri fl-isforzi
tagħhom ta' pprogrammar mill-ġdid li jaġġustaw
il-finanzjament aktar lejn il-ħtiġijiet ta' tkabbir. Ħafna mill-Istati Membri
għandhom bżonn iżidu l-isforzi tagħhom biex jindirizzaw
il-frodi u l-evażjoni tat-taxxa. L-Istati Membri kollha għandhom xi
"ekonomiji klandestini", li jinkludu uħud li huma
żviluppati sew. Il-problemi kkawżati mill-frodi u l-evażjoni
tat-taxxa jridu jiġu indirizzati f'livelli differenti permezz ta': l-isforzi
tal-Istati Membri biex irendu s-sistema tagħhom għall-ġbir ta'
taxxi aktar effettiva; kooperazzjoni aktar b'saħħitha u effettiva
bejn l-Istati Membri; politika tal-UE ċara u koerenti fil-konfront
tal-pajjiżi terzi li tiżgura l-possibbiltà li jittieħdu
miżuri adegwati għal kontra l-frodi u l-evażjoni, li jibnu fuq
l-użu ta' ċerti ġurisdizzjonijiet mhux tal-UE li ma japplikawx
standards ekwivalenti; u politika koordinata u effettiva fir-rigward
tal-pajjiżi terzi.
4.
Konklużjonijiet
Il-kriżi żvelat
żbilanċi profondi ħafna u nuqqas milli jitwettqu r-riformi
neċessarji mal-UE kollha. Bħalma
dawn il-problemi ħadu ż-żmien biex bdew jinħassu, irid
jgħaddi ż-żmien qabel ma l-ekonomija tal-UE terġa' trabbi
bażi soda. L-analiżi li
saret għas-Semestru Ewropew 2012 turi li l-governanza ekonomika
l-ġdida tal-UE qed tibda taħdem, u li din qed tgħin lill-Istati
Membri jiffukaw fuq ir-riformi essenzjali li se jwasslu għal tkabbir
sostenibbli u għall-impjiegi. Huwa
evidenti wkoll li fid-deċiżjonijiet tagħhom dwar
il-konsolidazzjoni fiskali, l-Istati Membri mhux dejjem qed jagħżlu
t-toroq li l-aktar jifavorixxu t-tkabbir. B'mod ġenerali, hemm
bżonn li fit-tnax-il xahar li ġejjin, il-miżuri ta' tkabbir
jingħataw prominenza u urġenza ikbar, filwaqt li titkompla
l-ħidma fuq il-konsolidazzjoni u l-istabbilizzazzjoni fiskali tas-settur
finanzjarju. Sabiex il-miżuri
ta' politika u r-riformi jiġu sfruttati kemm jista' jkun possibbli,
jeħtieġ li dan il-proċess isir b'mod koordinat kemm fil-livell
nazzjonali kif ukoll f'dak tal-UE. Permezz tal-proposti li
hawn f'din il-Komunikazzjoni u permezz tar-rakkomandazzjonijiet
speċifiċi għall-pajjiżi aktar dettaljati tagħha,
il-Kummissjoni qed tipproponi miżuri konkreti li jistgħu jgħinu
lill-UE terġa' torjenta lilha nnifisha lejn it-tkabbir u toħloq
l-impjiegi li jistgħu jgħinuha biex tgħolli l-istandards
tal-għajxien, tnaqqas il-faqar u tiżgura tkabbir iktar sostenibbli
għall-futur. L-implimentazzjoni
ta' dawn ir-rakkomandazzjonijiet hija prijorità. Il-Kummissjoni se tuża l-istrumenti kollha tal-qafas il-ġdid
ta' governanza biex tikkontrolla u tivvaluta l-progress li se jsir matul
is-sena li ġejja. Fl-istess ħin,
il-Kummissjoni se tkompli tiffoka bil-qawwi fuq l-implimentazzjoni
sħiħa tal-Pjan Direzzjonali ta' Ottubru 2011 biex tiżgura
approċċ ibbilanċjat li jgħin lill-UE toħroġ
mill-kriżi. Il-Kummissjoni se
