(1)

Fl-4 ta’ Mejju 2016, il-Kunsill awtorizza lill-Kummissjoni u lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà jiftħu negozjati u jinnegozjaw il-modernizzazzjoni tal-Ftehim dwar Sħubija Ekonomika, Koordinazzjoni Politika u Koperazzjoni bejn il-Komunità Ewropea u l-Istati Membri tagħha, min-naħa l-waħda, u l-Istati Uniti Messikani, min-naħa l-oħra (1). In-negozjati ġew konklużi b’suċċess fis-17 ta’ Jannar 2025.

(2)

In-negozjati rriżultaw f’żewġ strumenti legali paralleli. L-ewwel strument huwa l-Ftehim ta’ Sħubija Strateġika Politika, Ekonomika u ta’ Kooperazzjoni bejn l-Unjoni Ewropea u l-Istati Membri tagħha, minn naħa waħda, u l-Istati Uniti tal-Messiku, min-naħa l-oħra, komunament imsejjaħ il-“Ftehim Globali Modernizzat” (il-“MGA”, Modernised Global Agreement), li jinkludi l-pilastru ta’ djalogu politiku u kooperazzjoni u l-pilastru tal-kummerċ u l-investiment, inkluż dispożizzjonijiet dwar il-protezzjoni tal-investiment. It-tieni strument huwa l-Ftehim Interim dwar il-Kummerċ bejn l-Unjoni Ewropea u l-Istati Uniti tal-Messiku (l-“ITA”) li jkopri l-liberalizzazzjoni tal-kummerċ u l-investiment. L-ITA ser jieqaf milli jkollu effett u ser jiġi sostitwit bil-MGA mad-dħul fis-seħħ ta’ dan tal-aħħar.

(3)

L-għan tal-ITA huwa li jrawwem aktar kummerċ u investiment sostenibbli bejn il-Partijiet billi jespandi u jiddiversifika r-relazzjonijiet ekonomiċi u kummerċjali tagħhom u billi joħloq opportunitajiet ġodda kemm għall-ħaddiema kif ukoll għan-negozji, b’mod partikolari l-intrapriżi żgħar u ta’ daqs medju, filwaqt li jikkontribwixxi għall-promozzjoni tal-iżvilupp sostenibbli fid-dimensjonijiet ekonomiċi, soċjali u ambjentali tiegħu.

(4)

Għalhekk jenħtieġ li l-ITA jiġi ffirmat,