EUR-Lex Access to European Union law
This document is an excerpt from the EUR-Lex website
Document 52011PC0720
Proposal for a COUNCIL DECISION on the position to be adopted on behalf of the European Union within the relevant instances of the World Trade Organization on the accession of the Russian Federation to the World Trade Organization
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f'isem l-Unjoni Ewropea fit-taqsimiet relevanti tal-Organizzazzjoni Dinjija tal-Kummerċ dwar is-sħubija tal-Federazzjoni Russa fl-Organizzazzjoni Dinjija tal-Kummerċ
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f'isem l-Unjoni Ewropea fit-taqsimiet relevanti tal-Organizzazzjoni Dinjija tal-Kummerċ dwar is-sħubija tal-Federazzjoni Russa fl-Organizzazzjoni Dinjija tal-Kummerċ
/* KUMM/2011/0720 finali - 2011/0320 (NLE) */
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f'isem l-Unjoni Ewropea fit-taqsimiet relevanti tal-Organizzazzjoni Dinjija tal-Kummerċ dwar is-sħubija tal-Federazzjoni Russa fl-Organizzazzjoni Dinjija tal-Kummerċ /* KUMM/2011/0720 finali - 2011/0320 (NLE) */
MEMORANDUM TA’ SPJEGAZZJONI 1. IL-KUNTEST TAL-PROPOSTA Ħarsa Ġenerali lejn it-Termini tas-Sħubija fid-WTO tal-Federazzjoni Russa I. DAĦLA Il-membri tal-Organizzazzjoni Dinjija tal-Kummerċ (WTO) u l-Federazzjoni Russa waslu fl-istadju konklużiv tan-negozjati ta' ftehim dwar it-termini li skonthom il-Federazzjoni Russa tista' tissieħeb mal-organizzazzjoni. Dan wara 18-il sena ta' negozjati, li bdew meta l-Federazzjoni Russa ppreżentat l-applikazzjoni tagħha biex tingħaqad mad-WTO fl-1993. Issa, qabel ma l-UE tkun tista' tappoġġja b'mod formali s-sħubija tal-Federazzjoni Russa, irid ikun hemm Deċiżjoni tal-Kunsill li tapprova t-termini tas-sħubija tal-Federazzjoni Russa fid-WTO. Hawn taħt qed tingħata taqsira tat-termini tas-sħubija. II. TAQSIRA TAT-TERMINI TAS-SĦUBIJA TAL-FEDERAZZJONI RUSSA FID-WTO SKONT IS-SETTUR Tariffi tal-Importazzjonijiet Il-medja ġenerali tar-rata konsolidata finali (FBR) tal-Federazzjoni Russa hija ta' 7,6%. Il-medja tal-FBR fir-rigward tal-merkanzija industrijali hija ta' 7,9%, iżda f'setturi differenti din tvarja minn żero dazju għall-prodotti tal-Ftehim dwar it-Teknoloġija tal-Informatika (ITA) għal medji baxxi fit-tagħmir mediku u l-farmaċewtiċi (4,3%), fit-tagħmir agrikolu (4,6%), fiż-żraben (5%), fit-tagħmir tal-kostruzzjoni u l-kimiċi (5,2%), għall-ogħla medji għall-ħġieġ (11.1%) u ċ-ċeramika (12.2.%). L-istatistiċi tal-kummerċ għall-2010 juru li l-kimiċi, il-makkinarju u l-vetturi motorizzati huma tliet setturi industrijali ewlenin li jikkostitwixxu iktar minn 60% tat-total tal-esportazzjonijiet tal-UE lejn ir-Russja. F'dawn is-setturi, il-medja ta' FBR tvarja minn 5,3% għall-kimiċi għal 6.5% għall-makkinarju u l-apparati tad-dar, għal 9.2% għall-vetturi u partijiet tagħhom. Il-medja stimata tal-FBR fir-rigward tal-merkanzija agrikola hija ta' 11,5% bl-ogħla medji għar-ross (20%), il-prodotti tal-ħalib (14,6%) u ż-żjut veġetali (11,4%). Mill-11 327 linja tariffarja fl-iskeda tal-merkanzija tal-Federazzjoni Russa, 6 992 mhux se jilħqu l-FBR fil-mument tas-sħubija, u minħabba f'hekk se jkollhom perjodu ta' implimentazzjoni. Mid-data tas-sħubija tal-Federazzjoni Russa mad-WTO, l-itwal perjodi ta' implimentazzjoni huma previsti għall-vetturi motorizzati (seba' snin) u għal ċerti kimiċi u prodotti tal-għamara (sitt snin). Dawn il-livelli medji