taħdem b'mod intensiv flimkien mal-Istati Membri u mal-Istituzzjonijiet
Ewropej biex timplimenta l-inizjattiva tagħha għat-tkabbir u biex
tiżviluppa l-komponenti ewlenin u medda ta' żmien għat-tlestija
tal-Unjoni Ekonomika u Monetarja. Anness 1: Is-Semestru Ewropew Anness 2: Ir-riżultati tal-analiżi
fil-fond u tal-proċeduri ta' defiċit eċċessiv Anness 1: Is-Semestru Ewropew
għall-koordinazzjoni tal-politika F'Marzu tal-2010,
il-Kummissjoni pproponiet l-istrateġija Ewropa 2020 u l-Kunsill
Ewropew approvaha. Din hija
l-istrateġija tal-UE għat-tkabbir għall-għaxar snin li
ġejjin. Għandha ħames
miri nominali fl-oqsma tal-impjiegi, tar-R&Ż, tal-klima u
l-enerġija, tal-edukazzjoni u tal-ġlieda kontra l-faqar. F'Marzu tal-2011, tlieta u għoxrin Stat
Membru qablu wkoll dwar il-Patt Euro Plus biex iżidu
l-koordinazzjoni tar-riformi f'oqsma li mhumiex kompletament koperti fil-livell
tal-UE (ara l-kaxxa). Il-Kummissjoni pproponiet
ukoll "six-pack" ta' leġiżlazzjoni, li qablu dwaru
l-koleġiżlaturi tal-UE, fir-rigward tal-governanza ekonomika, u dan
daħal fis-seħħ fit-13 ta' Diċembru 2011. Din il-leġiżlazzjoni l-ġdida tat
lill-UE għodod ġodda u effettivi biex japprofondixxu
l-monitoraġġ tal-politiki ekonomiċi u fiskali tal-Istati Membri
u biex jinfurzaw ir-regoli. Permezz
tagħha, ġie emendat il-Patt ta' Stabbiltà u Tkabbir,
bil-għan li tissaħħaħ is-sorveljanza kollettiva tal-finanzi
pubbliċi. Il-kriterju
tal-proporzjon tad-dejn inkluż fit-Trattat huwa enfasizzat ħafna
iktar, u ġew introdotti mekkaniżmi ġodda ta' infurzar
(inklużi s-sanzjonijiet) kemm fil-parti preventiva tal-Patt kif ukoll
f'dik korrettiva. Billi ġiet
rikonoxxuta l-importanza li l-iżbilanċi makroekonomiċi ta'
natura mhux fiskali jiġu indirizzati bil-qawwi, ġie estiż ukoll
il-qafas ta' sorveljanza permezz tal-proċedura l-ġdida
għall-iżbilanċ makroekonomiku. Din il-proċedura għandha l-għan li tipprevjeni milli
jiffurmaw żbilanċi li jikkawżaw riskju għall-istabbiltà
ekonomika. Fejn l-iżbilanċi
jippersistu, il-proċedura se tiggarantixxi li jittieħdu l-azzjonijiet
korrettivi meħtieġa. Il-proċedura
l-ġdida tinkludi sistema ta' sanzjonijiet għal nuqqas ripetut ta'
konformità mal-azzjonijiet miftiehma. L-ewwel rapport tal-Kummissjoni dwar il-mekkaniżmu ta' twissija,
li ġie ppublikat fi Frar 2012, sar bl-użu ta' din il-proċedura
l-ġdida. F'konformità
mas-sejbiet li ħarġu minn dan ir-rapport, saru l-ewwel analiżi
fil-fond dwar tnax-il pajjiż (il-Belġju, il-Bulgarija, id-Danimarka,
Spanja, Franza, l-Italja, Ċipru, l-Ungerija, is-Slovenja, il-Finlandja,
l-Isvezja u r-Renju Unit)[10]. Sabiex jaslu għal
dawn l-objettivi b'mod kollettiv u biex iressqu flimkien dawn l-impenji kollha,
sabiex jiżguraw koordinazzjoni ex-ante u segwitu aħjar
tad-deċiżjonijiet, l-Istati Membri qablu u implimentaw
għall-ewwel darba fl-2011 mod ġdid ta' kif jikkoordinaw il-politiki
