(1)

Ir-Regolament (UE) 2019/817 u r-Regolament (UE) 2019/818 jistabbilixxu qafas għall-interoperabbiltà bejn is-sistemi ta’ informazzjoni tal-UE fl-oqsma tal-fruntieri, il-viża, il-kooperazzjoni tal-pulizija u dik ġudizzjarja, l-ażil u l-migrazzjoni.

(2)

Dak il-qafas jinkludi għadd ta’ komponenti tal-interoperabbiltà, inkluż ir-repożitorju komuni ta’ informazzjoni dwar l-identità (CIR). Is-CIR joħloq fajl individwali għal kull persuna li tkun irreġistrata fis-Sistema ta’ Dħul/Ħruġ (EES), fis-Sistema ta’ Informazzjoni dwar il-Viża (VIS), fis-Sistema Ewropea ta’ Informazzjoni u ta’ Awtorizzazzjoni għall-Ivvjaġġar (ETIAS), fil-Bażi tad-Data Ewropea tad-Dattiloskopika dwar l-Ażil (Eurodac) jew fis-Sistema Ewropea ta’ Informazzjoni ta’ Rekords Kriminali għal Ċittadini ta’ Pajjiżi Terzi (ECRIS-TCN). Dan il-komponent huwa stabbilit biex jiffaċilita u jassisti fl-identifikazzjoni korretta tal-persuni rreġistrati fis-sistemi, jappoġġa d-Detettur ta’ Identitajiet Multipli (MID), u jissimplifika l-aċċess għall-awtoritajiet maħtura kif speċifikat mid-dispożizzjonijiet relatati fir-Regolamenti.

(3)

Skont ir-Regolamenti (UE) 2019/817 u (UE) 2019/818, il-Kummissjoni għandha tiddetermina d-data li minnha s-CIR jibda jopera ladarba l-kundizzjonijiet stabbiliti fl-Artikolu 72(3) tar-Regolament (UE) 2019/817 u fl-Artikolu 68(3) tar-Regolament (UE) 2019/818 ikunu ntlaħqu. Dik id-data għandha tiġi stabbilita fi żmien 30 jum mill-adozzjoni tal-att ta’ implimentazzjoni.

(4)

Il-Kummissjoni vverifikat li ġew adottati l-atti ta’ implimentazzjoni meħtieġa għall-operat tas-CIR (3); li l-Aġenzija tal-Unjoni Ewropea għat-Tmexxija Operattiva ta’ Sistemi tal-IT fuq Skala Kbira fl-Ispazju ta’ Libertà, Sigurtà u Ġustizzja (eu-LISA) iddikjarat it-tlestija b’suċċess ta’ test komprensiv tas-CIR, li tkun wettqet f’kooperazzjoni mal-awtoritajiet tal-Istati Membri; li l-eu-LISA tkun ivvalidat l-arranġamenti tekniċi u legali biex tiġbor u tittrasmetti d-data msemmija fl-Artikolu 18 tar-Regolamenti (UE) 2019/817 u (UE) 2019/818 u tkun innotifikathom lill-Kummissjoni. l-eu-LISA tkun iddikjarat it-tlestija b’suċċess ta’ test komprensiv tal-mekkaniżmi u l-proċeduri awtomatizzati għall-kontroll tal-kwalità tad-data, l-indikaturi komuni tal-kwalità tad-data u l-istandards minimi tal-kwalità tad-data, li hija tkun wettqet b’kooperazzjoni mal-awtoritajiet tal-Istati Membri.

(5)

Għalhekk huwa xieraq li tiġi ddeterminata d-data li fiha jibda jopera s-CIR.

(6)

Peress li r-Regolamenti (UE) 2019/817 u (UE) 2019/818 jibnu fuq l-acquis ta’ Schengen, f’konformità mal-Artikolu 4 tal-Protokoll Nru 22 dwar il-Pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka nnotifikat l-implimentazzjoni tar-Regolamenti (UE) 2019/817 u (UE) 2019/818 fil-liġi nazzjonali tagħha. Għalhekk, id-Danimarka hija marbuta b’din id-Deċiżjoni.

(7)

Din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen li fihom l-Irlanda mhix qed tieħu sehem f’konformità mal-Protokoll Nru 19 dwar l-acquis ta’ Schengen integrat fil-qafas tal-Unjoni Ewropea, anness mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea, u, suġġetta għall-applikazzjoni tal-Artikolu 4 ta’ dak il-Protokoll, l-Irlanda mhijiex marbuta biha jew suġġetta għall-applikazzjoni tagħha.

(8)

Fir-rigward tal-Iżlanda u tan-Norveġja, din id-Deċiżjoni tikkostitwixxi żvilupp fid-dispożizzjonijiet tal-acquis ta’ Schengen skont it-tifsira tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawn l-aħħar tnejn imsemmija mal-implimentazzjoni, l-applikazzjoni u l-iżvilupp tal-acquis (4) ta’ Schengen, li jaqgħu fil-qasam imsemmi fl-Artikolu 1, il-punt A, tad-Deċiżjoni tal-Kunsill 1999/437/KE (5).

(9)

Fir-rigward tal-Iżvizzera, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen, skont it-tifsira tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (6), li jaqgħu fil-qasam imsemmi fl-Artikolu 1, il-punt A, tad-Deċiżjoni 1999/437/KE, moqri flimkien mal-Artikolu 3 tad-Deċiżjoni tal-Kunsill 2008/146/KE (7).

(10)

Fir-rigward tal-Liechtenstein, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen skont it-tifsira tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis (8) ta’ Schengen, li jaqgħu fil-qasam imsemmi fl-Artikolu 1, il-punt A, tad-Deċiżjoni 1999/437/KE, moqri flimkien mal-Artikolu 3 tad-Deċiżjoni tal-Kunsill 2011/350/UE (9).

(11)

Fir-rigward ta’ Ċipru, din id-Deċiżjoni tikkostitwixxi att li jibni fuq l-acquis ta’ Schengen jew li b’xi mod ieħor huwa relatat miegħu fis-sens tal-Artikolu 3(1) tal-Att tal-Adeżjoni tal-2003,