konsolidati għat-tariffi huma ferm raġonevoli, b'mod partikolari meta mqabbla mar-rati attwali medji konsolidati jew saħansitra applikati ta' pajjiżi tal-BRIC oħrajn. Pereżempju, l-FBR taċ-Ċina għall-merkanzija industrijali hija ta' 10% (rata medja applikata – 8,7%, dik tal-Brażil – 31,4% (rata applikata medja – 14,1%) u tal-Indja – 48,5% (rata applikata medja– 10,1%). Fl-agrikultura, iċ-Ċina hija suġġetta għal rata medja stmata ta' 15,6% u l-Indja – 31,8%. It-Tariffi tal-Esportazzjonijiet L-iskeda tal-merkanziji tal-Federazzjoni Russa tinkludi konċessjonijiet u impenji tariffarji mandatorji fuq l-esportazzjoni ta' firxa wiesgħa ta' prodotti, prinċipalment materja prima, inkluż ħut u frott tal-baħar, żerriegħa, prodotti kimiċi u minerali, żejt u prodotti tal-gass, metalli mhux maħduma u fdalijiet, plastik, ġlud, injam, polpa, karta, ħaġar prezzjuż u semiprezzjuż. Servizzi L-iskeda tal-impenji speċifiċi fis-servizzi tal-Federazzjoni Russa hija ferm sodisfaċenti u tagħti opportunitajiet tas-suq sinifikanti lill-fornituri tas-servizz Ewropew. Ir-Russja se tidħol għall-impenji tal-aċċess għas-suq u dawk tat-trattament nazzjonali f'firxa wiesgħa ta' setturi tas-servizz, inklużi s-servizzi professjonali, tal-kompjuter u servizzi kummerċjali oħrajn, is-servizzi tal-kostruzzjoni, dawk postali u servizzi oħrajn ta' twassil, it-telekomunikazzjoni, is-servizzi tal-aġenziji tal-aħbarijiet, it-trasport, id-distribuzzjoni, is-servizzi ambjentali, dawk finanzjarji (assigurazzjoni, banek u servizzi tas-sigurtà), dawk turistiċi u dawk marbuta mal-ivvjaġġar. Ir-Russja intrabtet ukoll bit-trasferimenti intrakorporattivi ta' persuni fiżiċi li jipprovdu servizzi u li jikkonċernaw viżitaturi b'interess kummerċjali, inklużi viżitaturi li jwaqqfu preżenza kummerċjali. Impenji tal-protokoll Fl-istadju aħħari multilaterali tal-proċess tas-sħubija, il-Membri tad-WTO flimkien raw li jiżguraw il-konformità bażika tal-liġijiet tal-kummerċ, ir-regolamenti, il-proċeduri amministrattivi u l-istituzzjonijiet tal-Federazzjoni Russa u tal-Unjoni Doganali (CU) bejn il-Federazzjoni Russa, ir-Repubblika tal-Każakistan u r-Repubblika tal-Belarus fejn ir-Russja kienet trasferiet il-kompetenzi regolatorji nazzjonali tagħha lill-CU, b'regoli u ftehimiet tad-WTO, li jistabbilixxu l-impenji korrispondenti fil-Protokoll tas-sħubija u fir-Rapport tal-Grupp ta' Ħidma. Il-kwistjonijiet li ġejjin huma ta' interess partikolari għall-UE: Id-drittijiet tal-kummerċ Ir-Russja kkomettiet ruħha li tapplika l-liġijiet, ir-regolamenti u l-miżuri l-oħrajn kollha li jaffettwaw l-importazzjoni u l-esportazzjoni ta' merkanzija b'konformità mad-dispożizzjonijiet relevanti tal-Ftehim WTO, inkluż il-Ftehim dwar il-Proċeduri ta' Liċenzjar tal-Importazzjonijiet u d-dispożizzjonijiet tal-GATT relevanti. Ir-Russja qablet, speċifikament fir-rigward tar-regolament dwar l-importazzjoni tax-xarbiet alkoħoliċi, il-farmaċewtiċi u prodotti bit-teknoloġija tal-kriptaġġ, li ma teħtieġx li liċenzji tal-importazzjoni jew l-attività jkollhom jgħaddu minn proċeduri ta' dikjarazzjoni doganali. Barra minn hekk, kwalunkwe permessi, awtorizzazzjoni bil-quddiem u rekwiżiti tal-liċenzjar li ma jistgħux ikunu ġġustifikati skont id-dispożizzjonijiet tal-Ftehim WTO għandhom jiġu eliminati u ma għandhomx jiġu applikati minn dakinhar li r-Russja tissieħeb mad-WTO. Il-politiki tal-ipprezzar Ir-Russja kkommettiet ruħha li tapplika kwalunkwe