nazzjonali, is-Semestru Ewropew għall-koordinazzjoni tal-politika. Iċ-ċiklu
jibda bil-pubblikazzjoni tal-Istħarriġ Annwali dwar it-Tkabbir (SAT)
mill-Kummissjoni Ewropea, li janalizza l-isfidi ekonomiċi u jistabbilixxi
l-prijoritajiet għall-UE kollha kemm hi. L-Istħarriġ Annwali dwar it-Tkabbir jiġi ppreżentat
lill-Parlament Ewropew u jservi ta' referenza għad-diskussjoni bejn
il-Kapijiet tal-Istat jew tal-Gvern fis-summit Ewropew tar-rebbiegħa. Abbażi tal-gwida tagħhom, l-Istati
Membri jippreżentaw il-Programmi ta' Stabbiltà u ta' Konverġenza (li
jagħtu ħarsa lejn is-sitwazzjoni tal-finanzi pubbliċi
tagħhom) u l-Programmi Nazzjonali ta' Riforma (li jagħtu ħarsa
lejn il-miżuri li jagħtu spinta lit-tkabbir u lill-impjiegi) f'April,
sabiex il-Kummissjoni tkun tista' tivvalutahom fl-istess waqt. Il-valutazzjoni tal-Kummissjoni tieħu
l-għamla ta' proposti għar-rakkomandazzjonijiet annwali
speċifiċi għall-pajjiżi, li mbagħad jiġu diskussi
mill-konfigurazzjonijiet tal-Kunsill, sal-bidu tas-sajf jiġu approvati
mill-Kunsill Ewropew u fl-aħħar jiġu adottati mill-Kunsill. Fit-tieni parti tas-sena, l-Istati Membri
jiffinalizzaw il-baġits nazzjonali u l-istrateġiji ta' riforma
tagħhom, u l-Kummissjoni u l-entitajiet tal-UE relevanti jiddiskutu u
jikkontrollaw il-prestazzjoni u l-progress. Il-pakkett tal-lum
qed iwitti t-triq għall-konklużjoni tat-tieni Semestru Ewropew
għall-koordinazzjoni tal-politika fil-Kunsill Ewropew ta' Ġunju 2012. Meta mqabbla mas-sena li għaddiet,
l-effettività tal-proċess u l-impatt tal-gwida li ngħatat ġew
imsaħħa permezz tat-tagħlimiet li nġabru
mill-implimentazzjoni tar-rakkomandazzjonijiet tal-2011, permezz tas-sejbiet
tal-analiżi fil-fond li twettqu għat-12-il Stat Membru u permezz
tal-awtomatiċità ikbar li għandha ssegwi l-adozzjoni
tar-rakkomandazzjonijiet proposti għall-azzjoni. Tabella 1: Ħarsa ġenerali lejn ir-rakkomandazzjonijiet speċifiċi għall-pajjiżi għall-perjodu 2012-2013* * Għall-Irlanda, il-Greċja, il-Portugall u
r-Rumanija, l-unika rakkomandazzjoni li hemm hija li jimplimentaw l-impenji
eżistenti skont il-programmi ta' assistenza finanzjarja tal-UE/FMI. Tabella 2: Ħarsa ġenerali lejn il-miri tal-istrateġija Ewropa 2020[11] Is-simbolu
"*" huwa miżjud meta mira nazzjonali tkun qed tiġi espressa
b'indikatur differenti mill-indikatur tal-mira ewlenija tal-UE. Il-miri tal-Istati Membri || Ir-rata tal-impjiegi (f'%) || Ir-R&Ż f'% tal-PDG || Il-miri ta' tnaqqis fl-emissjonijiet (imqabbla mal-livelli tal-2005)[12] || L-enerġija rinnovabbli || L-effiċjenza fl-enerġija – it-tnaqqis fil-konsum tal-enerġija f'Mtoe[13] || Tluq bikri mill-iskola f'% || Edukazzjoni terzjarja f'% || It-tnaqqis tal-popolazzjoni li qiegħdha fir-riskju tal-faqar jew tal-esklużjoni soċjali, f'għadd ta' persuni Il-mira nominali tal-UE || 75% || 3% || -20% (imqabbla mal-livelli tal-1990) || 