kontrolli tal-prezzijiet eżistenti jew futuri fuq prodotti u servizzi b'konsistenza mal-Ftehim tad-WTO u kkonfermat li l-miżuri tal-kontroll tal-prezz mhux se jiġu użati biex jipproteġu l-produzzjoni domestika ta' merkanziji, jew biex tiddgħajjef l-implimentazzjoni tal-impenji tas-servizzi tar-Russja. Fir-rigward tal-applikazzjoni tal-ispejjeż kollha tat-trasport bil-ferrovija, ir-Russja kkommettiet ruħha li ma tagħtix trattament inqas favorevoli lill-importazzjonijiet u l-esportazzjonijiet minn dak li jingħata lil dawk il-prodotti li huma simili, sostitwibbli u li qegħdin f'kompetizzjoni diretta u li jiġu trasportati bejn postijiet domestiċi, sa mhux aktar tard mill-1 ta' Lulju 2013. Fir-rigward tal-gass naturali, ir-Russja qablet li tiżgura li l-produtturi u d-distributuri tal-gass naturali tal-Federazzjoni Russa joperaw fuq il-bażi ta' kunsiderazzjonijiet kummerċjali normali u fir-rigward tal-provvisti tagħhom għall-utenti industrijali, li jirkupraw l-ispejjeż tagħhom, inkluż l-investiment u t-trasport, b'tali mod li jkunu kapaċi jagħmlu qligħ. Il-proċeduri u l-ħlasijiet doganali F'dak li għandu x'jaqsam mal-valutazzjoni doganali, ir-Russja kkommettiet ruħha li tapplika il-liġijiet, ir-regolamenti u l-prattiki tagħha skont ir-regoli tad-WTO. B'mod partikolari, ir-Russja mhi se tagħmel użu minn l-ebda forma ta' valur minimu, bħall-prezzijiet ta' referenza jew skeda fissa ta' valutazzjoni għall-valutazzjoni doganali tal-merkanzija. Fir-rigward tad-deżinjazzjoni ta' punti tal-kontroll doganali speċifiċi għad-dikjarazzjoni, id-dħul jew il-ħruġ ta' ċerta merkanzija, ir-Russja pprovdiet lista eżawrjenti ta' tali miżuri u kkommettiet ruħha li teliminahom mill-jum tas-sħubija jekk dawn imorru kontra l-Ftehim WTO. Ir-Russja assumiet obbligu li tiżgura li l-livell tal-ħlasijiet doganali, inklużi l-ħlasijiet tal-approvazzjoni doganali, ma jaqbiżx il-prezz tas-servizzi pprovduti. Fl-aħħar nett, fir-rigward tal-proċeduri ta' tranżitu, ir-Russja għandha tapplika l-liġijiet u r-regolamenti kollha tagħha kif ukoll miżuri dwar it-tranżitu tal-merkanzija (inkluża l-enerġija), bħal dawk il-ħlasijiet li jiggvernaw għat-trasport tal-merkanzija fit-tranżitu bit-triq, bil-ferrovija jew bl-ajru, u kwalunkwe ħlasijiet oħrajn u ħlasijiet doganali marbuta mat-tranżitu, b'konformità mal-Ftehim WTO. L-ostakli tekniċi tal-kummerċ (TBT) Ir-Russja kkommettiet ruħha biex tiżgura li r-regolamenti, l-istandards u l-proċeduri tal-valutazzjoni tal-konformità kollha applikati fit-territorju tal-Federazzjoni Russa jirrispettaw il-prinċipji tal-Ftehim dwar it-TBT tad-WTO , inkluża t-trasparenza, in-nondiskriminazzjoni u t-trattament nazzjonali. Kwalunkwe miżuri marbuta mat-TBT applikati fir-Russja, inklużi dawk adottati mill-korpi kompetenti tal-Komunità Ekonomika Ewroasjatika u l-CU, għandhom ikunu konformi mal-Ftehim WTO. Il-miżuri sanitarji u fitosanitarji (SPS) Ir-Russja kkommettiet ruħha li tiżviluppa u tapplika l-miżuri kollha b'rabta mal-SPS skont il-Ftehim tad-WTO mid-data tas-sħubija tagħha fid-WTO. B'mod partikolari, il-miżuri SPS għandhom jiġu applikati biss safejn hu meħtieġ biex tiġi mħarsa l-ħajja jew is-saħħa tal-bniedem, tal-annimali jew tal-pjanti; għandhom ikunu bbażati fuq prinċipji xjentifiċi kif ukoll fuq valutazzjoni tar-riskju u, fejn jeżistu, fuq standards, linji gwida u rakkomandazzjonijiet internazzjonali; ma għandhomx ikunu aktar restrittivi kummerċjalment minn kemm hu meħtieġ sabiex jinkiseb livell xieraq ta' protezzjoni applikata fil-Federazzjoni Russa; u għandhom jintegraw l-implimentazzjoni tal-prinċipju ekwivalenti. Il-Ftehim dwar Aspetti relatati mal-Kummerċ tad-Drittijiet tal-Proprjetà Intellettwali (TRIPS) Ir-Russja kkommettiet ruħha li tapplika bis-sħiħ id-dispożizzjonijiet tal-Ftehim tad-WTO dwar it-TRIPS mid-data tas-sħubija fid-WTO, inklużi d-dispożizzjonijiet għall-infurzar, mingħajr rikors għal xi perjodu tranżitorju. III. RAKKOMANDAZZJONI Il-Kummissjoni tikkunsidra li, bil-preżentazzjoni tat-termini tas-Sħubija tal-Federazzjoni Russa fid-WTO għall-approvazzjoni tal-Kunsill, dawn it-termini jirrappreżentaw pakkett ibbilanċjat għalkemm ambizzjuż ta' ftuħ tas-suq kif ukoll impenji regolatorji, li se jġibu ammont sostanzjali ta' benefiċċji lill-UE, lill-Federazzjoni Russa u lill-imsieħba tad-WTO tagħha fil-kummerċ. 2011/0320 (NLE) Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f'isem l-Unjoni Ewropea fit-taqsimiet relevanti tal-Organizzazzjoni Dinjija tal-Kummerċ dwar is-sħubija tal-Federazzjoni Russa fl-Organizzazzjoni Dinjija tal-Kummerċ IL-KUNSILL TAL-UNJONI EWROPEA, Wara li kkunsidra t-Trattat dwar il-Funzjonament tal-Unjoni Ewropea, u partikolarment l-Artikoli 91, 100(2), u l-ewwel subparagrafu tal-Artikolu 207(4), flimkien mal-Artikolu 218(9) tiegħu, Wara li kkunsidra l-proposta tal-Kummissjoni Ewropea, Billi: (1) F'Ġunju 1993 il-Gvern tal-Federazzjoni Russa applika għas-sħubija fil-Ftehim li jistabbilixxi l-Organizzazzjoni Dinjija tal-Kummerċ (WTO), skont l-Artikolu XII ta' dak il-Ftehim. (2) Bejn is-16 u s-17 ta' Ġunju 1993, ġie stabbilit Grupp ta' Ħidma dwar is-sħubija tal-Federazzjoni Russa sabiex jintlaħaq ftehim dwar it-termini tas-sħubija aċċettabbli għall-Federazzjoni Russa u l-Memrbi kollha tad-WTO. (3) Il-Kummissjoni, f'isem l-Unjoni Ewropea, innegozjat serje komprensiva f'dak li hu ftuħ tas-swieq u impenji regolatorji oħra min-naħa tal-Federazzjoni Russa li jissodisfaw ir-rekwiżiti u l-għanijiet tal-Unjoni u li jikkonformaw mal-livell ta' żvilupp tal-Federazzjoni Russa. (4) Dawn l-impenji huma issa mnaqqxa fil-Protokoll tas-Sħubija tal-Federazzjoni Russa mal-WTO. (5) Is-sħubija tad-WTO mistennija tkun ta' kontribut pożittiv fit-tul fil-proċess ta' riforma ekonomika u żvilupp sostenibbli fil-Federazzjoni Russa. (6) Il-Protokoll tas-Sħubija għandu għalhekk jiġi approvat. (7) L-Artikolu XII tal-Ftehim li jistabbilixxi d-WTO jipprovdi li għandu jintlaħaq ftehim dwar it-termini tas-sħubija bejn il-Membru li qed jissieħeb u d-WTO, u li l-Konferenza Ministerjali tad-WTO tapprova t-termini tas-sħubija min-naħa tad-WTO. L-Artikolu IV.2 tal-Ftehim jistabbilixxi li d-WTO, jipprovdi li matul l-intervalli bejn il-laqgħat tal-Konferenza Ministerjali, il-funzjonijiet tagħha għandhom jitmexxu mill-Kunsill Ġenerali. (8) Bl-istess mod, huwa meħtieġ li tiġi stabbilita l-pożizzjoni li għandha tittieħed f'isem l-Unjoni fit-taqsimiet relevanti tad-WTO, kemm jekk fil-Konferenza Ministerjali kif ukoll fil-Kunsill Ġenerali tad-WTO, ADOTTA DIN ID-DEĊIŻJONI: Artikolu Uniku 1. Il-pożizzjoni li għandha tiġi adottata f'isem l-Unjoni Ewropea fit-taqsimiet relevanti tal-Organizzazzjoni Dinjija tal-Kummerċ dwar is-sħubija tal-Federazzjoni Russa fl-Organizzazzjoni Dinjija tal-Kummerċ. 2. Din id-Deċiżjoni għandha tidħol fis-seħħ dakinhar li tiġi adottata. Magħmul fi […], Għall-Kunsill Il-President