20% || żieda ta' 20 % fl-effiċjenza fl-enerġija li tiswa daqs 368 Mtoe || 10% || 40% || 20 000 000 UE (Stima) || 73.70-74% || 2.65-2.72% || -20% (imqabbla mal-livelli tal-1990) || 20% || 206.5 || 10.3-10.5% || 37.6-38.0%[14] || AT || 77-78% || 3.76% || -16% || 34% || 7.16 || 9.5% || 38 % (inkluż l-ISCED 4a, li fl-2010 kien madwar 12 %) || 235 000 BE || 73.2% || 3.0% || -15% || 13% || 9.80 || 9.5% || 47% || 380 000 BG || 76% || 1.5% || 20% || 16% || 3.20 || 11% || 36% || 260 000* CY || 75-77% || 0.5% || -5% || 13% || 0.46 || 10% || 46% || 27 000 CZ || 75% || 1% (is-settur pubbliku biss) || 9% || 13% || M.A. || 5.5% || 32% || Jinżamm l-għadd ta' persuni fir-riskju tal-faqar jew tal-esklużjoni soċjali fil-livell tal-2008 (15.3% tal-popolazzjoni totali), bi sforzi biex jitnaqqas bi 30 000 DE || 77% || 3% || -14% || 18% || 38.30 || <10% || 42% (inkluż l-ISCED 4, li fl-2010 kien madwar 11.4%) || 320 000 (qiegħda għal żmien twil)* DK || 80% || 3% || -20% || 30% || 0.83 || <10% || Mill-anqas 40% || 22 000 (persuni li jgħixu f'unitajiet domestiċi b'intensità ta' xogħol baxxa ħafna)* EE || 76% || 3% || 11% || 25% || 0.71 || 9.5% || 40% || 61 860 persuna barra mir-riskju tal-faqar* EL || 70% || Mira mhux disponibbli || -4% || 18% || 2.70 || taħt l-10% || 32% || 450 000 ES || 74% || 3% || -10% || 20% || 25.20 || 15% || 44% || 1 400 000 - 1 500 000 FI || 78% || 4% || -16% || 38% || 4.21 || 8% || 42% (definizzjoni nazzjonali ristretta) || 150 000 FR || 75% || 3% || -14% || 23% || 34.00 || 9.5% || 50% || Tnaqqis tar-rata fissa ta' persuni fir-riskju tal-faqar b'terz matul il-perjodu 2007-2012 jew b'1 600 000 persuna* HU || 75% || 1.8% || 10% || 14.65% || 2.96 || 10% || 30.3% || 450 000 IE || 69-71% || madwar 2% 2.5% tal-PNG) || -20% || 16% || 2.75 || 8% || 60% || 200 000* IT || 67-69% || 1.53% || -13% || 17% || 27.90 || 15-16% || 26-27% || 2 200 000 LT || 72.8% || 1.9% || 15% || 23% || 1.14 || <9% || 40% || 170 000 LU || 73% || 2.3-2.6% || -20% || 11% || 0.19 || <10% || 66% || 6 000 LV || 73% || 1.5% || 17% || 40% || 0.67 || 13.4% || 34-36% || 121 000* MT || 62.9% || 0.67% || 5% || 10% || 0.24 || 29% || 33% || 6 560 NL || 80 % || 2,5 % || -16% || 14% || M.A. || <8 % || >40% mistennija 45% fl-2020 || 93 000* PL || 71% || 1.7% || 14% || 15.48% || 13.6 || 4.5% || 45% || 1 500 000 PT || 75% || 3% || 1% || 31% || 6.00 || 10% || 40% || 200 000 RO || 70% || 2% || 19% || 24% || 10.00 || 11.3% || 26.7% || 580 000 SE || Ħafna iktar minn 80 % || Madwar 4 % || -17% || 49% || 12.80 || <10% || 40-45% || Tnaqqis fil-% ta' nisa u rġiel li ma jagħmlux parti mill-forza tax-xogħol (minbarra studenti fuq bażi full-time), tal-qiegħda għal żmien twil jew ta' dawk fuq liv fit-tul minħabba raġunijiet ta' mard, għal ħafna inqas minn 14 %* SI || 75% || 3% || 4% || 25% || M.A. || 5% || 40% || 40 000 SK || 72% || 1% || 13% || 14% || 1.65 || 6% || 40% || 170 000 UK || Mira mhux fil-PNR || Mira mhux fil-PNR || -16% || 15% || M.A. || Mira mhux fil-PNR || Mira mhux fil-PNR || Miri numeriċi eżistenti tal-Att dwar il-Faqar fost it-Tfal tal-2010* Anness 2: Ir-riżultati tal-analiżi
fil-fond Fl-14 ta' Frar 2012,
il-Kummissjoni Ewropea ppreżentat l-ewwel Rapport tagħha dwar
il-Mekkaniżmu ta' Twissija, li tħejja f'konformità mar-Regolament
(UE) Nru 1176/2011 dwar il-prevenzjoni u l-korrezzjoni
tal-iżbilanċi makroekonomiċi. Ir-Rapport dwar il-Mekkaniżmu ta' Twissija eżamina
s-sitwazzjoni tal-Istati Membri kollha, minbarra tal-erba' pajjiżi
tal-programm (il-Greċja, l-Irlanda, il-Portugall u r-Rumanija). Abbażi ta' qari ekonomiku tat-tabella ta'
valutazzjoni bi twissija bikrija, il-Kummissjoni kkonkludiet li kienet
iggarantita analiżi aktar fil-fond tal-iżviluppi makroekonomiċi
fit-tnax-il Stat Membru segwenti: Il-Belġju,
il-Bulgarija, id-Danimarka, Spanja, Franza, l-Italja, Ċipru, l-Ungerija[15],
is-Slovenja, il-Finlandja, l-Isvezja u r-Renju Unit. Għal kull
wieħed minn dawn il-pajjiżi, is-servizzi tal-Kummissjoni wettqu
analiżi fil-fond speċifiċi għall-pajjiżi. Dawn qed jiġu ppubblikati bħala
Dokumenti ta' Ħidma tal-Persunal, u jagħmlu parti minn dan
il-pakkett. Bi tħejjija
għal din l-analiżi, saru missjonijiet speċifiċi ta'
ġbir ta' fatti, kif previst mil-leġiżlazzjoni[16].
Din il-Komunikazzjoni tissodisfa r-rekwiżiti stipulati
fl-Artikolu 5.3 tar-Regolament (UE) Nru 1176/2011, li skontu
l-Kummissjoni għandha tinforma lill-Kunsill u lill-Parlament Ewropew
bir-riżultati tal-analiżi fil-fond u toħroġhom fil-pubbliku.
Abbażi
tal-analiżi fil-fond li twettqu f'konformità mal-Artikolu 5
tar-Regolament (UE) Nru 1176/2011, il-Kummissjoni kkonkludiet li
jeħtieġ li dawn l-iżbilanċi jiġu indirizzati, u
uħud minnhom b'urġenza: ·
Il-Belġju qed jesperjenza
xi żbilanċi. B'mod partikolari, l-iżviluppi
makroekonomiċi fl-oqsma tal-kompetittività esterna tal-merkanzija u
tad-dejn, speċjalment il-livell għoli tad-dejn pubbliku,
jistħoqqilhom attenzjoni ulterjuri biex jitnaqqas ir-riskju ta' effetti
negattivi fuq il-funzjonament tal-ekonomija. ·
Il-Bulgarija qed tesperjenza
xi żbilanċi. B'mod partikolari, il-livell tad-dejn estern kif
ukoll ċerti żviluppi makroekonomiċi relatati mal-proċess
ta' tnaqqis tad-dejn mis-settur korporattiv u mal-proċess ta'
aġġustament fis-suq tax-xogħol, jistħoqqilhom ċertu
attenzjoni biex jitnaqqas ir-riskju ta' effetti negattivi fuq il-funzjonament
tal-ekonomija. ·
Id-Danimarka qed tesperjenza
xi żbilanċi. B'mod partikolari, ċerti żviluppi
makroekonomiċi, notevolment dawk li jinsabu fil-bażi tal-kompetittività
esterna tagħha, u r-riskji potenzjali relatati mad-dejn tal-unitajiet
domestiċi, jistħoqqilhom ċertu attenzjoni biex jitnaqqas
ir-riskju ta' effetti negattivi fuq il-funzjonament tal-ekonomija.
Spanja qed tesperjenza
żbilanċi serji ħafna. B'mod
partikolari, l-iżviluppi makroekonomiċi, notevolment dawk
relatati mal-livell sinifikanti ta' dejn tas-settur privat,
mal-pożizzjoni negattiva tad-dejn kbir estern u mas-settur
finanzjarju, li ġew influwenzati mill-iżviluppi fis-suq
residenzjali, jeħtieġu monitoraġġ mill-qrib u
attenzjoni urġenti tal-politika ekonomika, bil-għan li jiġu
evitati kwalunkwe effetti negattivi fuq il-funzjonament tal-ekonomija u
fuq il-funzjonament tal-Unjoni Ekonomika u Monetarja.
Franza qed tesperjenza
żbilanċi serji. B'mod partikolari, ċerti żviluppi
makroekonomiċi fl-oqsma tal-prestazzjoni tal-esportazzjoni u
tal-kompetittività, jistħoqqilhom ċertu attenzjoni biex
jitnaqqas ir-riskju ta' effetti negattivi fuq il-funzjonament
tal-ekonomija.
L-Italja qed tesperjenza żbilanċi
serji. B'mod partikolari, id-dejn pubbliku għoli u
l-iżviluppi makroekonomiċi fil-qasam tal-prestazzjoni
tal-esportazzjoni, jistħoqqilhom ċertu attenzjoni billi l-Italja
ilha titlef il-kompetittività esterna tagħha sa mill-adozzjoni
tal-euro. Minħabba l-livell għoli ta' dejn pubbliku,
it-tisħiħ tal-potenzjal tat-tkabbir għandu jitqies
bħala prijorità ewlenija biex jitnaqqas ir-riskju ta' effetti
negattivi fuq il-funzjonament tal-ekonomija.
Ċipru qed jesperjenza
żbilanċi serji ħafna. B'mod
partikolari, l-iżviluppi makroekonomiċi skont kif riflessi
fil-kont kurrenti, fil-finanzi pubbliċi u fis-settur finanzjarju
jirrikjedu monitoraġġ mill-qrib u attenzjoni urġenti
tal-politika ekonomika, bil-għan li jiġu evitati kwalunkwe
effetti negattivi fuq il-funzjonament tal-ekonomija u fuq il-funzjonament
tal-Unjoni Ekonomika u Monetarja.
L-Ungerija qed tesperjenza żbilanċi serji. B'mod
partikolari, ċerti żviluppi makroekonomiċi bħalma huma
d-daqs negattiv ħafna tal-pożizzjoni tal-investiment
internazzjonali nett u d-dejn pubbliku, jistħoqqilhom attenzjoni
mill-qrib ħafna biex jitnaqqsu r-riskji kbar ta' effetti negattivi
fuq il-funzjonament tal-ekonomija. . Apparti l-valutazzjoni tal-azzjoni
effettiva, u f'konformità mad-dispożizzjonijiet tar-regolament dwar
il-Fond ta' Koeżjoni tal-UE, il-Kummissjoni adottat ukoll proposta
għal deċiżjoni tal-Kunsill biex titneħħa
s-sospensjoni tal-impenji tal-Fond ta' Koeżjoni ta' Marzu 2012.
Is-Slovenja qed tesperjenza żbilanċi serji. B'mod
partikolari, żviluppi makroekonomiċi relatati mal-proċess
ta' tnaqqis tad-dejn mis-settur korporattiv u mal-istabbiltà bankarja, u
żvilupp mhux favorevoli iżda mhux daqstant urġenti
fil-kompetittività esterna, jistħoqqilhom jiġu kkontrollati
mill-qrib ħafna biex jitnaqqsu r-riskji kbar ta' effetti negattivi
fuq il-funzjonament tal-ekonomija.
Il-Finlandja qed tesperjenza xi żbilanċi. B'mod partikolari,
żviluppi makroekonomiċi relatati mal-kompetittività,
jistħoqqilhom ċertu attenzjoni biex jitnaqqas ir-riskju ta'
effetti negattivi fuq il-funzjonament tal-ekonomija.
L-Isvezja qed tesperjenza xi żbilanċi. B'mod partikolari,
ċerti żviluppi makroekonomiċi li jikkonċernaw id-dejn
tas-settur privat u s-suq residenzjali, jistħoqqilhom ċertu
attenzjoni biex jitnaqqas ir-riskju ta' effetti negattivi fuq
il-funzjonament tal-ekonomija.
Ir-Renju Unit qed jesperjenza xi
żbilanċi. B'mod partikolari, żviluppi
makroekonomiċi fl-oqsma tad-dejn tal-unitajiet domestiċi u
tas-suq residenzjali, kif ukoll żviluppi mhux favorevoli
fil-kompetittività esterna jistħoqqilhom ċertu attenzjoni, biex
jitnaqqas ir-riskju ta' effetti negattivi fuq il-funzjonament
tal-ekonomija.
Dawn
l-iżbilanċi se jiġu segwiti taħt il-parti preventiva
tal-Proċedura għall-Iżbilanċi Makroekonomiċi u huma
integrati fir-Rakkomandazzjonijiet Speċifiċi għall-Pajjiżi
fil-qafas tas-Semestru Ewropew. [1] COM (2011) 669 [2] COM (2010) 2020 [3] COM (2011) 818 [4] COM (2011)594 u COM (2011) 510 [5] COM (2011) 400
[6] COM (2011) 815
[7] Ir-Regolament (UE)
Nru 1176/2011 dwar il-prevenzjoni u l-korrezzjoni tal-iżbilanċi
makroekonomiċi. [8] Il-"pajjiżi
tal-programm" (il-Greċja, l-Irlanda, il-Portugall u r-Rumanija) ma
ġewx inklużi f'dan l-eżerċizzju. [9] COM (2012) 173 [10] Il-"pajjiżi
tal-programm", il-Greċja, l-Irlanda, il-Portugall u r-Rumanija ma
ġewx inklużi f'dan l-eżerċizzju. [11] Il-miri nazzjonali stabbiliti
fil-Programmi Nazzjonali ta' Riforma f'April 2012. [12] Il-miri nazzjonali ta' tnaqqis
fl-emissjonijiet definiti fid-Deċiżjoni 2009/406/KE (jew
id-"Deċiżjoni dwar il-Kondiviżjoni tal-Isforzi")
jirrigwardaw l-emissjonijiet li mhumiex koperti mis-Sistema għan-Negozjar
tal-Emissjonijiet. L-emissjonijiet
koperti mis-Sistema għan-Negozjar tal-Emissjonijiet se jitnaqqsu
b'21 % meta mqabbla mal-livelli tal-2005. It-tnaqqis globali fl-emissjonijiet korrespondenti se jkun ta'
-20 % meta mqabbel mal-livelli tal-1990. [13] Għandu jiġi rrimarkat li
t-tbassir nazzjonali jvarja wkoll skont is-sena/snin ta' bażi li
fuqha/fuqhom jiġu bbażati l-istimi tal-iffrankar. [14] Il-kalkulazzjoni ma tinkludix l-ISCED
4 (il-Ġermanja, l-Awstrija), u r-Renju Unit, ir-riżultat bl-ISCED 4: 40.0-40.4%. [15] Il-gvern Ungeriż talab
formalment li jingħata assistenza finanzjarja prekawzjonarja mill-UE u
mill-FMI f'Novembru 2011. [16] F'konformità mal-Artikoli 5.1 u
13 tar-Regolament (UE) Nru 1176/2011, l-analiżi fil-fond
għandhom isiru fl-istess żmien li jsiru l-missjonijiet ta’
sorveljanza. Il-missjonijiet seħħew fil-livell tas-servizz bejn Marzu
u April.